ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܒܗܳܢܳܐ ܠܺܠܝܳܐ ܐܶܬܺܝܠܶܕ: ܦܳܪܽܘܩܰܢ ܒܓܰܘ ܒܶܝܬ ܠܚܶܡ: ܘܰܡܓܽܘ̈ܫܶܐ ܘܪ̈ܳܥܰܘܳܬܳܐ: ܩܰܪܶܒܘ ܠܶܗ ܩܽܘܪ̈ܒܳܢܰܝܗܽܘܢ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܒܠܺܠܝܳܐ ܕܫܰܠܝܳܐ ܐ̱ܢܳܫܽܘܬܳܐ: ܕܢܰܚ ܠܰܢ ܢܽܘܗܪܳܐ ܫܰܪܺܝܪܳܐ: ܘܡܰܠܰܐܟ̈ܶܐ ܘܰܒܢܰܝ̈ܢܳܫܳܐ: ܙܳܡܪܺܝܢ ܫܽܘܒܚܳܐ ܒܡܰܘܠܳܕܶܗ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܢܰܘܕܶܐ ܠܶܗ ܠܒܰܪ ܐܰܠܳܗܳܐ: ܕܰܒܡܰܘܠܳܕܶܗ ܚܰܪܰܪ ܠܰܢ: ܡܶܢ ܛܳܥܝܽܘܬܳܐ ܕܰܦܬܰܟܪ̈ܶܐ: ܘܰܐܠܶܦ ܠܰܢ ܕܰܢܙܰܡܰܪ ܠܶܗ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܰܠ ܡܳܢܳܐ ܪܳܚܡܰܬܝ

ܥܒܰܕ ܐܰܒܳܐ ܒܝܰܠܕܶܗ ܫܰܝܢܳܐ܆ ܒܶܝܬ ܥܶܠܳܝ̈ܶܐ ܠܬܰܚ̈ܬܳܝܶܐ܆ ܘܣܳܗܶܕ ܓܰܒܪܺܐܶܝܠ ܥܺܝܪܳܐ܆ ܕܶܐܫܬܰܕܰܪ ܡܶܢ ܐܰܠܳܗܳܐ܆ ܠܘܳܬ ܡܰܪܝܰܡ ܛܽܘܒܳܢܺܝܬܳܐ܆ ܕܰܢܣܰܒܪܺܝܗ̇ ܡܶܛܽܠ ܒܰܛܢܳܐ܀

ܡܫܰܡ̈ܫܳܢܶܐ ܠܐ̱ܪ̈ܳܙܰܘܗ̱ܝ ܙܗܰܝ̈ܳܐ܆ ܓܒܳܐ ܠܶܗ ܕܶܢܚܳܐ ܫܰܪܺܝܪܳܐ܆ ܡܶܢ ܡܰܠܰܐܟ̈ܶܐ ܓܰܒܪܺܐܶܝܠ܆ ܘܡܶܢ ܒܢܰܝ̈ܢܳܫܳܐ ܠܰܒܬܽܘܠܬܳܐ܆ ܘܡܶܢ ܫܡܰܝܳܐ ܠܟܰܘܟܰܒ ܢܽܘܗܪܳܐ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܒܗܳܢܳܐ ܠܺܠܝܳܐ ܕܚܰܕ̈ܘܳܬܳܐ܆ ܠܳܐ ܢܶܕܡܰܟ ܐܰܝܟ ܡܰܐܺܝ̈ܢܶܐ܆ ܕܪ̈ܳܥܰܘܳܬܳܐ ܕܰܫܗܰܪܘ ܒܶܗ. ܐܶܫܬܘܺܝܘ ܠܰܚܙܳܬܳܐ ܕܥܺܝܪ̈ܶܐ܆ ܕܰܢܚܶܬܘ ܫܰܒܰܚܘ ܒܒܶܝܬ ܠܚܶܡ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܒܗܳܢܳܐ ܠܺܠܝܳܐ ܐܶܣܬܰܒܰܪܘ܆ ܪ̈ܳܥܰܘܳܬܳܐ ܡܶܢ ܥܺܝܪ̈ܶܐ܆ ܕܶܐܬܺܝܠܶܕ ܠܟܽܘܢ ܝܰܘܡܳܢܳܐ܆ ܡܳܪܝܳܐ ܡܫܺܝܚܳܐ ܦܳܪܽܘܩܳܐ܆ ܒܪܺܝܟܽ ܗ̱ܘ ܕܶܐܬܳܐ ܠܡܰܘܠܳܕܳܐ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܒܗܳܢܳܐ ܠܺܠܝܳܐ ܐܶܬܺܝܠܶܕ܆ ܦܳܪܽܘܩܰܢ ܒܓܰܘ ܒܶܝܬ ܠܚܶܡ܆ ܡܓܽܘ̈ܫܶܐ ܐܶܬܰܘ ܠܐܺܝܩܳܪܶܗ܆ ܕܰܢܩܰܪܒܽܘܢ ܠܶܗ ܩܽܘܪ̈ܒܳܢܶܐ܆ ܒܪܺܝܟ ܕܰܒܕܳܫ̈ܢܶܐ ܐܶܬܝܰܩܰܪ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܫܽܘܒܚܳܐ

ܫܽܘܒܚܳܐ ܠܰܐܒܳܐ ܕܰܒܚܽܘܒܶܗ܆ ܫܰܕܰܪ ܠܰܒܪܶܗ ܠܦܽܘܪܩܳܢܰܢ܆ ܘܰܫܪܳܐ ܒܥܽܘܒܳܐ ܒܬܽܘܠܳܝܳܐ܆ ܒܕܰܟܝܽܘܬܳܐ ܕܠܳܐ ܙܽܘܘܳܓܳܐ܆ ܘܰܢܦܰܩ ܡܶܢܳܗ̇ ܘܰܚܬܺܝܡܳܐ܆ ܡܳܪܶܐ ܟܽܠ ܫܽܘܒܚܳܐ ܠܳܟ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܦܬܰܚ ܠܺܝ ܬܰܪܥܶܗ
ܥܰܢܺܝ̈ܕܶܐ ܕܰܫܩܰܠܘ̱ ܦܰܓܪܳܟ܆ ܘܒܰܕܡܳܟ (ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ)

ܒܗܳܢܳܐ ܝܰܪܚܳܐ ܕܰܡܫܰܠܰܚ܆ ܐܺܝ̈ܠܳـܢܶܐ ܡܶܢ ܦܺܐܪ̈ܰܝܗܽܘܢ܆ ܝܶܗܒܰܬ ܠܰܢ ܟܰܪܣܳܗ̇ ܕܡܰܪܝܰܡ܆ ܦܺܐܪܳܐ ܐܰܟܳܪܳܐ ܕܢܰܦܫܶܗ܆ ܠܳܐ ܙܪܰܥܬܶܗ ܐܺܝܕܳܐ ܕܒܶܣܪܳܐ܆ ܘܠܳܐ ܢܰܨܒܶܗ ܙܰܪܥܳܐ ܕܓܰܒܪܳܐ܆ ܘܠܳܐ ܪܶܓܫܰܬ ܟܰܪܣܳܐ܆ ܗܳܝ ܕܰܫܪܳܐ ܒܳܗ̇ ܢܺܝܚܳܐܺܝܬ܀

ܫܽܘܒܚܳܐ

ܡܰܢܽܘ ܟܰܝ ܐܰܠܨܶܗ ܕܢܶܚܽܘܬ܆ ܢܶܗܘܶܐ ܗ̱ܘܳܐ ܥܽܘܠܳܐ ܒܓܰܘ ܟܰܪܣܳܐ܆ ܘܰܢܫܰܦܶܦ ܒܰܝܢܳܬ ܫܽܘ̈ܩܶܐ܆ ܕܨܶܒܝܳܢܶܗ ܠܗܳܕܶܐ ܢܰܓܕܶܗ܆ ܙܽܘܙܳܐ ܗܰܘ ܕܶܐܒܰܕ ܒܳܥܶܐ܆ ܘܒܳܬܰܪ ܥܶܪܒܳܐ ܐܶܬܳܐ ܠܶܗ܆ ܨܰܠܡܳܐ ܒܥܳܐ ܢܚܰܕܶܬ܆ ܘܰܢܩܺܝܡܺܝܘܗ̱ܝ ܡܶܢ ܕܰܚܺܝܚܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܨܠܺܝܒܳܐ ܥܒܺܝܕ ܠܶܗ ܠܥܳܠܡܳܐ

ܥܽܘܢܺܝܬܳܐ: ܫܽܘܒܚܳܐ ܠܝܰܠܕܳܟ: ܐܰܠܳܗܳܝܳܐ ܐܳܦ ܐ̱ܢܳܫܳܝܳܐ.

ܡܚܰܒܶܒ ܗ̱ܘܳܐ ܠܶܗ. ܝܰܘܣܶܦ ܠܰܒܪܳܐ ܐܰܝܟ ܕܰܠܫܰܒܪܳܐ܆ ܡܫܰܡܶܫ ܗ̱ܘܳܐ ܠܶܗ ܐܰܝܟ ܕܠܰܐܠܳܗܳܐ܆ ܚܳܕܶܐ ܗ̱ܘܳܐ ܒܶܗ ܐܰܝܟ ܕܰܒܛܳܒܳܐ܆ ܘܰܙܗܺܝܪ ܡܶܢܶܗ. ܐܰܝܟ ܕܡܶܢ ܟܺܐܢܳܐ ܦܶܗܝܰܐ ܗ̱ܘ ܪܰܒܳܐ܀

ܕܰܘܺܝܕ ܡܰܠܟܳܐ. ܩܳܡ ܡܶܢ ܫܰܪܒܰܬܝ ܘܰܩܛܰܪ ܬܳܓܳܐ܆ ܠܫܶܦܠܳܐ ܪܰܒܳܐ ܗܳܐ ܡܛܺܝܬ ܐܶܢܳܐ܆ ܕܰܚܠܳܦ ܡܰܠܟܳܐ ܗܘܺܝܬ ܢܰܓܳܪܳܐ܆ ܡܳܐ ܕܳܡܶܐ ܠܺܝ. ܕܰܒܒܰܝܬܝ ܐܺܝܬܰܘܗ̱ܝ ܡܳܪܶܐ ܡܰܠ̈ܟܶܐ܀

ܟܡܳܐ ܟܰܝ ܐܶܬܗܰܪ. ܕܰܪܡܶܐ ܥܽܘܠܳܐ ܣܳܒܳܐ ܩܽܘܕܡܰܝ܆ ܕܟܽܠ ܠܰܫܡܰܝܳܐ ܬܰܠܝܳܐ ܥܰܝܢܶܗ܆ ܟܰܕ ܠܳܐ ܫܳܠܳܐ ܪܶܬܡܳܐ ܕܦܽܘܡܶܗ܆ ܡܳܐ ܕܳܡܶܐ ܠܺܝ. ܕܥܰܡ ܐܰܠܳܗܳܐ ܡܡܰܠܶܠ ܫܶܬܩܶܗ܀

ܡܰܢܽܘ ܚܙܳܐ ܟܰܝ. ܥܽܘܠܳܐ ܕܚܳܐܰܪ ܟܽܠܶܗ ܠܟܽܠܕܽܘܟ܆ ܕܳܡܶܐ ܚܶܙܘܶܗ ܕܗܽܘ ܡܕܰܒܰܪ ܠܗܶܝܢ܆ ܠܟܽܠ ܒܶܪ̈ܝܳܬܳܐ ܕܰܠܥܶܠ ܘܕܰܠܬܰܚܬ܆ ܕܳܡܶܐ ܚܶܙܘܶܗ ܠܗܰܘ ܦܳܩܽܘܕܳܐ ܕܰܠܟܽܠ ܦܳܩܶܕ܀

ܟܰܕ ܒܰܪ ܚܰܕ ܐܰܢ̱ܬ. ܐܶܩܪܶܝܟ ܡܶܟܺܝܠ ܒܰܪ ܣܰܓܺܝ̈ܶܐܐ܆ ܠܳܐ ܣܳܦܩܺܝܢ ܠܳܟ ܪ̈ܶܒܽܘ ܦܽܘ̈ܡܺܝܢ܆ ܕܒܰܪ ܐܰܠܳܗܳܐ ܐܰܢ̱ܬ ܐܳܦ ܒܰܪܢܳܫܳܐ܆ ܒܰܪ ܕܰܘܺܝܕ ܐܰܢ̱ܬ܆ ܒܰܪ ܐܰܒܪܳܗܳܡ ܘܰܒܪܳܗ̇ ܕܡܰܪܝܰܡ܀

ܗܳܐ ܫܓܺܝܫ ܥܳܠܡܳܐ. ܥܰܠ ܝܳܠܶܕܬܳܟ ܐܰܝܟ ܕܥܰܠ ܝܰܘܢܳܢ܆ ܗܳܐ ܗܶܪܳܘܕܶܣ ܬܰܥܠܳܐ ܫܺܝܛܳܐ܆ ܒܳܥܶܐ ܕܢܶܩܛܽܘܠ ܠܓܽܘܪܝܳܐ ܕܰܐܪܝܳܐ܆ ܡܳܪܳܗ̇ ܕܶܐܡܶܗ܆ ܐܰܢ̱ܬ ܐܰܠܶܦܰܝܢܝ ܠܰܐܝܟܳܐ ܐܶܥܪܽܘܩ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܫܺܝܚܳܐ ܘܡܶܫܚܳܐ

ܥܽܘܢܺܝܬܳܐ: ܠܳܟ ܫܽܘܒܚܳܐ ܡܶܢ ܟܽܠ ܒܶܪ̈ܝܳܢ܆ ܒܪܳܐ ܕܰܒܚܰܝܠܶܗ ܚܰܪܰܪ ܟܽܠ.

ܩܶܪܒܰܬ ܡܰܪܝܰܡ ܘܰܛܥܶܢܬܶܗ܆ ܠܡܳܪܳܗ̇ ܘܰܒܪܳܗ̇ ܘܰܐܠܳܗܳܗ̇܆ ܘܟܰܕ ܫܰܪܝܰܬ ܠܰܡܢܰܨܳܪܽܘ܆ ܠܥܽܘܠܳܐ ܕܩܰܫܺܝܫ ܡܶܢ ܕܳܪ̈ܶܐ܆ ܣܳܓܕܳܐ ܐ̱ܢܳܐ ܠܳܟ ܒܶܪܝ ܘܰܪܚܽܘܡܝ܆ ܫܪܶܐ ܒܰܐܪܥܳܐ ܫܪܶܐ ܒܰܫܡܰܝܳܐ܆ ܣܳܓܕܳܐ ܐ̱ܢܳܐ ܠܳܟ ܫܠܶܐ ܘܫܰܬܺܝܩ܆ ܕܩܳܠܶܗ ܪܳܥܶܡ ܒܰܥ̈ܢܳܢܶܐ܀

