ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܒܳܥܶܝܢܰܢ ܘܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܐܰܠܳܗܳܐ ܕܝ̣ܠܰܢ: ܕܰܬ̣ܩܰܒܶܠ ܨܠܰܘ̈ܳܬܰܢ ܘܬܶܫܒ̈ܚܳܬܰܢ ܥܰܡ ܦܝ̣ܪܡܰܢ: ܘܰܬ̣ܫܰܕܰܪ ܚܢܳܢܳܟ ܠܺܐܝܳܠܰܢ ܒܥܶܕܳܢܳܐ ܗܳܢܳܐ ܚܰܢܳܢܳܐ ܡܳܪܝܳܐ ܐܰܠܳܗܳܐ: ܘܢ̣ܶܛܪܘ̣ܕ ܡܶܢ ܬܰܪ̈ܥܝܳܬܰܢ ܠܟܽܠܳܗ̇ ܡܰܐܝ̣ܢܘ̣ܬܳܐ ܕܰܚܛܝ̣ܬܳܐ: ܘܰܠܟܽܠܗܽܘܢ ܚܘ̣ܫ̈ܳܒܶܐ ܣܪ̈ܝ̣ܩܶܐ: ܘܰܥܒܶܕ ܠܦܘ̣̈ܡܰܝܢ ܟܶܢܳܪ̈ܶܐ ܚܠܰܝ̈ܳܐ ܘܩܰܕܝ̣̈ܫܶܐ: ܕܒܰܙܡܳܪܗܽܘܢ ܡܶܬܪܰܥܝܳܐ ܐܰܠܳܗܘ̣ܬܳܟ: ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܪܝ̣ܚܳܐ ܗܰܢܺܝܳܐܐ ܕܦܰܐܝܽܘ̣ܬܳܐ ܡܬܘ̣ܡܳܝܬܳܐ ܘܰܐܠܳܗܳܝܬܳܐ: ܗܰܘ̇ ܕܐܝ̣ܬܰܘܗ̱ܝ ܡܕܰܟܝܳܢܳܐ ܘܡܳܪܘ̣ܩܳܐ ܕܨܳܐܝܽܘ̣ܬܳܐ ܐ̱ܢܳܫܳܝܬܳܐ: ܗܰܘ̇ ܡܗܰܕܝܳܢܳܐ ܕܰܠܘܳܬ ܛܳܒܘ̣ܬܳܐ ܘܰܡܩܰܪܒܳܢܳܐ ܕܨܶܝܕ ܛܘ̣ܒܬܳܢܘ̣ܬܳܐ: ܠܗܰܘ̇ ܡܟܝ̣ܠܳܢܳܐ ܘܝܳܗܘ̣ܒܳܐ ܕܫܰܦܝ̣ܪ̈ܳܬܳܐ: ܠܗܰܘ̇ ܕܰܡܥܰܠܰܝ ܡܰܢ ܐܳܦ ܡܶܢ ܬܶܐܘܳܪܺܝܰܐ ܘܟܘ̣̈ܢܳܝܶܐ ܕܰܒܪ̈ܰܝܳܐ: ܘܗܘ̣ܠ̈ܳܢܳܝܶܐ ܘܰܠܡܶܨܛܰܒܝܳܢܘ̣ܬܳܐ ܕܰܠܘܳܬ ܒܶܣ̈ܡܶܐ ܕܡܶܢ ܥܶܩܳܪ̈ܶܐ ܐܰܪ̈ܥܳܢܳܝܶܐ ܕܡܶܢܰܢ ܡܶܬܩܰܪܒܝ̣ܢ: ܒܚܘ̣ܒܳܐ ܡܶܬܪܟܶܢ ܐܰܢ̱ܬ ܠܰܡܩܰܒܳܠܘ̣ ܡܶܢ ܐܝ̣ܕܰܝ̈ܢ ܚܰܛܳܝ̈ܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܩܕܳܡܰܝܢ ܘܟܽܠܗܽܘܢ ܝܰܘܡ̈ܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܳܪܝܳܐ ܐܰܠܳܗܳܐ ܩܰܕܝ̣ܫܳܐ ܘܰܡܪܰܚܡܳܢܳܐ ܘܢܰܓܝ̣ܪ ܪܘ̣ܚܳܐ ܘܣܰܓܝ̣ ܛܰܝܒܘ̣ܬܳܐ ܘܩܘ̣ܫܬܳܐ ܠܥܘ̣ܕܪܳܢܳܐ ܕܝ̣ܠܰܢ ܩܳܪܶܝܢܰܢ ܠܳܟ: ܘܰܠܣܘ̣ܝܳܥܳܐ ܕܰܡܚܝ̣ܠܘ̣ܬܰܢ ܐܳܦ ܒܰܐܓܘ̣ܢܳܐ ܪܘ̣ܚܳܢܳܝܳܐ ܕܰܡܝܰܬܪܘ̣ܬܳܐ ܘܰܡܚܰܡܣܢܳܢܘ̣ܬܳܐ ܕܰܒܝܰܘ̈ܡܳܬܳܐ ܗܳܠܶܝܢ ܩܰܕܝ̣̈ܫܶܐ ܕܨܰܘܡܳܐ: ܘܰܡܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܐܰܠܳܗܳܐ ܪܳܚܶܡ ܐ̱ܢܳܫ̈ܳܐ: ܐܰܒܘ̣ܗ̱ܝ ܘܫܳܠܘ̣ܚܶܗ ܕܡܳܪܝܳܐ ܘܰܐܠܳܗܳܐ ܘܦܳܪܘ̣ܩܳܐ ܕܝ̣ܠܰܢ ܝܶܫܽܘܥ ܡܫܝ̣ܚܳܐ: ܗܰܘ̇ ܣܳܝܽܘ̣ܡܳܐ ܘܰܡܫܰܡܠܝܳܢܳܐ ܘܰܡܟܰܠܠܳܢܳܐ ܕܰܐܓܘ̣ܢܳܐ ܗܳܢܳܐ: ܘܰܡܥܰܕܪܳܢܳܐ ܘܦܳܪܘ̣ܩܳܝܳܐ: ܚܰܝܶܠ ܘܥܰܕܰܪ ܘܫܰܪܰܪ: ܘܫܰܟܶܢ ܠܟܽܠܰܢ ܒܝܰܕ ܛܰܝܒܘ̣ܬܳܐ ܕܝ̣ܠܳܟ ܚܰܝܠܳܐ ܘܡܰܥܒܕܳܢܘ̣ܬܳܐ ܕܪܘ̣ܚܳܟ ܩܰܕܝ̣ܫ ܒܟܽܠ: ܘܰܚܦܝ̣ܛܘ̣ܬܳܐ ܛܳܒܬܳܐ ܘܰܚܘܝ̣ܚܘ̣ܬܳܐ ܕܗܰܘܢܳܐ ܘܢܰܦܫܳܐ ܘܰܕܦܰܓܪܳܐ: ܕܒܰܡܣܰܝܒܪܳܢܘ̣ܬܳܐ ܘܒܰܡܚܰܡܣܢܳܢܘ̣ܬܳܐ ܕܥܝ̣ܪܳܐܝ̣ܬ ܘܰܐܬܠܝ̣ܛܳܐܝ̣ܬ ܢ̇ܶܪܗܛܝ̣ܘܗ̱ܝ ܠܶܐܣܛܰܕܺܝܳܘܢ ܕܰܡܝܰܬܪܘ̣ܬܳܐ ܕܝܰܘ̈ܡܳܬܳܐ ܗܳܠܶܝܢ ܩܰܕܝ̣̈ܫܶܐ ܕܨܰܘܡܳܐ: ܘܗܰܒܠܰܢ ܡܳܪܝܳܐ ܐܰܠܳܗܳܐ ܕܟܰܕ ܒܥܝ̣ܪܘ̣ܬܳܐ ܘܰܒܙܰܗܝܽܘ̣ܬܳܐ ܘܰܒܩܰܕܝ̣ܫܘ̣ܬܳܐ ܘܰܒܕܰܟܝܽܘ̣ܬܳܐ ܘܒܰܢܙܝ̣ܪܘ̣ܬܳܐ ܘܨܰܘܡܳܐ ܕܡܶܢ ܟܽܠܗܶܝܢ ܒܝ̣̈ܫܳܬܳܐ: ܘܰܒܥܳܢܘܳܝܽܘ̣ܬܳܐ ܘܕܘ̣ܪܳܫܳܐ ܕܢܰܦܫܳܐ ܘܰܕܦܰܓܪܳܐ: ܘܒܰܨܠܰܘ̈ܳܬܳܐ ܘܰܒܬܰܟܫ̈ܦܳܬܳܐ ܘܕܶܡ̈ܥܶܐ ܕܰܬܝܳܒܘ̣ܬܳܐ ܡܳܪܩܝ̣ܢܰܢ ܟܽܠܳܗ̇ ܨܳܐܝܽܘ̣ܬܳܐ ܕܰܚܛܝ̣ܬܳܐ ܕܝ̣ܠܰܢ: ܘܥܘ̣ܬܪܳܐ ܪܘ̣ܚܳܢܳܝܳܐ ܒܢܰܦܫ̈ܳܬܰܢ ܘܰܒܦܰܓܪ̈ܰܝܢ ܠܦܘ̣ܪܩܳܢܰܢ ܢܳܣܒܝ̣ܢܰܢ: ܢ̇ܶܫܬܘܶܐ ܠܡܶܬܡܰܢܳܥܽܘ̣ ܦܨܝ̣ܚܳܐܝ̣ܬ ܠܥܺܐܕܳܐ ܪܰܒܳܐ ܘܫܰܘܬܳܦܘ̣ܬܳܐ ܕܦܶܨܚܳܐ ܩܰܕܝ̣ܫܳܐ ܘܕܰܩܝܳܡܬܳܐ ܡܚܰܕܬܰܬ݀ ܟܽܠ ܕܝ̣ܚܝ̣ܕܳܝܳܐ ܒܪܳܐ ܕܝ̣ܠܳܟ: ܘܰܠܫܘ̣ܠܳܡܳܐ ܛܘ̣ܒܬܳܢܳܐ ܗܰܘ̇ ܕܠܳܟ ܫܳܦܰܪ: ܘܠܰܟܠܝ̣ܠܳܐ ܕܙܳܟܘ̣ܬܳܐ ܘܕܰܩܪܳܝܬܳܐ ܕܰܠܥܶܠ ܢ̇ܶܫܬܘܶܐ: ܒܶܗ ܒܰܡܫܝ̣ܚܳܐ ܝܶܫܘܽܥ ܡܳܪܰܢ: ܗܰܘ̇ ܕܒܐܝ̣̈ܕܰܘܗ̱ܝ ܘܥܰܡܶܗ ܠܳܟ ܦܐܶܐ ܫܘ̣ܒܚܳܐ ܘܐܝ̣ܩܳܪܳܐ ܘܐܘ̣ܚܕܳܢܳܐ ܥܰܡ ܪܘ̣ܚܳܐ ܕܝ̣ܠܳܟ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܰܐܡܝ̣ܢܳܐܝ̣ܬ ܢ̇ܩܰܪܶܒ ܠܡܳܪܘ̣ܬܳܟ ܦܝ̣ܪܡܳܐ ܗܳܢܳܐ ܡܶܬܝܰܕܥܳܢܳܐ ܕܰܨܠܘ̣ܬܳܐ ܕܟܝ̣ܬܳܐ: ܘܢ̇ܰܥܛܰܪ ܩܕܳܡ ܪܰܒܘ̣ܬܳܟ ܪܝ̣ܚܳܐ ܒܰܣܝ̣ܡܳܐ ܕܨܰܘܡܳܐ ܩܰܕܝ̣ܫܳܐ: ܘܢ̇ܰܣܶܩ ܠܐܝ̣ܩܳܪܳܟ ܦܝ̣ܪܡܳܐ ܡܪܰܥܝܳܢܳܐ ܕܰܥܒܳܕ̈ܶܐ ܛܳܒ̈ܶܐ: ܘܢ̇ܕܰܒܰܚ ܠܐܝ̣ܬܘ̣ܬܳܟ ܬܰܘܕ̈ܝܳܬܳܐ ܦܰܐܝ̈ܳܬܳܐ: ܘܪܘ̣ܡܪ̈ܳܡܶܐ ܗܕܝ̣ܪ̈ܶܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