ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ
ܐܶܙܰܠ̱ܬ ܡܰܪܝܰܡ ܨܶܝܕ ܐܶܠܺܝܫܒܰܥ

ܐܳܡܪܳܐ ܥܺܕܬܳܐ܆ ܕܠܳܐ ܕܳܚܠܳܐ. ܐ̱ܢܳܐ ܡܶܢ ܡܰܚ̈ܫܽܘܠܶܐ܆ ܘܓܰܠ̱̈ܠܶܐ ܕܛܳܪܶܝܢ ܒܺܝ܆ ܕܡܰܠܟܳܐ ܕܡܰܟܪܰܢܝ܆ ܝܰܗ̱ܒܠܺܝ ܙܰܝܢܳܐ܆ ܕܒܶܗ ܗ̱ܽܘ ܐܰܩܪܶܒ܆ ܠܽܘܩܒܰܠ ܡܰܪ̈ܳܚܶܐ܆ ܨܠܺܝܒܶܗ ܚܰܝ݂ܳܐ܆ ܕܒܶܗ ܡܶܙܕܰܟܶܐ ܐܳܟܶܠܩܰܪܨܳܐ܆ ܘܡܶܢܶܗ ܒܳܗܬܺܝܢ ܟܳܦܽܘܪ̈ܶܐ܀

ܫܽܘܒܚܳܐ

ܦܽܘܡܶܟܝ ܚܰܣܝܳܐ܆ ܘܦܽܘܡܳܐ ܕܝܰܠ̈ܕܰܝܟܝ܆ ܢܶܪܥܰܡ ܫܽܘܒܚܳܐ ܩܳܠܰܝ̈ ܬܰܘܕܺܝܬܳܐ܆ ܠܰܒܪܳܐ ܕܚܰܕܬܶܟܝ܆ ܘܕܰܟܺܝ ܘܡܰܪܩܶܟܝ܆ ܡܶܢ ܛܰܡܽܐܘܬܳܐ ܘܥܰܒܕܶܟܝ ܠܶܗ ܟܰܠܬܳܐ܆ ܢܚܶܬ ܘܰܫܪܳܐ ܒܶܟܝ܆ ܘܩܰܕܶܫ ܒܶܟܝ ܡܰܥܡܽܘܕܺܝܬܳܐ܆ ܐܶܡܳܐ ܕܝܳܠܕܳܐ ܪ̈ܽܘܚܳܢܶܐ܀

ܡܰܕܪܳܫܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ܆ ܕܪܰܡܪܶܡ ܥܺܕܬܶܗ܆ ܘܒܰܕܡܶܗ ܦܰܪܩܳܗ̇ ܡܶܢ ܛܳܥܝܽܘܬܳܐ.

ܛܽܘܒܰܝܟܝ ܥܺܕܬܳܐ܆ ܕܗܳܐ ܡܰܬܩܰܢ ܒܶܟܝ܆ ܥܺܐܕܳܐ ܪܰܒܳܐ ܘܥܰܕܥܺܐܕ ܡܰܠܟܳܐ܆ ܨܶܗܝܽܘܢ ܫܒܺܝܩܬܳܐ܆ ܕܗܳܐ ܐܶܬܓܰܙܝܰܬ܆ ܘܰܨܕܶܝܢ ܬܰܪ̈ܥܶܝܗ̇ ܡܶܢ ܥܰܕ̈ܥܺܐܕܶܐ܆ ܛܽܘܒ ܠܬܰܪ̈ܥܰܝܟܝ ܕܶܐܬܦܰܬܰܚܘ ܘܠܳܐ ܡܠܰܘ܆ ܘܰܠܕܳܪ̈ܳܬܶܟܝ ܕܶܐܬܦܰܫܰܛܝ̈ ܘܠܳܐ ܣܒܰܥ̈ܝ܆ ܗܳܐ ܪܳܥܡܺܝܢ ܒܶܟܝ܆ ܥܰܡ̱̈ܡܶܐ ܕܰܩܥܰܘ܆ ܘܫܰܬܩܽܘܗ̱ܝ ܠܗܰܘ ܥܰܡܳܐ܀

