ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ
ܥܰܢܺܝ̈ܕܶܐ ܕܰܫܩܰܠܘ̱ ܦܰܓܪܳܟ ܦܳܪܽܘܩܰܢ (ܣܳܠܶܩ܆ ܒܡܰܪܝܰܡ ܝܳܠܕܰܬ ܐܰܠܳܗܳܐ)

ܒܗܳܢܳܐ ܝܰܘܡܳܐ ܕܒܶܗ ܐܶܬܺܝܠܶܕ ܒܽܘܟܪܳܐ܆ ܒܪܶܗ ܕܰܐܒܳܐ ܒܪܳܗ̇ ܕܰܒܬܽܘܠܬܳܐ ܕܠܳܐ ܙܽܘܘܳܓܳܐ܆ ܫܰܝܢܳܐ ܢܶܣܓܶܐ ܠܳܗ̇ ܠܥܺܕܬܳܐ ܩܰܕܺܝܫܬܳܐ܆ ܘܝܰܠ̈ܕܶܝܗ̇ ܢܶܩܥܽܘܢ ܒܰܪܘܳܙܳܐ ܫܽܘܒܚܳܐ ܠܰܫܡܳܟ܀

ܫܽܘܒܚܳܐ

ܫܽܘܒܚܳܐ ܠܶܗ ܠܰܐܒܳܐ ܕܫܰܕܰܪ ܠܺܝܚܺܝܕܶܗ܆ ܘܶܐܬܓܰܫܰܡ ܡܶܢ ܒܰܪ̱ܬ ܐ̱ܢܳܫ̈ܳܐ ܘܰܗܘܳܐ ܐ̱ܢܳܫܳܐ܆ ܕܢܶܦܪܽܘܩ ܘܰܢܫܰܘܙܶܒ ܠܓܶܢܣܳܐ ܕܐ̱ܢܳܫܽܘܬܳܐ܆ ܡܶܢ ܛܳܥܝܽܘܬܳܐ ܕܰܚܛܺܝܬܳܐ ܘܰܕܣܳܛܳܢܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܡܶܢ ܥܳܠܡܳܐ ܡܶܕܶܡ ܠܳܐ ܟܰܢܫܶܬ

ܥܽܘܢܺܝܬܳܐ: ܒܪܺܝܟ ܕܰܕܢܰܚ ܘܰܐܢܗܰܪ ܒܶܪ̈ܝܳܬܳܐ܆ ܒܡܰܘܠܳܕܶܗ ܕܡܶܢ ܒܬܽܘܠܬܳܐ ܡܰܪܝܰܡ.

ܠܳܐ ܪܓܺܝܫܺܝܢ ܟܪ̈ܽܘܒܶܐ ܠܡܽܘܢ ܕܳܡܶܐ. ܗܰܘ ܚܰܝܠܳܐ ܕܰܫܪܶܐ ܥܰܠ ܚܰܨܗܽܘܢ. ܟܰܕ ܡܰܒܥܰܕ ܡܶܢܗܽܘܢ ܛܥܺܝܢܺܝܢ ܠܶܗ. ܒܪܺܝܟ ܚܰܝܠܳܐ ܕܰܛܥܺܝܢ ܠܛܳܥܽܘ̈ܢܰܘܗ̱ܝ. ܢܰܘܕܽܘܢ ܠܳܟ ܥܺܝܪ̈ܶܐ: ܟܕܺܝܢܰܝ̈ ܒܡܰܪܟܰܒܬܳܟ: ܥܰܡ ܡܰܪܝܰܡ ܐܶܡܳܟ ܘܐ̱ܢܳܫ̈ܳܐ ܒܬܶܫܒܽܘܚܬܳܐ: ܥܶܠܳܝ̈ܶܐ ܘܟܽܠܗܽܘܢ ܬܰܚ̈ܬܳܝܶܐ. ܡܰܣܩܺܝܢ ܠܳܟ ܫܽܘܒܚܳܐ ܒܟܽܠ ܦܽܘ̈ܡܺܝܢ܀

