ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܛܳܣ ܓܰܒܪܺܐܶܝܠ ܘܰܢܚܶܬ܆ ܡܶܢ ܣܶܕܪ̈ܶܐ ܕܰܫ̈ܡܰܝܳܢܶܐ܆ ܘܝܰܗ̱ܒܠܳܗ̇ ܫܠܳܡܳܐ. ܠܡܰܪܝܰܡ ܒܬܽܘܠܬܳܐ ܩܰܕܺܝܫܬܳܐ܆ ܐܰܠܳܗܳܐ ܐܶܬܪܰܚܰܡܥܠܰܝܢ܀

ܐܶܡܰܪ ܥܺܝܪܳܐ ܠܡܰܪܝܰܡ܆ ܕܚܺܝ݂ܠ ܥܶܠܳܝܳܐ ܢܰܓܶܢ ܥܠܰܝܟܝ܆ ܘܬܺܐܠܕܺܝܢ ܝܰܠܕܳܐ. ܕܡܰܠܟܽܘܬܶܗ ܠܳܐ ܡܶܫܬܰܪܝܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܢܚܶܬ ܥܺܝܪܳܐ ܨܶܝܕ ܡܰܪܝܰܡ܆ ܘܰܥܢܳܐ ܘܗܳܟܰܢ ܐܶܡܰܪ ܠܳܗ̇܆ ܕܗܳܐ ܡܳܪܝ ܥܰܡܶܟܝ܆ ܘܡܶܢܶܟܝ ܕܳܢܰܚ ܦܳܪܽܘܩܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܺܝܠܺܝܕ ܡܬܽܘܡܳܐܺܝܬ܆ ܡܶܢ ܥܽܘܒܳܐ ܓܢܺܝܙܳܐ ܕܰܐܒܽܘܗ̱ܝ܆ ܒܥܽܘܒܳܐ ܕܡܰܪܝܰܡ. ܢܚܶܬ ܘܰܐܓܶܢ ܐܰܝܟ ܕܰܫܦܰܪ ܠܶܗ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܥܰܠ ܘܰܫܪܳܐ ܒܟܰܪܣܳܐ܆ ܒܰܫܠܳܡܶܗ ܕܪܺܝܫ ܡܰܠܰܐܟ̈ܶܐ܆ ܘܰܢܣܰܒ ܦܰܓܪܳܐ. ܘܶܐܬܒܰܪܢܰܫ ܡܶܢ ܒܰܪ̱ܬ ܕܰܘܺܝܕ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܓܰܒܪܺܐܶܝܠ ܥܺܝܪܳܐ܆ ܠܰܒܬܽܘܠܬܳܐ ܣܰܒܰܪ܆ ܕܰܒܪܳܐ ܗܳܘܶܐ ܠܶܟܝ܆ ܘܗܽܘ ܦܳܪܶܩ ܥܳܠ̈ܡܶܐ܆ ܗܳܘܶܐ ܐܰܝܟ ܫܰܒܪܳܐ܆ ܘܩܰܫܺܝܫ ܡܶܢ ܕܳܪ̈ܶܐ܆ ܟܽܠܟܽܘܢ ܥܰܡ̱̈ܡܶܐ܆ ܬܰܘ ܢܶܒܪܽܘܟ ܘܢܶܣܓܽܘܕ ܠܶܗ܀

ܒܬܽܘܠܬܳܐ ܠܡܰܠܰܐܟܳܐ܆ ܥܢܳܬ ܗ̱ܘܳܬ ܘܶܐܡܪܰܬ ܠܶܗ܆ ܕܰܐܝܟܰܢܳܐ ܬܶܗܘܶܐ܆ ܗܳܕܶܐ ܕܣܰܒܰܪܬܳܢܝ܆ ܕܓܰܒܪܳܐ ܠܳܐ ܚܟܺܝܡ ܠܺܝ܆ ܘܣܳܗܶܕ ܠܺܝ ܕܫܰܠܚܳܟ܆ ܘܰܒܙܽܘܘܳܓܳܐ܆ ܕܰܒ̈ܥܺܝܠܳܬܳܐ ܠܳܐ ܪܓܺܝܫܳܢ܀

ܐܳܡܰܪ ܠܳܗ̇ ܥܺܝܪܳܐ܆ ܠܰܒܬܽܘܠܬܳܐ ܡܰܪܝܰܡ܆ ܕܰܐܝܟܰܢܳܐ ܐܶܡܪܺܝܘܗ̱ܝ܆ ܘܶܐܦܰܫܩܺܝܘܗ̱ܝ ܠܳܐ ܝܳܕܰܥ ܐ̱ܢܳܐ܆ ܗܽܘ ܒܪܳܐ ܡܰܠܰܐܟ̈ܶܐ܆ ܘܗܽܘ ܓܰܒܠܶܗ ܠܳܐܕܳܡ܆ ܘܗܽܘ ܨܒܳܐ ܕܢܶܬܺܝܠܶܕ܆ ܡܶܢ ܥܽܘܒܶܟܝ ܕܰܟܝܳܐ܀

ܚܙܳܬܶܗ ܒܰܪ̱ܬ ܕܰܘܺܝܕ܆ ܠܥܺܝܪܳܐ ܘܶܐܬܪܰܗܒܰܬ܆ ܘܰܒܕܶܚܠܳܐ ܪܰܒܳܐ܆ ܘܒܰܪܬܺܝܬܳܐ ܥܢܳܬ ܘܶܐܡܪܰܬ ܠܶܗ܆ ܕܡܳܪܳܟ ܡܰܢ ܐܺܝܬܰܘܗ̱ܝ܆ ܕܫܰܠܚܳܟ ܕܰܬܣܰܒܪܰܢܝ܆ ܘܕܰܨܒܳܐ ܘܰܫܦܰܪ ܠܶܗ܆ ܢܶܗܘܶܐ ܠܺܝ ܐܰܝܟܰܢ ܕܶܐܡܰܪܬ܀

ܗܳܐ ܐܶܢܳܐ ܐܰܡܬܶܗ܆ ܕܡܳܪܳܟ ܐܶܡܪܰܬ ܠܶܗ܆ ܒܬܽܘܠܬܳܐ ܩܰܕܺܝܫܬܳܐ܆ ܠܡܰܠܰܐܟܳܐ ܕܣܰܒܪܳܗ̇܆ ܢܗܶܐ ܠܺܝ ܐܰܝܟ ܡܶܠܬܳܟ܆ ܢܶܫܪܶܐ ܘܢܰܓܶܢ ܒܺܝ܆ ܝܰܠܕܶܗ ܕܥܶܠܳܝܳܐ܆ ܕܰܨܒܳܐ ܕܡܶܢܝ ܢܶܕܢܰܚ܀

ܫܽܘܒܚܳܐ

ܡܶܢ ܬܶܓ̈ܡܶܐ܆ ܕܥܺܝܪ̈ܶܐ ܘܣܶܕܪ̈ܶܐ ܕܓܰܘܙܰܠܬܳܐ܆ ܛܳܣ ܘܰܢܚܶܬ ܥܺܝܪܳܐ܆ ܘܣܰܒܪܳܗ̇ ܠܰܒܬܽܘܠܬܳܐ܆ ܕܰܒܪܳܐ ܗܳܘܶܐ ܠܶܟܝ܆ ܘܦܳܪܶܩ ܒܶܪ̈ܝܳܬܳܐ܆ ܘܰܡܫܰܟܶܢ ܚܰܝ̈ܶܐ܆ ܚܰܕ̱̈ܬܶܐ ܠܰܡܗܰܝܡ̈ܢܶܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܪܰܘܡܳܐ ܘܥܽܘܡܩܳܐ ܘܟܽܠ ܕܰܒܗܽܘܢ

