ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܣܳܗ̈ܕܶܐ ܦܬܰܚܘ ܓܰܙܰܝ̈ܟܽܘܢ
ܕܠܳܐ ܫܶܩܝܳܐ ܕܙܰܒܢܳܐ ܐܰܦܪܰܥ ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܐܶܫܬܰܥܳܐ ܠܰܢ ܝܽܘܚܰܢܳܢ: ܥܰܠ ܚܶܙܘܳܐ ܕܚܺܝܠܳܐ ܕܰܚܙܰܝܬ: ܠܥܶܠ ܡܶܢ ܢܰܗܪܳܐ ܒܓܰܘ ܝܽܘܪܕܢܳܢ: ܚܙܺܝܬ ܪܽܘܚܳܐ ܒܰܕܡܽܘܬ ܝܰܘܢܳܐ: ܕܡܶܢ ܪܰܘܡܳܐ ܠܥܽܘܡܩܳܐ ܢܶܚܬܰܬ: ܘܰܐܒܳܐ ܕܩܳܥܶܐ ܕܗܳܢܰܘ ܒܶܪܝ: ܗ̄: ܕܶܐܬܳܐ ܕܢܶܦܪܽܘܩ ܒܶܪ̈ܝܳܬܳܐ: ܡܶܢ ܫܽܘܥܒܳܕܳܐ ܕܰܚܛܺܝܬܳܐ܀

ܫܽܘܒܚܳܐ

ܝܰܗ̱ܒܘ ܛܽܘܒܳܐ ܥܺܝܪ̈ܰܝ ܪܰܘܡܳܐ: ܠܝܽܘܚܰܢܳܢ ܒܰܪ ܥܰܩܪܽܘܬܳܐ: ܕܰܒܪܳܐ ܡܫܺܝܚܳܐ ܡܶܢܶܗ ܥܡܰܕ: ܘܣܳܡ ܝܰܡܺܝܢܶܗ ܥܰܠ ܪܺܝܫܶܗ: ܘܠܳܐ ܝܶܩܕܰܬ ܡܶܢ ܓܰܘܙܰܠܬܳܐ: ܫܽܘܒܚܳܐ ܠܚܰܝܠܳܐ ܕܗܽܘ ܣܰܡܟܶܗ: ܗ̄: ܫܽܘܒܚܳܐ ܠܶܗ ܟܡܳܐ ܐܶܬܡܰܟܰܟ: ܡܶܛܽܠ ܦܽܘܪܩܳܢܶܗ ܕܳܐܕܳܡ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܰܬܚܽܘܡܳܐ ܕܗܰܝܡܳܢܽܘܬܳܐ
ܐ̱ܪ̈ܳܙܶܐ ܘܛܽܘ̈ܦܣܶܐ ܘܦ̈ܶܠܳܐܬܳܐ

ܪܓܺܝܓ ܗ̱ܘܳܐ ܩܳܠܶܗ ܕܦܳܪܽܘܩܰܢ܆ ܟܰܕ ܐܳܡܰܪ ܠܶܗ ܠܝܽܘܚܰܢܳܢ܆ ܕܬܳܐ ܣܺܝܡ ܐܺܝܕܳܟ ܥܰܠ ܪܺܝܫܝ ܘܰܐܥܡܶܕܰܝܢܝ܆ ܘܙܳܥ ܝܽܘܚܰܢܳܢ ܘܶܐܣܬܰܪܰܕ܆ ܕܰܚܙܳܐ ܠܢܰܗܪܳܐ ܟܰܕ ܝܳܩܶܕ܆ ܒܫܰܠܗܶܒܺܝܬܳܐ ܘܢܽܘܪܳܐ ܕܫܰܪܝܳܐ ܒܶܗ܆ ܘܰܩܦܰܣ ܐܺܝܕܶܗ ܟܰܕ ܪܳܥܶܠ܆ ܘܰܩܥܳܐ ܒܩܳܠܶܗ ܟܰܕ ܐܳܡܰܪ܆ ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܕܶܐܬܥܡܶܕ܆ ܘܶܐܡܰܪ ܠܶܗ ܕܰܫܒܽܘܩ ܗܳܫܳܐ܆ ܢܡܰܠܶܐ ܟܽܠܳܗ̇ ܟܺܐܢܽܘܬܳܐ܆ ܐܰܢ̱ܬ ܣܺܝܡ ܐܺܝܕܳܟ ܘܶܐܢܳܐ ܥܳܡܶܕ ܐ̱ܢܳܐ܆ ܘܥܰܡ ܩܳܠܶܗ ܕܰܐܒܳܐ ܡܶܢ ܠܥܶܠ܆ ܪܽܘܚܳܐ ܢܶܚܬܰܬ ܐܰܝܟ ܝܰܘܢܳܐ܆ ܗ̄ ܘܩܰܘܝܰܬ ܥܰܠ ܪܺܝܫܶܗ܀

ܠܝܽܘܪܕܢܳܢ ܐܶܬܳܐ ܕܢܶܥܡܰܕ ܗ̱ܘܳܐ܆ ܗܰܘ ܕܰܛܥܺܝܢ ܗ̱ܘܳܐ ܠܰܟܪ̈ܽܘܒܶܐ܆ ܘܰܡܩܰܕܫܺܝܢ ܠܶܗ ܣܪ̈ܳܦܶܐ ܒܓܶܦܰܝ̈ܗܽܘܢ܆ ܩܪܳܐ ܡܳܪܰܢ ܠܒܰܪ ܥܰܩܪܽܘܬܳܐ܆ ܬܳܐ ܣܺܝܡ ܐܺܝܕܳܟ ܠܥܶܠ ܡܶܢ ܪܺܝܫܝ܆ ܘܰܐܥܡܶܕܰܝܢܝ ܐܰܢ̱ܬ ܕܨܶܒܝܳܢܝ ܗܳܟܰܢ ܨܒܳܐ܆ ܘܪܽܘܚܳܐ ܕܩܽܘܕܫܳܐ ܡܶܢ ܪܰܘܡܳܐ܆ ܢܶܚܬܰܬ ܫܶܟܢܰܬ ܥܰܠ ܪܺܝܫܶܗ܆ ܗ̄ ܘܰܠܡܰܝ̈ܳܐ ܩܰܕܫܰܬ܀

ܡܰܕܪܳܫܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܠܳܐ ܪܓܺܝܫܺܝܢ ܟܪ̈ܽܘܒܶܐ ܠܡܽܘܢ ܕܳܡܶܐ

ܥܽܘܢܺܝܬܳܐ: ܠܳܟ ܫܽܘܒܚܳܐ ܕܰܥܡܰܕܬ ܘܚܰܣܺܝܬܳܢ ܘܩܰܕܶܫܬܳܢ ܒܪܽܘܚܳܐ ܩܰܕܺܝܫܳܐ.

ܐܰܠܳܗܳܐ ܒܪ̈ܰܚܡܰܘܗ̱ܝ ܪܟܶܢ ܘܰܢܚܶܬ܆ ܕܰܢܡܰܙܶܓ ܚܢܳܢܶܗ ܒܓܰܘ ܡܰܝ̈ܳܐ܆ ܕܰܢܚܰܠܶܛ ܟܝܳܢܳܐ ܕܪܰܒܽܘܬܶܗ܆ ܥܰܡ ܦܰܓܪ̈ܶܐ ܡܚܺܝ̈ܠܶܐ ܕܐ̱ܢܳܫܽܘܬܰܢ܆ ܥܒܰܕ ܥܶܠܬܳܐ ܒܡܰܝ̈ܳܐ܆ ܕܢܶܚܽܘܬ ܢܶܫܪܶܐ ܒܰܢ܆ ܐܰܝܟ ܥܶܠܬܳܐ ܕܪ̈ܰܚܡܶܐ܆ ܕܰܢܚܶܬ ܫܪܳܐ ܒܟܰܪܣܳܐ܆ ܐܳܘ ܠܪ̈ܰܚܡܶܐ ܕܡܳܪܝܳܐ ܟܡܳܐ ܫܦܺܝܥܺܝܢ܆ ܒܟܽܠ ܥܶܠ̈ܠܳܢ ܒܳܥܶܐ ܕܢܶܫܪܶܐ ܒܰܢ܀

