ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܫܶܠܡܰܬ ܡܶܠܬܶܗ ܕܰܢܒܺܝܳܐ܆ ܕܶܐܬܢܰܒܺܝ ܥܰܠ ܦܳܪܽܘܩܰܢ܆ ܕܗܳܐ ܓܰܒܪܳܐ ܘܰܫܡܶܗ ܕܶܢܚܳܐ܆ ܕܰܕܢܰܚ ܝܰܘܡܳܢ ܒܰܒܪܺܝܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܡܰܠܰܐܟ̈ܶܐ ܛܦܰܣܘ ܒܰܚ̈ܕܳܕܶܐ܆ ܘܚܰܦܺܝܘ ܣܪ̈ܳܦܶܐ ܐܰܦܰܝ̈ܗܽܘܢ܆ ܟܰܕ ܚܳܝܪܺܝܢ ܗ̱ܘܰܘ ܒܰܡܫܺܝܚܳܐ܆ ܕܥܳܡܶܕ ܗ̱ܘܳܐ ܡܶܢ ܝܽܘܚܰܢܳܢ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܪܺܝܟܽ ܗ̱ܘ ܓܰܙܳܐ ܕܥܽܘܕܪ̈ܳܢܶܐ܆ ܕܶܐܬܳܐ ܘܰܐܥܬܰܪ ܠܰܣܢܺܝ̈ܩܶܐ܆ ܒܪܺܝܟ ܟܰܣܝܳܐ ܕܶܐܬܳܐ ܠܓܶܠܝܳܐ܆ ܕܰܢܩܰܕܶܫ ܠܰܢ ܒܰܥܡܳܕܶܗ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܝܽܘܡ ܕܶܢܚܳܟ ܚܳܕܝܳܐ ܥܺܕܬܳܐ܆ ܘܪܳܘܙܳܐ ܬܺܒܶܝܠ ܒܰܡܠܳܐܳܗ̇܆ ܘܙܳܡܪܺܝܢ ܫܽܘܒܚܳܐ ܘܬܰܘܕܺܝܬܳܐ܆ ܕܰܚܙܰܘ ܢܽܘܗܪܳܐ ܫܰܪܺܝܪܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܕܶܢܚܳܟ ܡܳܪܝ ܢܶܗܪܰܬ ܬܺܒܶܝܠ܆ ܘܰܦܢܰܘ ܥܰܡ̱̈ܡܶܐ ܡܶܢ ܛܽܘܥܝܰܝ܆ ܘܶܐܬܩܰܕܫܰܬ ܡܰܥܡܽܘܕܺܝܬܳܐ܆ ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܐܰܝܟܰܢܳܐ ܡܰܨܝܳܐ ܕܢܰܥܡܶܕ܆ ܥܰܒܕܳܐ ܠܡܳܪܳܐ ܡܩܰܕܶܫ ܟܽܠ܆ ܘܰܐܝܟܰܢܳܐ ܐܶܣܺܝܡ ܐܺܝ̈ܕܰܝ܆ ܥܰܠ ܢܽܘܪܳܐ ܘܶܐܢܳܐ ܚܰܒܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܩܽܘܩܳܝܳܐ
ܟܽܠܳܗ̇ ܐܰܪܥܳܐ ܕܶܐܦܶܣܳܘܣ

ܕܠܳܐ ܢܽܘܪܳܐ ܘܰܕܠܳܐ ܩܰܝ̈ܣܶܐ ܚܰܡܘ ܗ̱ܘܰܘ ܡܰܝ̈ܳܐ܆ ܟܰܕ ܐܶܬܳܐ ܒܪܳܐ ܕܰܐܠܳܗܳܐ ܕܢܶܥܡܰܕ ܒܓܰܘ ܝܽܘܪܕܢܳܢ܆ ܩܪܶܒ ܝܽܘܚܰܢܳܢ. ܐܰܝܟ ܟܳܗܢܳܐ ܙܰܗܝܳܐ܆ ܘܣܳܡ ܝܰܡܺܝܢܶܗ܆ ܥܰܠ ܪܺܝܫܶܗ ܕܰܒܪܳܐ܆ ܘܩܳܠܳܐ ܐܶܬܳܐ ܡܶܢ ܪܰܘܡܳܐ ܘܗܳܟܰܢܳܐ ܐܶܡܰܪ܆ ܕܗܳܢܰܘ ܒܶܪܝ ܘܗܳܢܰܘ ܚܰܒܺܝܒܝ ܕܣܰܟܺܝܘ ܠܶܗ ܥܳܠ̈ܡܶܐ ܗ̄ܘܗ̄܀

ܫܽܘܒܚܳܐ

ܬܶܗܪܳܐ ܪܰܒܳܐ ܗܘܳܐ ܐܰܚܰܝ̈ ܥܰܠ ܝܽܘܪܕܢܳܢ ܢܰܗܪܳܐ܆ ܟܰܕ ܩܳܠܶܗ ܕܰܐܒܳܐ ܓܢܺܝܙܳܐ ܐܰܙܥܶܩ ܡܶܢ ܪܰܘܡܳܐ܆ ܫܡܰܥܘ ܗ̱ܘܰܘ ܥܰܡ̱̈ܡܶܐ. ܘܨܳܬܝ̈ ܗ̱ܘܰܝ̈ ܐܶܡ̈ܘܳܬܳܐ܆ ܟܰܕ ܐܳܡܰܪ ܗ̱ܘܳܐ܆ ܕܗܳܢܰܘ ܒܶܪܝ ܚܰܒܺܝܒܝ܆ ܘܗܽܘ ܡܩܰܕܶܫ ܡܰܥܡܽܘܕܺܝܬܳܐ ܠܚܽܘܣܳܝ ܚܰܘ̈ܒܶܐ܆ ܘܗܽܘ ܡܰܠܒܶܫ ܐܶܣܛܰܠ ܫܽܘܒܚܳܐ ܠܳܐܕܳܡ ܘܰܠܝܰܠ̈ܕܰܘܗ̱ܝ܆ ܗ̄ܘܗ̄܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܒܬܽܘܠܬܳܐ ܩܪܳܬܰܢܝ ܕܺܐܡܰܪ ܫܰܪܒܳܗ̇

ܥܽܘܢܺܝܬܳܐ: ܠܳܟ ܬܶܫܒܽܘܚܬܳܐ ܒܝܰܘܡܳܐ ܕܕܶܢܚܳܟ ܡܶܢ ܡܰܪܥܺܝܬܳܟ.

ܒܝܰܘ̈ܡܰܝ ܡܰܠܟܳܐ. ܕܰܟܬܰܒ ܐ̱ܢܳܫ̈ܳܐ ܒܰܟܣܶܦ ܪܺܝܫܳܐ܆ ܢܚܶܬ ܦܳܪܽܘܩܰܢ ܘܰܟܬܰܒ ܐ̱ܢܳܫ̈ܳܐ܆ ܒܰܣܦܰܪ ܚܰܝ̈ܶܐ ܕܰܐܠܳܗܽܘܬܶܗ܆ ܒܰܐܪܥܳܐ ܟܰܬܒܽܘܗ̱ܝ܆ ܒܪܰܘܡܳܐ ܟܰܬܒܰܢ ܒܪܺܝܟ ܫܳܠܽܘܚܶܗ܀

ܫܢܰܝ̈ܳܐ ܬܠܳܬܺܝܢ. ܩܰܘܺܝ ܒܰܐܪܥܳܐ ܡܶܣܟܺܢܳܐܺܝܬ܆ ܩ̈ܳـܠܶܐ ܕܫܽܘܒܚܳܐ ܒܩܳܠ ܦܽܘܪܫܳܢܳܐ܆ ܢܶܓܕܽܘܠ ܐܰܚܰܝ̈ ܠܰܫܢܰܝ̈ ܡܳܪܰܢ܆ ܠܰܫ̈ܢܺܝܢ ܬܠܳܬܺܝܢ܆ ܟܠܺܝ̈ܠܺܝܢ ܬܠܳܬܺܝܢ ܒܪܺܝܟ ܡܶܢܝܳܢܶܗ܀

ܒܫܰܢ̱ܬܳܐ ܕܬܰܪܬܶܝܢ. ܣܪ̈ܳܦܶܐ ܣܰܓܺܝ ܢܰܘܕܽܘܢ ܥܰܡܰܢ܆ ܕܟܰܕ ܡܫܰܡܫܺܝܢ ܗ̱ܘܰܘ ܠܰܒܪܳܐ ܒܪܰܘܡܳܐ܆ ܚܙܰܐܽܘܗ̱ܝ ܒܰܐܪܥܳܐ ܕܰܡܫܰܡܶܫ ܗ̱ܘܳܐ܆ ܐܰܫܺܝܓ ܪ̈ܶܓܠܶܐ܆ ܡܪܰܩ ܢܰܦ̈ܫܳܬܳܐ ܒܪܺܝܟ ܫܳܠܽܘܚܶܗ܀

ܒܫܰܢ̱ܬܳܐ ܕܰܐܪܒܰܥ. ܬܰܘܕܶܐ ܥܰܡܰܢ ܫܡܰܝܳܐ ܕܟܽܠܳܗ̇܆ ܙܥܽܘܪܝܳܐ ܗ̱ܝ ܠܰܒܪܳܐ ܘܬܶܗܪܰܬ ܕܰܚܙܳܬ܆ ܕܰܓܢܶܐ ܒܥܰܪܣܶܗ ܕܙܰܟܰܝ ܡܳܟܣܳܐ܆ ܗܽܘ ܡܠܶܐ ܫܡܰܝܳܐ܆ ܘܰܡܠܶܐ ܥܰܪܣܳܐ ܠܶܗ ܪܰܒܽܘܬܳܐ܀

ܒܫܰܢ̱ܬܳܐ ܕܫܶܬ ܬܽܘܒ܆ ܢܰܘܕܶܐ ܥܰܡܰܢ ܐܳܐܰܪ ܟܽܠܶܗ܆ ܕܰܒܪܰܒܽܘܬܶܗ ܡܶܬܓܰܝܶܐܐ ܗ̱ܘܳܐ܆ ܚܙܳܐ ܗ̱ܘܳܐ ܠܡܳܪܶܗ ܪܰܒܳܐ ܕܰܗܘܳܐ܆ ܥܽܘܠܳܐ ܙܥܽܘܪܳܐ܆ ܒܥܽܘܒܳܐ ܙܥܽܘܪܳܐ ܒܪܺܝܟ ܐܺܝܩܳܪܶܗ܀

ܘܰܒܫܰܢ̱ܬܳܐ ܬܽܘܒ܆ ܗܳܝ ܕܰܬܡܳܢܶܐ ܒܪܺܝܬܳܐ ܬܫܰܒܰܚ܆ ܕܝܳܢܩܺܝܢ ܦܺܐܪ̈ܶܐ ܡܶܢ ܡܰܒܽܘ̈ܥܶܝܗ̇܆ ܣܶܓܕܰܬ ܕܰܚܙܳܬ ܠܰܒܪܳܐ ܒܟܶܢܦܳܐ܆ ܕܝܳܢܶܩ ܡܶܢܳܗ̇. ܚܰܠܒܳܐ ܕܰܟܝܳܐ ܒܪܺܝܟ ܨܶܒܝܳܢܶܗ܀

ܒܫܰܢ̱ܬܳܐ ܕܰܥܣܰܪ܆ ܛܽܘܪܳܐ ܕܣܺܝܢܰܝ ܢܫܰܒܰܚ ܕܰܫܦܰܪ܆ ܩܽܘܕܡܰܬ ܡܳܪܶܗ ܚܙܳܐ ܕܥܰܠ ܡܳܪܶܗ܆ ܟ̈ܺܐܦܶܐ ܫܩܰܠܘ ܗ̱ܘܰܘ ܩܰܒܶܠ ܟܺܐܦ̈ܶܐ܆ ܕܥܺܕܬܳܐ ܢܶܒܢܶܐ܆ ܠܥܶܠ ܡܶܢ ܟܺܐܦܰܘ̈ܗ̱ܝ ܒܪܺܝܟ ܒܶܢܝܳܢܶܗ܀

ܒܫܰܢ̱ܬܳܐ ܕܬܰܪܬܶܝܢ܆ ܘܰܥܣܰܪ ܢܰܘܕܶܐ ܗܰܝܟܰܠ ܩܽܘܕܫܳܐ܆ ܕܰܚܙܳܐ ܠܰܒܪܳܐ ܟܰܕ ܝܳܬܶܒ ܗ̱ܘܳܐ܆ ܒܰܝܢܳܬ ܣܳܦܪ̈ܶܐ ܠܒܶܫ ܐܽܘ̈ܟܳܡܶܐ܆ ܕܒܳܥܶܐ ܒܥܺܐܕܳܐ. ܐܶܡܰܪ ܦܶܨܚܳܐ ܒܪܺܝܟ ܚܽܘܣܳܝܶܗ܀

ܒܫܰܢ̱ܬܳܐ ܕܰܥܣܰܪ ܘܰܐܪܒܰܥ ܢܰܘܕܶܐ ܦܶܨܚܳܐ ܕܡܶܨܪܶܝܢ܆ ܠܦܶܨܚܳܐ ܕܶܐܬܳܐ ܘܰܐܦܨܰܚ ܟܽܘܠܳܐ܆ ܘܰܚܠܳܦ ܦܶܪܥܽܘܢ ܛܰܒܥܶܗ ܠܠܶܓܝܽܘܢ܆ ܚܠܳܦ ܦܰܪ̈ܳܫܶܐ܆ ܠܫ̈ܺܐܕܶܐ ܚܰܢܶܩ ܒܪܺܝܟ ܦܽܘܪܥܳܢܶܗ܀