ܡܽܘܫܶܐ ܠܺܝ ܢܶܬܶܠ ܛܽܘܒܳܐ܆ ܕܒܺܝ ܐܶܬܓܡܰܪ ܐ̱ܪܳܙܳܐ ܕܣܰܢܝܳܐ܆ ܡܶܟܺܝܠ ܢܶܬܠܽܘܢ ܠܺܝ ܛܽܘܒܳܐ܆ ܡܰܠ̈ܟܶܐ ܘܟܳܗ̈ܢܶܐ ܘܰܢܒܺܝ̈ܶܐ܆ ܕܒܺܝ ܐܶܫܬܰܡ̈ܠܺܝ ܡܶܠܰܝ̈ܗܽܘܢ܆ ܘܰܗܘܰܝ̈ ܟܽܠܗܶܝܢ ܒܰܥܒܳܕܳܐ܆ ܒܪܺܝܟ ܕܶܐܬܳܐ ܘܫܰܡܠܺܝ ܐ̱ܪ̈ܳܙܶܐ܆ ܘܦ̈ܶܠܳܐܬܳܐ ܕܰܢܒܺܝܽܘܬܳܐ܀

ܚܳܕܶܝܢ ܒܳܟ ܢܒܺܝ̈ܶܐ ܕܰܐܒܽܘܟ܆ ܕܒܰܕܶܩܘ ܐ̱ܪܳܙܳܐ ܕܡܶܐܬܺܝܬܳܟ܆ ܘܰܦܨܺܝܚܺܝܢ ܒܳܟ ܚܰܙܳܝ̈ܶܐ܆ ܕܰܥܠܰܝܟ ܡܰܠܶܠܘ ܟܰܣ̈ܝܳܬܳܐ܆ ܡܒܰܕܩܳܢ̈ܶܐ ܕܫܰܪܺܝܪ̈ܳܬܳܐ܆ ܢܶܬܬܪܺܝܡ ܪܺܝܫܟܽܘܢ ܡܶܢ ܩܰܒܪ̈ܶܐ܆ ܕܶܐܬܳܐ ܘܫܰܡܠܺܝ ܡܶܠܰܝ̈ܟܽܘܢ܆ ܒܪܺܝܟ ܕܶܐܬܳܐ ܠܝܰܠܕܳܐ ܘܦܰܪܩܰܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܕܡܰܘ̈ܕܝܳܢܶܐ
ܣܳܠܶܩ: ܕܽܘܨ ܟܶܢܫܳܐ ܕܰܥܠܰܝܡܳܬܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܰܒܝܰܠܕܶܗ܆ ܚܰܪܰܪ ܠܰܢ ܡܶܢ ܛܳܥܝܽܘܬܳܐ.

ܪܰܒܳܐ ܗ̱ܝ ܣܰܓܺܝ ܬܶܕܡܽܘܪܬܳܐ܆ ܘܠܳܐ ܡܶܬܡܰܠܠܳܐ ܒܠܶܫܳܢܳܐ܆ ܕܰܒܬܽܘܠܬܳܐ ܕܠܳܐ ܙܽܘܘܳܓܳܐ܆ ܝܳܠܕܳܐ ܥܽܘܠܳܐ ܕܠܳܐ ܙܰܪܥܳܐ܆ ܘܰܒܬܽܘ̈ܠܶܐ ܚܬܺܝܡܺܝܢ ܢܛܺܝܪܺܝܢ܀

ܐܰܪܟܶܢ ܠܰܫܡܰܝܳܐ ܘܰܢܚܶܬ܆ ܘܰܫܪܳܐ ܒܥܽܘܒܳܗ̇ ܕܒܰܪ̱ܬ ܕܰܘܺܝܕ܆ ܘܠܳܐ ܣܕܰܩ ܠܰܫܡܰܝܳܐ ܒܡܰܚܬܶܗ܆ ܘܠܳܐ ܫܪܳܐ ܛܰܒ̈ܥܶܐ ܕܝܳܠܶܕܬܶܗ܆ ܘܰܚ̈ܬܳܡܶܐ ܕܰܒܬܽܘܠܽܘܬܳܗ̇܀

