ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ
ܐܰܠܳܗܳܐ ܕܚܳܣ ܥܰܠ ܢܺܝܢܘܶܐ ܚܽܘܣ ܥܠܰܝܢ (ܣܳܠܶܩ܆ ܒܡܰܪܝܰܡ ܝܳܠܕܰܬ ܐܰܠܳܗܳܐ)

ܐܰܢ̱ܬ ܛܰܠܝܳܐ ܢܒܺܝܶܗ ܕܥܶܠܳܝܳܐ ܬܶܬܩܪܶܐ܆ ܐܳܦ ܐܺܝܙܓܰܕܶܗ ܢܰܨܺܝܚܳܐ ܒܚܽܘܪܒܳܐ ܬܶܗܘܶܐ܆ ܬܰܦܢܶܐ ܠܶܒܳܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ܆ ܘܰܫܒܺܝܠܳܐ ܬܪܺܝܨܳܐ ܬܚܰܘܶܐ ܠܰܒܢܰܝ̈ܢܳܫܳܐ܀

ܫܽܘܒܚܳܐ

ܥܩܰܪܬܳܐ ܕܝܶܠܕܰܬ ܟܳܪܽܘܙܳܐ ܩܽܘܡܝ ܫܰܒܰܚܝ܆ ܕܰܒܪܶܟܝ ܐܺܝܬܰܘܗ̱ܝ ܐܺܝܙܓܰܕܶܗ ܕܒܰܪ ܐܰܠܳܗܳܐ܆ ܕܩܳܥܶܐ ܘܡܰܟܪܶܙ ܒܓܰܘ ܚܽܘܪܒܳܐ ܕܳܐܬܶܐ ܠܶܗ܆ ܐܶܡܪܶܗ ܚܰܝܳܐ ܕܰܐܠܳܗܳܐ ܕܢܶܦܪܽܘܩ ܥܳܠ̈ܡܶܐ܀

ܡܰܕܪܳܫܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ
ܐܰܝܢܳܐ ܕܪܳܚܶܡ ܝܽܘܠܦܳܢܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܚܰܕܺܝ ܠܰܥܩܰܪܬܳܐ܆ ܒܡܰܘܠܳܕܶܗ ܕܟܳܪܽܘܙܳܐ ܕܩܽܘܫܬܳܐ.

ܡܛܳܐ ܗ̱ܘܳܐ ܙܰܒܢܳܐ ܕܶܐܠܺܝܫܒܰܥ܆ ܬܺܐܠܰܕ ܗ̱ܘܳܬ ܠܟܳܪܽܘܙܳܐ ܕܒܶܛܢܰܬ܆ ܝܺܗܽܘܕ ܐܶܬܦܰܨܚܰܬ܆ ܘܰܪܘܰܙܘ ܠܶܘܳܝ̈ܶܐ܆ ܘܰܙܡܰܪܘ ܫܽܘܒܚܳܐ ܟܰܕ ܡܰܘܕܶܝܢ܆ ܒܪܺܝܟ ܡܳܪܝܳܐ ܕܰܣܥܰܪ ܥܰܡܶܗ܀

ܢܽܘܪܳܢܳܐ ܪܫܰܡ ܒܰܣܒܰܪܬܶܗ܆ ܕܝܽܘܚܰܢܳܢ ܝܳܠܕܳܐ ܐܶܠܺܝܫܒܰܥ܆ ܘܒܶܗ ܒܰܫܡܳܐ ܗܳܢܳܐ܆ ܢܶܬܩܪܶܐ ܟܳܪܽܘܙܳܐ܆ ܕܨܶܒܝܳܢ ܡܳܪܶܗ ܢܶܫܬܰܡܠܶܐ܆ ܕܒܰܚܢܳܢܶܗ ܚܰܕܺܝ ܠܰܐܒܳܗܰܘ̈ܗ̱ܝ܀

ܥܺܝܪܳܐ ܒܰܕܶܩ ܥܰܠ ܝܰܠܕܶܗ܆ ܘܡܰܘܠܳܕܶܗ ܘܬܰܪܒܺܝܬܳܗ̇ ܕܩܰܘܡܬܶܗ܆ ܫܠܰܘ ܠܟܽܘܢ ܥܶܒܪ̈ܳܝܶܐ܆ ܥܒܰܪ̈ܝ ܥܰܬܺܝ̈ܩܳܬܳܐ܆ ܘܰܐܡܠܶܟ ܙܰܒܢܳܐ ܕܚܰܕ̱̈ܬܳܬܳܐ܆ ܕܦܽܘܪܩܳܢܳܐ ܢܶܫܬܰܟܰܢ ܒܥܳܠܡܳܐ܀