ܒܫܰܢ̱ܬܳܐ ܕܰܥܣܰܪ܆ ܘܰܕܫܶܬ ܬܰܘܕܶܐ ܚܶܛܬܳܐ ܒܦܺܐܪ̈ܶܝܗ̇܆ ܠܗܰܘ ܐܰܟܳܪܳܐ ܕܰܙܪܰܥ ܢܰܦܫܶܗ܆ ܒܰܐܪܥܳܐ ܥܩܰܪܬܳܐ ܕܥܰܠ ܟܽܠ ܟܳܡܰܬ܆ ܫܶܘܚܰܬ ܝܶܗܒܰܬ ܠܰܚܡܳܐ ܚܰܕ̱ܬܳܐ ܒܪܺܝܟ ܐܰܟܳܪܳܗ̇܀

ܒܫܰܢ̱ܬܳܐ ܕܰܥܣܰܪ܆ ܘܰܬܡܳܢܶܐ ܬܽܘܒ ܢܰܘܕܶܐ ܚܡܺܝܪܰܢ܆ ܠܰܚܡܺܝܪ ܩܽܘܫܬܳܐ ܕܰܚܠܰܕ ܘܰܢܓܰܕ܆ ܟܽܠ ܪ̈ܶܥܝܳܢܺܝܢ ܘܰܥܒܰܕ ܐܶܢܽܘܢ܆ ܚܰܕ ܪܶܥܝܳܢܳܐ܆ ܘܚܰܕ ܝܽܘܠܦܳܢܳܐ ܒܪܺܝܟ ܝܽܘܠܦܳܢܶܗ܀

ܒܫܰܢ̱ܬܳܐ ܕܥܶܣܪܺܝܢ܆ ܢܰܘܕܶܐ ܥܰܡܰܢ ܥܽܘܬܪܳܐ ܕܙܰܒܢܳܐ܆ ܕܰܐܪܫܶܠܘ ܫܰܒܩܽܘܗ̱ܝ ܐ̱ܢܳܫ̈ܳܐ ܓܡܺܝܪ̈ܶܐ܆ ܡܶܛܽܠ ܕܰܐܥܕܺܝܘ ܘܰܐܚܶܒܘ ܪܰܚܡܽܘܗ̇ ܠܡܶܣܟܺܢܽܘܬܳܐ܆ ܡܶܛܽܠ ܛܽܘ̈ܒܶܝܗ̇ ܒܪܺܝܟ ܕܰܨܒܳܐ ܒܳܗ̇܀

ܒܫܰܢ̱ܬܳܐ ܕܥܶܣܪܺܝܢ܆ ܘܬܰܪܬܶܝܢ ܢܰܘܕܶܐ ܙܰܒܢܳܐ ܘܣܰܝܦܳܐ܆ ܕܠܳܐ ܣܦܰܩܘ ܩܰܛܠܽܘܗ̱ܝ ܠܰܒܥܶܠܕܒܳܒܳܐ܆ ܕܰܐܢ̱ܬ ܗ̱ܽܘ ܩܛܰܠܬܳܝܗ̱ܝ ܘܰܐܢ̱ܬ ܗ̱ܽܘ ܩܒܰܥܬܳܗ̇܆ ܠܶܐܕܢܳܐ ܕܦܰܣܩܳܗ̇܆ ܣܰܝܦܶܗ ܕܫܶܡܥܽܘܢ ܒܪܺܝܟ ܚܽܘܠܡܳܢܳܟ܀

ܒܫܰܢ̱ܬܳܐ ܕܥܶܣܪܺܝܢ܆ ܘܰܐܪܒܰܥ ܢܰܘܕܶܐ ܥܽܘܬܪܳܐ ܠܡܳܪܰܢ܆ ܬܗܰܪܘ ܗ̱ܘܰܘ ܓ̈ܰܙܶܐ ܒܡܳܪܶܐ ܓ̈ܰܙܶܐ܆ ܟܰܕ ܡܶܬܪܰܒܶܐ ܒܶܝܬ ܡܶܣ̈ܟܺܢܶܐ܆ ܡܰܣܟܶܢ ܢܰܦܫܶܗ. ܕܰܠܟܽܠ ܢܰܥܬܰܪ ܒܪܺܝܟܽ ܗ̱ܘ ܥܽܘܬܪܶܗ܀

ܒܫܰܢ̱ܬܳܐ ܕܥܶܣܪܺܝܢ܆ ܘܰܕܫܶܬ ܢܰܘܕܶܐ ܥܰܡܰܢ ܡܽܘܫܶܐ܆ ܕܰܕܚܶܠ ܘܰܥܪܰܩ ܡܶܢ ܝܰܕ ܩܶܛܠܳܐ܆ ܢܰܘܕܶܐ ܠܰܒܪܳܐ ܕܗܽܘܝܽܘ ܒܪ̈ܶܓܠܰܘܗ̱ܝ܆ ܥܰܠ ܠܳܗ̇ ܠܰܫܝܽܘܠ܆ ܒܪܺܝܟܽ ܗ̱ܘ ܕܒܰܙܳܗ̇ ܒܝܽܘܡ ܢܽܘܚܳܡܶܗ܀

ܒܫܰܢ̱ܬܳܐ ܕܥܶܣܪܺܝܢ܆ ܐܳܦ ܕܰܬܡܳܢܶܐ ܢܰܘܕܽܘܢ ܥܰܡܰܢ܆ ܟܽܠ ܓܰܢ̱ܒܳܪ̈ܶܐ ܕܠܳܐ ܦܰܪܩܽܘܢ ܗ̱ܘܰܘ܆ ܡܶܢ ܫܰܒܳܝܳܐ ܚܰܕ ܕܶܝܢ ܣܓܺܝܕܳܐ܆ ܕܰܗܘܳܐ ܢܟܺܝܣܳܐ܆ ܘܰܐܕܪܶܟ ܦܰܪܩܰܢ ܒܪܺܝܟ ܦܽܘܨܳܝܶܗ܀

ܒܫܰܢ̱ܬܳܐ ܕܺܐܝܬܶܝܗ̇܆ ܗܳܝ ܕܰܬܠܳܬܺܝܢ ܢܰܘܕܽܘܢ ܥܰܡܰܢ܆ ܡܺܝ̈ܬܶܐ ܕܰܚܝܰܘ ܒܝܽܘܡ ܡܶܐܬܺܝܬܶܗ܆ ܘܚܰܝ̈ܶܐ ܕܰܚܝܰܘ ܒܰܙܩܺܝܦܽܘܬܶܗ܆ ܘܪܰܘܡܳܐ ܘܥܽܘܡܩܳܐ܆ ܒܶܗ ܐܶܫܬܰܝܰܢܘ ܒܪܺܝܟ ܥܰܡ ܐܰܒܽܘܗ̱ܝ܀

ܐ̱ܚܪܺܢܳܐ

ܩܳܠܳܐ ܒܩ̄: ܪܽܘܚܳܐ ܒܕܰܘܺܝܕ

ܥܽܘܢܺܝܬܳܐ: ܒܪܺܝܟ ܕܰܥܡܰܕ ܕܰܠܟܽܘܢ ܢܰܥܡܶܕ܆ ܕܬܶܬܚܰܣܽܘܢ ܡܶܢ ܚܰܘ̈ܒܰܝܟܽܘܢ.

