ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܥܰܠ ܚܰܝܠܳܐ ܕܰܫܒܺܝܚܽܘܬܳܟ܆ ܥܰܡܳܐ ܕܰܦܢܳܐ ܣܠܶܩ ܠܺܝܗܽܘܕ܆ ܣܳܡ ܫܶܬܶܐܣ̈ܶܐ ܕܢܶܒܢܶܐ ܗ̱ܘܳܐ܆ ܒܰܝܬܳܐ ܠܰܫܡܳܟ ܩܰܕܺܝܫܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܬܰܘ ܘܰܚܙܰܘ ܠܥܺܕܰܬ ܩܽܘܕܫܳܐ܆ ܕܰܡܨܰܒܬܳܐ ܒܟܽܠ ܕܶܡ̈ܘܳܬܳܐ܆ ܘܣܺܝܡܳܐ ܒܳܗ̇ ܡܰܥܡܽܘܕܺܝܬܳܐ܆ ܠܚܽܘܣܳܝ ܚܰܘ̈ܒܶܐ ܘܰܚ̈ܛܳܗܶܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܚܳܕܝܳܐ ܥܺܕܬܳܐ ܡܗܰܝܡܰܢܬܳܐ܆ ܘܙܳܡܪܳܐ ܫܽܘܒܚܳܐ ܘܬܰܘܕܺܝܬܳܐ܆ ܠܗܰܘ ܕܝܰܗ̱ܒ ܠܳܗ̇ ܦܰܓܪܶܗ ܘܰܕܡܶܗ܆ ܠܚܽܘܣܳܝ ܚܰܘ̈ܒܶܐ ܘܰܚ̈ܛܳܗܶܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ
ܣܳܠܶܩ: ܠܡܰܪܝܰܡ ܝܳܠܕܰܬ ܐܰܠܳܗܳܐ

ܡܰܢ ܗ̱ܺܝ ܗܳܕܶܐ ܕܰܒ̈ܡܰܬܠܶܐ܆ ܫܠܶܝܡܽܘܢ ܡܰܠܟܳܐ ܠܳܗ̇ ܗ̱ܽܘ ܡܢܰܨܰܪ ܗ̱ܘܳܐ܆ ܕܗܳܐ ܣܳܠܩܳܐ ܡܶܢ ܡܰܣܚܽܘܬܳܐ ܘܫܰܦܝܳܐ ܘܕܰܟܝܳܐ܆ ܘܰܠܒܺܝܫܳܐ ܠܳܗ̇ ܓܰܐܝܽܘܬܳܐ ܘܗܳܐ ܡܶܣܬܰܡܟܳܐ ܒܥܽܘܫܢܳܐ ܥܰܠ ܕܳܕܳܗ̇܀

ܫܽܘܒܚܳܐ

ܚܙܳܬܶܗ ܥܺܕܬܳܐ ܠܰܡܫܺܝܚܳܐ܆ ܕܰܠܚܰܛܳܝ̈ܶܐ ܦܬܺܝܚ ܓܰܙܳܐ ܕܪ̈ܰܚܡܰܘܗ̱ܝ܆ ܫܶܒܩܰܬ ܟܽܠܗܽܘܢ ܐܰܠܳܗ̈ܶܐ ܕܰܣܪܺܝܩܽܘܬܳܐ܆ ܘܪܶܗܛܰܬ ܛܶܦܣܰܬ ܣܶܓܕܰܬ ܠܶܗ܆ ܘܫܽܘܒܚܶܗ ܙܳܡܪܳܐ ܒܠܺܠܝܳܐ ܘܒܺܐܝܡܳܡܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܒܬܽܘܠܬܳܐ ܩܪܳܬܰܢܝ ܕܺܐܡܰܪ ܫܰܪܒܳܗ̇

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܐܘܪܶܒ ܝܽܘܡ ܚܽܘܕܳܬܳܗ̇ ܕܥܺܕܰܬ ܩܽܘܕܫܳܐ.

ܗܽܘ ܒܶܝܬ ܥܰܝ̈ܢܰܝ܆ ܪܽܘܫܡܶܗ ܣܳܐܶܡ ܘܰܡܙܰܗܶܐ ܠܺܝ܆ ܘܠܳܐ ܚܳܫܚܺܝܢ ܠܺܝ ܓܕܽܘ̈ܠܶܐ ܕܕܰܗܒܳܐ܆ ܘܒܰܡܫܺܝܚܽܘܬܶܗ ܡܰܢܗܰܪ ܐܰܦܰܝ̈܆ ܘܠܳܐ ܗܳܘܶܝܢ ܠܺܝ܆ ܙܠܺܝ̈ܚܶܐ ܕܣܺܐܡܳܐ ܕܠܳܐ ܫܳܦܪܺܝܢ ܠܺܝ܀

ܒ̈ܳܬܶܐ ܕܡܰܠ̈ܟܶܐ܆ ܠܳܐ ܦܳܚܡܺܝܢ ܠܶܟܝ ܥܺܕܰܬ ܩܽܘܕܫܳܐ܆ ܕܰܒܗܽܘܢ ܗ̱ܽܘ ܫܟܺܝܚ ܥܽܘܬܪܳܐ ܕܥܳܒܰܪ܆ ܘܒܶܟܽܝ ܗ̱ܘ ܗܳܐ ܫܟܺܝܚ ܗܰܘ ܕܠܳܐ ܥܳܒܰܪ܆ ܕܺܐܝܬܰܘܗ̱ܝ ܦܰܓܪܳܐ܆ ܕܡܳܐ ܡܚܰܣܝܳܢܳܐ ܘܫܳܒܶܩ ܚܰܘ̈ܒܶܐ܀

ܐܺܝܬ ܒܶܟܝ ܥܺܕܬܳܐ܆ ܚܰܬܢܳܐ ܡܫܺܝܚܳܐ ܕܠܳܐ ܡܬܽܘܡ ܥܳܒܰܪ܆ ܒܰܕܡܽܘܬ ܡܰܠ̈ܟܶܐ ܐܰܪ̈ܥܳܢܳܝܶܐ܆ ܘܺܐܝܬ ܒܶܟܝ ܚܢܳܢܳܐ ܘܪ̈ܰܚܡܶܐ ܫܦܺܝ̈ܥܶܐ܆ ܠܟܽܠ ܡܰܢ ܕܳܐܬܶܐ܆ ܘܰܡܨܰܠܶܐ ܒܶܟܝ ܘܫܳܐܶܠ ܪ̈ܰܚܡܶܐ܀

ܛܽܘܒܰܝܟܝ ܥܺܕܬܳܐ܆ ܕܺܐܝܬ ܒܶܟܝ ܟܺܐܢ̈ܶܐ ܘܟܳܗ̈ܢܶܐ ܙܗܰܝ̈ܳܐ܆ ܕܩܳܨܶܝܢ ܦܰܓܪܶܗ ܕܺܝܚܺܝܕܳܝܳܐ܆ ܘܫܳܒܩܺܝܢ ܚܛܳܗ̈ܶܐ ܕܟܽܠ ܬܰܝܳܒ̈ܶܐ܆ ܘܡܰܦܢܶܝܢ ܥܰܡ̱̈ܡܶܐ܆ ܡܶܢ ܛܳܥܝܽܘܬܳܐ ܠܽܐܘܪܚܳܐ ܕܚܰܝ̈ܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܡܰܠܟܽܘܬܳܐ

ܥܽܘܢܺܝܬܳܐ: ܚܳܕܶܝܢ ܥܺܝܪ̈ܶܐ ܘܕܳܝܨܺܝܢ ܒܢܰܝ̈ܢܳܫܳܐ܆ ܒܝܽܘܡ ܚܽܘܕܳܬܳܗ̇ ܕܥܺܕܬܳܐ ܡܗܰܝܡܰܢܬܳܐ.