ܨܳܪܶܗ ܠܛܰܠܝܳܐ ܐܰܝܟ ܟܰܘܟܒܳܐ܆ ܘܠܺܝܚܺܝܕܳܐ ܐܰܝܟ ܢܽܘܗܪܳܐ ܡܫܰܒܚܳܐ܆ ܛܳܒ ܫܰܦܺܝܪܳܐ ܗ̱ܘܳܬ܆ ܨܽܘܪܬܳܐ ܕܶܐܬܓܰܡܪܰܰܬ܆ ܕܺܐܝܙܓܰܕܳܐ ܗܘܳܐ ܝܽܘܚܰܢܳܢ܆ ܩܕܳܡ ܢܽܘܗܪܳܐ ܕܶܐܬܳܐ ܠܶܗ ܠܥܳܠܡܳܐ܀

ܪܽܘܚܳܐ ܪܰܒܝܶܗ ܠܝܰܠܽܘܕܳܐ܆ ܘܰܐܝܟ ܫܶܒܠܳܐ ܕܒܽܘܪ̈ܟܳܬܳܐ ܫܘܰܚ ܣܠܶܩ܆ ܘܰܐܙܺܝܥ ܒܦܶܬܓܳܡܰܘ̈ܗ̱ܝ܆ ܠܥܰܡ̱̈ܡܶܐ ܘܰܠܡܰܠ̈ܟܶܐ܆ ܕܡܶܠܬܶܗ ܣܰܝܦܳܐ ܛܥܺܝܢܳܐ ܗ̱ܘܳܬ܆ ܕܢܰܟܶܣ ܗ̱ܘܳܐ ܠܙܰܠܺܝ̈ܠܶܐ ܕܡܰܣܟܠܺܝܢ܀

ܬܗܰܪܘ ܗ̱ܘܰܘ ܟܶܢ̈ܫܶܐ ܕܡܰܠܰܐܟ̈ܶܐ܆ ܘܠܰܚܙܳܬܶܗ ܛܳܒ ܐܶܬܪܰܓܪܰܓܘ ܗ̱ܘܰܘ܆ ܘܡܳܪܶܗ ܟܬܰܒ ܥܠܰܘܗ̱ܝ܆ ܕܒܺܝܠܺܝ̈ܕܰܝ ܢܶܫ̈ܶܐ܆ ܠܳܐ ܩܳܡ ܕܕܳܡܶܐ ܠܝܽܘܚܰܢܳܢ܆ ܘܡܰܢܽܘ ܟܰܝ ܣܳܦܶܩ ܕܢܺܐܡܪܺܝܘܗ̱ܝ܀

ܚܕܺܝ ܗ̱ܘܳܐ ܙܟܰܪܝܳܐ ܒܝܰܠܽܘܕܳܐ܆ ܘܶܐܠܺܝܫܒܰܥ ܪܳܘܙܳܐ ܘܰܡܫܰܒܚܳܐ܆ ܥܺܕܬܳܐ ܡܗܰܝܡܰܢܬܳܐ܆ ܠܕܽܘܟܪܳܢܶܗ ܡܩܰܠܣܳܐ܆ ܘܫܳܐܠܳܐ ܪ̈ܰܚܡܶܐ ܒܝܽܘܡ ܥܺܐܕܶܗ܆ ܡܶܢ ܡܳܪܳܐ ܕܰܒܓܰܘܳܗ̇ ܢܰܨܒܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܠܳܗܳܐ ܕܰܪܚܶܡܬܽܘܢܳܝܗ̱ܝ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܐܘܪܶܒ ܕܽܘܟܪܳܢܳܟ܆ ܝܽܘܚܰܢܳܢ ܟܳܪܽܘܙ ܩܽܘܫܬܳܐ.