ܕܳܠܰܬ ܪܽܘܚܳܐ ܡܶܢ ܪܰܘܡܳܐ܆ ܘܩܰܕܫܰܬ ܡܰܝ̈ܳܐ ܒܪܽܘܚܳܦܳܗ̇܆ ܒܡܰܥܡܽܘܕܺܝܬܶܗ ܕܝܽܘܚܰܢܳܢ܆ ܫܶܒܩܰܬ ܟܽܠ ܘܰܫܪܳܬ ܥܰܠ ܚܰܕ܆ ܗܳܫܳܐ ܕܶܝܢ ܢܶܚܬܰܬ ܘܰܫܪܳܬ܆ ܥܰܠ ܟܽܠ ܕܺܝܠܺܝܕ ܡܶܢ ܡܰܝ̈ܳܐ܀

ܕܽܘܡܳܪܰܐ ܗ̱ܘ ܕܰܡܕܰܟܶܐ ܟܽܠ܆ ܠܡܰܝ̈ܳܐ ܢܚܶܬ ܕܰܢܕܰܟܶܐ ܟܽܠ܆ ܝܰܡ̱̈ܡܶܐ ܛܽܘܒܳܐ ܝܰܗ̱ܒܘ ܗ̱ܘܰܘ ܠܶܗ܆ ܠܝܽܘܪܕܢܳܢ ܢܰܗܪܳܐ ܕܰܥܡܰܕܬ ܒܶܗ܆ ܘܡܰܝ̈ܳܐ ܕܒܰܫܡܰܝܳܐ ܚܣܰܡܘ ܗ̱ܘܰܘ܆ ܕܠܳܐ ܫܘܰܘ ܕܢܶܗܘܽܘܢ ܠܡܰܣܚܽܘܬܳܟ܀

ܕܽܘܡܳܪܳܐ ܪܰܒܳܐ ܐܰܚܰܝ̈܆ ܕܟܰܕ ܡܠܶܝܢ ܡܰܒܽܘ̈ܥܶܐ ܡܰܝ̈ܳܐ܆ ܠܚܽܘܕ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܡܨܶܝܢ ܚܰܝܠܳܐ ܠܰܡܚܰܣܳܝܽܘ܆ ܚܰܝܠܬܳܢܺܝ̈ܢ ܡܰܝ̈ܳܐ ܕܝܰܡ̱̈ܡܶܐ܆ ܘܰܡܚܺܝܠܺܝܢ ܡܶܢ ܕܰܢܚܰܣܽܘܢ܀

ܡܰܠܰܐܟ̈ܶܐ ܝܰܘܡܳܢ ܚܳܕܶܝܢ܆ ܒܚܰܕ ܚܰܛܳܝܳܐ ܡܳܐ ܕܬܳܐܶܒ܆ ܟܡܳܐ ܝܰܬܺܝܪ ܚܳܕܶܝܢ ܗܳܫܳܐ܆ ܟܽܠܗܽܘܢ ܬܶܓ̈ܡܶܐ ܕܰܫܡܰܝܳܐ܆ ܕܗܳܐ ܝܳܠܕܳܐ ܡܰܥܡܽܘܕܺܝܬܳܐ܆ ܫܡܰܝܳܢ̈ܶܐ ܚܠܳܦ ܐܰܪ̈ܥܳܢܶܐ܀

ܡܰܝ̈ܳܐ ܫܚܺܝ̈ܡܶܐ ܩܰܕܶܫ ܗ̱ܘܳܐ܆ ܐܶܠܺܝܫܰܥ ܒܰܫܡܳܐ ܟܰܣܝܳܐ܆ ܥܡܰܕ ܗ̱ܘܳܐ ܒܗܽܘܢ ܓܰܪܒܳܐ ܓܰܠܝܳܐ܆ ܕܰܟܝܶܗ ܗ̱ܘܳܐ ܚܰܝܠܳܐ ܟܰܣܝܳܐ܆ ܐܶܬܛܰܠܰܩ ܓܰܪܒܳܐ ܢܕܺܝܕܳܐ܆ ܐܰܝܟ ܥܽܘܠܳܐ ܒܡܰܥܡܽܘܕܺܝܬܳܐ܀

ܕܰܢܺܝܚܺܝܢ ܪ̈ܰܚܡܶܐ ܝܰܘܡܳܢ܆ ܘܡܶܢ ܣܰܘ̈ܦܶܐ ܠܣܰܘ̈ܦܶܐ ܡܬܺܝܚܺܝܢ܆ ܨܡܰܚ ܫܶܡܫܳܐ ܘܰܕܢܰܚܘ ܪ̈ܰܚܡܶܐ܆ ܘܚܶܡܠܰܬ ܥܽܘܙܳܗ̇ ܟܺܐܢܽܘܬܳܐ܆ ܚܽܘܒܳܗ̇ ܦܶܫܛܰܬ ܛܰܝܒܽܘܬܳܐ܆ ܗܳܐ ܚܢܳܢܳܐ ܘܪ̈ܰܚܡܶܐ ܡܰܓܳܢ܀

ܨܳܪ ܗ̱ܘܳܐ ܒܙܶܩ̈ܬܶܐ ܕܶܡ̈ܘܳܬܳܐ܆ ܘܒܰܢ̈ܩܰܘܳܬܳܐ ܦ̈ܶܠܳܐܬܳܐ܆ ܨܠܺܝܒܳܐ ܒܙܶܩ̈ܬܶܐ ܐܶܬܦܰܫܰܩ܆ ܘܒܰܢ̈ܩܰܘܳܬܳܐ ܢܰܦ̈ܫܳܬܳܐ܆ ܗܘܳܐ ܩܰܝܣܶܗ ܐ̱ܪܳܙܳܐ ܠܩܰܝܣܰܢ܆ ܐܳܦ ܥܳܢ̈ܶܗ ܐ̱ܪܳܙ ܡܰܪܥܺܝܬܰܢ܀

