ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܥܰܡ ܐܶܣܛܘ̣̈ܟܣܶܐ ܘܰܟܝ̈ܳܢܶܐ ܕܙܳܥ̣ܘ̱ ܘܰܪܥܶܠ̣ܘ̱ ܒܗܳܢܳܐ ܝܰܘܡܳܐ: ܢ̇ܶܕܚܰܠ ܘܰܢ̇ܙܘ̣ܥ ܡ̣ܶܢ ܕܝ̣̈ܢܰܝܟ ܘܬܰܫ̣ܪܶܐ ܒܰܢ ܕܶܚܠܬܳܐ ܕܝܰܘܡܳܐ ܐ̱ܚܪܳܝܳܐ ܘܠܳܐ ܬܶܡ̣ܢܶܐ ܠܰܢ ܥܰܡ ܗܳܢܽܘܢ ܕܨܰܠܒܘ̣ܟ: ܐܶܠܳܐ ܐܰܘܕܳܐ ܒܰܢ ܕܐܰܘܕܝ̣ܢܰܢ ܒܳܟ ܘܰܒܚܰܫܰܝ̈ܟ ܦܳܪ̈ܘ̣ܩܳܝܶܐ: ܘܫܰܘܙܶܒ ܠܰܢ ܡ̣ܶܢ ܬܰܫܢܝ̣̈ܩܶܐ ܕܰܢܛܝ̣ܪܝ̣ܢ ܠܥܳܒ̈ܕܰܝ ܒܝ̣̈ܫܳܬܳܐ: ܕܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܗܕܝ̣ܪ ܒܬܶܫ̈ܒܚܳܬܳܐ ܘܰܡܥܰܠܰܝ ܒܪܘ̣ܡܪ̈ܳܡܶܐ: ܕܰܕܠܳܐ ܚܶܙܘܳܐ ܘܙܝ̣ܘܳܐ ܐܶܬ̣ܓܠܝ̣ ܒܰܒܪܝ̣ܬܳܐ ܘܫܝ̣ܛܳܐ ܘܡܰܟܝ̣ܟܳܐ ܥܰܠ ܐܰܪܥܳܐ ܐܶܬ̣ܚܙܝ̣: ܠܗܰܘ̇ ܡܪܰܝܰܡ ܡ̣ܶܢ ܚܰܫ̈ܶܐ ܘܡܰܒܥܰܕ ܡ̣ܶܢ ܟܺܐܒ̈ܶܐ ܕܰܠܡܶܣ̣ܒܰܠ ܚܰܫܰܝ̈ܢ ܘܠܰܡܣܰܝܒܰܪ ܟܺܐܒ̈ܶܐ ܕܝ̣ܠܰܢ ܐܶܬ̣ܬܰܚܬܝ̣ ܡ̣ܶܢ ܐܰܬܪܶܗ: ܠܗܰܘ̇ ܟܺܐܢܳܐ ܘܰܬܪܝ̣ܨܳܐ ܕܒ̣ܰܕܰܪ ܒܟܺܐܢܘ̣ܬܶܗ ܠܙܳܩܘ̣ܦܰܘ̈ܗ̱ܝ ܘܟܰܢ̣ܶܫ ܒܛܰܝܒܘ̣ܬܶܗ ܠܣܳܓܘ̣̈ܕܰܘܗ̱ܝ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܘܐܰܚܝ̣ܕ ܟܽܠ ܡܶܠܬܳܐ ܚܰܝܳܐ ܕܐܰܒܳܐ ܚܰܝܳܐ ܘܛܘ̣ܒܬܳܢܳܐ: ܗܰܘ̇ ܡܰܒܘ̣ܥܳܐ ܕܥܘ̣ܕܪ̈ܳܢܶܐ ܘܰܡܫܰܟܢܳܢܳܐ ܕܠܳܐ ܡܶܬ̣ܚܰܒܠܳܢܘ̣ܬܳܐ: ܗܰܘ̇ ܕܰܡܥܰܠܰܝ ܡ̣ܶܢ ܟܽܠ ܝ̣ܕܰܥܬܳܐ ܘܣܘ̣ܟܳܠܳܐ ܘܰܬܚܘ̣ܡܳܐ ܕܰܒܪ̈ܰܝܳܐ ܒܰܓܢܝ̣ܙܘ̣ܬ ܐܰܠܳܗܘ̣ܬܶܗ ܡܪܰܝܰܡܬܳܐ: ܗܰܘ̇ ܕܟܰܕ ܚـܼܙܰܝܬܳܝܗ̱ܝ ܠܨܰܠܡܳܐ ܕܝ̣ܠܳܟ ܕܡܶܬܢܰܘܰܠ ܗ̱ܘܳܐ ܒܚܰܫ̈ܶܐ ܕܰܚܛܝ̣ܬܳܐ ܘܰܡܥܰܪܩܰܠ ܒܨܶܒܝܳܢܶܗ ܒܦܰܚ̈ܶܐ ܕܣܳܛܳܢܳܐ: ܐܰܪܟܶܢ̣ܬ ܪ̈ܰܚܡܰܝܟ ܘܐܶܬܥ̣ܰܪܙܰܠܬ ܥܰܡ ܒܶܣܪܳܐ ܘܢܰܦܫܳܐ ܝܰܕܘ̣ܥܬܳܢܝ̣ܬܳܐ: ܘܒܰܪܢܳܫܳܐ ܡܫܰܡܠܝܳܐ ܗ̣ܘܰܝܬ ܕܠܳܐ ܫܘ̣ܓܢܳܝܳܐ ܘܒܰܐܠܳܗܘ̣ܬܳܟ ܟ̣ܰܬܰܪܬ: ܒܥܳܠܡܳܐ ܗܰܠܶܟ݂ܬ: ܘܰܬܚܶܝܬ ܙܰܒܢ̈ܶܐ ܐܰܢ̱ܬ ܠܳܟ ܛܰܟܶܣ̣ܬ: ܐܰܢ̱ܬ ܕܐܝ̣ܬܰܝܟ ܠܳܐ ܙܰܒܢܳܝܳܐ ܘܕܰܠܥܶܠ ܡ̣ܶܢ ܙܰܒܢ̈ܶܐ: ܘܕܘ̣ܡܳܪܳܐ ܕܠܳܐ ܡܶܬ̣ܡܰܠܰܠ ܘܬܶܗܪܳܐ ܕܠܳܐ ܡܶܬ̣ܦܰܫܰܩ: ܒܥܳܡܰܪܬܳܐ ܗ̣ܘܰܝܬ ܐܰܝܟ ܕܣܰܓܺܝ̈ܶܐܐ ܥܠܰܝܟ ܢ̣ܶܬܡܗܽܘܢ ܘܡܰܠ̈ܟܶܐ ܦܘ̣̈ܡܰܝܗܽܘܢ ܢ̣ܶܐܚܕܽܘܢ: ܒܗܳܝ̇ ܕܒܳܟ ܫܟܝ̣̈ܚܳܢ ܗ̱ܘܰܝ̈ ܐܰܠܳܗܳܝ̈ܳܬܳܐ ܘܐ̱ܢܳܫܳܝ̈ܳܬܳܐ ܬܶܕܡܪ̈ܳܬܳܐ ܘܚܰܫ̈ܶܐ: ܡܰܟܝ̣ܟܘ̣ܬܳܐ ܘܪܘ̣ܡܪ̈ܳܡܶܐ: ܡܚܝ̣ܠܘ̣ܬܳܐ ܘܓܰܢ̱ܒܳܪܘ̣ܬܳܐ: ܘܡ̣ܶܢ ܗܘ̣ܦܳܟܰܝ̈ܟ ܓܶܝܪ ܬܶܕܡܪ̈ܳܬܳܐ ܕܳܢܚ̈ܳܢ ܗ̱ܘܰܝ̈ ܘܡ̣ܶܢ ܡܰܟܝ̣ܟܘ̣ܬܳܟ ܩܘ̣ܠܳܣܰܝ̈ܟ ܢܳܒ̇ܥܝ̣ܢ: ܘܰܒܗܳܕܶܐ ܬܶܡܗܳܐ ܐܪܡܝ̣ܬ ܥܰܠ ܫܰܠܝ̣̈ܛܳܢܶܐ ܘܠܳܐ ܐܶܣ̣ܬܰܟܠܘ̣ܟ: ܘܠܳܐ ܗܰܝܡܶܢ̣ܘ̱ ܠܫܶܡܥܳܟ: ܢܘ̣ܪܳܐ ܘܡܰܝ̈ܳܐ ܕܰܟܢܝ̣ܫܝ̣ܢ ܠܥܶܠ ܡ̣ܶܢ ܟܝܳܢܳܐ ܕܰܒܗܽܘܢ ܦܝ̣ܠܝ̣ܣܘ̣ܦܘ̣ܬܳܐ ܥܳܠܡܳܢܳܝܬܳܐ ܐܶܬܚܰܢ̣ܩܰܬ݀ : ܩܰܢܝܳܐ ܪܥܝ̣ܥܳܐ ܐܶܬܰܐܡ̣ܪܰܬ݀ ܕܠܰܒܪܝ̣ܬܳܐ ܕܰܡ̣ܛܳܬ݀ ܬܶܣܡܘ̣ܟ: ܫܪܳܓܳܐ ܕܰܡܛܰܦܛܰܦ ܐܶܬ̣ܩܰܪܝܰܬ݀ ܕܰܠܥܳܡܰܪܬܳܐ ܕܚܶܫ̣ܟܰܬ݀ ܬܰܢ̣ܗܰܪ: ܡܚܰܒܰܠ ܚܶܙܘܶܗ ܡ̣ܶܢ ܒܢܰܝ̈ܢܳܫܳܐ ܐܶܬ̣ܟܰܢܝܰܬ݀ : ܕܫܘ̣ܦܪܳܐ ܕܝ̣ܠܳܟ ܩܰܕܡܳܝܳܐ ܠܰܢ ܬܰܗ̣ܦܶܟ: ܫܝ̣ܛܳܐ ܘܡܰܟܝ̣ܟܳܐ ܕܐ̱ܢܳܫܳܐ ܐܫܬܰܡ̣ܰܗܬ ܕܐܝ̣ܩܳܪܳܐ ܘܪܘ̣ܡܪܳܡܳܐ ܠܰܢ ܬܫ̣ܰܟܶܢ: ܒܰܚ̈ܛܳܗܶܐ ܕܝ̣ܠܰܢ ܦܓܰܥ̣ܬ ܕܫܘ̣ܒܩܳܢܳܐ ܓܡܝ̣ܪܳܐ ܠܰܢ ܬܶܬ̣ܶܠ: ܫܰܪܝ̣ܪܳܐܝ̣ܬ ܓܶܝܪ ܚܰܫܰܝ̈ܢ ܣܰܝܒ̣ܰܪܬ ܘܟܺܐܒܰܝ̈ܢ ܣܒܰܠ̣ܬ ܐܰܝܟܰܢܳܐ ܕܰܒܫܘ̣̈ܡܳܬܳܐ ܕܝ̣ܠܳܟ ܢ̇ܶܬܰܐܣܶܐ ܘܒܰܟܪܝ̣ܗܘ̣ܬܳܟ ܢ̇ܶܬܚܠܶܡ: ܐܳܘ ܕܪܰܚܝ̣ܩ ܡ̣ܶܢ ܚܰܫ̈ܶܐ ܘܡܰܒܥܰܕ ܡ̣ܶܢ ܟܺܐܒ̈ܶܐ ܘܟܘ̣ܪ̈ܗܳܢܶܐ: ܒܗܳܝ̇ ܕܰܚܛܝ̣ܬܳܐ ܠܳܐ ܥܒ̣ܰܕܬ: ܘܢܶܟܠܳܐ ܒܦܘ̣ܡܳܟ ܠܳܐ ܐܫ̣ܬܟܰܚ: ܐܶܠܳܐ ܨܒ̣ܰܝܬ ܘܐܰܢ̱ܬ ܠܳܟ ܐܰܡܶܟ݂ܬ ܘܚܰܫ̣ܬ: ܘܰܚܛܳܗ̈ܶܐ ܕܪܝ̣ܫ ܓܒܝ̣ܠܬܰܢ ܘܟܺܐܒ̈ܶܐ ܥܠܰܝܟ ܩܰܒܶܠ̣ܬ: ܘܥܰܠ ܗܳܕܶܐ ܟܪ̈ܝ̣ܗܳܬܳܐ ܥܠܰܝܟ ܐܶܬܶܐܡܰܪ̈ܝ̱ ܘܫܘ̣̈ܡܳܬܳܐ ܘܚܰܫ̈ܶܐ ܒܫܰܪܒܳܟ ܐܶܬܡ̣ܰܠܰܠܘ̱: ܟܰܕ ܒܚܰܪܬܳܐ ܕܟܽܠܳܗ̇ ܣܳܥܘ̣ܪܘ̣ܬܳܐ ܐܰܠܗܳܝ̇ܬܳܐ ܠܩܶܛܠܳܐ ܡܶܛܽܠ ܚܛܳܗܰܝ̈ܢ ܐܶܬܛܰܝܰܒ̣ܬ: ܘܰܠܡܰܘܬܳܐ ܡܰܚܝܳܢܳܐ ܕܡܝ̣ܬܘ̣ܬܰܢ ܐܶܬܥ̣ܰܬܰܕܬ: ܡܰܟܝ̣ܟܘ̣ܬܳܐ ܕܠܳܐ ܡܶܬ̣ܡܰܠܠܳܐ ܡܶܛܽܠ ܥܰܘܠܰܢ ܩܢ̣ܰܝܬ: ܘܢܝ̣ܚܘ̣ܬܳܐ ܕܠܳܐ ܣܳܟܳܐ ܠܘ̣ܩܒܰܠ ܪܓܝ̣ܙܘ̣ܬܰܢ ܚܰܘܝ̣ܬ: ܛܰܝܶܒ̣ܬ ܐܰܢ̱ܬ ܠܳܟ ܠܩܺܐܪܣܳܐ ܪܰܒܳܐ ܕܰܚܠܳܦܰܝܢ: ܒܡܰܟܝ̣ܟܘ̣ܬܳܐ ܣܰܓܺܝ̣ܐܬܳܐ ܒܦܘ̣ܡܳܐ ܠܳܐ ܦܬܝ̣ܚܳܐ ܕܐܰܝܟ ܐܶܡܪܳܐ ܠܢܶܟܣܬܳܐ ܐܶܬܕܒ̣ܰܪܬ: ܘܐܰܝܟ ܢܶܩܝܳܐ ܩܕܳܡ ܓܳܙܘ̣ܙܳܐ ܫܰܬܝ̣ܩ ܗ̱ܘܰܝܬ: ܘܡ̣ܶܢ ܚܒܘ̣ܫܝܳܐ ܘܡ̣ܶܢ ܕܝ̣ܢܳܐ ܠܳܐ ܥܪܰܩ̣ܬ: ܠܡܶܣܒܰܠ ܗܳܠܶܝܢ ܕܰܥܠܰܝܟ ܒܰܢܒܺܝܘ̣ܬܳܐ ܪ̈ܫܝ̣ܡܳܢ ܗ̱ܘܰܝ̈: ܐܰܝܟܰܢܳܐ ܕܠܳܐ ܠܒܶܣܬܪܳܟ ܬܶܗ̣ܦܘ̣ܟ ܐܳܦܠܳܐ ܒܚܶܪܝܳܢܳܐ ܬܩܘ̣ܡ: ܐܶܠܳܐ ܓܘ̣ܫܡܳܟ ܠܡܰܚ̈ܘܳܬܳܐ ܬ̣ܶܬܶܠ: ܦܰܟܰܝ̈ܟ ܠܫܘ̣̈ܩܳܦܶܐ: ܦܰܪܨܘ̣ܦܳܟ ܠܪܘ̣ܩܳܐ ܬ̣ܣܝ̣ܡ: ܘܐܰܦܰܝ̈ܟ ܡ̣ܶܢ ܒܶܗܬܬܳܐ ܠܳܐ ܬܰܦ̣ܢܶܐ: ܐܝ̣̈ܕܰܝܟ ܘܪ̈ܶܓܠܰܝܟ ܠܒܘ̣ܙܳܥܳܐ ܕܨܶܨ̈ܶܐ: ܕܰܦܢܳܟ ܠܠܘ̣ܟܳܝܬܳܐ ܘܢܰܚ̈ܬܰܝܟ ܠܦܘ̣ܠܳܓ ܦܶܣ̈ܶܐ: ܛܥܶܡ̣ܬ ܚܰܠܳܐ ܘܰܡܪܳܪ̈ܶܐ: ܘܰܒܟܽܠܗܶܝܢ ܥܰܠ ܩܰܝܣܳܐ ܕܚܶܣܕܳܐ ܬܶܬ̣ܬܠܶܐ: ܘܥܰܡ ܥܰܘ̈ܳܠܶܐ ܬܶܬ̣ܡܢܶܐ: ܘܡ̣ܶܢ ܟܽܠ ܚܰܙܳܝܰܝ̈ܟ ܬܶܬ̣ܡܰܝܰܩ: ܘܡ̣ܶܢ ܗܳܢܽܘܢ ܕܰܚܕܳܪ̈ܰܝܟ ܬܶܬ̣ܚܰܣܰܕ: ܘܢܰܦܫܳܟ ܠܡܰܘܬܳܐ ܬܰܫ̣ܠܶܡ ܘܰܠܥܰܫܝ̣̈ܢܶܐ ܒܶܙܬܳܐ ܬܦ̣ܰܠܶܓ: ܘܥܰܡ̱̈ܡܶܐ ܣܰܓܺܝ̈ܶܐܐ ܬܰܦ̣ܢܶܐ ܘܨܶܒܝܳܢܶܗ ܕܐܰܒܘ̣ܟ ܒܳܟ ܢ̣ܰܨܠܰܚ: ܘܡ̣ܶܢ ܗܳܝܕܶܝܟ ܠܬܰܠܡܝ̣̈ܕܰܝܟ ܐ̱ܪܳܙܳܟ ܓܠ̣ܰܝܬ: ܘܡܶܕܶܡ ܕܰܥܬܝ̣ܕ ܕܢܶܗ̣ܘܶܐ ܠܳܟ ܠܰܫܠܝ̣̈ܚܰܝܟ ܐܰܘܕܰܥ̣ܬ: ܐܰܝܟܰܢܳܐ ܕܠܳܐ ܢ̣ܶܬܕܰܘܕܽܘܢ ܒܥܶܕܳܢܳܐ ܕܚܰܫܳܟ ܐܳܦܠܳܐ ܢ̣ܶܬܟܰܫܠܽܘܢ ܒܫܳܥܬܳܐ ܕܰܨܠܝ̣ܒܘ̣ܬܳܟ: ܘܡܶܛܽܠ ܗܳܕܶܐ ܡܦܝ̣ܣܝ̣ܢܰܢ ܠܳܟ ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ: ܕܬ̣ܰܪܚܶܩ ܡܶܢܰܢ ܟܽܠ ܥܳܩܬܳܐ ܡܕܰܝܒܳܢܝ̣ܬܳܐ: ܘܟܽܠ ܚܰܫܳܐ ܕܰܠܢܰܦܫܳܐ ܡܣܰܓܶܦ: ܘܡܶܢܳܟ ܕܳܘܝܳܐܝ̣ܬ ܡܰܪܚܶܩ ܘܐܰܩܢܳܐ ܠܰܢ ܚܰܫܳܐ ܡܩܰܠܣܳܐ ܕܥܰܠ ܚܛܳܗܰܝ̈ܢ: ܘܥܳܩܬܳܐ ܬܡܝ̣ܗܬܳܐ ܕܡܶܛܽܠ ܠܳܐ ܢܳܡܘ̣ܣܳܝ̈ܘܳܬܳܐ ܕܝ̣ܠܰܢ ܗܳܝ̇ ܕܰܓܡܝ̣ܪܳܐܝ̣ܬ ܬܘܳܬ ܢܰܦܫܳܐ ܕܠܳܐ ܗܳܦܟܳܐ ܒܰܢ ܥܳܒ̇ܕܳܐ ܘܟܽܠܳܢܳܐܝ̣ܬ ܨܶܝܕ ܘܰܥܕܳܟ ܒܟܽܠܙܒܰܢ ܡܒܰܪܟܳܐ: ܐܰܝܟܰܢܳܐ ܕܕܰܟܝܳܐܝ̣ܬ ܘܩܰܕܝ̣ܫܳܐܝ̣ܬ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܪܳܡܳܐ ܕܐܶܬ̣ܬܰܚܬܝ̣ ܡܶܛܽܠܳܬܰܢ: ܘܰܗ̣ܘܳܐ ܒܰܪܢܳܫܳܐ ܐܟܘܳܬܰܢ: ܘܣܰܝܒ̣ܰܪ ܚܰܫ̈ܶܐ ܡܶܛܽܠ ܦܘ̣ܪܩܳܢܰܢ: ܫܡܰܥ ܨܠܰܘ̈ܳܬܳܐ ܘܒܳܥܘ̈ܳܬܰܢ ܘܩܰܒܶܠ ܠܦܝ̣ܪܡܳܐ ܗܳܢܳܐ ܕܡ̣ܶܢ ܒܨܝ̣ܪܘ̣ܬܰܢ: ܘܐܰܢܗܰܪ ܒܶܗ ܠܥܰܝ̈ܢܶܐ ܕܡܰܕܥܰܝ̈ܢ ܒܢܘ̣ܗܪܳܐ ܕܬܶܫܒ̈ܚܳܬܳܐ ܕܝ̣ܠܳܟ: ܘܚܰܝܶܠ ܠܟܽܠܰܢ ܠܘܳܬ ܦܘ̣ܠܚܳܢܳܐ ܕܦܘ̣̈ܩܕܳܢܰܝܟ ܡܰܥܒ̈ܕܰܝ ܚܰܝ̈ܶܐ: ܠܺܐܝ̣̈ܕܰܝܳܐ ܕܶܝܢ ܕܝ̣ܠܰܢ ܠܘܳܬ ܣܳܥܘ̣ܪܘ̣ܬܳܐ ܕܛܳܒ̈ܳܬܳܐ ܙܰܝܶܢ: ܠܗܰܠ̈ܟܳܬܰܢ ܬܰܪܶܨ ܐܰܝܟ ܡܶܠܬܳܟ ܠܡܰܚ̈ܫܒܳܬܰܢ ܛܰܪ ܒܥ̱ܘ̣ܗܕܳܢܳܐ ܕܝ̣ܠܳܟ: ܠܣܶܦܘ̈ܳܬܰܢ ܘܰܠܠܶܫܳܢܰܝ̈ܢ ܒܡ̈ܶܠܶܐ ܕܬܶܫܒ̈ܚܳܬܳܐ ܕܝ̣ܠܳܟ ܘܒܰܫܪܳܪܳܐ ܩܰܕܶܫ ܠܟܽܠܰܢ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