ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܡܫܺܝܚܳܐ ܕܰܡܠܰܟ ܢܽܘܚܳܡܳܐ

ܡܫܺܝܚܳܐ ܕܢܰܚܡܶܗ ܠܠܳܥܳܙܳܪ܆ ܘܠܰܛܠܺܝܬܳܐ ܒܰܪ̱ܬ ܝܽܘܐܳܪܳܫ܆ ܢܰܚܶܡ ܘܰܐܚܳܐ ܠܥܰܢܺܝ̈ܕܶܐ܆ ܙܒܺܝ̈ܢܰܝ ܒܰܕܡܳܟ ܝܰܩܺܝܪܳܐ܀

ܡܫܺܝܚܳܐ ܡܰܠܟܳܐ ܕܬܶܫܒܽܘܚܬܳܐ܆ ܕܓܰܠ̈ܝܳܢ ܩܕܳܡܰܝܟ ܟܰܣ̈ܝܳܬܳܐ܆ ܠܳܐ ܬܶܓܠܶܐ ܡܽܘ̈ܡܶܐ ܕܥܰܒܕܰܝ̈ܟ܆ ܡܳܐ ܕܟܰܣ̈ܝܳܬܳܐ ܡܶܬܓܰܠ̈ܝܳܢ܀

ܠܳܟ ܚܳܝܪܺܝܢ ܡܺܝ̈ܬܶܐ ܕܰܫܝܽܘܠ܆ ܬܢܰܚܶܡ ܐܶܢܽܘܢ ܡܳܪܶܐ ܟܽܠ܆ ܐܰܕܢܰܚ ܡܳܪܝ ܢܽܘܗܪܳܐ ܥܠܰܝܗܽܘܢ܆ ܘܛܰܠܳܐ ܕܪ̈ܰܚܡܶܐ ܪܽܘܣ ܠܗܽܘܢ܀

ܕܰܕܡܶܟܘ ܒܰܐܬܪܳܐ ܕܰܐܟܣܶܢܝܳܐ܆ ܢܩܽܘܡܽܘܢ ܥܰܡ ܟܺܐܢ̈ܶܐ ܕܪܰܚܡܽܘܟ܆ ܘܰܚܠܳܦ ܕܡܶܢ ܓܶܢܣܳܐ ܐܶܬܦܪܶܫܘ܆ ܥܰܡ ܡܰܠܰܐܟ̈ܶܐ ܢܶܬܚܰܠܛܽܘܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܨܠܺܝ ܡܳܪܝܳܐ ܒܪ̈ܰܚܡܶܐ

ܐܰܠܳܗܳܐ ܥܒܶܕ ܒܰܚܢܳܢܳܟ܆ ܣܰܒܪܳܐ ܛܳܒܳܐ ܠܥܰܢܺܝ̈ܕܶܐ܆ ܘܡܳܐ ܕܰܒܫܽܘܒܚܳܐ ܕܳܢܰܚ ܐܰܢ̱ܬ܆ ܢܶܥܠܽܘܢ ܥܰܡܳܟ ܠܰܓܢܽܘܢܳܐ܀

ܐܳܘ ܛܳܒܳܐ ܕܰܡܠܶܐ ܪ̈ܰܚܡܶܐ܆ ܠܳܐ ܢܶܬܬܕܺܝܢܽܘܢ ܣܳܓܽܘܕܰܝ̈ܟ܆ ܘܠܳܐ ܠܕܺܝܢܳܐ ܥܰܡܗܽܘܢ ܬܶܥܽܘܠ܆ ܕܠܳܐ ܙܳܟܶܐ ܩܕܳܡܰܝܟ ܟܽܠ ܕܚܰܝ܀

ܐܰܠܒܶܫ ܐܶܢܽܘܢ ܬܶܫܒܽܘܚܬܳܐ܆ ܠܥܰܢܺܝ̈ܕܶܐ ܕܰܫܩܰܠܘ ܦܰܓܪܳܟ܆ ܘܒܰܕܡܳܟ ܚܰܣܳܐ ܚܰܘ̈ܒܰܝܗܽܘܢ܆ ܘܢܶܚܕܽܘܢ ܥܰܡܳܟ ܒܶܝܬ ܐܰܒܽܘܟ܀

