ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܗܰܘ ܕܺܝܠܺܝܕ ܡܶܢ ܐܰܒܳܐ܆ ܩܕܳܡ ܥܳܠ̈ܡܶܐ ܪܽܘܚܳܢܳܐܺܝܬ܆ ܒܬܽܘܠܬܳܐ ܡܰܪܝܰܡ܆ ܝܺܠܶܕܬܶܗ ܒܶܣܪܳܢܳܐܺܝܬ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܰܠܣܶܓܕܬܳܐ ܕܺܝܠܶܗ܆ ܨܳܒܘ ܘܶܐܬܰܘ ܪ̈ܳܥܰܘܳܬܳܐ܆ ܘܥܰܠܘ ܘܰܣܓܶܕܘ ܠܶܗ܆ ܘܩܰܪܶܒܘ ܠܶܗ ܩܽܘܪ̈ܒܳܢܰܝܗܽܘܢ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܝܰܠܕܳܐ ܡܬܽܘܡܳܝܳܐ: ܕܰܩܕܳܡ ܥܳܠ̈ܡܶܐ ܐܺܝܬܰܘܗ̱ܘ ܗ̱ܘܳܐ: ܒܚܰܪܬܳܐ ܕܙܰܒ̈ܢܶܐ: ܐܶܬܺܝܠܶܕ ܡܶܢ ܒܰܪ̱ܬ ܕܰܘܺܝܕ: ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܶܬܺܝܠܶܕ ܒܒܶܝܬ ܠܚܶܡ܆ ܝܰܠܕܳܐ ܕܺܐܝܬܰܘܗ̱ܝ ܕܽܘܡܳܪܳܐ܆ ܘܙܳܚܰܬ ܦܳܪܶܣ. ܘܣܶܓܕܰܬ ܠܶܗ ܥܰܡ ܩܽܘܪ̈ܒܳܢܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܡܶܢ ܐܰܒܳܐ ܪܽܘܚܳܢܳܐܺܝܬ܆ ܘܡܶܢ ܡܰܪܝܰܡ ܦܰܓܪܳܢܳܐܺܝܬ܆ ܐܶܬܺܝܠܶܕ ܗ̱ܘܳܐ܆ ܘܠܳܐ ܗ̱ܘܳܐ ܬܪܶܝܢ ܐܶܠܳܐ ܚܰܕ ܗ̱ܽܘ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܕܢܰܚ ܡܰܠܟܳܐ ܒܳܐܦܰܪܬܳܐ܆ ܘܪܳܥܝܳܐ ܕܥܰܡ̱̈ܡܶܐ ܒܒܶܝܬ ܠܚܶܡ܆ ܘܰܐܙܺܝܥ ܘܰܐܪܗܶܒ܆ ܠܡܰܠ̈ܟܶܐ ܘܟܳܗ̈ܢܶܐ ܘܰܢܒܺܝ̈ܶܐ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܡܶܢ ܟܰܘܟܰܒ ܢܽܘܓܗܳܐ܆ ܡܓܽܘ̈ܫܶܐ ܐܶܣܬܰܒܰܪܘ܆ ܕܗܳܐ ܒܒܶܝܬ ܠܚܶܡ܆ ܫܪܶܐ ܡܰܠܟܳܐ ܗܰܘ ܕܶܐܬܺܝܠܶܕ܆ ܗܽܘ ܐܺܝܬܰܘܗ̱ܝ ܨܶܡܚܳܐ܆ ܘܗܽܘ ܐܺܝܬܰܘܗ̱ܝ ܡܳܪܝܳܐ܆ ܘܗܽܘܝܽܘ ܕܶܐܬܺܝܠܶܕ܆ ܝܰܘܡܳܢܳܐ ܒܓܰܘ ܒܶܝܬ ܠܚܶܡ܀

ܡܰܓܰܣ ܒܰܡܥܰܪܬܳܐ܆ ܘܰܟܪܺܝܟ ܥܰܙܪܽܘܪ̈ܶܐ܆ ܘܝܳܢܶܩ ܚܰܠܒܳܐ܆ ܘܪܳܡܽ ܗ̱ܘ ܟܝܳܢܶܗ ܡܶܢ ܥܳܠ̈ܡܶܐ܆ ܡܶܬܢܰܨܰܪ ܐܰܝܟ ܫܰܒܪܳܐ܆ ܘܩܰܫܺܝܫ ܡܶܢ ܕܳܪ̈ܶܐ܆ ܘܙܳܐܶܢ ܒܶܪ̈ܝܳܬܳܐ܆ ܘܗܽܘܝܽܘ ܒܳܪܽܘܝܳܐ ܕܟܽܠܳܐ܀

ܙܡܺܝܪܬܳܐ ܕܬܶܕܡܽܘܪܬܳܐ܆ ܝܰܘܡܳܢ ܐܶܙܕܰܡܪܰܬ܆ ܡܶܢ ܡܰܠܰܐܟ̈ܶܐ܆ ܒܰܡܥܰܪܬܳܐ ܒܓܰܘ ܒܶܝܬ ܠܚܶܡ܆ ܫܽܘܒܚܳܐ ܠܰܐܠܳܗܳܐ܆ ܒܪܰܘܡܳܐ ܩܳܥܶܝܢ ܗ̱ܘܰܘ܆ ܘܥܰܠ ܐܰܪܥܳܐ ܫܠܳܡܳܐ܆ ܘܣܰܒܪܳܐ ܛܳܒܳܐ ܠܐ̱ܢܳܫܽܘܬܳܐ܀

ܥܰܠܘ ܪ̈ܳܥܰܘܳܬܳܐ܆ ܠܓܰܘ ܒܶܝܬ ܠܚܶܡ܆ ܘܶܐܫܟܰܚܘ ܬܰܡܳܢ܆ ܥܽܘܠܳܐ ܕܰܟܪܺܝܟ ܒܥܰܙܪܽܘܪ̈ܶܐ܆ ܘܟܶܢ̈ܫܶܐ ܕܡܰܠܰܐܟ̈ܶܐ܆ ܟܰܕ ܩܳܥܶܝܢ ܘܳܐܡܪܺܝܢ܆ ܩܰܕܺܝܫ ܩܰܕܺܝܫ܆ ܩܰܕܺܝܫ ܡܳܪܝܳܐ ܚܰܝܠܬܳܢܳܐ܀

ܒܪܺܝܟ ܐܰܒܳܐ ܕܫܰܠܚܳܟ܆ ܫܽܘܒܚܳܐ ܠܡܽܘܟܳܟܳܟ܆ ܒܪܺܝܟܺܝܢ ܪ̈ܰܚܡܰܝܟ܆ ܕܰܒܗܽܘܢ ܣܥܰܪܬܳܢ ܒܰܚܢܳܢܳܟ܆ ܣܓܺܝܕ ܐܰܢ̱ܬ ܡܶܢ ܟܽܠܳܐ܆ ܪܽܘܚܳܐ ܩܰܕܺܝܫܳܐ܆ ܕܰܡܚܰܣܶܐ ܠܥܰܒ̈ܕܰܘܗ̱ܝ܆ ܕܩܳܪܶܝܢ ܠܶܗ ܒܗܰܝܡܳܢܽܘܬܳܐ܀

ܫܽܘܒܚܳܐ

ܚܰܕ ܒܰܪ ܡܶܣ̈ܟܺܢܶܐ܆ ܒܪܳܗ̇ ܕܰܡܓܰܙܰܝܬܳܐ܆ ܡܰܪܗܶܒ ܪ̈ܽܘܚܳܢܶܐ܆ ܘܰܡܙܺܝܥ ܠܰܐܪ̈ܥܳܢܶܐ܆ ܐܺܝܙܓܰܕܶܗ ܦܪܰܚ ܡܛܳܐ܆ ܠܦܳܪܶܣ ܕܰܡܓܽܘ̈ܫܶܐ܆ ܘܗܽܘ ܘܶܐܡܶܗ ܗܳܫܳܐ܆ ܠܡܶܨܪܶܝܢ ܥܰܪܺܝܩܺܝܢ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܛܽܘܒܰܝܟܝ ܐܶܡܳܐ ܕܢܰܟܦܽܘܬܳܐ

ܠܥܶܠ ܒܰܫܡܰܝܳܐ ܥܰܡ ܐܰܒܽܘܗ̱ܝ܆ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ܆ ܐܰܠܳܗܳܐܺܝܬ ܡܶܙܕܰܝܰܚ܆ ܥܰܠ ܓܺܝ̈ܓܠܶܐ ܡܰܠܳܠܳـ̈ܬܳܐ܆ ܘܰܣܪ̈ܳܦܶܐ ܕܶܫܬܳܐ ܓܶܦܺܝ̈ܢ܆ ܩܰܕܺܝܫ ܩܰܕܺܝܫ ܩܰܕܺܝܫ ܩܳܥܶܝܢ ܠܶܗ܆ ܘܒܰܥܢܳܢܳܐ ܦܺܐܝܬܳܐ ܡܰܪܝܰܡ܆ ܡܰܠܝܰܬ ܥܽܘܫܢܳܐ ܐܶܙܕܰܝܰܚ܆ ܕܰܠܡܶܨܪܶܝ݉ܢ ܢܶܣܥܽܘܪ܆ ܕܰܟܪܺܝܗܳܐ ܗ̱ܘܳܬ ܘܰܟܦܺܝܦܳܐ܆ ܠܣܶܓܕܰܬ ܨܰܠ̈ܡܶܐ ܘܰܓ̈ܠܺܝܦܶܐ܆ ܘܰܐܦܢܺܝ ܐܶܢܽܘܢ ܠܺܝܕܰܥܬܳܐ ܐܰܠܳܗܳܝܬܳܐ܀

ܫܽܘܒܚܳܐ

ܒܪܺܝܟܽ ܗ̱ܘ ܝܰܠܕܳܐ ܕܕܽܘܡܳܪܳܐ܆ ܕܠܳܐ ܡܶܬܕܪܶܟ ܘܠܳܐ ܡܶܬܥܰܩܰܒ܆ ܘܰܐܝܢܳܐ ܕܰܫܡܶܗ ܕܽܘܡܳܪܳܐ܆ ܐܰܝܟ ܕܰܩܪܳܝܗ̱ܝ ܗ̱ܘܳܐ ܐܶܫܰܥܝܳܐ܆ ܕܽܘܡܳܪܳܐ ܕܟܰܕ ܐܰܠܳܗܰܐ ܗ̱ܘ܆ ܗܘܳܐ ܒܰܪܢܳܫܳܐ ܘܶܐܬܳܐ ܠܡܽܘܟܳܟܳܐ܆ ܗܘܳܐ ܡܰܘܠܳܕܶܗ ܡܶܢ ܐܶܡܳܐ܆ ܒܬܽܘܠܬܳܐ ܕܠܳܐ ܚܰܟܡܳܗ̇ ܓܰܒܪܳܐ܆ ܟܽܠܶܗ ܕܽܘ݉ܡܳܪܰܐ ܗ̱ܘ܆ ܘܬܶܗܪܳܐ ܪܰܒܳܐ ܡܰܘܠܳܕܶܗ܆ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆ ܘܗܳܐ ܙܳܡܪܳܐ ܠܶܗ ܬܶܫܒܽܘܚܬܳܐ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܒܪܺܝܟܽ ܗ̱ܘ ܡܫܺܝܚܳܐ܆ ܕܰܓܒܳܟܝ

ܢܚܶܬ ܦܳܪܽܘܩܳܐ܆ ܒܰܥ̈ܢܳܢܶܐ ܩܰܠܺܝ̈ܠܳܬܳܐ܆ ܘܠܰܐܪܥܳܐ ܕܡܶܨܪܶܝܢ ܐܶܬܘܰܥܰܕ܆ ܕܰܠܓܳܠܽܘܬܳܐ ܢܰܥܕܶܐ ܗ̱ܘܳܐ܆ ܘܓܰܝܴ̈ܣܶܐ ܚܙܰܐܽܘܗ̱ܝ ܡܶܢ ܫܶܠܝ܆ ܘܰܗܘܰܘ ܥܰܦܪܳܐ ܘܕܰܚܺܝܚܳܐ܆ ܫܽܘܒܚܳܐ ܠܶܗ ܕܰܒܝܰܕ ܪܶܡܙܶܗ܆ ܦܬܰܟܪ̈ܶܝܗ̇ ܕܰܐܪܥܳܐ ܐܶܬܬܰܒܰܪܘ܆ ܘܰܐܦܢܺܝ ܠܥܰܡ̱̈ܡܶܐ ܡܶܢ ܛܽܘܥܝܰܝ܆ ܠܗܰܝܡܳܢܽܘܬܳܐ ܕܰܫܪܳܪܳܐ܀

