ܦܪܽܘ̣ܡܝܽܘܢ

ܬܶܫܒܘ̣ܚܬܳܐ: ܠܗܰܘ̇ ܦܳܪܘ̣ܩܳܐ ܕܩܰܕܶܡ̣ܘ̱ ܨܳܪܘ̱ ܢܒܺܝ̈ܶܐ ܡܶܐܬܝ̣ܬܶܗ: ܘܰܪܫܰܡ̣ܘ̱ ܙܰܕܝ̣̈ܩܶܐ ܦܘ̣ܪܩܳܢܶܗ: ܘܚܰܘܝ̣ܘ ܩܰܕܝ̣̈ܫܶܐ ܢܶܨܚܳܢܶܗ: ܘܒܰܕܶܩ̣ܘ̱ ܟܺܐܢ̈ܶܐ ܡܘ̣ܟܳܟܶܗ: ܘܐܰܘܕܰܥ̣ܘ̱ ܬܪ̈ܝ̣ܨܶܐ ܥܰܠ ܚܰܫܶܗ: ܘܐܰܟ̣ܪܶܙܘ̱ ܡܒܕ̈ܩܳܢܶܐ ܨܠܝ̣ܒܘ̣ܬܶܗ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܬܪܰܝܳܢܳܐ ܕܠܶܠܝܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܕܰܒܨܶܒܝܳܢܳܐ ܕܝ̣ܠܳܟ ܘܕܐܰܒܘ̣ܟ ܠܳܐ ܡܶܬ̣ܕܰܪܟܳܢܳܐ ܘܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܐܶܬ̣ܚܰܝܰܕܬ ܠܒܶܣܪܳܐ ܒܰܪ ܟܝܳܢܳܐ ܕܝ̣ܠܰܢ: ܒܰܩܢܘ̣ܡܳܐ ܕܝ̣ܠܳܟ ܐܰܠܳܗܳܝܳܐ ܘܒܰܡܕܰܒܪܳܢܘ̣ܬܳܐ ܕܝ̣ܠܳܟ ܦܳܪܘ̣ܩܳܝܬܳܐ: ܠܚܰܘܒܬܳܐ ܕܝ̣ܠܰܢ ܒܢܰܝ̈ܢܳܫܳܐ ܦܘ̣ܪܩܳܢܳܐ ܡܫܰܡܠܝܳܐ ܫܰܟܶܢ̣ܬ: ܘܥܰܡܰܢ ܐܶܬܗ̣ܰܦܰܟ݂ܬ ܒܰܕܡܘ̣ܬܰܢ ܣܛܰܪ ܡܶܢ ܚܛܝ̣ܬܳܐ: ܟܰܕ ܩܰܘܝ̣ܬ ܒܰܐܠܳܗܘ̣ܬܳܟ ܫܰܪܝ̣ܪܬܳܐ ܘܚܺܐܪܘ̣ܬܳܐ ܠܰܟܝܳܢܰܢ ܝܰܗ̣ܒܬ ܘܒܰܝܬܳܝܘ̣ܬܳܐ ܫܰܪܝ̣ܪܬܳܐ ܘܠܳܐ ܡܶܨܛܰܠܝܘ̣ܬܳܐ: ܐܰܝܟ ܥܳܒܘ̣ܕܳܐ ܘܒܳܪܘ̣ܝܳܐ ܕܟܽܠ ܡ̇ܨܶܐ̣: ܘܰܒܡܘ̣ܠܳܝܳܐ ܗܰܘ̇ ܕܰܡܕܰܒܪܳܢܘ̣ܬܳܐ ܕܝ̣ܠܳܟ ܐܰܠܳܗܳܝ̇ܬܳܐ ܠܘܳܬ ܚܰܫܳܐ ܦܳܪܘ̣ܩܳܝܳܐ ܐܶܬ̣ܰܝܬ: ܘܒܰܐܓܘ̣ܢܳܐ ܕܰܠܒܰܪ ܡܶܢ ܥܳܠܡܳܐ ܠܗܳܢܳܐ ܓܡ̣ܰܪܬ: ܘܙܳܟܘ̣ܬܳܐ ܫܰܪܝ̣ܪܬܳܐ ܒܢܰܨܝ̣ܚܘ̣ܬܳܐ ܕܝ̣ܠܳܟ ܐܰܠܶܦ̣ܬ ܠܰܢ: ܘܰܠܦܺܐܪܳܐ ܡܡܝ̣ܬܳܢܳܐ ܕܒܰܢ ܚܠܝ̣ܕ ܗ̱ܘܳܐ ܪܰܨܶܨܬ: ܘܡܶܛܽܠ ܠܳܐ ܢܳܡܘ̣ܣܳܝ̈ܘܳܬܳܐ ܕܝ̣ܠܰܢ ܩܰܒܶܠ̣ܬ ܥܠܰܝܟ ܡܘ̣ܟܳܟܳܐ ܘܨܰܥܪܳܐ ܘܚܶܣܕܳܐ ܕܥܰܠ ܨܠܝ̣ܒܳܐ: ܘܚܰܝܠܳܐ ܘܰܟܠܝ̣ܠܳܐ ܟܘ̣ܒܳܢܳܝܳܐ: ܘܥܰܡ ܓܰܝ̈ܳܣܶܐ ܬܘ̣ܒ ܐܶܬ̣ܡܢܝ̣ܬ: ܘܰܓܡ̣ܰܪܬ ܒܰܩܢܘ̣ܡܳܟ ܠܟܽܠܗܶܝܢ ܐܰܝܠܶܝܢ ܕܐܰܟ̣ܪܶܙܘ̱ ܥܠܰܝܟ ܢܒܺܝ̈ܶܐ ܩܰܕܝ̣̈ܫܶܐ: ܟܰܕ ܚܰܕ ܡܰܢ ܒܚܰܫ̈ܶܐ ܕܰܣܒ̣ܰܠܬ ܘܠܳܐ ܒܰܓ̣ܶܢܬ ܠܛܘ̣ܦܣܳܐ ܕܚܰܫܳܟ ܬܗܝ̣ܪܳܐ ܨܳܐܰܪ ܗ̱ܘܳܐ: ܘܰܐ̱ܚܪܺܢܳܐ ܠܡܘ̣ܟܳܟܳܟ ܕܥܰܠ ܩܰܝܣܳܐ ܒܝܰܕ ܦܟܳܪ̈ܶܐ ܕܚܰܒܝ̣ܒܶܗ ܕܰܠܥܶܠ ܡܶܢ ܥܠܳܬܳܐ ܡܚܰܘܶܐ ܗ̱ܘܳܐ: ܚܰܕ ܒܶܐܡܪܳܐ ܕܡܶܬܢܟܶܣ ܗ̱ܘܳܐ ܠܢܶܟܣܬܶܗ ܕܰܩܢܘ̣ܡܳܟ ܒܚܰܪܰܬ ܙܰܒܢ̈ܶܐ ܪܳܫܶܡ ܗ̱ܘܳܐ: ܘܰܐ̱ܚܪܺܢܳܐ ܒܙܳܟܘ̣ܬܳܐ ܕܰܢܣ̣ܰܒ ܒܝܰܕ ܢܰܝܙܟ݂ܳܐ ܕܐܰܪܝ̣ܡ ܠܙܳܟܘ̣ܬܶܗ ܕܰܨܠܝ̣ܒܳܟ ܡܰܘ̇ܕܰܥ ܗ̱ܘܳܐ: ܚܰܕ ܕܐܶܢܳܐ ܠܚܰܫܳܐ ܡܛܰܝܰܒ ܐ̱ܢܳܐ: ܥܰܠ ܚܰܫܳܟ ܨܶܒܝܳܢܳܝܳܐ ܕܰܗ̣ܘܳܐ ܥܰܠ ܐܰܦܰܝ̈ܢ ܡ̣ܶܬܢܰܒܶܐ ܗ̱ܘܳܐ: ܘܰܐ̱ܚܪܺܢܳܐ ܕܫܰܪܝ̣ܪܳܐܝ̣ܬ ܕܚܰܫܰܝ̈ܢ ܣܳܒܶܠ ܐܰܢ̱ܬ ܘܟܘ̣ܪ̈ܗܳܢܰܝܢ ܛܳܥܶܢ ܐܰܢ̱ܬ ܐܳܡܰܪ ܗ̱ܘܳܐ: ܚܰܕ ܕܢ̣ܶܬܩܛܶܠ ܡܫܝ̣ܚܳܐ ܡܰܠܟܳܐ ܘܐܘ̣ܪܫܠܶܡ ܬ̣ܶܚܪܰܒܝ̱ ܒܩܶܛܠܶܗ ܒܓܰܘ ܒܳܒܶܝܠ ܡܰܙܥܶܩ ܗ̱ܘܳܐ: ܘܰܐ̱ܚܪܺܢܳܐ ܕܡܶܛܽܠ ܚܛܳܗܰܝ̈ܢ ܘܡܶܛܽܠ ܥܰܘ̈ܠܰܝܢ ܠܕܶܒܚܳܐ ܡ̣ܶܬܩܰܪܰܒ ܐܰܢ̱ܬ ܡܣܰܟܶܠ ܗ̱ܘܳܐ: ܚܰܕ ܕܰܠܡܳܢܳܐ ܣܘ̣ܡܳܩܝ̣ܢ ܢܰܚ̈ܬܰܝܟ ܘܒܰܕܡܳܐ ܨܒܝ̣ܥܝ̣ܢ ܕܰܩܢܘ̣ܡܳܟ ܡܫܰܐܶܠ ܗ̱ܘܳܐ: ܘܰܐ̱ܚܪܺܢܳܐ ܒܰܕܡܳܐ ܕܕܺܝܰܬܝ̣ܩܝ̣ ܗܳܝ̇ ܕܝ̣ܠܳܟ ܠܰܐܣܝ̣ܪ̈ܶܐ ܡܶܢ ܓܘ̣ܒܳܐ ܕܠܰܝܬ ܒܶܗ ܡܰܝ̈ܳܐ ܐܘܟܝ̣ܬ ܫܝܘ̣ܠ ܫܳܪܶܐ ܐܰܢ̱ܬ ܡܣܰܒܰܪ ܗ̱ܘܳܐ: ܐܶܠܳܐ ܡܦܝ̣ܣܝ̣ܢܰܢ ܠܪܶܚܡܰܬ݀ ܐ̱ܢܳܫܘ̣ܬܳܟ ܡܳܪܝܳܐ ܡܪܰܚܡܳܢܳܐ ܕܰܬ̣ܫܰܟܶܢ ܠܰܢ ܒܝܰܕ ܚܰܫ̈ܶܐ ܕܝ̣ܠܳܟ ܦܳܪ̈ܘ̣ܩܳܝܶܐ ܘܡܰܥܒ̈ܕܰܝ ܚܰܝ̈ܶܐ ܬܪܝ̣ܨܘ̣ܬܳܐ ܘܕܰܟܝܘ̣ܬܳܐ ܘܩܰܕܝ̣ܫܘ̣ܬܳܐ ܕܢܰܦܫܳܐ ܘܰܕܦܰܓܪܳܐ: ܘܪ̈ܰܚܡܶܐ ܘܚܘ̣ܣܳܝܳܐ ܘܫܘ̣ܒܩܳܢܳܐ ܕܰܚ̈ܛܳܗܶܐ ܡܶܛܽܠ ܕܐܰܠܳܗܳܐ ܕܦܘ̣ܪܩܳܢܳܐ ܕܝ̣ܠܰܢ ܐܝ̣ܬܰܝܟ: ܘܠܳܟ ܬܶܫܒܘ̣ܚܬܳܐ ܘܬܰܘܕܝ̣ܬܳܐ ܡܰܣܩܝ̣ܢܰܢ ܘܠܰܐܒܘ̣ܟ ܗܰܘ̇ ܠܳܐ ܚܳܫܘ̣ܫܳܐ ܘܛܘ̣ܒܬܳܢܳܐ ܘܰܠܪܘ̣ܚܳܐ ܕܝ̣ܠܳܟ ܩܰܕܝ̣ܫܳܐ ܡܰܥܒܶܕ ܚܰܝ̈ܶܐ ܘܰܫ̇ܘܶܐ̣ ܠܳܟ ܒܐܘ̣ܣܺܝܰܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܦܳܪܽܘ̣ܩܳܐ ܘܰܡܢܰܛܪܳܢܳܐ ܕܰܡܗܰܝ̈ܡܢܶܐ ܕܐܶܬ̣ܳܐ ܠܚܰܫ̈ܶܐ ܒܨܶܒܝܳܢܶܗ ܘܐܶܬ̣ܬܪܝ̣ܡ ܥܰܠ ܨܠܝ̣ܒܳܐ ܘܰܢܓ̣ܰܕ ܠܒܶܪ̈ܝܳܬܳܐ ܠܣܶܓܕܬܶܗ ܐܰܝܟ ܫܽܘܘ̣ܕܳܝܶܗ ܫܰܪܝ̣ܪܳܐ: ܩܰܒܶܠ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܐܶܬ̣ܩܰܪܰܒ ܠܳܟ ܒܝܰܘܡܳܐ ܗܳܢܳܐ ܕܚܰܫܳܟ ܦܳܪܘ̣ܩܳܝܳܐ: ܒܰܪܶܟ ܘܢܰܛܰܪ ܠܟܶܢܫܰܢ ܒܰܨܠܝ̣ܒܳܟ ܣܓܝ̣ܕܳܐ ܘܰܡܫܰܒܚܳܐ: ܘܣܰܬܰܪ ܠܰܢ ܬܚܶܝܬ ܟܶܢ̈ܦܶܐ ܕܛܰܝܒܘ̣ܬܳܟ: ܐܰܝܟܰܢܳܐ ܕܟܰܕ ܒܚܰܝܠܳܟ ܡܶܬ̣ܢܰܛܪܝ̣ܢܰܢ ܡܶܢ ܟܽܠ ܒܝ̣ܫܳܐ ܘܡܰܩܪܒܳܢܳܐ: ܘܕܰܢ̇ܫܰܒܚܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܠܥܳܠܡܝ̣ܢ܀