ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܝ̣ܠܰܢ: ܕܰܒܫܰܝܢܳܐ ܒܗܝ̣ܠܳܐ ܕܰܪܚܝ̣ܡ ܠܳܟ: ܘܒܰܫܠܳܡܳܐ ܫܰܦܝܳܐ ܕܫܳܦܰܪ ܠܳܟ: ܘܰܒܩܰܘܡܳܐ ܐܰܡܝ̣ܢܳܐ ܕܰܡܪܰܥܶܐ ܠܳܟ: ܢ̇ܶܥܒܶܕ ܕܘ̣ܟܪܳܢܳܐ ܕܰܒܬܘ̣ܠܬܳܐ ܡܰܪܝܰܡ: ܕܝ̣ܠ̣ܶܕܬܳܟ ܥܰܡ ܟܽܠܗܽܘܢ ܩܰܕܝ̣̈ܫܶܐ ܡܢܝ̣̈ܚܳܢܶܐ ܕܝ̣ܠܳܟ: ܘܰܕܣܳܗ̈ܕܶܐ ܢܰܨܝ̣̈ܚܶܐ ܕܰܓ̇ܒܶܝܢ̣ ܠܳܟ: ܘܚܰܠܶܛ ܠܰܢ ܒܓܘ̣ܕܰܝ̈ܗܽܘܢ: ܘܡܰܢܰܥ ܠܰܢ ܠܰܐܘ̈ܘܳܢܰܝܗܽܘܢ: ܕܥܰܡܗܽܘܢ ܘܒܰܝܢܳܬܗܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܠܳܟ ܫܘ̣ܒܚܳܐ ܡܰܘܪܶܒ ܕܘ̣ܟܪܳܢ ܝܳܠܶܕܬܶܗ: ܘܠܳܟ ܬܰܘܕܝ̣ܬܳܐ ܡܝܰܩܰܪ ܥ̱ܘ̣ܗܕܳܢܳܐ ܕܰܪ̈ܚܘ̣ܡܰܘܗ̱ܝ: ܗܰܘ̇ ܕܰܒܟܽܠܕܳܪ̈ܝ̣ܢ ܪܰܡܪܶܡ̣ܬ ܠܰܐܝܠܶܝܢ ܕܰܒܕܘ̣ܒܳܪ̈ܰܝܗܽܘܢ ܪܰܥܝܽܘ̣ܟ: ܝܰܩ̣ܰܪܬ ܠܰܐܝܠܶܝܢ ܕܰܐܚ̣ܒܘ̣ܟ: ܕܠܰܢܒܺܝ̈ܶܐ ܐܶܬ̣ܚܙܰܝܬ ܒܓܶܠܝ̈ܳܢܶܐ: ܘܠܰܫܠܝ̣ܚ̈ܶܐ ܐܰܣܓܝ̣ܬ ܢܶܨ̈ܚܳܢܶܐ: ܘܰܠܣܳܗ̈ܕܶܐ ܚܰܝܶܠ̣ܬ ܒܰܐܓ̈ܘ̣ܢܶܐ: ܘܠܰܪ̈ܕܝ̣ܦܶܐ ܙܰܝܶܢ̣ܬ ܠܘ̣ܩܒܰܠ ܪ̈ܳܕܘ̣ܦܶܐ: ܘܰܓܡ̣ܰܪܬ ܠܡܰܘ̈ܕܝܳܢܶܐ ܒܬܰܘܕܝ̣ܬܳܐ: ܘܨܰܒܶܬ̣ܬ ܠܩܰܕܝ̣̈ܫܶܐ ܒܕܘ̣ܒܳܪ̈ܶܐ ܕܰܡܝܰܬܪܘ̣ܬܳܐ: ܘܠܰܐܝܠܶܝܢ ܕܰܐܘܕܝ̣ܘ ܒܳܟ ܐܶܫ̣ܬܰܘܕܝ̣ܬ ܢܘ̣ܚܳܡܳܐ ܕܙܰܕܝ̣ܩܘ̣ܬܳܐ: ܐܰܫܘܳܐ ܠܰܢ ܕܰܠܕܘ̣ܟܪܳܢܳܐ ܕܟܽܠܗܽܘܢ ܢ̇ܶܥܒܶܕ ܒܕܰܟܝܽܘ̣ܬܳܐ ܘܰܒܚܰܣܝܘ̣ܬܳܐ: ܘܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܢ̇ܰܘܕܶܐ ܘܢ̇ܶܣܓܘ̣ܕ ܘܰܢ̇ܫܰܒܰܚ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܟܰܕ ܥ̱ܘ̣ܗܕܳܢܳܐ ܡܫܰܡܠܶܝܢܰܢ ܡܳܪܝܳܐ ܩܕܳܡܰܝܟ: ܕܟܽܠܗܽܘܢ ܗܳܢܽܘܢ ܕܡ̣ܶܢ ܥܳܠܰܡ ܫܦ̣ܰܪܘ̱ ܠܳܟ: ܐܰܒܳܗ̈ܳܬܳܐ ܛܘ̣ܒ̈ܬܳܢܶܐ ܘܪ̈ܝ̣ܫܰܝ ܐܰܒܳܗ̈ܳܬܳܐ: ܗܳܢܽܘܢ ܕܣܰܟܝ̣ܘ ܠܓܶܠܝܳܢܳܟ: ܘܶܐܬ̣ܪܰܓܪܰܓܘ̱ ܕܢܶܚ̣ܙܽܘܢ ܠܝܰܘܡܳܐ ܕܡܰܘܠܳܕܳܟ: ܐܰܟܡܰܢ ܕܰܠܒܘ̣ܪܟܬܳܐ ܗܳܝ̇ ܕܰܡܩܰܕܡܳܐ ܗ̱ܘܳܬ݀ ܡܠܝ̣ܟܳܐ ܕܢ̣ܶܣܒܽܘܢ: ܕܰܢܒܺܝ̈ܶܐ ܩܰܕܝ̣̈ܫܶܐ ܗܳܢܽܘܢ ܕܰܗ̣ܘܰܘ ܚܰܙܳܝ̈ܶܐ ܘܰܡܒܰܕ̈ܩܳܢܶܐ ܕܐ̱ܪ̈ܳܙܶܐ: ܗܳܢܽܘܢ ܕܰܒܣܰܓܺܝܽܐܘ̣ܬ ܙܢܰܝ̈ܳܐ ܘܕܶܡ̈ܘܳܬܳܐ ܐܶܬ̣ܢܰܒܝ̣ܘ ܡܶܛܽܠܳܬܳܟ: ܘܰܗ̣ܘܰܝܬ ܠܗܽܘܢ ܨܶܒܬܳܐ ܘܫܘ̣ܒܗܳܪܳܐ: ܘܫܘ̣ܡܠܳܝܳܐ ܕܰܢܒܺܝܘ̣ܬܗܽܘܢ: ܘܚܰܘܝ̣ܬ ܐܶܢܽܘܢ ܫܰܪܝ̣ܪ̈ܶܐ ܒܡܶܬܓܰܠܝܳܢܘ̣ܬܳܟ: ܕܰܫܠܝ̣̈ܚܶܐ ܘܰܕܟܳܪ̈ܘ̣ܙܶܐ: ܕܶܐܘܰܢܓܶܠܝ̣̈ܣܛܶܐ ܗܳܢܽܘܢ ܕܰܗ̣ܘܰܘ ܚܰܙܳܝ̈ܶܐ ܘܰܡܫܰܡ̈ܫܳܢܶܐ ܕܝ̣ܠܳܟ: ܘܰܛܥܶܢܘ̱ ܠܰܫܡܳܐ ܕܝ̣ܠܳܟ ܩܕܳܡ ܡܰܠ̈ܟܶܐ ܘܥܰܡ̱̈ܡܶܐ ܘܰܒܢܰܝ̈ܳܐ ܕܐܝ̣ܣܪܳܐܝܶܠ: ܘܒܰܕܡܘ̣ܬ ܢܰܗܪ̈ܰܘܳܬܳܐ ܦܰܪ̈ܕܰܝܣܳܝܶܐ ܡ̣ܶܢ ܡܰܒܘ̣ܥܳܐ ܥܕܶܝܢܳܝܳܐ ܡܬ̣ܰܩܘ̱: ܘܶܐܬܡܠܝ̣ܘ ܫܶܦ̈ܥܶܐ ܕܪܘ̣ܚܳܐ ܩܰܕܝ̣ܫܳܐ: ܘܰܐܫܦ̣ܰܥܘ̱ ܒܟܽܠܳܗ̇ ܡܖܬܥܰܡܪܳܢܝ̣ܬܳܐ ܣܒܰܪܬܳܐ ܐܶܘܰܢܓܶܠܳܝܬܳܐ: ܘܰܐܟ̣ܪܶܙܘ̱ ܒܟܽܠܶܗ ܥܳܠܡܳܐ ܣܒܰܪܬܳܐ ܕܦܘ̣ܪܩܳܢܳܐ: ܘܰܐܦ̣ܢܝ̣ܘ ܠܰܒܪܝ̣ܬܳܐ ܟܽܠܳܗ̇ ܠܣܶܓܕܬܳܐ ܕܝ̣ܠܳܟ: ܕܣܳܗ̈ܕܶܐ ܕܡܰܘܕ̈ܝܳܢܶܐ ܗܳܢܽܘܢ ܕܒܳܟ ܐܶܙܕܰܝܰܢܘ̱ ܙܰܝܢܳܐ ܠܳܐ ܡܶܙܕܰܟܝܳܢܳܐ: ܘܰܙܟ̣ܰܘ ܠܡܰܠ̈ܟܶܐ ܛܪ̈ܘ̣ܢܶܐ ܘܶܐܬ̣ܟܰܠܰܠܘ̱ ܒܰܟܠܝ̣̈ܠܶܐ ܕܙܳܟܘ̣ܬܳܐ: ܕܕܰܝܪ̈ܳܝܶܐ، ܕܥܳܢܘ̈ܳܝܶܐ: ܕܝ̣ܚܝ̣̈ܕܳܝܶܐ ܘܡܰܕܒܪ̈ܳܝܶܐ: ܗܳܢܽܘܢ ܕܰܐܝܟ ܦܘ̣ܩܕܳܢܳܟ ܡܳܪܳܢܳܝܳܐ ܟܦ̣ܰܪܘ̱ ܒܥܳܠܡܳܐ: ܘܰܣܢ̣ܰܘ ܪ̈ܓܝ̣ܓܳܬܶܗ ܘܰܫܩ̣ܰܠܘ̱ ܙܩܝ̣ܦܳܟ ܘܶܐܬ̣ܰܘ ܒܳܬܪܳܟ: ܕܡܰܠ̈ܦܳܢܰܝ ܐ̱ܪ̈ܳܙܶܐ ܘܡܰܐ̱ܪ̈ܙܳܢܶܐ ܕܥܺܕܬܳܐ: ܗܳܢܽܘܢ ܕܰܒܕܳܪ ܘܕܳܪ ܩܳܡ̣ܘ̱ ܒܪܝ̣ܫ ܥܰܡܳܐ ܕܝ̣ܠܳܟ ܡܗܰܝܡܢܳܐ: ܘܒܰܕܡܘ̣ܬ ܬܰܦ̈ܶܐ ܕܰܘܝ̣̈ܕܳܝܶܐ ܚܰܕܝ̣ܘ ܠܥܺܕܬܳܟ ܩܰܕܝ̣ܫܬܳܐ: ܒܝܰܕ ܫܶܦ̈ܥܶܐ ܕܡܰܘܗ̈ܒܳܬܳܐ ܕܪܘ̣ܚܳܟ ܩܰܕܝ̣ܫܳܐ ܘܰܒܫܶܩܝܳܐ ܕܝܽܘ̣ܠ̈ܦܳܢܶܐ ܐܰܠܳܗ̈ܳܝܶܐ: ܘܰܒܡܰܢܗܪܳܢܘ̣ܬܳܐ ܕܣܘ̣ܟ̈ܳܠܶܐ ܢܒܺܝ̈ܳܝܶܐ: ܘܰܫܠܝ̣̈ܚܳܝܶܐ ܘܶܐܘܰܢܓ̈ܶܠܳܝܶܐ ܗܰܕܪܘ̣ܗ̇: ܡܦܝ̣ܣܝ̣ܢܰܢ ܠܛܳܒܘ̣ܬܳܐ ܕܝ̣ܠܳܟ ܡܳܪܝܳܐ ܕܰܡܡܰܪ̈ܝܳܢܶܐ ܢ̇ܶܗܘܶܐ ܒܕܘ̣ܒܳܪ̈ܶܐ ܕܝ̣ܠܗܽܘܢ: ܘܒܰܛܢܳܢܗܽܘܢ ܕܰܚܠܳܦ ܫܰܦܝ̣ܪܘ̣ܬ ܕܶܚܠܬܳܐ ܗܳܢܽܘܢ ܕܐܝ̣ܬܰܝܗܽܘܢ ܒܰܝ̈ܬܳܝܶܐ ܕܝ̣ܠܳܟ: ܘܰܒܢܰܝ̈ ܐ̱ܪ̈ܳܙܶܐ: ܘܕܰܝܳܪ̈ܶܐ ܒܰܐܘ̈ܘܳܢܶܐ ܛܘ̣ܒ̈ܬܳܢܶܐ: ܗܳܢܽܘܢ ܕܰܒܛܶܟ̈ܣܶܐ ܘܩܰܘ̈ܡܶܐ ܘܓܘ̣ܕ̈ܶܐ ܡܰܠܰܐܟܳܝ̈ܳܬܳܐ ܐܰܡܝ̣ܢܳܐܝ̣ܬ ܡܫܰܒܚܝ̣ܢ ܠܳܟ: ܥܰܡ ܚܰܝ̈ܠܰܘܳܬܳܐ ܡܰܠܰܐܟܳܝ̈ܶܐ ܘܰܫܡܰܝ̈ܳܢܶܐ: ܬܘ̣ܒ ܕܶܝܢ ܐܰܫܘܳܐ ܠܰܢ ܕܠܰܒܬܘ̣ܠܬܳܐ ܝܳܠܕܰܬ݀ ܐܰܠܳܗܳܐ ܡܰܪܝܰܡ ܐܶܡܳܐ ܕܝ̣ܠܳܟ ܡܒܰܪܰܟܬܳܐ ܢ̇ܥܰܕܥܶܕ ܐܰܝܟ ܕܰܦ̇ܐܶܐ̣ ܒܠܶܒܳܐ ܕܰܟܝܳܐ ܘܰܒܬܰܪܥܝ̣ܬܳܐ ܦܰܪܶܗܣܺܝܳܝܬܳܐ ܘܰܒܪܶܥܝܳܢܳܐ ܕܰܡܪܰܝܰܡ ܡ̣ܶܢ ܚܰܫܳܐ ܗܘ̣ܠܳܢܳܝܳܐ: ܘܰܠܥܰܢܝ̣̈ܕܶܐ ܐܰܝܠܶܝܢ ܕܰܒܗܰܝܡܳܢܘ̣ܬܳܐ ܕܒܳܟ ܩܰܕܶܡ̣ܘ̱ ܚܙ̣ܰܩܘ̱ ܐܶܬܕܰܟܰܪ ܘܰܐܢܝ̣ܚ ܪ̈ܘ̣ܚܳܬܗܽܘܢ ܒܰܐܘ̈ܘܳܢܶܐ ܛܘ̣ܒ̈ܬܳܢܶܐ: ܝ̣ܕܝ̣ܥܳܐܝ̣ܬ ܠܗܳܠܶܝܢ ܕܝܰܘܡܳܢܳܐ ܥ̱ܘ̣ܗܕܳܢܳܐ ܕܝ̣ܠܗܽܘܢ ܡܫܰܡܠܶܝܢܰܢ: ܥܰܡ ܩܰܕܝ̣̈ܫܰܝܟ ܚܰܠܶܛ ܐܶܢܽܘܢ ܒܟܶܢܫ̈ܰܝܗܽܘܢ: ܡܢܝ̣ ܐܶܢܽܘܢ ܒܓܘ̣ܕܰܝ̈ܗܽܘܢ: ܛܰܟܶܣ ܐܶܢܽܘܢ ܒܣܶܕܪ̈ܰܝܗܽܘܢ: ܐܰܫܪܳܐ ܐܶܢܽܘܢ ܒܡܰܫ̈ܟܢܶܐ ܕܙܰܕܝ̣̈ܩܶܐ: ܒܰܡܛܰܠ̈ـܠܶܐ ܕܢܘ̣ܗܪܳܐ ܒܥܘ̣ܒܶܗ ܕܰܐܒܪܳܗܳܡ ܘܕܐܝ̣ܣܚܳܩ ܘܰܕܝܰܥܩܽܘܒ: ܒܦܰܪܕܰܝܣܳܐ ܕܒܘ̣ܣ̈ܳܡܶܐ: ܒܓܰܢܬܳܐ ܕܓܶܐܘ̈ܳܬܳܐ: ܒܰܐܬܪܳܐ ܕܰܢܝܳܚܳܐ: ܐܰܝܟܳܐ ܕܩܳܠܳܐ ܢܰܨܝ̣ܚܳܐ ܕܫܘ̣ܒܚܳܐ ܘܕܰܘܨܳܐ ܕܚܰܕܘ̣ܬܳܐ ܪܘ̣ܚܳܢܳܝܬܳܐ: ܕܗܳܢܽܘܢ ܕܰܡܥܰܕܥܕܝ̣ܢ ܘܚܳܕܶܝܢ ܒܳܟ: ܘܠܰܐܒܳܗ̈ܳܬܰܢ ܚܣܰܝ̈ܳܐ ܕܰܒܪܝ̣ܫ ܥܰܡܳܐ ܩܳܝܡܝ̣ܢ ܗܰܒ ܠܗܽܘܢ ܚܦܝ̣ܛܘ̣ܬܳܐ ܘܰܠܒܝ̣ܒܘ̣ܬܳܐ ܕܰܥܕܰܡܳܐ ܠܰܕܡܳܐ: ܐܰܝܟܰܢܳܐ ܕܢ̣ܶܪܥܽܘܢ ܘܰܢ̣ܕܰܒܪܽܘܢ ܡܰܪ̈ܥܝܳܬܳܐ ܕܝ̣ܠܗܽܘܢ ܟܳܗܢܳܝ̈ܳܬܳܐ: ܘܰܢ̣ܛܰܝܒܽܘܢ ܠܳܟ ܥܰܡܳܐ ܓܡܝ̣ܪܳܐ ܕܛܳܐܶܢ ܒܰܥܒ̈ܳܕܶܐ ܛܳܒ̈ܶܐ: ܘܰܠܥܳܠܡܳܐ ܟܽܠܶܗ ܫܰܟܶܢ ܫܰܝܢܳܐ ܘܰܫܠܳܡܳܐ ܕܡܶܢܳܟ: ܡܶܛܽܠ ܕܰܐܠܳܗܳܐ ܛܳܒܳܐ ܘܪܳܚܶܡ ܐ̱ܢܳܫ̈ܳܐ ܐܝ̣ܬܰܝܟ: ܘܰܦ̇ܐܶܐ̣ ܠܳܟ ܫܘ̣ܒܚܳܐ ܘܐܝ̣ܩܳܪܳܐ ܘܐܘ̣ܚܕܳܢܳܐ ܥܰܡ ܐܰܒܘ̣ܟ ܘܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܬܶܒ̣ܣܰܡܝ̱ ܠܳܟ ܡܳܪܝ̱ ܨܠܘ̣ܬܰܢ ܘܒܳܥܘ̣ܬܰܢ: ܘܥܶܛܪܳܐ ܕܦܝ̣ܪܡܰܢ: ܘܬ̣ܶܬܢܝ̣ܚܝ̱ ܐܰܠܳܗܘ̣ܬܳܟ ܒܕܘ̣ܒܳܪ̈ܰܝܢ ܫܰܦܝ̣ܪ̈ܶܐ: ܒܝܰܕ ܬܰܟܫ̈ܦܳܬܳܐ ܕܝܳܠܶܕܬܳܟ ܒܬܘ̣ܠܬܳܐ ܩܰܕܝ̣ܫܬܳܐ ܡܰܪܝܰܡ: ܘܕܰܢܒܺܝ̈ܶܐ ܕܰܐܟܪܙܘ̣ܟ ܒܕܳܪ̈ܰܝܗܽܘܢ: ܘܕܰܫܠܝ̣ܚ̈ܶܐ ܕܣܰܒܪܘ̣ܟ ܒܟܶܢܫ̈ܰܝܗܽܘܢ: ܘܰܕܣܳܗ̈ܕܶܐ ܕܝܰܩ̣ܪܘ̣ܟ ܒܩܶܛܠܰܝ̈ܗܽܘܢ: ܘܒܐܝ̣ܙܓܰܕܘ̣ܬܳܐ ܕܗܳܠܶܝܢ ܟܢܝ̣ܫܳܐܝ̣ܬ ܐܶܬܪܰܚܰܡ ܥܰܠ ܢܰܦܫ̈ܳܬܰܢ: ܘܚܰܣܳܐ ܠܥܰܢܝ̣̈ܕܰܝܢ: ܘܰܐܫܘܳܐ ܠܰܢ ܕܰܢ̇ܩܘ̣ܡ ܡ̣ܶܢ ܝܰܡܝ̣ܢܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܥܳܠܰܡ ܥܳܠܡܝ̣ܢ ܐܰܡܝ̣ܢ܀