ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܒܪܺܝܟܽ ܗ̱ܘ ܕܰܓܒܳܝܗ̱ܝ ܡܶܢ ܟܰܪܣܳܐ: ܠܝܽܘܚܰܢܳܢ ܒܰܪ ܥܰܩܪܽܘܬܳܐ: ܘܚܰܕܺܝ ܠܠܶܒܳܐ ܕܰܐܒܳܗܰܘ̈ܗ̱ܝ: ܘܝܰܗ̱ܒ ܠܗܽܘܢ ܐܳܦ ܣܽܘܟܳܝܗܽܘܢ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܝܰܘܡܳܢܳܐ ܗܘܳܐ ܟܳܪܽܘܙܳܐ܆ ܠܶܐܠܺܝܫܒܰܥ ܒܛܽܘܪܳܐ ܕܺܝܗܽܘܕ܆ ܘܰܐܘܕܝܰܬ ܘܫܰܒܚܰܬ ܠܰܐܠܳܗܳܐ܆ ܕܰܐܥܒܰܪ ܚܶܣܕܳܐ ܕܥܰܩܪܽܘܬܳܗ̇܆. ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܝܽܘܡ ܡܰܘܠܳܕܶܗ ܕܺܐܝܙܓܰܕܳܐ: ܝܽܘܚܰܢܳܢ ܒܰܪ ܥܰܩܪܽܘܬܳܐ: ܚܳܕܝܳܐ ܥܺܕܬܳܐ ܥܰܡ ܝܰܠ̈ܕܶܝܗ̇: ܘܙܳܡܪܳܐ ܫܽܘܒܚܳܐ ܠܗܰܘ ܕܰܓܒܳܝܗ̱ܝ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܗܳܢܳܐ ܝܰܘܡܳܐ ܐܶܬܺܝܠܶܕ܆ ܝܽܘܚܰܢܳܢ ܟܳܪܽܘܙ ܩܽܘܫܬܳܐ܆ ܕܢܰܬܩܶܢ ܐܽܘܪܚܳܐ ܩܕܳܡ ܡܳܪܶܗ܆ ܕܶܐܬܳܐ ܕܢܶܦܪܽܘܩ ܒܶܪ̈ܝܳܬܳܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܡܰܘܠܳܕܶܗ ܕܟܳܪܽܘܙ ܩܽܘܫܬܳܐ܆ ܫܶܠܡܰܬ ܡܶܠܬܶܗ ܕܶܐܫܰܥܝܳܐ܆ ܗܳܐ ܕܢܰܚ ܩܳܠܳܐ ܐܰܝܟ ܕܶܐܡܰܪ܆ ܕܰܢܫܰܝܶܢ ܠܡܰܕܒܪܳܐ ܚܽܘܪܒܳܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܦܺܐܪܳܐ ܪܓܺܝܓܳܐ ܝܶܗܒܰܬ ܗ̱ܘܳܬ܆ ܥܩܰܪܬܳܐ ܕܝܶܠܕܰܬ ܠܝܽܘܚܰܢܳܢ܆ ܕܰܒܣܰܬܳܐ ܕܥܶܬܩܰܬ ܗܰܒܶܒ܆ ܘܰܗܘܳܐ ܣܓܽܘܠܳܐ ܡܰܠܳܠܳܐ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܒܝܽܘܡ ܝܰܠܕܶܗ ܕܟܳܪܽܘܙ ܩܽܘܫܬܳܐ܆ ܢܶܙܡܰܪ ܫܽܘܒܚܳܐ ܠܗܰܘ ܕܰܓܒܳܝܗ̱ܝ܆ ܕܟܰܕ ܗܽܘ ܒܓܰܘ ܟܰܪܣܳܐ ܕܶܐܡܶܗ܆ ܩܰܕܫܶܗ ܘܥܰܒܕܶܗ ܟܳܪܽܘܙܳܐ. ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܗܰܒܠܳܗ̇ ܠܥܺܕܬܳܟ
ܫܽܘܒܚܳܐ ܠܗܰܘ ܕܛܳܥܶܢ. ܘܰܡܣܰܝܒܰܪ

