ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܥܰܠ ܝܽܘܪܕܢܳܢ

ܕܽܘܨܝ ܘܶܐܬܦܰܨܚܝ܆ ܥܺܕܬܳܐ ܘܰܙܡܰܪܝ ܫܽܘܒܚܳܐ܆ ܠܰܡܫܺܝܚܳܐ܆ ܕܰܫܪܶܐ ܒܶܟܝ ܘܰܡܩܰܕܶܫ ܠܶܟܝ܀

ܩܽܘܡܝ ܥܺܕܬܳܐ܆ ܙܡܰܪܝ ܫܽܘܒܚܳܐ ܠܰܒܪܳܐ ܕܡܰܟܪܶܟܝ܆ ܘܨܰܒܶܬ ܒܢܰܝ̈ܟܝ܆ ܒܰܡܕܰܒܪ̈ܳܢܶܐ ܟܳܗ̈ܢܶܐ܀

ܝܰܠ̈ܕܶܝܗ̇ ܕܥܺܕܬܳܐ܆ ܐܰܘܕܰܘ ܠܶܗ ܠܰܡܫܺܝܚܳܐ܆ ܕܚܰܪܰܪܟܽܘܢ܆ ܡܶܢ ܛܳܥܝܽܘܬܳܐ ܕܰܦܬܰܟܪ̈ܶܐ܀

ܦܰܓܪܶܗ ܘܰܕܡܶܗ܆ ܕܰܡܟܺܝܪܳܗ̇ ܕܥܺܕܰܬ ܩܽܘܕܫܳܐ܆ ܒܺܐܝ̈ܕܰܝ ܟܳܗ̈ܢܶܐ܆ ܡܶܬܦܰܠܰܓ ܠܚܽܘܣܳܝ ܚܰܘ̈ܒܶܐ܀

ܒܪܺܝܟܽ ܗ̱ܘ ܕܬܰܚܬܺܝ܆ ܪܰܒܽܘܬܶܗ ܘܰܗܘܳܐ ܐܽܘܟܠܳܐ܆ ܐܳܦ ܫܶܩܝܳܐ܆ ܠܥܳܢ̈ܶܗ ܦܪܺܝܩܰܬ ܒܰܨܠܺܝܒܶܗ܀

ܥܺܕܬܳܐ ܕܒܰܫܠܺܝ̈ܚܶܐ܆ ܫܽܘܪ̈ܶܝܗ̇ ܐܶܬܩܰܝܰܡܘ܆ ܘܒܰܕܡܳܐ ܕܰܢܒܺܝ̈ܶܐ܆ ܓܰܙܶܝ̈ܗ̇ ܐܶܫܬܰܪܬܰܚܘ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܩܰܕܺܝܫܳܐ ܕܰܐܫܪܺܝ ܫܟܺܝܢܬܶܗ

ܛܳܒܳܐ ܕܰܐܓܥܶܠ ܠܰܫܠܺܝ̈ܚܰܘܗ̱ܝ܆ ܫܽܘܠܛܳܢܳܐ ܕܪܰܘܡܳܐ ܘܥܽܘܡܩܳܐ ܐܰܓܶܢ ܫܽܘܒܚܳܟ ܝܰܘܡܳܢܳܐ܆ ܥܰܠ ܥܺܕܬܳܟ ܘܩܰܕܶܫܶܝܗ̇܀

ܗܳܝ ܐܺܝܕܳܐ ܕܰܫܠܺܝܚܽܘܬܳܐ܆ ܕܝܰܗ̱ܒ ܡܳܪܰܢ ܠܰܬܪܶܥܣܰܪܬܳܐ܆ ܗܳܐ ܡܶܬܝܰܒܠܳܐ ܒܟܽܠ ܦܶܢ̈ܝܳܢ܆ ܒܺܐܝ̈ܕܰܝ ܫܠܺܝ̈ܚܶܐ ܩܰܕܺܝ̈ܫܶܐ܀

ܨܠܳܐ ܪܳܡܳܐ ܥܰܠ ܛܽܘܪ ܣܺܝܢܰܝ܆ ܘܰܐܓܶܢ ܐܺܝܕܶܗ ܥܰܠ ܡܽܘܫܶܐ܆ ܘܡܽܘܫܶܐ ܣܳܡܳܗ̇ ܥܰܠ ܐܰܗܪܽܘܢ܆ ܘܶܐܬܝܰܒܠܰܬ ܨܶܝܕ ܝܽܘܚܰܢܳܢ܀

ܗܳܐ ܪܺܝܫ ܟܳܗ̈ܢܶܐ ܩܳܐܶܡ ܒܳܗ̇܆ ܘܰܛܥܺܝܢ ܡܽܘܪܽܘܢ ܕܰܢܩܰܕܫܺܝܗ̇܆ ܐܰܓܶܢ ܚܰܝܠܳܟ ܒܰܪ ܛܳܒܳܐ܆ ܘܩܰܕܶܫ ܡܟܺܝܪܬܳܟ ܕܚܰܒܶܒܬܳܟ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܢܽܘܗܪܳܐ ܕܡܶܢ ܢܽܘܗܪܳܐ

ܩܽܘܫܝ ܟܰܦܳܐ ܥܺܕܬܳܐ܆ ܩܥܳܐ ܠܳܗ̇ ܢܒܺܝܳܐ ܐܶܫܰܥܝܳܐ܆ ܘܰܙܡܰܪܝ ܫܽܘܒܚܳܐ ܘܬܰܘܕܺܝܬܳܐ܆ ܠܚܰܬܢܳܐ ܕܶܐܬܳܐ ܗ̱ܘܳܐ ܘܡܰܟܪܶܟܝ܆ ܘܙܰܡܶܢ ܠܰܚܠܽܘܠܶܟܝ܆ ܪܰܘܡܳܐ ܘܥܽܘܡܩܳܐ ܘܟܽܠ ܕܰܒܗܽܘܢ܀

ܨܶܒ̈ܬܶܐ ܪ̈ܽܘܚܳܢܶܐ܆ ܨܰܒܬܶܟܝ ܗ̱ܘܳܐ ܡܰܠܟܳܐ ܡܳܪܶܟܝ܆ ܘܰܒܡܰܝ̈ܳܐ ܘܪܽܘܚܳܐ ܡܰܪܩܶܟܝ܆ ܘܰܒܚܰܫܶܗ ܟܬܰܒ ܦܶܪܢܺܝܬܶܟܝ܆ ܘܰܒܡܶܫܚܳܐ ܕܡܽܘܪܽܘܢ܆ ܩܰܕܶܫ ܡܰܫܚܶܟܝ ܕܰܟܝܳܐܺܝܬ܀

ܒܶܣ̈ܡܳܢܰܝ ܬܰܪܫܺܝܫ܆ ܘܡܶܫܚܳܐ ܕܰܟܝܳܐ ܡܶܢ ܡܶܨܪܶܝܢ܆ ܒܰܣܶܡ ܘܰܡܫܰܚ ܗ̱ܘܳܐ ܠܓܽܘܫܡܶܟܝ܆ ܒܝܰܕ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܘܰܪ̈ܕܶܐ ܘܫܽܘ̈ܫܰܢܶܐ܆ ܟܠܺܝܠܳܐ ܕܟܽܠ ܫܽܘܦܪ̈ܺܝܢ ܣܳܡ ܠܶܟܝ܀

ܡܰܢܽܘ ܚܙܳܐ ܚܰܬܢܳܐ܆ ܕܒܰܚܠܽܘܠܶܗ ܕܒܰܚ ܠܰܩܢܽܘܡܶܗ܆ ܘܦܰܓܪܶܗ ܝܰܗ̱ܒ ܗ̱ܘܳܐ ܠܰܡܟܺܝܪܬܶܗ܆ ܘܒܰܕܡܶܗ ܚܰܝܳܐ ܡܶܬܒܰܣܡܳܐ܆ ܘܠܰܨܠܺܝܒܶܗ ܣܳܓܕܳܐ܆ ܘܙܳܡܪܳܐ ܫܽܘܒܚܳܐ ܠܗܰܘ ܕܰܐܘܪܒܳܗ̇܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܫܡܰܝܳܢ̈ܶܐ ܫܽܘܒܚܳܐ ܙܳܡܪܺܝܢ

ܒܪܺܝܟܽ ܗ̱ܘ ܕܰܫܪܳܐ ܒܛܰܝܒܽܘܬܶܗ܆ ܒܥܺܕܬܳܐ ܕܰܓܒܳܐ ܠܺܐܝܩܳܪܶܗ܆ ܘܰܐܬܩܶܢ ܒܳܗ̇ ܡܰܕܒܰܚ ܩܽܘܕܫܳܐ܆ ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܀

ܥܺܕܰܬ ܩܽܘܕܫܳܐ ܕܽܘܨܝ ܘܰܚܕܳܝ܆ ܒܥܺܐܕܳܐ ܕܰܥܒܰܕ ܠܶܟܝ ܡܰܠܟܳܐ܆ ܕܰܚܠܳܦ ܕܶܒ̈ܚܶܐ ܘܢܽܘ̈ܩܳܝܶܐ܆ ܗܽܘ ܗܘܳܐ ܒܶܟܝ ܕܶܒܚܳܐ ܚܰܝܳܐ܀

ܬܠܳܬܳܐ ܫܽܘܪ̈ܶܐ ܚܰܣܺܝ̈ܢܶܐ܆ ܟܪܺܝܟܺܝܢ ܠܺܝ ܐܳܡܪܳܐ ܥܺܕܬܳܐ܆ ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܆ ܘܠܳܐ ܕܳܚܠܳܐ ܐ̱ܢܳܐ ܡܶܢ ܒܺܝܫܳܐ܀

ܡܫܺܝܚܳܐ ܟܽܘܡܪܳܐ ܕܰܫܪܳܪܳܐ܆ ܕܰܕܒܰܚ ܢܰܦܫܶܗ ܒܰܙܩܺܝܦܳܐ܆ ܒܰܛܶܠ ܣܶܕ̈ܩܶܐ ܘܚܶܪ̈ܝܳܢܶܐ܆ ܡܶܢ ܥܺܕܬܳܐ ܕܒܳܟ ܗ̱ܽܘ ܛܶܦܣܰܬ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܐܶܬܬܥܺܝܪ ܕܰܡ̈ܟܶܐ

ܒܗܳܢܳܐ ܝܰܘܡܳܐ ܕܩܽܘܕܳܫܶܟܝ ܥܺܕܰܬ ܩܽܘܕܫܳܐ܆ ܢܶܙܡܰܪ ܫܽܘܒܚܳܐ ܘܬܰܘܕܺܝܬܳܐ܆ ܠܰܡܫܺܝܚܳܐ ܕܰܫܪܳܐ ܒܓܰܘܶܟܝ܆ ܠܶܗ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܒܪܺܝܟܽ ܗ̱ܘ ܡܫܺܝܚܳܐ ܕܠܰܫܠܺܝ̈ܚܰܘܗ̱ܝ ܚܰܘܺܝ ܘܰܐܠܶܦ܆ ܕܢܰܬܩܢܽܘܢ ܠܶܗ ܡܰܕܒܰܚ ܩܽܘܕܫܳܐ܆ ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܆ ܠܶܗ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܬܶܣܰܩ ܠܳܟ ܡܳܪܝ ܬܰܘܕܺܝܬܳܐ ܒܥܺܕܰܬ ܩܽܘܕܫܳܐ܆ ܡܶܢ ܦܽܘܡܳܐ ܕܟܽܠܗܽܘܢ ܝܰܠ̈ܕܶܝܗ̇܆ ܕܡܰܣܩܺܝܢ ܫܽܘܒܚܳܐ ܠܡܳܪܽܘܬܳܟ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܒܪܺܝܟܽ ܗ̱ܘ ܕܰܐܫܪܺܝ ܒܓܰܘ ܥܺܕܬܳܐ ܫܟܺܝܢܬܳܐ ܕܺܝܠܶܗ܆ ܘܨܰܒܬܳܗ̇ ܗ̱ܘܳܐ ܒܪ̈ܺܝܫܰܝ ܟܳܗ̈ܢܶܐ܆ ܘܰܒܟܳܗ̈ܢܶܐ ܘܒܰܡܫܰܡ̈ܫܳܢܶܐ܆ ܠܶܗ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܡܳܐ ܫܰܦܺܝܪ ܗ̱ܘܳܐ ܘܰܦܐܶܐ܆ ܗܳܢܳܐ ܝܰܘܡܳܐ ܡܶܢ ܟܽܠ ܝܰܘ̈ܡܺܝܢ܆ ܘܰܫܒܺܝܚ ܫܽܘܦܪܶܗ ܕܗܳܢ ܥܺܐܕܳܐ ܡܶܢ ܟܽܠ ܥܺܐܕܺܝ̈ܢ܆ ܕܒܶܗ ܗܽܘ ܚܳܕ̈ܝܳܢ܆ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ܀

