ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܛܳܒܳܐ ܘܪܳܚܶܡ ܐ̱ܢܳܫܳܐ ܘܚܰܝܽܘ̣ܣܬܳܢܳܐ ܡܳܪܝܳܐ: ܕܨܶܒܝܳܢܶܗ ܨܶܝܕ ܟܽܠ ܐ̱ܢܳܫ ܐܰܪܟܢ̣ܶܗ: ܘܚܘ̣ܒܶܗ ܣܰܓܺܝܳܐܐ ܠܟܽܠ ܦܶܢܝ̈ܳܢ ܐܰܘܒܠ̣ܶܗ: ܘܟܰܕ ܡܶܢ ܟܽܠ ܓܢܝ̣ܙ ܗ̱ܘ̣ ܒܰܟܝܳܢܶܗ: ܠܟܽܠ ܡܰܢ ܕܰܒܥ̣ܳܝܗ̱ܝ ܐܶܫ̣ܬܟܰܚ ܒܰܚܢܳܢܶܗ: ܗܰܒܠܰܢ ܡܳܪܝ̱ ܕܠܳܟ ܢ̇ܶܪܚܰܡ ܘܠܳܟ ܢ̇ܶܒܥܶܐ ܘܰܢ̇ܫܰܡܠܶܐ ܦܘ̣ܩ̈ܕܳܢܰܝܟ: ܘܢ̇ܶܪܕܶܐ ܒܢܳܡܘ̣̈ܣܰܝܟ: ܘܡܶܢ ܟܽܠ ܡܶܕܶܡ ܕܰܠܒܰܪ ܡܶܢܳܟ ܢ̇ܰܗܦܶܟ ܐܰܦܰܝ̈ܢ ܓܡܝ̣ܪܳܐܝ̣ܬ: ܘܰܒܟܽܠܶܗ ܒܰܪܢܳܫܰܢ ܓܰܘܳܝܳܐ ܘܒܰܪܳܝܳܐ ܢ̇ܫܰܒܚܳܟ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܕܒܰܫܦܝ̣ܥܘ̣ܬ ܛܳܒܘ̣ܬܶܗ ܠܰܫܦܝ̣ܥܘ̣ܬ ܒܝ̣̈ܫܳܬܰܢ ܙܳܟܶܐ: ܘܰܒܪܰܒܘ̣ܬܳܐ ܕܰܚܢܳܢܳܐ ܕܝ̣ܠܶܗ ܠܪܰܒܘ̣ܬ ܣܰܟܠ̈ܘܳܬܳܐ ܕܝ̣ܠܰܢ ܡܚܰܦܶܐ: ܘܰܠܘܳܬ ܪ̈ܰܚܡܶܐ ܘܪܶܚܡܰܬ݀ ܐ̱ܢܳܫܘ̣ܬܳܐ ܠܘܳܬܰܢ ܡܶܬܪܟܶܢ: ܘܰܠܒܳܥ̈ܘܳܬܰܢ ܘܰܨܠܰܘ̈ܳܬܰܢ ܡܩܰܒܶܠ: ܘܰܒܙܶܕ̈ܩܳܬܰܢ ܘܰܒܨܰܘܡܰܢ ܠܣܰܟܠ̈ܘܳܬܰܢ ܥܳܛܶܐ: ܕܠܶܗ ܢ̇ܫܰܒܰܚ ܘܠܶܗ ܢ̇ܰܘܕܶܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܪܰܡܫܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܐܰܠܳܗܳܐ ܗܰܘ̇ ܕܡܶܛܽܠ ܪܶܚܡܰܬ݀ ܐ̱ܢܳܫܘ̣ܬܳܐ ܕܝ̣ܠܳܟ ܒܪܰܝܬܳܢ ܘܣܳܡܬܳܢ ܒܚܰܝ̈ܶܐ ܗܳܠܶܝܢ: ܕܢ̇ܶܫܬܰܘܬܰܦ ܥܰܡܳܟ ܒܫܘ̣ܘ̈ܟܳܢܰܝܟ ܘܰܒܡܰܘܗ̈ܒܳܬܳܟ ܐܰܠܳܗܳܝ̈ܳܬܳܐ: ܗܰܘ̇ ܕܣܳܡܬ ܠܰܢ ܒܦܰܪܕܰܝܣܳܐ ܕܒܘ̣̈ܣܳܡܶܐ ܒܝܰܕ ܛܰܝܒܘ̣ܬܳܟ: ܘܰܚܢܰܢ ܒܝܰܕ ܠܳܐ ܡܶܫܬܰܡܥܳܢܘ̣ܬܳܐ ܡܶܢܶܗ ܐܶܬܢܰܟܪܝ̣ܢܰܢ: ܘܰܒܝܰܕ ܥܒܳܪ ܦܘ̣ܩܕܳܢܳܐ ܠܟܽܠ ܐܳܕܫܳܐ ܕܰܚܛܝ̣ܬܳܐ ܐܶܫܬܰܥܒ̣ܰܕܢܰܢ ܘܰܐܘܒ̣ܶܕܢܰܢ ܓܰܠܝܽܘ̣ܬ ܐܰܦ̈ܶܐ ܕܰܠܘܳܬܳܟ: ܘܦܰܪܶܗܣܺܝܰܐ ܕܰܢ̇ܦܝ̣ܣܳܟ ܠܰܝܬ ܠܰܢ: ܡܰܥ̱ܗܕܝ̣ܢܰܢ ܩܕܳܡܰܝܟ ܠܰܡܕܰܒܪܳܢܘ̣ܬܳܟ ܕܰܚܠܳܦܰܝܢ: ܠܣܘ̣ܪܳܩܳܟ ܨܶܒܝܳܢܳܝܳܐ: ܠܰܥܡܳܕܳܟ ܩܰܕܝ̣ܫܳܐ: ܠܨܰܘܡܳܟ ܗܰܘ̇ ܕܒܶܗ ܙܳܟܘ̣ܬܳܐ ܥܰܠ ܒܝ̣ܫܳܐ ܫܰܟܶܢܬ ܠܰܢ: ܘܰܠܝܰܥܢܘ̣ܬܳܐ ܘܪܶܚܡܰܬ݀ ܪ̈ܓܝ̣ܓܳܬܳܐ ܕܚܰܩ̣ܬ ܡܶܢܰܢ: ܠܗܳܠܶܝܢ ܐܶܬܕܰܟܰܪ ܘܚܽܘܢ ܠܰܢ: ܘܫܰܟܶܢ ܠܰܢ ܕܰܒܢܳܡܘ̈ܣܰܝܟ ܢ̇ܶܪܕܶܐ: ܘܦܘ̣ܩ̈ܕܳܢܰܝܟ ܢ̇ܫܰܡܠܶܐ: ܘܡܶܢ ܒܝ̣̈ܫܳܬܳܐ ܢ̇ܶܬܪܚܶܩ: ܚܰܝܶܠ ܠܰܢ ܕܶܝܢ ܘܰܠܡܶܛܰܪ ܙܗܝ̣ܪܳܐܝ̣ܬ ܠܦܰܓܪܳܐ ܒܠܳܐ ܣܰܒܥܘ̣ܬܳܐ ܕܬܘ̣ܪ̈ܣܳܝܶܐ: ܠܰܡܩܰܦܳܚܽܘ̣ ܠܟܰܪܣܳܐ ܗܳܝ̇ ܕܐܝ̣ܬܶܝܗ̇ ܡܰܘܠܕܳܢܝ̣ܬܳܐ ܕܟܽܠܗܽܘܢ ܚܰܫ̈ܶܐ ܫܟܝ̣ܪ̈ܶܐ: ܠܡܶܐܚܰܕ ܕܶܝܢ ܝܰܨܝ̣ܦܳܐܝ̣ܬ ܠܪ̈ܶܓܫܶܐ ܕܢܶܗ̣ܘܽܘܢ ܡܫܰܡܫܝ̣ܢ ܕܰܟܝܘ̣ܬܳܐ ܘܩܰܕܝ̣ܫܘ̣ܬܳܐ: ܢ̇ܕܰܟܶܐ ܡܶܢܰܢ ܠܫܶܡܥܳܐ ܠܰܡܩܰܒܠܳܢܘ̣ܬܳܐ ܕܦܘ̣ܩ̈ܕܳܢܶܐ ܕܝ̣ܠܳܟ ܡܰܥܒ̈ܕܰܝ ܚܰܝ̈ܶܐ: ܠܣܰܘܩܳܐ ܕܰܒܪܘ̣ܚܳܐ ܐܰܠܳܗܳܝܳܐ ܢ̇ܶܬܬܙܝ̣ܥ: ܠܰܚܙܳܬܳܐ ܕܰܒܬܶܕܡܪ̈ܳܬܳܐ ܕܝ̣ܠܳܟ ܬܶܗܪܘ̣ܓ: ܠܰܛܥܳܡܬܳܐ ܕܰܒܡ̈ܶܠܰܝܟ ܬ̣ܶܬܒܰܣܰܡܝ̱: ܠܓܶܫܬܳܐ ܕܰܒܣܳܥܘ̣ܪܘ̣ܬ ܛܳܒ̈ܳܬܳܐ ܬܰܟ݂ܫܰܪܝ̱: ܠܪ̈ܶܓܫܶܐ ܪ̈ܘ̣ܚܳܢܳܝܶܐ ܕܶܝܢ ܠܘܳܬ ܓܒܝ̣ܠܘ̣ܬܳܐ ܕܒܰܪܢܳܫܳܐ ܩܰܕܡܳܝܳܐ ܗܰܘ̇ ܕܒܰܐܠܳܗܳܐ ܐܶܬ̣ܒܪܝ̣ ܒܙܰܕܝ̣ܩܘ̣ܬܳܐ ܘܰܒܚܰܣܝܽܘ̣ܬܳܐ ܢ̣ܶܗܦܘ̣ܟ ܢ̣ܰܣܶܩ: ܠܗܰܘܢܳܐ ܡܰܢ ܕܣܰܟܘ̣ܠܬܳܢܳܐܝ̣ܬ ܢ̣ܶܬܕܰܒܰܪ: ܠܡܶܠܬܳܐ ܕܰܒܝܘ̣ܠ̈ܦܳܢܰܝܟ ܬ̣ܶܬܡܰܕܰܟܝ̱܆ ܠܝ̣ܕܰܥܬܳܐ ܕܥܰܡܳܟ ܬ̣ܶܬܥܢܶܐ: ܠܬܰܪܥܝ̣ܬܳܐ ܕܰܒܚܘ̣ܒܳܟ ܬ̣ܶܬܶܐܣܰܪܝ̱: ܘܰܠܗܶܪܓܰܢ ܘܣܘ̣ܟܳܠܰܢ ܕܗܳܠܶܝܢ ܕܰܠܥܶܠ ܢ̇ܶܒܥܶܐ: ܘܗܳܠܶܝܢ ܕܰܠܥܶܠ ܢ̇ܶܬܪܰܥܶܐ: ܘܡܶܢ ܐܰܪܥܳܐ ܘܰܐܪ̈ܥܳܢܝܳܬܳܐ ܓܡܝ̣ܪܳܐܝ̣ܬ ܢ̇ܰܗܦܶܟ ܐܰܦܰܝ̈ܢ: ܘܰܒܟܽܠܶܗ ܒܰܪܢܳܫܰܢ ܓܰܘܳܝܳܐ ܘܒܰܪܳܝܳܐ ܩܕܝ̣ܫܳܐܝ̣ܬ ܢ̇ܫܰܡܠܶܐ ܠܝܰܘܡ̈ܳܬܳܐ ܗܳܠܶܝܢ ܡܝܰܩܪ̈ܶܐ ܘܩܰܕܝ̣̈ܫܶܐ ܕܨܰܘܡܳܐ: ܒܥܝ̣ܪܘ̣ܬܳܐ ܘܰܒܙܰܗܝܽܘ̣ܬܳܐ ܕܢܰܦܫܳܐ: ܒܕܰܟܝܽܘ̣ܬܳܐ ܘܩܰܕܝ̣ܫܘ̣ܬܳܐ ܕܦܰܓܪܳܐ: ܒܰܨܠܰܘ̈ܳܬܳܐ ܘܬܰܟܫ̈ܦܳܬܳܐ ܕܠܺܠܝܳܐ ܘܕܐܝ̣ܡܳܡܳܐ ܕܰܩܕܳܡܰܝܟ ܡܩܰܪܒܝ̣ܢܰܢ: ܘܥܰܡ ܙܘܳܕ̈ܶܐ ܛܳܒ̈ܶܐ ܘܕܘ̣ܒܳܪ̈ܶܐ ܡܝܰܬܪ̈ܶܐ ܢ̇ܶܫܬܘܶܐ ܠܦܶܨܚܳܐ ܩܰܕܝ̣ܫܳܐ: ܘܠܰܩܝܳܡܬܳܐ ܗܳܝ̇ ܕܰܥܬܝ̣ܕܳܐ ܕܬ̣ܶܗܘܶܐ ܠܟܽܠܗܽܘܢ ܩܰܕܝ̣̈ܫܶܐ ܘܥܰܡܗܽܘܢ ܢ̇ܶܬܒܰܣܰܡ ܒܰܓܢܘ̣ܢܳܟ ܘܰܒܛܳܒ̈ܳܬܳܟ ܫܡܰܝܳܢܝ̈ܳܬܳܐ ܕܰܠܥܳܠܰܡ ܘܰܐܟܚܕܳܐ ܢ̇ܶܙܡܰܪ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܐܡܝ̣ܢܳܐܝ̣ܬ ܢ̇ܩܰܪܶܒ ܠܡܳܪܘ̣ܬܳܟ ܦܝ̣ܪܡܳܐ ܗܳܢܳܐ ܡܶܬܝܰܕܥܳܢܳܐ ܕܰܨܠܘ̣ܬܳܐ ܕܟܝ̣ܬܳܐ: ܘܢ̣ܶܥܬܰܪ ܩܕܳܡ ܪܰܒܘ̣ܬܳܟ ܪܝ̣ܚܳܐ ܒܰܣܝ̣ܡܳܐ ܕܨܰܘܡܳܐ ܩܰܕܝ̣ܫܳܐ: ܘܢ̇ܰܣܶܩ ܠܐܝ̣ܩܳܪܳܟ ܦܺܐܪ̈ܶܐ ܡܪ̈ܰܥܝܳܢܶܐ ܕܰܥܒܴ̈ܕܶܐ ܛܳܒ̈ܶܐ: ܘܰܢ̇ܕܰܒܰܚ ܠܳܟ ܬܰܘܕ̈ܝܳܬܳܐ ܦܰܐܝ̈ܳܬܳܐ ܘܪ̈ܘܡܪܳܡܶܐ ܛܳܒ̈ܶܐ ܘܰܗܕܝ̣ܪ̈ܶܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