ܫܽܘܒܚܳܐ

ܒܽܐܘܪܝܳܐ ܪܡܶܐ ܗ̱ܘܳܐ܆ ܡܳܪܳܐ ܕܟܽܠܗܶܝܢ ܒܶܪ̈ܝܳܬܳܐ܆ ܘܶܐܬܟܰܪܰܟ ܒܓܰܘ ܥܰܙܪܽܘܪ̈ܶܐ܆ ܗܰܘ ܕܰܫܡܰܝܳܐ ܙܥܽܘܪܺܝܢ ܠܶܗ܆ ܘܺܝܢܶܩ ܚܰܠܒܳܐ ܐܰܝܟ ܫܰܒܪܳܐ܆ ܫܽܘܒܚܳܐ ܠܶܗ ܘܰܠܫܳܠܽܘܚܶܗ. ܕܫܰܠܚܶܗ ܡܶܛܽܠ ܦܽܘܪܩܳܢܰܢ܆ ܘܰܫܩܰܠ ܣܶܓܕܬܳܐ ܕܰܦܬܰܟܪ̈ܶܐ܆ ܘܣܰܚܦܶܗ ܠܒܺܝܫܳܐ ܘܰܠܚܰܝܠܶܗ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܦܶܬܓܳܡܳܐ: ܡܰܠ̈ܟܶܐ ܕܬܰܪܫܺܝܫ ܘܰܕܓܳܙܪ̈ܳܬܳܐ܆ ܩܽܘܪ̈ܒܳܢܶܐ ܢܰܝܬܽܘܢ ܠܶܗ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܒܪܳܐ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀

ܚܳܪ ܗ̱ܘܳܐ ܒܬܰܥ̈ܠܶܐ ܓܽܘܪܝܳܐ ܕܰܐܪܝܳܐ ܘܰܐܪܗܶܒ ܐܶܢܽܘܢ܆ ܘܶܐܬܬܙܺܝܥ ܟܽܠܗܽܘܢ ܘܰܢܦܰܠܘ ܩܽܘܕܡܰܘܗ̱ܝ ܐܰܝܟ ܚܰܠܳܫ̈ܶܐ܆ ܚܙܰܘ ܚܶܫܽܘ̈ܟܶܐ ܠܢܽܘܗܪܳܐ ܪܰܒܳܐ ܘܰܛܫܰܘ ܡܶܢܶܗ܆ ܕܰܒܙܰܠܺܝ̈ܩܰܘܗ̱ܝ ܪܳܕܶܦ ܗ̱ܘܳܐ ܠܗܽܘܢ ܡܶܢ ܐܰܪ̈ܥܳܬܳܐ܀

ܫܽܘܒܚܳܐ ܠܰܐܒܳܐ ܕܠܶܗ ܗ̱ܽܘ ܣܳܓ̈ܕܳܢ ܟܽܠ ܒܶܪ̈ܝܳܬܳܐ܆ ܘܣܶܓܕܬܳܐ ܠܰܒܪܳܐ ܕܟܳܦܶܝܢ ܩܽܘܕܡܰܘܗ̱ܝ ܟܽܠ ܕܶܚ̈ܠܳܬܳܐ܆ ܬܰܘܕܺܝ ܠܪܽܘܚܳܐ ܕܒܶܗ ܗ̱ܽܘ ܒܶܛܠܰܬ ܟܽܠ ܛܳܥܝܽܘܬܳܐ܆ ܚܰܕ ܗ̱ܽܘ ܟܝܳܢܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