ܡܰܠܟܳܐ ܡܫܺܝܚܳܐ ܕܰܓܒܳܗ̇܆ ܠܥܺܕܰܬ ܩܽܘܕܫܳܐ ܡܶܢ ܫܽܘܪܳܝܳܐ܆ ܐܰܢ̱ܬ ܢܰܛܰܪܶܝܗ̇ ܡܶܢ ܣܶܕ̈ܩܶܐ ܘܰܦܠܺܝܓ̈ܘܳܬܳܐ܆ ܘܒܳܟ ܡܳܪܶܐ ܟܽܠ܆ ܢܶܫܪܶܐ ܫܰܝܢܳܐ ܒܓܰܘ ܟܶܢ̈ܫܶܝܗ̇܀

ܠܰܘ ܐܰܝܟ ܕܰܥܒܰܪ ܘܰܒܛܶܠ܆ ܡܰܫܟܰܢ ܙܰܒܢܳܐ ܬܶܒܛܰܠ ܥܺܕܬܳܐ܆ ܘܠܳܐ ܐܰܝܟ ܗܰܘ ܒܰܝܬܳܐ ܕܰܒܢܳܐ ܫܠܶܝܡܽܘܢ ܡܰܠܟܳܐ܆ ܬܶܗܘܶܐ ܠܚܶܣܕܳܐ܆ ܒܰܝܢܳܬ ܥܰܡ̱̈ܡܶܐ ܘܶܐܡ̈ܘܳܬܳܐ܀

ܢܶܐܚܽܘܕ ܫܰܝܢܳܟ ܠܝܰܠ̈ܕܶܝܗ̇܆ ܕܥܺܕܰܬ ܩܽܘܕܫܳܐ ܕܰܐܚܺܝܕܺܝܢ ܒܳܟ܆ ܘܰܫܠܳܡܳܟ ܢܶܗܘܶܐ ܫܽܘܪܳܐ ܕܰܡܢܰܛܰܪ ܠܳܗ̇܆ ܕܬܶܩܥܶܐ ܘܬܺܐܡܰܪ܆ ܐܶܬܕܰܟܪܰܝܢܝ ܡܳܐ ܕܳܐܬܶܐ ܐܰܢ̱ܬ܀

ܚܽܘܣ ܥܰܠ ܥܺܕܬܳܟ ܪܳܥܝܳܐ܆ ܛܳܒܳܐ ܕܰܐܫܠܶܡ ܢܰܦܫܶܗ ܚܠܳܦܶܝܗ̇܆ ܫܰܘܙܶܒܶܝܗ̇ ܡܶܢ ܓܺܗܰܢܳܐ ܒܝܰܘܡܳܐ ܐ̱ܚܪܳܝܳܐ܆ ܘܫܰܝܢܳܟ ܢܰܡܠܶܟ܆ ܥܰܠ ܝܰܠ̈ܕܶܝܗ̇ ܥܕܰܡܳܐ ܠܥܳܠܰܡ܀