ܒܰܡܥܰܪܬܳܐ ܒܚܽܘܪܺܝܒ ܪܟܶܢ ܘܰܫܪܳܐ܆ ܘܥܰܠ ܡܽܘܫܶܐ ܐܰܓܢܰܬ ܪܰܒܽܘܬܶܗ܆ ܡܙܰܓ ܙܺܝܘܶܗ ܡܫܰܒܚܳܐ ܒܡܳܝܽܘ̈ܬܶܐ܆ ܗܘܳܬ ܬܰܡܳܢ ܕܡܽܘܬ ܡܰܥܡܽܘܕܺܝܬܳܐ܆ ܕܰܢܚܶܬ ܫܪܳܐ ܒܓܰܘܳܗ̇܆ ܘܰܐܡܶܟ ܒܓܰܘ ܡܰܝ̈ܳܐ܆ ܥܽܘܙܳܐ ܕܪܰܒܽܘܬܶܗ܆ ܕܢܶܫܪܶܐ ܒܚܰܠܳܫ̈ܶܐ܆ ܥܰܠ ܡܽܘܫܶܐ ܫܪܳܐ ܗܰܘܦܳܐ ܕܫܽܘܒܚܶܗ܆ ܘܰܥܠܰܝܟܽܘܢ ܫܽܘܡܠܳܝܶܗ ܕܡܳܪܟܽܘܢ܀

ܗܰܘ ܗܳܟܺܝܠ ܥܽܘܙܳܐ ܕܠܳܐ ܣܰܝܒܰܪ܆ ܗܰܘ ܡܽܘܫܶܐ ܪܰܒܗܽܘܢ ܕܰܦܪ̈ܺܝܩܶܐ܆ ܘܶܐܠܺܝܳܐ ܪܺܝܫܗܽܘܢ ܕܛܰܢܳܢ̈ܶܐ܆ ܘܰܣܪ̈ܳܦܶܐ ܡܚܰܦܶܝܢ ܐܰܦܰܝ̈ܗܽܘܢ܆ ܕܥܽܘܙܰܐ ܗ̱ܘ ܙܳܟܶܐ ܟܽܠ܆ ܡܙܰܓܘ ܪܰܟܒܽܘܗ̱ܝ ܪ̈ܰܚܡܰܘܗ̱ܝ܆ ܒܝܰܕ ܡܰܝ̈ܳܐ ܘܡܶܫܚܳܐ܆ ܐܰܝܟ ܕܰܬܩܽܘܡ ܩܽܘܕܡܰܘܗ̱ܝ܆ ܡܚܺܝܠܽܘܬܳܐ ܟܽܠܳܗ̇ ܕܐ̱ܢܳܫܽܘܬܳܐ܆ ܕܰܒܡܶܫܚܳܐ ܘܡܰܝ̈ܳܐ ܬܶܬܥܰܛܦܺܝܘܗ̱ܝ܀

ܠܶܐܪܰܡܝܳܐ ܢܒܺܝܳܐ ܩܰܕܶܫ ܗ̱ܘܳܐ܆ ܕܶܐܢ ܥܽܘܒܳܐ ܡܚܺܝܠܳܐ ܕܙܽܘܘܳܓܳܐ܆ ܐܶܬܩܰܕܰܫ ܒܰܛܢܶܗ ܘܡܰܘܠܳܕܶܗ܆ ܟܡܳܐ ܬܩܰܕܶܫ ܗܺܝ ܡܰܥܡܽܘܕܺܝܬܳܐ܆ ܒܰܛܢܳܗ̇ ܘܡܰܘܠܳܕܳܗ̇܆ ܫܰܦܝܳܐ ܘܪܽܘܚܳܢܳܐ܆ ܠܗܰܠ ܓܶܝܪ ܒܓܰܘ ܟܰܪܣܳܐ܆ ܒܰܛܢܰܐ ܗ̱ܘ ܕܟܽܠܒܰܪܢܳܫ܆ ܗܳܪܟܳܐ ܕܶܝܢ ܡܶܢ ܡܰܝ̈ܳܐ ܘܪܽܘܚܳܐ܆ ܡܰܘܠܳܕܳܐ ܕܡܰܘܠܶܕ ܪ̈ܽܘܚܳܢܶܐ܀

ܡܰܪܳܚܳܐ ܕܥܳܡܶܕ ܘܬܽܘܒ ܚܳܛܶܐ܆ ܐܰܝܟ ܚܶܘܝܳܐ ܕܫܳܠܰܚ ܘܬܽܘܒ ܠܳܒܶܫ܆ ܕܡܶܬܚܰܕܰܬ ܘܛܳܠܶܐ ܘܗܳܦܶܟ ܬܽܘܒ܆ ܠܳܒܶܫ ܠܳܗ̇ ܠܗܳܝ ܥܰܬܺܝܩܽܘܬܳܐ܆ ܠܳܐ ܓܶܝܪ ܫܳܠܰܚ ܠܶܗ܆ ܚܶܘܝܳܐ ܠܡܰܚܫܰܒܬܶܗ܆ ܫܠܽܘܚܽܘܢ ܠܡܰܪܢܺܝܬܳܐ܆ ܫܽܘܚܬܳܐ ܕܢܰܦ̈ܫܳܬܳܐ܆ ܒܰܪܢܳܫܳܐ ܥܰܬܺܝܩܳܐ ܫܠܰܚܬܽܘܢ܆ ܗܳܫܳܐ ܚܰܕܽܘܬܳܐ ܠܒܺܝܫܺܝܢ ܐ̱ܢ̱ܬܽܘܢ܀

ܠܰܡܥܺܝܢܳܐ ܕܡܰܝ̈ܳܐ ܚܙܳܬ ܗܳܓܳܪ܆ ܘܡܶܢ ܓܰܘܳܗ̇ ܐܰܫܩܝܰܬ ܠܡܳܪܽܘܕܳܐ܆ ܗܰܘ ܕܰܗܘܳܐ ܥܪܳܕܳܐ ܒܓܰܘ ܕܰܒܪܳܐ܆ ܚܠܳܦ ܡܥܺܝܢܳܐ ܗܳܐ ܡܰܥܡܽܘܕܺܝܬܳܐ܆ ܥܡܰܕܘ ܒܳܗ̇ ܒܢܰܝ̈ ܗܳܓܳܪ܆ ܘܰܒܣܶܡܘ ܘܶܐܫܬܰܝܰܢܘ܆ ܡܰܢܽܘ ܚܙܳܐ ܥܪܳܕܳܐ܆ ܕܗܳܐ ܐܶܬܟܕܶܢ ܘܦܳܠܰܚ܆ ܥܰܡ ܬܰܘܪ̈ܶܐ ܢܺܝ̈ܚܶܐ ܘܒܰܣܺܝ̈ܡܶܐ܆ ܕܙܰܪܥܗܽܘܢ ܚܰܕ ܒܰܡܳܐܐ ܡܶܬܚܨܶܕ܀

ܒܪܺܝܫܺܝܬ ܕܶܝܢ ܪܽܘܚܳܐ ܕܪܽܘܚܳܦܳܐ܆ ܥܰܠ ܡܰܝ̈ܳܐ ܪܰܚܦܰܬ ܒܛܶܢܘ ܘܰܐܘܠܶܕܘ܆ ܬܰܢܺܝ̈ܢܶܐ ܘܢܽܘ̈ܢܶܐ ܘܦܳܪܰܚܬܳܐ܆ ܪܽܘܚ ܩܽܘܕܫܳܐ ܪܰܚܦܰܬ ܒܡܰܥܡܽܘܕܺܝܬܳܐ܆ ܘܝܶܠܕܰܬ ܒܐ̱ܪܳܙ ܢܶܫܪܳܐ܆ ܒܬܽܘ̈ܠܶܐ ܘܪ̈ܺܝܫܳܢܶܐ܆ ܘܝܶܠܕܰܬ ܒܐ̱ܪܳܙ ܢܽܘ̈ܢܶܐ܆ ܢܰܟ̈ܦܶܐ ܘܨܰܝܳܡ̈ܶܐ܆ ܒܐ̱ܪܳܙܳܐ ܕܬܰܢܺܝ̈ܢܶܐ ܗܳܐ ܥܪ̈ܺܝܡܶܐ܆ ܕܶܐܬܡܰܟܰܟܘ ܘܰܗܘܰܘ ܐܰܝܟ ܝܰܘ̈ܢܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܰܢܽܘ ܟܰܝ ܟܰܕ ܡܳܝܽܘܬܰܐ ܗ̱ܘ (ܐܶܬܩܰܛܰܠܘ ܗ̱ܘܰܘ ܝܰܠܽܘ̈ܕܶܐ)

ܥܽܘܢܺܝܬܳܐ: ܠܳܟ ܫܽܘܒܚܳܐ ܡܶܢ ܟܽܠ ܦܽܘ̈ܡܺܝܢ ܒܗܳܢܳܐ ܝܰܘܡܳܐ ܕܰܥܡܳܕܳܟ.

ܬܪܶܝܢ ܩܳܠܺܝ̈ܢ ܡܰܠܶܠ ܒܶܠܥܰܡ܆ ܥܰܠ ܡܰܠܟܳܐ ܘܥܰܠ ܟܳܪܽܘܙܶܗ܆ ܪܺܝܫܳܐ ܓܶܝܪ ܐܶܡܰܪ ܕܰܢܩܽܘܡ܆ ܘܦܳܪܽܘܩܳܐ ܐܰܝܟ ܒܰܪ ܡܰܠܟܳܐ܆ ܟܰܘܟܒܳܐ ܬܽܘܒ ܕܰܥܠܰܘܗ̱ܝ ܒܰܕܶܩ܆ ܫܶܡܫܳܐ ܗ̱ܘܳܐ ܘܺܐܝܙܓܰܕܳܐ܆ ܗܳܢܰܘ ܟܳܪܽܘܙܳܐ ܕܶܐܙܰܠ܆ ܘܰܐܝܬܺܝ ܠܡܳܪܶܗ ܡܶܢ ܪܽܘܚܩܳܐ܆ ܣܳܓܽܘ̈ܕܶܐ ܐܳܦ ܩܽܘܪ̈ܒܳܢܶܐ܆ ܒܪܺܝܟ ܕܶܐܬܢܰܨܰܚ ܒܺܐܝܙܓܰܕܶܗ܀

ܬܗܰܪܘ ܒܶܗ ܥܺܝܪ̈ܶܐ ܘܡܰܠܰܐܟ̈ܶܐ܆ ܒܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ܆ ܕܰܐܪܟܶܢ ܪܺܝܫܶܗ ܠܰܥܡܳܕܳܐ܆ ܟܰܕ ܗܽܘ ܐܺܝܬܰܘܗ̱ܝ ܡܚܰܣܶܐ ܟܽܠ܆ ܡܩܰܕܫܳܢܳܐ ܕܟܽܠܗܽܘܢ ܛܰܡ̈ܶܐܐ܆ ܘܫܳܒܶܩ ܚܰܘ̈ܒܶܐ ܕܚܰܛܳܝ̈ܶܐ܆ ܕܰܐܝܟ ܚܰܣܺܝܪܳܐ ܠܰܥܡܳܕܳܐ܆ ܐܶܬܩܰܪܰܒ ܡܳܪܳܐ ܕܟܽܠܳܐ܆ ܒܪܺܝܟ ܡܽܘܟܳܟܶܗ ܕܚܰܕܬܶܗ ܗ̱ܘܳܐ܆ ܠܓܶܢܣܰܢ ܕܰܒܠܺܝ ܒܰܚܒܳܠܳܐ܀

ܬܶܗܪܶܬ ܠܺܝ ܡܳܪܝ ܒܰܥܡܳܕܳܟ܆ ܘܳܐܦ ܒܡܽܘܟܳܟܳܟ ܕܰܚܠܳܦܰܝܢ܆ ܕܟܰܕ ܡܳܪܳܐ ܐܰܢ̱ܬ ܒܰܟܝܳܢܳܟ܆ ܘܶܐܬܰܝܬ ܕܡܶܢ ܥܰܒܕܳܟ ܬܶܥܡܰܕ܆ ܘܝܽܘܚܰܢܳܢ ܬܽܘܒ ܐܳܡܰܪ ܗ̱ܘܳܐ܆ ܕܶܐܢܳܐ ܐ̱ܢܳܐ ܣܢܺܝܩܳܐ ܕܶܐܥܡܰܕ܆ ܡܶܢ ܪܰܒܽܘܬܳܟ ܘܶܐܬܚܰܣܶܐ܆ ܘܶܐܢ ܡܰܡܪܰܚ ܐ̱ܢܳܐ ܝܳܩܶܕ ܐ̱ܢܳܐ܆ ܘܥܰܠ ܕܶܐܬܡܰܟܰܟ ܐܰܫܘܺܝܬܳܝܗ̱ܝ܆ ܢܣܺܝܡ ܝܰܡܺܝܢܶܗ ܥܰܠ ܪܺܝܫܳܟ܀

ܬܶܡܗܶܬ ܠܺܝ ܡܳܪܝ ܕܡܶܢ ܣܰܘ̈ܟܰܝܟ܆ ܩܶܛܦܶܬ ܩܽܘܪܒܳܢ ܬܶܫܒܽܘܚܬܳܐ܆ ܬܶܡܗܶܬ ܠܺܝ ܬܽܘܒ ܕܡܶܢ ܙܰܪܥܳܟ܆ ܩܰܪܒܶܬ ܟܰܦܳܐ ܕܬܰܘܕܺܝܬܳܐ܆ ܡܶܢ ܓܰܙܳܟ ܡܳܪܝ ܐܰܘܙܶܦܬܳܟ܆ ܘܡܶܢ ܣܺܝ̈ܡܳܬܳܟ ܐܰܫܶܐܠܬܳܟ܆ ܒܟܶܢܳܪܳܟ ܗ̱ܽܘ ܢܶܩܫܶܬ ܠܺܝ܆ ܘܡܶܢ ܕܺܝܠܳܟ ܗ̱ܽܘ ܝܶܗܒܶܬ ܠܳܟ܆ ܒܪܺܝܟܽ ܗ̱ܘ ܕܝܰܗ̱ܒ ܠܺܝ ܕܶܐܬܶܠ ܠܶܗ܆ ܫܽܘܒܚܳܐ ܠܶܗ ܘܠܰܐܒܽܘܗ̱ܝ ܘܪܽܘܚܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܟܰܠܰܬ ܡܰܠܟܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܶܐܬܳܐ܆ ܘܰܥܡܰܕ ܒܝܽܘܪܕܢܳܢ ܡܶܢ ܝܽܘܚܰܢܳܢ.

ܒܗܳܢܳܐ ܥܺܐܕܳܐ ܡܫܰܒܚܳܐ܆ ܐܶܬܳܐ ܡܳܪܰܢ ܠܝܽܘܪܕܢܳܢ ܢܰܗܪܳܐ܆ ܚܙܳܝܗ̱ܝ ܝܽܘܚܰܢܳܢ ܘܰܐܟܪܶܙ܆ ܘܰܩܥܳܐ ܘܶܐܡܰܪ ܕܗܳܢܰܘ ܕܶܢܚܳܐ܆ ܗܳܢܳܐ ܐܺܝܬܰܘܗ̱ܝ܆ ܐܶܡܪܳܐ ܚܰܝܳܐ܆ ܘܒܰܪ ܐܰܠܳܗܳܐ܆ ܕܶܐܬܳܐ ܠܥܳܠܡܳܐ܆ ܥܰܠ ܗܳܢܳܐ ܐܰܟܪܶܙܘ܆ ܢܒܺܝ̈ܶܐ ܒܪܽܘܚ ܩܽܘܕܫܳܐ܆ ܕܗܽܘ ܦܳܪܶܩ ܠܳܐܕܳܡ ܘܰܠܝܰܠ̈ܕܰܘܗ̱ܝ܀

ܢܚܶܬ ܗ̱ܘܳܐ ܘܰܥܡܰܕ ܒܝܽܘܪܕܢܳܢ܆ ܘܣܶܕܪ̈ܶܐ ܕܢܽܘܪܳܐ ܛܦܰܣܘ ܒܰܚ̈ܕܳܕܶܐ܆ ܩܪܶܒ ܝܽܘܚܰܢܳܢ ܘܰܐܪܺܝܡ܆ ܐܺܝܕܶܗ ܘܣܳܡܳܗ̇ ܥܰܠ ܓܳܒܽܘܠܶܗ܆ ܘܩܳܠܶܗ ܕܰܐܒܳܐ܆ ܨܪܳܐ ܠܰܫܡܰܝܳܐ܆ ܕܗܳܐ ܠܰܡ ܐܰܢ̱ܬܽ ܗ̱ܘ܆ ܒܶܪܝ ܚܰܒܺܝܒܳܐ܆ ܘܪܽܘܚ ܩܽܘܕܫܳܐ ܢܶܚܬܰܬ܆ ܘܥܰܠ ܪܺܝܫܶܗ ܩܰܘܝܰܬ܆ ܘܥܺܕܬܳܐ ܩܰܒܶܠܬܶܗ ܘܠܶܗ ܣܳܓܕܳܐ܀

