ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܘܰܥܶܕ ܘܛܰܝܶܒ ܠܰܢ ܡܳܪܝܳܐ: ܠܘܳܬ ܕܘ̣ܒܳܪ̈ܶܐ ܡܰܠܰܐܟ̈ܳܝܶܐ: ܘܰܠܘܳܬ ܣܳܥܘ̣ܪܘ̣ܬܳܐ ܕܛܳܒ̈ܳܬܳܐ: ܘܰܥܕܳܐ ܕܚܰܝ̈ܶܐ ܡܳܪܝܳܐ: ܘܗܰܒ ܠܰܢ ܕܰܒܝܰܘ̈ܡܳܬܳܐ ܗܳܠܶܝܢ ܕܟ̈ܰܝܳܐ ܘܩܰܕܝ̣̈ܫܶܐ ܕܨܰܘܡܳܐ ܕܢ̇ܶܚܒܘ̣ܨ ܘܢ̇ܶܫܬܰܘܫܰܛ ܠܘܳܬ ܪܘܳܙܳܐ ܘܚܰܕܘ̣ܬܳܐ ܐܰܘܟܝ̣ܬ ܒܘ̣ܣܳܡܳܐ ܕܦܶܨܚܳܐ ܩܰܕܝ̣ܫܳܐ: ܟܰܕ ܡܰܙܠܓܝ̣ܢܰܢ ܒܕܰܟܝܘ̣ܬܳܐ ܘܩܰܕܝܫܘ̣ܬܳܐ: ܡܙܰܡܪܝ̣ܢܰܢ ܠܳܟ ܬܶܫܒ̈ܚܳܬܳܐ ܕܰܟ̈ܝܳܬܳܐ ܘܩܰܕܝ̣̈ܫܳܬܳܐ ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝܫܳܐ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܕܒܰܩܢܘ̣ܡܶܗ ܕܪܰܫ̣ ܠܰܢ ܫܒܝ̣ܠܳܐ ܕܚܰܝ̈ܶܐ ܒܨܘܰܡܶܗ ܕܰܚܠܳܦܰܝܢ: ܐܰܣܝ̣ ܠܝܰܥܢܘ̣ܬܳܐ ܕܚܰܘܳܐ ܐܶܡܰܢ ܩܰܕܡܳܝܬܳܐ: ܘܒܰܬܠܳܬܳܐ ܕܰܪ̈ܶܐ ܕܥܰܡ ܐܳܟܠܩܰܪܨܳܐ: ܘܒ̣ܰܛܶܠ ܡܶܢܰܢ ܠܪܶܚܡܰܬ݀ ܟܰܪܣܳܐ ܘܫܘ̣ܒܚܳܐ ܣܪܝ̣ܩܳܐ: ܘܪܰܒܘ̣ܬ ܢܰܦܫܳܐ: ܘܚ̣ܰܝܶܠ ܠܰܢ ܕܰܒܨܰܘܡܳܐ ܢ̇ܶܙܟܶܝܘܗ̱ܝ: ܘܰܒܡܰܟܝܟܘ̣ܬܳܐ ܢ̇ܫܰܦܠܝ̣ܘܗ̱ܝ: ܘܰܒܚܘ̣ܒܳܐ ܕܰܠܘܳܬ ܚܕܳܕ̈ܶܐ ܢ̇ܦܰܠܗܕܝ̣ܘܗ̱ܝ: ܠܶܗ ܠܰܡܚܰܝܠܳܢܳܐ ܕܕܰܪ̈ܳܪܶܐ ܢ̇ܰܘܕܶܐ ܘܢ̇ܶܣܓܘ̣ܕ ܘܰܢ̇ܫܰܒܰܚ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܕܪܳܡ ܐܰܬܪܶܗ ܘܰܡܥܰܠܰܝ ܡܰܫܪܝܶܗ: ܘܟܽܠܗܽܘܢ ܛܘ̣ܒ̈ܶܐ ܘܣܝ̣̈ܡܳܬܳܐ ܚܡܝ̣ܠܝ̣ܢ ܒܒܶܝܬ ܓܰܙܶܗ: ܗܰܘ̇ ܕܠܳܐ ܣܶܦ̣ܩܰܬ݀ ܡܶܣܟܺܢܘ̣ܬܰܢ ܕܬ̣ܶܣܰܩܝ̱ ܨܶܝܕ ܥܘ̣ܬܪܶܗ: ܐܰܚ̣ܶܬ ܗܘ̣ ܓܰܙܶܗ ܠܘܳܬ ܡܶܣܟܺܢܘ̣ܬܰܢ: ܗܰܘ̇ ܕܡܶܛܽܠ ܕܰܚ̣ܙܳܐ ܕܠܳܐ ܨܳܒܶܝܢܰܢ ܕܢ̇ܶܥܬܰܪ ܡ̣ܶܢ ܫܦܝ̣ܥܘ̣ܬ ܒܰܣܝ̣ܡܘ̣ܬܶܗ ܐܶܬ̣ܡܰܣܟܰܢ ܗܘ̣: ܘܠܰܢ ܐܰܥ̣ܬܰܪ ܒܪܶܚܡܰܬ݀ ܐ̱ܢܳܫܘ̣ܬܶܗ: ܗܰܘ̇ ܕܢܰܓܝ̣ܪܳܐ ܪܘ̣ܚܶܗ ܘܰܙܥܘ̣ܪܝܳܐ ܬܒܰܥܬܶܗ: ܥܰܬܝ̣ܪ ܒܫܘ̣ܒܩܳܢܳܐ: ܘܡܰܬܝ̣ܢ ܠܘܳܬ ܡܶܣܟܺܢܘ̣ܬܳܐ: ܗܰܘ̇ ܕܰܙܥܘ̣ܪ̈ܝܳܢ ܐܶܢܶܝܢ ܡܰܪ̈ܕܘܳܬܶܗ: ܘܣܰܓ̈ܺܝܳܐܢ ܛܰܝ̈ܒܘܳܬܶܗ: ܐܝ̣ܢ ܡܳܪܝܳܐ ܗܰܘ̇ ܚܘ̣ܒܳܐ ܪܰܒܳܐ ܘܠܳܐ ܡܶܬܡܰܫܚܳܢܳܐ: ܫܰܡܠܳܐ ܠܰܢ ܒܚܘ̣ܒܳܐ ܕܡ̣ܶܢ ܠܘܳܬܳܟ: ܘܰܡܠܝ̣ ܠܰܢ ܚܘ̣ܒܳܐ ܕܰܐܠܳܗܘ̣ܬܳܟ: ܐܝ̣ܢ ܫܰܪܝ̣ܪܳܐ ܘܩܰܕܝ̣ܫܳܐ ܡܳܪܝܳܐ ܡܠܝ̣ ܠܶܫܳܢܰܢ ܫܪܳܪܳܟ: ܘܢܰܦܫܰܢ ܗܰܝܡܳܢܘ̣ܬܳܐ ܬܪܝ̣ܨܰܬ݀ ܫܘ̣ܒܚܳܐ ܕܒܳܟ: ܘܦܰܓܪܰܢ ܢܰܩܕܘ̣ܬܳܐ ܘܕܰܟܝܘ̣ܬܳܐ ܘܩܰܕܝ̣ܫܘ̣ܬܳܐ ܘܛܳܒܘ̣ܬܳܐ: ܐܝ̣ܢ ܗܰܘܢܳܐ ܪܰܒܳܐ ܕܰܠܟܽܠ ܗܰܘ̈ܢܝ̣ܢ ܡܰܢܗܰܪ: ܐܰܢܗܰܪ ܠܗܰܘܢܳܐ ܕܝ̣ܠܰܢ: ܗܰܘ̇ ܕܰܒܨܰܠܡܳܟ ܡܰܬܩܰܢ ܒܢܘ̣ܗܪܳܐ ܡܝܰܬܪܳܐ ܘܡܰܠܟܳܝܳܐ ܕܝܰܕܥ̈ܳܬܳܐ ܐܰܠܳܗܳܝ̈ܳܬܳܐ: ܐܝ̣ܢ ܒܪܳܐ ܡܫܝ̣ܚܳܐ ܕܶܐܫ̣ܬܠܰܚܬ ܡ̣ܶܢ ܐܰܒܘ̣ܟ ܠܦܘ̣ܪܩܳܢܰܢ: ܐܰܫܠܰܚܰܝܢ ܚܰܕ̈ܘܳܬܶܗ ܕܥܳܠܡܳܐ ܥܳܒܘ̣ܪܳܐ ܘܡܶܫܬܰܪܝܳܢܳܐ: ܚܠܳܦ ܙܡܝ̣ܪ̈ܳܬܳܐ ܥܳܠ̈ܡܳܢܳܝܳܬܳܐ ܐܰ‌ܠܶܦ ܠܰܢ ܙܡܝ̣ܪ̈ܳܬܳܐ ܩܰܕܝ̣̈ܫܳܬܳܐ ܕܪܘ̣ܚܳܟ ܡܰܥܒܶܕ ܚܰܝ̈ܶܐ: ܚܠܳܦ ܐܳܣܘ̣ܛܘ̣ܬܳܐ ܘܝܰܥܢܘ̣ܬܳܐ ܙܰܝܶܢ ܠܰܢ ܒܨܰܘܡܳܐ ܩܰܕܝ̣ܫܳܐ: ܚܠܳܦ ܚܰܝ̈ܶܐ ܙܰܒ̈ܢܳܝܶܐ ܚܰܝܶܠ ܠܰܢ ܠܘܳܬ ܥܰܡ̈ܠܶܐ ܘܐܰܡ̈ܢܶܐ ܕܰܡܝܰܬܪܘ̣ܬܳܐ: ܚܠܳܦ ܗܰܢܺܝܽܐܘ̣ܬܳܐ ܕܒܶܣܪܳܐ ܗܶܢܝܳܢܳܐ ܕܚܘ̣ܫܳܒ̈ܶܐ ܕܪܳܘܙܝ̣ܢ ܒܪܘ̣ܚ ܫܰܟܶܢ ܠܰܢ: ܚܠܳܦ ܡܰܡܠ̱ܠܳܐ ܣܪܝ̣ܩܳܐ ܐܰ‌ܠܒܶܟ ܠܰܢ ܫܶܬܩܳܐ ܡܝܰܬܪܳܐ: ܚܠܳܦ ܥܶܢ̈ܝܳܢܶܐ ܒܰܪ̈ܳܝܶܐ ܐܰܥܢܳܐ ܠܰܢ ܒܬܶܫܒܶܚ̈ܬܳܐ ܐܰ‌ܠܳܗܳܝ̈ܬܳܐ: ܚܠܳܦ ܪܰܦܝܘ̣ܬܳܐ ܙܰܠܝ̣ܠܬܳܐ ܚܰܘܳܐ ܠܰܢ ܚܝ̣ܨܽܘ̣ܬܳܐ ܠܳܐ ܡܶܬܚܰܣܢܳܢܝ̣ܬܳܐ: ܚܠܳܦ ܓܰܐܝܘ̣ܬܳܐ ܘܰܢܦܝ̣ܚܘ̣ܬܳܐ ܥܰܠܳܐ ܠܰܢ ܠܥܳܢܘܳܝܘ̣ܬܳܐ ܘܢܰܟܦܘ̣ܬܳܐ: ܚܠܳܦ ܕܰܗܝ̣ܢܘ̣ܬܳܐ ܕܦܰܓܪܳܐ ܐܰܩܢܳܐ ܠܰܢ ܕܗܝ̣ܢܘ̣ܬܳܐ ܪܘ̣ܚܳܢܳܝܬܳܐ ܘܢܰܚܒܘ̣ܬܳܐ ܦܰܓܪܢܳܝܬܳܐ: ܚܠܳܦ ܚܘ̣ܫܳܒ̈ܶܐ ܕܪ̈ܳܢܝܳܢ ܒܥܶܠ̈ܠܳܬܳܐ ܐܰܪ̈ܥܳܢܳܝܳܬܳܐ: ܪ̈ܶܥܝܳܢܶܐ ܕܗܳܪܓܝ̣ܢ ܒܰܫ̈ܡܰܝܳܢܝܳܬܳܐ ܚܠܳܦ ܣܶܢܶܐܬܳܐ ܘܰܒܥܶܠܕܒܳܒܘ̣ܬܳܐ: ܡܠܝ̣ ܠܰܢ ܚܘ̣ܒܳܐ ܘܰܡܫܰܝܢܘ̣ܬܳܐ: ܚܠܳܦ ܚܶܡܬܳܐ ܘܰܚܣܳܡܳܐ ܢܝ̣ܚܘ̣ܬܳܐ ܕܶܝܢ ܘܒܰܣܝ̣ܡܘ̣ܬܳܐ: ܙܪܘ̣ܥ ܒܰܢ ܚܠܳܦ ܫܶܩܝܳܐ ܕܚܰܡܪܳܐ ܕܰܡܕܰܘܶܕ ܠܰܢ: ܐܰܫܩܳܐ ܠܰܢ ܫܶܩܝܳܐ ܪܘ̣ܚܳܢܳܝܳܐ ܕܰܡܚܰܕܶܐ ܠܘ̣ܩܒܰܠ ܚܰܪܡܘ̣ܬܳܐ: ܫܰܟܶܢ ܠܰܢ ܡܪܰܚܡܳܢܘ̣ܬܳܐ ܠܘ̣ܩܒܰܠ ܪܳܡܘ̣ܬܳܐ: ܚܰܘܳܐ ܠܰܢ ܡܰܟܝ̣ܟܘ̣ܬܳܐ ܠܘ̣ܩܒܰܠ ܫܘ̣ܒܗܳܪܳܐ: ܫܝ̣ܛܘ̣ܬܳܐ ܛܰܦܶܣ ܒܰܢ ܠܘ̣ܩܒܰܠ ܪܶܚܡܰܬ݀ ܐܝ̣ܩܳܪܳܐ ܘܩܘ̣ܠܳܣܳܐ: ܓܽܘܢܳܝܳܐ ܘܡܰܟܣܳܢܘ̣ܬܳܐ ܐܰܥܒܶܕ ܒܰܢ ܠܘ̣ܩܒܰܠ ܩܶܢ̈ܝܳܢܶܐ ܘܥܘ̣ܬܪ̈ܶܐ: ܡܣܰܪܩܘ̣ܬܳܐ ܕܡ̣ܶܢ ܙܰܒ̈ܢܳܝܳܬܳܐ ܐܰܠܶܦ ܠܰܢ: ܕܚܘ̣ܩ ܡܶܢܰܢ ܠܩܘ̣ܛܳܥ ܪܶܥܝܳܢܳܐ ܘܰܐܠܒܶܟ ܠܰܢ ܡܚܰܡܣܢܳܢܘ̣ܬܳܐ: ܐܝ̣ܢ ܡܰܠܦܳܢܳܐ ܫܰܪܝ̣ܪܳܐ ܫܰܟܶܢ ܠܰܢ ܚܶܟܡܬܳܐ ܕܝܘ̣ܠ̈ܦܳܢܰܝܟ ܐܰܠܳܗܳܝ̈ܶܐ: ܘܦܘ̣ܩ̈ܕܳܢܶܐ ܕܝ̣ܠܳܟ ܡܳܪ̈ܳܢܳܝܶܐ ܐܰܫܠܰܚ ܡܶܢܰܢ ܠܚܰܫ̈ܶܐ ܦܰܓܪ̈ܳܢܳܝܶܐ: ܘܰܐܠܒܶܫ ܠܰܢ ܠܒܘ̣ܫܳܐ ܕܠܳܐ ܡܶܬܚܰܒܠܳܢܘ̣ܬܳܐ: ܥܒܶܕ ܠܰܢ ܦܘ̣ܪܩܳܢܳܐ ܡ̣ܶܢ ܨܶܢ̈ܥܳܬܶܗ ܡܰܘܒܕܳܢ̈ܝܳܬܳܐ ܕܐܳܟܶܠܩܰܪܨܳܐ: ܘܡ̣ܶܢ ܟܽܠܗܽܘܢ ܙܰܘ̈ܥܶܐ ܘܚܘ̣ܫܳܒ̈ܶܐ ܕܰܚܛܝ̣ܬܳܐ ܦܰܨܳܐ ܠܰܢ ܡ̣ܶܢ ܦܶܓܥ̈ܰܘܗ̱ܝ ܕܣܳܛܳܢܳܐ: ܘܡ̣ܶܢ ܦܰܚܰܘ̈ܗ̱ܝ ܥܳܠܡܳܢܳܝ̈ܶܐ ܚܰܣܳܐ ܚܰܘ̈ܒܰܝܢ ܘܰܥܒܶܕ ܠܰܢ ܡ̈ܳܐܢܶܐ ܕܚܳܫܚܝ̣ܢ ܠܐܝ̣ܩܳܪܳܟ ܘܢ̣ܶܬܠܰܘܽܘܢ ܠܰܢ ܪ̈ܰܚܡܰܝܟ ܒܙܰܒܢܳܐ ܗܳܢܳܐ: ܕܒܶܗ ܡ̣ܶܢ ܥܳܠܡܳܐ ܗܳܢܳܐ ܡܶܫܬܪܶܝܢܰܢ: ܘܢ̇ܶܗܘܶܐ ܠܳܟ ܟܶܢܳܪ̈ܶܐ ܕܙܳܡܪܝ̣ܢ ܫܘ̣ܒܚܳܐ ܐܰܡܝ̣ܢܳܐ: ܘܡܰܣܩܝ̣ܢ ܬܰܘܕܝ̣ܬܳܐ ܘܰܕܠܳܐ ܫܶܠܝܳܐ: ܠܳܟ ܡܳܪܝ̱ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܒܓܘ̣ܕ̈ܶܐ ܪ̈ܘ̣ܚܳܢܳܝܳܬܳܐ ܘܩܰܕܝ̣̈ܫܳܬܳܐ: ܘܰܒܟܶܢ̈ܫܳܐ ܠܳܐ ܗܘ̣ܠܳܢܳܝ̈ܶܐ: ܗܳܢܽܘܢ ܕܰܠܥܶܠ ܡ̣ܶܢ ܥܳܠܡܳܐ ܗܳܢܳܐ ܗܳܠܶܝܢ ܕܰܕܠܳܐ ܫܰܠܘܳܐ ܡܫܰܒܚܝ̣ܢ ܠܳܟ: ܚܰܠܶܛ ܡܳܪܝܳܐ ܠܟܶܢܫܳܐ ܗܳܢܳܐ ܒܨܝ̣ܪܳܐ ܕܝ̣ܠܰܢ: ܘܠܳܐ ܒܝܰܕ ܫܶܢܬܳܐ ܕܰܚܛܝ̣ܬܳܐ ܢ̇ܶܬܢܰܟܪܶܐ: ܘܢ̇ܶܬܪܚܶܩ ܡ̣ܶܢ ܟܶܢ̈ܫܶܐ ܕܩܰܕܝ̣̈ܫܶܐ: ܗܳܢܽܘܢ ܕܰܡܫܰܒܚܝ̣ܢ ܠܳܟ ܪܘ̣ܚܳܢܳܐܝ̣ܬ ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