ܡܒܰܕܩܳܢܳܐ ܕܰܣܬܺܝܪ̈ܳܬܳܐ܆ ܡܚܰܘܝܳܢܳܐ ܕܰܓ̈ܢܺܝܙܳܬܳܐ܆ ܡܰܠܦܳܢܳܐ ܕܫܰܪܺܝܪ̈ܳܬܳܐ܆ ܡܠܶܐ ܚܽܘܒܳܐ ܘܩܰܕܺܝܫܽܘܬܳܐ܆ ܘܰܡܨܰܒܰܬ ܒܰܟܢܺܝܟܽܘܬܳܐ܀

ܐܺܝܙܓܰܕܳܐ ܘܡܰܥܡܶܕ ܡܳܪܶܗ܆ ܘܡܰܪܓܳܐ ܡܠܶܐ ܟܽܠ ܒܽܘ̈ܣܳܡܺܝܢ܆ ܟܶܢܫܳܐ ܕܙܰܝܰܚ ܕܽܘܟܪܳܢܳܟ܆ ܒܰܨܠܰܘ̈ܳܬܳܟ ܘܒܳܥ̈ܘܳܬܳܟ܆ ܢܶܣܰܒ ܪ̈ܰܚܡܶܐ ܘܫܽܘܒܩܳܢܳܐ܀

ܒܝܽܘܡ ܥܺܐܕܳܟ ܡܳܪܝ ܝܽܘܚܰܢܳܢ܆ ܒܥܺܝ ܚܠܳܦ ܟܽܠܗܽܘܢ ܡܝܰܩܪ̈ܳܢܰܝܟ܆ ܕܢܶܫܬܘܶܐ ܠܫܽܘܒܩܳܢܳܐ ܕܚܰܘ̈ܒܶܐ܆ ܟܶܢܫܳܐ ܕܙܰܝܰܚ ܥܰܕܥܺܐܕܳܟ܆ ܘܢܺܐܬܶܐ ܠܰܢ ܚܢܳܢܳܐ ܘܪ̈ܰܚܡܶܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܝܽܘܠܦܳܢܳܐ ܣܰܘܩܳܐ ܕܐ̱ܢܳܫ̈ܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܟܳܪܽܘܙ ܩܽܘܫܬܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܪܳܡܺܝܢ ܫܽܘܦܪ̈ܰܝܟ ܡܶܢ ܠܶܫܳܢܝ܆ ܡܳܟܽܘܪܳܗ̇ ܕܥܺܕܰܬ ܩܽܘܕܫܳܐ܆ ܪܳܚܡܶܗ ܕܚܰܬܢܳܐ ܫܡܰܝܳܢܳܐ܆ ܒܬܽܘܠܳܐ ܙܰܗܝܳܐ ܝܽܘܚܰܢܳܢ܆ ܐܺܝܙܓܰܕܳܐ ܙܳܪܰܥ ܫܰܝܢܳܐ܆ ܘܰܫܠܳܡܳܐ ܒܥܺܕܬܶܗ ܕܰܒܪܳܐ܆ ܨܠܽܘܬܳܟ ܬܶܗܘܶܐ ܣܶܬܳܪܳܐ܆ ܠܟܶܢܫܳܐ ܕܙܰܝܰܚ ܕܽܘܟܪܳܢܳܟ܀

ܚܰܕܽܘܬܳܐ ܘܕܰܘܨܳܐ ܪܰܒܳܐ܆ ܗܘܳܐ ܠܳܗ̇ ܠܥܺܕܬܳܐ ܒܕܽܘܟܪܳܢܳܟ܆ ܕܢܽܘܗܪܳܐ ܐܰܟܪܶܙܬ ܒܓܰܘ ܬܺܒܶܝܠ܆ ܘܚܰܝ̈ܶܐ ܠܳܐ ܡܳܝܽܘܬܽܘܬܳܐ܆ ܒܥܺܝ ܗܳܟܺܝܠ ܐܳܘ ܝܽܘܚܰܢܳܢ܆ ܚܠܳܦ ܟܶܢܫܳܐ ܕܙܰܝܰܚ ܥܺܐܕܳܟ܆ ܕܢܺܐܬܶܐ ܠܶܗ ܡܶܢ ܨܶܝܕ ܡܳܪܳܟ܆ ܚܢܳܢܳܐ ܘܪ̈ܰܚܡܶܐ ܘܫܽܘܒܩܳܢܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܟܳܪܽܘܙ ܩܽܘܫܬܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