ܚܙܳܝܗ̱ܝ ܗ̱ܘܳܐ ܥܰܒܕܳܐ ܠܡܳܪܶܐ܆ ܕܚܰܝ̈ܠܰܘܳܬܳܐ ܓܢܺܝ̈ܙܶܐ ܕܰܠܥܶܠ܆ ܕܰܩܪܶܒ ܕܢܶܥܡܰܕ ܒܝܽܘܪܕܢܳܢ܆ ܘܫܰܪܺܝ ܒܳܥܶܐ ܟܰܕ ܡܶܬܟܰܫܰܦ܆ ܐܰܪܦܳܢܝ ܡܳܪܰܢ܆ ܕܠܳܐ ܐܶܩܪܽܘܒ ܠܳܟ܆ ܝܳܩܶܕ ܐ̱ܢܳܐ ܠܺܝ܆ ܡܶܢ ܓܰܘܙܰܠܬܳܟ܆ ܫܡܰܝ̈ܳܐ ܠܳܐ ܡܣܰܝܒܪܺܝܢ܆ ܥܽܘܙܳܐ ܕܢܰܒܪܰܫܬܳܟ܆ ܘܶܐܢܳܐ ܥܰܦܪܳܢܳܐ ܠܳܐ ܐܰܡܪܰܚ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܟܶܢܫܳܐ ܥܶܠܳܝܳܐ

ܥܽܘܢܺܝܬܳܐ: ܐܰܫܘܳܢܝ ܐܳܦ ܠܺܝ ܡܳܪܝ܆ ܕܶܐܙܡܰܪ ܠܳܟ ܫܽܘܒܚܳܐ܆ ܒܟܶܢܳܪܳܐ ܕܪܽܘܚܳܐ ܒܝܰܘܡܳܐ ܕܰܥܡܳܕܳܟ.

ܐܰܒܳܐ ܥܰܡ ܪܽܘܚܳܐ܆ ܠܰܒܪܳܐ ܚܰܒܶܒܘ ܗ̱ܘܰܘ܆ ܕܰܢܚܶܬ ܘܶܐܬܓܰܫܰܡ ܘܰܠܒܶܫ ܡܽܘܟܳܟܳܐ܆ ܝܰܠܕܶܗ ܘܰܥܡܳܕܶܗ܆ ܐܰܟܪܙܽܘܗ̱ܝ ܟܡܳܐ ܡܰܟܺܝܟ܆ ܒܝܰܠܕܶܗ ܓܶܝܪ ܩܰܕܫܰܢ ܘܒܰܥܡܳܕܶܗ ܕܰܟܝܰܢ܆ ܘܟܰܕ ܐܰܥܡܕܰܢ ܦܰܪܥܳܗ̇ ܠܚܰܘܒܬܰܢ܆ ܘܚܰܕܬܶܗ ܗ̱ܘܳܐ ܠܓܶܢܣܰܢ ܕܰܒܠܺܝ܆ ܒܪܺܝܟ ܕܰܥܡܰܕ ܘܚܰܣܺܝ ܠܥܳܠܡܳܐ܀

ܝܽܘܚܰܢܳܢ ܐܰܥܡܶܕ܆ ܒܡܰܝ̈ܳܐ ܠܚܰܛܳܝ̈ܶܐ܆ ܘܰܐܟܪܶܙ ܕܰܢܬܽܘܒܽܘܢ ܘܢܶܬܦܢܽܘܢ ܠܡܰܠܟܽܘܬܳܐ܆ ܐܰܢ̱ܬ ܡܳܪܰܢ ܒܙܽܘܦܳܟ܆ ܠܟܽܠܢܳܫ ܡܚܰܘܰܪ ܐܰܢ̱ܬ܆ ܠܡܽܘܢ ܥܰܡ ܚܰܛܳܝ̈ܶܐ ܐܶܬܰܝܬ ܠܰܥܡܳܕܳܐ܆ ܘܟܰܕ ܩܽܘܕܫܳܐ ܠܟܽܘܡܪ̈ܶܐ ܝܳܗܶܒ ܐܰܢ̱ܬ܆ ܘܚܽܘܣܳܝܳܐ ܠܛܰܡ̈ܶܐܐ ܡܫܰܟܶܢ ܐܰܢ̱ܬ܆ ܕܬܶܥܡܰܕ ܒܓܰܘ ܡܰܝ̈ܳܐ ܠܳܐ ܣܢܺܝܩ ܐܰܢ̱ܬ܀

ܐ̱ܚܪܺܢܳܐ

ܩܳܠܳܐ ܒܩ̄: ܚܕܰܘ ܥܰܡ̱̈ܡܶܐ

ܥܽܘܢܺܝܬܳܐ: ܫܽܘܒܚܳܐ ܠܶܗ ܠܗܰܘ ܡܳܪܳܐ. ܛܳܒܳܐ ܘܒܰܣܺܝܡܳܐ܆ ܕܶܐܬܳܐ ܠܶܗ ܠܰܥܡܳܕܳܐ ܘܩܰܕܶܫ ܠܰܢ ܡܰܝ̈ܳܐ.

ܒܗܳܢ ܠܺܠܝܳܐ ܒܠܰܡܦܺܝ̈ܕܶܐ. ܒܪܺܝܬܳܐ ܢܳܗܪܳܐ܆ ܒܢܰܝ̈ ܢܽܘܗܪܳܐ ܩܽܘܡܘ ܫܰܒܰܚܘ. ܕܗܳܐ ܐܶܬܳܐ ܡܫܺܝܚܳܐ܀

ܒܗܳܢ ܠܺܠܝܳܐ ܩܥܳܐ ܐܰܒܳܐ. ܠܥܶܠ ܡܶܢ ܝܽܘܪܕܢܳܢ܆ ܕܗܳܢܰܘ ܒܶܪܝ ܚܰܒܺܝܒܳܐ. ܕܒܶܗ ܗ̱ܽܘ ܐܶܨܛܒܺܝܬ܀

ܒܗܳܢ ܠܺܠܝܳܐ ܪܰܚܶܦ ܗ̱ܘܳܐ. ܪܽܘܚܳܐ ܕܩܽܘܕܫܳܐ܆ ܐܰܝܟ ܝܰܘܢܳܐ ܥܰܠ ܡܰܝ̈ܳܐ. ܘܡܰܒܽܘ̈ܥܶܐ ܪܬܰܚܘ܀

ܒܗܳܢ ܠܺܠܝܳܐ ܒܗܳܢ ܠܺܠܝܳܐ. ܐܰܙܠܶܓ ܢܽܘܗܪܳܐ܆ ܥܰܠ ܝܽܘܪܕܢܳܢ ܒܰܥܡܳܕܶܗ. ܕܒܰܪ ܐܰܠܳܗܳܐ܀

ܒܗܳܢ ܠܺܠܝܳܐ ܥܪܰܩ ܢܰܗܪܳܐ. ܘܰܗܦܰܟ ܠܒܶܣܬܪܶܗ܆ ܟܰܕ ܚܙܳܝܗ̱ܝ ܗ̱ܘܳܐ ܠܰܡܫܺܝܚܳܐ. ܕܶܐܬܳܐ ܕܢܶܥܡܰܕ܀

ܒܗܳܢ ܠܺܠܝܳܐ ܚܰܡܘ ܡܰܝ̈ܳܐ. ܒܝܽܘܪܕܢܳܢ ܢܰܗܪܳܐ܆ ܕܠܳܐ ܢܽܘܪܳܐ ܘܠܳܐ ܩܰܝ̈ܣܶܐ. ܒܬܶܗܪܳܐ ܪܰܒܳܐ܀

