ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܗܰܘ ܒܳܪܽܘܝܳܐ. ܘܰܡܬܰܩܢܳܢܳܐ ܕܟܽܠ܆ ܐܰܝܟ ܝܰܠܽܘܕܳܐ ܒܩܽܘܪ̈ܒܳܢܶܐ ܐܶܬܛܥܶܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܫܳܪܶܐ ܠܰܐܪܥܳܐ. ܘܠܰܫܡܰܝܳܐ ܒܡܶܠܬܶܗ܆ ܫܪܺܝܗ̇ ܡܳܪܝ ܠܣܰܝܒܽܘܬܝ ܒܰܫܠܳܡܳܐ ܘܶܐܬܬܢܺܝܚ܆ ܪܰܚܶܡ ܥܠܰܝܢ ܐܰܠܳܗܳܐ܀

ܛܽܘܒܰܝܟ ܫܶܡܥܽܘܢ. ܕܥܰܠ ܐܺܝܕܰܝ̈ܟ ܛܥܶܢܬܳܝܗ̱ܝ܆ ܠܥܽܘܠܳܐ ܕܩܰܫܺܝܫ ܡܶܢ ܟܽܠܗܽܘܢ ܕܳܪ̈ܶܐ܆ ܪܰܚܶܡܥܠܰܝܢ ܐܰܠܳܗܳܐ܀

ܗܰܘ ܕܰܠܫܶܡܥܽܘܢ. ܕܥܰܠ ܕܪ̈ܳܥܰܘܗ̱ܝ ܙܰܝܚܳܟ܆ ܪܫܰܡܬ ܕܽܘܟܪܳܢܶܗ ܒܰܫܡܰܝܳܐ ܘܒܰܐܪܥܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐܳܡܰܪ ܫܶܡܥܽܘܢ. ܒܒܳܥܽܘ ܚܰܢܳܢܳܐ܆ ܫܪܺܝܗ̇ ܡܳܪܝ ܠܣܰܝܒܽܘܬܝ ܕܢܽܘܓܪܳܐ ܣܰܟܺܝܬ ܠܳܟ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܨܠܺܝ ܡܳܪܝܳܐ ܒܪ̈ܰܚܡܶܐ

ܗܰܘ ܕܒܰܬܪܽܘܢܽܘܣ ܥܰܡ ܐܰܒܽܘܗ̱ܝ܆ ܥܰܠ ܡܰܪܟܰܒܬܳܐ ܡܶܬܓܰܐܶܐ܆ ܫܶܡܥܽܘܢ ܣܳܒܳܐ ܒܓܰܘ ܗܰܝܟܠܳܐ܆ ܥܰܠ ܐܰܝܕܰܘ̈ܗ̱ܝ ܙܰܝܰܚ ܛܰܥܢܶܗ܀

ܥܰܠ ܕܪ̈ܳܥܰܘܗ̱ܝ ܛܰܥܢܶܗ ܫܶܡܥܽܘܢ܆ ܠܥܽܘܠܳܐ ܕܩܰܫܺܝܫ ܡܶܢ ܕܳܪ̈ܶܐ܆ ܘܶܐܡܰܪ ܠܶܗ ܕܰܫܪܺܝܢܝ ܡܶܟܺܝܠ܆ ܕܗܳܐ ܚܙܰܝ̈ ܥܰܝ̈ܢܰܝ ܠܰܚܢܳܢܳܟ܀

ܬܳܐ ܒܰܫܠܳܡ ܕܳܡܶܐ ܠܰܐܒܽܘܗ̱ܝ܆ ܫܽܘܒܚܳܐ ܠܳܟ ܘܰܠܫܳܠܽܘܚܳܟ܆ ܕܰܠܦܽܘܪܩܳܢܰܢ ܐܶܬܬܰܚܬܺܝܬ܆ ܘܡܰܢܽܘ ܣܳܦܶܩ ܕܢܰܘܕܶܐ ܠܳܟ܀

ܫܪܺܝܢܝ ܒܰܫܠܳܡܳܐ ܩܳܥܶܐ ܗ̱ܘܳܐ܆ ܫܶܡܥܽܘܢ ܣܳܒܳܐ ܠܰܡܫܺܝܚܳܐ܆ ܕܺܐܙܰܠ ܐܰܟܪܶܙ ܠܰܩܒܺܝܪ̈ܶܐ܆ ܕܗܳܐ ܡܰܛܺܝ ܠܶܗ ܡܢܰܚܡܳܢܟܽܘܢ܀

ܟܪܽܘܒܳܐ ܕܒܶܣܪܳܐ ܗܘܳܐ ܫܶܡܥܽܘܢ܆ ܘܰܐܝܟ ܕܰܒ̈ܓܶܦܶܐ ܒܰܕܪ̈ܳܥܰܘܗ̱ܝ܆ ܡܙܰܝܰܚ ܗ̱ܘܳܐ ܠܶܗ ܠܰܡܫܺܝܚܳܐ܆ ܕܰܗܘܳܐ ܥܽܘܠܳܐ ܒܨܶܒܝܳܢܶܗ܀

ܫܽܘܒܚܳܐ

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ܆ ܕܶܐܬܬܰܚܬܺܝ ܘܰܗܘܳܐ ܥܽܘܠܳܐ܆ ܘܰܠܟܳܗܢܳܐ ܡܶܬܩܰܪܰܒ ܗ̱ܘܳܐ܆ ܐܰܝܟ ܕܰܢܫܰܡܠܶܐ ܢܳܡܽܘܣܳܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܬܰܘ ܢܥܰܕܥܶܕ ܕܽܘܟܪ̈ܳܢܰܝܗܽܘܢ

ܥܰܠ ܕܪ̈ܳܥܰܘܗ̱ܝ ܛܰܥܢܶܗ ܫܶܡܥܽܘܢ܆ ܠܒܰܪ ܐܰܠܳܗܳܐ ܕܶܐܬܓܰܫܰܡ܆ ܒܗܰܝܟܰܠ ܩܽܘܕܫܳܐ ܟܰܕ ܩܰܪܶܒܘ܆ ܡܰܪܝܰܡ ܘܝܰܘܣܶܦ ܩܽܘܪ̈ܒܳܢܶܐ܆ ܘܰܡܦܺܝܣ ܗ̱ܘܳܐ ܠܶܗ ܟܰܕ ܐܳܡܰܪ܆ ܕܗܳܐ ܚܙܰܝ̈ ܥܰܝ̈ܢܰܝ ܠܰܚܢܳܢܳܟ ܪܰܒܳܐ܆ ܐܺܙܰܠ ܐܶܬܬܢܺܝܚ ܒܶܝܬ ܡܺܝ̈ܬܶܐ܆ ܥܰܕ ܐܳܬܶܐ ܝܽܘܡ ܢܽܘܚܳܡܳܐ܆ ܘܶܐܓ݉ܠܶܐ ܣܬܺܝܪ̈ܳܬܳܐ ܕܶܐܬܡܰܠܰܠܝ̈ ܗ̱ܘܰܝ̈ ܡܶܢ ܪܽܘܚܳܐ܆ ܥܰܠ ܝܰܠܕܳܐ ܕܠܳܐ ܙܽܘܘܳܓܳܐ ܕܰܕܢܰܚ ܒܰܐܪܥܳܐ܆ ܕܢܶܦܪܽܘܩ ܠܳܐܕܳܡ ܘܰܠܝܰܠ̈ܕܰܘܗ̱ܝ܀

