ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܚܰܠܶܛ ܡܳܪܝ̱ ܩ̈ܳܠܶܐ ܕܬܶܫ̈ܒܚܳܬܰܢ ܘܰܙܡܝܪ̈ܳܬܳܐ ܕܗܰܘ̈ܢܰܝܢ: ܒܥܶܕܳܢܳܐ ܗܳܢܳܐ ܕܨܰܦܪܳܐ ܥܰܡ ܟܶܢܫ̈ܶܐ ܕܰܫܡܰܝ̈ܳܢܶܐ ܒܥܺܕܬܳܐ ܗܳܝ ܐܘ̣ܪܫܠܶܡܳܝܬܳܐ: ܐܰܝܟܰܢܳܐ ܕܰܒܨܰܦܪܳܐ ܗܰܘ̇ ܡܶܬܝܰܕܥܳܢܳܐ ܘܰܕܪܰܡܫܳܐ ܠܰܝܬ ܠܶܗ: ܥܰܡܗܽܘܢ ܘܰܒܝܢܳܬܗܽܘܢ ܕܰܟܝܳܐܝ̣ܬ ܘܩܰܕܝܫܳܐܝ̣ܬ ܢ̇ܫܰܒܚܳܟ ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܰܬܠܝ̣ܬܳܝܘ̣ܬܳܐ ܡܪܰܝܰܡܬܳܐ ܡܬܘ̣ܡܳܝܬܳܐ ܘܰܡܫܰܒܰܚܬܳܐ: ܗܳܝ ܕܰܠܪܝ̣ܫ ܐܰܒ̈ܳܗܳܬܳܐ ܪܳܚܶܡ ܐܰܟܣ̈ܢܳܝܶܐ ܐܰܒܪܳܗܳܡ ܒܰܕܡܘ̣ܬ ܡܰܠܰܐܟ̈ܶܐ ܐܶܬ̣ܓܰܠܝܰܬ݀ ܘܕܰܚܕܳܐ ܗ̱ܝ ܐܰܠܳܗܘ̣ܬܳܐ ܒܰܬܠܳܬܳܐ ܩܢܘ̣ܡ̈ܝܢ ܒܰܕܶܩ̣ܬ: ܠܝܰܥܩܽܘܒ ܕܶܝܢ ܒܐ̱ܪܳܙܳܐ ܕܣܶܒܶܠܬܳܐ ܐܶܬ̣ܚܰܘܺܝ̣ܬ: ܕܒܳܗܿ ܡܰܠܰܐܟ̈ܶܐ ܣܳܠ̇ܩܝ̣ܢ ܘܢܳܚ̇ܬܝ̣ܢ: ܘܒܰܝܬܳܐ ܕܰܐܠܳܗܳܐ ܕܘ̣ܟܬܳܐ ܗܳܝ ܡܶܢܶܗ ܐܶܫܬܰܡ̣ܗܰܬ݀ : ܗܳܝ ܕܡܶܢܶܗ ܗ̱ܝ̣ ܟܽܠ ܡܰܘܗܰܒܬܳܐ ܛܳܒܬܳܐ: ܘܗܝ̣ ܗ̱ܝ̣ ܥܶܠܬܳܐ ܕܟܽܠܗܶܝܢ ܫܰܦܝ̣ܪ̈ܳܬܳܐ: ܕܝܳܗ̇ܒܳܐ ܦܘ̣ܪ̈ܥܳܢܶܐ ܛܳܒ̈ܶܐ ܠܣܳܥܪ̈ܰܝ ܛܳܒ̈ܳܬܳܐ: ܘܰܡܡܰܠܝܳܐ ܚܰܣܝܪ̈ܳܬܳܐ ܕܰܣܢܝ̈ܩܶܐ ܒܰܫܦܝܥܘ̣ܬܳܐ ܕܠܶܗ ܢ̇ܰܘܕܶܐ ܘܰܢ̇ܫܰܒܰܚ ܘܰܢ̇ܪܰܡܪܶܡ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܕܒܰܫܦܝ̣ܥܘ̣ܬܳܐ ܕܛܳܒܘ̣ܬܳܐ: ܕܝ̣ܠܳܟ ܠܰܫܦܝ̣ܥܘ̣ܬܳܐ ܕܒܝ̣̈ܫܳܬܳܐ ܕܝ̣ܠܰܢ ܙܳܟܶܐ ܐܰܢ̱ܬ: ܘܰܒܪܰܒܘ̣ܬܳܐ ܕܰܚܢܳܢܳܐ ܕܝ̣ܠܳܟ: ܠܪܰܒܘ̣ܬܳܐ ܕܣܰܟ̈ܠܘܳܬܳܐ ܕܝ̣ܠܰܢ ܡܚܰܦܶܐ ܐܰܢ̱ܬ: ܐܰܢ̱ܬ ܐܳܦ ܗܳܫܳܐ ܡܳܪܝܳܐ ܟܰܕ ܒܣܰܓܺܝܽܐܘ̣ܬܳܐ ܕܥܰܘ̈ܠܶܐ ܕܝ̣ܠܰܢ ܡܰܗܡܶܐ ܐܰܢ̱ܬ: ܘܰܠܘܳܬ ܪ̈ܰܚܡܶܐ ܘܪܶܚܡܰܬ݀ ܐ̱ܢܳܫܘ̣ܬܳܐ ܠܰܢ ܡܶܬܪܟܶܢ ܐܰܢ̱ܬ: ܐܰܛܶܐܒ ܘܰܐܩܝ̣ܡ ܒܫܰܦܝܪܘ̣ܬ ܨܶܒܝܳܢܳܐ ܕܝ̣ܠܳܟ ܠܥܺܕܬܳܟ ܩܰܬܘ̣ܠܝ̣ܩܝ̣ ܘܰܫܠܝ̣ܚܳܝܬܳܐ ܕܰܒܟܽܠ ܐܰܬܰܪ: ܘܰܠܫܘ̣ܪ̈ܶܐ ܕܨܶܗܝܽܘܢ ܡܶܬܝܰܕܥܳܢܝ̣ܬܳܐ ܕܝ̣ܠܳܟ ܒܢܝ̣ ܘܪܰܡܪܶܡ: ܘܟܰܕ ܠܒܳܥ̈ܘܳܬܳܐ ܕܝ̣ܠܰܢ ܘܰܠܩܘ̣ܪ̈ܒܳܢܶܐ ܡܩܰܒܶܠ ܐܰܢ̱ܬ: ܚܘ̣ܪ ܒܰܢ ܒܪ̈ܰܚܡܶܐ ܘܒܰܚܢܳܢܳܐ ܘܰܒܟܽܠܗܽܘܢ ܐܰܚ̈ܰܝܢ ܡܗܰܝ̈ܡܢܶܐ ܕܗܳܪܟܳܐ ܘܕܰܒܟܽܠܕܘ̣ܟ ܕܰܦܩ̣ܰܕܘ̱ ܠܰܢ ܕܢ̇ܶܬܕܟܰܪ ܐܶܢܽܘܢ ܒܰܨܠܰܘ̈ܳܬܳܐ ܘܬܰܟܫ̈ܦܳܬܳܐ ܕܰܠܘܳܬܳܟ ܐܰܠܳܗܳܐ ܕܝ̣ܠܰܢ: ܝܰܬܝ̣ܪܳܐܝ̣ܬ ܕܶܝܢ ܒܰܟܢܘ̣ܫܝܳܐ ܕܥܰܒ̈ܕܰܝܟ ܗܳܠܶܝܢ ܕܰܩܕܳܡ ܪܰܒܘ̣ܬܳܟ ܪܟܝ̣ܢܝ̣ܢ: ܘܒܰܪܶܟ ܐܶܢܽܘܢ ܒܒܘ̣ܪܟܬܳܐ ܕܰܫܡܰܝܳܐ ܡ̣ܶܢ ܠܥܶܠ ܕܛܘ̣ܒܬܳܢܘ̣ܬܳܐ ܕܚܰܝ̈ܶܐ ܠܳܐ ܡܶܬܚܰܒ̈ܠܳܢܶܐ ܘܰܕܠܳܐ ܥܳܩܬܳܐ: ܘܰܒܒܘ̣ܪ̈ܟܳܬܳܐ ܕܰܐܪܥܳܐ ܠܬܰܚܬ ܘܕܰܡܫܰܪܬܚܘ̣ܬܳܐ ܘܰܕܗܰܝܡܳܢܘ̣ܬܳܐ ܕܟܽܠ ܡܦܰܬܟܘ̣ܬ ܦܐܪ̈ܶܐ ܡܩܰܝ̈ܡܳܢܶܐ ܕܚܰܝ̈ܶܐ ܗܳܠܶܝܢ ܙܰܒ̈ܢܳܝܶܐ ܩܰܢܝܳܐ ܣܡܘ̣ܟ ܕܶܝܢ ܠܟܽܠ ܒܰܝܬܳܝܘ̣ܬܳܐ ܪܚܝ̣ܡܬܳܐ ܘܰܐ̱ܚܝܳܢܳܝܬܳܐ ܕܝܠܗܽܘܢ ܢܰܛܰܪ ܠܟܽܠ ܡܰܘܥܝ̣ܬܳܐ ܓܶܢܣܳܢܳܝܬܳܐ: ܘܒܰܪ̱ܬ ܥܝܳܕܳܐ ܕܝ̣ܠܗܽܘܢ ܘܰܗܘܝ̣ ܩܳܝܘ̣ܡܳܐ ܘܝܳܨܽܘ̣ܦܳܐ ܠܗܳܠܶܝܢ ܕܰܒܛܰܠܝܘ̣ܬܳܐ ܘܰܠܗܳܠܶܝܢ ܕܰܒܥܘ̣ܙܳܐ ܕܩܰܘܡܬܳܐ: ܠܗܳܠܶܝܢ ܕܒܰܡܨܰܥܬܳܐ ܕܰܫܢܰܝ̈ܳܐ ܠܗܳܠܶܝܢ ܕܰܒܣܰܝܒܘ̣ܬܳܐ: ܠܗܳܠܶܝܢ ܕܒܰܡܚܝ̣ܠܘ̣ܬܳܐ: ܠܗܳܠܶܝܢ ܕܰܒܡܶܣܟܺܢܘ̣ܬܳܐ: ܠܗܳܠܶܝܢ ܕܒܰܡܫܰܪܬܚܘ̣ܬܳܐ: ܠܗܳܠܶܝܢ ܕܰܒܕܘ̣ܒܪ̈ܶܐ ܕܚܺܐܪܘ̣ܬܳܐ ܠܗܳܠܶܝܢ ܕܰܬܚܶܝܬ ܢܝ̣ܪܳܐ ܕܥܰܒܕܘ̣ܬܳܐ: ܠܗܳܠܶܝܢ ܕܰܐܟܚܕܳܐ ܩܳܝܡܝ̣ܢ ܥܰܡܰܢ ܘܰܡܨܰܠܶܝܢ: ܘܰܠܗܳܠܶܝܢ ܕܪܰܚܝ̣ܩܝ̣ܢ ܘܡܰܒܥܕܝ̣ܢ: ܘܟܰܕ ܠܟܽܠܗܽܘܢ ܘܰܠܟܽܠܗܶܝܢ ܡܶܬܥ̱ܰܗܰܕ ܐܰܢ̱ܬ ܘܥܰܠ ܟܽܠܗܽܘܢ ܘܥܰܠ ܟܽܠܗܶܝܢ ܚܳܐܶܣ ܐܰܢ̱ܬ: ܘܗܰܒ ܠܗܽܘܢ ܡܳܪܝܳܐ ܡܩܰܕܝܳܢܘ̣ܬܳܐ ܕܛܳܒ̈ܳܬܳܐ: ܕܙܰܒܢܳܐ ܕܠܳܐ ܚܛܳܗܿ: ܒܘ̣ܣܳܡܳܐ ܕܥܰܡ̈ܠܶܐ ܕܡ̣ܶܢ ܟܺܐܢܘ̣ܬܳܐ ܕܠܳܐ ܚܘ̣ܝܳܒ: ܡ̣ܶܢ ܟܽܠ ܛܳܒ̈ܳܬܳܐ ܪ̈ܘ̣ܚܳܢܝܳܬܳܐ ܘܦܰܓܪ̈ܳܢܝܳܬܳܐ ܡܠܝ̣ ܒܳܬܰܝ̈ܗܽܘܢ ܘܢܰܛܰܪ ܐܶܢܽܘܢ: ܠܳܐ ܚܳܫܘ̣ܫ̈ܶܐ ܥܒܶܕ ܐܶܢܽܘܢ ܘܠܳܐ ܚܰܣܝ̣ܪ̈ܶܐ ܕܰܒܰܪ ܐܶܢܽܘܢ ܠܳܐ ܡܰܘܬܪܳܢܳܐܝ̣ܬ: ܗܰܕܳܐ ܐܶܢܽܘܢ ܠܳܐ ܡܶܬܥܰܘܟܳܢܳܐܝ̣ܬ: ܐܰܥܬܰܪ ܐܶܢܽܘܢ ܒܕܘ̣ܒܳܪ̈ܶܐ ܛܳܒ̈ܶܐ: ܫܰܪܰܪ ܐܶܢܽܘܢ ܒܟܽܠ ܬܰܪܥܝ̣ܬܳܐ ܡܝܰܬܰܪܬܳܐ: ܘܟܰܕ ܡܩܰܒ̈ܠܰܝ ܐܰܟܣ̈ܢܳܝܶܐ ܘܰܡܣܰܬܪ̈ܰܝ ܡܶܣ̈ܟܺܢܶܐ: ܡܣܰܝܒܪ̈ܳܢܶܐ ܟܝ̣ܬ ܘܡܰܘܕ̈ܝܳܢܶܐ ܘܝܰܨܽܘ̣ܦ̈ܬܳܢܶܐ ܚܰܬܝ̣̈ܬܶܐ ܕܦܘ̣ܩ̈ܕܳܢܰܝܟ ܩܰܕܝ̣̈ܫܶܐ ܠܗܽܘܢ ܡܫܰܡܠܶܐ ܐܰܢ̱ܬ: ܫܰܟܶܢ ܠܗܽܘܢ ܡܳܪܝܳܐ ܒܫܰܦܝ̣ܪܘ̣ܬ ܩܰܢܳܝܘ̣ܬܳܐ ܕܢܰܦܫܳܐ: ܚܰܡܝ̣ܡܘ̣ܬܳܐ ܕܦܰܓܪܳܐ ܡܶܬܢܰܗܪܳܢܘ̣ܬܳܐ ܕܗܰܘܢܳܐ: ܫܽܘܘ̣ܫܳܛܳܐ ܕܰܠܘܳܬ ܟܽܠܗܶܝܢ ܡܝܰܬܪ̈ܳܬܳܐ: ܗܰܒ ܠܗܽܘܢ ܬܘ̣ܒ ܐܰܝܟ ܛܳܒܳܐ ܘܫܰܦܝ̣ܪ ܒܫܘ̣ܘ̈ܟܳܢܶܐ: ܗܳܠܶܝܢ ܕܝܰܬܝ̣ܪ ܪܰܘܪ̈ܒܳܢ: ܘܝܰܬܝ̣ܪ ܡܝܰܩܪ̈ܳܢ ܗܳܠܶܝܢ ܡܬܘ̣ܡܳܝ̈ܳܬܳܐ ܘܕܰܡܟܰܬܪ̈ܳܢ: ܗܳܠܶܝܢ ܠܳܐ ܡܶܬܚܰܒܠܳܢ̈ܝܳܬܳܐ ܘܕܰܠܥܳܠܰܡ: ܡܶܛܽܠ ܕܚܰܝܘ̣ܣܬܳܢܳܐ ܘܰܫܦܝ̣ܥ ܒܪ̈ܰܚܡܶܐ ܐܝ̣ܬܰܝܟ: ܘܪܳܚܶܡ ܐ̱ܢܳܫܳܐ ܘܠܳܟ ܫܘ̣ܒܚܳܐ ܘܐܝ̣ܩܳܪܳܐ ܘܐܘ̣ܚܕܳܢܳܐ ܡܰܣܩܝ̣ܢܰܢ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܨܰܘܡܳܐ ܕܰܟܝܳܐ ܘܩܰܕܝ̣ܫܳܐ: ܘܬܶܫ̈ܒܚܳܬܳܐ ܪ̈ܘ̣ܚܳܢܝܳܬܳܐ: ܥܰܡ ܙܡܝ̣ܪ̈ܳܬܳܐ ܠܳܐ ܗܘ̣ܠ̈ܳܢܝܳܬܳܐ ܘܥܶܛܪܳܐ ܗܳܢܳܐ ܕܒܶܣ̈ܡܶܐ ܢ̇ܶܫܬܘܶܐ ܕܰܢ̇ܩܰܪܶܒ ܠܳܟ ܪܘ̣ܡܝܳܢܳܐ ܕܫܳܦܰܪ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܘܢ̣ܶܬܩܰܒܠܽܘܢ ܩܕܳܡܰܝܟ ܐܰܝܟ ܪܝ̣ܚܳܐ ܒܰܣܝ̣ܡܳܐ: ܘܫܰܟܶܢ ܠܰܢ ܚܝ̣ܨܘ̣ܬܳܐ ܕܢܰܦܫܳܐ ܠܘ̣ܩܒܰܠ ܨܶܢ̈ܥܳܬܶܗ ܕܒܝ̣ܫܳܐ: ܘܓܰܢ̱ܒܳܪܘ̣ܬܳܐ ܒܰܐܓܘ̣ܢܳܐ ܕܙܰܕܝ̣ܩܘ̣ܬܳܐ: ܐܰܝܟܰܢܳܐ ܕܥܰܡ ܙܘܳܕ̈ܶܐ ܛܳܒ̈ܶܐ ܘܕܘ̣ܒܳܪ̈ܶܐ ܡܝܰܬܪ̈ܶܐ: ܢ̇ܶܐܪܘ̣ܥ ܦܶܓܥܳܟ ܦܨܺܝ̣ܚܳܐ: ܘܢ̇ܶܬܒܰܣܰܡ ܥܰܡܳܟ ܚܢܰܢ ܘܥܰܢܝ̣̈ܕܰܝܢ ܒܰܓܢܽܘ̣ܢܟ ܪܘ̣ܚܳܢܳܝܳܐ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