ܐܰܝܟ ܐܶܣܬܺܝܪܳܐ ܡܶܢ ܡܰܝ̈ܳܐ܆ ܣܶܠܩܶܬ ܡܶܢ ܡܰܥܡܽܘܕܺܝܬܳܐ܆ ܐܶܡܪܰܬ ܥܺܕܬܳܐ ܩܰܕܺܝܫܬܳܐ܆ ܒܢܽܘܪܳܐ ܘܪܽܘܚܳܐ ܐܶܬܚܰܫܠܶܬ܆ ܘܰܠܓܰܙܶܗ ܕܡܰܠܟܳܐ ܥܶܠܶܬ܆ ܘܠܺܝܚܺܝܕܳܝܳܐ ܐܶܬܡܰܟܪܶܬ܀

ܠܒܽܘܫܳܐ ܕܫܽܘܒܚܳܐ ܠܒܺܝܫܳܐ ܐ̱ܢܳܐ܆ ܘܢܰܚ̈ܬܶܐ ܕܢܽܘܗܪܳܐ ܥܛܺܝܦܳܐ ܐ̱ܢܳܐ܆ ܒܬܽܘܠܬܳܐ ܗܘܺܝܬ ܡܶܢ ܓܰܘ ܡܰܝ̈ܳܐ܆ ܘܗܳܐ ܦܨܺܝܚܺܝܢ ܒܺܝ ܡܰܠܰܐܟ̈ܶܐ܆ ܕܰܗܘܺܝܬ ܟܰܠܬܳܐ ܡܫܰܒܰܚܬܳܐ܆ ܠܚܰܬܢܳܐ ܕܦܰܪܩܰܢܝ ܒܰܥܡܳܕܶܗ܀

ܠܒܽܘܫܳܐ ܕܫܽܘܒܚܳܐ ܠܒܺܝܫܳܐ ܐ̱ܢܳܐ܆ ܘܢܰܚ̈ܬܶܐ ܕܢܽܘܗܪܳܐ ܥܛܺܝܦܳܐ ܐ̱ܢܳܐ܆ ܒܬܽܘܠܬܳܐ ܗܘܺܝܬ ܡܶܢ ܓܰܘ ܡܰܝ̈ܳܐ܆ ܘܗܳܐ ܦܨܺܝܚܺܝܢ ܒܺܝ ܡܰܠܰܐܟ̈ܶܐ܆ ܕܰܗܘܺܝܬ ܟܰܠܬܳܐ ܡܫܰܒܰܚܬܳܐ܆ ܠܚܰܬܢܳܐ ܕܦܰܪܩܰܢܝ ܒܰܥܡܳܕܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܫܺܝܚܳܐ ܘܡܶܫܚܳܐ

ܥܽܘܢܺܝܬܳܐ: ܡܫܺܝܚܳܐ ܒܡܶܫܚܳܐ ܗܳܐ ܪܳܫܶܡ܆ ܐܶܡܪ̈ܶܐ ܚܰܕ̱̈ܬܶܐ ܒܰܓܙܳܪܶܗ.

ܡܫܺܝܚܳܐ ܘܡܶܫܚܳܐ ܐܶܫܬܰܘܬܰܦܘ: ܟܰܣܝܳܐ ܘܓܰܠܝܳܐ ܐܶܬܡܰܙܰܓܘ: ܡܶܫܚܳܐ ܡܳܫܰܚ ܓܰܠܝܳܐܺܝܬ: ܡܫܺܝܚܳܐ ܪܫܶܡ ܟܰܣܝܳܐܺܝܬ: ܐܶܡܪ̈ܶܐ ܚܰܕ̈ܬܶܐ ܘܪ̈ܽܘܚܳܢܶܐ: ܓܙܳܪܳܐ ܕܰܬܪܶܝܢ ܢܶܨ̈ܚܳܢܰܘܗ̱ܝ: ܒܰܛܢܶܗ ܓܶܝܪ ܡܶܢ ܓܰܘ ܡܶܫܚܳܐ: ܘܡܰܘܠܳܕܶܗ ܡܶܢ ܓܰܘ ܡܰܝ̈ܳܐ܀

ܡܶܫܚܳܐ ܕܰܐܣܓܺܝ ܐܶܠܺܝܫܳܥ܆ ܛܥܽܘܡܳܐ ܠܦܽܘܡܳܐ ܗܳܘܶܐ ܗ̱ܘܳܐ܆ ܩܰܪܢܳܐ ܓܶܝܪ ܗܳܝ ܕܰܐܪܡܰܠܬܳܐ܆ ܠܰܘ ܗܺܝ ܗܘܳܬ ܕܰܡܫܺܝܚܽܘܬܳܐ܆ ܡܶܫܚܶܗ ܕܡܳܪܰܢ ܕܰܒܩܰܪܢܳܐ܆ ܠܰܘ ܕܶܝܢ ܐܽܘܟܠܳܐ ܠܦܽܘܡܳܐ ܗ̱ܘܳܐ܆ ܠܚܰܛܳܝܳܐ ܕܺܐܒܳܐ ܕܰܠܒܰܪ܆ ܐܶܡܪܳܐ ܒܥܳܢ̈ܳܐ ܥܳܒܶܕ ܠܶܗ܀

ܡܶܫܚܳܐ ܕܰܪܫܰܡ ܗ̱ܘܳܐ ܘܰܡܫܰܚ܆ ܠܰܒ̈ܢܰܝ ܐܰܗܪܽܘܢ ܠܶܘܳܝܳܐ܆ ܢܽܘܪܳܐ ܦܰܓܪ̈ܰܝܗܽܘܢ ܐܶܟܠܰܬ܆ ܢܽܘܪܳܐ ܢܰܚ̈ܬܰܝܗܽܘܢ ܢܶܛܪܰܬ܆ ܠܟܽܘܢ ܕܶܝܢ ܛܽܘܒܰܝܟܽܘܢ ܐܰܚܰܝ̈܆ ܕܢܶܚܬܰܬ ܢܽܘܪܶܗ ܕܚܰܢܳܢܳܐ܆ ܐܶܟܠܰܬ ܓܰܡܪܰܬ ܚܰܘ̈ܒܰܝܟܽܘܢ܆ ܕܰܟܝܰܬ ܩܰܕܫܰܬ ܦܰܓܪ̈ܰܝܟܽܘܢ܀

ܡܶܫܚܳܐ ܛܳܒܳܐ ܥܰܠ ܪܺܝܫܶܗ܆ ܕܡܳܪܰܢ ܡܰܪܝܰܡ ܢܶܣܟܰܬ ܗ̱ܘܳܬ܆ ܦܳܚ ܪܺܝܚܶܗ ܒܒܰܝܬܳܐ ܟܽܠܶܗ܆ ܐܳܦ ܪܺܝܚܳܐ ܕܰܡܫܺܝܚܽܘܬܟܽܘܢ܆ ܦܳܚ ܠܶܗ ܘܰܥܛܰܪ ܠܰܫܡܰܝܳܐ܆ ܘܰܠܥܺܝܪ̈ܶܐ ܕܰܠܥܶܠ ܡܒܰܣܶܡ܆ ܠܣܳܛܳܢܳܐ ܥܰܙܺܝܙ ܪܺܝܚܶܗ܆ ܘܠܰܐܠܳܗܳܐ ܚܠܶܐ ܒܽܘܣܳܡܶܗ܀

