ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܡܳܪܝܳܐ ܡ̇ܠܶܐ̣ ܪ̈ܰܚܡܶܐ: ܠܳܐ ܬ̣ܰܗܦܶܟ ܐܰܦ̈ܰܝܟ ܡܶܢܰܢ ܡܶܛܽܠ ܥܰܘ̈ܠܰܝܢ: ܐܶܠܳܐ ܚܘ̣ܪ ܒܰܢ ܒܥܰܝܢܳܐ ܛܳܒܬܳܐ ܘܰܒܬܰܪܥܝ̣ܬܳܐ ܡܫܰܝܰܢܬܳܐ: ܘܰܐܢܗܰܪ ܥܰܝ̈ܢܰܝܢ ܕܠܳܐ ܢ̇ܶܕܡܰܟ ܠܡܰܘܬܳܐ ܕܚܰܛܝ̣ܬܳܐ ܡܶܛܽܠ ܕܥܰܠ ܛܰܝܒܘ̣ܬܳܟ ܡܥܰܠܝܰܬ݀ ܡ̣ܶܢ ܟܽܠ ܬܟܝ̣ܠܝ̣ܢܰܢ: ܘܰܐܫܘܳܐ ܠܰܢ ܕܢ̇ܶܪܘܰܙ ܒܦܘ̣ܪܩܳܢܳܟ: ܘܰܢ̇ܫܰܒܚܳܟ ܕܠܳܐ ܫܶܠܝܳܐ: ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܕܟܰܕ ܠܳܐ ܫܰܢܝ̣ ܡ̣ܶܢ ܠܘܳܬ ܐܰܒܘ̣ܗ̱ܝ: ܥܰܡܰܢ ܗ̱ܘܳܐ ܐܰܟܘܳܬܰܢ: ܟܰܕ ܠܳܐ ܐܶܫܬܰܚ̣ܠܰܦ ܡ̣ܶܢ ܗܳܝ ܕܐܝ̣ܬܰܘܗ̱ܝ ܗ̱ܘܳܐ: ܘܟܰܕ ܠܳܐ ܣܢܝ̣ܩ ܗ̱ܘܳܐ ܥܰܠ ܨܰܘܡܳܐ ܘܨܳܡ̣ ܚܠܳܦܰܝܢ: ܘܟܰܕ ܗܽܘ̣ ܣܰܩܘ̣ܒܠܳܐ ܠܶܗ ܠܳܐ ܐܝ̣ܬ: ܐܶܬ̣ܟܰܬܰܫ ܥܰܡ ܒܥܶܠܕܰܪܰܢ ܕܠܰܢ ܢ̣ܚܰܘܶܐ ܕܰܐܝܟܰܢܳܐ ܢ̇ܰܩܪܶܒ ܒܙܰܒܢܳܐ ܕܣܳܥܶܐ ܥܠܰܝܢ ܢܳܟܘ̣ܠܳܐ: ܐܰܝܟ ܕܥܰܠ ܐܰܒܳܗ̈ܰܝܢ ܩܰܕܝ̣̈ܫܶܐ ܩܰܕܡܳܝ̈ܶܐ: ܘܰܐܠ̣ܶܦ ܠܰܢ ܕܰܐܝܟܰܢܳܐ ܢ̇ܶܬܶܠ ܠܶܗ: ܘܕܰܐܝܟܰܢ ܢ̇ܶܣܰܒ ܡ̣ܶܢܗ ܒܝ̣ܕܰܥܬܳܐ ܕܡ̣ܶܢ ܠܘܳܬܶܗ: ܗܰܘ̇ ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰ‌ܠܳܗܳܐ ܕܝ̣ܠܰܢ: ܗܰܘ̇ ܝܳܗܘ̣ܒܳܐ ܕܢܳܡܘ̣ܣܳܐ ܪܘ̣ܚܳܢܳܝܳܐ ܘܰܡܫܰܟܢܳܢܳܐ ܕܶܐܣܛܰܕܺܝܳܘܢ ܐܰܠܳܗܳܝܳܐ ܘܡܳܪܳܢܳܝܳܐ: ܗܰܘ̇ ܕܡܶܛܽܠ ܡܶܬܥܰܒܪܳܢܘ̣ܬܰܢ ܩܰܕܡܳܝܬܳܐ: ܘܡܶܙܕܰܟܝܳܢܘ̣ܬܰܢ ܕܡ̣ܶܢ ܛܥܳܡܬܳܐ ܪܶܓܬܳܢܳܝܬܳܐ ܘܠܳܐ ܢܳܡܘ̣ܣܳܝܬܳܐ: ܡܶܐܬܝ̣ܬܳܐ ܕܝ̣ܠܶܗ ܕܰܠܘܳܬܰܢ ܗܳܝ ܠܳܐ ܡܶܬܡܰܠܳܠܢܝ̣ܬܳܐ ܘܠܳܐ ܡܶܬܦܰܪܥܳܢܝ̣ܬܳܐ ܥܒ̣ܰܕ: ܘܡܶܛܽܠ ܚܰܝܳܒܘ̣ܬܰܢ ܪܰܒܬܳܐ ܗܘ̣ ܒܪܶܚܡܰܬ݀ ܐ̱ܢܳܫܘ̣ܬܶܗ ܕܡܘ̣ܬܳܐ ܥܰܒܕܳܢܳܝܬܳܐ ܕܝ̣ܠܰܢ ܢܣ̣ܰܒ: ܟܰܕ ܗܘ̣ ܠܚܘ̣ܕ ܐܝܬܰܘܗ̱ܝ: ܦܶܚܡܳܐ ܠܰܐܠܳܗܳܐ ܐܰܒܳܐ ܕܝ̣ܠܶܗ: ܒܐܘ̣ܣܺܝܰܐ ܕܰܐܠܳܗܘ̣ܬܳܐ ܗܳܝ ܕܐܝ̣ܬܶܝܗܿ ܕܰܠܥܶܠ ܡ̣ܶܢ ܟܽܠ ܫܘ̣ܡܳܗܿ ܕܐܘ̣ܣܺܝܰܐ ܘܕܰܟܝܳܢܳܐ: ܕܡܶܫܬܰܡܰܫ ܒܰܫܡܰܝܳܐ ܘܥܰܠ ܐܰܪܥܳܐ: ܘܰܒܛܳܒܘ̣ܬ ܨܶܒܝܳܢܶܗ ܛܳܒܳܐ: ܢܚ̣ܶܬ ܠܕܰܪܳܐ ܪܘ̣ܚܢܳܝܳܐ: ܕܥܰܡ ܣܳܢܳܐܐ ܕܐ̱ܢܳܫܘ̣ܬܰܢ ܗܰܘ̇ ܕܰܒܝܰܕ ܡܶܐܟܘ̣ܠܬܳܐ ܚܰܝܒ̣ܶܗ ܠܪܝ̣ܫ ܓܶܢܣܰܢ ܗܰܘ̇ ܕܰܒܨܰܘܡܳܐ ܫܰܪܝ̣: ܗܰܘ̇ ܕܰܐܪܒܥܝ̣ܢ ܐܰܝܟ ܢܳܡܘ̣ܣܳܐ ܕܫܰܡ̣ܶܫ ܡܘ̣ܫܶܐ ܒܛܘ̣ܪܳܐ ܕܚܘ̣ܪܝܒ ܘܐܺܠܺܝܳܐ ܗܳܟܘ̣ܬ: ܘܟܰܕ ܠܫܘ̣ܠܳܡ ܐܰܪܒܥܝ̣ܢ ܡܰܛܝ̣ܬ ܪܰܒ ܚܰܝܠܳܐ ܕܝ̣ܠܰܢ: ܘܡܳܪܰܢ ܘܰܐܠܳܗܰܢ ܪܰܒܳܐ ܘܦܳܪܘ̣ܩܰܢ ܗܳܝܕܶܝܢ ܗܳܟܘ̣ܬ ܠܘܳܬ ܥܶܩܳܪ̈ܶܐ ܕܒܰܐܪܥܳܐ ܚܳܐܪ ܗ̱ܘܰܝܬ ܕܬܶܬ݂ܬܰܪܣܶܐ: ܗܰܘ̇ ܕܰܠܟܽܠ ܒܪܶܡܙܳܐ ܕܨܶܒܝܳܢܳܟ ܡܬܰܪܣܶܐ ܐܰܢ̱ܬ ܘܰܡܣܰܒܰܥ ܐܰܝܟܰܢܳܐ ܕܬ̣ܰܛܥܶܐ ܒܶܗ ܒܰܢܟܝܠܳܐ ܕܠܳܐ ܢ̣ܶܚܫܒܳܟ ܐܰܠܳܗܳܐ ܘܒܰܪ ܐܰܠܳܗܳܐ ܐܰܝܟ ܕܶܐܡ̣ܰܪ: ܘܢ̣ܶܫܬܐܶܠ ܡ̣ܶܢ ܬܰܟܬܘ̣ܫܳܐ ܕܥܰܡܳܟ: ܐܶܠܳܐ ܚܰܘܝ̣ܬ ܠܶܗ ܟܰܦܢܳܐ ܪܰܒܳܐ: ܘܠܰܐܪܒܥܝ̣ܢ ܠܳܐ ܥܒ̣ܰܪܬ ܕܢ̣ܶܚܫܒܳܟ ܐܰܝܟ ܚܰܕ ܡ̣ܶܢ ܨܰܝ̈ܡܶܐ ܐ̱ܪ̈ܳܙܢܳܝܶܐ ܕܝ̣ܠܳܟ ܘܢ̣ܶܬܩܰܪܰܒ ܠܰܡܢܰܣܳܝܘ̣ܬܳܟ ܐܰܝܟ ܨܶܒܝܳܢܳܟ: ܐܰܝܟܰܢܳܐ ܕܬ̣ܰܠܶܦ ܕܰܪܳܐ ܘܬܰܟܬܘ̣ܫܳܐ ܕܥܰܡܶܗ ܘܒܳܟ ܘܒܐܝ̣̈ܕܰܝܟ ܢ̣ܶܣܰܒ ܙܳܟܘ̣ܬܳܐ ܕܥܰܠ ܨܶܢ̈ܥܳܬܶܗ ܡܰܘܒܕܳܢ̈ܝܳܬܳܐ: ܘܟܰܕ ܒܕܰܪ̈ܶܐ ܬܠܳܬܳܐ ܡܕܰܪ̈ܡܶܐ ܘܡܰܠ̈ܝ݂ܰܝ݂ ܢܶܟܠܳܐ ܐܶܬ̣ܩܰܪܰܒ ܠܘܳܬܳܟ: ܘܒܰܪ ܐܰܠܳܗܳܐ ܡܚܰܘܶܐ ܗ̱ܘܳܐ ܠܳܟ ܒܰܣܒܝܪܘ̣ܬܳܟ ܕܡ̣ܶܢ ܟܬܳܒ̈ܶܐ ܐܰܠܳܗܳܝ̈ܶܐ ܘܫܘ̣ܘ̈ܕܳܥܶܐ ܐ̱ܪ̈ܳܙܢܳܝܶܐ ܡܚܰܘܶܐ ܗ̱ܘܳܐ ܠܳܟ: ܐܰܝܟܰܢܳܐ ܐܰܘ ܒܪܶܚܡܰܬ݀ ܡܶܐܟܘ̣ܠܬܳܐ: ܐܰܘ ܒܪܶܚܡܰܬ݀ ܫܘ̣ܒܗܳܪܳܐ: ܐܳܘ ܒܪܶܚܡܰܬ݀ ܥܳܠܡܳܐ ܘܝܰܥܢܘ̣ܬܳܐ ܡܚܰܝܶܒ ܗ̱ܘܳܐ ܠܳܟ: ܘܰܕܢ̣ܶܫܬܰܘܕܥܳܟ ܘܶܐܢ ܒܰܪܐܢܳܫܳܐ ܐܰܢ̱ܬ ܫܚܝ̣ܡܳܐ ܢ̣ܩܰܪܒܳܟ ܠܣܶܓܕܬܶܗ ܘܶܐܢ ܒܪܶܗ ܐܰܢ̱ܬ ܕܰܐܠܳܗܳܐ ܟܝܳܢܳܐܝ̣ܬ: ܠܳܐ ܬܘ̣ܒ ܢ̣ܶܣܥܶܐ ܥܠܰܝܟ ܒܰܚܕܳܐ ܡ̣ܶܢ ܨܶܢ̈ܥܳܬܶܗ: ܐܰܢ̱ܬ ܕܶܝܢ ܡܶܛܽܠ ܕܰܐܠܳܗܳܐ ܐܝ̣ܬܰܝܟ: ܘܰܒܨܶܒܝܳܢܳܟ ܗ̣ܘܰܝܬ ܒܰܪܢܳܫܳܐ ܕܠܳܐ ܫܘ̣ܚܠܳܦܳܐ: ܡ̣ܶܢ ܟܬܳܒ̈ܶܐ ܢܦܝ̣ܚ ܒܪܘ̣ܚܳܐ ܥܒ̣ܰܕܬ ܦܘ̣ܢܳܝܳܐ: ܐܰܝܟ ܡܩܰܕܡܘ̣ܬ ܝ̣ܕܰܥܬܳܟ ܘܰܫ̣ܪܰܝܬܳܝܗ̱ܝ ܡܚܰܝܒܳܐ: ܟܰܕ ܠܳܐ ܐܶܫ̣ܬܰܘܕܥܳܟ ܕܡܰܢܘ̣ ܐܝ̣ܬܰܝܟ ܒܩܘ̣ܫܬܳܐ: ܥܕܰܡܳܐ ܕܰܢܓ݂ܰܕܬܳܝܗ̱ܝ ܠܰܙܩܝ̣ܦܳܟ: ܘܬܰܡܳܢ ܬܘ̣ܒ ܥܒ̣ܰܕܬܳܗܿ ܠܡܰܦܘ̣ܠܬܶܗ ܕܰܠܥܳܠܰܡ: ܘܰܠܗܳܢܳܐ ܕܰܪܳܐ ܪܘ̣ܚܳܢܳܝܳܐ ܐܰܫܠ̣ܶܡܬ ܠܥܺܕܬܳܟ ܩܰܕܝ̣ܫܬܳܐ: ܕܨܰܘܡܳܐ ܕܡ̣ܶܢ ܠܰܚܡܳܐ ܘܡܰܝ̈ܳܐ: ܐܳܦ ܨܰܘܡܳܐ ܕܡ̣ܶܢ ܪ̈ܓܝ̣ܓܳܬܳܐ ܬ̣ܨܽܘ̣ܡܝ̱: ܕܗܳܠܶܝܢ ܕܗ̣ܶܢܶܝܢ ܐܝ̣ܬܰܝܗܶܝܢ ܥܶܩܳܪܳܐ ܕܟܽܠܗܶܝܢ ܒܝ̣̈ܫܳܬܳܐ: ܚܢܰܢ ܕܶܝܢ ܡܳܪܝ̱ ܟܰܕ ܠܗܳܕܶܐ ܡܰܫܠܡܳܢܘ̣ܬܳܐ ܐܰܠܳܗܳܝܬܳܐ ܩܰܒܶܠ̣ܢܰܢ: ܘܥܰܡ ܨܰܘܡܳܐ ܕܡ̣ܶܢ ܠܰܚܡܳܐ ܐܳܦ ܡ̣ܶܢ ܒܝ̣̈ܫܳܬܳܐ ܟܡܳܐ ܕܡܰܨܝܳܐ: ܠܰܡܚܝ̣̈ܠܶܐ ܨܳܡ̣ܢܰܢ ܘܦܘ̣ܩܕܳܢܳܐ ܕܝ̣ܠܳܟ ܡܳܪܳܢܳܝܳܐ ܟܡܳܐ ܕܣܶܦ̣ܩܰܬ݀ ܫܰܦܠܘ̣ܬܰܢ ܫܰܡܠܝ̣ܢܰܢ: ܗܳܫܳܐ ܒܥܘ̣ܕܪܳܢܳܐ ܕܛܰܝܒܘ̣ܬܳܟ: ܘܣܘ̣ܝܳܥܳܐ ܕܡܶܢܳܟ ܠܘܰܥܕܳܐ ܕܰܐܪܒܥܝ̣ܢ ܝܰܘܡܝ̣̈ܢ ܡܰܠ̈ܝ݂ܰܝ݂ ܐ̱ܪ̈ܳܙܶܐ ܕܦܘ̣ܪܩܳܢܳܐ ܕܝ̣ܠܰܢ ܐܶܬ̣ܡܰܢܰܥܢܰܢ: ܡܶܟܝ̣ܠ ܒܳܥܶܝܢܰܢ ܡܶܢܳܟ ܕܰܬ̣ܩܰܒܠܝ̣ܘܗ̱ܝ ܠܨܰܘܡܰܢ ܡܚܝ̣ܠܳܐ: ܐܰܝܟ ܨܰܘܡܳܐ ܕܟܺܐܢ̈ܶܐ ܩܰܕ̈ܡܳܝܶܐ ܘܡܶܨ̈ܥܳܝܶܐ: ܘܕܰܐ̱ܚܪ̈ܳܝܶܐ ܕܪܰܥܝܘ̣ܟ ܒܨܰܘܡܰܝ̈ܗܽܘܢ ܩܰܒܶܠܝܳܗ̱ܝ ܡܳܪܝ̱ ܠܨܰܘܡܰܢ: ܐܰܝܟ ܨܰܘܡܶܗ ܕܡܽܘܫܶܐ ܡܢܝ̣ܚܳܢܳܟ ܘܬܶܫܒܘ̣ܚܬܳܐ ܘܙܝ̣ܘܳܐ ܐܰܠܒܶܫ ܠܢܰܦ̈ܫܳܬܰܢ ܘܰܠܦܰܓܪ̈ܰܝܢ: ܐܰܝܟ ܕܰܠܗܰܘ̇ ܒܫܘ̣ܠܳܡ ܨܰܘܡܶܗ ܩܰܒܶܠܳܝܗ̱ܝ ܡܳܪܝ̱ ܠܨܰܘܡܰܢ ܐܰܝܟ ܨܰܘܡܶܗ ܕܺܐܠܺܝܳܐ ܛܰܢܳܢܳܐ: ܘܥܰܠܳܐ ܗܰܘ̈ܢܰܝܢ ܘܡܰܕ̈ܥܰܝܢ ܘܪ̈ܶܥܝܳܢܰܝܢ ܠܘܳܬ ܚܙܳܬܳܐ ܕܪܰܒܘ̣ܬܳܟ: ܩܰܒܶܠܳܝܗ̱ܝ ܡܳܪܝ̱ ܠܨܰܘܡܰܢ ܐܰܝܟ ܨܰܘܡܶܗ ܕܕܰܘܺܝܕ ܡܰܠܟܳܐ ܡܪܰܥܝܳܢܳܐ ܕܝ̣ܠܳܟ: ܘܢ̇ܶܫܬܘܶܐ ܠܚܘ̣ܣܳܝܳܐ ܕܚܰܘ̈ܒܶܐ: ܘܰܠܠܶܒܳܐ ܕܰܟܝܳܐ ܘܪܘ̣ܚܳܐ ܡܰܟܝ̣ܟܬܳܐ: ܩܰܒܶܠܳܝܗ̱ܝ ܡܳܪܝ̱ ܠܨܰܘܡܰܢ ܐܰܝܟ ܨܰܘܡܳܐ ܕܢܝ̣̈ܢܘܳܝܶܐ: ܘܢ̇ܶܬܦܰܨܶܐ ܡ̣ܶܢ ܓܙܳܪܕܝ̣ܢܳܐ ܕܚܘ̣ܝܳܒܳܐ ܕܰܥܠܰܝܢ ܡ̣ܶܢ ܟܺܐܢܘ̣ܬܳܐ: ܩܰܒܶܠܳܝܗ̱ܝ ܡܳܪܝ̱ ܠܨܰܘܡܰܢ ܐܰܝܟ ܨܰܘܡܶܗ ܕܕܳܢܺܝ̣ܐܝܶܠ ܪܓܝ̣ܓܳܐ: ܘܒܶܗ ܢ̇ܶܫܬܰܘܙܰܒ ܡ̣ܶܢ ܚܰܫ̈ܶܐ ܒܝ̣̈ܫܶܐ ܘܚܘ̣ܫ̈ܳܒܶܐ ܫܟܝ̣ܪ̈ܶܐ ܗܳܠܶܝܢ ܕܐܰܝܟ ܚܰܝܘܰܬ݀ ܫܶܢܳܐ ܡܒܰܣܒܣܝ̣ܢ ܠܟܽܠܗܽܘܢ ܗܰܕܳܡܰܝ̈ܢ: ܩܰܒܶܠܳܝܗ̱ܝ ܡܳܪܝ̱ ܠܨܰܘܡܰܢ ܐܰܝܟ ܨܰܘܡܳܐ ܕܰܛܠܳܝ̈ܶܐ ܕܒܶܝܬ ܚܰܢܰܢܝܳܐ ܥܰܒ̈ܕܰܝܟ: ܘܒܶܗ ܢ̇ܫܰܗܶܐ ܠܢܘ̣ܪܳܐ ܕܚܶܡܬܳܐ ܘܕܰܚܣܳܡܳܐ ܘܰܕܢܶܟܠܳܐ ܘܕܰܐܟܬܳܐ ܘܰܕܥܳܩܬܳܐ ܡ̣ܶܢ ܠܶܒܰܘ̈ܳܬܰܢ: ܩܰܒܶܠܳܝܗ̱ܝ ܡܳܪܝ̱ ܠܨܰܘܡܰܢ ܐܰܝܟ ܨܰܘܡܳܐ ܕܰܫܠܝ̣̈ܚܶܐ ܒܥܶܠܝ̣ܬܳܐ: ܘܒܶܗ ܢ̇ܶܫܬܘܶܐ ܠܡܰܘ̈ܗܒܳܬܳܐ ܘܫܽܘ̈ܘ̣ܟܳܢܶܐ ܒܝܰܕ ܪܘ̣ܚܳܐ ܦܰܪܰܩܠܝ̣ܛܳܐ: ܩܰܒܶܠܳܝܗ̱ܝ ܡܳܪܝ̱ ܠܨܰܘܡܰܢ ܐܰܝܟ ܨܰܘܡܳܐ ܕܶܐܣܬܝ̣ܪ ܢܰܟܦܬܳܐ ܘܰܕܡܽܘ̣ܪܕܟܰܝ: ܘܒܶܗ ܢ̇ܰܘܒܶܕ ܠܰܒܥܶܠ̈ܕܒܳܒܶܐ ܕܢܰܦ̈ܫܳܬܰܢ: ܟܣܰܝ̈ܳܐ ܘܰܓܠܰܝ̈ܳܐ ܥܒܶܕ ܡܳܪܝ̱ ܠܨܰܘܡܰܢ ܡܩܰܒܠܳܐ ܩܕܳܡܰܝܟ: ܘܒܳܟ ܢ̇ܶܣܰܒ ܟܠܝ̣ܠܳܐ ܕܙܳܟܘ̣ܬܳܐ ܥܰܡ ܨܰܝ̈ܳܡܶܐ ܟܰܫܝ̣ܪ̈ܶܐ ܐܳܦܶܢ ܠܳܐ ܫܳܘܶܝܢܰܢ ܡܶܛܽܠ ܠܳܐ ܢܳܡܘ̣ܣܳܝ̈ܘܳܬܳܐ ܕܝ̣ܠܰܢ: ܒܪܰܡ ܡܶܛܽܠ ܛܰܝܒܘ̣ܬܳܟ ܢ̇ܶܫܬܘܶܐ ܠܪ̈ܰܚܡܶܐ ܕܡܶܢܳܟ: ܘܰܠܫܰܘܬܳܦܘ̣ܬܳܐ ܕܐ̱ܪ̈ܳܙܰܝܟ ܣܓܝ̣̈ܕܶܐ ܘܰܐܠܳܗܳܝ̈ܶܐ ܘܰܠܚܰܫ̈ܰܝܟ ܡܝܰܩܪ̈ܶܐ ܘܩܰܕܝ̣̈ܫܶܐ: ܘܠܰܩܒܘ̣ܪܬܳܟ ܡܳܪܳܢܳܝܬܳܐ ܘܳܐܦ ܠܰܩܝܳܡܬܳܟ ܬܠܝ̣ܬܳܝܰܬ݀ ܝܰܘ̈ܡܶܐ: ܘܰܡܫܰܒܰܚܬܳܐ ܘܠܐܘ̣ܪܥܳܐ ܦܨܺܝ̣ܚܳܐ ܕܓܶܠܝܳܢܳܟ ܫܒܝ̣ܚܳܐ ܘܰܠܡܰܥܰܠܬܳܐ ܕܠܰܓܢܽܘܢܳܟ ܕܢܘ̣ܗܪܳܐ: ܥܰܡ ܟܽܠܗܽܘܢ ܩܰܕܝ̣ܫ̈ܰܝܟ: ܘܬܰܡܳܢ ܚܢܰܢ ܘܥܰܢܝ̣̈ܕܰܝܢ ܡܗܰܝܡ̈ܢܶܐ ܕܰܫܟ̣ܶܒܘ̱ ܒܳܟ ܢ̇ܶܬܒܰܣܰܡ ܥܰܠ ܦܳܬܘ̣ܪܳܐ ܕܡܰܠܟܘ̣ܬܳܟ ܥܰܡ ܟܶܢ̈ܫܶܐ ܕܨܰܝܳܡ̈ܶܐ ܟܰܫܝ̣ܪ̈ܶܐ ܕܰܫܦ̣ܰܪܘ̱ ܠܳܟ ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܳܪܝܳܐ ܡܪܰܚܡܳܢܳܐ ܘܰܡܪܰܚܦܳܢܳܐ ܘܣܰܓܝ̣ ܪ̈ܰܚܡܶܐ: ܗܰܘ̇ ܕܠܳܐ ܨܳܒܶܐ ܐܰܢ̱ܬ ܒܰܐܒܕܳܢܳܐ ܕܰܓܒܝ̣ܠܬܳܐ ܕܝ̣ܠܳܟ ܥܢܝ̣ ܠܰܢ ܗܳܫܳܐ ܕܩܳܪܶܝܢܰܢ ܠܳܟ: ܘܰܠܪ̈ܰܚܡܰܝܟ ܫܦܝ̣̈ܥܶܐ ܡܣܰܟܶܝܢܰܢ: ܘܨܰܘܡܰܢ ܢ̣ܶܗܘܶܐ ܠܰܢܝܳܚܳܟ ܘܰܨ̈ܠܰܘܳܬܰܢ ܠܨܶܒܝܳܢܳܟ ܘܒܳܥ̈ܘܳܬܰܢ ܠܰܦܝܳܣܳܟ ܘܰܠܚܝ̣ ܘܰܐܥܒܰܪ ܠܟܽܠܗܽܘܢ ܚܛܳܗ̈ܶܐ ܘܣܰܟ̈ܠܘܳܬܳܐ ܕܥܰܡܳܟ ܘܰܥܒܶܕ ܠܰܢ ܒܢܰܝ̈ ܝܳܪܬܘ̣ܬܳܐ ܕܝ̣ܠܳܟ: ܡܢܝ̣ ܠܰܢ ܒܰܓܙܳܪܳܐ ܕܥܶܪ̈ܒܶܐ ܕܝ̣ܠܳܟ: ܘܰܐܫܘܳܐ ܠܰܢ ܠܚܰܝ̈ܶܐ ܛܘ̣ܒ̈ܬܳܢܶܐ ܕܰܠܥܳܠܰܡ ܘܰܠܛܳܒ̈ܳܬܳܐ ܕܡ̣ܶܢ ܠܘܳܬܳܟ: ܥܰܡ ܟܽܠ ܕܫܳܦܰܪ ܠܨܶܒܝܳܢܳܟ: ܘܠܳܟ ܦܳܐܶܐ ܫܘ̣ܒܚܳܐ ܘܐܝܩܳܪܳܐ ܘܐܘ̣ܚܕܳܢܳܐ ܗܳܫܳܐ ܒܟܽܠܙܒܰܢ ܠܥܳܠܡܝܢ܀