ܒܗܳܢ ܠܺܠܝܳܐ ܬܰܘ ܢܶܫܗܰܪ. ܒܪܶܚܡܬܶܗ ܕܰܡܫܺܝܚܳܐ܆ ܕܶܐܬܳܐ ܠܶܗ ܠܰܥܡܳܕܳܐ. ܡܶܛܽܠܳܬܰܢ܀

ܒܗܳܢ ܠܺܠܝܳܐ ܬܰܘ ܢܶܬܦܨܰܚ. ܘܢܶܚܕܶܐ ܘܰܢܫܰܒܰܚ܆ ܠܰܡܫܺܝܚܳܐ ܕܒܰܥܡܳܕܶܗ. ܠܚܳܐ ܠܰܚܛܺܝܬܰܢ܀

ܒܗܳܢ ܠܺܠܝܳܐ ܒܗܳܢ ܠܺܠܝܳܐ. ܣܢܽܘ̈ܢܝܳܬܳܐ ܠܳܥ̈ܙܳܢ܆ ܒܩܳܠܰܝ̈ܗܽܘܢ ܫܰܦܺܝܪ̈ܶܐ. ܕܰܕܢܰܚ ܡܳܪܝܳܐ܀

ܒܗܳܢ ܠܺܠܝܳܐ ܥܠܰܝ̈ܡܳܬܳܐ. ܒܰܦ̈ܠܰܓܶܐ ܢܳܩ̈ܫܳܢ܆ ܘܰܡܫܰܒ̈ܚܳܢ ܒܰܪܘܳܙܳܐ. ܕܡܳܪܝܳܐ ܗܳܐ ܕܢܰܚ܀

ܒܗܳܢ ܠܺܠܝܳܐ ܩܽܘܫܝ ܟܰܦܳܐ. ܥܺܕܬܳܐ ܐܳܦ ܐܶܬܦܨܰܚ܆ ܕܗܳܐ ܕܢܰܚ ܠܶܗ ܐܺܝܡܳܡܳܐ. ܕܠܰܐܪܥܳܐ ܡܰܢܗܰܪ܀

ܒܗܳܢ ܠܺܠܝܳܐ ܢܗܰܪܘ ܥܳܠ̈ܡܶܐ. ܘܒܶܪ̈ܝܳܬܳܐ ܟܽܠܗܶܝܢ܆ ܕܒܰܥܡܳܕܳܟ ܐܶܬܕܰܟܺܝܘ. ܡܶܢ ܛܰܡܐܽܘܬܳܐ܀

ܒܗܳܢ ܠܺܠܝܳܐ ܟܽܠ ܦܽܘ̈ܡܺܝܢ. ܫܽܘܒܚܳܐ ܢܶܩܥܽܘܢ܆ ܠܗܰܘ ܡܳܪܳܐ ܡܪܰܚܡܳܢܳܐ. ܕܶܐܬܳܐ ܘܦܰܪܩܰܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܰܡܳܐ ܘܥܰܡ̱̈ܡܶܐ

ܥܽܘܢܺܝܬܳܐ: ܫܽܘܒܚܳܐ ܠܳܟ ܡܳܪܝ ܕܠܳܟ ܣܳܓ̈ܕܳܢ܆ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ.

ܚܙܺܝܬ ܝܽܘܚܰܢܳܢ ܕܬܶܗܪܳܐ ܡܠܶܐ܆ ܘܟܶܢ̈ܫܶܐ ܚܕܳܪ̈ܰܘܗ̱ܝ ܗܳܐ ܩܳܝܡܺܝܢ܆ ܘܚܰܬܢܳܐ ܡܫܺܝܚܳܐ ܟܰܕ ܡܶܬܪܟܶܢ܆ ܨܶܝܕ ܒܰܪ ܥܰܩܪ̈ܶܐ ܕܗܽܘ ܢܰܥܡܕܺܝܘܗ̱ܝ܀

ܟܰܠܬܳܐ ܡܟܺܝܪܳܐ ܘܠܳܐ ܝܳܕܥܳܐ܆ ܡܰܢܽܘ ܚܰܬܢܳܐ ܕܠܶܗ ܚܳܝܪܳܐ܆ ܚܕܽܘ̈ܓܶܐ ܟܢܺܝܫܺܝܢ ܡܰܕܒܪܳܐ ܡܠܶܐ܆ ܘܰܟܣܶܐ ܡܳܪܰܢ ܒܰܝܢܳܬܗܽܘܢ܀

ܗܳܝܕܶܝܢ ܚܰܬܢܳܐ ܢܰܦܫܶܗ ܓܠܳܐ: ܘܨܶܝܕ ܝܽܘܚܰܢܳܢ ܠܢܰܗܪܳܐ ܩܪܶܒ: ܘܙܳܥ ܟܳܪܽܘܙܳܐ ܘܶܐܡܰܪ ܥܠܰܘܗܝ: ܗܽܘܝܽܘ ܚܰܬܢܳܐ ܕܠܶܗ ܐܶܟܪܙܶܬ܀

ܐ̱ܬܳܐ ܠܰܥܡܳܕܳܐ ܡܳܪܶܐ ܟܽܠ܆ ܘܚܰܘܺܝ ܢܰܦܫܶܗ ܥܰܠ ܝܽܘܪܕܢܳܢ܆ ܚܙܳܝܗ̱ܝ ܝܽܘܚܰܢܳܢ ܘܺܐܝܕܶܗ ܩܦܰܣ܆ ܟܰܕ ܡܶܬܕܰܡܰܪ ܒܰܨܒܽܘܬܳܐ܀

ܐܰܝܟܰܢܳܐ ܡܳܪܝ ܬܶܥܡܰܕ ܐܰܢ̱ܬ: ܕܰܐܢ̱ܬ ܒܰܥܡܳܕܳܟ ܡܚܰܣܶܝܬ ܟܽܠ: ܡܰܥܡܽܘܕܺܝܬܳܐ ܠܳܟ ܚܳܝܪܳܐ: ܪܽܘܣ ܒܳܗ̇ ܩܽܘܕܫܳܐ ܘܡܶܫܬܰܡܠܝܳܐ܀

ܐܳܡܰܪ ܡܳܪܰܢ ܕܶܐܢܳܐ ܨܒܺܝܬ܆ ܩܪܽܘܒ ܐܰܥܡܶܕܰܝܢܝ ܕܗܳܟܰܢ ܨܒܺܝܬ܆ ܕܬܶܥܨܶܐ ܠܨܶܒܝܳܢܝ ܠܳܐ ܡܶܫܟܚܰܬ܆ ܐܶܥܡܰܕ ܡܶܢܳܟ ܠܳܐ ܬܶܬܚܪܶܐ܀

ܒܳܥܶܐ ܐ̱ܢܳܐ ܡܳܪܝ ܠܳܐ ܐܶܬܥܨܶܐ: ܕܥܰܣܩܳܐ ܗ̱ܝ ܗܳܕܶܐ ܕܶܐܡܰܪܬ ܠܺܝ: ܐܶܢܳܐ ܣܢܺܝܩ ܐ̱ܢܳܐ ܕܰܐܢ̱ܬ ܬܰܥܡܕܰܢܝ: ܕܰܐܢ̱ܬ ܗ̱ܽܘ ܒܙܽܘܦܳܟ ܡܚܰܘܰܪ ܟܽܠ܀

ܒܥܺܝܬ ܕܰܫܦܰܪ ܠܺܝ ܕܗܳܟܰܢ ܢܗܶܐ܆ ܘܰܐܢ̱ܬ ܝܽܘܚܰܢܳܢ ܠܡܽܘܢ ܡܶܬܚܪܶܝܬ܆ ܫܒܽܘܩ ܟܺܐܢܽܘܬܳܐ ܡܶܬܡܰܠܝܳܐ܆ ܬܳܐ ܐܰܥܡܶܕܰܝܢܝ ܡܽܘܢ ܩܳܝܡܰܬ܀

ܓܶܠܳܐ ܠܢܽܘܪܳܐ ܐܰܝܟܰܢ ܡܨܶܐ: ܕܢܶܠܒܽܘܟ ܒܺܐܝ̈ܕܰܘܗ̱ܝ ܟܰܕ ܚܰܒܬܳܐ: ܐܳܘ ܢܽܘܪܳܢܳܐ ܪܰܚܶܡ ܥܠܰܝ. ܘܠܳܐ ܐܶܩܪܽܘܒ ܠܳܟ ܕܥܰܣܩܳܐ ܗ̱ܝ ܠܺܝ܀

ܓܠܺܝܬ ܠܳܟ ܨܶܒܝܳܢܝ ܠܡܽܘܢ ܕܳܪܫܰܬ܆ ܩܪܽܘܒ ܐܰܥܡܶܕܰܝܢܝ ܡܽܘܢ ܩܳܝܡܰܬ܆ ܚܠܽܘܠܳܐ ܡܛܰܝܰܒ ܠܳܐ ܬܰܗܦܟܰܢܝ܆ ܡܶܢ ܡܶܫܬܽܘܬܳܐ ܕܠܺܝ ܚܳܝܪܳܐ܀

ܕܳܚܠܺܝܢ ܥܺܝܪ̈ܶܐ ܘܠܳܐ ܡܰܡܪܚܺܝܢ: ܕܰܢܚܽܘܪܽܘܢ ܒܳܟ ܕܠܳܐ ܢܶܓܗܪܽܘܢ: ܘܶܐܢܳܐ ܐܰܝܟܰܢ ܡܳܪܝ ܐܰܥܡܕܳܟ: ܡܚܺܝܠ ܐ̱ܢܳܐ ܐܶܩܪܽܘܒ ܠܳܐ ܬܶܥܕܠܰܢܝ܀

ܕܳܚܠܰܬ ܡܳܕܶܝܢ ܠܳܐ ܬܶܬܚܪܶܐ܆ ܠܽܘܩܒܰܠ ܨܶܒܝܳܢܝ ܕܶܐܥܡܰܕ ܒܥܺܝܬ܆ ܡܰܥܡܽܘܕܺܝܬܳܐ ܠܺܝ ܚܳܝܪܳܐ܆ ܫܰܡܠܳܐ ܥܒܳܕܳܐ ܕܶܐܬܺܝܬ ܠܶܗ܀

ܗܳܐ ܐܰܟܪܶܙܬܳܟ ܥܰܠ ܝܽܘܪܕܢܳܢ: ܒܶܐܕ̈ܢܰܝ ܥܰܡܳܐ ܕܠܳܐ ܡܶܬܛܦܺܝܣ: ܘܶܐܢ ܚܳܙܶܐ ܠܳܟ ܕܡܶܢܝ ܥܳܡܕܰܬ: ܡܶܬܦܰܠܰܓ ܠܶܗ ܕܠܰܘ ܡܳܪܝܳܐ ܐܰܢ̱ܬ܀

ܗܳܐ ܥܳܡܶܕ ܐ̱ܢܳܐ ܐܰܝܟ ܕܶܐܡܪܶܬ܆ ܘܰܐܒܳܐ ܕܫܰܠܚܰܢܝ ܣܳܗܶܕ ܠܺܝ܆ ܕܰܒܪܶܗ ܐܶܢܳܐ ܘܒܺܝ ܐܶܨܛܒܺܝ܆ ܢܪܰܥܶܐ ܠܡܳܪܝܳܐ ܕܰܪܓܺܝܙ ܗ̱ܘܳܐ܀

ܘܳܠܶܐ ܠܺܝ ܡܳܪܝ ܕܶܐܕܰܥ ܟܝܳܢܝ: ܕܰܓܒܺܝܠܬܳܐ ܐ̱ܢܳܐ ܡܶܢ ܐܳܕܰܡܬܳܐ: ܘܰܐܢ̱ܬ ܓܳܒܽܘܠܳܐ ܡܰܬܩܶܢ ܟܽܠ. ܐܶܢܳܐ ܒܡܰܝ̈ܳܐ ܠܡܳܢ ܐܰܥܡܕܳܟ܀

ܘܳܠܶܐ ܕܬܶܕܰܥ ܠܡܽܘܢ ܐܶܬܺܝܬ܆ ܘܰܠܡܳܢܳܐ ܒܥܺܝܬ ܕܰܐܢ̱ܬ ܬܰܥܡܕܰܢܝ܆ ܡܨܰܥܬܳܐ ܕܽܐܘܪܚܳܐ ܕܶܐܬܺܝܬ ܒܳܗ̇܆ ܡܰܥܡܽܘܕܺܝܬܳܐ ܗ̱ܝ ܠܳܐ ܬܶܬܛܠܶܡ܀

ܙܥܽܘܪ ܗ̱ܽܘ ܢܰܗܪܳܐ ܕܶܐܬܰܝܬ ܠܶܗ: ܕܬܶܫܪܶܐ ܒܓܰܘܶܗ ܘܗܽܘ ܢܣܰܝܟܳܟ: ܫܡܰܝܳܐ ܠܥܽܘܙܳܟ ܠܳܐ ܣܳܦܩܺܝܢ: ܡܰܥܡܽܘܕܺܝܬܳܐ ܟܡܳܐ ܬܶܐܚܕܳܟ܀

ܙܥܽܘܪܝܳܐ ܗ̱ܝ ܟܰܪܣܳܐ ܡܶܢ ܝܽܘܪܕܢܳܢ܆ ܨܒܺܝܬ ܠܺܝ ܘܰܫܪܺܝܬ ܒܰܒܬܽܘܠܬܳܐ܆ ܘܰܐܝܟ ܕܶܐܬܝܰܠܕܶܬ ܡܶܢ ܡܰܪܒܥܳܐ܆ ܐܳܦ ܥܳܡܶܕ ܐ̱ܢܳܐ ܒܓܰܘ ܝܽܘܪܕܢܳܢ܀

ܚܰܝ̈ܠܰܘܳܬܳܐ ܗܳܐ ܩܳܝܡܺܝܢ܆ ܘܣܶܕܪ̈ܶܐ ܕܥܺܝܪ̈ܶܐ ܗܳܐ ܣܳܓܕܺܝܢ܆ ܘܶܐܢ ܩܳܪܶܒ ܐ̱ܢܳܐ ܠܺܝ ܕܰܐܥܡܕܳܟ܆ ܪܳܐܶܬ ܐ̱ܢܳܐ ܡܳܪܝ ܡܶܢ ܙܰܘܥܬܳܐ܀

ܚܰܝ̈ܠܶܐ ܘܟܶܢ̈ܫܶܐ ܠܳܟ ܝܳܗܒܺܝܢ: ܟܽܠܗܽܘܢ ܛܽܘܒܳܐ ܕܠܺܝ ܡܰܥܡܕܰܬ: ܠܗܳܕܶܐ ܓܒܺܝܬܳܟ ܡܶܢ ܡܰܪܒܥܳܐ: ܐܰܢ̱ܬ ܠܳܐ ܬܶܕܚܰܠ ܕܶܐܢܳܐ ܨܒܺܝܬ܀

ܛܰܝܒܶܬ ܐܽܘܪܚܳܐ ܕܶܐܫܬܰܠܚܶܬ܆ ܡܰܟܪܶܬ ܟܰܠܬܳܐ ܕܶܐܬܦܰܩܕܶܬ܆ ܢܺܐܪܰܒ ܕܶܢܚܳܟ ܥܰܠ ܥܳܠܡܳܐ܆ ܗܳܫܳܐ ܕܰܨܒܰܝܬ ܕܬܶܥܡܰܕ ܡܶܢܝ܀

ܛܽܘܝܳܒܝ ܗܳܢܰܘ ܕܗܳܟܰܢ ܨܒܺܝܬ: ܐܶܚܽܘܬ ܐܶܥܡܰܕ ܒܓܰܘ ܝܽܘܪܕܢܳܢ: ܘܶܐܚܫܽܘܠ ܙܰܝܢܳܐ ܠܰܕܥܳܡܕܺܝܢ: ܘܰܢܚܽܘܪܽܘܢ ܒܺܝ ܘܠܳܐ ܢܶܙܕܟܽܘܢ܀

ܝܰܠܕܶܗ ܕܰܐܒܳܐ ܒܡܽܘܢ ܐܰܥܡܕܳܟ܆ ܕܗܳܐ ܐܰܢ̱ܬ ܒܰܐܒܽܘܟ ܘܰܐܒܽܘܟ ܒܳܟ܆ ܩܽܘܕܫܳܐ ܠܟܽܘܡܪ̈ܶܐ ܐܰܢ̱ܬ ܝܳܗܒܰܬ܆ ܘܡܰܝ̈ܳܐ ܫܚܺܝ̈ܡܶܐ ܠܡܽܘܢ ܫܳܐܠܰܬ܀