ܚܰܘܝܶܗ ܡܳܪܝܳܐ ܠܰܢܒܺܝܳܐ܆ ܒܕܳܪ̈ܳܬܶܗ ܟܰܗܺܝ̈ܢܳܬܳܐ܆ ܬܰܪܥܳܐ ܕܰܐܚܺܝܕ ܘܶܐܡܰܪ ܠܶܗ܆ ܕܗܳܢܳܐ ܠܰܡ ܢܶܗܘܶܐ ܐܰܚܺܝܕ܆ ܥܰܠ ܕܰܐܠܳܗܳܐ ܥܳܐܶܠ ܒܶܗ܀

ܕܶܐܬܺܝܠܶܕ ܡܳܪܝܳܐ ܐܰܫܰܪ܆ ܘܕܰܐܝܟܰܢ ܝܺܠܺܝܕ ܠܳܐ ܬܶܒܨܶܐ܆ ܒܚܽܘܒܳܐ ܘܰܒܗܰܝܡܳܢܽܘܬܳܐ܆ ܩܪܽܘܒ ܘܰܣܓܽܘܕ ܒܪܽܘܚܳܐ ܩܽܘܕܡܰܘܗ̱ܝ܆ ܕܠܳܐ ܦܽܘܠܳܓܳܐ ܘܚܶܪܝܳܢܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܘܳܐ ܢܽܘܗܪܳܐ ܐܰܝܟ ܟܳܪܽܘܙܳܐ

ܥܽܘܢܺܝܬܳܐ: ܠܳܟ ܬܶܫܒܽܘܚܬܳܐ ܒܰܪ ܡܳܪܶܐ ܟܽܠ܆ ܠܳܟ ܬܰܘܕܺܝܬܳܐ ܒܝܽܘܡ ܡܰܘܠܳܕܳܟ.

ܗܘܳܐ ܢܽܘܗܪܳܐ ܐܰܝܟ ܟܳܪܽܘܙܳܐ܆ ܠܗܰܘ ܢܰܗܺܝܪܳܐ ܕܝܶܠܕܰܬ ܡܰܪܝܰܡ܆ ܗܘܳܐ ܓܶܝܪ ܒܰܛܢܶܗ ܒܙܳܟܽܘܬ ܢܽܘܗܪܳܐ܆ ܐܳܦ ܡܰܘܠܳܕܶܗ ܒܙܳܟܽܘܬ ܫܶܡܫܳܐ ܒܪܺܝܟ ܙܰܟܳܝܳܐ܀

ܡܶܢܝܳܢܳܐ ܠܰܡ ܕܥܶܣܪܳܐ ܫܰܠܡܰܐ ܗ̱ܘ܆ ܒܥܶܣܪܳܐ ܒܢܺܝܣܳܢ ܥܰܠܬ ܠܓܰܘ ܟܰܪܣܳܐ܆ ܡܶܢܝܳܢܳܐ ܕܶܝܢ ܕܶܫܬܳܐ ܓܡܺܝܪ ܗ̱ܽܘ܆ ܒܶܫܬܳܐ ܒܟܳܢܽܘܢ ܠܶܫܬܳܐ ܓܰܒܺܝ̈ܢ ܚܰܕܺܝ ܝܰܠܕܳܟ܀

ܫܡܶܗ ܕܶܝܢ ܕܝܰܘܣܶܦ ܠܳܐ ܣܳܦܶܩ ܗ̱ܘܳܐ܆ ܕܰܐܒܳܐ ܢܗܶܐ ܠܳܟ ܕܰܡܚܺܝܠܳܐ ܗ̱ܘܳܐ܆ ܫܡܳܟ ܗ̱ܽܘ ܝܰܗ̱ܒ ܠܶܗ ܝܽܘܕ ܐܳܬܽܘܬܳܐ܆ ܫܡܳܟ ܗ̱ܽܘ ܚܰܝܶܠ ܠܰܫܡܶܗ ܕܝܰܘܣܶܦ ܕܰܐܒܳܐ ܢܗܶܐ ܠܳܟ܀