ܕܳܡܶܝܢ ܗ̱ܘܰܘ ܟܶܢ̈ܫܶܐ ܒܕܰܒܪܳܐ܆ ܠܥܶܪ̈ܒܶܐ ܕܠܳܐ ܐܺܝܬ ܠܗܽܘܢ ܪܳܥܝܳܐ܆ ܗܘܳܐ ܠܗܽܘܢ ܪܳܥܝܳܐ ܪܰܚܡܳܢܳܐ܆ ܘܰܐܣܓܺܝ ܠܗܽܘܢ ܪܶܥܝܳܐ ܕܠܰܚܡܳܐ܆ ܠܟܽܘܢ ܛܽܘܒܰܝܟܽܘܢ ܬܰܡܺܝ̈ܡܶܐ܆ ܐܶܡܪ̈ܶܐ ܪ̈ܫܺܝܡܶܐ ܕܰܡܫܺܝܚܳܐ܆ ܕܰܠܦܰܓܪܳܐ ܘܰܕܡܳܐ ܫܘܰܝܬܽܘܢ܆ ܘܗܽܘ ܪܳܥܝܳܐ ܗܘܳܐ ܠܟܽܘܢ ܪܶܥܝܳܐ܀

ܡܳܐܢܳܐ ܕܰܓܒܺܝܠ ܡܶܢ ܥܰܦܪܳܐ܆ ܩܢܶܐ ܫܽܘܦܪܳܐ ܡܶܢ ܓܰܘ ܡܰܝ̈ܳܐ܆ ܫܳܩܶܠ ܚܰܝܠܳܐ ܡܶܢ ܢܽܘܪܳܐ܆ ܘܶܐܬܚܰܒܰܠ ܐܶܢܗܽܘ ܕܰܢܦܰܠ܆ ܠܳܐ ܡܨܶܐ ܡܶܢ ܕܪܺܝܫ ܕܢܶܬܬܰܩܰܢ܆ ܗܘܰܝܬܽܘܢ ܡܳܐܢ̈ܶܐ ܠܛܰܝܒܽܘܬܳܐ܆ ܐܶܙܕܰܗܰܪܘ ܡܶܢ ܟܺܐܢܽܘܬܳܐ܆ ܕܠܳܐ ܝܳܗܒܳܐ ܬܪܶܝܢ ܬܽܘܩܳܢܺܝ̈ܢ܀

ܡܰܢܽܘ ܓܰܪܒܳܐ ܕܶܐܬܕܰܟܺܝ܆ ܘܰܦܢܳܐ ܬܽܘܒ ܘܰܪܚܶܡ ܓܰܪܒܶܗ܆ ܫܠܰܚܬܽܘܢ ܥܰܘܠܳܐ ܫܒܽܘܩܽܘܢܳܝܗ̱ܝ܆ ܕܠܰܝܬ ܕܠܳܒܶܫ ܓܰܪܒܳܐ ܕܰܫܠܰܚ܆ ܢܦܰܠ ܘܰܛܒܰܥ ܠܳܐ ܢܶܬܕܰܠܶܐ܆ ܒܳܩ ܘܰܒܠܺܝ ܠܳܐ ܢܶܬܚܰܕܰܬ܆ ܫܽܘܚܬܳܐ ܥܠܰܝܟܽܘܢ ܠܳܐ ܬܶܣܰܩ܆ ܕܡܶܫܚܶܗ ܡܫܰܚܬܽܘܢ ܕܰܡܫܺܝܚܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ
ܢܶܩܥܽܘܢ ܓܰܪ̈ܡܰܝ ܡܶܢ ܩܰܒܪܳܐ ܕܰܐܠܳܗܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܒܰܥܡܳܕܶܗ ܕܰܟܝܰܢ܆ ܘܒܰܣܚܳܬܶܗ ܐܰܠܳܗܳܝܬܳܐ ܩܰܕܫܰܢ.

ܚܙܳܬܶܗ ܥܺܕܬܳܐ ܠܝܽܘܚܰܢܳܢ܆ ܒܓܰܘ ܚܽܘܪܒܳܐ ܘܪܶܗܛܰܬ ܣܶܓܕܰܬ ܠܶܗ܆ ܘܣܶܒܪܰܬ ܠܳܗ̇ ܕܚܰܬܢܰܐ ܗ̱ܘ܆ ܘܩܶܪܒܰܬ ܕܰܬܫܰܐܠܺܝܘܗ̱ܝ܆ ܘܰܥܢܳܐ ܓܰܒܝܳܐ ܘܶܐܡܰܪ ܠܳܗ̇܆ ܕܗܳܐ ܒܳܬܰܪܝ ܐܳܬܶܐ ܘܦܳܪܶܩ ܠܶܟܝ܀

ܒܙܽܘܦܶܗ ܕܰܟܝܳܐ ܡܚܰܣܶܐ ܠܶܟܝ܆ ܘܒܰܪܣܳܣܶܗ ܡܕܰܟܶܐ ܡܩܰܕܶܫ ܠܶܟܝ܆ ܢܰܚ̈ܬܶܐ ܡܰܠܒܶܫ ܠܶܟܝ܆ ܕܢܽܘܪܳܐ ܘܰܕܪܽܘܚܳܐ܆ ܘܦܰܓܪܶܗ ܘܰܕܡܶܗ ܡܰܘܟܶܠ ܠܶܟܝ܆ ܘܒܰܓܢܽܘܢܶܗ ܡܚܰܕܶܐ ܘܡܰܦܨܰܚ ܠܶܟܝ܀

ܒܗܳܢܳܐ ܝܰܘܡܳܐ ܢܚܶܬ ܪܽܘܚܳܐ܆ ܘܩܰܕܶܫ ܗ̱ܘܳܐ ܠܡܰܒܽܘ̈ܥܶܐ ܟܽܠܗܽܘܢ܆ ܕܢܶܗܘܽܘܢ ܡܰܘܠܕܺܝܢ܆ ܒܢܰܝ̈ܳܐ ܠܰܐܠܳܗܳܐ܆ ܚܠܳܦ ܡܰܘܠܳܕܳܐ ܩܰܕܡܳܝܳܐ܆ ܕܡܰܦܪܶܝܢ ܗ̱ܘܰܘ ܪ̈ܰܚܫܳܐ ܘܦܳܪܰܚܬܳܐ܀