ܩܽܘܡܝ ܐܰܘܕܳܝ ܠܶܗ ܥܺܕܬܳܐ ܠܰܡܫܺܝܚܳܐ܆ ܒܟܶܢ̈ܫܶܐ ܕܝܰܠ̈ܕܰܝܟܝ ܘܰܙܡܰܪܝ ܬܶܫܒܽܘܚܬܳܐ܆ ܕܶܐܬܳܐ ܘܦܰܪܩܶܟܝ ܒܚܰܫܰܘ̈ܗ̱ܝ ܕܰܨܠܺܝܒܳܐ܆ ܐܳܦ ܦܶܪܢܺܝܬܳܐ ܒܰܕܡܶܗ ܟܬܰܒ ܝܰܗ̱ܒ ܠܶܟܝ܀

ܒܝܽܘܡ ܚܽܘܕܳܬܶܟܝ ܥܺܕܬܳܐ ܡܗܰܝܡܰܢܬܳܐ܆ ܚܳܕܶܝܢ ܥܳܠ̈ܡܶܐ ܘܒܶܪ̈ܝܳܬܳܐ ܟܽܠܗܶܝܢ܆ ܘܰܒܩܳܠܰܝ̈ܗܽܘܢ ܙܳܡܪܺܝܢ ܬܶܫܒܽܘܚܬܳܐ܆ ܠܰܒܪܳܐ ܕܦܰܪܩܶܟܝ ܒܰܕܡܶܗ ܡܶܢ ܛܽܘܥܝܰܝ܀

ܪܳܡ ܘܰܡܥܰܠܰܝ ܝܰܘܡܳܐ ܕܚܽܘܕܳܬܶܟܝ܆ ܥܺܕܰܬ ܩܽܘܕܫܳܐ ܟܰܠܬܶܗ ܕܰܡܪܰܝܡܳܐ܆ ܒܪܺܝܟܽ ܗ̱ܘ ܕܡܰܟܪܶܟܝ ܘܰܢܚܶܬ ܫܪܳܐ ܒܓܰܘܶܟܝ܆ ܘܒܶܟܝ ܫܰܡܠܺܝ ܗ̱ܘܳܐ ܐ̱ܪ̈ܳܙܶܐ ܩܰܕܺܝ̈ܫܶܐ܀

ܗܳܐ ܡܰܠܰܐܟ̈ܶܐ ܚܳܕܶܝܢ ܒܚܽܘܕܳܬܶܟܝ܆ ܟܰܠܬܳܐ ܕܰܡܟܰܪ ܐܰܒܳܐ ܠܺܝܚܺܝܕܶܗ܆ ܪܳܘܙܳܐ ܫܡܰܝܳܐ ܘܰܡܫܰܒܚܳܐ ܐܰܪܥܳܐ܆ ܠܗܰܘ ܕܰܐܫܠܶܡ ܗ̱ܘܳܐ ܢܰܦܫܶܗ ܥܰܠ ܐܰܦܰܝ̈ܟܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܬܛܰܝܰܒ ܟܶܢܫܳܐ ܕܰܥܠܰܝ̈ܡܳܬܳܐ

ܥܺܕܬܳܐ ܡܳܪܝ ܕܰܐܦܢܺܝܬ ܡܶܢ ܛܳܥܝܽܘܬܳܐ܆ ܕܳܚܩܳܐ ܠܛܳܥܰܝ̈ܳܐ ܕܠܳܐ ܢܶܥܠܽܘܢ ܠܳܗ̇܆ ܠܘܳܬܳܟ ܗܳܐ ܓܳܥܝܳܐ ܐܳܦ ܡܶܬܟܰܫܦܳܐ܆ ܕܠܳܐ ܢܶܣܥܽܘܢ ܥܠܶܝܗ̇ ܕܺܐܒ̈ܶܐ ܚܰܪ̈ܡܶܐ܀

ܒܰܗܺܝܬ ܐܰܪܺܝܳܘܣ ܚܶܘܝܳܐ ܠܺܝܛܳܐ܆ ܕܒܰܪܝܳܐ ܩܳܪܶܐ ܠܳܟ ܡܫܺܝܚܳܐ ܡܳܪܰܢ܆ ܐܰܢ̱ܬܽ ܗ̱ܘ ܕܡܶܢ ܥܳܠܰܡ ܘܰܩܕܳܡ ܫܶܡܫܳܐ܆ ܫܡܳܟ ܐܺܝܬܰܘܗ̱ܝ ܐܰܟܪܶܙ ܢܒܺܝܳܐ ܕܰܘܺܝܕ܀