ܠܶܓܝܽܘܢܳܐ ܫܓܺܝܪܬܳܐ ܕܢܽܘܪ̈ܳܢܶܐ܆ ܛܥܺܝܢܳܐ ܠܶܗ ܒܙܰܘܥܳܐ ܘܒܰܪܬܺܝܬܳܐ܆ ܘܰܛܠܺܝܬܳܐ ܚܬܺܝܡܬܳܐ ܒܢܽܘܨܪ̈ܳܬܳܗ̇܆ ܛܥܺܝܢܳܐ ܠܶܗ ܠܰܒܪܳܐ ܘܚܳܕܝܳܐ ܒܶܗ܆ ܡܶܙܕܰܝܰܚ ܒܪܰܘܡܳܐ܆ ܒܓܺܝ̈ܓܠܶܐ ܕܚܺܝ̈ܠܳܬܳܐ܆ ܘܰܟܪ̈ܽܘܒܶܐ ܒܙܰܘܥܳܐ܆ ܟܕܺܝܢܺܝܢ ܒܡܰܪܟܰܒܬܶܗ܆ ܘܰܕܪ̈ܳܥܶܐ ܕܡܰܪܝܰܡ ܛܥܺܝܢܺܝܢ ܠܶܗ܆ ܒܪܺܝܟ ܕܰܙܥܰܪ ܘܰܐܘܪܶܒ ܙܥܽܘܪܽܘܬܰܢ܀

ܒܗܳܢ ܝܰܘܡܳܐ ܐܶܬܺܝܠܶܕ ܝܰܠܕܳܐ܆ ܒܒܶܝܬ ܠܚܶܡ ܩܽܘܪܝܰܬ ܝܺܗܽܘܕܳܐ܆ ܘܰܡܓܽܘ̈ܫܶܐ ܐܶܬܰܘ ܡܶܢ ܦܳܪܶܣ܆ ܘܩܰܪܶܒܘ ܠܶܗ ܩܽܘܪ̈ܒܳܢܶܐ ܕܟܰܝ̈ܳܐ܆ ܕܰܗܒܳܐ ܥܰܡ ܡܽܘܪܳܐ܆ ܘܰܠܒܽܘܢܬܳܐ ܕܟܺܝܬܳܐ܆ ܠܗܰܘ ܡܰܠܟܳܐ ܘܡܳܪܳܐ܆ ܕܟܽܠܗܶܝܢ ܒܶܪ̈ܝܳܬܳܐ܆ ܘܰܗܦܰܟܘ ܗ̱ܘܰܘ ܘܶܐܙܰܠܘ ܟܰܕ ܚܳܕܶܝܢ܆ ܕܶܐܫܟܰܚܘ ܗ̱ܘܰܘ ܡܕܰܒܰܪ ܟܽܠ ܣܰܘ̈ܦܺܝܢ܀

ܟܪܺܝܟ ܘܰܪܡܶܐ ܒܽܐܘܪܝܳܐ ܕܚܰܝ̈ܘܳܬܳܐ܆ ܒܝܰܕ ܓܽܘܫܡܳܐ ܕܚܰܝܶܕ ܠܪܰܒܽܘܬܶܗ܆ ܩܦܰܣ ܢܰܦܫܶܗ ܘܰܨܒܳܐ ܕܢܶܣܬܰܝܰܟ܆ ܟܰܕ ܐܺܝܬܰܘܗ̱ܝ ܟܽܠܶܗ ܕܠܳܐ ܣܳܟܳܐ܆ ܙܶܩܪܰܬ ܠܶܗ ܐܶܡܶܗ܆ ܠܒܽܘܫܳܐ ܕܢܶܬܟܰܣܶܐ܆ ܠܗܰܘ ܕܳܐܦܠܳܐ ܗܰܘܢܳܐ܆ ܠܳܐ ܡܨܶܐ ܬܽܘܒ ܕܢܶܚܙܶܝܘܗ̱ܝ܆ ܡܶܫܚܰܬ ܠܶܗ ܡܶܫܚܳܐ ܥܰܠ ܒܽܘܪ̈ܟܶܝܗ̇܆ ܘܦܶܟܪܰܬ ܠܶܗ ܐܺܝ̈ܕܰܘܗ̱ܝ ܒܥܰܙܪܽܘܪ̈ܶܐ܀

ܡܫܰܕܪܳܐ ܠܶܗ ܐܶܡܶܗ ܠܟܳܐ ܘܰܠܟܳܐ܆ ܘܫܳܡܰܥ ܠܳܗ̇ ܘܥܳܒܶܕ ܦܽܘܩܕܳܢܳܗ̇܆ ܘܶܐܢ ܓܶܕܫܰܬ ܘܠܳܐ ܥܒܰܕ ܠܗܰܘ ܕܶܐܡܪܰܬ܆ ܙܶܥܩܰܬ ܒܶܗ ܘܩܳܡܰܬ ܥܠܰܘܗ̱ܝ ܕܬܶܡܚܶܝܘܗ̱ܝ܆ ܘܶܐܢ ܐܶܬܬܦܺܝܣ ܘܰܫܡܰܥ܆ ܘܰܥܒܰܕ ܠܗܰܘ ܕܶܐܡܪܰܬ܆ ܢܰܨܪܰܬ ܘܚܰܒܶܒܬܶܗ܆ ܘܥܰܦܩܰܬ ܘܢܰܫܶܩܬܶܗ܆ ܘܶܐܢ ܓܶܕܫܰܬ ܘܰܐܕܶܫ ܐܰܝܟ ܫܰܒܪܳܐ܆ ܩܳܡܰܬ ܥܠܰܘܗ̱ܝ ܘܰܪܗܶܛ ܕܠܳܐ ܕܬܶܡܚܶܝܘܗ̱ܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܝܢܰܘ ܕܢܰܓܺܝܪܳܐ ܪܽܘܚܶܗ

ܥܽܘܢܺܝܬܳܐ: ܫܽܘܒܚܳܐ ܠܗܰܘ ܕܰܦܪܰܩ܆ ܥܺܕܬܳܐ ܒܡܰܘܠܳܕܶܗ.

ܐܶܩܪܶܝܗ̇ ܡܙܰܘܰܓܬܳܐ܆ ܒܬܽܘ̈ܠܶܝܗ̇ ܡܙܺܝܥܺܝܢ ܠܺܝ܆ ܝܰܠܕܳܗ̇ ܡܰܬܗܰܪ ܠܺܝ܆ ܦܺܐܪܳܗ̇ ܕܽܘܡܳܪܰܐ ܗ̱ܘ܆ ܘܰܒܪܳܗ̇ ܡܬܽܘܡܳܝܰܐ ܗ̱ܘ܆ ܚܪܶܡ ܗ̱ܽܘ ܕܒܳܨܶܐ ܠܶܗ܀

ܠܳܐ ܐܺܝܬ ܒܢܶܩ̈ܒܳܬܳܐ܆ ܚܰܠܒܳܐ ܘܰܒܬܽܘ̈ܠܶܐ܆ ܕܰܐܝܟܳܐ ܕܺܐܝܬ ܚܰܠܒܳܐ܆ ܠܳܐ ܐܺܝܬ ܒܬܽܘܠܽܘܬܳܐ܆ ܒܡܰܪܝܰܡ ܠܚܽܘܕ ܬܶܗܪܳܐ܆ ܝܰܠܕܳܐ ܘܰܒܬܽܘ̈ܠܶܐ܀

ܬܰܪܬܶܝܢ ܒܬܽܘ̈ܠܳܬܳܐ܆ ܗܘܰܝ̈ ܠܳܗ̇ ܠܐܢܳܫܽܘܬܳܐ܆ ܚܕܳܐ ܥܶܠܰܬ ܚܰܝ̈ܶܐ܆ ܚܕܳܐ ܥܶܠܰܬ ܡܰܘܬܳܐ܆ ܡܰܘܬܳܐ ܒܝܰܕ ܚܰܘܳܐ܆ ܘܚܰܝ̈ܶܐ ܒܝܰܕ ܡܰܪܝܰܡ܀

ܐܶܠܦܳܐ ܗ̱ܝ ܕܗܺܝ ܛܶܥܢܰܬ܆ ܣܺܝ̈ܡܳܬܳܐ ܘܓܰܙ̈ܶܐ܆ ܘܰܐܝܬܝܰܬ ܠܰܣܢܺܝ̈ܩܶܐ܆ ܥܽܘܬܪܳܐ ܫܡܰܝܳܢܳܐ܆ ܡܺܝ̈ܬܶܐ ܥܬܰܪܘ ܡܶܢܳܗ̇܆ ܕܚܰܝ̈ܶܐ ܛܥܺܝܢܳܐ ܗ̱ܘܳܬ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ
ܐܰܢܺܝܚ ܡܳܪܝܳܐ ܠܥܰܢܺܝ̈ܕܶܐ ܒܰܐܘܳܢ̈ܶܐ

ܥܽܘܢܺܝܬܳܐ: ܒܪܺܝܟܳܐ ܗ̱ܝ ܡܰܪܝܰܡ ܕܝܺܠܶܕܬܶܗ܆ ܠܰܡܫܺܝܚܳܐ ܦܳܪܽܘܩܶܗ ܕܥܳܠܡܳܐ.