ܗܰܒ ܠܰܢ ܦܳܪܽܘܩܰܢ܆ ܕܢܶܙܡܰܪ ܫܽܘܒܚܳܐ ܘܬܰܘܕܺܝܬܳܐ܆ ܒܝܽܘܡ ܡܰܘܠܳܕܶܗ܆ ܕܟܳܪܽܘܙܳܐ ܡܫܰܒܚܳܐ܆ ܘܰܐܥܒܰܪ ܡܶܢ ܐܰܪܥܳܐ܆ ܚܰܪܒܳܐ ܘܫܶܒܝܳܐ ܘܡܰܘܬܳܢܳܐ܆ ܘܰܐܫܪܳܐ ܫܰܝܢܳܟ܆ ܒܰܐܪܒܰܥ ܦܶܢ̈ܝܳܬܳܐ܀

ܫܽܘܒܚܳܐ

ܫܽܘܒܚܳܐ ܘܬܰܘܕܺܝܬܳܐ܆ ܙܡܰܪ ܗ̱ܘܳܐ ܙܟܰܪܝܳܐ ܝܰܘܡܳܢܳܐ܆ ܠܡܳܪܳܐ ܕܟܽܠܳܐ܆ ܕܚܰܕܝܶܗ ܒܣܽܘܟܳܝܶܗ܆ ܘܝܰܗ̱ܒܠܶܗ ܟܳܪܽܘܙܳܐ܆ ܕܢܰܦܢܶܐ ܠܥܰܡ̱̈ܡܶܐ ܘܠܶܐܡ̈ܘܳܬܳܐ܆ ܡܶܢ ܛܳܥܝܽܘܬܳܐ܆ ܠܽܐܘܪܚܳܐ ܕܰܫܪܳܪܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ
ܡܶܢ ܓܽܘܒܳܐ ܕܕܽܘܘܳܢܳܐ

ܝܽܘܚܰܢܳܢ ܒܰܪ ܥܰܩܪܽܘܬܳܐ: ܡܶܢ ܐܶܠܺܝܫܒܰܥ ܐܶܬܺܝܠܶܕ: ܘܰܙܟܰܪܝܳܐ ܐܰܒܽܘܗ̱ܝ ܡܰܠܶܠ ܘܒܰܕܶܩ ܟܰܣ̈ܝܳܬܳܐ: ܫܽܘܒܚܳܐ ܠܶܗ ܠܺܝܚܺܝܕܳܝܳܐ: ܕܰܡܠܳܝܗ̱ܝ ܪܽܘܚܳܐ ܘܓܶܠ̈ܝܳܢܶܐ ܘܫܰܕܪܶܗ ܩܽܘܕܡܰܘܗ̱ܝ ܕܢܰܫܰܦܶܐ: ܐܽܘܪܚܳܐ ܠܡܰܠܟܽܘܬܳܐ܀

ܫܽܘܒܚܳܐ

ܒܛܽܘܪܳܐ ܕܺܝܗܽܘܕ ܬܶܕܡܽܘܪܬܳܐ: ܘܒܶܝܬ ܠܶܘܳܝ̈ܶܐ ܬܳܘܕܺܝܬܳܐ: ܕܶܐܬܺܝܠܶܕ ܠܗܽܘܢ ܟܳܪܽܘܙܳܐ ܘܺܐܝܙܓܰܕܶܗ ܕܰܒܪܳܐ: ܘܰܫܪܳܐ ܫܶܬܩܳܐ ܕܝܳܠܽܘܕܶܗ: ܕܰܐܣܪܶܗ ܥܺܝܪܳܐ ܕܠܳܐ ܗܰܝܡܶܢ: ܘܰܐܘܕܺܝ ܒܪܽܘܚܳܐ ܠܰܐܠܳܗܳܐ: ܘܰܙܡܰܪ ܠܶܗ ܫܽܘܒܚܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ܆ ܕܢܰܨܰܚ ܘܰܐܘܪܶܒ ܝܽܘܡ ܕܽܘܟܪܳܢܳܟ.

ܫܪܳܓܳܐ ܕܢܳܗܰܪ܆ ܩܽܘܕܡܰܬ ܫܶܡܫܳܐ ܕܙܰܕܺܝܩܽܘܬܳܐ܆ ܩܳܠܳܐ ܕܪܳܗܶܛ ܩܽܘܕܡܰܬ ܡܶܠܬܳܐ܆ ܘܡܰܬܩܶܢ ܐܽܘܪܚܳܐ ܠܡܰܠܟܳܐ ܡܳܪܶܗ܆ ܘܰܒܟܽܠ ܫܽܘܦܪ̈ܺܝܢ܆ ܕܙܰܕܺܝܩܽܘܬܳܐ ܓܐܶܐ ܘܰܡܨܰܒܰܬ܀

ܢܰܘܣܳܐ ܕܰܟܝܳܐ܆ ܕܠܳܐ ܐܶܬܟܰܬܰܡ ܒܰܪ̈ܓܺܝܓܳܬܳܐ܆ ܘܢܰܦܫܳܐ ܕܪܳܘܙܳܐ ܒܩܰܕܺܝܫܽܘܬܳܐ܆ ܘܦܰܓܪܳܐ ܡܨܰܒܰܬ ܒܰܐܒܺܝܠܽܘܬܳܐ܆ ܘܥܰܡ ܩܰܕܺܝ̈ܫܶܐ܆ ܣܺܝܡܳܐ ܦܶܨܬܶܗ ܒܰܣܦܰܪ ܚܰܝ̈ܶܐ܀

ܒܬܽܘܠܳܐ ܙܰܗܝܳܐ܆ ܟܳܪܽܘܙ ܩܽܘܫܬܳܐ ܡܳܪܝ ܝܽܘܚܰܢܳܢ܆ ܒܥܺܝ ܡܶܢ ܡܳܪܳܟ ܗܰܘ ܕܰܐܥܡܶܕܬܳܝܗ̱ܝ܆ ܘܣܳܡܬ ܝܰܡܺܝܢܳܟ ܠܥܶܠ ܡܶܢ ܪܺܝܫܶܗ܆ ܕܢܰܥܒܰܪ ܡܶܢܰܢ܆ ܟܽܠ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܟܰܠܰܬ ܡܰܠܟܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܚܰܕܺܝ ܠܥܰܩܪ̈ܶܐ܆ ܒܝܽܘܡ ܡܰܘܠܳܕܶܗ ܕܟܳܪܽܘܙ ܩܽܘܫܬܳܐ.

ܚܰܕܘܳܐ ܪܰܒܳܐ ܗܘܳܐ ܗ̱ܘܳܐ܆ ܒܶܝܬ ܠܶܘܳܝ̈ܶܐ ܘܒܺܝܗܽܘܕ ܟܽܠܳܗ̇܆ ܕܰܒܡܰܘܠܳܕܶܗ ܕܛܰܠܝܳܐ܆ ܟܳܪܽܘܙ ܩܽܘܫܬܳܐ ܒܰܪ ܥܰܩܪܽܘܬܳܐ܆ ܥܩܰܪܬܳܐ ܕܳܝܨܳܐ܆ ܒܦܺܐܪܳܐ ܕܝܶܠܕܰܬ܆ ܙܟܰܪܝܳܐ ܡܰܘܕܶܐ܆ ܕܶܐܬܦܬܰܚ ܦܽܘܡܶܗ܆ ܘܰܒܪܽܘܚܳܐ ܘܩܽܘܕܫܳܐ܆ ܠܰܒܪܶܗ ܡܢܰܨܰܪ ܗ̱ܘܳܐ܆ ܕܰܢܒܺܝܶܗ ܕܡܳܪܝܳܐ܆ ܢܗܶܐ ܛܰܠܝܳܐ܀

ܒܗܳܢܳܐ ܝܰܘܡܳܐ ܬܶܚܕܶܐ܆ ܥܺܕܰܬ ܩܽܘܕܫܳܐ ܘܟܽܠܗܽܘܢ ܝܰܠ̈ܕܶܝܗ̇܆ ܘܩܳܠܰܝ̈ ܫܽܘܒܚܳܐ ܬܰܣܶܩ܆ ܠܡܰܠܟܳܐ ܡܫܺܝܚܳܐ ܒܪܳܐ ܕܰܐܠܳܗܳܐ܆ ܕܫܰܕܰܪ ܩܽܘܕܡܰܘܗ̱ܝ ܟܳܪܽܘܙ ܩܽܘܫܬܳܐ܆ ܕܢܰܟܪܶܙ ܠܰܐܪܥܳܐ. ܥܰܠ ܡܶܐܬܺܝܬܶܗ܆ ܕܬܽܘܒܽܘܢ ܚܰܛܳܝ̈ܶܐ܆ ܘܰܦܢܰܘ ܡܶܢ ܛܽܘܥܝܰܝ܆ ܕܗܳܐ ܒܳܬܰܪ ܐܳܬܶܐ܆ ܡܚܰܣܝܳܢܟܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܦܰܪܕܰܝܣܳܐ
ܬܠܳܬܳܐ ܙܩܺܝ̈ܦܶܐ ܚܙܺܝܬ ܕܚܰܕ ܠܚܰܕ

ܥܽܘܢܺܝܬܳܐ: ܕܽܘܟܪܳܢ ܟܳܪܽܘܙܳܐ ܢܶܗܘܶܐ ܠܒܽܘܪ̈ܟܳܬܰܢ܆ ܘܰܨܠܽܘܬܶܗ ܬܶܗܘܶܐ ܫܽܘܪܳܐ ܠܢܰܦ̈ܫܳܬܰܢ.

ܐܰܚܰܝ̈ ܨܠܰܘ ܐܶܕܢܳܐ܆ ܘܰܫܡܰܥܘ ܒܦܽܘܪܫܳܢܳܐ܆ ܫܰܪܒܶܗ ܕܝܽܘܚܰܢܳܢ܆ ܩܠܺܝܕܳܐ ܕܥܰܩܪܽܘܬܳܐ܆ ܬܰܪ̈ܥܶܐ ܬܪܶܝܢ ܦܬܰܚ ܗ̱ܘܳܐ܆ ܒܝܰܠܕܶܗ ܝܽܘܚܰܢܳܢ܆ ܠܶܫܳܢܶܗ ܕܰܐܒܽܘܗ̱ܝ ܘܡܰܪ݉ܒܥܳܐ܆ ܥܺܝܪܳܐ ܒܠܰܡ ܦܽܘܡܶܗ܆ ܘܠܳܐ ܐ̱ܢܳܫ ܫܪܳܐ ܫܶܬܩܶܗ܆ ܥܕܰܡܳܐ ܕܝܽܘܚܰܢܳܢ. ܢܦܰܩ ܫܪܳܝܗ̱ܝ ܒܡܰܘܠܳܕܶܗ܀

ܓܢܽܘܢܳܐ ܗܘܳܬ ܟܰܪܣܳܗ̇܆ ܕܶܐܠܺܝܫܒܰܥ ܐܶܡܳܟ܆ ܘܕܰܝܶܨܬ ܒܓܰܘ ܥܽܘܒܳܗ̇܆ ܕܝܳܨܳܐ ܕܢܰܟܦܽܘܬܳܐ܆ ܕܰܦܣܰܥܬ ܘܰܥܒܰܪܬ ܠܳܟ܆ ܬܚܽܘܡܳܐ ܕܟܽܠ ܥܽܘ̈ܠܺܝܢ܆ ܕܬܶܦܽܘܩ ܩܕܳܡ ܝܰܪܚܳܐ ܕܣܺܝܡ ܠܳܟ݉܆ ܒܪܺܝܟܽ ܗ̱ܘ ܕܚܰܘܺܝ ܠܳܟ܆ ܢܰܦܫܶܗ ܒܓܰܘ ܟܰܪܣܳܐ܆ ܘܰܗܦܰܟ ܥܡܰܕ ܡܶܢܳܟ. ܒܓܰܘ ܝܽܘܪܕܢܳܢ ܢܰܗܪܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܩܽܘܡ ܦܰܘܠܳܘܣ ܐܰܪܕܺܝܟܠܳܐ ܕܥܺܕܬܳܐ

ܥܽܘܢܺܝܬܳܐ: ܒܪܺܝܟ ܕܰܐܘܪܶܒ ܝܰܘܡܳܐ ܕܕܽܘܟܪܳܢܶܗ܆ ܟܳܪܽܘܙܳܐ ܕܩܽܘܫܬܳܐ ܝܽܘܚܰܢܳܢ.

ܐܳܘ ܦܺܐܪܳܐ ܒܪܺܝܟܳܐ ܕܥܰܩܪܽܘܬܳܐ܆ ܒܪܺܝܟ ܕܙܰܡܢܰܢܝ ܘܰܩܪܳܢܝ ܠܝܽܘܡ ܥܺܐܕܳܟ܆ ܒܓܰܘ ܟܰܪܣܳܐ ܒܟܶܣܝܳܐ ܡܕܰܝܶܨ ܗ̱ܘܰܝܬ܆ ܩܕܳܡ ܡܳܪܳܟ ܕܶܐܬܳܐ ܠܓܰܠܝܽܘܬܳܐ܆ ܓܙܰܡ ܒܺܝܫܳܐ ܢܟܺܝܠܳܐ܆ ܕܰܢܣܺܝܡ ܒܳܟ ܡܽܘܡܳܐ܆ ܘܰܐܝܟ ܡܳܪܳܟ ܙܟܰܝܬܳܝܗ̱ܝ܆ ܠܢܶܟܠܶܗ ܒܓܰܘ ܕܰܒܪܳܐ܆ ܕܢܰܚ ܢܽܘܗܪܳܟ ܘܦܰܪܣܺܝ ܓܠܺܝ̈ܠܳܝܶܐ܆ ܪܥܶܡ ܩܳܠܳܟ ܘܰܐܦܢܺܝ ܠܚܰܛܳܝ̈ܶܐ܀

ܗܳܐ ܠܡܳܪܳܟ ܐܰܟܪܶܙܬ ܒܶܝܬ ܚܰܝ̈ܶܐ܆ ܘܰܩܕܳܡܰܘܗ̱ܝ ܣܰܒܰܪܬ ܒܶܝܬ ܡܺܝ̈ܬܶܐ܆ ܪܗܶܛܬ ܣܰܒܰܪܬ ܠܥܽܘ̈ܠܶܐ ܒܓܰܘ ܟܰܪܣܳܐ܆ ܪܗܶܛܬ ܐܰܟܪܶܙܬ ܠܡܺܝ̈ܬܶܐ ܒܓܰܘ ܩܰܒܪ̈ܶܐ܆ ܘܰܫܡܰܥܘ ܓܶܝܪ ܩܳܠܳܟ܆ ܡܺܝ̈ܬܶܐ ܒܓܰܘ ܩܰܒܪ̈ܶܐ܆ ܘܰܠܡܳܪܝܳܐ ܡܳܪܳܟ܆ ܫܰܒܰܚܘ ܒܚܰܕ ܩܳܠܳܐ܆ ܬܰܘܕܺܝܬܳܐ ܠܡܳܪܳܟ ܡܶܢ ܟܽܠܳܐ܆ ܕܗܽܘ ܐܰܘܪܶܒ ܝܰܘܡܳܐ ܕܕܽܘܟܪܳܢܳܟ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܛܦܰܢܝ ܪܰܡܫܳܐ ܘܰܒܡܰܛܰܪܬܶܗ ܕܠܺܠܝܳܐ

ܨܠܽܘܬܳܟ ܥܰܡܰܢ ܟܳܪܽܘܙ ܩܽܘܫܬܳܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܙܰܩܬܽܘܢܝ ܚܶܒ̈ܠܶܐ ܘܥܳܦܶܬ ܢܶܦܠܶܬ ܒܥܰܪܣܳܐ ܕܟܺܐܒ̈ܶܐ܆ ܘܶܐܠܳܐ ܫܰܢܺܝܬܝ ܕܢܺܐܬܶܐ ܠܝܰܠܕܳܐ ܦܽܘܪܣܳܐ ܠܳܐ ܐܺܝܬ܆ ܠܳܐ ܓܶܝܪ ܢܳܦܶܩ ܐܶܠܳܐ ܫܰܢܺܝ ܗܰܘ ܬܰܩܺܝܦܳܐ܆ ܕܳܐܦܠܳܐ ܦܰܐܝܳܐ ܕܡܰܠܟܳܐ ܠܡܳܐܟܳܐ ܢܶܗܘܶܐ ܡܫܰܡܶܫ܀

ܫܽܘܒܚܳܐ ܠܰܐܒܳܐ ܕܫܰܕܪܶܗ ܩܳܠܳܐ ܩܕܳܡ ܝܺܚܺܝܕܶܗ܆ ܘܣܶܓܕܬܳܐ ܠܰܒܪܳܐ ܕܰܫܪܳܐ ܒܝܰܠܕܶܗ ܥܽܘ̈ܒܶܐ ܥܰܩܪ̈ܶܐ܆ ܬܰܘܕܺܝ ܠܪܽܘܚܳܐ ܕܒܶܗ ܐܶܬܬܙܺܝܥ ܗ̱ܘܳܐ ܒܕܰܘܨܳܐ ܟܰܣܝܳܐ܆ ܩܕܳܡ ܗܰܘ ܟܰܣܝܳܐ ܕܶܐܬܳܐ ܠܓܶܠܝܳܐ ܠܶܗ ܬܶܫܒܽܘܚܬܳܐ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