ܡܰܪܝܰܡ ܒܬܽܘܠܬܳܐ ܗܳܝ ܕܰܛܥܶܢܬܳܟ܆ ܒܟܰܪܣܳܐ ܘܟܶܢܦܳܐ ܡܳܪܝܳܐ ܡܫܺܝܚܳܐ܆ ܪܺܝܫ ܐܳܬܽܘܬܶܗ ܕܰܫܡܳܟ ܪܰܒܳܐ܆ ܛܰܥܢܶܗ ܠܰܫܡܳܗ̇ ܒܰܕܡܽܘܬ ܚܰܝܠܶܗ ܛܥܺܝܢ ܒܶܪ̈ܝܳܬܳܐ܀

ܝܽܘܚܰܢܳܢ ܗܘܳܐ ܒܰܛܢܶܗ ܒܬܶܫܪܺܝܢ܆ ܕܒܶܗ ܗ̱ܽܘ ܣܳܓܶܐ ܐܳܦ ܚܶܫܽܘܟܳܐ܆ ܒܰܛܢܳܟ ܕܺܝܠܳܟ ܗܘܳܐ ܗ̱ܘܳܐ ܒܢܺܝܣܳܢ܆ ܕܡܰܡܠܶܟ ܢܽܘܗܪܳܐ ܥܰܠ ܚܶܫܽܘܟܳܐ ܘܰܡܫܰܥܒܶܕ ܠܶܗ܀

ܠܒܰܛܢܳܟ ܨܳܪ ܗ̱ܘܳܐ ܢܺܝܣܳܢ ܝܰܪܚܳܐ: ܕܩܳܥܶܐ ܕܶܐܬܳܐ ܢܽܘܗܪܳܐ ܦܰܐܝܳܐ: ܒܟܳܢܽܘܢ ܢܦܰܩܘ ܗ̱ܘܰܘ ܬܪܶܝܢ ܢܰܗܺܝܪ̈ܶܐ: ܐ̱ܰܢܬ ܡܶܢ ܟܰܪܣܳܐ ܘܰܫܡܳܟ ܥܰܡܳܟ: ܡܶܢ ܓܰܘ ܚܶܫܟܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܒܪܳܐ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀

ܥܰܠ ܥܰܬܺܝܪܳܐ ܥܰܡ ܡܶܣ̈ܟܺܢܶܐ ܠܒܰܝܬܳܐ ܫܺܐܝܠܳܐ܆ ܫܪܰܘ ܬܰܚܽܘ̈ܒܶܐ ܥܰܡ ܥܰܙܺܝܙܳܐ ܒܢܶܩܥܳܐ ܚܠܺܝܠܳܐ܆ ܒܶܪܟܰܬ ܕܬܺܐܠܰܕ ܢܶܩܝܳܐ ܒܬܽܘܠܬܳܐ ܠܓܽܘܪܝܳܐ ܕܰܐܪܝܳܐ܆ ܠܗܰܘ ܬܰܩܺܝܦܳܐ ܕܰܒܒܽܘܪ̈ܟܳܬܶܗ ܟܰܬܒܶܗ ܝܰܥܩܽܘܒ܀

ܫܽܘܒܚܳܐ ܠܰܐܒܳܐ ܕܺܝܠܶܕ ܠܰܒܪܳܐ ܕܠܳܐ ܫܽܘܪܳܝܳܐ܆ ܘܣܶܓܕܬܳܐ ܠܰܒܪܳܐ ܕܝܶܠܕܰܬ ܡܰܪܝܰܡ ܕܠܳܐ ܫܽܘܠܳܡܳܐ܆ ܬܰܘܕܺܝ ܠܪܽܘܚܳܐ ܕܰܫܘܶܐ ܠܰܐܒܳܐ ܘܠܰܒܪܳܐ ܕܡܶܢܶܗ܆ ܬܠܺܝܬܳܝܽܘܬܳܐ ܚܰܕ ܐܰܠܳܗܳܐ ܠܶܗ ܬܶܫܒܽܘܚܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