ܛܽܘܒܰܝܟܝ ܥܺܕܬܳܐ܆ ܕܰܒܥܰܕܥܺܐܕܶܟܝ܆ ܥܺܝܪ̈ܶܐ ܚܳܕܶܝܢ ܒܰܝܢܳܬ ܥܺܐܕܰܝ̈ܟܝ܆ ܚܰܕ ܓܶܝܪ ܠܺܠܝܳܐ܆ ܫܰܒܰܚܘ ܥܺܝܪ̈ܶܐ܆ ܒܰܐܪܥܳܐ ܕܟܳܡܰܬ ܫܽܘܒܚܳܐ ܛܶܠܡܰܬ܆ ܛܽܘܒ ܠܩܳܠܰܝ̈ܟܝ ܕܶܐܙܕܪܰܥܘ ܘܶܐܬܚܨܶܕܘ܆ ܘܒܰܫܡܰܝܳܐ ܐܶܬܚܡܶܠܘ ܒܰܐܘܨܪ̈ܶܐ܆ ܦܽܘܡܶܟܝ ܦܺܝܪܡܳܐ܆ ܘܩܳܠܰܝ̈ܟܝ ܐܰܝܟ ܒܶܣ̈ܡܶܐ܆ ܥܳܛܪܺܝܢ ܒܥܰܕܥܺܐܕܶܟܝ܀

ܛܽܘܒܰܝܟܝ ܥܺܕܬܳܐ܆ ܕܗܳܐ ܕܳܐܶܨ ܒܶܟܝ܆ ܐܳܦ ܐܶܫܰܥܝܳܐ ܒܰܢܒܺܝܽܘܬܶܗ܆ ܕܗܳܐ ܠܰܡ ܒܬܽܘܠܬܳܐ܆ ܬܶܒܛܰܢ ܬܺܐܠܰܕ܆ ܝܰܠܕܳܐ ܕܰܫܡܶܗ ܐܳܦ ܕܽܘܡܳܪܳܐ܆ ܐܳܘ ܠܦܽܘܫܳܩܳܐ ܕܶܐܬܓܠܺܝ ܒܥܺܕܬܳܐ܆ ܬܪܶܝܢ ܫܡܳܗܶܝ̈ܢ ܕܶܐܬܡܰܙܰܓܘ ܚܰܕ ܒܚܰܕ܆ ܥܰܡܰܢܽܘܐܶܝܠ܆ ܥܰܡܶܟܽܝ ܗ̱ܘ ܒܟܽܠ ܙܒܰܢ܆ ܕܡܰܙܓܶܟܝ ܒܗܰܕܳܡܰܘ̈ܗ̱ܝ܀

ܛܽܘܒܰܝܟܝ ܥܺܕܬܳܐ܆ ܕܗܳܐ ܚܳܕܶܐ ܒܶܟܝ܆ ܐܳܦ ܕܳܢܺܝܐܶܝܠ ܓܰܒܪܳܐ ܪܓܺܝܓܳܐ܆ ܒܰܕܶܩ ܕܡܶܬܩܛܶܠ܆ ܡܰܠܟܳܐ ܡܫܺܝܚܳܐ܆ ܘܩܽܘܪܝܰܬ ܡܰܠ̈ܟܶܐ ܒܩܶܛܠܶܗ ܚܳܪܒܳܐ܆ ܛܽܘܒ ܠܥܰܡ̱̈ܡܶܐ ܕܶܐܬܩܪܺܝܘ ܘܠܳܐ ܗܦܰܟܘ܆ ܘܳܝ ܠܥܰܡܳܐ ܕܶܐܫܬܕܺܝ ܘܠܳܐ ܦܢܳܐ܆ ܙܡܺܝ̈ܢܶܐ ܐܶܫܬܶܐܠܘ܆ ܘܳܐܪ̈ܚܶܐ ܚܠܳܦܰܝܗܽܘܢ܆ ܒܳܣܡܺܝܢ ܒܰܚܠܽܘܠܶܟܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܟܰܠܰܬ ܡܰܠܟܳܐ

ܥܽܘܢܺܝܬܳܐ: ܐܰܫܪܳܐ ܡܳܪܰܢ ܫܰܝܢܳܟ ܒܥܺܕܰܬ ܩܽܘܕܫܳܐ ܦܪܺܝܩܰܬ ܒܰܕܡܳܟ.

