ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܳܪܳܐ ܛܳܒܳܐ ܕܚܳܐܶܢ ܠܚܰܛܳܝ̈ܶܐ ܕܬܳܝܒܝ̣ܢ: ܘܨܳܒܶܐ ܒܬܰܝܳܒ̈ܶܐ ܕܰܠܘܳܬܶܗ ܡܶܬܦܢܶܝܢ: ܠܗܰܘ̇ ܡܰܠܝܳܐ ܘܥܰܬܝ̣ܪܳܐ ܕܪܳܚܶܡ ܠܰܣܢܝ̣̈ܩܶܐ ܕܫܳܐܠܝ̣ܢ ܠܶܗ: ܘܚܳܕܶܐ ܒܢܳܣ̈ܘ̣ܒܶܐ ܕܢܳܩܫܝ̣ܢ ܒܬܰܪܥܶܗ: ܠܗܰܘ̇ ܡܚܰܣܝܳܢܳܐ ܘܚܰܝܘ̣ܣܬܳܢܳܐ ܕܰܪܓܝ̣ܓ ܠܦܘ̣ܢܳܝܰܢ: ܘܣܳܘܰܚ ܠܒܳܥ̈ܘܳܬܰܢ ܡܶܛܽܠ ܦܘ̣ܪܩܳܢܰܢ ܛܳܒܳܐ ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܕܝ̣ܠܰܢ: ܠܳܐ ܬ̣ܶܫܕܶܐ ܠܰܢ ܒܥ̈ܘ̣ܒܶܐ ܣܦܝ̣̈ܩܶܐ: ܗܰܘ̇ ܕܡ̣ܶܢ ܥܘ̣ܒܳܐ ܛܘ̣ܒܬܳܢ ܒܟܽܠ: ܠܛܳܒܘ̣ܬܳܐ ܕܝ̣ܠܳܟ ܠܰܪܓܶܠܬܳܐ ܕܒܘ̣ܣܳܡ̈ܶܐ ܠܟܽܠ ܡܰܫܦܰܥ ܐܰܢ̱ܬ: ܠܳܐ ܬܶܣܟܘ̣ܪ ܠܰܢ ܐܘ̣ܪܚܳܐ ܕܰܠܘܳܬ ܬܝܳܒܘ̣ܬܳܐ: ܗܰܘ̇ ܕܳܐܦ ܠܗܽܘܢ ܠܰܫܡܰܝܳܐ ܠܡܶܦܬܰܚ ܠܰܢ ܡܶܫܬܰܘܕܶܐ ܐܰܢ̱ܬ: ܠܳܐ ܬ̣ܚܰܦܶܐ ܒܒܶܗܬܬܳܐ ܠܦܰܪ̈ܨܽܘ̣ܦܶܐ ܕܝ̣ܠܰܢ: ܟܰܕ ܡ̣ܶܢ ܣܰܒܪܳܐ ܗܰܘ̇ ܛܳܒܳܐ ܦ̣ܰܕܢܰܢ: ܠܳܐ ܢ̣ܶܗܘܽܘܢ ܗܳܢܽܘܢ ܕܡ̣ܶܢ ܩܕܝ̣ܡ ܪ̈ܚܝ̣ܡܶܐ ܘܚܰܒܝ̣̈ܒܶܐ ܗܳܫܳܐ ܣܢܝ̣̈ܩܶܐ ܘܰܣܢܰܝ̈ܳܐ: ܗܳܢܽܘܢ ܕܡ̣ܶܢ ܩܕܝ̣ܡ ܘܝܳܪ̈ܬܶܐ ܘܰܒ̈ܢܰܝܳܐ ܗܳܫܳܐ ܐܰܟܣ̈ܢܳܝܶܐ ܘܰܡܢܰܟܪ̈ܰܝܳܐ: ܠܳܐ ܬ̣ܰܛܶܢ ܠܰܢ ܒܠܳܐ ܥܰܡܳܐ: ܐܰܝܟܰܢܳܐ ܕܳܐܦ ܚܢܰܢ ܐܰܛܶܢܢܳܟ ܒܚܰܫ̈ܶܐ ܫܟܝ̣ܪ̈ܶܐ ܘܰܕܠܳܐ ܢܳܡܘ̣ܣ: ܠܳܐ ܬ̣ܩܝ̣ܡ ܠܰܢ ܣܰܩܘ̣ܒܠܳܐܝ̣ܬ ܐܘ̣ܡܬܳܐ ܥܶܪܬܳܐ ܘܰܡܡܰܪܡܪܳܢܝ̣ܬܳܐ ܒܝܘ̣ܠܦܳܢܳܐ ܒܝ̣ܫܳܐ: ܘܰܥܝ̈ܳܕܶܐ ܫܟܝ̣ܪ̈ܶܐ ܕܠܘ̣ܩܒܰܠ ܐܶܘܰܢܓܶܠܝܽܘܢ ܕܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ ܡܶܬܟܰܬܫ̈ܳܢܶܐ: ܐܶܢ ܕܶܝܢ ܡܰܣܠܶܐ ܐܰܢ̱ܬ ܠܰܢ ܡ̣ܶܢ ܥܰܒܕ̈ܶܐ ܕܝ̣ܠܳܟ ܡܳܪܝܳܐ: ܘܠܰܒܥܶܠ̈ܕܒܳܒܶܐ ܡܚܰܒ̈ܠܳܢܶܐ ܡܰܫ̇ܠܶܡ ܐܰܢ̱ܬ ܠܰܢ: ܚܢܰܢ ܡܰܢ ܐܰܝܟ ܒܢܰܝ̈ܳܐ ܕܠܳܐ ܡܶܬܬܦܝ̣ܣܳܢܘ̣ܬܳܐ ܟܺܐܢܳܐܝ̣ܬ ܐܳܒܕܝ̣ܢܰܢ: ܐܰܢ̱ܬ ܕܶܝܢ ܡܳܪܝܳܐ ܟܰܕ ܛܰܢܳܢܳܐ ܘܣܳܢܶܐ ܒܝ̈ܫܳܬܳܐ ܐܝ̣ܬܰܝܟ: ܐܰܝܟܰܢܳܐ ܡܶܫܟܰܚ ܐܰܢ̱ܬ ܠܰܡܣܰܝܒܳܪܽܘ̣ ܬܪܝ̣ܥܘ̣ܬ ܦܘ̣ܡ̈ܶܐ ܕܥܰܡ̱̈ܡܶܐ ܠܳܐ ܡܗܰܝ̈ܡܢܶܐ: ܒܢܰܝ̈ܳܐ ܓܶܝܪ ܕܚܰܢ̈ܦܶܐ ܘܰܕܝ̈ܘ̣ܕܳܝܶܐ ܚܳܕܝܶܢ: ܘܟܶܢܫܳܐ ܚܰܣܳܡܳܐ ܕܫܺܐܕ̈ܶܐ ܢܳܩܶܫ ܟܰܦܳܐ: ܐܶܢ ܗܘ̣ ܕܳܐܦ ܚܢܰܢ ܣܳܓܘ̣ܕ̈ܶܐ ܕܝ̣ܠܳܟ: ܥܰܡܗܽܘܢ ܐܰܟܚܕܳܐ ܡ̣ܶܢ ܒܰܝܬܳܝܘ̣ܬܳܐ ܗܳܝ ܕܝ̣ܠܳܟ ܢ̇ܶܦܶܠ: ܡܶܬܟܰܡܪܝ̣ܢ ܕܶܝܢ ܒܪܰܡ ܚܰܝ̈ܠܰܘܳܬܳܐ ܕܰܠܥܶܠ: ܘܪ̈ܘ̣ܚܳܬܳܐ ܕܩܰܕܝ̈ܫܶܐ ܕܝ̣ܠܳܟ ܡܶܬܐܰܒܠ̈ܳܢ ܥܠܰܝܢ: ܐܶܢܗܘ̣ ܕܡ̣ܶܢ ܡܢܳܬܳܐ ܕܝ̣ܠܗܽܘܢ ܢ̇ܶܬܢܰܟܪܶܐ ܡ̣ܶܢ ܟܽܠ ܦܪܘ̣ܣ ܕܶܝܢ ܐܳܦܠܳܐ ܐܰܢ̱ܬ ܗ̱ܘ̣ ܕܠܳܐ ܡܫܰܘܬܳܦܘ̣ܬ ܚܰܫܳܐ ܡܶܬܪܡܶܐ ܐܰܢ̱ܬ ܠܗܳܢܳܐ ܕܟܽܠܶܗ ܚܘ̣ܣܪܳܢܳܐ ܠܰܡܣܰܝܒܳܪܘ̣: ܟܰܕ ܒܰܣܝ̣ܡܳܐ ܝܰܬܝ̣ܪܳܐܝ̣ܬ: ܘܦܳܪܘ̣ܩܳܐ ܘܝܳܨܽܘܦܳܐ ܕܥܺܕܬܳܟ: ܘܒܰܕܓܽܘܢ ܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܕܰܠܗܳܢܽܘܢ ܕܟܺܐܢܳܐܝ̣ܬ ܐܰܗܦܶܟ̣ܬ ܐܰܦ̈ܰܝܟ ܡ̣ܶܢܗܽܘܢ ܟܰܕ ܠܳܐ ܣܰܒܥܳܐܝ̣ܬ ܚܳܛܶܝܢ ܗ̱ܘܰܘ: ܠܗܽܘܢ ܠܗܳܠܶܝܢ ܒܪܶܚܡܰܬ݀ ܐ̱ܢܳܫܘ̣ܬܳܟ ܩܰܒܶܠ ܐܳܦܶܢ ܡܢܳܬܳܢܳܐܝ̣ܬ ܬܳܝܒܝ̣ܢ: ܗܳܢܽܘܢ ܟܰܕ ܓܘ̣ܡܕܳܢܳܐܝ̣ܬ ܡܪܰܓܙܝ̣ܢ ܗ̱ܘܰܘ ܠܳܟ: ܙܥܝ̣ܦܳܐ ܡܶܕܶܡ ܘܝܰܬܝ̣ܪ ܚܶܡܬܳܢܳܐ ܒܗܽܘܢ ܚ̣ܳܪܬ: ܒܗܽܘܢ ܒܗܳܠܶܝܢ ܕܒܰܒ̈ܢܳܬ ܩ̈ܳܠܶܐ ܪ̈ܰܥܘ̣ܡܳܬܳܐ ܡܶܬܚܰܢܢܝ̣ܢ ܠܳܟ: ܒܥܰܝ̈ܢܶܐ ܦܨܝ̈ܚܳܬܳܐ ܐܰܨܶܕ ܐܶܬ̣ܢܰܚܬ ܐܶܬ̣ܚܰܠܰܦ: ܐܶܫܬܰܝܰܢ ܠܰܢ ܠܥܰܒ̈ܕܶܐ ܘܠܰܐܡ̈ܗܳܬܳܐ ܕܝ̣ܠܳܟ ܡܳܪܝܳܐ ܚܰܒܶܒ: ܠܰܒܶܒ: ܥܰܦܶܩ: ܒܰܝܰܐ ܠܰܒ̈ܢܰܝܟ ܘܰܠܒ̈ܢܳܬܳܟ: ܝ̣ܨܰܦ ܕܟܽܠܗܽܘܢ ܘܰܕܟܽܠܗܶܝܢ ܠܚܰܫ̈ܰܝܢ ܟܣܰܝ̈ܳܐ: ܘܥܰܣ̈ܩܰܝ ܠܡܶܬܰܐܣܳܝܘ̣ ܐܰܚܠܶܡ ܠܫܘ̣ܚ̈ܢܰܝܢ ܓܰܠܝ̈ܳܐ ܘܡܰܟ̈ܰܐܒܶܐ ܐܰܣܳܐ: ܘܩܰܒܶܠ ܡܳܪܝܳܐ ܡܶܫܬܰܘܕܝܳܢܘ̣ܬܳܐ ܕܚܰܘ̈ܒܳܬܳܐ ܕܝ̣ܠܰܢ: ܘܫܰܟܶܢ ܠܰܢ ܫܘ̣ܒܩܳܢܳܐ ܕܰܚܛܳܗ̈ܐ: ܩܰܒܶܠ ܛܘ̣̈ܦܶܐ ܙܥܘ̣ܪ̈ܝܳܬܳܐ ܕܕܶܡ̈ܥܶܐ ܕܝ̣ܠܰܢ: ܘܫܰܟܶܢ ܠܰܢ ܡܶܛܪ̈ܶܐ ܫܦܝ̣̈ܥܶܐ ܕܰܚܢܳܢܳܟ: ܘܟܰܕ ܠܓܘ̣ܪ̈ܓܳܚܶܐ ܕܝ̣ܠܰܢ ܩܕܳܡܰܝܟ ܡܶܢܰܢ ܢܳܣܶܒ ܐܰܢ̱ܬ: ܗܰܒܠܰܢ ܩܰܘܡܳܐ ܘܰܩܝܳܡܬܳܐ ܕܥܰܡ ܩܰܕܝ̣̈ܫܰܝܟ: ܗܳܠܶܝܢ ܓܶܝܪ ܡܶܣ̈ܟܺܢܶܐ ܕܥܰܡܳܐ ܕܝ̣ܠܳܟ: ܠܪ̈ܰܚܡܶܐ ܕܝ̣ܠܳܟ ܫܳܐܠܝ̣ܢ ܘܰܠܦܘ̣ܪܩܳܢܳܟ ܡܶܬܝܰܐܝܒܝ̣ܢ: ܘܗܳܢܽܘܢ ܕܒܰܚܛܝ̣ܬܳܐ ܠܗܰܘ̇ ܕܰܫܩ̣ܰܠ ܚܛܝ̣ܬܶܗ ܕܥܳܠܡܳܐ: ܗܳܢܽܘܢ ܕܰܒܚܶܫܘ̣ܟܳܐ ܕܠܳܐ ܝ̣ܕܰܥܬܳܐ: ܠܫܶܡܫܳܐ ܗܰܘ̇ ܕܙܰܕܝܩܘ̣ܬܳܐ: ܫܒܰܝ̈ܳܐ ܠܦܳܪܘ̣ܩܳܐ: ܐܰܣܝ̣ܪ̈ܶܐ ܠܰܡܫܰܘܙܒܳܢܳܐ ܡܣܰܒܪܝ̣ܢ ܟܪ̈ܝܗܶܐ ܠܳܐܣܝܳܐ: ܣܢܝ̣̈ܩܶܐ ܠܪܰܒ ܡܰܘܗܰܒܬܳܐ: ܡܝ̣̈ܬܶܐ ܠܝܳܗܶܒ ܚܰܝ̈ܶܐ ܡܣܰܟܶܝܢ: ܬܳܐ ܗܳܟܝ̣ܠ ܐܳܘ ܡܳܪܝܳܐ ܘܰܗܘܺܝ̣ ܟܽܠ ܠܟܽܠ: ܐܰܝܟܰܢܳܐ ܕܰܠܟܽܠܰܢ ܬ̣ܶܦܪܘ̣ܩ ܠܣܳܓ̈ܘ̣ܕܰܝܟ: ܘܟܰܕ ܕܟܰܝ̈ܳܐ ܡ̣ܶܢ ܛܰܡ̈ܶܐܐ ܥܳܒܶܕ ܐܰܢ̱ܬ ܠܰܢ: ܘܡ̣ܶܢ ܡܚܝ̣̈ܠܶܐ ܚܠܝ̣̈ܡܶܐ: ܘܡ̣ܶܢ ܡܶܣ̈ܟܺܢܶܐ ܥܰܬܝ̣ܪ̈ܶܐ: ܘܰܫ̈ܡܰܝܳܢܶܐ ܚܠܳܦ ܐܰܪ̈ܥܳܢܶܐ: ܫܘ̣ܒܚܳܐ ܘܐܝ̣ܩܳܪܳܐ ܘܣܶܓܕܬܳܐ ܢ̇ܶܫܬܘܶܐ ܕܢ̇ܰܣܶܩ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ܀