ܢܰܦܫܳܗ̇ ܬܶܗܪܳܐ ܡܰܠܝܳܐ ܗ̱ܘܳܬ܆ ܘܰܒܬܶܗܪܳܐ ܠܝܰܠܽܘܕܳܐ ܡܰܠܠܰܬ܆ ܒܩ̈ܳܠܶܐ ܕܦܽܘܪܫܳܢܳܐ܆ ܒܙܰܘܥܳܐ ܕܪ̈ܽܘܚܳܢܶܐ܆ ܘܰܒܩܺܝ̈ܢܳܬܳܐ ܦܰܐܝ̈ܳܬܳܐ܆ ܢܽܘܨܪ̈ܳܬܳܐ ܚܰܠ̈ܝܳܬܳܐ ܠܶܥܙܰܬ܀

ܠܡܰܢܽܘ ܕܳܡܶܝܬ ܝܰܠܽܘܕܳܐ܆ ܕܨܽܘܪ̈ܳܬܳܐ ܡܶܢ ܝܰܘܣܶܦ ܠܰܝܬ ܒܳܟ܆ ܠܳܐ ܒܒܰܛܢܳܟ ܐܰܪܓܶܫ܆ ܐܳܦܠܳܐ ܒܡܰܘܠܳܕܳܟ܆ ܐܰܒܽܘܟ ܕܺܝܠܳܟ ܒܰܫܡܰܝܰܐ ܗ̱ܘ܆ ܘܰܐܪܥܳܢܳܐ ܠܳܐ ܪܓܺܝܫ ܒܡܰܘܠܳܕܳܟ܀

ܗܰܘ ܨܰܝܳܪܳܐ ܕܟܽܠ ܥܽܘ̈ܠܺܝܢ. ܨܳܪ ܨܰܠܡܳܐ ܠܝܳܬܶܗ ܒܡܰܪܒܥܳܐ܆ ܘܰܕܡܽܘܬܳܐ ܕܥܰܒܕܳܐ. ܫܩܰܠ ܠܶܗ ܡܶܢ ܟܰܪܣܳܐ܆ ܘܰܢܦܰܩ ܣܰܥܪܳܗ̇ ܠܰܓܒܺܝܠܬܶܗ܆ ܘܶܐܬܡܰܟܰܟ ܕܢܶܦܪܽܘܩ ܠܥܳܠܡܳܐ܀

ܒܰܒܬܽܘ̈ܠܳܬܳܐ ܬܽܘܒ ܢܰܟܦܳܐ ܗ̱ܝ܆ ܘܰܐܝܟ ܐܶܡܳܐ ܛܥܺܝܢܳܐ ܘܡܰܝܢܩܳܐ܆ ܠܙܳܝܽܘܢܳܐ ܕܥܳܠ̈ܡܶܐ. ܕܰܗܘܳܐ ܒܰܪܢܳܫܳܐ܆ ܫܡܰܝܳܐ ܙܥܽܘܪܝܳܐ ܗ̱ܝ ܠܺܐܝܩܳܪܶܗ ܘܒܰܡܥܰܪܬܳܐ ܥܒܰܕ ܗ̱ܘܳܐ ܡܰܘܠܳܕܶܗ܀

ܡܶܢ ܡܶܕܝܳܪ̈ܰܘܗ̱ܝ ܥܶܠܳܝ̈ܶܐ܆ ܕܳܠ ܘܰܢܚܶܬ ܐܰܠܳܗܳܐ ܡܶܠܬܳܐ܆ ܘܰܫܪܳܐ ܒܰܒܬܽܘܠܬܳܐ܆ ܒܛܶܢܬܶܗ ܘܺܝܠܶܕܬܶܗ܆ ܘܪܳܡ ܡܶܢ ܡܶܠܬܳܐ ܡܰܘܠܳܕܶܗ܆ ܠܺܝܛ ܦܽܘܡܳܐ ܕܡܰܡܪܰܚ ܕܢܶܒܨܶܝܘܗ̱ܝ܀

ܢܶܩܥܽܘܢ ܓܰܪ̈ܡܰܝ ܡܶܢ ܩܰܒܪܳܐ܆ ܕܰܐܠܳܗܳܐ ܝܶܠܕܰܬ ܒܬܽܘܠܬܳܐ܆ ܘܶܐܢ ܡܶܬܦܰܠܰܓ ܐ̱ܢܳܐ. ܐܶܣܬܠܶܐ ܡܶܢ ܩܽܘܫܬܳܐ܆ ܘܶܐܢ ܐܺܝܬ ܒܪܶܥܝܳܢܝ ܫܽܘܚܠܳܦܳܐ܆ ܥܰܡ ܝܽܘܕܳܐ ܒܓܺܗܰܢܳܐ ܐܶܫܬܕܶܐ܀

ܐܰܝܟ ܛܽܘܪ ܣܺܝܢܰܝ ܩܰܒܶܠܬܳܟ܆ ܘܡܶܢ ܢܽܘܪܳܟ ܠܳܐ ܝܶܩܕܰܬ ܐܰܝܟ ܗܰܘ܆ ܕܰܐܢ̱ܬܽ ܗ̱ܘ ܛܰܫܺܝܬܳܗ̇܆ ܠܢܽܘܪܳܐ ܕܪܰܒܽܘܬܳܟ. ܕܠܳܐ ܢܶܥܛܰܪ ܒܝܰܕ ܬܶܢܳܢܳܐ܆ ܘܡܶܢ ܢܽܘܪܳܟ ܕܰܠܫܽܘ̈ܥܶܐ ܡܰܘܩܕܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܬܰܘ ܘܰܬܗܰܪܘ ܐܳܘ ܦܳܪ̈ܽܘܫܶܐ܆ ܟܰܣܝܳܐܺܝܬ ܕܠܳܐ ܥܽܘܩܳܒܳܐ܆ ܬܰܘ ܘܰܚܙܰܐܽܘܗ̱ܝ ܠܝܰܠܽܘܕܳܐ܆ ܕܝܰܘܡܳܢ ܕܽܘܟܪܳܢ ܡܰܘܠܳܕܶܗ܆ ܗܽܘ ܫܰܒܪܳܐ ܘܛܰܠܝܳܐ ܘܥܽܘܠܳܐ܆ ܘܣܳܒܳܐ ܘܩܰܫܺܝܫ ܝܰܘ̈ܡܳܬܳܐ܆ ܡܳܐ ܥܰܫܺܝܢܺܝܢ ܫܽܘ̈ܚܠܳܦܰܘܗ̱ܝ܆ ܘܬܽܘܒ ܣܰܓܺܝܐܺܝܢ ܐܳܬܘ̈ܳܬܶܗ܆ ܘܬܰܡܺܝܗܺܝܢ ܟܽܠܗܽܘܢ ܛܽܘܦ̈ܣܰܘܗ̱ܝ܆ ܘܰܐܘ̈ܳܢܶܐ ܕܰܒܗܽܘܢ ܫܳܪܶܐ܀

ܕܒܶܝܬ ܓܰܒܪܺܐܶܝܠ ܕܰܡܚܰܦܶܝܢ܆ ܐܰܦܰܝ̈ܗܽܘܢ ܕܠܳܐ ܢܚܽܘܪܽܘܢ ܒܶܗ܆ ܕܒܶܝܬ ܝܰܘܣܶܦ ܒܰܕܪ̈ܳܥܰܝܗܽܘܢ܆ ܛܥܺܝܢܺܝܢ ܠܶܗ ܘܰܡܙܰܝܚܺܝܢ ܠܶܗ܆ ܡܰܪܟܰܒܬܳܐ ܕܰܫ̈ܡܰܝܳܢܶܐ܆ ܒܙܰܘܥܳܐ ܟܕܺܝܢܳܐ ܠܺܐܝܩܳܪܶܗ܆ ܘܰܛܠܺܝܬܳܐ ܗܳܐ ܡܙܰܝܚܳܐ ܠܶܗ܆ ܘܰܡܢܰܨܪܳܐ ܘܰܡܚܰܒܒܳܐ ܠܶܗ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