ܝܰܠ̈ܕܰܘܗ̱ܝ ܕܳܐܕܳܡ ܠܺܝ ܚܳܝܪܺܝܢ: ܕܝܰܠܕܳܐ ܚܰܕܬܳܐ ܐܶܥܒܶܕ ܠܗܽܘܢ: ܐܽܘܪܚܳܐ ܒܡܰܝ̈ܳܐ ܐܶܕܪܽܘܫ ܠܗܽܘܢ: ܘܰܕܠܳܐ ܐܶܥܡܰܕ ܠܳܐ ܡܶܫܟܚܳܐ܀

ܟܳܗ̈ܢܶܐ ܡܶܢܳܟ ܡܶܬܩܰܕܫܺܝܢ܆ ܘܡܶܢܳܟ ܟܽܘܡܪ̈ܶܐ ܡܶܬܚܰܘܪܺܝܢ܆ ܢܒܺܝ̈ܶܐ ܘܡܰܠ̈ܟܶܐ ܐܰܢ̱ܬ ܗ̱ܽܘ ܥܒܰܕܬ܆ ܘܡܰܥܡܽܘܕܺܝܬܳܐ ܡܽܘܢ ܬܰܘܬܪܳܟ܀

ܟܰܠܬܳܐ ܕܡܶܟܪܶܬ ܠܺܝ ܚܳܝܪܳܐ: ܐܶܚܽܘܬ ܐܶܥܡܰܕ ܘܶܐܩܰܕܫܺܝܗ̇: ܪܳܚܡܳܐ ܕܚܰܬܢܳܐ ܠܳܐ ܬܶܫܬܐܶܠ: ܡܶܢ ܡܰܣܚܽܘܬܳܐ ܕܠܺܝ ܚܳܝܪܳܐ܀

ܠܳܐ ܡܶܫܟܰܚ ܐ̱ܢܳܐ ܕܰܠܢܽܘܪܳܐ܆ ܐܶܠܒܽܘܟ ܒܺܐܝ̈ܕܰܝ ܝܳܩܶܕ ܐ̱ܢܳܐ܆ ܗܳܐ ܠܶܓܝܽܘܢܰܝ̈ܟ ܡܶܫܬܰܠܗܒܺܝܢ܆ ܠܚܰܕ ܡܶܢ ܥܺܝܪ̈ܶܐ ܦܩܽܘܕ ܢܰܥܡܕܳܟ܀

ܠܰܘ ܡܶܢ ܥܺܝܪ̈ܶܐ ܦܰܓܪܝ ܐܶܬܢܣܶܒ: ܕܶܐܩܪܶܐ ܠܥܺܝܪܳܐ ܕܗܽܘ ܢܰܥܡܕܰܢܝ: ܦܰܓܪܶܗ ܕܳܐܕܳܡ ܗܳܐ ܠܒܺܝܫ ܐ̱ܢܳܐ: ܘܰܐܢ̱ܬ ܒܰܪ ܐܳܕܳܡ ܠܺܝ ܡܰܥܡܕܰܬ܀

ܡܰܝ̈ܳܐ ܚܙܰܐܽܘܟ ܘܣܰܓܺܝ ܕܚܶܠܘ܆ ܚܙܰܐܽܘܟ ܡܰܝ̈ܳܐ ܘܗܳܐ ܪܳܥܠܺܝܢ܆ ܪܳܬ ܠܶܗ ܢܰܗܪܳܐ ܡܶܢ ܙܰܘܥܬܳܐ܆ ܡܚܺܝܠ ܐ̱ܢܳܐ ܐܶܩܪܽܘܒ ܪܰܚܶܡ ܥܠܰܝ܀

ܡܰܝ̈ܳܐ ܒܰܥܡܳܕܝ ܡܶܬܩܰܕܫܺܝܢ: ܘܢܽܘܪܳܐ ܘܪܽܘܚܳܐ ܡܶܢܝ ܢܳܣܒܺܝܢ: ܘܶܐܠܳܐ ܥܶܡܕܶܬ ܠܳܐ ܐܶܬܓܡܰܪܘ: ܕܢܰܦܪܽܘܢ ܝܰܠ̈ܕܶܐ ܕܠܳܐ ܡܳܝܬܺܝܢ܀

ܢܽܘܪܳܐ ܠܢܽܘܪܳܟ ܐܶܢ ܩܳܪܒܳܐ: ܝܳܩܕܳܐ ܡܶܢܳܗ̇ ܐܰܝܟ ܚܰܒܬܳܐ: ܛܽܘܪܳܐ ܕܣܺܝܢܰܝ ܠܳܐ ܣܰܝܒܪܳܟ: ܘܶܐܢܳܐ ܡܚܺܝܠܳܐ ܒܡܽܘܢ ܐܰܥܡܕܳܟ܀

ܢܽܘܪܳܐ ܐ̱ܢܳܐ ܗܳܝ ܕܡܶܬܓܰܘܙܠܳܐ܆ ܘܡܶܛܽܠ ܕܰܨܒܺܝܬ ܐ̱ܢܳܫܳܐ ܗܘܺܝܬ܆ ܥܽܘܠܳܐ ܒܟܰܪܣܳܗ̇ ܕܰܒܬܽܘܠܬܳܐ܆ ܘܗܳܫܳܐ ܥܡܺܝܕܳܐ ܒܓܰܘ ܝܽܘܪܕܢܳܢ܀

ܣܰܓܺܝ ܦܰܐܝܳܐ ܕܬܶܫܡܥܰܢܝ܆ ܒܟܽܠ ܕܳܐܡܰܪ ܐ̱ܢܳܐ ܘܠܳܐ ܬܶܬܚܪܶܐ܆ ܐܶܢܳܐ ܐܰܥܡܶܕܬܳܟ ܒܓܰܘ ܟܰܪܣܳܐ܆ ܐܰܥܡܶܕܰܝܢܝ ܐܰܢ̱ܬ ܒܓܰܘ ܝܽܘܪܕܢܳܢ܀

ܣܰܓܺܝ ܙܳܕܶܩ ܕܰܐܢ̱ܬ ܬܰܥܡܕܰܢܝ: ܐܰܝܟ ܕܳܐܡܰܪ ܐ̱ܢܳܐ ܘܠܳܐ ܬܶܬܚܪܶܐ: ܗܳܐ ܐܰܥܡܶܕܬܳܟ ܒܓܰܘ ܟܰܪܣܳܐ: ܐܰܢ̱ܬ ܐܰܥܡܶܕܰܝܢܝ ܒܓܰܘ ܝܽܘܪܕܢܳܢ܀

ܥܰܒܕܳܐ ܐܶܢܳܐ ܘܰܡܚܺܝܠ ܐ̱ܢܳܐ: ܡܚܰܪܰܪ ܟܽܠܳܐ ܪܰܚܶܡܥܠܰܝ: ܥܰܪ̈ܩܰܝܟ ܕܶܐܫܪܶܐ ܠܳܐ ܐܶܬܡܨܺܝܬ: ܠܪܺܝܫܳܟ ܪܳܡܳܐ ܡܰܢ ܐܰܫܘܝܰܢܝ܀

ܥܰܒ̈ܕܶܐ ܒܰܥܡܳܕܝ ܡܶܬܚܰܪܪܺܝܢ܆ ܐ̱ܫܛܳܪ̈ܶܐ ܒܰܣܚܳܬܝ ܡܶܬܩܰܕܕܺܝܢ܆ ܚܪܽܘܪ̈ܶܐ ܒܡܰܝ̈ܳܐ ܡܶܬܚܰܬܡܺܝܢ܆ ܘܶܐܠܳܐ ܥܶܡܕܶܬ ܒܛܶܠܝ̈ ܟܽܠܗܶܝܢ܀

ܦܪܺܝܣܳܐ ܕܫܽܘܒܚܳܐ ܐܳܐܰܪ ܛܥܺܝܢ܆ ܘܰܡܣܰܟܶܐ ܠܳܟ ܐܳܦ ܝܽܘܪܕܢܳܢ܆ ܐܶܢ ܫܶܠܡܰܬ ܠܳܗ̇ ܕܬܶܥܡܰܕ ܨܒܰܝܬ܆ ܬܳܐ ܠܰܥܡܳܕܳܐ ܡܕܰܟܶܐ ܟܽܠ܀

