ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܳܡܳܐ ܘܰܡܥܰܠܝܳܐ ܘܣܳܝܽܘ̣ܡܳܐ ܕܢܳܡܘ̣̈ܣܶܐ ܩܰܕܝ̣̈ܫܶܐ: ܘܳܐܣܝܳܐ ܫܰܪܝ̣ܪܳܐ ܕܢܰܦܫ̈ܳܬܳܐ ܘܰܕܦܰܓܪ̈ܶܐ: ܘܥܳܨܽܘܒܳܐ ܡܗܝ̣ܪܳܐ ܕܰܐܬ̣ܩܶܢ ܠܘ̣ܩܒܰܠ ܟܺܐܒ̈ܶܐ ܕܰܚܛܝ̣ܬܳܐ ܣܰܡ̱̈ܡܳܢܶܐ ܡܝܰܬܪ̈ܶܐ ܕܰܬܝܳܒܘ̣ܬܳܐ ܡܩܰܠܰܣܬܳܐ: ܘܣܳܡ ܥܰܠ ܫܘ̣ܚ̈ܢܶܐ ܘܡܰܚ̈ܘܳܬܳܐ ܕܰܓܕܰܫ̣ܘ̱ ܠܐ̱ܢܳܫܘ̣ܬܳܐ ܡܶܢ ܥܶܠܬܳܐ ܕܝܰܥܢܘ̣ܬܳܐ ܥܶܩܳܪ̈ܶܐ ܡܰܚܠ̈ܡܳܢܶܐ ܕܰܒܝܰܕ ܨܰܘܡܳܐ ܘܰܨܠܘ̣ܬܳܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܩܰܘܡܳܐ ܩܰܕܡܳܝܳܐ ܕܠܺܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܡܰܠܟܳܐ ܪܰܒܳܐ ܕܬܶܫܒܘ̣ܚܬܳܐ: ܕܰܦܬܝ̣ܚ ܗ̱ܘ̣ ܬܰܪܥܶܗ ܩܕܳܡ ܚܰܛܳܝ̈ܶܐ: ܗܰܘ̇ ܠܶܘܝܳܐ ܛܳܒܳܐ ܠܰܐܝܠܶܝܢ ܕܪܳܕܶܝܢ ܥܰܡܶܗ: ܘܰܡܫܰܘܙܒܳܢܗܽܘܢ ܡܶܢ ܠܶܐܘܬܶܗ ܕܥܳܠܡܳܐ ܗܳܢܳܐ: ܝܰܡܳܐ ܕܫܘ̣ܒܩܳܢ ܚܰܘ̈ܒܶܐ ܘܰܚܛܳܗ̈ܶܐ ܗܰܘ̇ ܕܒܶܗ ܡܰܣܟ̈ܠܳܢܶܐ ܒܝܰܕ ܨܰܘܡܳܐ ܡܶܫܟܚܝ̣ܢ ܕܢ̣ܶܚܙܽܘܢ ܠܰܐܒܘ̣ܗ̱ܝ: ܘܒܶܗ ܢܰܦܫ̈ܳܬܳܐ ܡܟܰܪ̈ܗܳܬܳܐ ܡܶܬܰܐܣ̈ܝܳܢ ܡܶܢ ܡܘ̣ܡܰܝ̈ܗܶܝܢ: ܘܒܶܗ ܣܡܰܝ̈ܳܐ ܢܳܗܪܝ̣ܢ ܡܶܢ ܛܰܝܒܘ̣ܬܶܗ ܐܰܠܳܗܳܝܬܳܐ: ܡܪܰܚܡܳܢܳܐ ܕܚܳܕܶܐ ܒܰܐܝܠܶܝܢ ܕܡܶܢܶܗ ܒܳܥܶܝܢ ܠܳܐ ܗ̱ܘܳܐ ܒܝ̣ܫܳܐܝ̣ܬ ܐܶܠܳܐ ܛܳܒܳܐܝ̣ܬ: ܘܰܡܩܝ̣ܡ ܣܚܝ̣ܦܘ̣ܬܳܐ ܕܰܡܟܰܬܡ̈ܶܐ: ܗܰܘ̇ ܕܢܰܨܰܚ ܠܝ̣ܚܝ̣̈ܕܳܝܶܐ ܟܰܫܝ̣ܪ̈ܶܐ ܒܨܰܘܡܳܐ ܡܬܝ̣ܚܳܐ ܕܠܰܝܬ ܠܶܗ ܫܘ̣ܠܳܡܳܐ ܒܗܳܝ̇ ܕܟܽܠܶܗ ܙܰܒܢܳܐ ܕܚܰܝܰܝ̈ܗܽܘܢ ܒܰܚܣܝ̣ܠܘ̣ܬܳܐ ܕܡܶܢ ܡܶܐܟܘ̣ܠܬܳܐ ܡܣܰܒܥܳܢܝ̣ܬܳܐ ܥܰܒ̣ܪܘ̣ܗ̱ܝ: ܒܨܰܘܡܳܐ ܡܶܬܦܰܪܩܝ̣ܢ ܒܝ̣̈ܫܶܐ ܡܶܢ ܓܺܗܰܢܳܐ ܗܳܝ̇ ܕܰܢܛܝ̣ܪܳܐ ܠܰܐܝܠܶܝܢ ܕܰܪܚܶܡ̣ܘ̱ ܟܰܪܣܗܽܘܢ: ܒܨܰܘܡܳܐ ܫܘ̣ܒܚܳܐ ܕܠܳܐ ܡܶܬܡܰܠܰܠ ܡܰܠܒܶܫ ܡܫܝ̣ܚܳܐ ܐܰܠܳܗܳܐ ܠܨܰܝ̈ܳܡܶܐ ܟܰܫܝ̣ܪ̈ܶܐ ܘܥܳܢܘ̈ܳܝܶܐ ܢܰܨܺܝ̈ܚܶܐ: ܒܨܰܘܡܳܐ ܥܘ̣ܕܪܳܢܳܐ ܓܳܐܰܚ ܡܶܢ ܫܡܰܝܳܐ ܥܰܠ ܐܰܝܠܶܝܢ ܕܪܳܚܡܝ̣ܢ ܠܶܗ: ܒܨܰܘܡܳܐ ܚܰܝܠܳܐ ܕܠܳܐ ܡܶܬܚܰܣܰܢ ܩܳܢܶܝܢ ܒܢܝ̈ܢܳܫܳܐ ܘܒܶܗ ܙܳܟܶܝܢ ܠܰܒܥܶܠ̈ܕܒܳܒܰܝܗܽܘܢ ܟܣܰܝ̈ܳܐ ܘܰܓܠܰܝ̈ܳܐ: ܒܨܰܘܡܳܐ ܐܳܐܰܪ ܡܶܬܕܰܟܝܳܐ ܡܶܢ ܣܰܪܝܽܘ̣ܬܳܐ ܕܰܚܛܳܗ̈ܶܐ: ܘܗܳܘܶܐ ܒܳܗ̇ ܪܝ̣ܚܳܐ ܒܰܣܝ̣ܡܳܐ ܡܶܢ ܨܠܰܘ̈ܳܬܳܐ ܕܨܰܝ̈ܳܡܶܐ: ܘܠܳܐ ܡܨܶܝܢ ܫܺܐܕ̈ܶܐ ܕܒܳܗ̇ ܡܟܰܬܪܝ̣ܢ ܐܶܠܳܐ ܝܳܩܕܝ̣ܢ ܐܰܝܟ ܥܡܝ̣ܪܳܐ ܡܶܢ ܓܰܘܙܰܠܬܳܐ: ܒܨܰܘܡܳܐ ܕܰܚܠܝ̣ܛ ܒܶܗ ܚܘ̣ܒܳܐ ܚܳܕܶܐ ܐܰܒܳܐ ܘܰܒܪܳܐ ܘܪܘ̣ܚܳܐ ܩܰܕܝ̣ܫܳܐ: ܘܡܰܓܶܢ ܚܰܝܠܶܗ ܐܰܠܳܗܳܝܳܐ ܥܰܠ ܐܰܝܠܶܝܢ ܕܨܳܝܡܝ̣ܢ ܠܶܗ: ܘܫܳܪܶܐ ܒܗܽܘܢ ܐܰܝܟ ܡܶܠܬܶܗ ܕܶܐܡ̣ܰܪ: ܕܶܐܥ̇ܡܰܪ ܒܗܽܘܢ ܘܶܐܗܰܠܶܟ ܒܗܽܘܢ: ܒܨܰܘܡܳܐ ܐܺܠܺܝܳܐ ܒܰܪ ܬܰܘ̈ܬܳܒܶܐ ܢܓ̣ܰܕ ܠܰܫܡܰܝܳܐ ܘܠܰܐܪܥܳܐ ܡܶܢ ܚܰܣܝ̣ܪܘ̣ܬ ܡܶܛܪܳܐ ܫܢܰܝ̈ܳܐ ܬܠܳܬ ܘܝܰܪ̈ܚܶܐ ܫܬܳܐ: ܒܨܰܘܡܳܐ ܨܠܘ̣ܬܶܗ ܕܚܶܙܰܩܝܳܐ ܡܰܠܟܳܐ ܕܺܐܝ̣ܣܪܳܐܝܶܠ ܗ̣ܘܳܬ݀ ܩܠܝ̣ܕܳܐ ܘܦܶܬܚ̣ܰܬ݀ ܬܰܪ̈ܥܶܐ ܪ̈ܳܡܶܐ ܕܰܫܡܰܝܳܐ ܘܫܶܩ̣ܠܰܬ݀ ܚܰܝ̈ܶܐ ܬܰܘܣܶܦܬܳܐ ܥܰܠ ܝܰܘܡ̈ܳܬܶܗ: ܒܨܰܘܡܳܐ ܘܰܥܕܳܐ ܕܚܰܝ̈ܶܐ ܚܰܕ̈ܬܶܐ ܘܒܘ̣ܣ̈ܳܡܶܐ ܪ̈ܘ̣ܚܳܢܳܝܶܐ ܕܠܳܐ ܡܶܫܬܪܶܝܢ ܡܶܫܬܰܟܢܝ̣ܢ ܠܰܐܝܠܶܝܢ ܕܒܶܗ ܟܳܕܢܝ̣ܢ ܢܰܦܫܗܽܘܢ: ܒܨܰܘܡܳܐ ܡܰܠܰܐܟܳܐ ܕܡܳܪܝܳܐ ܩܳܗܝܳܐ ܚܰܪܒܶܗ ܘܒܳܛܶܠ ܡܶܢ ܚܶܡܬܶܗ ܡܰܪܝ̣ܪܬܳܐ ܘܡܶܢ ܚܺܐܦܶܗ ܗܰܘ̇ ܡܫܝ̣ܡܳܢܳܐ: ܘܡܶܬܬܢܝ̣ܚ ܡܳܪܝܳܐ ܡܶܢ ܟܺܐܢܘ̣ܬܶܗ: ܒܨܰܘܡܳܐ ܗܳܘܶܝܢܰܢ ܡܶܢ ܚܰܛܳܝ̈ܶܐ ܬܰܝ̈ܳܒܶܐ: ܘܡܶܢ ܬܰܝ̈ܳܒܶܐ ܡܚܰܣ̈ܝܳܢܶܐ ܕܰܚܒܳܪ̈ܳܬܰܢ: