ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܫܒܺܝܚ ܕܽܘܟܪܳܢܳܟ ܝܽܘܚܰܢܳܢ. ܘܗܳܐ ܢܳܨܰܚ ܒܰܐܪܒܰܥ ܦܶܢ̈ܝܳܢ܆ ܘܥܺܕܰܬ ܩܽܘܕܫܳܐ ܗܳܐ ܙܳܡܪܳܐ܆ ܬܶܫܒܽܘܚܬܳܐ ܒܝܽܘܡ ܕܽܘܟܪܳܢܳܟ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܓܰܘ ܦܺܝܢܟܳܐ ܥܰܠ ܠܰܣܡܳܟܳܐ: ܪܺܝܫܶܗ ܚܰܣܝܳܐ ܘܩܰܕܺܝܫܳܐ: ܘܥܺܕܰܬ ܩܽܘܕܫܳܐ ܡܗܰܝܡܰܢܬܳܐ: ܗܳܐ ܒܳܣܡܳܐ ܒܰܛܥܳܡ̈ܳܬܶܗ: ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܦܫܽܘܛ ܩܰܕܺܝܫܳܐ ܝܰܡܺܝܢܳܟ܆ ܕܥܰܠ ܪܺܝܫ ܡܳܪܳܟ ܐܶܬܬܣܺܝܡܰܬ܆ ܘܒܰܪܶܟ ܟܶܢ̈ܫܶܐ ܕܶܐܬܛܰܝܰܒܘ܆ ܕܰܢܙܰܝܚܽܘܢ ܝܽܘܡ ܕܽܘܟܪܳܢܳܟ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܣܒܰܪܬܶܗ ܕܡܳܪܝܳܐ ܡܶܬܟܰܪܙܳܐ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܆ ܘܝܽܘܡ ܕܽܘܟܪܳܢܶܗ ܕܟܳܪܽܘܙܳܐ܆ ܘܗܳܐ ܢܳܨܰܚ ܒܟܽܠ ܐܰܬܪ̈ܰܘܳܢ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܫܽܘܒܚܳܐ ܠܳܟ ܐܰܠܳܗܳܐ܀

ܬܶܗܪܳܐ ܪܰܒܳܐ ܘܕܽܘܡܳܪܳܐ܆ ܐܶܚܰܕ ܗ̱ܘܳܐ ܠܥܺܝܪ̈ܰܝ ܪܰܘܡܳܐ܆ ܕܰܚܙܰܐܽܘܗ̱ܝ ܠܗܰܘ ܛܰܢܳܢܳܐ܆ ܕܰܩܛܺܝܠ ܗ̱ܘܳܐ ܕܠܳܐ ܣܰܟܠܽܘܬܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܳܪܽܘܬܳܐ ܥܒܰܕ ܗ̱ܘܳܐ ܡܰܠܟܳܐ܆ ܘܟܰܢܶܫ ܠܳܗ̇ ܚܺܐܪ̈ܰܘܗ̱ܝ ܕܰܐܬܪܳܐ܆ ܘܶܐܫܬܺܝܘ ܘܰܪܘܺܝܘ ܕܳܘܰܝ̈ܳܐ܆ ܘܶܐܬܚܰܒܰܠܘ ܛܰܡ̈ܶܐܐ ܒܚܰܡܪܳܐ܆ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܫܽܘܒܚܳܐ ܠܶܗ ܠܒܰܪ ܐܰܠܳܗܳܐ܆ ܕܰܐܣܓܺܝ ܐܰܘܪܶܒ ܕܽܘܟܪܳܢܶܗ܆ ܕܝܽܘܚܰܢܳܢ ܟܳܪܽܘܙ ܩܽܘܫܬܳܐ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ ܫܽܘܒܚܳܐ ܠܳܟ ܫܽܘܒܚܳܐ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܡܳܪܝܳܐ ܡܳܪܰܢ
ܐܺܝܠ ܓܰܢ̱ܒܳܪܳܐ ܕܩܳܡ ܥܰܠ ܪܰܘܡܳܗ̇