ܫܽܘܒܚܳܐ

ܟܪܽܘܒܳܐ ܕܒܶܣܪܳܐ ܗܘܳܐ ܫܶܡܥܽܘܢ܆ ܘܰܣܪܳܦܳܐ ܗܘܳܐ ܒܕܽܘܒܳܪ̈ܰܘܗ̱ܝ܆ ܘܰܐܝܟ ܕܰܒ̈ܓܶܦܶܐ ܒܰܕܪ̈ܳܥܰܘܗ̱ܝ܆ ܠܡܳܪܶܐ ܟܪ̈ܽܘܒܶܐ ܡܙܰܝܰܚ ܗ̱ܘܳܐ܆ ܫܪܺܝ ܠܥܰܒܕܳܟ ܐܳܡܰܪ ܗ̱ܘܳܐ ܠܶܗ܆ ܕܰܡܦܳܣ ܗ̱ܘܳܐ ܒܶܗ ܕܗܽܘܝܽܘ ܐܰܠܳܗܳܐ܆ ܘܡܶܢ ܛܰܠܝܳܐ ܐܰܝܟ ܕܡܶܢ ܡܰܠܟܳܐ܆ ܚܪܽܘܪܳܐ ܕܡܰܘܬܳܐ ܫܳܐܶܠ ܗ̱ܘܳܐ܆ ܒܪܺܝ݉ܚܶܗ ܣܳܩ ܚܰܝ̈ܶܐ ܕܪܽܘܚܳܐ ܕܩܽܘܕܫܳܐ ܒܰܕܶܩ ܠܶܗ܆ ܕܟܳܣܳܐ ܕܡܰܘܬܳܐ ܠܳܐ ܬܶܛܥܰܡ܆ ܥܕܰܡܳܐ ܕܬܶܚܙܶܐ ܠܒܰܪ ܐܰܠܳܗܳܐ܆ ܡܳܐ ܕܕܳܢܰܚ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܩܪܳܐ ܠܗܽܘܢ ܡܳܪܰܢ ܠܰܫܠܺܝ̈ܚܰܘܗ̱ܝ

ܒܗܰܝܟܰܠ ܩܽܘܕܫܳܐ܆ ܛܰܥܢܶܗ ܫܶܡܥܽܘܢ ܠܰܡܫܺܝܚܳܐ܆ ܘܫܰܪܺܝ ܡܦܺܝܣ ܠܶܗ ܟܰܕ ܐܳܡܰܪ܆ ܕܒܳܥܶܐ ܐ̱ܢܳܐ ܫܪܺܝܢܝ ܒܰܫܠܳܡܳܐ܆ ܕܗܳܐ ܚܙܰܝ̈ ܥܰܝ̈ܢܰܝ ܠܰܚܢܳܢܳܟ܆ ܡܰܠܟܳܐ ܪܰܒܳܐ ܕܺܝܣܪܳܐܶܝܠ܆ ܕܰܐܢ̱ܬܽ ܗ̱ܘ ܣܰܒܪܳܐ ܫܰܪܺܝܪܳܐ܆ ܕܠܶܗܽ ܗ̱ܘ ܡܣܰܟ̈ܝܳܢ ܒܶܪ̈ܝܳܬܳܐ܆ ܕܰܬܚܰܕܶܬ ܨܰܠܡܶܗ ܕܳܐܕܳܡ܆ ܕܚܰܒܠܶܗ ܒܺܝܫܳܐ ܒܰܚܣܳܡܶܗ܀