ܓܰܒܪܺܐܶܝܠ ܪܺܝܫ ܡܰܠܰܐܟ̈ܶܐ܆ ܐܶܡܰܪ ܠܶܐܡܳܐ ܡܒܰܪܰܟܬܳܐ܆ ܫܠܳܡ ܠܶܟܝ ܡܰܠܝܰܬ ܛܰܝܒܽܘܬܳܐ܆ ܒܪܺܝܟܬܳܐ ܕܢܶܫ̈ܶܐ ܡܳܪܝ ܥܰܡܶܟܝ܆ ܬܩܰܒܠܺܝܢ ܒܰܛܢܳܐ ܕܕܽܘܡܳܪܳܐ܆ ܘܬܺܐܠܕܺܝܢ ܝܰܠܕܳܐ ܕܦܳܪܶܩ ܒܶܪ̈ܝܳܬܳܐ܆ ܪܽܘܚܳܐ ܕܩܽܘܕܫܳܐ ܢܶܫܪܶܐ ܒܶܟܝ܆ ܘܚܺܝܠ ܥܶܠܳܝܳܐ ܢܰܓܶܢ ܒܶܟܝ܆ ܫܽܘܒܚܳܐ ܠܗܰܘ ܟܰܣܝܳܐ܆ ܕܰܨܒܳܐ ܘܰܗܘܳܐ ܒܰܪܢܳܫܳܐ܆ ܘܰܦܪܰܩ ܥܰܡ̱̈ܡܶܐ ܒܡܰܘܠܳܕܶܗ ܘܰܐܦܢܺܝ ܐܶܢܽܘܢ܆ ܡܶܢ ܬܰܘܫܳܐ ܠܽܐܘܪܚܳܐ ܕܚܰܝ̈ܶܐ܀

ܫܽܘܒܚܳܐ

ܗܰܘ ܕܰܫܡܰܝܳܐ ܙܥܽܘܪܺܝܢ ܠܶܗ܆ ܘܠܳܐ ܡܣܰܝܟܺܝܢ ܥܰܙܺܝܙܽܘܬܶܗ܆ ܬܰܚܬܺܝ ܪܰܘܡܳܐ ܕܪܰܒܽܘܬܶܗ܆ ܘܶܐܬܳܐ ܠܒܰܛܢܳܐ ܘܡܰܘܠܳܕܳܐ܆ ܘܡܶܢ ܥܽܘܒܳܐ ܕܰܒܬܽܘܠܽܘܬܳܐ܆ ܕܢܰܚ ܐܰܝܟ ܫܶܡܫܳܐ ܘܰܐܢܗܰܪ ܒܶܪ̈ܝܳܬܳܐ܆ ܘܰܒܝܽܘܠܦܳܢܶܗ ܐܶܬܚܰܕܰܬ܆ ܥܳܠܡܳܐ ܕܰܒܠܺܝ ܒܛܳܥܝܽܘܬܳܐ܆ ܘܚܰܕܺܝ ܒܡܰܘܠܳܕܶܗ ܠܥܶܠܳܝ̈ܶܐ ܘܰܠܬܰܚ̈ܬܳܝܶܐ܆ ܘܰܡܓܽܘ̈ܫܶܐ ܐܶܬܰܘ ܡܶܢ ܦܳܪܶܣ ܘܩܰܪܶܒܘ ܗ̱ܘܰܘ ܠܶܗ܆ ܐܰܝܟ ܩܽܘܪ̈ܒܳܢܶܐ ܕܰܠܡܰܠܟܳܐ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܛܽܘܒܰܝܟܝ ܥܺܕܬܳܐ܆ ܕܗܳܐ ܡܶܬܪܰܡܪܰܡ