ܡܰܚܪܰܡ ܡܶܢ ܥܺܕܬܳܐ ܬܶܐܘܳܕܳܘܪܳܘܣ܆ ܘܢܶܣܛܽܘܪ ܡܰܪܳܚܳܐ ܘܕܺܝܳܘܕܳܘܪܳܘܣ܆ ܘܦܰܘܠܶܐ ܫܡܺܝܫܛܳܝܳܐ ܘܰܬܠܳܬܰܝ̈ܗܽܘܢ܆ ܬܪܶܝܢ ܟܝܳܢܺܝ̈ܢ ܡܰܘܕܶܝܢ ܒܰܬܪܶܝܢ ܦܰܪ̈ܨܽܘܦܺܝܢ܀

ܠܽܘܩܒܰܠ ܕܶܝܢ ܗܳܠܶܝܢ ܡܰܘܕܝܳܐ ܥܺܕܬܳܐ܆ ܕܚܰܕܽ ܗ̱ܘ ܠܚܽܘܕ ܐܺܝܬܰܘܗ̱ܝ ܟܝܳܢܳܐ ܡܓܰܫܡܳܐ܆ ܬܠܳܬܳܐ ܦܰܪ̈ܨܽܘܦܶܐ ܬܠܳܬܳܐ ܩܢܽܘ̈ܡܶܐ܆ ܘܰܬܠܳܬܳܐ ܫܡܳܗ̈ܶܐ ܚܰܕ ܗ̱ܽܘ ܟܝܳܢܗܽܘܢ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܐܰܘܕܳܝ ܥܺܕܬܳܐ ܒܰܙܡܺܝܪ̈ܳܬܶܟܝ ܫܰܦܺܝܪ̈ܳܬܳܐ܆

ܘܩܰܪܶܒܝ ܠܰܒܪܳܐ ܕܳܫ̈ܢܶܐ ܕܫܽܘܒܚܳܐ ܒܝܽܘܡ ܚܽܘܕܳܬܶܟܝ܀

ܦܽܘܡܶܟܝ ܢܰܩܕܳܐ ܕܳܡܶܐ ܠܚܽܘ̈ܛܶܐ ܕܰܙܚܽܘܪܺܝܬܳܐ܆ ܡܶܣܬܰܒܪܳܐ ܠܰܢ ܕܒܰܕܡܳܐ ܨܒܺܝ̈ܥܳܢ ܐܳܦ ܣܶܦ̈ܘܳܬܶܟܝ܆ ܒܰܬܪܶܝܢ ܓܰܘ̈ܢܺܝܢ ܫܽܘܦܪܶܟܝ ܢܳܨܰܚ ܒܰܟܢܽܘ̈ܫܳܬܳܐ܆ ܒܰܕܡܳܐ ܡܰܝ̈ܳܐ ܕܗܳܐ ܪܳܕܶܝܢ ܠܶܟܝ ܡܶܢ ܡܰܒܽܘܥܳܐ܀

ܫܽܘܒܚܳܐ ܠܰܐܒܳܐ ܕܨܰܒܶܬ ܠܥܺܕܬܶܗ ܒܟܽܠܗܽܘܢ ܫܽܘܦܪ̈ܶܐ܆ ܘܣܶܓܕܬܳܐ ܠܰܒܪܳܐ ܕܒܶܗ ܐܶܬܗܰܕܪܰܬ ܟܰܠܰܬ ܢܽܘܗܪܳܐ܆ ܬܰܘܕܺܝ ܠܪܽܘܚܳܐ ܕܒܶܗ ܐܶܬܩܰܕܫܰܬ ܒܰܪ̱ܬ ܐܺܝܡܳܡܳܐ܆ ܘܡܶܢ ܦܽܘܡ ܝܰܠ̈ܕܶܝܗ̇ ܫܽܘܒܚܳܐ ܢܶܣܰܩ ܒܟܽܠ ܥܶܕܳܢܺܝ̈ܢ܀

ܐܰܝܢܳܐ ܕܡܰܩܪܶܒ ܥܰܡܶܟܝ ܥܺܕܬܳܐ ܣܽܘܣܝܶܗ ܢܶܦܶܠ܆

ܘܰܒܗܰܘ ܓܶܐܪܳܐ ܕܡܳܬܚܳܐ ܩܶܫܬܶܗ ܒܣܶܛܪܶܗ ܢܶܒܠܰܥ܀