ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܪܳܡܳܐ ܘܰܡܥܰܠܝܳܐ ܒܐܝ̣ܬܘ̣ܬܶܗ ܕܰܥܕܰܡܳܐ ܠܣܳܟܳܐ ܕܡܰܟܝ̣ܟܘ̣ܬܳܐ ܬܰܚ̣ܬܝ̣ ܪܰܒܘ̣ܬܶܗ: ܠܗܰܘ̇ ܚܰܝܠܳܐ ܕܚܝ̣ܠܳܐ ܘܥܰܙܝ̣ܙܳܐ ܘܰܫܒܝ̣ܚܳܐ ܒܟܰܣܝܘ̣ܬܶܗ ܕܐܘ̣ܪܚܳܐ ܚܰܬܝ̣ܬܬܳܐ ܕܪܘ̣ܡܪܳܡܳܐ ܚ̣ܰܘܝ̣ ܡܰܟܝ̣ܟܘ̣ܬܶܗ ܒܓܰܠܝܘ̣ܬܶܗ: ܠܗܰܘ̇ ܕܰܡܫܰܡ̈ܫܳܢܰܘܗ̱ܝ ܢܘ̣ܪ̈ܳܢܳܝܶܐ ܚܦܝ̣ܛܝ̣ܢ ܥܰܠ ܬܶܫܡܶܫܬܶܗ: ܘܠܰܡܫܰܡ̈ܫܳܢܰܘܗ̱ܝ ܥܰܦܪ̈ܳܢܶܐ ܒܥܘ̣ܡܩܳܐ ܥܒܝ̣ܕ ܡܫܰܡܫܳܢܳܐ ܒܛܰܝܒܘ̣ܬܶܗ: ܠܗܰܘ̇ ܕܥܶܠܳܝ̈ܶܐ ܒܪܶܥܠܳܐ ܪܳܐܬܝ̣ܢ ܡܶܢ ܬܶܫܒܘ̣ܚܬܶܗ: ܘܒܶܝܬ ܬܰܚ̈ܬܳܝܶܐ ܡܰܟܝ̣ܟ ܘܰܚܦܝ̣ܛ ܥܰܠ ܬܶܫܡܶܫܬܳܐ ܕܬܰܠ̈ܡܝ̣ܕܶܐ: ܠܗܰܘ̇ ܕܠܳܐ ܐܶܬ̣ܳܐ ܠܰܒܪܝ̣ܬܳܐ ܕܢܶܫ̣ܬܰܡܰܫ ܐܶܠܳܐ ܕܰܢܰܫ̣ܡܶܫ: ܘܰܠܡ̣ܶܬܰܠ ܢܰܦܫܶܗ ܦܘ̣ܪܩܳܢܳܐ ܚܠܳܦ ܣܰܓܺܝ̈ܶܐܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܰܬܠܳܬܫܳܥܝ̣̈ܢ: ܘܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܡܶܠܬܳܐ ܗܰܘ̇ ܡܬܘ̣ܡܳܝܳܐ: ܘܕܰܠܥܶܠ ܡܶܢ ܙܰܒܢܳܐ ܗܘ̣ ܫ̇ܘܶܐ̣ ܒܐܘ̣ܣܺܝܰܐ ܠܰܐܒܳܐ ܘܰܠܪܘ̣ܚܳܐ ܩܰܕܝ̣ܫܳܐ ܒܫܰܘܝܘ̣ܬ ܨܶܒܝܳܢܳܐ ܕܐܰܠܳܗܘ̣ܬܳܟ ܬܚܶܝܬ ܙܰܒ̈ܢܶܐ ܗ̣ܘܰܝܬ ܒܰܕܡܘ̣ܬܳܐ ܕܒܰܪܢܳܫܳܐ: ܘܒܰܫܦܝ̣ܥܘ̣ܬ ܪ̈ܰܚܡܶܐ ܕܝ̣ܠܳܟ ܒܟܽܠܡܶܕܶܡ ܠܰܢ ܐܶܬ̣ܕܰܡܝ̣ܬ ܣܛܰܪ ܡܶܢ ܚܛܝ̣ܬܳܐ: ܘܟܽܠܳܗ̇ ܡܰܪܕܝ̣ܬܳܐ ܕܰܟܝܳܢܳܐ ܕܝ̣ܠܰܢ ܫܰܡܠܝ̣ܬ: ܘܟܰܕ ܠܘܳܬ ܫܘ̣ܠܳܡ ܡܕܰܒܪܳܢܘ̣ܬܳܐ ܡܰܢ̣ܰܥܬ: ܨܒ̣ܰܝܬ ܕܰܒܝܰܕ ܚܰܫ̈ܶܐ ܕܝ̣ܠܳܟ ܟܝܳܢܳܝ̈ܶܐ ܘܫܰܪܝ̣ܪ̈ܶܐ ܘܠܳܐ ܥܕܝ̣̈ܠܶܐ ܚܰܫ̈ܶܐ ܕܝ̣ܠܰܢ ܬ̣ܶܣܰܒ ܘܡܶܢ ܗܳܠܶܝܢ ܠܰܢ ܬܚ̣ܰܪܰܪ: ܘܒܐܝ̣̈ܕܰܝܗܽܘܢ ܠܘܳܬ ܡܰܘܬܳܐ ܕܰܙܩܝ̣ܦܳܐ ܬ̣ܺܐܬܶܐ: ܐܰܝܟܰܢܳܐ ܕܒܶܗ ܬܡܝ̣ܬ ܠܰܚܛܝ̣ܬܳܐ ܘܰܠܡܰܘܬܳܐ: ܘܐܶܨܛܒܰܝܬ ܒܪܶܚܡܰܬ݀ ܐ̱ܢܳܫܘ̣ܬܳܟ ܕܛܘ̣ܦܣܳܐ ܕܡܘ̣ܟܳܟܳܟ ܗܰܘ̇ ܕܰܠܥܶܠ ܡܶܢ ܡܰܘܬܳܐ ܠܰܢ ܬܰܫ̣ܠܶܡ: ܒܝܰܕ ܬܰܠ̈ܡܝ̣ܕܶܐ ܕܝ̣ܠܳܟ ܫܰܪܝ̣ܪ̈ܶܐ ܘܰܐܝܟ ܒܰܪܢܳܫܳܐ ܫܝ̣ܛܳܐ ܫܩܰܠ̣ܬ ܣܶܕܘ̣ܢܳܐ ܒܚܰܨܰܝ̈ܟ ܘܪ̈ܶܓܠܶܐ ܕܝ̣ܠܗܽܘܢ ܐܰܫܝ̣ܓܬ: ܘܐ̱ܪܳܙܳܐ ܕܚܘ̣ܒܳܐ ܝܰܬܝ̣ܪ ܢܰܗܝ̣ܪܳܐܝ̣ܬ ܐܶܬܝ̣ܗܶܒ ܠܰܢ ܡܶܢܳܟ ܓܘ̣ܥܠܳܢܳܐ: ܘܥܰܠ ܐܰܦܰܝ̈ ܗܳܢܳܐ ܥܘ̣ܬܪܳܐ ܕܛܰܝܒܘ̣ܬܳܟ ܦܺܐܪ̈ܶܐ ܕܬܶܫܒܘ̣ܚܬܳܐ ܘܬܰܘܕܝ̣ܬܳܐ ܘܰܕܩܘ̣ܒܳܠܛܰܝܒܘ̣ܬܳܐ ܕܠܳܟ ܡܢܝ̣ܚܝ̣ܢ ܢܶܫ̇ܬܘܶܐ ܕܰܢ̇ܩܰܪܶܒ ܠܛܰܝܒܘ̣ܬܳܟ: ܟܰܕ ܒܳܥܶܝܢܰܢ ܡܶܢܳܟ ܡܳܪܰܢ ܕܬܰܫ̣ܘܶܐ ܠܰܢ ܕܰܡܫܰܡܠܝܳܐܝ̣ܬ ܢ̣ܶܬܩܰܒܰܥ ܒܢܰܦ̈ܫܳܬܰܢ ܝܘ̣ܩܢܳܐ ܕܐ̱ܪ̈ܳܙܰܝܟ: ܘܰܒܬܰܪܥܝ̣ܬܳܐ ܡܡܰܟܰܟ݂ܬܳܐ ܢܫܰܡ̇ܠܶܐ ܦܘ̣ܩ̈ܕܳܢܶܐ ܕܝ̣ܠܳܟ ܦܳܪ̈ܘ̣ܩܳܝܶܐ: ܐܰܝܟܰܢܳܐ ܕܟܰܕ ܒܥܶܩ̈ܒܳܬܳܐ ܕܡܰܠܦܳܢܘ̣ܬܳܐ ܕܝ̣ܠܳܟ ܪܳܕܶܝܢܰܢ: ܢ̇ܫܝ̣ܓ ܐܳܦ ܚܢܰܢ ܪ̈ܶܓܠܶܐ ܕܰܚ̈ܕܳܕܶܐ ܘܰܒܬܰܟܫ̈ܦܳܬܳܐ ܡܶܬ̣ܚܰܢܢܝ̣ܢܰܢ ܠܒܰܣܝ̣ܡܘ̣ܬܳܟ ܕܥܰܡ ܫܝܳܓܬܳܐ ܕܪ̈ܶܓܠܶܐ ܕܝ̣ܠܰܢ ܒܶܣܪ̈ܳܢܳܝܳܬܳܐ ܬܰܫܝ̣ܓ ܘܬܶܡ̣ܪܘ̣ܩ ܟܽܠܶܗ ܪܶܗܛܳܐ ܕܒܝ̣̈ܫܳܬܳܐ ܕܝ̣ܠܰܢ: ܗܳܠܶܝܢ ܕܰܒܙܰܘ̈ܥܶܐ ܟܣܰܝ̈ܳܐ ܘܰܓܠܰܝ̈ܳܐ ܒܰܢ ܐܶܫ̣ܬܰܡܰܫܘ̱: ܡ̣ܶܢ ܡܰܥܒܕܳܢܘ̣ܬܳܐ ܕܰܒܥܶܠ̈ܕܒܳܒܶܐ ܡܶܬܝ̈ܰܕܥܳܢܶܐ: ܘܫܰܟܶܢ ܠܰܢ ܕܢ̇ܶܬܓܡܰܪ ܒܬܰܠܡܝ̣ܕܘ̣ܬܳܟ ܫܰܪܝ̣ܪܬܳܐ: ܐܰܝܟܰܢܳܐ ܕܡܰܠܝܳܐܝ̣ܬ ܡܶܬܚܰܪܪܝ̣ܢ ܥܶܩܒܰܝ̈ܢ ܘܡܶܬܕܰܟ̈ܝܳܢ ܡ̣ܶܢ ܢܘ̣ܟ̈ܬܳܬܳܐ ܘܫܘ̣̈ܡܳܬܳܐ ܕܬܰܢܝ̣ܢܳܐ ܡܶܬܝܰܕܥܳܢܳܐ: ܘܰܠܒܝ̣ܒܳܐܝ̣ܬ ܘܚܰܝܠܬܳܢܳܐܝ̣ܬ ܥܠܰܘܗ̱ܝ ܢ̇ܕܰܝܶܫ ܘܥܰܠ ܟܽܠܶܗ ܚܰܝܠܶܗ: ܒܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ ܘܰܒܦܘ̣̈ܩܕܳܢܶܐ ܐܘܰܢ̈ܓܶܠܳܝܶܐ: ܘܰܒܫܘ̣ܡܠܳܝܳܐ ܕܚܘ̣ܒܳܐ ܘܰܫܠܳܡܳܐ ܘܫܰܝܢܳܐ ܗܰܘ̇ ܕܰܠܬܰܠ̈ܡܝ̣ܕܶܐ ܕܝ̣ܠܳܟ ܫܒܰܩ̣ܬ ܢ̇ܶܬܚܰܙܰܩ: ܘܥܰܡܗܽܘܢ ܢ̇ܡܰܢܰܥ ܠܝܳܪܬܘ̣ܬܳܐ ܕܛܘ̣ܒܬܳܢܘ̣ܬܳܐ ܕܬܰܡܳܢ ܗܳܝ̇ ܕܰܠܗܳܢܽܘܢ ܢܛܝ̣ܪܳܐ ܘܰܡܛܰܝܒܳܐ ܒܝܰܕ ܬܰܟܫ̈ܦܳܬܳܐ ܕܝ̣ܠܗܽܘܢ ܩܰܕܝ̣̈ܫܳܬܳܐ: ܘܥܰܡܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܬܶܫܒܘ̣ܚܬܳܐ ܘܐܝ̣ܩܳܪܳܐ ܘܣܶܓܕܬܳܐ ܢ̇ܰܣܶܩ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܪܳܡܳܐ ܕܐܶܬ̣ܡܰܟܰܟ ܕܰܠܡ̈ܳܟܶܐ ܢ̣ܶܬܶܠ ܛܘ̣ܦܣܳܐ ܫܰܦܝ̣ܪܳܐ ܒܰܩܢܘ̣ܡܶܗ: ܩܰܒܶܠܳܝܗ̱ܝ ܡܳܪܝ̱ ܠܦܝ̣ܪܡܳܐ ܗܳܢܳܐ ܕܰܡܩܰܪܒܝ̣ܢܰܢ ܩܕܳܡܰܝܟ ܒܥܶܕܳܢܳܐ ܗܳܢܳܐ: ܘܐܰܫܘܳܐ ܠܰܢ ܕܰܢ̇ܫܝ̣ܓ ܠܨܳܐܬܳܐ ܟܣܝ̣ܬܳܐ ܕܰܚܛܝ̣ܬܳܐ ܡ̣ܶܢ ܗܰܕܳܡ̈ܶܐ ܟܰܣ̈ܝܳܬܳܐ ܕܢܰܦ̈ܫܳܬܰܢ ܘܢܶܗ̇ܘܶܐ ܕܟܰܝ̈ܳܐ ܘܰܕܠܳܐ ܡܘ̣ܡ: ܘܢܶܫ̇ܬܘܶܐ ܘܢܶܚ̇ܕܶܐ ܒܰܩܝܳܡܬܳܟ ܡܫܰܒܰܚܬܳܐ ܘܰܢ̇ܙܰܡܰܪ ܠܳܟ ܬܶܫܒ̈ܚܳܬܳܐ ܕܰܟܝ̈ܳܬܳܐ ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