ܚܰܬܢܳܐ ܕܪܰܘܡܳܐ ܩܨܳܐ ܠܳܗ̇܆ ܠܥܺܕܰܬ ܩܽܘܕܫܳܐ ܦܰܓܪܶܗ ܚܰܣܝܳܐ܆ ܘܰܕܡܶܗ ܚܰܝܳܐ ܡܙܰܓ ܒܳܗ̇܆ ܘܰܪܫܰܡ ܗ̱ܘܳܐ ܒܳܗ̇ ܨܠܺܝܒܳܐ ܕܩܶܛܠܶܗ܆ ܐܰܬܩܶܢ ܘܫܰܪܰܪ܆ ܡܳܪܝ ܫܶܬܶܐܣܶܝ̈ܗ̇܆ ܒܗܰܝܡܳܢܽܘܬܳܐ܆ ܬܪܺܝܨܰܬ ܫܽܘܒܚܳܐ܆ ܫܽܘܒܚܳܐ ܠܗܰܘ ܕܚܰܫ ܗ̱ܘܳܐ܆ ܥܰܠ ܐܰܦܰܝ̈ ܥܺܕܬܶܗ܆ ܘܦܰܪܩܳܗ̇ ܡܶܢ ܛܽܘܥܝܰܝ ܒܰܙܩܺܝܦܶܗ܀

ܥܺܝܪ̈ܰܝ ܪܰܘܡܳܐ ܙܳܡܪܺܝܢ܆ ܫܽܘܒ̈ܚܶܐ ܫܦܰܝ̈ܳܐ ܒܝܽܘܡ ܚܽܘܕܳܬܶܟܝ܆ ܐܳܦ ܡܰܠܰܐܟ̈ܶܐ ܡܗܰܠܠܺܝܢ܆ ܠܰܐܒܳܐ ܓܢܺܝܙܳܐ ܒܩ̈ܳܠܶܐ ܕܬܶܗܪܳܐ܆ ܕܰܒܝܰܕ ܚܽܘܒܶܗ܆ ܫܰܕܰܪ ܠܰܒܪܶܗ܆ ܘܰܢܚܶܬ ܦܰܪܩܶܟܝ܆ ܡܶܢ ܛܳܥܝܽܘܬܳܐ܆ ܘܒܰܕܡܶܗ ܝܰܩܺܝܪܳܐ܆ ܟܬܰܒ ܠܶܟܝ ܦܶܪܢܺܝܬܳܐ܆ ܕܥܰܡܶܗ ܬܶܬܒܰܣܡܺܝܢ ܒܰܓܢܽܘܢܳܐ܀

ܫܽܘܒܚܳܐ ܠܰܐܒܳܐ ܕܪܰܫܡܶܟܝ܆ ܥܺܕܰܬ ܩܽܘܕܫܳܐ ܒܰܢܒܺܝܽܘܬܳܐ܆ ܘܣܶܓܕܬܳܐ ܠܰܒܪܳܐ ܡܫܺܝܚܳܐ܆ ܕܟܰܠܶܠ ܘܨܰܒܬܶܟܝ ܒܰܫܠܺܝ݂ܚܽܘܬܳܐ܆ ܬܰܘܕܺܝ ܠܪܽܘܚܳܐ܆ ܕܕܰܟܺܝ ܡܰܪܩܶܟܝ܆ ܘܙܰܡܶܢ ܥܰܡ̱̈ܡܶܐ܆ ܕܢܶܬܚܰܕܽܘܢ ܒܶܟܝ܆ ܘܢܶܩܥܽܘܢ ܬܶܫܒܽܘܚܬܳܐ܆ ܒܝܰܘܡܳܐ ܕܚܽܘܕܳܬܶܟܝ܆ ܠܡܰܠܟܳܐ ܫܡܰܝܳܢܳܐ ܕܰܫܪܳܐ ܒܶܟܝ܀

