ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ
ܫܽܘܒܚܳܐ ܠܳܟ ܕܰܒܦܽܘܩܕܳܢܳܟ ܐܰܡܠܶܟ

ܕܳܡܶܐ ܪܺܝܫܶܗ ܕܝܽܘܚܰܢܳܢ ܠܰܣܓܽܘܠܳܐ܆ ܕܰܩܛܰܦܬܶܗ ܗܶܪܳܘܕܺܝܰܐ ܘܗܺܝ ܠܳܐ ܛܥܶܡܬܶܗ܆ ܫܰܩܠܽܘܗ̱ܝ ܟܺܐܢ̈ܶܐ ܘܙܰܕܺܝ̈ܩܶܐ ܘܗܰܝܡܶܢܘ ܒܶܗ܆ ܘܗܳܐ ܥܒܺܝܕܺܝܢ ܓܰܪ̈ܡܰܘܗ̱ܝ ܫܽܘܪܳܐ ܠܥܺܕܰܬ ܩܽܘܕܫܳܐ܀

ܫܽܘܒܚܳܐ

ܛܠܺܝܬܳܐ ܫܶܐܠܰܬ ܡܶܢ ܡܰܠܟܳܐ ܠܝܽܘܚܰܢܳܢ܆ ܘܥܺܕܬܳܐ ܫܶܐܠܰܬ ܗ̱ܘܳܬ ܡܫܺܝܚܳܐ ܡܶܢ ܦܺܝܠܰܛܳܘܣ܆ ܝܽܘܚܰܢܳܢ ܡܰܐܣܶܐ ܟܺܐܒ̈ܶܐ ܕܠܳܐ ܐܰܓܪܳܐ܆ ܘܰܡܫܺܝܚܳܐ ܫܳܒܶܩ ܚܰܘ̈ܒܶܐ ܠܰܒܢܰܝ̈ܢܳܫܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܨܠܽܘܬܳܟ ܓܰܒܝܳܐ ܡܳܪܝ ܝܽܘܚܰܢܳܢ܆ ܬܶܗܘܶܐ ܫܽܘܪܳܐ ܠܟܽܠܶܗ ܟܶܢܫܰܢ.

ܛܽܘܒܰܝܟ ܕܰܐܢ̱ܬ ܗ̱ܽܘ ܪܰܒ ܒܰܢ̈ܒܺܝܶܐ܆ ܕܡܶܢ ܪܽܘܚܩܳܐ ܠܰܡ ܐܶܬܪܰܓܪܰܓܘ ܗ̱ܘܰܘ܆ ܣܰܟܺܝܘ ܘܠܳܐ ܚܙܰܘ ܠܰܒܪܳܐ ܡܫܺܝܚܳܐ܆ ܐܰܢ̱ܬ ܕܶܝܢ ܐܺܝܕܳܟ ܣܳܡܬ ܥܰܠ ܪܺܝܫܶܗ܆ ܫܰܡܶܫܬ ܛܢܳܢܳܐ ܕܢܳܡܽܘܣܳܐ ܠܒܺܝܫ ܗ̱ܘܰܝܬ܆ ܚܰܘܺܝܬ ܚܢܳܢܳܐ ܕܠܰܡܫܺܝܚܳܐ ܠܒܺܝܫ ܗ̱ܘܰܝܬ܆ ܒܳܟ ܨܺܝܪ ܗ̱ܘܳܐ܆ ܐܶܠܺܝܳܐ ܕܠܳܐ ܐܶܬܳܐ܆ ܨܳܪܬܳܝܗ̱ܝ ܒܣܽܘܥܪ̈ܳܢܰܝܟ܀

ܒܬܶܗܪܳܐ ܐܺܡܰܪ ܥܰܠ ܝܽܘܚܰܢܳܢ܆ ܕܡܶܢ ܡܰܠ̈ܳܠܶܐ ܪܳܡܺܝܢ ܫܽܘܦܪ̈ܰܘܗ̱ܝ܆ ܗܳܢܳܐ ܕܰܗܘܳܐ ܐܰܝܟ ܡܶܨܥܳܝܳܐ܆ ܒܶܝܬ ܥܰܬܺܝܩܬܳܐ ܐܳܦ ܠܰܚܕܰܬܳܐ܆ ܒܰܢ̈ܒܺܝܶܐ ܗܳܐ ܪܫܺܝܡܺܝܢ ܐ̱ܪ̈ܳܙܰܘܗ̱ܝ܆ ܘܒܰܫ̈ܠܺܝܚܶܐ ܗܳܐ ܚܠܺܝܛܺܝܢ ܫܰܪ̈ܒܰܘܗ̱ܝ܆ ܘܰܓܕܺܝܠ ܟܠܺܝܠܶܗ܆ ܥܰܡܗܽܘܢ ܕܢܰܨܺܝ̈ܚܶܐ܆ ܘܣܳܗ̈ܕܶܐ ܩܰܕܺܝ̈ܫܶܐ܀

ܒܥܺܝ ܘܶܐܬܟܰܫܰܦ ܠܗܰܘ ܕܰܐܥܡܶܕܬܳܝܗ̱ܝ܆ ܡܶܛܽܠ ܪ̈ܰܚܡܰܘܗ̱ܝ ܒܝܽܘܪܕܢܳܢ ܢܰܗܪܳܐ܆ ܕܫܰܝܢܶܗ ܪܰܒܳܐ ܢܰܡܠܶܟ ܒܰܐܪܥܳܐ܆ ܘܢܰܡܠܶܟ ܫܠܳܡܶܗ ܥܰܠ ܥܳܡܽܘܪ̈ܶܝܗ̇܆ ܘܥܺܕ̄ܬܳܐ ܕܗܳܐ ܡܝܰܩܪܳܐ ܕܽܘܟܪܳܢܳܟ܆ ܬܶܬܢܰܛܰܪ ܡܶܢ ܒܺܝܫܳܐ ܘܚܰܝܠܶܗ܆ ܘܫܽܘܒܚܳܐ ܬܰܣܶܩ܆ ܠܰܡܫܺܝܚܳܐ ܕܰܐܘܪܶܒ ܝܽܘܡ ܥܺܐܕܳܟ ܦܰܐܝܳܐ܀

ܣܳܡ ܝܰܡܺܝܢܶܗ ܥܰܠ ܪܺܝܫ ܡܳܪܶܗ܆ ܕܶܐܬܳܐ ܢܚܰܕܶܬ ܨܰܠܡܶܗ ܕܰܒܠܺܝ܆ ܐܰܟܪܶܙ ܠܰܫܡܶܗ ܒܕܰܒܪܳܐ ܕܺܝܗܽܘܕ܆ ܘܙܳܥܘ ܗ̱ܘܰܘ ܡܰܠ̈ܟܶܐ ܡܶܢ ܦܶܬܓܳܡܰܘ̈ܗ̱ܝ܆ ܘܟܰܕ ܗܽܘ ܒܚܽܘܪܒܳܐ ܐܰܟܶܣ ܠܗܶܪܳܘܕܶܣ܆ ܕܠܳܐ ܫܰܠܺܝܛ ܠܳܟ ܕܬܶܣܰܒ ܐܰܢ̱ܬܰܬ ܐܰܚܽܘܟ܆ ܘܰܕܠܳܐ ܫܰܡܥܶܗ܆ ܦܰܪܣܺܝ ܠܰܚܛܺܝܬܶܗ܆ ܒܰܐܪܒܰܥ ܦܶܢ̈ܝܳܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܩܛܺܝܠ ܗ̱ܽܘ

ܥܽܘܢܺܝܬܳܐ: ܒܪܺܝܟ ܕܰܓܒܳܐ ܠܥܺܕܬܶܗ. ܘܪܰܡܪܶܡ ܩܰܪܢܳܗ̇܆ ܒܝܰܕ ܡܳܪܝ ܝܽܘܚܰܢܳܢ܆ ܕܰܐܥܡܶܕ ܡܳܪܶܗ.

