ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܠܳܟ ܡܫܰܒܚܝ̣ܢܰܢ ܡܳܪܝܳܐ ܡܪܰܚܡܳܢܳܐ: ܕܙܰܝܶܢ̣ܬ ܡܚܝ̣ܠܘ̣ܬܰܢ ܒܙܰܝ̈ܢܶܐ ܕܨܰܘܡܳܐ ܩܰܕܝ̣ܫܳܐ: ܐܰܝܟܰܢܳܐ ܕܒܶܗ ܢ̇ܶܬܟܰܬܰܫ ܥܰܡ ܒܥܶܠܕܰܪܰܢ: ܘܢ̇ܶܣܰܒ ܙܳܟܘ̣ܬܳܐ ܒܚܰܝܠܶܗ ܕܰܨܠܝ̣ܒܳܐ ܙܰܟܳܝܳܐ ܘܡܰܥܒܶܕ ܚܰܝ̈ܶܐ: ܘܟܰܕ ܙܳܟܘ̣ܬܳܐ ܚܰܝܠܬܳܢܝ̣ܬܳܐ ܘܓܰܢ̱ܒܳܪܘ̣ܬܳܐ ܢܳܣ̇ܒܝ̣ܢܰܢ: ܥܰܡ ܡܙܰܡܪܳܢܳܐ ܕܰܘܺܝ̣ܕ ܒܪܰܒܘ̣ܬ ܩ̈ܳܠܶܐ ܢܰܨܝ̣ܚܳܐܝ̣ܬ ܢ̇ܰܙܥܶܩ: ܕܗܳܢܽܘܢ ܒܪܰܟܘ̱ ܘܰܢܦ̣ܰܠܘ̱: ܘܰܚܢܰܢ ܩܳܡ̣ܢܰܢ ܒܥܘ̣ܕܪܳܢܳܐ ܕܝ̣ܠܳܟ ܡܳܪܝܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܕܩܰܪܝ̣ܒ ܗ̱ܘ̣ ܠܰܐܝܠܶܝܢ ܕܩܳܪܶܝܢ ܠܶܗ ܒܩܘ̣ܫܬܳܐ: ܘܨܳܒܶܐ ܒܚܰܝ̈ܶܐ ܘܦܘ̣ܪܩܳܢܳܐ ܕܰܓܒܝ̣ܠܬܶܗ: ܗܰܘ̇ ܕܰܦܬܝ̣ܚ ܬܰܪܥܶܗ ܠܬܰܝܳܒ̈ܶܐ: ܘܚܳܐܰܪ ܠܡܶܬܦܰܢܝܳܢܘ̣ܬܳܐ ܕܝ̣ܠܗܽܘܢ ܗܰܘ̇ ܕܡܰܘܫܶܛ ܐܝ̣ܕܳܐ ܕܥܘ̣ܕܪܳܢܳܐ ܠܰܐܝܠܶܝܢ ܕܰܠܘܳܬܶܗ ܡܶܬܦܢܶܝܢ: ܘܡܰܥܒܰܪ ܣܰܟ̈ܠܘܳܬܗܽܘܢ ܘܡܶܫܬܰܪ̈ܥܳܢܘܳܬܗܽܘܢ ܒܰܬܝܳܒܘ̣ܬܳܐ ܕܰܠܘܳܬܶܗ: ܡܦܝ̣ܣܝ̣ܢܰܢ ܠܳܟ ܡܳܪܝܳܐ ܐܰܠܳܗܳܐ ܕܰܬ̣ܫܰܟܶܢ ܒܥܶܕܳܢܳܐ ܗܳܢܳܐ ܠܥܰܒ̈ܕܰܝܟ ܕܰܩܕܳܡܰܝܟ ܪܟܝ̣ܢܝ̣ܢ ܚܘ̣ܣܳܝܳܐ ܘܫܘ̣ܒܩܳܢܳܐ ܕܰܚ̈ܛܳܗܶܐ: ܘܒܰܛܶܠ ܡܰܪ̈ܕܘܳܬܳܐ ܕܪܘ̣ܓܙܳܐ ܕܡܶܛܽܠ ܚܛܳܗ̈ܰܝܢ ܠܚܝ̣̈ܡܳܢ ܠܰܢ: ܘܰܐܕܢܰܚ ܪ̈ܰܚܡܰܝܟ ܥܰܠ ܥܰܡܳܟ ܡܗܰܝܡܢܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܫܡܰܥ ܒܰܚܢܳܢܳܟ ܡܳܪܰܢ ܨܠܰܘ̈ܳܬܳܐ ܘܬܰܟܫ̈ܦܳܬܳܐ ܕܝ̣ܠܰܢ ܚܰܛ̈ܳܝܶܐ: ܐܳܦ ܡܰܣܟ̈ܠܳܢܶܐ ܥܰܒ̈ܕܰܝܟ: ܕܰܒܥܶܕܳܢܳܐ ܗܳܢܳܐ ܡܩܰܪܒܝ̣ܢܰܢ ܩܕܳܡܰܝܟ ܥܰܡ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܟܰܕ ܬܳܒܥܝ̣ܢܰܢ ܠܡܶܓܰܕ ܠܘܳܬܰܢ ܠܪ̈ܰܚܡܰܝܟ ܠܳܐ ܡܶܬܡܰܫ̈ܚܳܢܶܐ: ܘܩܰܒܶܠ ܐܶܢܽܘܢ ܡܶܢܰܢ ܐܰܝܟ ܪܶܚܡܰܬ݀ ܐ̱ܢܳܫܘ̣ܬܳܟ ܠܳܐ ܡܶܬܡܰܠܠܳܢܝ̣ܬܳܐ: ܗܳܝ ܕܒܳܗܿ ܡ̣ܶܢ ܠܳܐ ܡܶܕܶܡ ܒ̣ܪܰܝܬ ܠܰܢ: ܘܒܰܝ̈ܬܳܝܶܐ ܠܡܳܪܘ̣ܬܳܟ ܠܡܶܗܘܳܐ ܐܰܫܘܝ̣ܬ ܠܰܢ: ܘܟܰܕ ܢܦܰܠ̣ܢܰܢ ܡ̣ܶܢ ܬܘ̣ܩܳܢܰܢ ܩܰܕܡܳܝܳܐ: ܘܒܰܡܕܰܒܪܳܢܘ̣ܬܳܟ ܦܳܪܘ̣ܩܳܝܬܳܐ ܘܰܒ̈ܚܰܫܰܝܟ ܡܰܥ̈ܒܕܰܝ ܚܰܝ̈ܶܐ ܐܰܩܝ̣ܡܬ ܠܰܢ ܘܳܐܦ ܒܨܰܘܡܳܟ ܕܥܰܠ ܐܰܦ̈ܝܰܢ: ܘܡܶܛܽܠ ܕܰܐܪܓ̣ܶܙܢܳܟ ܐܳܦ ܗܳܫܳܐ ܒܣܘ̣ܪ̈ܚܳܢܰܝܢ ܘܰܗܦܰܟ̣ܢܰܢ ܘܶܐܬ̣ܬܘܺܝ̣ܢܰܢ ܠܡܶܩܰܫ ܒܬܰܪܥܳܐ ܕܪ̈ܰܚܡܰܝܟ: ܡܦܝ̣ܣܝ̣ܢܰܢ ܠܒܰܣܝ̣ܡܘ̣ܬܳܟ ܕܠܳܐ ܐܰܝܟ ܡܳܪܘ̣ܕܘ̣ܬܳܐ ܘܩܰܫܝܘ̣ܬܳܐ ܕܠܶܒܳܐ ܕܝ̣ܠܰܢ ܬ̣ܶܬܚܰܫܰܚ ܠܘܳܬܰܢ: ܠܳܐ ܬ̣ܶܟܦܘ̣ܪ ܒܰܢ ܐܰܠܳܗܳܐ: ܡܶܛܠ ܕܶܐܬ̣ܓܰܘܣܢܰܢ ܒܳܟ ܠܳܐ ܬ̣ܰܒܗܶܬ ܠܰܢ ܚܰܢܳܢܳܐ: ܡܶܛܽܠ ܕܰܥܠܰܝܟ ܗ̱ܘ̣ ܣܰܒܪܰܢ ܠܳܐ ܡܳܪܝ̱ ܬ̣ܶܕܚܘ̣ܩ ܠܰܢ ܡ̣ܶܢ ܠܘܳܬܳܟ: ܠܰܢ ܗܳܢܽܘܢ ܕܰܒܨܰܠܡܳܟ ܒܪܰܝܬ ܘܬܰܩܶܢ̣ܬ: ܠܳܐ ܡܳܪܝ̱ ܬ̣ܰܣܠܶܐ ܠܰܢ ܡ̣ܶܢ ܩܕܳܡܰܝܟ: ܠܰܢ ܗܳܢܽܘܢ ܕܡܶܛܽܠܳܬܰܢ ܣܰܝܒ̣ܰܪܬ ܒܰܒܣܰܪ ܨܠܝ̣ܒܳܐ ܩܰܕܝ̣ܫܳܐ: ܠܳܐ ܬ̣ܶܢܰܕ ܠܳܟ ܡܶܢܰܢ ܡܳܪܝܳܐ ܘܬ̣ܰܫܠܶܡ ܠܰܢ ܠܬܰܫܢܝ̣̈ܩܶܐ: ܠܰܢ ܗܳܢܽܘܢ ܕܥܰܡ ܦܰܓܪܳܟ ܘܰܕܡܳܟ ܐܶܬ̣ܡܙܰܓܢܰܢ: ܠܳܐ ܡܳܪܝ̱ ܬ̣ܰܗܡܶܐ ܡܶܢܰܢ ܛܰܝܒܘ̣ܬܳܟ ܕܥܰܡ ܟܳܦܘ̣ܪ̈ܶܐ ܗܳܢܽܘܢ ܕܰܕܠܳܐ ܣܰܒܪܳܐ ܢ̇ܶܬܢܓܶܕ ܐܶܠܳܐ ܗܰܒ ܘܰܐܫܘܳܐ ܠܰܢ ܕܰܒܡܶܬܦܰܢܝܳܢܘ̣ܬܰܢ ܕܰܠܘܳܬܟ: ܢ̣ܶܬܠܰܒܒܽܘܢ ܟܽܠܗܽܘܢ ܚܰܛ̈ܳܝܶܐ ܕܰܐܟܘܳܬܰܢ: ܕܠܳܐ ܢ̣ܶܦܣܩܽܘܢ ܣܰܒܪܳܐ ܥܰܠ ܚܰܝܰܝ̈ܗܽܘܢ: ܐܰܢ̱ܬ ܓܶܝܪ ܡܳܪܝ̱ ܐܶܡ̣ܰܪܬ: ܕܰܒܝܰܘܡܳܐ ܕܢ̣ܶܗܦܘ̣ܟ ܥܰܘܳܠܳܐ ܡ̣ܶܢ ܥܰܘܠܶܗ: ܠܳܐ ܐܶܬܕܟܰܪ ܠܶܗ ܚܛܝ̣ܬܶܗ: ܘܶܐܢ ܕܢ̣ܶܗܘܽܘܢ ܚܛܳܗܰܝ̈ܟܽܘܢ ܐܰܝܟ ܙܚܽܘ̣ܪܝ̣ܬܳܐ܇ ܐܰܝܟ ܬܰܠܓܳܐ ܢܶܬܚܰܘܪܽܘܢ: ܘܶܐܢ ܬܶܬ̣ܦܢܽܘܢ ܠܘܳܬܝ̱: ܐܶܢܳܐ ܐܰܣܶܐ ܬܒܳܪܳܐ ܕܝ̣ܠܟܽܘܢ: ܘܗܳܫܳܐ ܡܳܪܝܳܐ ܕܦܳܢܶܝܢܰܢ ܠܘܳܬܳܟ ܠܳܐ ܬ̣ܶܓܠܘ̣ܙ ܪ̈ܰܚܡܰܝܟ ܡܶܢܰܢ: ܕܳܐܦܶܢ ܓܶܝܪ ܝܰܬܝ̣ܪ ܡ̣ܶܢ ܟܽܠ ܐ̱ܢܳܫ ܐܰܪܓ݂ܶܙܢܳܟ ܒܰܥ̈ܒܳܕܰܝܢ ܒܝ̣̈ܫܶܐ: ܐܶܠܳܐ ܡܶܛܽܠ ܫܡܳܟ ܩܰܕܝ̣ܫܳܐ ܗܰܘ̇ ܕܶܐܬ̣ܩܪܝ̣ ܥܠܰܝܢ: ܕܠܳܐ ܐܰܗܦܶܟ̣ܢܰܢ ܐܰܦ̈ܝܰܢ ܡܶܢܳܟ: ܐܳܦܠܳܐ ܐܰܢ̱ܬ ܡܳܪܝ̱ ܬ̣ܰܗܦܶܟ ܐܰܦ̈ܰܝܟ ܡܶܢܰܢ: ܘܠܳܐ ܬ̣ܶܥܒܶܕ ܠܰܢ ܠܚܶܣܕܳܐ ܘܰܠܡܘ̣ܝܳܩܳܐ ܠܥܰܡ̱̈ܡܶܐ ܕܠܳܐ ܐܰ‌ܠܳܗ: ܐܳܦܠܳܐ ܬ̣ܰܫܠܶܡ ܠܰܢ ܒܐܝ̣̈ܕܰܝ ܒܝ̣ܫܳܐ ܣܳܩܘ̣ܪܰܢ ܗܰܘ̇ ܕܨܳܒܶܐ ܕܢ̣ܰܦܶܕ ܠܰܢ ܡ̣ܶܢ ܣܰܒܪܰܢ ܒܰܣܝ̣ܡܳܐ ܕܰܠܘܳܬܳܟ: ܝܳܕܰܥ ܐܰܢ̱ܬ ܗ̱ܘ̣ ܓܶܝܪ ܕܶܐܢܗܽܘ ܕܬ̣ܶܫܒܘ̣ܩ ܠܰܢ ܕܢ̇ܶܬܢܰܣܶܐ ܒܰܩܪ̈ܳܒܰܘܗ̱ܝ ܕܒܝ̣ܫܳܐ ܕܰܠܝ̣̈ܠܰܝ ܠܡܰܦܘ̣ܠܬܳܐ ܐܝ̣ܬܰܝܢ: ܘܰܦܫܝ̣̈ܩܰܝ ܠܡܶܨܛܰܠܝܳܢܘ̣ܬܳܐ: ܘܰܒܟܽܠܶܗ ܟܝܳܢܳܐ ܐ̱ܢܳܫܳܝܳܐ ܠܰܝܬ ܕܰܡܥܰܠܰܝ ܡ̣ܶܢ ܡܘ̣ܡ̈ܶܐ ܘܛܘ̣ܠ̈ܫܶܐ ܕܰܚܛܝ̣ܬܳܐ: ܐܶܠܳܐ ܐܶܢ ܐܰܢ̱ܬ ܐܰܠܳܗܳܐ ܕܨܳܒܶܐ ܒܚܰܝ̈ܶܐ ܕܟܽܠ: ܘܚܳܐܰܪ ܐܰܢ̱ܬ ܠܡܶܬܦܰܢܝܳܢܘ̣ܬܳܐ ܕܟܽܠ ܐ̱ܢܳܫ ܩܰܒܶܠ ܠܰܢ ܘܚܰܒܶܒ ܠܰܢ: ܘܚܰܕܳܐ ܠܰܢ ܒܛܳܒ̈ܳܬܳܟ ܫܡܰܝ̈ܳܢܝܳܬܳܐ ܘܕܰܠܥܳܠܰܡ: ܡܶܛܠ ܕܕܝ̣ܠܳܟ ܗ̱ܘ̣ ܫܘ̣ܠܛܳܢܳܐ ܘܡܰܠܟܘ̣ܬܳܐ ܘܬܶܫܒܘ̣ܚܬܳܐ: ܘܠܳܟ ܫܘ̣ܒܚܳܐ ܡܰܣܩܝ̣ܢܰܢ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܺܝ̣ܪܡܳܐ

ܗܰܒܠܰܢ ܡܳܪܝ̱ ܕܢ̇ܶܗܘܶܐ ܬܰܠܡܝ̣̈ܕܶܐ ܠܰܫܪܳܪܳܟ: ܘܡܶܫܬܰܡ̈ܥܳܢܶܐ ܠܦܘ̣ܩ̈ܕܳܢܰܝܟ ܘܰܡܢܝ̣̈ܚܳܢܶܐ ܠܪ̈ܰܚܡܰܝܟ: ܐܰܥܬܰܪ ܠܰܢ ܒܣܰܒܪܳܟ ܘܰܒܚܘ̣ܒܳܟ: ܘܰܒܗܰܝܡܳܢܘ̣ܬܳܐ ܫܰܪܝ̣ܪܬܳܐ ܘܠܳܐ ܡܶܨܛܰܠܝܳܢܝ̣ܬܳܐ: ܘܩܰܒܶܠ ܦܝ̣ܪܡܰܢ ܠܰܢܝܳܚܳܐ ܕܰܡܪܰܚܡܳܢܘ̣ܬܳܟ ܘܰܗܘܺܝ̣ ܠܰܢ ܐܰܒܳܐ ܘܫܘ̣ܪܳܐ ܘܒܶܝܬ ܓܰܘܣܳܐ: ܘܰܡܠܝ̣ ܢܰܦ̈ܫܳܬܰܢ ܦܘ̣ܪܩܳܢܳܟ ܘܦܰܓܪ̈ܰܝܢ ܥܘ̣ܕܪܳܢܳܐ ܕܛܰܝܒܘ̣ܬܳܟ: ܘܰܐܫܘܳܐ ܠܰܢ ܕܰܒܩܳܠܳܐ ܪܳܡܳܐ ܘܒܰܐܦ̈ܶܐ ܓܰܠܝ̈ܳܬܳܐ: ܘܰܒܬܰܪܥܝ̣ܬܳܐ ܕܟܝ̣ܬܳܐ ܢ̇ܰܣܶܩ ܠܳܟ ܡܡܰܠܠܘ̣ܬ ܬܶܫܒ̈ܚܳܬܳܐ ܒܟܽܠܙܒܰܢ ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