ܫܽܘܒܚܳܐ

ܫܽܘܒܚܳܐ ܢܰܣܶܩ ܠܰܐܒܳܐ܆ ܘܢܶܣܓܽܘܕ ܠܰܒܪܳܐ ܘܢܰܘܕܶܐ ܠܪܽܘܚܳܐ܆ ܬܠܺܝܬܳܝܽܘܬܳܐ ܩܰܕܺܝܫܬܳܐ ܚܰܕ ܐܰܠܳܗܳܐ܆ ܕܡܶܢ ܥܶܠܳܝ̈ܶܐ܆ ܘܬܰܚܬܳܝ̈ܶܐ ܡܶܣܬܓܶܕ ܘܡܶܫܬܰܒܰܚ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܩܽܘܩܳܝܳܐ
ܚܕܳܐ ܛܠܺܝܬܳܐ ܡܶܢ ܒܶܝܬ ܕܰܘܺܝܕ

ܡܰܢ ܗ̱ܺܝ ܗܳܕܶܐ ܒܰܪ̱ܬ ܡܰܠܟܳܐ ܕܶܐܡܰܪ ܕܰܘܺܝܕ܆ ܕܰܒܫܽܘܒܚܳܐ ܪܰܒܳܐ ܩܳܡܰܬ ܡܶܢ ܝܰܡܺܝܢ ܡܳܪܝܳܐ܆ ܠܒܽܘܫܳܗ̇ ܢܽܘܗܪܳܐ܆ ܘܰܦܪܺܝܣܳܗ̇ ܙܺܝܘܳܐ܆ ܘܥܰܠ ܡܰܪܟܰܒܬܳܐ܆ ܒܳܐܰܐܪ ܡܶܙܕܰܝܚܳܐ܆ ܡܬܺܝܚ ܫܽܘܠܛܳܢܳܗ̇ ܡܶܢ ܣܰܘ̈ܦܶܐ ܥܕܰܡܳܐ ܠܣܰܘ̈ܦܶܐ܆ ܗܺܝܺ ܗ̱ܝ ܥܺܕܬܳܐ ܩܰܕܺܝܫܬܳܐ ܕܰܡܨܰܒܬܳܐ ܘܩܳܝܡܳܐ܆ ܗ̄ܘܗ̄܀

ܫܽܘܒܚܳܐ

ܡܳܐ ܫܰܦܺܝܪܰܬܝ ܒܰܪ̱ܬ ܥܰܡ̱̈ܡܶܐ ܡܳܐ ܫܰܦܺܝܪܰܬܝ܆ ܫܠܶܝܡܽܘܢ ܡܰܠܟܳܐ ܡܢܰܨܰܪ ܠܶܟܝ ܥܺܕܬܳܐ ܩܰܕܺܝܫܬܳܐ܆ ܟܰܟܳܪܺܝܬܳܐ܆ ܡܰܛ̈ܦܳܢ ܣܶܦ̈ܘܳܬܶܟܝ܆ ܘܪܺܝܚܳܐ ܕܡܳܐܢܰܝ̈ܟܝ܆ ܐܰܝܟ ܘܰܪܕܳܐ ܒܢܺܝܣܳܢ܆ ܟܽܠܶܟܝ ܥܺܕܬܳܐ ܫܰܦܺܝܪܰܬܝ ܘܡܽܘܡܳܐ ܠܰܝܬ ܒܶܟܝ܆ ܡܰܠܟܳܐ ܡܫܺܝܚܳܐ ܡܢܰܛܰܪ ܠܶܟܝ ܘܠܰܨܠܺܝܒܶܗ ܣܳܓܕܰܬܝ܆ ܗ̄ܘܗ̄܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕ̈ܰܝܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܟܽܠܡܶܕܶܡ ܐܶܬܒܰܩܺܝܬ
ܒܬܽܘܠܬܳܐ ܝܳܠܕܰܬ ܕܽܘܡܳܪܳܐ. ܬܰܘ ܢܺܐܙܰܠ

ܢܚܶܬ ܐܰܠܳܗܳܐ ܠܛܽܘܪ ܣܺܝܢܰܝ܆ ܒܰܥ̈ܢܳܢܶܐ ܘܰܒܥܰܪ̈ܦܶܠܶܐ܆ ܘܛܰܥܢܶܗ ܗ̱ܘܳܐ ܛܽܘܪܳܐ ܠܚܰܝܠܳܐ ܕܰܠܟܽܠ ܛܥܺܝܢ܆ ܢܚܶܬ ܠܶܓܝܽܘ̈ܢܶܐ ܕܡܰܠܰܐܟ̈ܶܐ ܘܟܶܢ̈ܫܶܐ ܕܰܣܪ̈ܳܦܶܐ܆ ܪ̈ܽܘܚܳܢܶܐ ܥܰܡ ܢܽܘܪ̈ܳܢܶܐ ܚܰܝ̈ܠܶܐ ܕܠܳܐ ܡܶܢܝܳܢ܆ ܩܪ̈ܰܝ ܗ̱ܘܰܝ̈ ܬܰܡܳܢ ܩܰܪ̈ܢܳܬܳܐ܆ ܘܝܰܒܶܒܘ ܗ̱ܘܰܘ ܐܳܦ ܫܺܝܦܽܘܪ̈ܶܐ܆ ܩܳܡ ܚܰܬܢܳܐ ܘܰܢܚܶܬ ܠܰܐܪܥܳܐ܆ ܘܰܡܟܰܪ ܠܶܗ ܥܺܕܰܬ ܩܽܘܕܫܳܐ܆ ܒܪܺܝܟܽ ܗ̱ܘ ܕܶܐܬܬܰܚܬܺܝ ܘܦܰܪܩܰܢ ܡܶܢ ܛܽܘܥܝܰܝ܀

ܫܽܘܒܚܳܐ

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ܆ ܕܶܐܬܳܐ ܘܰܡܟܰܪ ܠܶܗ ܥܺܕܬܳܐ܆ ܘܒܰܕܡܶܗ ܙܰܟܳܝܳܐ ܦܶܪܢܺܝܬܳܐ ܟܬܰܒ ܠܳܗ̇܆ ܘܰܩܒܰܥ ܒܳܗ̇ ܡܰܥܡܽܘܕܺܝܬܳܐ ܟܰܪܣܳܐ ܩܰܕܺܝܫܬܳܐ܆ ܘܰܐܬܩܶܢ ܒܳܗ̇ ܡܰܕܒܰܚ ܩܽܘܕܫܳܐ ܚܽܘܣܳܝܳܐ ܠܥܳܠܡܳܐ܆ ܣܳܡ ܒܳܗ̇ ܢܒܺܝ̈ܶܐ ܘܰܫܠܺܝܚ̈ܶܐ܆ ܘܣܳܗ̈ܕܶܐ ܒܪ̈ܺܝܟܶܐ ܘܛܽܘ̈ܒܳܢܶܐ܆ ܘܝܰܗ̱ܒܠܳܗ̇ ܡܰܠ̈ܦܳܢܶܐ ܕܩܽܘܫܬܳܐ܆ ܒܗܰܝܡܳܢܽܘܬܳܐ ܕܰܫܪܳܪܳܐ܆ ܒܪܺܝܟ ܕܰܒܢܳܗ̇ ܠܥܺܕܬܳܐ ܘܨܰܒܬܳܗ̇ ܒܟܽܠ ܫܽܘܦܪ̈ܺܝܢ܀

ܡܶܢ ܥܳܠܰܡ

ܡܫܺܝܚܳܐ ܕܰܡܠܰܟ ܢܽܘܚܳܡܳܐ. ܠܝܰܠ̈ܕܰܘܗ̱ܝ ܕܳܐܕܳܡ ܥܰܦܪܳܢܳܐ. ܘܶܐܡ̣ܰܪ ܒܰܣܒܰܪܬܶܗ: ܠܰܐܝܠܶܝܢ ܕܗܰܝܡܶܢܘ ܒܶܗ܆ ܕܟܽܠ ‌ܐܰܝܢܳܐ ܕܳܐܟܶܠ ܡ̣ܶܢ ܦܰܓܪܝ: ܘܫܳܬܶܐ ܕܶܡܝ ܚܰܝܳܐ. ܗ̣ܽܘ ܒܺܝ ܡܩܰܘܶܐ: ܘܶܐܢܳܐ ܒܶܗ: ܘܰܠܚܰܪܬܳܐ ܒܺܝ ܢܩܽܘܡ. ܢܰܚܶܡ ܘܰܐܚܳܐ ܒܛܰܝܒܽܘܬܳܟ. ܠܥܰܒ̈ܕܰܝܟ ܕܰܫܟܶܒܘ ܥܰܠ ܣܰܒܪܳܟ. ܘܡܳܐ ܕܳܐܬܶܐ ܐܰܢ̱ܬ ܒܬܶܫܒܽܘܚܬܳܐ: ܒܟܶܢ̈ܫܶܐ ܫܒܺܝ̈ܚܶܐ ܕܡܰܠܰܐܟܰܝ̈ܟ܆ ܥܰܡܳܟ ܡܳܪܝ ܢܶܥܠܽܘܢ: ܠܰܓܢܽܘܢ ܚܰܕ̈ܘܳܬܳܐ܀