ܒܗܳܢܳܐ ܝܰܘܡܳܐ ܐܶܬܚܰܠܰܠ܆ ܡܶܢ ܨܳܐܬܶܗ ܐܳܕܳܡ ܥܰܦܪܳܢܳܐ܆ ܘܰܫܦܰܪ ܘܶܐܨܛܰܠܰܠ܆ ܕܰܒܠܺܝ ܘܶܐܬܬܰܠܰܠ܆ ܘܰܢܚܶܬ ܡܳܪܶܗ ܠܓܰܘ ܝܽܘܪܕܢܳܢ܆ ܘܡܶܢ ܬܰܡܳܢ ܐܰܩܢܺܝ ܠܶܗ ܫܽܘܦܪܳܐ܀

ܡܫܺܝܚܳܐ ܩܰܝܣܳܐ ܩܰܠܺܝܠܳܐ܆ ܢܚܶܬ ܕܰܠܝܶܗ ܠܳܐܕܳܡ ܕܢܰܦܺܝܠ ܗ̱ܘܳܐ܆ ܘܰܐܣܩܶܗ ܡܶܢ ܗܰܘܬܳܐ܆ ܗܳܝ ܕܒܳܗ̇ ܛܰܒܺܝܥ ܗ̱ܘܳܐ܆ ܒܰܕܡܽܘܬ ܦܰܪܙܠܳܐ ܝܰܩܺܝܪܳܐ܆ ܠܰܫܡܰܝܳܐ ܐܰܣܩܶܗ ܒܰܥܡܳܕܶܗ܀

ܡܶܚܕܳܐ ܕܰܢܚܶܬ ܠܓܰܘ ܝܽܘܪܕܢܳܢ܆ ܐܰܝܟ ܕܶܐܬܦܰܩܰܕ ܢܰܥܡܳܢ ܣܽܘܪܝܳܝܳܐ܆ ܒܰܫܒܰܥ ܓ̈ܡܳܥܳܬܳܐ܆ ܕܰܣܚܳܐ ܒܓܰܘ ܝܽܘܪܕܢܳܢ܆ ܩܢܳܐ ܕܽܘܟܳܝܳܐ ܘܚܽܘܠܡܳܢܳܐ܆ ܘܫܰܒܰܚ ܗ̱ܘܳܐ ܠܰܐܠܳܗܳܐ ܕܕܰܟܝܶܗ܀

ܥܡܰܕ ܒܶܗ ܐܶܠܺܝܳܐ ܒܝܽܘܪܕܢܳܢ܆ ܘܶܐܣܬܰܠܰܩ ܠܪܰܘܡܳܐ ܕܰܫܡܰܝܳܐ܆ ܘܚܰܘܺܝ ܕܟܽܠ ܕܣܳܚܶܐ܆ ܒܝܽܘܪܕܢܳܢ ܡܶܬܚܰܠܰܠ܆ ܘܣܳܠܶܩ ܠܪܰܘܡܳܐ ܕܰܫܡܰܝܳܐ܆ ܒܪܺܝܟ ܕܥܰܒܕܶܗ ܣܶܒܠܬܳܐ ܠܓܶܢܣܰܢ܀

ܣܽܘܓܺܝܬܳܐ

ܩܳܠܳܐ ܒܩ̄: ܥܰܡܳܐ ܘܥܰܡ̱̈ܡܶܐ

ܥܽܘܢܺܝܬܳܐ: ܒܪܺܝܟ ܕܰܐܘܠܶܕ ܠܰܢ ܬܶܢܝܳܢܽܘܬ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ.

ܐܰܠܳܗܳܐ ܩܪܳܢܝ ܠܰܚܠܽܘܠܶܗ܆ ܐܳܡܪܳܐ ܥܺܕܬܳܐ ܠܰܙܡܺܝ̈ܢܶܐ܆ ܐܶܥܽܘܠܝ ܥܰܡܶܗ ܠܰܓܢܽܘܢܳܐ܆ ܥܰܡ̱̈ܡܶܐ ܚܕܰܘ ܥܰܡܝ ܕܶܐܬܦܰܪܩܶܬ܀

ܡܶܢ ܫܽܘܩܳܐ ܕܨܰܠ̈ܡܶܐ ܣܶܠܩܶܬ܆ ܘܰܒܡܰܝ̈ܳܐ ܚܰܝ̈ܶܐ ܥܶܡܕܶܬ܆ ܒܢܽܘܪܳܐ ܘܪܽܘܚܳܐ ܐܶܬܡܰܪܩܶܬ܆ ܘܰܠܚܰܬܢܳܐ ܡܫܺܝܚܳܐ ܢܶܩܦܶܬ܀

ܒܡܶܫܚܶܗ ܡܒܰܣܡܳܐ ܐܰܕܗܶܢ ܪܺܝܫܝ܆ ܒܟܳܣܶܗ ܚܰܝܳܐ ܐܰܪܘܺܝ ܠܶܒܝ܆ ܛܳܒܺܝܢ ܪ̈ܰܚܡܰܘܗ̱ܝ ܡܶܢ ܚܰܡܪܳܐ܆ ܬܪ̈ܺܝܨܶܐ ܪܚܽܘܡܽܘܗ̱ܝ ܕܰܨܒܳܐ ܒܺܝ܀

ܢܶܦܩܶܬ ܒܳܬܪܶܗ ܒܰܒܥܳܬܶܗ܆ ܢܳܛܽܘܪ̈ܶܐ ܕܠܺܠܝܳܐ ܕܰܠܚܽܘܢܝ܆ ܫ̈ܺܐܕܶܐ ܕܢܳܛܪܺܝܢ ܚܶܫܽܘܟܳܐ܆ ܥܰܠ ܕܰܪܚܶܡܬܶܗ ܒܰܙܰܚܘ ܒܺܝ܀

ܢܽܘܪܳܐ ܕܚܽܘܒܶܗ ܐܰܪܡܺܝ ܒܺܝ܆ ܕܡܶܢ ܓܰܘ ܡܰܝ̈ܳܐ ܣܶܦܰܬ ܒܺܝ܆ ܒܪܶܓܰܬ ܚܰܝ̈ܶܐ ܫܓܺܝܪܳܐ ܐ̱ܢܳܐ܆ ܘܕܶܐܚܙܶܐ ܠܚܰܬܢܳܐ ܨܰܗܝܳܐ ܐ̱ܢܳܐ܀

ܠܒܽܘ̈ܫܶܐ ܕܫܽܘܒܚܳܐ ܠܒܺܝܫܳܐ ܐ̱ܢܳܐ܆ ܘܢܰܚ̈ܬܶܐ ܕܢܽܘܗܪܳܐ ܥܛܺܝܦܳܐ ܐ̱ܢܳܐ܆ ܒܬܽܘܠܬܳܐ ܗܘܺܝܬ ܡܶܢ ܓܰܘ ܡܰܝ̈ܳܐ܆ ܘܗܳܐ ܦܨܺܝܚܺܝܢ ܒܺܝ ܡܰܠܰܐܟ̈ܶܐ܀