ܩܥܰܘ ܠܳܗ̇ ܢܒܺܝ̈ܶܐ ܠܥܺܕܬܳܐ܆ ܒܐ̱ܪ̈ܳܙܶܐ ܘܛܽܘ̈ܦܣܶܐ ܕܰܢܒܺܝܽܘܬܳܐ܆ ܣܰܒܪܽܘܗ̇ ܫܠܺܝܚ̈ܶܐ ܘܰܐܟܪܙܽܘܗ̇܆ ܒܝܰܕ ܡܶܠܰܝ̈ܗܽܘܢ ܡܰܠ̈ܝ݂ܰܝ ܬܶܗܪܳܐ܆ ܘܶܐܬܳܐ ܘܫܰܡܠܺܝ܆ ܠܰܢܒܺܝܽܘܬܳܐ܆ ܘܐ̱ܪ̈ܳܙܶܐ ܘܛܽܘ̈ܦܣܶܐ܆ ܕܟܽܠ ܚܰܙܳܝ̈ܶܐ܆ ܡܫܺܝܚܳܐ ܓܒܳܐ ܠܥܺܕܬܶܗ܆ ܕܡܶܢ ܥܰܡ̱̈ܡܶܐ ܟܰܢܫܳܗ̇܆ ܘܕܰܟܝܳܗ̇ ܐܳܦ ܩܰܕܫܳܗ̇ ܘܰܐܓܶܢ ܒܳܗ̇܀

ܣܽܘܓܺܝܬܳܐ

ܩܳܠܳܐ ܒܩ̄: ܐܰܝܠܶܝܢ ܩ̈ܳܠܶܐ
ܡܰܢܽܘ ܚܙܳܐ ܢܶܩܝܳܐ ܟܰܕ ܡܰܝܢܩܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܒܢܳܐ ܠܥܺܕܰܬ ܩܽܘܕܫܳܐ܆ ܘܰܒܪܺܝܟܽ ܗ̱ܘ ܕܫܰܪܰܪ ܫܶܬܶܐܣܶܝ̈ܗ̇.

ܒܰܢܝܳܐ ܘܣܺܝܡܳܐ ܥܺܕܬܳܐ ܥܰܠ ܟܺܐܦܳܐ܆ ܕܪܰܒܳܐ ܫܶܡܥܽܘܢ ܪܺܝܫ ܬܰܠܡܺܝ̈ܕܶܐ܆ ܘܥܰܠ ܫܰܒܥܺܝܢ ܘܰܬܪܶܝܢ ܥܰܡܽܘ̈ܕܶܐ܆ ܣܡܺܝܟܳܐ ܘܩܳܝܡܳܐ ܐܳܦ ܡܶܬܥܰܠܝܳܐ܀

ܡܰܬܰܝ ܡܰܪܩܳܘܣ ܠܽܘܩܳܐ ܝܽܘܚܰܢܳܢ܆ ܓܰܢܳܢ̈ܶܐ ܥܒܺܝܕܺܝܢ ܒܦܰܪܕܰܝܣܶܟܝ܆ ܘܡܰܫܩܶܝܢ ܘܡܰܪܘܶܝܢ ܠܟܽܠ ܐܰܪ̈ܥܳܬܶܟܝ܆ ܘܫܳܘܚܺܝ݂ܢ ܒܘܰܪ̈ܕܶܐ ܥܰܡ ܫܽܘ̈ܫܰܢܶܐ܀

ܐܺܝܬ ܒܶܟܝ ܐܰܪܒܥܺܝܢ ܕܰܐܩܪܶܒܘ ܥܰܡ ܒܺܝܫܳܐ܆ ܘܰܕܕܳܡܶܝܢ ܠܗܽܘܢ ܕܠܳܐ ܡܶܢܝܳܢܳܐ܆ ܘܕܶܡܗܽܘܢ ܛܥܺܝܢܺܝܢ ܥܰܠ ܐܺܝ̈ܕܰܝܗܽܘܢ܆ ܘܰܡܩܰܪܒܺܝܢ ܒܶܟܝ ܠܚܰܬܢܳܐ ܕܡܰܟܪܶܟܝ܀