ܒܗܳܢܳܐ ܝܰܘܡܳܐ܆ ܕܕܽܘܟܪܳܢܳܟ ܒܬܽܘܠܳܐ ܙܰܗܝܳܐ܆ ܚܳܕܶܝܢ ܥܰܡ̱̈ܡܶܐ ܘܛܽܘ̈ܗܡܶܐ ܘܫܰܪ̈ܒܳܬܳܐ܆ ܘܙܳܡܪܺܝܢ ܫܽܘܒܚܳܐ܆ ܠܰܐܠܳܗܳܐ ܕܣܳܡܳܟ ܩܽܘܕܡܰܘܗ̱ܝ܆ ܘܥܰܒܕܳܟ ܟܳܗܢܳܐ ܘܡܰܠܦܳܢܳܐ ܕܩܽܘܫܬܳܐ܆ ܐܰܢ̱ܬ ܐܰܢܗܰܪܬܳܝܗ̱ܝ܆ ܠܥܳܠܡܳܐ ܡܶܢ ܚܶܫܽܘܟܽܘܬܳܐ܆ ܘܰܐܢ̱ܬ ܩܰܪܶܒܬܳܝܗ̱ܝ ܨܶܝܕ ܢܽܘܗܪܳܐ ܡܫܺܝܚܳܐ܀

ܫܽܘܒܚܳܐ

ܗܕܺܝܪ ܒܰܢ̈ܒܺܝܶܐ܆ ܘܟܳܪܽܘܙܳܐ ܕܗܰܝܡܳܢܽܘܬܳܐ܆ ܕܰܥܬܺܝ̈ܕܳܬܳܐ ܩܰܕܶܡ ܚܰܘܺܝ ܗ̱ܘܳܐ܆ ܫܒܺܝܚ ܒܰܫܠܺܝ̈ܚܶܐ܆ ܕܠܰܣܒܰܪܬܳܐ ܡܰܚܝܳܢܺܝܬܳܐ܆ ܐܰܟܪܶܙ ܘܣܰܒܰܪ ܒܰܝܢܳܬ ܐܶܡ̈ܘܳܬܳܐ܆ ܘܰܦܐܶܐ ܒܣܳܗ̈ܕܶܐ܆ ܕܰܐܪܟܶܢ ܪܺܝܫܶܗ ܩܕܳܡ ܣܰܝܦܳܐ܆ ܥܰܠ ܕܰܐܟܶܣ ܗ̱ܘܳܐ ܡܰܠ̈ܟܶܐ ܕܠܳܐ ܟܽܘܚܳܕ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ ܡܳܪܝܳܐ
ܥܰܢܺܝ̈ܕܶܐ ܕܰܫܩܰܠܘ̱ ܦܰܓܪܳܟ ܦܳܪܽܘܩܰܢ (ܣܳܠܶܩ: ܒܰܠܡܰܪܝܰܡ ܝܳܠܕܰܬ ܐܰܠܳܗܳܐ)

ܒܳܟ ܐܶܣܬܰܝܟܰܘ ܟܽܠ ܫܽܘܦܪ̈ܺܝܢ ܝܽܘܚܰܢܳܢ: ܢܒܺܝܽܘܬܳܐ ܘܰܫܠܺܝܚܽܘܬܳܐ ܥܰܡ ܣܳܗܕܽܘܬܳܐ: ܘܡܳܪܳܟ ܐܰܣܗܶܕ ܥܰܠ ܫܽܘܦܪ̈ܰܝܟ ܟܰܕ ܐܳܡܰܪ: ܒܺܝ̈ܠܺܝܕܰܝ ܢܶܫ̈ܶܐ ܠܳܐ ܩܳܡ ܐܰܝܟ ܝܽܘܚܰܢܳܢ܀

ܒܓܰܘ ܡܰܕܒܪܳܐ ܡܰܥܡܪܳܟ ܘܒܶܝܬ ܡܰܠ̈ܟܶܐ ܩܳܠܳܟ: ܘܰܦܪ̈ܺܝܫܶܐ ܘܙܰܕܽܘ̈ܩܳܝܶܐ ܙܳܥܘ ܡܶܢ ܩܽܘܕܡܰܝܟ: ܫܒܺܝܠܳܐ ܒܬܰܘܫܳܐ ܡܫܰܦܶܐ ܗ̱ܘܰܝܬ ܠܰܦܫܺܝ̈ܛܶܐ: ܘܰܥܪ̈ܺܝܡܶܐ ܒܳܟ ܐܶܬܟܰܘܰܢܘ: ܘܶܐܬܢܰܗܰܪܘ ܗ̱ܘܰܘ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܨܠܺܝܒܳܐ ܥܒܺܝܕ ܠܶܗ ܠܥܳܠܡܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܐܘܪܶܒ܆ ܝܽܘܡ ܕܽܘܟܪܳܢܶܗ ܕܟܳܪܽܘܙ ܩܽܘܫܬܳܐ.