ܦܶܬܓܳܡܳܐ: ܐܶܬܕܰܟܪ ܠܥܺܕܬܳܐ ܗܳܝ ܕܰܩܢܰܝܬ܆ ܘܰܦܪܰܩܬܳܗ̇ ܒܫܰܒܛܳܐ ܕܝܳܪܬܽܘܬܳܟ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܐܰܘܕܳܝ ܥܺܕܬܳܐ ܒܰܙܡܺܝܪ̈ܳܬܶܟܝ ܫܰܦܺܝܪ̈ܳܬܳܐ܆

ܘܩܰܪܶܒܝ ܠܰܒܪܳܐ ܕܳܫ̈ܢܶܐ ܕܫܽܘܒܚܳܐ ܒܝܽܘܡ ܩܽܘܕܳܫܶܟܝ܀

ܥܰܠ ܛܽܘܪ ܒܶܝܬ ܐܺܝܠ ܣܳܡ ܫܶܬܶܐܣܶܝ̈ܗ̇ ܕܥܺܕܬܳܐ ܝܰܥܩܽܘܒ܆ ܘܨܳܪܳܗ̇ ܘܨܰܒܬܳܗ̇ ܕܰܐܝܟܰܢ ܘܰܒܡܽܘܢ ܩܳܝܡܳܐ ܒܰܐܪܥܳܐ܆ ܐ̱ܒܳܐ ܕܒܰܢܒܺܝ̈ܶܐ ܐܶܬܢܰܒܺܝ ܥܠܶܝܗ̇ ܢܰܗܺܝܪܳܐܺܝܬ܆ ܘܣܳܡ ܒܳܗ̇ ܙܩܺܝܦܳܐ ܕܒܶܗ ܩܳܪܶܒ ܐ̱ܢܳܫ ܨܶܝܕ ܐܰܠܳܗܳܐ܀

ܫܽܘܒܚܳܐ ܠܰܐܒܳܐ ܕܰܒܢܳܐ ܠܥܺܕܬܶܗ ܗܳܐ ܡܶܢ ܠܩܽܘܕܡܺܝܢ܆ ܘܣܶܓܕܬܳܐ ܠܰܒܪܳܐ ܕܣܳܡ ܒܳܗ̇ ܦܰܓܪܶܗ ܠܚܽܘܣܳܝ ܚܰܘ̈ܒܶܐ܆ ܬܰܘܕܺܝ ܠܪܽܘܚܳܐ ܕܢܳܚܶܬ ܫܳܪܶܐ ܘܰܡܩܰܕܶܫ ܠܳܗ̇܆ ܐ̱ܪܳܙܳܐ ܟܰܣܝܳܐ ܟܝܳܢܳܐ ܣܓܺܝܕܳܐ ܠܶܗ ܬܶܫܒܽܘܚܬܳܐ܀

ܐܰܝܢܳܐ ܕܡܰܩܪܶܒ ܥܰܡܶܟܝ ܥܺܕܬܳܐ ܣܽܘܣܝܶܗ ܢܶܦܶܠ܆

ܘܰܒܗܰܘ ܓܶܐܪܳܐ ܕܡܳܬܚܳܐ ܩܶܫܬܶܗ ܒܣܶܛܪܶܗ ܢܶܒܠܰܥ܀