ܪܺܝܫ ܡܰܠܰܐܟ̈ܶܐ܆ ܓܰܒܪܺܐܶܝܠ ܐܶܫܬܰܕܰܪ ܗ̱ܘܳܐ܆ ܠܘܳܬ ܒܪܺܝܟܰܬ ܒܢܶܫ̈ܶܐ ܡܰܪܝܰܡ܆ ܕܰܢܣܰܒܪܺܝܗ̇ ܡܶܛܽܠ ܒܰܛܢܳܐ܆ ܕܪܽܘܚ ܩܽܘܕܫܳܐ ܢܺܐܬܶܐ ܠܘܳܬܶܟܝ܆ ܘܚܺܝܠ ܥܶܠܳܝܳܐ ܢܰܓܶܢ ܒܶܟܝ܆ ܕܡܶܬܺܝܠܶܕ ܒܶܟܝ ܩܰܕܺܝܫܰܐ ܗ̱ܘ܆ ܘܥܰܡܰܢܽܘܐܶܝܠ ܢܶܫܬܰܡܰܗ܆ ܕܺܐܝܬܰܘܗ̱ܝ ܐܰܟܚܕܳܐ ܕܠܳܐ ܦܽܘܠܳܓ܆ ܒܰܪ ܐܰܠܳܗܳܐ ܘܒܰܪܢܳܫܳܐ܀

ܫܽܘܒܚܳܐ

ܠܳܐ ܡܨܶܐ ܠܶܫܳܢܝ܆ ܕܰܢܬܰܢܶܐ ܥܰܠ ܪܰܒܽܘܬܳܟ܆ ܕܰܡܠܶܝܢ ܫܡܰܝ̈ܳܐ ܡܳܪܝ ܡܶܢܳܟ܆ ܘܙܺܝܘܳܟ ܡܰܪܗܶܒ ܠܰܟܪ̈ܽܘܒܶܐ܆ ܘܒܰܬܪܽܘܢܽܘܣ ܥܰܠ ܡܰܪܟܰܒܬܳܐ܆ ܣܪ̈ܳܦܶܐ ܡܩܰܕܫܺܝܢ ܠܺܐܝܩܳܪܳܟ܆ ܘܒܰܐܪܥܳܐ ܣܳܓܕܺܝܢ ܘܰܡܫܰܒܚܺܝܢ܆ ܥܰܡ̱̈ܡܶܐ ܘܛܽܘܗ̈ܡܶܐ ܘܫܰܪ̈ܒܳܬܳܐ܆ ܨܺܝܪ̈ܰܝ ܒܰܨܠܶܡ ܪܰܒܽܘܬܳܟ܆ ܛܒܺܝ̈ܥܰܝ ܒܪܽܘܫܡܶܗ ܕܰܨܠܺܝܒܳܟ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܣܽܘܓܺܝܬܳܐ ܕܰܩܕܳܡ ܐܶܘܰܢܓܶܠܝܽܘܢ

ܐܶܬܢܶܐ ܫܽܘܦܪ̈ܰܝܟܝ̱ ܬܳܗܰܪ ܐ̱ܢܳܐ܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܕܺܐܡܰܪ ܫܰܪܒܶܟ̣ܝ̱ ܠܳܐ ܡܨܶܐ ܐ̱ܢܳܐ܇ ܒܬ̣ܽܘܠܬܳܐ ܩܰܕܺܝܫܬܳܐ܀

ܒܪܺܝܟ̣ܬܳܐ ܒܢܶܫ̈ܶܐ ܐܰܢ̱ܬܝ ܐܺܝܬ̣ܰܝܟܝ̱܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܰܒܪܺܝܟ ܦܺܐܪܳܐ ܕܰܒܟܰܪܣܶܟ̣ܝ̱܇ ܐܶܡܪܰܬ̣ ܐܶܠܺܝܫܒܰܥ܀

ܛܽܘܒܰܝܟܝ̱ ܐܳܦ ܠܶܟ̣ܝ̱ ܘܠܰܐܒܳܗܰܝ̈ܟܝ̱܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܛܽܘܒܰܘܗܝ ܠܰܐܝܢܳܐ ܕܰܒܟܽܠ ܫܳܥ܇ ܛܽܘܒܳܐ ܝܳܗܶܒ ܠܶܟ̣ܝ̱܀

ܫܡܰܝ̈ܳܢܶܐ ܥܰܡ ܐܰܪ̈ܥܳܢܶܐ܇ ܡܰܪܝܰܡ ܒܰܪܬ̣ ܕܰܘܺܝܕ܇ ܚܳܕܶܝܢ ܒܝܰܘܡܳܐ ܕܕܽܘܟ̣ܪܳܢܶܟ̣ܝ̱܇ ܨܠܽܘܬ̣ܶܟ̣ܝ̱ ܬܥܰܕܰܪ ܠܰܢ܀

ܦܶܬܓܳܡܳܐ: ܢܶܚܽܘܬ ܐܰܝܟ ܡܶܛܪܳܐ ܥܰܠ ܓܶܙܬܳܐ܆ ܘܰܐܝܟ ܪ̈ܣܺܝܣܶܐ ܕܢܳܚܬܺܝܢ ܥܰܠ ܐܰܪܥܳܐ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܙܽܘܪ ܕܰܗܒܳܐ ܕܰܚܫܺܝܠ ܘܰܩܪܺܝܡ

ܨܠܽܘܬܶܟܝ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ ܥܰܡܰܢ܆

ܠܰܨ̈ܠܰܘܳܬܶܟܝ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܟܰܕ ܕܶܝܢ ܫܶܡܥܰܬ ܡܶܬܚܰܫܒܳܐ ܗ̱ܘܳܬ ܦܳܪܽܘܫܳܐܺܝܬ܆ ܕܡܳܢܳܐ ܗ̱ܝ ܥܶܠܬܶܗ ܕܗܳܢܳܐ ܫܠܳܡܳܐ ܕܠܳܐ ܒܰܥܝܳܕܳܐ܆ ܒܪܳܐ ܣܰܒܰܪܬܳܢܝ ܘܰܒܙܽܘܘܳܓܳܐ ܠܳܐ ܪܓܺܝܫܳܐ ܐ̱ܢܳܐ܆ ܒܰܛܢܳܐ ܫܡܺܝܥ ܠܺܝ ܘܠܳܐ ܚܰܙܝܳܐ ܠܺܝ ܫܰܘܬܳܦܽܘܬܳܐ܀

ܫܽܘܒܚܳܐ ܠܰܐܒܳܐ ܕܫܰܕܰܪ ܥܺܝܪܳܐ ܘܣܰܒܪܳܗ̇ ܠܡܰܪܝܰܡ܆ ܘܣܶܓܕܬܳܐ ܠܰܒܪܳܐ ܕܰܫܪܳܐ ܒܥܽܘܒܳܗ̇ ܘܰܕܢܰܚ ܡܶܢܳܗ̇܆ ܬܰܘܕܺܝ ܠܪܽܘܚܳܐ ܕܕܰܟܺܝ ܘܩܰܕܫܳܗ̇ ܘܟܶܢ ܐܰܓܶܢ ܒܳܗ̇܆ ܘܰܥܠܰܝܢ ܪ̈ܰܚܡܶܐ ܒܰܨܠܰܘ̈ܳܬܳܗ̇ ܒܟܽܠܥܶܕܳܢܺܝ̈ܢ܀

ܒܰܨ̈ܠܰܘܳܬܳܗ̇ ܕܗܳܝ ܕܰܛܥܶܢܬܳܟ ܝܰܪ̈ܚܶܐ ܬܶܫܥܳܐ܆

ܒܰܪ ܐܰܠܳܗܳܐ ܐܰܥܒܰܪ ܡܶܢܰܢ ܫܰܒ̈ܛܶܐ ܕܪܽܘܓܙܳܐ܀