ܐܰܝܟ ܐܶܠܺܝܳܐ. ܒܢܽܘܪܳܐ ܓܙܰܡ ܗ̱ܘܳܐ ܠܥܳܒ̈ܕܰܝ ܥܰܘܠܳܐ܆ ܘܣܰܪܶܕ ܐܶܢܽܘܢ ܒܰܓܙܳܪ ܕܺܝܢܳܐ܆ ܕܢܶܬܠܽܘܢ ܦܺܐܪ̈ܶܐ ܕܰܬܝܳܒܽܘܬܳܐ܆ ܕܠܳܐ ܐܰܝܟ ܩܰܝ̈ܣܶܐ܆ ܒܢܽܘܪܳܐ ܢܺܐܩܕܽܘܢ ܡܶܢ ܟܺܐܢܽܘܬܳܐ܀

ܐܰܟܶܣ ܡܰܠ̈ܟܶܐ. ܐܰܦܺܝ̈ܢ ܒܰܐܦܺܝ̈ܢ ܕܠܳܐ ܟܽܘܚܳܕܳܐ܆ ܘܰܐܒܗܶܬ ܐܶܢܽܘܢ ܒܰܥܪܺܝܡܽܘܬܶܗ. ܗܘܳܐ ܡܰܟܣܳܢܳܐ ܠܡܰܠ̈ܟܶܐ ܘܟܳܗ̈ܢܶܐ܆ ܘܰܫܘܶܝܢ ܗ̱ܘܰܘ ܠܶܗ܆ ܙܥܽܘܪ̈ܶܐ ܘܪܰܘܪ̈ܒܶܐ ܟܰܕ ܡܰܠܶܦ ܗ̱ܘܳܐ܀

ܟܡܳܐ ܛܰܢܳܢ ܗ̱ܘܳܐ. ܡܳܪܝ ܝܽܘܚܰܢܳܢ ܘܰܟܡܳܐ ܕܚܺܝܠ ܗ̱ܘܳܐ܆ ܟܡܳܐ ܕܳܚܠܺܝܢ ܗ̱ܘܰܘ ܟܶܢ̈ܫܶܐ ܡܶܢܶܗ܆ ܟܡܳܐ ܫܳܡܥܺܝܢ ܗ̱ܘܰܘ ܡܰܠܦܳܢܽܘܬܶܗ܆ ܘܥܰܠ ܕܰܢܙܺܝܪ ܗ̱ܘܳܐ܆ ܣܰܓܺܝ ܪܚܺܝܡ ܗ̱ܘܳܐ ܥܰܠ ܐܰܠܳܗܳܐ܀

ܒܬܽܘܠܳܐ ܙܰܗܝܳܐ. ܟܳܪܽܘܙ ܩܽܘܫܬܳܐ ܡܳܪܝ ܝܽܘܚܰܢܳܢ܆ ܒܥܺܝ ܡܶܢ ܡܳܪܳܟ ܗܰܘ ܕܰܐܥܡܶܕܬܳܝܗ̱ܝ܆ ܘܣܳܡܬ ܝܰܡܺܝܢܳܟ ܠܥܶܠ ܡܶܢ ܪܺܝܫܶܗ܆ ܕܢܰܥܒܰܪ ܡܶܢܰܢ. ܟܽܠ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܘܕܰܘ ܥܰܡ̱̈ܡܶܐ

ܥܽܘܢܺܝܬܳܐ: ܫܽܘܒܚܳܐ ܠܡܳܪܳܟ ܒܥܺܐܕܳܟ ܟܳܪܽܘܙ ܩܽܘܫܬܳܐ ܝܽܘܚܰܢܳܢ.