ܫܽܘܒܚܳܐ

ܪܰܘܡܳܐ ܘܥܽܘܡܩܳܐ܆ ܘܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܆ ܡܠܶܝܢ ܡܶܢܳܟ ܘܰܙܥܽܘܪܺܝܢ ܠܳܟ܆ ܘܠܳܐ ܡܣܰܝܟܺܝܢ ܠܳܗ̇ ܠܪܰܒܽܘܬܳܟ܆ ܘܰܒܥܽܘܒܳܐ ܕܰܒܬܽܘܠܽܘܬܳܐ܆ ܢܚܶܬܬ ܘܰܫܪܰܝܬ ܐܰܟܡܳܐ ܕܰܨܒܰܝܬ܆ ܡܰܪܝܰܡ ܐܶܡܳܐ ܕܺܝܠܶܕܬܳܟ܆ ܠܗܰܝܟܰܠ ܩܽܘܕܫܳܐ ܐܰܣܶܩܬܳܟ܆ ܘܡܶܢ ܫܶܡܥܽܘܢ ܡܶܬܚܰܒܰܒ ܗ̱ܘܰܝܬ܆ ܘܥܰܠ ܕܪ̈ܳܥܰܘܗ̱ܝ ܡܶܙܕܰܝܰܚ ܗ̱ܘܰܝܬ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܦܶܬܓܳܡܳܐ: ܐܺܬܶܐ ܠܒܰܝܬܳܟ ܒܺܐܝܩܳܪܳܐ ܘܶܐܦܪܥܳܟ ܢܶܕܪ̈ܰܝ܆ ܡܶܕܶܡ ܕܰܦܬܰܚ̈ܝ ܣܶܦ̈ܘܳܬܝ܆ ܗܰܠܶܠܽܘܝܰܗ

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܐܳܙܺܠ̱ܝܢ ܕܳܪ̈ܶܐ ܘܳܐܬܶܝܢ ܕܳܪ̈ܶܐ

ܐܳܙܺܠ̱ܝܢ ܕܳܪ̈ܶܐ ܘܳܐܬܶܝܢ ܕܳܪ̈ܶܐ ܘܣܳܒܳܐ ܩܰܝܳܡ܆

ܒܪܺܝܟܽ ܗ̱ܘ ܕܡܰܥܒܰܪ ܠܟܽܠܗܽܘܢ ܕܳܪ̈ܶܐ ܘܗܽܘ ܠܳܐ ܥܳܒܰܪ܀

ܛܥܶܢܬܶܗ ܡܰܪܝܰܡ ܠܰܡܩܰܒܶܠ ܟܽܠ ܥܰܡ ܩܽܘܪ̈ܒܳܢܶܐ܆ ܕܰܐܝܟ ܢܳܡܽܘܣܳܐ ܬܰܝܬܶܐ ܕܶܒ̈ܚܶܐ ܠܗܰܝܟܰܠ ܩܽܘܕܫܳܐ܆ ܫܩܰܠ ܦܰܪ̈ܽܘܓܶܐ ܕܰܐܝܬܺܝ ܝܰܘܣܶܦ ܡܶܛܽܠ ܛܰܠܝܳܐ܆ ܘܰܠܒܶܝܬ ܩܽܘܕܫܳܐ ܣܠܶܩ ܕܰܢܩܰܪܶܒ ܐܰܝܟ ܢܳܡܽܘܣܳܐ܀

ܚܙܳܗ̇ ܠܰܒܬܽܘܠܬܳܐ ܕܰܛܥܺܝܢܳܐ ܠܶܗ ܘܰܦܟܰܪ ܐܺܝܕܰܘ̈ܗ̱ܝ܆ ܣܓܶܕ ܒܰܪܬܺܝܬܳܐ ܘܩܰܒܠܶܗ ܡܶܢܳܗ̇ ܚܰܒܺܝܒܳܐܺܝܬ܆ ܫܰܪܺܝ ܡܦܺܝܣ ܠܶܗ ܕܰܫܪܺܝܢܝ ܡܶܟܳܐ ܨܶܝܕ ܫܽܘܠܳܡܳܐ܆ ܕܗܳܐ ܚܙܰܝ̈ ܥܰܝ̈ܢܰܝ ܚܢܳܢܳܟ ܪܰܒܳܐ ܫܰܪܺܝܪܳܐܺܝܬ܀

ܥܢܳܢ̈ܶܐ ܩܪܰܐܽܘܟ ܕܬܶܚܽܘܬ ܠܡܶܨܪܶܝܢ ܒܚܰܝܠܳܐ ܘܓܽܘܢܚܳܐ܆

ܘܰܛܥܺܝܢܰܬ ܠܶܗ ܠܡܳܪܳܐ ܕܟܽܠܗܽܘܢ ܐܰܬܪ̈ܰܘܳܬܳܐ܀