ܢܶܗܘܶܐ ܡܰܚܪܰܡ ܠܶܐܘܳܢ ܕܪܽܘܡܺܝ܆ ܦܳܩܕܳܐ ܥܺܕܬܳܐ ܘܳܐܡܪܳܐ ܠܰܒ̈ܢܶܝܗ̇܆ ܘܗܳܝ ܣܽܘܢܢܶܗܕܽܘܣ ܕܟܰܠܩܺܝܕܽܘܢܰܐ܆ ܘܡܰܪܩܺܝܰܢܳܘܣ ܗܰܘ ܡܰܪܳܚܳܐ܀

ܡܰܚܪܰܡ ܡܶܢܶܟܝ ܕܺܝܳܘܕܳܘܪܳܘܣ܆ ܘܢܰܨܳܝܳܐ ܬܶܐܘܳܕܳܘܪܺܝܛܳܘܣ܆ ܬܶܐܘܳܕܳܪܳܘܣ ܕܡܰܡܦܽܘܣܺܝܛܰܐ܆ ܥܰܡ ܒܰܪܨܰܘܡܳܐ ܗܰܘ ܕܰܢܨܺܝܒܺܝܢ܀

ܡܰܚܪܰܡ ܐܰܦܽܘܠܺܝܢܰܪܺܝܳܘܣ܆ ܥܰܡ ܕܽܘܡܝܰܐܢܽܘܣ ܕܰܐܠܟܣܰܢܕܪܺܝܰܐ܆ ܐܳܦ ܝܽܘܠܝܰܢܶܐ ܗܰܓܳܓܳܝܳܐ܆ ܥܰܡ ܐܰܦܪܶܝܡ ܐܰܢܛܺܝܽܘܟܳܝܳܐ܀

ܡܰܘܕܝܳܐ ܥܺܕܬܳܐ ܚܰܕ ܐܰܠܳܗܳܐ܆ ܒܰܬܠܳܬܳܐ ܩܢܽܘ̈ܡܶܐ ܩܰܕܺܝ̈ܫܶܐ܆ ܐܰܒܳܐ ܘܰܒܪܳܐ ܘܪܽܘܚܳܐ ܕܩܽܘܕܫܳܐ܆ ܚܰܕ ܚܰܝܠܳܐ ܐܺܝܬ ܠܰܬܠܳܬܰܝ̈ܗܽܘܢ܀

ܚܰܕ ܡܶܢ ܩܢܽܘ̈ܡܶܐ ܕܰܐܠܳܗܽܘܬܳܐ܆ ܢܚܶܬ ܘܶܐܬܓܰܫܰܡ ܡܶܢ ܪܽܘܚ ܩܽܘܕܫܳܐ܆ ܘܡܶܢ ܝܳܠܕܰܬ ܐܰܠܳܗܳܐ ܒܬܽܘܠܬܳܐ܆ ܟܰܕ ܠܳܐ ܩܰܒܶܠ ܥܠܰܘܗ̱ܝ ܬܰܘܣܶܦܬܳܐ܀

ܟܰܬܪܰܬ ܕܶܝܢ ܗܺܝ ܬܠܺܝܬܳܝܽܘܬܳܐ܆ ܐܰܝܟܰܢܳܐ ܕܺܐܝܬܶܝܗ̇ ܗ̱ܘܳܬ ܡܶܢ ܩܕܺܝܡ܆ ܩܕܳܡ ܕܶܐܬܓܰܫܰܡ ܬܠܺܝܬܳܝܽܘܬܳܐ܆ ܘܡܶܢ ܕܶܐܬܓܰܫܰܡ ܬܠܺܝܬܳܝܽܘܬܰܐ ܗ̱ܘ܀

