ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܙܰܝܶܢ ܡܳܪܝ̱ ܦܰܓܪ̈ܰܝܢ ܒܩܰܕܝ̣ܫܘ̣ܬܳܐ: ܘܢܰܦ̈ܫܳܬܰܢ ܒܗܰܝܡܳܢܘ̣ܬܳܐ ܘܗܰܘ̈ܢܰܝܢ ܒܡܶܠܬܳܐ ܕܬܶܐܘܳܠܳܘܓܺܝܰܐ: ܘܗܰܒܠܰܢ ܕܰܒܕܰܟܝܘ̣ܬܳܐ ܕܚܘ̣̈ܫܳܒܶܐ ܢܰܟ̈ܦܶܐ ܘܒܰܡܨܰܠܠܘ̣ܬܳܐ ܕܚܘ̣̈ܫܳܒܶܐ ܟܢܝ̣̈ܟܶܐ: ܘܰܒܢܰܩܕܘ̣ܬܳܐ ܕܗܘ̣ܦ̈ܳܟܶܐ ܬܪ̈ܝ̣ܨܶܐ: ܢܶܫ̇ܬܘܶܐ ܠܡܶܬܩܰܪܳܒܘ̣ ܠܦܳܬܘ̣ܪܳܟ ܫܡܰܝܳܢܳܐ ܘܰܠܡܶܫܬܰܘܬܳܦܘ̣ ܒܦܰܓܪܳܟ ܘܰܕܡܳܟ ܡܫܰܟܢܳܢܳܐ ܕܠܳܐ ܡܳܝܘ̣ܬܘ̣ܬܳܐ: ܒܥܺܐܕܳܐ ܗܳܢܳܐ ܕܦܘ̣ܪܩܳܢܰܢ: ܘܰܒܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ: ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܩܰܒܠܳܢܳܐ ܕܕܶܒܚ̈ܶܐ ܘܡܳܪܳܐ ܕܟܘ̣ܡܪ̈ܶܐ: ܕܰܨܒܳܐ ܘܕܶܒܚܳܐ ܘܟܳܗܢܳܐ ܗܘ̣ ܗ̣ܘܳܐ: ܠܗܰܘ̇ ܡܫܰܡܠܝܳܢܳܐ ܕܛܘ̣̈ܦܣܶܐ ܘܰܡܚܰܬܡܳܢܳܐ ܕܐ̱ܪ̈ܳܙܶܐ ܕܰܒܪܰܡܫܳܐ ܗܳܢܳܐ ܫܰܡܠܝ̣ ܠܨܘ̣ܪܬܶܗ ܕܡܽܘ̣ܫܶܐ: ܘܗܘ̣ ܒܰܩܢܘ̣ܡܶܗ ܚܠܳܦ ܟܽܠ ܠܝܳܠܘ̣ܕܶܗ ܩܰܪܶܒ ܕܶܒܚܳܐ ܡܩܰܒܠܳܐ: ܠܳܟ ܕܘ̣ܡܳܪܳܐ ܘܠܳܐ ܡܶܬܒܰܨܝܳܢܳܐ ܕܦܰܓܪܶܗ ܥܰܠ ܦܳܬܘ̣ܪܳܐ ܟܰܕ ܚܰܝ ܦܰܠ̣ܶܓ ܒܐܝ̣ܕܰܘ̈ܗ̱ܝ: ܘܰܕܡܶܗ ܡܰܙܶܓ ܠܰܫܠܝ̣ܚܘ̣ܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܫܶܡܫܳܐ ܪܰܒܳܐ ܕܙܰܕܝ̣ܩܘ̣ܬܳܐ ܘܢܘ̣ܗܪܳܐ ܫܰܪܝ̣ܪܳܐ ܘܰܡܬܘ̣ܡܳܝܳܐ ܕܡ̣ܶܢ ܐܰܒܳܐ: ܕܰܠܟܽܠ ܒܰܪܢܳܫܳܐ ܕܐܳܬܶܐ ܠܥܳܠܡܳܐ ܡܰܢܗܰܪ: ܗܰܘ̇ ܕܡܳܠܶܐ ܠܟܽܠ ܡ̣ܶܢ ܢܘ̣ܗܪܳܐ ܕܝ̣ܕܰܥܬܶܗ: ܗܰܘ̇ ܕܰܒܪܰܡܫܶܗ ܕܥܳܠܡܳܐ ܕܢܰܚ̣ܬ ܒܰܒܣܰܪ ܐܰܝܟܰܢܳܐ ܕܰܠܒܶܪ̈ܝܳܬܳܐ ܕܰܒܛܘ̣ܥܝܰܝ ܚܶܫ̣ܟܰܬ݀ ܬܰܢ̣ܗܰܪ: ܗܰܘ̇ ܕܰܒܪܰܡܫܶܗ ܕܢܳܡܘ̣ܣܳܐ ܒܪܰܡܫܳܐ ܗܳܢܳܐ ܕܦܶܨܚܳܐ ܠܗܳܠܶܝܢ ܕܢܳܡܘ̣ܣܳܐ ܒܰܩܢܘ̣ܡܳܟ ܫܰܡܠܝ̣ܬ: ܘܢܘ̣ܗܪܳܐ ܕܰܣܒܰܪܬܳܐ ܕܚܰܝ̈ܶܐ ܐܰܕܢܰܚ̣ܬ: ܘܰܠܝܘ̣ܩܢܳܐ ܘܨܰܠܡܳܐ ܗܰܘ̇ ܕܰܒܪܰܡܫܶܗ ܠܡܽܘܫܶܐ ܒܡܶܨܪܶܝܢ ܐܶܬ̣ܬܨܝ̣ܪ ܛܘ̣ܦܣܳܢܳܐܝ̣ܬ: ܒܪܰܡܫܳܐ ܗܳܢܳܐ ܕܝ̣ܠܳܟ ܡ̇ܠܶܐ̣ ܢܘ̣ܗܪܳܐ ܠܦܘ̣ܫܳܩܳܐ ܚܰܬܝ̣ܬܳܐ ܐܰܝܬܝ̣ܬ: ܒܗܳܢܳܐ ܓܶܝܪ ܪܰܡܫܳܐ ܦܶܨܚܳܐ ܢܳܡܘ̣ܣܳܝܳܐ ܥܰܡ ܬܰܠܡܝ̣̈ܕܰܝܟ ܪܶܓܬܳܢܳܐܝ̣ܬ ܐܶܟܰܠ̣ܬ: ܐܰܢ̱ܬ ܕܐܝ̣ܬܰܝܟ ܦܶܨܚܳܐ ܕܰܠܟܽܠ ܡܰܦܨܰܚ ܐܰܢ̱ܬ ܒܙܝ̣ܘܳܐ ܦܨܝ̣ܚܳܐ ܕܐܰܠܳܗܘ̣ܬܳܟ: ܒܗܳܢܳܐ ܪܰܡܫܳܐ ܐܶܡܪܳܐ ܕܐ̱ܪ̈ܳܙܶܐ ܫܰܡܠܝ̣ܬ: ܘܰܠܗܳܢܳܐ ܥܰܡ ܒܰܝ̈ܬܳܝܶܐ ܕܝ̣ܠܳܟ ܒܰܡܪܳܪ̈ܶܐ ܛܥܶܡ̣ܬ: ܐܰܢ̱ܬ ܕܐܝ̣ܬܰܝܟ ܐܶܡܪܶܗ ܕܐܰܠܳܗܳܐ ܗܰܘ̇ ܕܫܳܩܶܠ ܚܛܝ̣ܬܶܗ ܕܥܳܠܡܳܐ ܟܽܠܶܗ ܘܠܘ̣ܩܒܰܠ ܟܳܣܳܐ ܡܰܪܝ̣ܪܳܐ ܕܡܰܘܬܳܐ ܐܰܦܰܝ̈ܟ ܣܳܡ̣ܬ: ܒܗܳܢܳܐ ܪܰܡܫܳܐ ܕܐܝ̣ܬܰܘܗ̱ܝ ܬܚܘ̣ܡܳܐ ܕܬܰܪ̈ܬܰܝܗܶܝܢ ܕܺܝܰܬܝ̣̈ܩܰܐܣ: ܠܥܰܬܝ̣̈ܩܳܬܳܐ ܐܰܥܒ̣ܰܪܬ ܘܰܒܚܰܕ̈ܬܳܬܳܐ ܫܰܪܝ̣ܬ: ܒܗܳܢܳܐ ܪܰܡܫܳܐ ܐܘ̣ܪܚܳܐ ܛܰܪܩܬܳܐ ܕܪܘ̣ܡܪܳܡܳܐ ܒܡܰܟܝ̣ܟܘ̣ܬܳܐ ܣܰܓܝ̣ܐܬܳܐ ܚܰܘܝ̣ܬ: ܟܰܕ ܠܪ̈ܶܓܠܶܐ ܕܬܰܠܡܝ̣̈ܕܰܝܟ ܩܰܕܝ̣̈ܫܶܐ ܐܰܫܝ̣ܓܬ ܘܰܒܣܶܕܘ̣ܢܳܐ ܗܰܘ̇ ܕܰܡ̇ܚܶܐ̣ ܒܚܰܨܰܝ̈ܟ ܪܶܚܡ̣ܰܬ݀ ܐ̱ܢܳܫܳܐܝ̣ܬ ܠܗܳܠܶܝܢ ܟܰܦ̣ܰܪܬ ܘܫܰܘܝ̣ܬ: ܘܰܒܗܳܠܶܝܢ ܛܘ̣ܦܣܳܐ ܫܰܦܝ̣ܪܳܐ ܠܗܽܘܢ ܐܰܓܥܶܠ̣ܬ ܘܝܰܗ̣ܒܬ ܘܢܝ̣ܚܘ̣ܬܳܐ ܡܫܰܝܰܢܬܳܐ ܐܰܠܶܦ̣ܬ ܠܗܽܘܢ: ܒܗܳܢܳܐ ܪܰܡܫܳܐ ܦܰܓܪܳܟ ܡܰܚܝܳܢܳܐ ܒܐܝ̣ܕܰܝ̈ܟ ܩܰܕܝ̣̈ܫܳܬܳܐ ܠܰܒܢܰܝ̈ ܐ̱ܪܳܙܳܟ ܦܰܠ̣ܶܓܬ ܘܐܰܘܟܶܠ̣ܬ: ܘܰܕܡܳܟ ܡܳܪܳܢܳܝܳܐ ܠܗܽܘܢ ܡܰܙܶܓ݂ܬ ܘܐܰܫܩܝ̣ܬ: ܘܒܶܗ ܕܺܝܰܬܝ̣ܩܝ̣ ܚ̇ܕܰܬܳܐ ܠܰܡܟܝ̣ܪܬܳܟ ܥܺܕܬܳܐ ܩܰܕܝ̣ܫܬܳܐ ܫܰܪܰܪܬ: ܒܗܳܢܳܐ ܪܰܡܫܳܐ ܒܠܰܚܡܳܐ ܨܒܝ̣ܥܳܐ ܠܝܘ̣ܕܳܐ ܢܟܝ̣ܠܳܐ ܦܰܪܣܝ̣ܬ: ܘܰܠܬܰܠ̈ܡܝ̣ܕܶܐ ܬܰܡܝ̣̈ܡܶܐ ܥܰܠ ܓܘ̣ܡܕܳܢܘ̣ܬܶܗ ܓܠ̣ܰܝܬ: ܒܗܳܢܳܐ ܪܰܡܫܳܐ ܠܚܰܝ̈ܘܳܬܳܐ ܚܰܪ̈ܫܳܬܳܐ ܡ̣ܶܢ ܣܰܟܝ̣ܢܳܐ ܕܕܶܒܚ̈ܶܐ ܚܣ̣ܰܟܬ ܒܢܶܟܣܬܳܐ ܚܰܝܬܳܐ ܕܰܩܢܘ̣ܡܳܟ: ܒܗܳܢܳܐ ܪܰܡܫܳܐ ܠܛܶܠܳܢܝ̈ܳܬܳܐ ܘܛܘ̣̈ܦܣܶܐ ܫܰܬ̣ܶܩܬ: ܘܠܰܫܪܳܪܳܐ ܓܰܠܝܳܐ ܕܠܳܐ ܬܰܚܦܝ̣ܬܳܐ ܩܕܳܡܰܝܢ ܣܳܡ̣ܬ: ܒܗܳܢܳܐ ܪܰܡܫܳܐ ܠܶܘܺܝ̣ ܐܰܪܚ̣ܶܩ ܡ̣ܶܢ ܬܶܫܡܶܫܬܶܗ ܘܐܰܗܪܽܘܢ ܐܶܬ̣ܬܢܝ̣ܚ ܡ̣ܶܢ ܕܶܒܚܰܘ̈ܗ̱ܝ ܫܰܠ̈ܡܶܐ: ܒܗܳܢܳܐ ܪܰܡܫܳܐ ܐܰܓܥܶܠ̣ܬ ܟܳܗܢܘ̣ܬܳܐ ܠܓܘ̣ܕܳܐ ܢܰܨܝ̣ܚܬܳܐ ܕܒܶܝܬ ܫܶܡܥܽܘܢ ܘܥܰܠ̣ܘ̱ ܘܩܳܡ̣ܘ̱ ܥܰܠ ܓܰܙܶܝ̈ܗ̇ ܕܐܰܠܳܗܘ̣ܬܳܐ ܠܰܡܦܰܠܳܓܘ̣ ܠܦܰܓܪܳܟ ܚܰܝܳܐ ܠܥܰܡ̱̈ܡܶܐ ܕܰܐܪܥܳܐ: ܘܰܠܡܰܫܩܳܝܘ̣ ܕܡܳܟ ܙܰܟܳܝܳܐ ܠܛܘ̣̈ܗܡܶܐ ܘܰܠܫܰܪ̈ܒܳܬܳܐ: ܘܗܳܐ ܝܰܘܡܳܢܳܐ ܒܶܗ ܟܰܕ ܒܶܗ ܒܗܳܢܳܐ ܪܰܡܫܳܐ ܡܶܬܝ̣ܗܶܒ ܠܫܘ̣ܒܩܳܢ ܚܰܘ̈ܒܶܐ ܘܰܚ̈ܛܳܗܶܐ ܒܟܽܠܗܽܘܢ ܣܰܘ̈ܦܶܐ ܘܦܶܢܝ̈ܳܬܳܐ ܐܰܝܟ ܦܘ̣ܩܕܳܢܳܐ ܡܳܪܳܢܳܝܳܐ: ܡܶܛܽܠ ܗܳܕܶܐ ܡܦܝ̣ܣܝ̣ܢܰܢ ܠܳܟ ܡܫܝ̣ܚܳܐ ܡܳܪܰܢ ܒܶܗ ܒܪܰܡܫܳܐ ܗܳܢܳܐ ܡ̇ܠܶܐ̣ ܢܘ̣ܗܪܳܐ ܕܒܶܗ ܢܳܡܘ̣ܣܳܐ ܛܶܠܳܢܳܝܳܐ ܐܰܪܡ̣ܶܫ ܘܰܠܡܶܬ̣ܥܰܠܳܝܘ̣ ܡ̣ܶܢ ܡܨܰܥܬܳܐ ܐܰܫܩ̣ܶܠ: ܕܢܶܗ̣ܘܶܐ ܐܰܬܪܳܐ ܠܰܣܒܰܪܬܳܐ ܚ̇ܕܰܬܳܐ ܘܢܰܗܝ̣ܪܬܳܐ ܕܐܶܘܰܢܓܶܠܝܽܘܢ ܕܰܫܪܳܪܳܐ ܠܰܡܗܰܠܳܟܘ̣: ܐܰܫܘܳܐ ܠܡܶܫ̣ܬܰܘܬܳܦܘ̣ ܒܦܳܬܘ̣ܪܳܐ ܐܰܠܳܗܳܝܳܐ ܕܙܰܘܥܬܳܐ ܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ: ܟܰܕ ܡܚܰܪܪܝ̣ܢܰܢ ܡ̣ܶܢ ܡܰܪܝ̣ܪܘ̣ܬܳܐ ܘܪܘ̣ܓܙܳܐ ܘܰܚܣܳܡܳܐ: ܘܰܫ̇ܦܶܝܢ̣ ܚܘ̣̈ܫܳܒܰܝܢ ܡ̣ܶܢ ܕܠܘ̣ܚܝܳܐ ܕܰܐܟܬܳܢܘ̣ܬܳܐ ܘܰܢܟܝ̣ܠܘ̣ܬܳܐ ܣܟܰܪܝܘ̣ܛܳܝܬܳܐ: ܘܰܡܪ̈ܝ̣ܩܳܢ ܬܺܐܪ̈ܳܬܰܢ ܒܰܫܝܳܓܬܳܐ ܡܚܰܠܠܳܢܝ̣ܬܳܐ ܕܰܬܘܳܬܳܐ ܡܩܰܠܰܣܬܳܐ ܕܥܰܠ ܚܰܘ̈ܒܶܐ ܘܰܚ̈ܛܳܗܶܐ: ܘܐܰܣܝ̣ܪ̈ܳܢ ܢܰܦ̈ܫܳܬܰܢ ܒܪܶܚܡܬܳܟ ܐܰܠܳܗܳܝ̇ܬܳܐ: ܘܚܘ̣ܒܳܐ ܕܰܠܘܳܬ ܚ̈ܕܳܕܶܐ: ܘܢܰܗܝ̣ܪܝ̣ܢ ܗܰܘ̈ܢܰܝܢ ܒܨܶܡ̈ܚܶܐ ܘܙܰܠ̈ܓܶܐ ܕܝܘ̣ܠ̈ܦܳܢܰܝܟ ܐܰܠܳܗ̈ܳܝܶܐ: ܐܰܝܟܰܢܳܐ ܕܠܳܐ ܠܚܘ̣ܝܳܒܳܐ ܘܩܘ̣ܛܪܳܓܳܐ ܘܰܡܣܳܡ ܒܪܝ̣ܫܳܐ ܢ̣ܶܗܘܽܘܢ ܠܰܢ ܐ̱ܪ̈ܳܙܰܝܟ ܡܰܚ̈ܝܳܢܶܐ ܐܠܳܐ ܠܚܘ̣ܣܳܝܳܐ ܕܚܰܘ̈ܒܶܐ ܘܰܠܫܘ̣ܒܩܳܢܳܐ ܕܰܚ̈ܛܳܗܶܐ: ܘܠܰܡܪܝ̣ܩܘ̣ܬܳܐ ܕܢܰܦ̈ܫܳܬܳܐ ܘܰܕܦܰܓܪ̈ܶܐ ܡ̣ܶܢ ܟܽܠ ܫܥܝ̣̈ܢܶܐ ܣܝ̈ܳܢܳܝܶܐ: ܘܰܠܡܶܬܥܰܠܝܳܢܘ̣ܬܳܐ ܕܗܰܘ̈ܢܶܐ ܨܶܝܕ ܣܘ̣̈ܟܳܠܶܐ ܪ̈ܳܡܶܐ ܘܰܫܡܰܝ̈ܳܢܶܐ: ܘܰܒܙܰܠ̈ܓܶܐ ܘܨܶܡ̈ܚܶܐ ܐܰܠܳܗ̈ܳܝܶܐ ܠܡܶܬܬܰܒܪܳܩܘ̣ ܐܰܝܟܰܢܳܐ ܕܟܰܕ ܡܩܰܘ̈ܝܳܢܶܐ ܐܰܡܝ̣̈ܢܶܐ ܕܒܳܟ ܢܶܗ̇ܘܶܐ ܘܰܐܢ̱ܬ ܒܰܢ ܓܡܝ̣ܪ̈ܶܐ ܠܚܰܕ ܐܰܒܘ̣ܟ ܢܶܗ̇ܘܶܐ ܟܽܠܳܢܳܐܝ̣ܬ: ܘܐܰܡܝ̣ܢܳܐܝ̣ܬ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܠܳܟ ܩܰܪܶܒ̣ܢܰܢ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܟܰܕ ܫܳܐܠܝ̣ܢܰܢ ܡ̣ܶܢ ܡܪܰܚܡܳܢܘ̣ܬܳܟ ܕܬܰܫ̣ܘܶܐ ܠܰܢ ܕܕܰܟܝܳܐܝ̣ܬ ܢ̇ܥܰܕܥܶܕ ܠܳܟ ܥܺܐܕܳܐ ܗܳܢܳܐ ܕܫܘ̣ܠܳܡ ܥܰܬܝ̣ܩܬܳܐ ܘܰܕܫܘ̣ܪܳܝ ܚ̇ܕܰܬܳܐ: ܘܢ̣ܶܬܡܰܙܰܓ ܦܰܓܪܳܟ ܩܰܕܝ̣ܫܳܐ ܘܰܕܡܳܟ ܙܰܟܳܝܳܐ ܒܢܰܦ̈ܫܳܬܰܢ: ܘܢܶܗ̣ܘܶܐ ܠܚܘ̣ܣܳܝܳܐ ܕܟܽܠܗܶܝܢ ܡܶܬܥܰܒܪ̈ܳܢܘܳܬܰܢ: ܘܠܰܢܝܳܚܳܐ ܕܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ: ܘܰܚܢܰܢ ܘܗ̣ܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