ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ ܟܺܐܢܳܐ ܕܰܥܩ̣ܰܪ ܠܰܓܦܶܬܳܐ ܛܳܠܘ̣ܡܬܳܐ ܕܦܺܐܪ̈ܶܐ ܠܳܐ ܝܶܗ̣ܒܰܬ݀ : ܠܗܰܘ̇ ܬܪܝ̣ܨܳܐ ܕܠ̣ܳܛܳܗ̇ ܠܢܶܨܒܬܳܐ ܥܳܒܕܰܬ݀ ܚܰܪ̈ܘ̣ܒܶܐ: ܘܬܳܪܥܰܬ݀ ܣܝܳܓܳܐ ܥܰܒ̣ܕܳܗ̇ ܠܟܽܠ ܕܳܝܘ̣̈ܫܶܐ: ܘܡܰܘܥܝ̣ܬܳܐ ܣܳܡ̣ܳܗ̇ ܕܟܘ̣̈ܒܶܐ ܘܡܶܐܟܘ̣ܠܬܳܐ ܫܰܒ̣ܩܳܗ̇ ܕܰܚܙܝ̣ܪ̈ܶܐ: ܘܰܚܠܳܦܶܝܗ̇ ܓܒ̣ܳܐ ܠܥܺܕܰܬ݀ ܥܰܡ̱̈ܡܶܐ ܢܶܨܒܬܳܐ ܚ̇ܕܰܬܳܐ ܒܰܨܠܝ̣ܒܶܗ: ܘܐܰܪܘܝ̣ ܟܪ̈ܳܒܶܝܗ̇ ܕܢ̣ܶܬܪܰܒܽܘܢ ܦܺܐܪ̈ܶܐ ܕܝ̣ܠܳܗ̇: ܕܦܺܐܪ̈ܶܐ ܕܫܘ̣ܒܚܳܐ ܬ̣ܶܬܶܠ ܠܶܗ ܘܕܳܫ̈ܢܶܐ ܕܬܰܘܕܝ̣ܬܳܐ ܬ̣ܩܰܪܶܒܝ̱ ܠܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܣܘ̣ܬܳܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܠܳܟ ܫܽܘ̣ܒܚܳܐ ܘܠܳܟ ܬܰܘܕܝ̣ܬܳܐ ܢܳܨܘ̣ܒܳܗ̇ ܕܰܥܕܶܝܢ ܡܫܰܒܰܚܬܳܐ ܕܐܰܘܥܺܝ̣ܬ ܠܳܟ ܦܺܐܪ̈ܶܐ ܡܰܚ̈ܝܳܢܶܐ ܒܰܨܠܝ̣ܒܳܐ ܕܝ̣ܠܳܟ ܣܓܝ̣ܕܳܐ: ܘܰܢܨܰܒ̣ܬ ܠܳܟ ܟܰܪܡܳܐ ܪܘ̣ܚܳܢܳܝܳܐ ܥܺܕܬܳܐ ܩܰܕܝ̣ܫܬܳܐ ܕܝ̣ܠܳܟ: ܘܰܒܢ̣ܰܝܬ ܘܣܳܡ̣ܬ ܒܳܗ̇ ܡܰܓܕܠܳܐ ܪܰܒܳܐ ܕܦܘ̣ܪܩܳܢܳܐ: ܘܰܦܬܰܚ̣ܬ ܒܳܗ̇ ܡܥܝ̣ܢܳܐ ܐ̱ܪܳܙܳܢܳܐܝ̣ܬ: ܘܐܰܫܦܰܥ̣ܬ ܒܳܗ̇ ܬܰܦ̈ܶܐ ܕܰܡܚܰܕܶܝܢ ܠܳܗ̇: ܘܐܰܪܘܝ̣ܬ ܟܪ̈ܳܒܶܝܗ̇ ܕܢ̣ܶܬܪܰܒܽܘܢ ܦܺܐܪ̈ܶܝܗ̇: ܘܐܰܣ̣ܓܝ̣ܬ ܪ̈ܣܝ̣ܣܶܝܗ̇ ܕܬ̣ܶܬܪܰܒܶܐ ܡܰܘܥܝ̣ܬܳܗ̇: ܘܐܰܘܥܝ̣ܬ ܒܳܗ̇ ܥܶܢ̈ܒܶܐ ܫܰܦܝ̣ܪ̈ܳܬܳܐ ܕܗܰܝܡܳܢܘ̣ܬܳܐ ܚܠܳܦ ܚܰܪ̈ܘ̣ܒܶܐ ܣܢܰܝ̈ܳܐ ܕܟܳܦܘ̣ܪܘ̣ܬܳܐ: ܘܦܺܐܪ̈ܶܐ ܚܠ̈ܰܝܳܐ ܕܬܰܘܕܝ̣ܬܳܐ ܚܠܳܦ ܪܶܛܢܳܐ ܡܰܪܝ̣ܪܳܐ ܕܓܘ̣ܕܳܦܳܐ ܐܰܫܘܰܚ̣ܬ ܒܳܗ̇ ܕܳܫ̈ܢܶܐ ܫܒܝ̣̈ܚܶܐ ܕܬܶܫܒ̈ܚܳܬܳܐ: ܚܠܳܦ ܨܰܥܪܳܐ ܘܒܶܙܚܳܐ ܕܰܨܠܝ̣ܒܘ̣ܬܳܐ ܙܳܟܘ̣ܬܳܐ ܫܰܪܝ̣ܪܬܳܐ ܕܒܰܨܠܝ̣ܒܳܐ: ܠܳܟ ܡܳܪܝܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܕܗܳܕܶܐ ܒܛܝ̣ܠܘ̣ܬܳܐ ܚܰܘܝ̣ܬ ܡܶܛܽܠ ܦܘ̣ܪܩܳܢܰܢ: ܡܶܬܟܰܫܦܝ̣ܢܰܢ ܥܰܠ ܥܶܛܪܳܐ ܗܳܢܳܐ ܕܒܶܣ̈ܡܶܐ ܟܰܕ ܫܳܐܠܝ̣ܢܰܢ ܡ̣ܶܢ ܪ̈ܰܚܡܰܝܟ ܣܰܓܺܝ̈ܶܐܐ: ܕܬ̣ܶܥܒܶܕ ܠܰܢ ܦܳܥ̈ܠܶܐ ܟܰܫܝ̣ܪ̈ܶܐ ܕܡܰܠܟܘ̣ܬܳܟ ܘܬܰܓܳܪ̈ܶܐ ܒܰܥܳܝ̈ܶܐ ܕܥܘ̣ܬܪܳܟ: ܘܓܘ̣̈ܕܳܦܶܐ ܫܒܝ̣̈ܚܳܬܳܐ ܒܓܰܘ ܟܪܘ̣ܟܝܳܐ: ܘܙܰܪܥܳܐ ܒܪܝ̣ܟܳܐ ܒܓܰܘ ܚܰܩܠܳܐ ܕܝ̣ܠܳܟ: ܘܚ̈ܶܛܶܐ ܛܳܒ̈ܳܬܳܐ ܒܰܐܘܨܪ̈ܰܝܟ: ܘܢܶܨܒ̈ܳܬܳܐ ܪ̈ܚܝ̣ܡܳܬܳܐ ܒܕܳܪ̈ܳܬܳܐ ܕܩܘ̣̈ܕܫܰܝܟ ܘܐܶܡܪ̈ܶܐ ܫܰܡܺܝ̣̈ܢܶܐ ܒܡܰܪ̈ܓܰܝ ܡܰܠܟܘ̣ܬܳܟ: ܘܡܰܪ̈ܓܳܢܝܳܬܳܐ ܓܰܒ̈ܝܳܬܳܐ ܒܰܟܠܝ̣̈ܠܶܐ ܕܫܘ̣ܒܚܳܟ: ܘܕܶܩ̈ܠܶܐ ܪ̈ܳܡܶܐ ܒܦܰܪܕܰܝܣܳܟ: ܘܰܐܪ̈ܙܶܐ ܗܕܝ̣ܪ̈ܶܐ ܥܰܠ ܬܰܦܰܝ̈ ܝܘ̣ܠܦܳܢܳܐ ܕܝ̣ܠܳܟ: ܘܫܰܪ̈ܘܰܝܢܶܐ ܫܒܝ̣̈ܚܶܐ ܒܛܘ̣ܪ̈ܰܝ ܥܺܕܬܳܟ: ܘܐܰܝܟ ܙܰܝܬܳܐ ܡܫܰܒܚܳܐ ܒܒܰܝܬܳܐ ܕܐܝ̣ܩܳܪܳܐ ܕܝ̣ܠܳܟ: ܘܐܰܝܟ ܓܦܶܬܳܐ ܫܒܝ̣ܚܬܳܐ ܒܟܰܪܡܳܐ ܕܪܰܒܘ̣ܬܳܟ ܘܐܰܟܳܪ̈ܶܐ ܚܦܝ̣̈ܛܶܐ ܕܦܳܠ̇ܚܝ̣ܢ ܒܟܰܪܡܳܐ ܕܝ̣ܠܳܟ: ܘܐܰܘ̈ܘܳܢܶܐ ܫܦܝ̈ܐ ܠܡܰܫܪܝܳܟ: ܘܗܰܝ̈ܟܠܶܐ ܕܟܰܝ̈ܳܐ ܠܐܝ̣ܩܳܪ ܬܶܫܒܘ̣ܚܬܳܟ: ܘܡܰܕ̈ܒܚܶܐ ܙܗܰܝ̈ܳܐ ܠܰܥܡܘ̣ܪܝܳܐ ܕܐܝ̣ܬܘ̣ܬܳܟ: ܘܰܡܩܰܕ̈ܫܳܢܶܐ ܫܦܰܝ̈ܳܐ ܠܰܫܟܝ̣ܢܬܳܐ ܕܪܰܒܘ̣ܬܳܟ: ܘܰܩܪ̈ܰܝܳܐ ܬܰܩ̈ܢܶܐ ܘܩܰܕܝ̣̈ܫܶܐ ܠܡܰܠܟܘ̣ܬܳܐ ܕܡܳܪܘ̣ܬܳܟ: ܘܰܙܡܝ̣̈ܢܶܐ ܕܫܳܘܶܝܢ ܠܡܶܫܬܘ̣ܬܳܐ ܕܫܳܪܘ̣ܬܳܟ: ܘܰܚܕܘ̣̈ܓܶܐ ܕܟܰܝ̈ܳܐ ܠܰܚܠܘ̣ܠܳܐ ܕܡܳܪܘ̣ܬܳܟ: ܘܬܰܡܳܢ ܕܠܳܐ ܫܶܠܝܳܐ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