ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܝܳܕܘ̣ܥܳܐ ܕܟܰܣ̈ܝܳܬܳܐ ܠܗܰܘ ܕܰܝܳܢܳܐ ܕܡܰܚ̈ܫܒܳܬܳܐ: ܠܗܰܘ̇ ܒܳܚܘ̣ܪܳܐ ܕܠܶܒܰܘ̈ܳܬܳܐ: ܘܰܡܓܰܠܝܳܢܳܐ ܕܠܳܐ ܝ̣ܕܝ̣̈ܥܳܬܳܐ: ܠܗܰܘ̇ ܕܰܩܕܳܡ ܚܰܫܶܗ ܩܰܕܝ̣ܫܳܐ ܘܨܶܒܝܳܢܳܝܳܐ ܓ̣ܠܳܐ ܐ̱ܪܳܙܶܗ ܠܬܰܠ̈ܡܝ̣ܕܰܘܗ̱ܝ ܓܒܰܝ̈ܳܐ ܘܩܰܕܝ̣̈ܫܶܐ: ܘܐܰܘܕܰܥ ܐܶܢܽܘܢ ܥܰܠ ܙܩܝ̣ܦܶܗ ܦܳܪܘ̣ܩܳܝܳܐ: ܘܥܰܠ ܢܟܝ̣ܠܘ̣ܬܶܗ ܕܬܰܠܡܝ̣ܕܳܐ ܙܺܐܦܳܢܳܐ ܘܟܰܕܳܒܘ̣ܬܶܗ ܕܕܰܓܳܠܳܐ ܘܚ̣ܰܘܝ̣ ܐܶܢܽܘܢ ܙܰܒܢܳܐ ܕܡܰܘܬܶܗ ܚܰܝܳܐ: ܘܒ̣ܰܕܶܩ ܠܗܽܘܢ ܥܶܕܳܢܳܐ ܕܢܘ̣ܚܳܡܶܗ ܫܒܝ̣ܚܳܐ ܘܝܰܘܡܳܐ ܕܓܶܠܝܳܢܶܗ ܬܗܝ̣ܪܳܐ: ܘܫܳܥܬܳܐ ܕܕܶܢܚܶܗ ܬܡܝ̣ܗܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܳܟ ܫܽܘ̣ܒܚܳܐ ܘܠܳܟ ܬܰܘܕܝ̣ܬܳܐ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ ܕܐܝ̣ܬܰܝܟ ܠܳܐ ܚܳܫܘ̣ܫܳܐ ܘܠܳܐ ܡܳܝܘ̣ܬܳܐ: ܘܰܟܝܳܢܳܐܝ̣ܬ ܩ̇ܢܶܐ̣ ܐܰܢ̱ܬ ܠܳܐ ܚܳܫܘ̣ܫܘ̣ܬܳܐ ܘܠܳܐ ܡܳܝܘ̣ܬܘ̣ܬܳܐ: ܗ̣ܘܰܝܬ ܒܚܘ̣ܒܳܟ ܒܰܪܢܳܫܳܐ ܘܩܰܒܶܠ̣ܬ ܥܠܰܝܟ ܕܬܶܚ̣ܰܫ ܚܰܫ̈ܶܐ ܨܶܒܝ̈ܳܢܳܝܶܐ: ܘܰܒܝܰܕ ܚܰܫ̈ܶܐ ܕܝ̣ܠܳܟ ܠܳܐ ܥܕܝ̣̈ܠܶܐ ܠܳܐ ܚܳܫܘ̣ܫܘ̣ܬܳܐ ܙܰܡܶܢ̣ܬ ܠܓܶܢܣܳܐ ܕܰܒܢܰܝ̈ܢܳܫܳܐ ܘܐܰܚܶܫ̣ܬ ܐܶܢܽܘܢ ܠܚܰܫ̈ܶܐ ܒܚܰܫܰܘ̈ܗ̱ܝ ܕܰܩܢܘ̣ܡܳܟ: ܘܟܰܕ ܩܕܳܡ ܗܳܠܶܝܢ ܫܰܘܕܰܥ̣ܬ ܠܓܘ̣ܕܳܐ ܗܳܝ̇ ܪܚܝ̣ܡܬܳܐ ܘܢܰܨܝ̣ܚܬܳܐ ܕܬܰܠܡܝ̣̈ܕܰܝܟ: ܕܗܳܐ ܡܶܢ ܟܰܕܘ̣ ܐܶܬܓܡ̣ܰܪܘ̱ ܟܽܠܗܽܘܢ ܐ̱ܪ̈ܳܙܶܐ ܘܛܘ̣̈ܦܣܶܐ ܒܰܚܫܳܡܝ̣ܬܳܐ ܗܳܝ̇ ܐ̱ܪܳܙܳܢܳܝ̇ܬܳܐ: ܕܒܳܗ̇ ܐܶܡܪܳܐ ܗܰܘ̇ ܕܰܒܝܰܕ ܡܘ̣ܫܶܐ ܐܶܬ̣ܬܨܝ̣ܪ ܡܶܫ̣ܬܰܡܠܶܐ ܗ̱ܘܳܐ: ܘܟܰܕ ܐܶܡ̣ܰܪܬ ܠܘܳܬܗܽܘܢ ܕܚܰܕ ܡܶܢܟܽܘܢ ܠܡܰܘܬܳܐ ܡܰܫ̇ܠܶܡ ܠܝ̣: ܦܰܪܣܝ̣ܬ ܠܙܺܐܦܶܗ ܕܬܰܠܡܝ̣ܕܳܐ ܢܟܝ̣ܠܳܐ ܘܰܫܠܝ̣ܚܳܐ ܟܰܕܳܒܳܐ: ܘܟܰܕ ܐܝ̣ܬܰܝܟ ܕܰܝܳܢܳܐ ܕܕܰܝ̈ܳܢܶܐ ܘܡܰܠܟܳܐ ܕܡܰܠ̈ܟܶܐ ܘܡܳܪܳܐ ܕܡܳܪ̈ܰܘܳܬܳܐ: ܕܐܰܢ̱ܬ ܡܕܰܒܰܪ ܐܰܢ̱ܬ ܠܟܽܠ: ܐܶܬܕܒ̣ܰܪܬ ܐܰܝܟ ܐܶܡܪܳܐ ܠܢܶܟܣܬܳܐ ܨܶܝܕ ܦܝ̣ܠܰܛܘ̣ܣ ܕܰܝܳܢܳܐ: ܘܐܰܝܟ ܢܶܩܝܳܐ ܩܕܳܡ ܓܳܙܘ̣ܙܳܐ ܫܰܬܝ̣ܩ ܗ̱ܘܰܝܬ: ܘܩܳܡ̣ܬ ܒܒܶܝܬ ܕܝ̣ܢܳܐ ܐܝܟ ܒܰܪܢܳܫܳܐ: ܘܐܶܫ̣ܬܰܐܰܠܬ ܐܰܝܟ ܫܚܝ̣ܡܳܐ ܒܠܰܥ̣ܬ ܦܰܟܳܐ ܡܶܢ ܥܰܒܕܳܐ ܘܚ̣ܰܪܰܪܬ ܠܥܰܒ̈ܕܶܐ ܕܰܚܛܝ̣ܬܳܐ: ܐܶܬ̣ܬܠܝ̣ܬ ܒܩܰܝܣܳܐ ܕܰܨܠܝ̣ܒܳܐ ܘܥܰܠܝ̣ܬ ܠܰܢ ܠܪܰܘܡܳܐ ܕܰܠܥܶܠ: ܡܪܳܪ̈ܶܐ ܥܰܡ ܚܰܠܳܐ ܐܶܫ̣ܬܝ̣ܬ ܕܠܰܢ ܬ̣ܰܫܩܶܐ ܟܳܣܳܐ ܕܚܰܝ̈ܶܐ ܐܝ̣ܕܰܝ̈ܟ ܒܨܶܨ̈ܐ ܐܶܬܩܰܒ̣ܰܥ̈ܝ̱ ܘܐܝ̣̈ܕܰܝܳܐ ܕܝ̣ܠܰܢ ܐܶܬ̣ܩܰܕܰܫ̈ܝ̱: ܒܠܰܥ̣ܬ ܒܠܘ̣ܟܳܝܬܳܐ ܒܣܶܛܪܳܟ ܘܐܰܩ̣ܗܝ̣ܬ ܠܪܘ̣ܡܚܶܗ ܕܰܟܪܘ̣ܒܳܐ: ܡܝ̣ܬܬ ܒܰܨܠܝ̣ܒܳܐ ܘܐܰܡܝ̣ܬܬ ܠܡܰܘܬܳܐ ܛܪܘ̣ܢܳܐ: ܘܡܶܛܽܠ ܗܳܕܶܐ ܠܳܟ ܝܳܕ̇ܥܝ̣ܢܰܢ ܫܰܪܝ̣ܪܳܐܝ̣ܬ ܐܰܠܳܗܳܐ ܕܦܘ̣ܪܩܳܢܳܐ ܕܝ̣ܠܰܢ: ܘܒܰܕܓܽܘܢ ܡܦܝ̣ܣܝ̣ܢܰܢ ܠܳܟ ܕܬ̣ܰܫܘܶܐ ܠܰܢ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܒܠܶܒܳܐ ܫܚܝ̣ܩܳܐ ܘܰܒܪܘ̣ܚܳܐ ܡܰܟܝ̣ܟܬܳܐ ܢ̇ܶܚܰܫ ܒܚܰܫܳܟ: ܐܰܝܟܰܢܳܐ ܕܥܰܡܳܟ ܢܶܫ̇ܬܰܒܰܚ ܘܢ̇ܶܙܕܩܶܦ ܠܥܳܠܡܳܐ ܘܰܠܟܽܠܗܽܘܢ ܚܰܫܰܘ̈ܗ̱ܝ ܘܰܪ̈ܓܝ̣ܓܳܬܶܗ: ܘܗܘ̣ ܥܳܠܡܳܐ ܢܶـ̣ܙܕܩܶܦ ܠܰܢ: ܘܰܢ̇ܡܝ̣ܬ ܡܶܢܰܢ ܠܟܽܠܳܗ̇ ܗܰܢܺܝܐܘ̣ܬܳܐ ܕܒܰܪܢܳܫܳܐ ܥܰܬܝ̣ܩܳܐ ܘܒܳܟ ܕܐܝ̣ܬܰܝܟ ܚܰܝ̈ܶܐ ܫܰܪܝ̣ܪ̈ܶܐ ܢ̇ܺܚܶܐ: ܘܒܳܥܶܝܢܰܢ ܘܰܡܦܝ̣ܣܝ̣ܢܰܢ ܕܢܘ̣ܟܪ̈ܳܝܶܐ ܬ̣ܶܥܒܶܕ ܠܰܢ ܠܰܚܛܝ̣ܬܳܐ ܘܫܰܘ̈ܬܳܦܶܐ ܠܰܚܫܳܡܝ̣ܬܳܐ ܗܳܝ̇ ܐ̱ܪܳܙܳܢܳܝܬܳܐ: ܘܚ̣ܰܕ̈ܬܶܐ ܡܶܢ ܥܰܬܝ̣̈ܩܶܐ ܬ̣ܶܥܒܶܕ ܠܰܢ: ܘܢܘ̣ܗܪܳܐ ܕܝ̣ܠܳܟ ܬ̣ܰܠܒܶܫ ܠܰܢ: ܘܠܰܩܝܳܡܬܳܐ ܕܝ̣ܠܳܟ ܒܚܰܕܘ̣ܬܳܐ ܬ̣ܙܰܡܶܢ ܠܰܢ: ܘܒܰܡܛܰܠ̱̈ܠܶܐ ܫܡܰܝܳܢܝ̈ܳܬܳܐ ܬܶܫܒ̈ܚܳܬܳܐ ܢ̇ܙܰܡܰܪ ܠܳܟ ܘܠܰܐܒܘ̣ܟ ܗܰܘ̇ ܠܳܐ ܚܳܫܘ̣ܫܳܐ ܕܫܰܠܚ̣ܳܟ ܠܦܘ̣ܪܩܳܢܰܢ: ܘܰܠܪܘ̣ܚܳܟ ܩܰܕܝ̣ܫܳܐ ܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܐܘ̣ܣܺܝܰܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܪܳܡܳܐ ܕܐܶܬܡ̣ܰܟܰܟ ܕܰܠܡ̈ܳܟܶܐ ܢ̣ܶܬܶܠ ܛܘ̣ܦܣܳܐ ܫܰܦܝ̣ܪܳܐ ܒܰܩܢܘ̣ܡܶܗ: ܩܰܒܶܠܳܝܗ̱ܝ ܡܳܪܰܢ ܠܦܝ̣ܪܡܳܐ ܗܳܢܳܐ ܕܰܡܩܰܪܒܝ̣ܢܰܢ ܩܕܳܡܰܝܟ ܒܥܶܕܳܢܳܐ ܗܳܢܳܐ: ܘܐܰܫܘܳܐ ܠܰܢ ܕܰܢ̇ܫܝ̣ܓ ܠܨܳܐܬܳܐ ܟܣܝ̣ܬܳܐ ܕܰܚܛܝ̣ܬܳܐ ܡܶܢ ܗܰܕ̈ܳܡܶܐ ܟܣܰܝ̈ܳܐ ܕܢܰܦ̈ܫܳܬܰܢ: ܘܢ̇ܶܗܘܶܐ ܕܟܰܝ̈ܳܐ ܘܰܕܠܳܐ ܡܘ̣ܡ: ܘܢܶܫ̇ܬܘܶܐ ܕܢܶܚ̇ܕܶܐ ܒܰܩܝܳܡܬܳܟ ܡܫܰܒܰܚܬܳܐ: ܘܰܢ̇ܙܰܡܰܪ ܠܳܟ ܬܶܫܒ̈ܚܳܬܳܐ ܕܰܟ̈ܝܳܬܳܐ ܡܳܪܰܢ ܘܐܰܠܳܗܰܢ ܠܥܳܠܡܝ̣ܢ܀