ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܕܩܰܪܝ̣ܒ ܗ̱ܘ̣ ܠܰܐܝܠܶܝܢ ܕܩܳܪܶܝܢ ܠܶܗ ܒܩܘ̣ܫܬܳܐ ܘܨܳܒܶܐ ܒܚܰܝ̈ܶܐ ܘܦܘ̣ܪܩܳܢܳܐ ܕܰܓܒܝ̣ܠܬܶܗ ܠܗܰܘ̇ ܕܰܦܬܝ̣ܚ ܬܰܪܥܶܗ ܠܬܰܝܳܒ̈ܶܐ: ܘܚܳܐܰܪ ܠܡܶܬܦܰܢܝܳܢܘ̣ܬܳܐ ܕܝ̣ܠܗܽܘܢ: ܠܗܰܘ̇ ܕܡܰܘܫܶܛ ܐܝ̣ܕܳܐ ܕܥܘ̣ܕܪ̈ܳܢܶܐ ܠܰܐܝܠܶܝܢ ܕܰܠܘܳܬܶܗ ܡܶܬܦܢܶܝܢ: ܘܡܰܥܒܰܪ ܣܰܟ̈ܠܘܳܬܳܐ ܘܡܰܫܬܰܪ̈ܥܳܢܘܳܬܳܐ ܕܝ̣ܠܗܽܘܢ ܒܰܬܝܳܒܘ̣ܬܳܐ ܕܰܠܘܳܬܶܗ: ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܕܰܬ̣ܫܰܟܶܢ ܠܥܰܒ̈ܕܰܝܟ ܕܰܩܕܳܡܰܝܟ ܪܟܝ̣ܢܝ̣ܢ: ܚܘ̣ܣܳܝܳܐ ܕܚܰܘ̈ܒܶܐ ܘܫܘ̣ܒܩܳܢܳܐ ܕܰܚ̈ܛܳܗܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܓܰܢܒܳܪܳܐ ܘܚܰܝܠܬܳܢܳܐ ܘܰܡ̇ܨܶܐ̣ ܟܽܠ: ܗܰܘ̇ ܛܳܒܳܐ ܒܰܠܚܘ̣ܕܰܘܗ̱ܝ ܘܚܰܝܘ̣ܣܬܳܢܳܐ ܘܣܰܓܝ̣ ܪ̈ܰܚܡܶܐ ܘܠܳܐ ܡܶܬܥ̱ܰܗܕܳܢܳܐ ܕܒܝ̣̈ܫܳܬܳܐ: ܗܰܘ̇ ܕܡܰܗܡܶܐ ܐܰܢ̱ܬ ܡܶܢܰܢ ܟܰܕ ܚ̣ܛܰܝܢܰܢ: ܘܰܡܣܰܝܒܪ ܐܰܢ̱ܬ ܘܡܰܓܰܪ ܐܰܢ̱ܬ ܪܘ̣ܚܳܟ ܥܠܰܝܢ: ܘܠܳܐ ܥܳܛܶܐ ܐܰܢ̱ܬ ܘܡܰܘܒܶܕ ܐܰܢ̱ܬ ܠܰܢ ܟܰܕ ܡܰܪܓܙܝ̣ܢܰܢ ܠܳܟ: ܒܝܰܕ ܥܒܳܕ̈ܶܐ ܒܝ̣̈ܫܶܐ ܗܳܢܽܘܢ ܕܡܶܢܰܢ ܡܰܣܬܰܥܪܝ̣ܢ ܐܶܠܳܐ ܒܝܰܕ ܙܢܰܝ̈ܳܐ ܣܰܓ̈ܺܝܶܐܐ ܘܦܘ̣ܪ̈ܣܶܐ ܡܫܰܚܠ̈ܦܶܐ ܩܳܪܶܐ ܐܰܢ̱ܬ ܘܡܰܥܒܰܪ ܐܰܢ̱ܬ ܠܘܳܬ ܬܝܳܒܘ̣ܬܳܐ: ܠܰܢ ܗܳܢܽܘܢ ܕܠܳܐ ܫܳܘܶܝܢܰܢ ܠܪ̈ܰܚܡܶܐ ܕܡܶܢܳܟ: ܡܶܛܽܠ ܕܰܐܪܓ̣ܶܙܢܳܟ ܘܒܝ̣̈ܫܳܬܳܐ ܩܕܳܡܰܝܟ ܥܒ̣ܰܕܢܰܢ: ܘܶܐܬ̣ܪܚܶܩܢܰܢ ܘܶܐܬ̣ܢܰܟܪܝ̣ܢܰܢ ܡ̣ܶܢ ܒܰܝܬܳܝܘ̣ܬܳܐ ܘܬܰܠܡܝ̣ܕܘ̣ܬܳܐ ܕܝ̣ܠܳܟ: ܘܰܚܢܰܢ ܠܰܢ ܣܚ̣ܰܦܰܢ ܘܰܫ̣ܕܰܝܢ ܒܥܘ̣ܡܩܳܐ ܕܰܐܒܕܳܢܳܐ: ܘܰܒܗܰܘܬܳܐ ܕܒܝ̣̈ܫܳܬܳܐ: ܒܝܰܕ ܡܰܚ̈ܫܳܒܬܳܐ ܒܝ̣̈ܫܳܬܳܐ ܘܰܥ̈ܒܳܕܶܐ ܘܡ̈ܶܠܶܐ ܕܝ̣ܠܰܢ: ܗܰܘ̇ ܕܰܒܝܰܕ ܢܒܺܝܳܐ ܐܰܠܳܗܳܝܳܐ ܡܰܙܥܶܩ ܐܰܢ̱ܬ ܘܳܐܡܰܪ ܐܰܢ̱ܬ: ܕܠܳܐ ܨܳܒܶܐ ܐ̱ܢܳܐ ܒܡܰܘܬܶܗ ܕܚܰܛܳܝܳܐ: ܐܰܝܟ ܗܳܝ ܕܢ̣ܶܬܦܢܶܐ ܡ̣ܶܢ ܐܘ̣ܪܚܳܐ ܕܝ̣ܠܶܗ ܒܝ̣ܫܬܳܐ ܘܢ̣ܺܚܶܐ: ܘܶܐܬܦܢܰܘ ܠܘܳܬܝ̱ ܒܢܰܝ̈ܳܐ ܗܳܢܽܘܢ ܕܶܐܬ̣ܪܚܶܩܘ̱ ܘܶܐܢܳܐ ܐܰܣܶܐ ܬܝܳܒܘ̣ܬܟܽܘܢ: ܘܰܣܚܰܘ ܘܐܶܬܕܰܟܰܘ ܘܰܐܥܒܰܪܘ̱ ܒܝ̣̈ܫܳܬܳܐ ܕܰܥܒܳܕܰܝ̈ܟܽܘܢ ܡ̣ܶܢ ܩܕܳܡ ܥܰܝ̈ܢܰܝ: ܘܶܐܢ ܢܶܗܘܽܘܢ ܚܛܳܗܰܝ̈ܟܽܘܢ ܐܰܝܟ ܙܰܚܘ̣ܪܝ̣ܬܳܐ܆ ܐܰܝܟ ܬܰܠܓܳܐ ܢܶܬܚܰܘܪܽܘܢ: ܘܶܐܢ ܢܶܣܡܩܽܘܢ ܐܰܝܟ ܬܘ̣ܠܰܥܬܳܐ܆ ܐܰܝܟ ܥܰܡܪܳܐ ܢܶܗܘܽܘܢ: ܘܒܶܐܘܰܢܓܶܠܝܽܘܢ ܩܰܕܝ̣ܫܳܐ ܐܶܫ̣ܬܰܘܕܝ̣ܬ ܘܶܐܡ̣ܰܪܬ: ܕܚܰܕܘ̣ܬܳܐ ܪܰܒܬܳܐ ܗܳܘܝܳܐ ܒܰܫܡܰܝܳܐ ܥܰܠ ܚܰܕ ܚܰܛܳܝܳܐ ܕܬܳܐܶܒ: ܐܰܝܟܰܢܳܐ ܕܟܽܠܗܽܘܢ ܚܰܝ̈ܠܰܘܳܬܳܐ ܩܰܕܝ̣̈ܫܶܐ ܘܪ̈ܘ̣ܚܳܬܳܐ ܕܟܺܐܢ̈ܶܐ ܘܙܰܕܝ̣̈ܩܶܐ ܢ̣ܶܚܕܽܘܢ ܘܰܢ̣ܕܘ̣ܨܽܘܢ ܒܦܘ̣ܪܩܳܢܳܐ ܗܰܘ̇ ܕܰܠܦܶܛܪܘ̣ܣ ܪܝ̣ܫܳܐ ܕܰܫܠܝ̣̈ܚܶܐ: ܡ̣ܶܢ ܒܳܬܰܪ ܕܝ̣ܡܳܐ ܘܰܟܦ̣ܰܪ ܕܠܳܐ ܝܳܕܰܥ ܠܳܟ: ܘܶܐܬ̣ܢܰܟܪܝ̣ ܡ̣ܶܢ ܒܰܝܬܳܝܘ̣ܬܳܐ ܘܬܰܠܡܝ̣ܕܘ̣ܬܳܐ ܕܝ̣ܠܳܟ: ܬܘ̣ܒ ܡ̣ܶܢܕܪܝ̣ܫ ܒܝܰܕ ܕܶܡ̈ܥܶܐ ܕܰܬܝܳܒܘ̣ܬܳܐ: ܦܶܛܪܘ̣ܣ ܘܰܐܚܝ̣ܕ ܩܠܝ̣̈ܕܶܐ ܕܡܰܠܟܘ̣ܬܳܐ ܕܰܫܡܰܝܳܐ ܥܒܰܕܬ: ܐܰܢ̱ܬ ܗ̱ܘ̣ ܗܰܘ̇ ܕܰܠܓܰܝܳܣܳܐ ܗܰܘ̇ ܕܰܒܛܘ̣ܪ̈ܶܐ ܘܒܐܘ̣ܪ̈ܚܳܬܳܐ ܩܳܐܶܡ ܗ̱ܘܳܐ ܘܰܒܩܶܛܠܳܐ ܕܰܒܢܰܝ̈ܢܳܫܳܐ ܐܰܦ̣ܶܩ ܚܰܝܰܘ̈ܗ̱ܝ ܒܝ̣ܫܳܐܝ̣ܬ: ܘܒܰܕܡܳܐ ܐܰܝܟ ܕܰܒܡܰܝ̈ܳܐ ܣܚ̣ܳܐ ܗ̱ܘܳܐ ܘܰܡܦܰܠܦܰܠ: ܒܝܰܕ ܒܰܪ̱ܬ ܩܳܠܳܐ ܪܰܥܘ̣ܡܬܳܐ ܕܫ̣ܰܕܰܪ ܠܘܳܬܳܟ ܟܰܕ ܐܳܡܰܪ: ܐܶܬ̣ܕܰܟܪܰܝܢܝ̱ ܡܳܪܝ̱ ܡܳܐ ܕܳܐܬܶܐ ܐܰܢ̱ܬ ܒܡܰܠܟܘ̣ܬܳܟ: ܕܰܕܟܶܐ ܡ̣ܶܢ ܟܽܠܳܗܿ ܨܳܐܝܘ̣ܬܳܐ ܕܰܚܛܝ̣ܬܳܐ ܐܶܬ̣ܚܙܝ̣: ܘܒܰܪ ܡܰܠܟܘ̣ܬܳܐ ܕܰܫܡܰܝܳܐ ܗ̣ܘܳܐ: ܘܰܠܦܰܪܕܰܝܣܳܐ ܕܰܥܕܶܝܢ ܐܶܫܬܘܝ̣: ܐܰܢ̱ܬ ܗ̱ܘ̣ ܗܰܘ̇ ܕܰܠܙܳܢܝ̣ܬܳܐ ܗܳܝ ܕܰܗ̣ܘܳܬ ܦܰܚܳܐ ܘܰܐܒܕܳܢܳܐ ܠܣܰܓ̈ܺܝܶܐܐ: ܘܡ̣ܶܢ ܒܳܬܰܪ ܚܰܝ̈ܶܐ ܛܰܡ̈ܶܐܐ ܘܙܺܐܦ̈ܳܢܶܐ: ܘܠܳܐ ܢܳܡܘ̣ܣܳܝ̈ܘܳܬܳܐ ܕܰܚ̣ܝܳܬ݀ : ܒܝܰܕ ܕܶܡ̈ܥܶܐ ܕܰܬܝܳܒܘ̣ܬܳܐ ܠܘܳܬܳܟ ܐܶܬ̣ܩܰܪܒܰܬ݀ ܘܒܰܡܨܝ̣ܕܬܳܐ ܕܶܐܘܰܢܓܶܠܝܽܘܢ ܐܶܬ̣ܚܰܒܰܫܬ݀ ܢܰܟܦܬܳܐ ܘܰܕܟܝ̣ܬܳܐ ܝܰܬܝ̣ܪ ܡ̣ܶܢ ܒܬܘ̣ܠ̈ܳܬܳܐ ܐܶܬ̣ܚܰܙܝܰܬ݀ : ܐܰܢ̱ܬ ܗ̱ܘ̣ ܗܰܘ̇ ܕܠܰܒܪܳܐ ܐܳܣܘ̣ܛܳܐ ܡ̣ܶܢ ܒܳܬܰܪ ܝܳܪܬܘ̣ܬܳܐ ܗܳܝ ܐܰܒܳܗܳܝܬܳܐ ܕܰܡ̣ܛܳܬ݀ ܠܶܗ ܘܰܚ̣ܝܳܐ ܐܳܣܘ̣ܛܳܐܝ̣ܬ ܘܰܒܟܰܦܢܳܐ ܘܚܰܝ̈ܶܐ ܪ̈ܰܚܝܩܰܝ ܡܶܢܳܟ ܐܰܠܳܗܳܐ: ܡܰܚܫܰܒܬܳܐ ܕܰܬܝܳܒܘ̣ܬܳܐ ܐܰܕܝ̣ܠܬ ܒܶܗ: ܘܰܠܘܳܬܳܟ ܦܢ̣ܳܐ ܘܶܐܬ̣ܳܐ ܒܝܰܕ ܒܰܪ̱ܬ ܩܳܠܳܐ ܡܶܬܚܰܢܳܢܝ̣ܬܳܐ ܘܰܫܰܘܝܰܬ݀ ܠܚܘ̣ܣܳܝܳܐ ܕܶܐܡ̣ܰܪ: ܐܳܒܝ̱ ܚܛܺܝ̇ܬ ܒܰܫܡܰܝܳܐ ܘܰܩܕܳܡܰܝܟ: ܘܠܳܐ ܫܳܘܶܐ ܐ̱ܢܳܐ ܕܰܒܪܳܟ ܐܶܬܩܪܶܐ: ܘܠܐܘ̣ܪܥܳܐ ܕܝ̣ܠܶܗ ܒܚܰܕܘ̣ܬܳܐ ܢܦܰܩ̣ܬ: ܘܩܰܒܶܠ̣ܬܳܝܗ̱ܝ ܚܳܕܝܳܐܝ̣ܬ ܘܣܰܓܝ̣ ܪܶܚܡܰܬ݀ ܐ̱ܢܳܫܳܐܝ̣ܬ ܘܥܰܠ ܨܰܘܪܶܗ ܢܦܰܠ̣ܬ ܘܰܢܫܰܩ̣ܬܳܝܗ̱ܝ ܠܗܰܘ̇ ܕܰܒܣܰܪܝܘ̣ܬܳܐ ܕܰܚܛܝ̣ܬܳܐ ܡܦܰܠܦܰܠ ܗ̱ܘܳܐ ܘܰܡܛܰܒܰܥ: ܘܰܠܟܽܠܗܽܘܢ ܚܰܝ̈ܠܰܘܳܬܳܐ ܫܡܰܝܳܢ̈ܶܐ ܙܰܡܶܢ̣ܬ ܘܶܐܡ̣ܰܪܬ: ܕܢ̇ܶܚܕܶܐ ܝܰܘܡܳܢܳܐ ܘܢ̇ܶܬܒܰܣܰܡ: ܕܗܳܢܳܐ ܒܪܳܐ ܕܝ̣ܠܝ̱ ܡܝ̣ܬܳܐ ܗ̱ܘܳܐ ܘܰܚ̣ܝܳܐ ܘܰܐܒܝ̣ܕܳܐ ܗ̱ܘܳܐ ܘܶܐܫ̣ܬܟܰܚ: ܐܰܢ̱ܬ ܗ̱ܘ̣ ܗܰܘ̇ ܕܰܠܟܽܠܗܽܘܢ ܚܰܛܳܝ̈ܶܐ ܕܬܳܝܒܝ̣ܢ ܒܝܰܕ ܕܶܡ̈ܥܶܐ ܕܰܬܝܳܒܘ̣ܬܳܐ ܡܚܰܣܶܐ ܐܰܢ̱ܬ: ܘܚܰܒܝ̣̈ܒܶܐ ܘܒܰܝ̈ܬܳܝܶܐ ܥܳܒܶܕ ܐܰܢ̱ܬ: ܘܰܠܡܰܠܟܘ̣ܬܳܐ ܕܰܫܡܰܝܳܐ ܘܰܠܛܳܒ̈ܳܬܳܐ ܕܰܡܠܝ̣̈ܟܳܢ ܠܩܰܕܝ̣̈ܫܶܐ ܡܰܫܘܶܐ ܐܰܢ̱ܬ: ܘܒܰܕܓܽܘܢ ܒܳܥܶܝܢܰܢ ܡܶܢܳܟ ܡܳܪܝܳܐ ܐܰܠܳܗܳܐ ܚܘ̣ܣ ܘܶܐܬܪܰܚܰܡܥܠܰܝܢ ܒܥܶܕܳܢܳܐ ܗܳܢܳܐ: ܐܰܝܟ ܣܘ̣ܓܳܐܐ ܕܒܰܣܝܡܘ̣ܬܳܟ: ܘܰܫܒܘ̣ܩ ܘܰܐܥܒܰܪ ܟܽܠܗܶܝܢ ܣܰܟ̈ܠܘܳܬܳܐ ܕܝ̣ܠܰܢ ܥܰܒ̈ܕܶܐ ܕܝ̣ܠܳܟ: ܗܳܠܶܝܢ ܕܗܳܪܟܳܐ ܩܳܝܡܝ̣ܢ ܘܫܳܐܠܝ̣ܢ ܡܶܢܳܟ ܚܘ̣ܣܳܝܳܐ ܕܚܰܘ̈ܒܰܝܗܽܘܢ: ܘܫܘ̣ܒܩܳܢܳܐ ܕܰܚܛܳܗ̈ܰܝܗܽܘܢ: ܗܳܠܶܝܢ ܕܰܒܨܶܒܝܳܢܳܐ ܘܰܕܠܳܐ ܒܨܶܒܝܳܢܳܐ: ܕܒܝ̣ܕܰܥܬܳܐ ܘܰܕܠܳܐ ܒܝ̣ܕܰܥܬܳܐ: ܟܰܣ̈ܝܳܬܳܐ ܘܓܰܠ̈ܝܳܬܳܐ ܗܳܠܶܝܢ ܕܝܳܕܰܥ ܠܗܶܝܢ ܫܡܳܐ ܕܝ̣ܠܳܟ ܩܰܕܝܫܳܐ: ܘܰܠܚܰܝ̈ܶܐ ܕܝ̣ܠܰܢ ܕܰܒܰܪ ܠܘܳܬ ܗܳܝ ܕܫܳܦܪܳܐ ܩܕܳܡܰܝܟ ܒܥܳܠܡܳܐ ܗܳܢܳܐ ܘܰܒܥܳܠܡܳܐ ܕܰܥܬܝ̣ܕ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