ܡܰܚܪܰܡ ܟܽܠ ܕܡܰܘܕܶܐ ܬܪܶܝܢ ܟܝܳܢ̈ܶܐ܆ ܐܰܘ ܡܰܘܕܶܐ ܬܽܘܒ ܪܒܺܝܥܳܝܽܘܬܳܐ܆ ܘܡܰܚܪܰܡ ܟܽܠ ܕܡܰܘܕܶܐ ܕܰܒܬܽܘܠܬܳܐ. ܝܶܠܕܰܬ ܒܰܪܢܳܫܳܐ ܕܶܐܬܰܐܠܰܗ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܟܺܐܦܳܐ ܕܰܚܙܳܐ ܕܳܢܺܝܐܶܝܠ ܕܶܐܬܓܰܙܪܰܬ

ܡܳܪܰܢ ܐܶܬܪܰܚܰܡ ܥܠܰܝܢ ܒܗܳܢܳܐ ܥܺܐܕܳܐ ܩܰܕܺܝܫܳܐ܆

ܘܰܒܗܰܘ ܥܺܐܕܳܐ ܕܠܳܐ ܥܳܒܰܪ ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀

ܬܳܝ ܠܶܟܝ ܥܺܕܬܳܐ ܒܰܪ̱ܬ ܥܰܡ̱̈ܡܶܐ܆ ܠܒܰܫܳܝܗ̱ܝ ܠܰܡܫܺܝܚܳܐ ܕܡܰܟܪܶܟܝ܆ ܒܢܶܩܦܳܐ ܕܰܟܝܳܐ ܗܘܳܝ ܥܰܡܶܗ܆ ܘܗܰܒܝ ܠܶܗ ܐܺܝܕܳܐ ܕܰܩܝܳܡܳܐ܆ ܬܳܝ ܐܽܘܟܳܡܬܳܐ ܕܶܐܬܚܰܘܪܰܬ܆ ܠܒܰܫܝ ܓܰܐܝܽܘܬܳܐ ܘܬܶܫܒܽܘܚܬܳܐ܆ ܬܳܝ ܚܶܫܽܘܟܬܳܐ ܫܦܰܪܝ ܘܰܢܗܰܪܝ܆ ܒܗܰܘ ܫܶܡܫܳܐ ܕܙܰܕܺܝܩܽܘܬܳܐ܀

ܬܳܝ ܘܰܬܠܳܝܗܝ ܥܠܰܝܟܝ ܚܶܫ̈ܠܳܬܳܐ܆ ܝܰܩܺܝܪ̈ܳܬܳܐ ܕܰܕܡܰܝ̈ܳܐ܆ ܓܕܽܘ̈ܠܶܐ ܕܕܰܗܒܳܐ ܣܽܘܡܳܩܳܐ܆ ܘܥܶܩܷ̈ܐ ܕܣܺܐܡܳܐ ܕܰܡܦܰܬܟܺܝܢ܆ ܝܽܘܩܰܢ̈ܬܶܐ ܘܡܰܪ̈ܓܳܢܝܳܬܳܐ܆ ܘܒܶܪ̈ܽܘܠܶܐ ܘܛܰܒ̈ܥܶܐ ܛܳܒ̈ܶܐ܆ ܙܠܺܝ̈ܚܶܐ ܙܡܰܪ̈ܓܕܶܐ ܘܗܰܡ̈ܢܺܝܟܶܐ܆ ܘܥܶܙ̈ܩܳܬܳܐ ܫܰܦܺܝܪ̈ܳܬܳܐ܆ ܚܠܳܦ ܗܳܠܶܝܢ ܣܺܝܡ ܒܶܟܝ ܨܠܺܝܒܳܐ܆ ܘܦܰܓܪܳܐ ܘܰܕܡܳܐ ܡܚܰܣܝܳܢܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܗܳܢܳܐ ܥܺܐܕܳܐ ܩܰܕܺܝܫܳܐ܆

ܘܰܒܗܰܘ ܥܺܐܕܳܐ ܕܠܳܐ ܥܳܒܰܪ ܐܰܩܺܝܡ ܠܰܢ ܡܶܢ ܝܰܡܺܝܢܳܟ܀