ܚܽܘܪܒܳܐ ܪܚܺܝܡ ܗ̱ܘܳܐ ܠܳܟ. ܘܒܶܗ ܐܶܬܪܰܒܺܝܬ܆ ܕܛܽܘܦܣܳܐ ܪܫܺܝܡ ܗ̱ܘܳܐ ܒܳܟ ܗܰܘ ܕܶܐܠܺܝܳܐ܆ ܒܚܰܝܠܳܐ ܘܰܒܪܽܘܚܳܐ܆ ܕܗܰܘ ܐܶܙܕܰܝܰܢܬ܆ ܕܬܶܗܘܶܐ ܡܶܨܥܳܝܳܐ ܕܕܺܝܰܐܬܺܝ̈ܩܰܣ܀

ܚܕܽܘܓܳܐ ܗܘܰܝܬ ܕܚܰܬܢܳܐ. ܐܳܦ ܫܰܘܫܒܺܝܢܳܐ܆ ܘܡܳܟܽܘܪܳܐ ܕܟܰܠܬܳܐ ܒܰܪ̱ܬ ܐܰܪ̈ܡܳܝܶܐ܆ ܐܰܢ̱ܬ ܗ̱ܽܘ ܣܰܒܰܪܬܳܗ̇܆ ܠܥܺܕܰܬ ܩܽܘܕܫܳܐ܆ ܕܳܐܬܶܐ ܠܶܗ ܡܳܪܳܐ ܕܦܳܪܶܩ ܝܰܠ̈ܕܰܝܟܝ܀

ܟܣܶܐ ܗ̱ܘܳܐ ܓܶܝܪ ܚܰܬܢܳܐ. ܘܠܳܐ ܝܺܕܺܥ ܗ̱ܘܳܐ܆ ܘܡܶܫܬܽܘܬܳܐ ܪܳܥܡܳܐ ܒܩܳܠܰܝ̈ ܫܽܘܒܚܳܐ܆ ܘܩܳܠܳܟ ܩܳܥܶܐ ܗ̱ܘܳܐ܆ ܘܠܳܐ ܫܳܠܶܐ ܗ̱ܘܳܐ܆ ܘܡܰܟܪܶܙ ܗ̱ܘܳܐ ܠܟܰܠܬܳܐ ܘܰܡܣܰܒܰܪ ܗ̱ܘܳܐ܀

ܫܽܘܒܚܳܐ ܠܗܰܘ ܕܰܐܘܪܶܒ. ܝܽܘܡ ܕܽܘܟܪܳܢܳܟ܆ ܘܝܰܩܰܪ ܥܰܕܥܺܐܕܳܟ ܒܰܐܪܒܰܥ ܦܶܢ̈ܝܳܢ܆ ܫܽܘܒܚܳܐ ܠܶܗ ܘܠܰܐܒܽܘܗ̱ܝ܆ ܘܰܠܪܽܘܚ ܩܽܘܕܫܳܐ܆ ܘܥܰܠ ܟܽܠܰܢ ܪ̈ܰܚܡܶܐ ܒܰܨ̈ܠܰܘܳܬܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܳܕܳܡ ܚܛܳܐ ܘܰܩܢܳܐ

ܥܽܘܢܺܝܬܳܐ: ܫܽܘܒܚܳܐ ܠܗܰܘ ܕܰܐܘܪܶܒ ܐܳܦ ܝܰܩܰܪ܆ ܕܽܘܟܪܳܢ ܟܳܪܽܘܙܶܗ ܒܰܒܪܺܝܬܳܐ.