ܦܰܐܝܳܐ ܗܳܕܶܐ ܕܰܐܢ̱ܬ ܬܰܥܡܕܰܢܝ: ܕܠܳܐ ܐ̱ܢܳܫ ܢܶܛܥܶܐ ܘܢܺܐܡܰܪ ܥܠܰܝ: ܕܶܐܠܳܐ ܢܽܘܟܪܳܝ ܡܶܢ ܐܰܒܳܐ: ܠܡܽܘܢ ܠܶܘܳܝܳܐ ܕܚܶܠ ܢܰܥܡܕܶܗ܀

ܨܠܽܘܬܳܐ ܡܳܕܶܝܢ ܡܳܐ ܕܥܶܒܕܶܬ܆ ܐܰܝܟܰܢ ܐܶܚܬܽܘܡ ܥܰܠ ܝܽܘܪܕܢܳܢ܆ ܐܰܒܳܐ ܘܪܽܘܚܳܐ ܒܳܟ ܡܶܬܚܙܶܝܢ܆ ܘܰܠܡܰܢ ܐܶܩܪܶܐ ܐܰܝܟ ܟܳܗܢܳܐ܀

ܨܠܽܘܬܳܐ ܒܫܶܬܩܳܐ ܡܶܬܚܰܬܡܳܐ: ܐܺܝܕܳܟ ܒܰܠܚܽܘܕ ܬܳܐ ܣܺܝܡ ܥܠܰܝ: ܘܰܐܒܳܐ ܩܳܥܶܐ ܚܠܳܦ ܟܳܗܢܳܐ: ܐܰܝܕܳܐ ܕܦܰܐܝܳܐ ܡܶܛܽܠ ܒܪܶܗ܀

ܩܪ̈ܰܝܳܐ ܟܽܠܗܽܘܢ ܗܳܐ ܩܳܝܡܺܝܢ܆ ܙܡܺܝ̈ܢܰܝ ܚܰܬܢܳܐ ܗܳܐ ܣܳܗܕܺܝܢ܆ ܕܟܽܠܝܽܘܡ ܐܶܡܪܶܬ ܒܰܝܢܳܬܗܽܘܢ܆ ܕܩܳܠܳܐ ܐܶܢܳܐ ܘܠܰܘ ܡܶܠܬܳܐ܀

ܩܳܠܳܐ ܕܩܳܪܶܐ ܒܓܰܘ ܡܰܕܒܪܳܐ: ܫܰܡܠܳܐ ܥܒܳܕܳܐ ܕܶܐܬܰܝܬ ܠܶܗ: ܕܢܶܪܥܰܡ ܚܽܘܪܒܳܐ ܕܰܢܦܰܩܬ ܠܶܗ: ܒܫܰܝܢܳܐ ܪܰܒܳܐ ܕܰܐܟܪܶܙܬ ܒܶܗ܀

ܪܒܳܒܬܳܐ ܕܥܺܝܪ̈ܶܐ ܠܶܐܕܢܰܝ ܐ̱ܬܳܬ܆ ܘܡܶܢ ܒܶܝܬ ܐܰܒܳܐ ܫܳܡܰܥ ܐ̱ܢܳܐ܆ ܩܳܠ ܡܰܠܰܐܟ̈ܶܐ ܕܰܡܝܰܒܒܺܝܢ܆ ܒܕܶܢܚܳܟ ܡܳܪܰܢ ܚܝܰܘ ܥܳܠ̈ܡܶܐ܀

ܪܗܺܝܒ ܥܶܕܳܢܳܐ ܘܠܺܝ ܚܳܝܪܺܝܢ: ܚܕܽܘ̈ܓܶܐ ܕܢܶܚܙܽܘܢ ܡܽܘܢ ܡܶܣܬܥܰܪ: ܬܳܐ ܐܰܥܡܶܕܰܝܢܝ ܕܰܢܩܰܠܣܽܘܢ: ܠܩܳܠܶܗ ܕܰܐܒܳܐ ܡܳܐ ܕܡܶܫܬܡܰܥ܀

ܫܳܡܰܥ ܐ̱ܢܳܐ ܡܳܪܝ ܐܰܝܟ ܡܶܠܬܳܟ܆ ܬܳܐ ܠܰܥܡܳܕܳܐ ܕܚܽܘܒܳܟ ܥܨܳܟ܆ ܣܓܶܕ ܥܰܦܪܳܢܳܐ ܕܠܰܐܝܟܳܐ ܡܛܳܐ܆ ܕܥܰܠ ܓܳܒܽܘܠܳܐ ܐܺܝܕܶܗ ܢܣܺܝܡ܀

ܫܠܶܝܢ ܗ̱ܘܰܘ ܟܶܢ̈ܫܶܐ ܟܰܕ ܩܳܝܡܺܝܢ: ܘܰܢܚܶܬ ܚܰܬܢܳܐ ܠܓܰܘ ܝܽܘܪܕܢܳܢ: ܥܡܰܕ ܩܰܕܺܝܫܳܐ ܘܡܶܚܕܳܐ ܣܠܶܩ: ܘܰܐܙܠܶܓ ܢܽܘܗܪܶܗ ܥܰܠ ܥܳܠܡܳܐ܀

ܬܰܪ̈ܥܶܐ ܕܪܰܘܡܳܐ ܦܬܺܝܚܺܝܢ ܠܥܶܠ: ܘܩܳܠܶܗ ܕܰܐܒܳܐ ܟܰܕ ܡܶܫܬܡܰܥ: ܕܗܳܢܰܘ ܚܰܒܺܝܒ ܕܒܶܗ ܐܶܨܛܒܺܝܬ: ܟܽܠܟܽܘܢ ܥܰܡ̱̈ܡܶܐ ܠܶܗ ܬܰܘ ܣܓܽܘܕܘ܀

ܬܗܰܪܘ ܚܰܙܳܝ̈ܶܐ ܟܰܕ ܩܳܝܡܺܝܢ: ܒܪܽܘܚܳܐ ܕܢܶܚܬܰܬ ܕܬܶܣܗܰܕ ܥܠܰܘܗ̱ܝ: ܬܰܘܕܺܝ ܠܕܶܢܚܳܟ ܡܰܦܨܰܚ ܟܽܠ: ܕܰܒܓܶܠܝܳܢܶܗ ܢܗܰܪܘ ܥܳܠ̈ܡܶܐ܀

ܬܳܝ ܘܰܣܓܽܘܕ ܥܺܕܰܬ ܩܽܘܕܫܳܐ܆ ܠܺܝܚܺܝܕܳܝܳܐ ܐܰܠܳܗܳܐ܆ ܕܶܐܬܳܐ ܘܒܰܥܡܳܕܶܗ ܦܰܪܩܶܟܝ܆ ܘܩܰܕܶܫ ܠܶܟܝ ܡܰܥܡܽܘܕܺܝܬܳܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܟܺܐܦܳܐ ܕܰܚܙܳܐ ܕܳܢܺܝܐܶܝܠ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܢܚܶܬ ܩܰܕܺܝܫܳܐ ܠܓܰܘ ܢܰܗܪܳܐ܆ ܘܛܰܪܛܰܥ ܟܽܠܶܗ ܡܶܢ ܪܶܬܚܳܐ܆ ܩܪܳܐ ܠܝܽܘܚܰܢܳܢ ܟܳܪܽܘܙܶܗ܆ ܕܰܢܣܺܝܡ ܐܺܝܕܶܗ ܥܰܠ ܪܺܝܫܶܗ܀

ܫܠܶܝܢ ܗ̱ܘܰܘ ܟܶܢ̈ܫܶܐ ܟܰܕ ܩܳܝܡܺܝܢ܆ ܘܰܢܚܶܬ ܚܰܬܢܳܐ ܠܓܰܘ ܝܽܘܪܕܢܳܢ܆ ܥܡܰܕ ܩܰܕܺܝܫܳܐ ܡܶܚܕܳܐ ܣܠܶܩ܆ ܘܰܐܙܠܶܓ ܢܽܘܗܪܶܗ ܥܰܠ ܥܳܠܡܳܐ܀

ܪܽܘܚܳܐ ܢܶܚܬ ܗ̱ܘܳܐ ܡܶܢ ܪܰܘܡܳܐ܆ ܒܰܕܡܽܘܬܳܐ ܕܓܽܘܫܡܳܐ ܕܝܰܘܢܳܐ܆ ܘܰܚܙܳܬܶܗ ܟܰܠܬܳܐ ܘܕܳܨܰܬ܆ ܘܪܶܗܛܰܬ ܒܶܪܟܰܬ ܣܶܓܕܰܬ ܠܶܗ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