ܡܶܢ ܓܰܘ ܟܰܪܣܳܐ ܓܒܳܝܗ̱ܝ ܗ̱ܘܳܐ܆ ܡܳܪܶܗ ܠܟܳܪܽܘܙ ܩܽܘܫܬܳܐ܆ ܘܰܡܠܳܝܗ̱ܝ ܪܽܘܚܳܐ ܕܩܽܘܕܫܳܐ܆ ܘܫܰܕܪܶܗ ܩܳܠܳܐ ܩܕܳܡܰܘܗ̱ܝ܆ ܕܢܶܩܪܶܐ ܠܥܰܡ̱̈ܡܶܐ ܕܰܛܥܰܘ܆ ܘܰܟܢܰܫ ܠܰܐܒܺܝ̈ܕܶܐ܆ ܒܪܺܝܟܽ ܗ̱ܘ ܕܢܰܨܰܚ ܠܥܰܒܕܶܗ܀

ܫܪܳܓܳܐ ܕܰܩܕܳܡ ܕܰܠܩܳܐ܆ ܐܶܬܚܙܺܝ ܟܳܪܽܘܙ ܩܽܘܫܬܳܐ܆ ܟܰܘܟܒܳܐ ܕܰܩܕܳܡ ܫܶܡܫܳܐ܆ ܕܰܐܢܗܰܪ ܠܥܳܠܡܳܐ ܕܰܚܫܶܟ܆ ܐܺܝܙܓܰܕܳܐ ܕܰܩܕܳܡ ܚܰܬܢܳܐ܆ ܘܡܳܟܽܘܪܳܐ ܕܥܺܕܰܬ ܩܽܘܕܫܳܐ܆ ܒܪܺܝܟܽ ܗ̱ܘ ܕܨܰܒܬܳܟ ܒܟܽܠ ܫܽܘܦܪ̈ܺܝܢ܀

ܟܰܕ ܡܰܥܡܶܕ ܗ̱ܘܳܐ ܒܚܽܘܪܒܳܐ܆ ܐܰܟܪܶܙ ܠܟܶܢ̈ܫܶܐ ܘܶܐܡܰܪ܆ ܕܗܳܐ ܡܰܠܟܽܘܬܳܐ ܩܶܪܒܰܬ܆ ܬܽܘܒܽܘܢ ܥܰܡ̱̈ܡܶܐ ܘܰܚܝܰܘ܆ ܘܡܶܢ ܦܶܬܓܳܡܰܘ̈ܗ̱ܝ ܙܳܥܘ ܗ̱ܘܰܘ܆ ܥܰܡ̱̈ܡܶܐ ܘܡܰܠ̈ܟܶܐ ܕܰܐܪܥܳܐ܆ ܒܪܺܝܟܽ ܗ̱ܘ ܕܥܰܒܕܶܗ ܟܳܪܽܘܙܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܨܠܽܘܬܳܟ ܥܰܡܰܢ ܟܳܪܽܘܙ ܩܽܘܫܬܳܐ ܨܠܽܘܬܳܟ ܥܰܡܰܢ܆

ܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܪܺܝܫܳܐ ܕܡܰܢܽܘ ܥܰܠ ܠܰܣܡܳܟܳܐ ܒܦܺܝܢܟܳܐ ܡܶܡܬܽܘܡ܆ ܐܶܠܳܐ ܕܗܳܢܳܐ ܕܺܝܚܺܝܕܳܝܰܐ ܗ̱ܘ ܒܰܥܒܺܝ̈ܕܳܬܶܗ܆ ܟܰܕ ܣܳܒܪܺܝܢ ܗ̱ܘܰܘ ܕܰܡܨܰܥܪܺܝܢ ܠܶܗ ܣܓܺܝ ܐܺܝܩܳܪܶܗ܆ ܕܶܐܬܳܐ ܒܦܺܝܢܟܳܐ ܐܰܝܟ ܪܽܘܡܝܳܢܳܐ ܘܥܰܠ ܠܰܣܡܳܟܳܐ܀

ܐܰܝܟ ܚܰܙܽܘܪܳܐ ܕܕܰܗܒܳܐ ܒܦܺܝܢܟܳܐ ܡܶܬܩܰܪܰܒ ܗ̱ܘܳܐ܆ ܩܕܳܡ ܕܰܣܡܺܝܟܺܝܢ ܪܺܝܫܳܐ ܕܫܽܘܦܪ̈ܰܘܗ̱ܝ ܠܳܐ ܡܶܬܕܰܪܟܺܝܢ܆ ܘܰܪܕܳܐ ܕܺܝܥܳܐ ܒܚܽܘܪܒܳܐ ܕܺܝܗܽܘܕ ܘܶܐܬܳܐ ܡܰܠܟܳܐ܆ ܒܝܰܘܡܳܐ ܕܥܺܐܕܶܗ ܘܣܳܡܶܗ ܒܦܺܝܢܟܳܐ ܩܕܳܡ ܕܰܣܡܺܝܟܺܝܢ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