ܒܓܰܘ ܟܰܪܣܳܐ ܕܰܝܶܨ ܩܕܳܡ ܡܳܪܶܗ܆ ܕܶܐܬܳܐ ܠܰܫܠܳܡܶܗ ܒܰܛܠܺܝܬܳܐ܆ ܘܰܐܟܪܶܙ ܠܰܣܒܰܪܬܶܗ ܒܶܝܬ ܟܶܢ̈ܫܶܐ܆ ܟܰܕ ܐܶܬܳܐ ܕܢܶܥܡܰܕ ܒܓܰܘ ܝܽܘܪܕܢܳܢ܆ ܕܗܳܐ ܐܳܬܶܐ ܒܳܬܰܪܝ ܦܳܪܽܘܩܳܐ܀

ܥܺܕܬܳܐ ܥܰܡ ܝܰܠ̈ܕܶܝܗ̇ ܗܳܐ ܙܳܡܪܳܐ܆ ܫܽܘܒܚܳܐ ܒܕܽܘܟܪܳܢܶܗ ܕܟܳܪܽܘܙܳܐ܆ ܘܫܳܐܠܳܐ ܡܶܢ ܡܳܪܶܗ ܚܠܳܦ ܟܽܠܰܢ܆ ܚܢܳܢܳܐ ܘܚܽܘܣܳܝܳܐ ܘܫܽܘܒܩܳܢܳܐ܆ ܒܰܨܠܽܘܬܶܗ ܪ̈ܰܚܡܶܐ ܢܶܗܘܽܘܢ ܥܠܰܝܢ܀

ܬܰܪܬܶܝܢ ܗܘܰܝ̈ ܛܽܘܦܣܳܐ ܕܕܺܝܰܐܬܺܝ̈ܩܰܣ܆ ܐܶܠܺܝܫܒܰܥ ܥܩܰܪܬܳܐ ܐܳܦ ܡܰܪܝܰܡ܆ ܕܶܐܢ ܣܳܒܬܳܐ ܪܶܘܙܰܬ ܒܰܛܠܺܝܬܳܐ܆ ܥܰܬܺܝܩܬܳܐ ܚܶܕܝܰܬ ܒܰܚܕܰܬܳܐ܆ ܒܪܺܝܟ ܕܰܥܠܰܘܗ̱ܝ ܐܰܟܪ̈ܶܙܝ ܬܰܪ̈ܬܰܝܗܶܝܢ܀

ܐܽܘܪܚܳܐ ܩܕܳܡ ܡܳܪܶܗ ܡܰܬܩܶܢ ܗ̱ܘܳܐ܆ ܘܩܳܠܳܐ ܒܓܰܘ ܕܰܒܪܳܐ ܩܳܥܶܐ ܗ̱ܘܳܐ܆ ܘܡܰܪܬܶܐ ܗ̱ܘܳܐ ܠܟܽܠܢܳܫ ܘܳܐܡܰܪ ܗ̱ܘܳܐ܆ ܕܙܰܒܢܰܐ ܗ̱ܘ ܕܬܶܫܟܚܽܘܢ ܒܶܗ ܚܰܝܰܝ̈ܟܽܘܢ܆ ܕܗܳܐ ܡܰܛܺܝ ܡܳܪܳܗ̇ ܕܡܰܠܟܽܘܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܡܶܢ ܥܳܠܡܳܐ ܡܶܕܶܡ ܠܳܐ ܟܰܢܫܶܬ ܘܡܶܢ

ܥܽܘܢܺܝܬܳܐ: ܒܪܺܝܟ ܡܳܪܳܟ ܕܰܐܘܪܶܒ ܕܽܘܟܪܳܢܳܟ܆ ܝܽܘܚܰܢܳܢ ܟܳܪܽܘܙܳܐ ܕܩܽܘܫܬܳܐ.

ܐܳܘ ܦܺܐܪܳܐ ܒܪܺܝܟܳܐ ܕܰܥܩܰܪܬܳܐ܆ ܒܪܺܝܟ ܕܙܰܡܢܰܢ ܘܰܩܪܳܢ ܠܰܚܠܽܘܠܳܟ܆ ܒܓܰܘ ܟܰܪܣܳܐ ܒܟܶܣܝܳܐ ܡܕܰܝܶܨ ܗ̱ܘܰܝܬ܆ ܩܕܳܡ ܡܳܪܳܟ ܕܶܐܬܳܐ ܠܓܰܠܝܽܘܬܳܐ܆ ܓܙܰܡ ܒܺܝܫܳܐ ܢܟܺܝܠܳܐ܆ ܕܰܢܣܺܝܡ ܒܳܟ ܡܽܘܡܳܐ܆ ܘܰܐܝܟ ܡܳܪܳܟ ܙܟܰܝܬܳܝܗ̱ܝ܆ ܒܓܰܘ ܕܰܒܪܳܐ ܒܨܰܘܡܳܟ܆ ܕܢܰܚ ܢܽܘܗܪܳܟ ܘܦܰܪܣܺܝ ܓܠܺܝ̈ܠܳܝܶܐ܆ ܪܥܶܡ ܩܳܠܳܟ ܘܰܐܦܢܺܝ ܠܚܰܛܳܝ̈ܶܐ܀

ܛܳܥܰܝ̈ܳܐ ܐܶܬܦܢܺܝܘ ܒܝܰܕ ܩܳܠܳܟ܆ ܘܰܣܓܶܕܘ ܠܶܗ ܠܡܳܪܳܟ ܓܰܠܝܳܐܺܝܬ܆ ܐܰܟܶܣ ܝܽܘܠܦܳܢܳܟ ܠܚܰܛܳܝ̈ܶܐ܆ ܘܰܥܡܳܕܳܟ ܠܛܰܡ̈ܶܐܐ ܕܰܟܺܝ ܗ̱ܘܳܐ܆ ܟܳܗܢܳܐ ܪܰܒܳܐ ܗܘܰܝܬ܆ ܥܰܠ ܝܽܘܪܕܢܳܢ ܢܰܗܪܳܐ܆ ܘܰܠܡܳܪܝܳܐ ܡܳܪܳܟ܆ ܐܰܥܡܶܕܬ ܒܝܰܡܺܝܢܳܟ܆ ܠܳܟ ܛܽܘܒܰܝܟ ܕܰܫܡܰܥܬ ܡܶܢ ܪܰܘܡܳܐ܆ ܩܳܠ ܐܰܒܳܐ ܕܰܐܙܥܶܩ ܕܗܳܢܰܘ ܒܶܪܝ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܟܳܪܽܘܙ ܩܽܘܫܬܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܝܽܘܚܰܢܳܢ ܓܰܒܪܳܐ ܕܩܽܘܫܬܳܐ܆ ܕܰܩܥܳܐ ܘܰܐܟܪܶܙ ܩܕܳܡ ܡܳܪܶܗ܆ ܕܗܳܐ ܒܳܬܰܪܝ ܐܳܬܶܐ ܡܫܺܝܚܳܐ܆ ܘܗܽܘ ܦܳܪܶܩ ܠܳܗ̇ ܠܰܒܪܺܝܬܳܐ܆ ܘܰܡܚܰܪܰܪ ܘܰܡܫܰܘܙܶܒ ܠܳܗ̇܆ ܡܶܢ ܛܳܥܝܽܘܬܳܐ ܕܰܦܬܰܟܪ̈ܶܐ܀

ܩܳܠ ܢܶܥ̈ܡܳܬܶܗ ܨܳܝܬܳܐ ܗ̱ܘܳܬ܆ ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܘܫܶܒܩܰܬ ܨܰܠ̈ܡܶܐ ܘܰܓܠܺܝ̈ܦܶܐ܆ ܘܶܐܬܡܰܟܪܰܬ ܠܺܝܚܺܝܕܳܝܳܐ܆ ܘܗܳܐ ܙܳܡܪܳܐ ܫܽܘܒܚܳܐ ܦܰܐܝܳܐ܆ ܒܝܽܘܡ ܥܺܐܕܶܗ ܠܡܳܪܝܳܐ ܕܰܓܒܳܝܗ̱ܝ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬܶܗ ܕܟܳܪܽܘܙ ܩܽܘܫܬܳܐ܆

ܒܰܨܠܽܘܬܶܗ ܘܰܒܒܳܥܽܘܬܶܗ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