ܘܥܳܛܘ̣̈ܝܶܐ ܕܫܘ̣ܪ̈ܥܳܬܰܢ: ܒܨܰܘܡܳܐ ܙܳܟܶܝܢܰܢ ܠܰܒܥܶܠܕܰܪܰܢ: ܘܡܶܬܦܰܨܶܝܢܰܢ ܡܶܢ ܟܽܠܗܶܝܢ ܨܶܢܥ̈ܳܬܶܗ ܡܰܘܒ̈ܕܳܢܝܳܬܳܐ: ܒܨܰܘܡܳܐ ܟܽܠܗܽܘܢ ܚܰܛܳܝ̈ܶܐ ܕܬܳܝܒܝ̣ܢ ܡܶܬܚܰܠܠܝ̣ܢ ܟܘ̣ܬܡ̈ܳܬܗܽܘܢ: ܘܡܶܬܕܰܟܶܐ ܝܘ̣ܩܪܳܐ ܪܰܒܳܐ ܕܣܰܟܠ̈ܘܳܬܗܽܘܢ: ܒܨܰܘܡܳܐ ܝܳܪܬܝ̣ܢ ܟܺܐܢ̈ܶܐ ܡܶܕܶܡ ܕܥܰܝܢܳܐ ܠܳܐ ܚ̣ܙܳܬ݀ ܘܶܐܕܢܳܐ ܠܳܐ ܫܶܡ̣ܥܰܬ݀ : ܘܥܰܠ ܠܶܒܳܐ ܕܒܰܪܢܳܫܳܐ ܠܳܐ ܣܠ̣ܶܩ: ܒܨܰܘܡܳܐ ܗܳܘܶܝܢܰܢ ܚܰܒܪ̈ܶܐ ܠܥܝ̣ܪ̈ܶܐ ܘܫܳܩܠܝ̣ܢܰܢ ܕܘ̣ܡܝܳܐ ܕܝ̣ܠܗܽܘܢ ܒܢܰܦܫ̈ܳܬܰܢ: ܘܰܡܫܰܥܒܕܝ̣ܢܰܢ ܠܦܰܓܪܰܢ ܒܝܰܕ ܡܘ̣ܟܳܟܳܐ: ܒܨܰܘܡܳܐ ܝܳܬܒܝ̣ܢܰܢ ܒܶܐܒܠܳܐ ܪܰܒܳܐ ܘܒܳܟܶܝܢܰܢ ܥܰܠ ܚܛܳܗ̈ܰܝܢ ܕܰܣܥ̣ܰܪܢ ܐܶܢܽܘܢ ܒܝ̣ܕܰܥܬܳܐ ܘܰܒܠܳܐ ܝ̣ܕܰܥܬܳܐ: ܘܶܐܬܬܢܝ̣ܚ ܨܶܒܝܳܢܶܗ ܕܗܰܘ̇ ܕܰܠܩܘ̣ܒܠܳܐ: ܒܨܰܘܡܳܐ ܠܰܫܪܳܪܳܐ ܕܰܬܝܳܒܘ̣ܬܳܐ ܝܳܠܦܝ̣ܢܰܢ: ܕܒܶܗ ܡܶܬܥܰܠܶܝܢ ܨܰܝ̈ܳܡܶܐ ܠܕܶܚܠܰܬ݀ ܐܰܠܳܗܳܐ: ܒܨܰܘܡܳܐ ܒܳܣܪܝ̣ܢܰܢ ܠܪܶܚܡܰܬ݀ ܟܰܪܣܳܐ ܐܶܡܳܐ ܕܰܫܪܝ̣ܚܘ̣ܬܳܐ: ܘܡܰܘܒܕܳܢܝ̣ܬܳܐ ܕܟܽܠܗܶܝܢ ܡܝܰܬܪ̈ܳܬܳܐ: ܘܒܶܗ ܒܳܥܶܝܢܰܢ ܫܘ̣ܒܩܳܢܳܐ ܕܰܚܛܳܗ̈ܰܝܢ: ܒܨܰܘܡܳܐ ܥܳܐܠܝ̣ܢ ܨܰܝ̈ܳܡܶܐ ܠܰܐܬܪܳܐ ܕܠܳܐ ܐܝ̣ܬ ܒܶܗ ܬܶܢܚ̈ܳܬܳܐ: ܘܡܶܫܬܘܶܝܢ ܠܪܰܒܘ̣ܬ ܐܰܓܪܳܐ ܡܫܰܡܠܝܳܐ ܘܠܳܐ ܚܰܣܝ̣ܪܳܐ: ܒܨܰܘܡܳܐ ܠܶܒܳܐ ܕܰܕܟܶܐ ܡܶܢ ܚܶܡܬܳܐ ܩܳܢܶܝܢܰܢ: ܘܡܶܬܕܰܚܩܳܐ ܐܶܡܳܐ ܒܰܥܪܝ̣ܪܳܝܬܳܐ ܡܶܢܰܢ: ܗܳܝ̇ ܕܡܶܢ ܣܰܓܺܝܽܐܘ̣ܬ ܡܶܐܟܘ̣ܠܬܳܐ ܡܶܬܝܰܠܕܳܐ: ܒܨܰܘܡܳܐ ܕܰܪ̈ܳܪܶܐ ܠܳܐ ܡܶܙܕܰܟܝ̈ܳܢܶܐ ܗܳܘܶܝܢܰܢ: ܘܡܶܬܚܙܶܝܢܰܢ ܠܘ̣ܩܒܰܠ ܗܰܘ̇ ܡܰܛܥܝܳܢܳܐ ܕܒܰܚܣܳܡܳܐ ܐܰܦܩ̣ܰܢ ܡܶܢ ܓܰܢܬܳܐ ܒܝܰܕ ܡܶܐܟܘ̣ܠܬܳܐ ܩܳܛܘ̣ܠܬܳܐ: ܒܨܰܘܡܳܐ ܐܶܡܳܐ ܪܘ̣ܚܳܢܳܝܬܳܐ ܡܰܥܡܘ̣ܕܝ̣ܬܳܐ ܩܰܕܝ̣ܫܬܳܐ ܡܶܬܚܰܕܬܳܐ ܒܰܢ: ܘܗܳܘܶܝܢܰܢ ܒܢܰܝ̈ܳܐ ܫܰܪ̈ܝ̣ܪܶܐ ܠܰܐܠܳܗܳܐ ܐܰܒܳܐ: ܒܨܰܘܡܳܐ ܪܘ̣ܚܳܐ ܩܰܕܝ̣ܫܳܐ ܗܰܘ̇ ܕܩܰܒܶܠ̣ܢܰܢ ܡܶܢ ܡܰܝ̈ܳܐ ܡܶܬܬܢܝ̣ܚ ܒܰܢ: ܘܫܳܪܶܐ ܒܰܢ ܠܳܐ ܡܶܬܬܥܝ̣ܩܳܢܳܐܝ̣ܬ ܘܡܳܠܶܐ ܠܰܢ ܡܶܢ ܣܘ̣ܟ̈ܳܠܰܘܗ̱ܝ ܐܰܠܳܗ̈ܳܝܶܐ: ܒܨܰܘܡܳܐ ܐܶܬ̣ܢܰܨܰܚܘ̱ ܫܠܝ̣̈ܚܶܐ ܐܰܠܳܗ̈ܳܝܶܐ: ܘܒܶܗ ܐܶܬܚܰܝܰܠܘ̱ ܢܒܺܝ̈ܶܐ ܩܰܕܝ̣̈ܫܶܐ: ܒܨܰܘܡܳܐ ܡܚܰܘܶܐ ܠܰܢ ܐܘ̣ܪܚܶܗ ܡܫܝ̣ܚܳܐ ܐܰܠܳܗܳܐ ܘܰܡܫܰܘܙܶܒ ܠܰܢ ܡܶܢ ܓܰܝ̈ܳܣܶܐ ܠܝ̣̈ܛܶܐ: ܒܨܰܘܡܳܐ ܘܰܨܠܘ̣ܬܳܐ ܥܰܡ ܫܰܗܪܳܐ ܥܝ̣ܪܳܐ ܕܡܶܢ ܪܰܡܫܳܐ ܠܨܰܦܪܳܐ: ܗܳܘܶܝܢܰܢ ܡܰܠܰܐܟ̈ܶܐ ܒܶܣܪ̈ܳܢܶܐ: ܒܨܰܘܡܳܐ ܢܳܗܪܳܐ ܢܰܦܫܳܐ ܕܨܰܝ̈ܳܡܶܐ ܕܰܡܝܰܩܪܝ̣ܢ ܠܨܰܘܡܳܐ ܒܚܘ̣ܒܳܐ ܘܗܰܝܡܳܢܘ̣ܬܳܐ: ܒܨܰܘܡܳܐ ܠܳܐ ܚܳܫܘ̣̈ܫܶܐ ܡܶܬܛܰܝܒܝ̣ܢ ܩܕܳܡ ܐܰܠܳܗܘ̣ܬܳܐ ܡܪܰܝܰܡܬܳܐ ܥܰܡ ܚܟܝ̣̈ܡܳܬܳܐ ܥܰܬܝܪ̈ܳܬ݀ ܒܢܘ̣ܗܪܳܐ: ܒܨܰܘܡܳܐ ܫܘ̣ܒܚܳܐ ܠܰܐܠܳܗܳܐ ܙܳܡܪܝ̣ܢܰܢ ܘܡܶܢ ܝܰܡܝ̣ܢܶܗ ܡܰܘܬܶܒ ܠܰܢ: ܒܨܰܘܡܳܐ ܥܝ̣ܪܳܐܝ̣ܬ ܩܳܝܡܝ̣ܢܰܢ ܒܬܶܫܡ̈ܫܳܬܰܢ: ܒܨܰܘܡܳܐ ܘܙܶܕܩ̈ܳܬܳܐ ܫܳܦܪܝ̣ܢܰܢ ܠܒܳܪܘ̣ܝܰܢ: ܒܨܰܘܡܳܐ ܢܘ̣ܪܳܐ ܕܰܒܝܽܘ̣ܡ ܕܝ̣ܢܳܐ ܡܛܰܝܒܳܐ ܠܪ̈ܰܫܝ̣ܥܶܐ ܕܳܥܟܳܐ ܩܕܳܡܰܝܢ: ܒܨܰܘܡܳܐ ܥܘ̣ܬܪܳܐ ܪܰܒܳܐ ܩܳܢܶܝܢܰܢ: ܒܨܰܘܡܳܐ ܒܰܫܡܰܝܳܐ ܕܰܠܥܶܠ ܥܳܡܪܝ̣ܢܰܢ: ܒܨܰܘܡܳܐ ܕܰܝܳܪ̈ܶܐ ܒܢܘ̣ܗܪܳܐ ܡܬܘ̣ܡܳܝܳܐ ܗܳܘܶܝܢܰܢ: ܒܨܰܘܡܳܐ ܟܠܝ̣̈ܠܶܐ ܫܒܝ̣̈ܚܶܐ ܡܫܝ̣ܚܳܐ ܐܰܠܳܗܰܢ ܓܳܕܶܠ ܠܰܢ: ܥܰܡ ܥܳܒ̈ܕܰܝ ܨܶܒܝܳܢܶܗ ܡܰܘܬܶܒ ܠܰܢ: ܘܬܰܡܳܢ ܕܠܳܐ ܫܶܠܝܳܐ ܢ̇ܰܣܶܩ ܠܶܗ ܫܘ̣ܒܚܳܐ ܘܬܰܘܕܝ̣ܬܳܐ ܠܰܐܒܘ̣ܗ̱ܝ ܘܰܠܪܘ̣ܚܳܐ ܩܰܕܝ̣ܫܳܐ ܡܫܰܟܢܳܢܳܐ ܕܛܳܒ̈ܳܬܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