ܗܳܐ ܦܬܺܝܚܳܐ ܡܰܥܡܽܘܕܺܝܬܳܐ܆ ܕܢܺܐܬܽܘܢ ܥܰܡ̱̈ܡܶܐ ܘܶܐܡ̈ܘܳܬܳܐ܆ ܘܰܒܓܰܘ ܥܽܘܒܳܗ̇ ܢܶܣܬܰܬܪܽܘܢ܆ ܒܢܰܝ̈ܳܐ ܕܰܐܒܳܐ ܫܡܰܝܳܢܳܐ܀

ܡܰܫܪܺܝܬܳܐ ܕܰܫܡܰܝܳܢ̈ܶܐ܆ ܟܪܺܝܟܳܐ ܠܳܗ̇ ܠܡܰܥܡܽܘܕܺܝܬܳܐ܆ ܕܰܢܩܰܒܠܽܘܢ ܡܶܢ ܓܰܘ ܡܰܝ̈ܳܐ܆ ܒܢܰܝ̈ܳܐ ܠܰܐܠܳܗܳܐ ܐܰܒܳܐ܀

ܟܶܢ̈ܫܶܐ ܕܪܽܘܚܳܐ ܟܪܺܝܟܺܝܢ ܠܳܗ̇܆ ܠܶܐܡܳܐ ܕܝܳܠܕܳܐ ܪ̈ܽܘܚܳܢܶܐ܆ ܕܣܰܓܺܝ ܚܳܕܶܝܢ ܪ̈ܽܘܚܳܢܶܐ܆ ܡܳܐ ܕܡܶܫܬܰܟܚܺܝܢ ܐܰܒܺܝ̈ܕܶܐ܀

ܡܰܥܠܳܢܳܐ ܕܨܶܝܕ ܐܰܠܳܗܳܐ܆ ܡܰܥܡܽܘܕܺܝܬܳܐ ܗ̱ܝ ܒܰܪ̱ܬ ܢܽܘܗܪܳܐ܆ ܘܰܐܝܢܳܐ ܕܡܶܢܳܗ̇ ܠܳܐ ܥܳܐܶܠ܆ ܕܢܶܚܙܶܐ ܠܪܳܡܳܐ ܠܳܐ ܡܶܫܟܰܚ܀

ܨܰܗܝܶܗ ܕܥܰܡܳܐ ܒܰܐܫܺܝܡܽܘܢ܆ ܥܕܰܡܳܐ ܠܟܺܐܦܳܐ ܘܶܐܣܬܰܝܰܟ܆ ܗܳܟܰܢ ܡܰܘܬܳܐ ܕܐ̱ܢܳܫܽܘܬܳܐ܆ ܡܛܳܐ ܠܰܙܩܺܝܦܳܐ ܘܶܐܬܛܰܠܰܩ܀

ܠܳܐܕܳܡ ܓܰܒܠܶܗ ܡܶܢ ܥܰܦܪܳܐ܆ ܘܶܐܬܚܰܒܰܠ ܠܶܗ ܒܰܚܛܺܝܬܳܐ܆ ܘܰܒܡܰܝ̈ܳܐ ܕܡܰܥܡܽܘܕܺܝܬܳܐ܆ ܦܢܳܐ ܠܬܽܘܩܳܢܶܗ ܩܰܕܡܳܝܳܐ܀

ܚܶܘܝܳܐ ܠܚܰܘܳܐ ܐܰܛܥܺܝ ܗ̱ܘܳܐ܆ ܘܰܓܢܰܒ ܡܶܢܳܗ̇ ܠܰܟܠܺܝܠܳܗ̇܆ ܘܰܒܪܳܗ̇ ܕܰܒܬܽܘܠܬܳܐ ܪܰܨܶܗ܆ ܘܡܶܢ ܡܰܝ̈ܳܐ ܟܠܺܝܠܳܐ ܝܰܗ̱ܒ ܠܳܗ̇܀

ܠܳܐ ܢܶܫܠܰܚ ܐܶܣܛܰܠ ܫܽܘܒܚܳܐ: ܕܰܐܠܒܶܫܬܳܢ ܡܳܪܝ ܒܰܥܡܳܕܳܐ: ܘܠܳܐ ܢܰܗܠܽܘܢ ܒܰܢ ܣܳܩܽܘܪ̈ܰܝܢ: ܘܰܢܡܰܝܩܽܘܢ ܒܰܢ ܒܥܶܠ̈ܕܒܳܒܰܝܢ܀

ܬܶܗܘܶܐ ܠܰܢ ܡܰܥܡܽܘܕܺܝܬܳܐ܆ ܙܰܝܢܳܐ ܠܽܘܩܒܰܠ ܒܥܶܠ̈ܕܒܳܒܰܝܢ܆ ܘܗܺܝ ܬܰܕܥܶܟ ܠܢܽܘܪܳܐ ܡܶܢܰܢ܆ ܘܬܰܘܪܶܬ ܠܰܢ ܡܰܠܟܽܘܬ ܪܰܘܡܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܩܳܠܳܐ ܕܩܳܪܶܐ ܒܚܽܘܪܒܳܐ ܕܺܝܗܽܘܕ ܩܪܽܘܒ ܐܰܥܡܶܕܰܝܢܝ܆ ܐܳܦ ܐܶܬܚܰܝܰܠ ܘܠܳܐ ܬܶܬܩܰܢܰܛ ܡܶܢ ܓܰܘܙܰܠܬܳܐ܆ ܫܡܰܥ ܝܽܘܚܰܢܳܢ ܡܶܠܰܝ̈ ܡܳܪܶܗ ܘܰܐܚܕܶܗ ܬܶܗܪܳܐ܆ ܘܰܐܪܟܶܢ ܪܺܝܫܶܗ ܘܰܣܓܶܕ ܩܽܘܕܡܰܘܗ̱ܝ ܘܗܳܟܰܢ ܐܶܡܰܪ܀

ܫܽܘܒܚܳܐ ܠܟܰܣܝܳܐ ܕܶܐܬܳܐ ܠܓܶܠܝܳܐ ܡܶܛܽܠܳܬܰܢ܆ ܕܢܶܚܠܽܘܛ ܢܰܦܫܶܗ ܥܰܡ ܬܰܚܬܳܝ̈ܶܐ ܒܡܰܥܡܽܘܕܺܝܬܳܐ܆ ܟܽܠܗܽܘܢ ܥܰܡ̱̈ܡܶܐ ܕܰܦܪܰܩܬ ܐܶܢܽܘܢ ܒܝܰܕ ܡܽܘܟܳܟܳܟ܆ ܢܰܣܩܽܘܢ ܫܽܘܒܚܳܐ ܠܳܟ ܡܳܪܝ ܘܠܰܐܒܽܘܟ ܘܰܠܪܽܘܚܩܽܘܕܫܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