ܟܠܺܝ ܡܶܢ ܥܰܒܕܰܝ̈ܟ ܘܣܳܓܽܘܕܰܝ̈ܟ܆ ܟܽܠ ܬܰܫܢܺܝ̈ܩܶܐ ܡܰܪܺܝܪ̈ܶܐ܆ ܘܓܺܗܰܢܳܐ ܠܗܽܘܢ ܠܳܐ ܬܶܩܪܽܘܒ܆ ܘܬܰܘܠܥܳܐ ܒܓܽܘܫܡܗܽܘܢ ܠܳܐ ܬܶܣܒܰܟ܀

ܡܶܢ ܦܳܬܽܘܪܳܟ ܢܶܬܦܰܛܡܽܘܢ܆ ܘܡܶܢ ܛܳܒ̈ܳܬܳܟ ܢܶܣܬܰܒܥܽܘܢ܆ ܘܡܶܢ ܢܰܚܠܳܟ ܕܚܰܝ̈ܶܐ ܢܶܫܬܽܘܢ܆ ܘܢܶܪܘܽܘܢ ܡܶܢ ܫܽܘܡܢܶܗ ܕܒܰܝܬܳܟ܀

ܫܽܘܒܚܳܐ

ܣܓܺܝܕ ܐܰܢ̱ܬ ܡܶܢ ܟܽܠ ܒܶܪ̈ܝܳܬܳܐ܆ ܡܫܰܒܰܚ ܐܰܢ̱ܬ ܡܶܢ ܟܽܠ ܫܰܪ̈ܒܳܢ܆ ܟܽܠܗܽܘܢ ܥܰܡ̱̈ܡܶܐ ܢܰܘܕܽܘܢ ܠܳܟ܆ ܘܟܽܠ ܐܶܡ̈ܘܳܬܳܐ ܠܳܟ ܢܫܰܒܚܽܘܢ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܐܶܢ ܢܽܘܚܳܡܳܐ ܠܳܐ ܗܳܘܶܐ

ܡܳܐ ܕܰܡܝܰܒܶܒ ܫܺܝܦܽܘܪܳܐ܆ ܘܡܶܬܢܰܚܡܺܝܢ ܝܰܠ̈ܕܰܘܗ̱ܝ ܕܳܐܕܳܡ܆ ܘܙܳܥܩܳܐ ܩܰܪܢܳܐ ܒܰܩܒܺܝܪ̈ܶܐ܆ ܘܡܶܢ ܫܶܠܝ ܩܳܝܡܺܝܢ ܕܠܳܐ ܚܒܳܠܳܐ܆ ܒܩܳܠܳܟ ܚܰܝܳܐ ܢܶܬܬܥܺܝܪܽܘܢ ܐܰܝܠܶܝܢ܆ ܕܰܫܟܶܒܘ ܒܰܐܬܪܳܐ ܕܰܐܟܣܶܢܝܳܐ܆ ܘܰܚܠܳܦ ܕܰܗܘܰܘ ܬܰܘ̈ܬܳܒܶܐ܆ ܢܽܘܟܪ̈ܳܝܶܐ ܐܰܟܣ̈ܢܳܝܶܐ܆ ܒܰܐ݉ܬܪܳܐ ܡܠܶܐ ܛܽܘ̈ܒܶܐ܆ ܘܰܒܦܰܪܕܰܝܣܳܐ ܕܠܳܐ ܥܳܒܰܪ܆ ܥܰܡ ܙܰܕܺܝ̈ܩܶܐ ܢܶܬܒܰܣܡܽܘܢ܆ ܘܰܢܝܰܒܒܽܘܢ ܠܳܟ ܫܽܘܒܚܳܐ܆ ܚܰܕ̱ܬܳܐ ܒܢܽܘܚܳܡܳܐ܀

ܫܽܘܒܚܳܐ

ܐܰܕܢܰܚ ܢܽܘܗܪܳܐ ܕܛܰܝܒܽܘܬܳܟ܆ ܒܰܐܬܪܳܐ ܕܰܓܠܺܝܙ ܡܶܢ ܢܽܘܗܪܳܐ܆ ܥܰܠ ܐܰܟܣ̈ܢܳܝܶܐ ܕܰܫܟܶܒܘ ܒܳܟ. ܘܰܡܣܰܟܶܝܢ ܠܝܽܘܡ ܓܶܠܝܳܢܳܟ܆ ܘܰܦܪܽܘܥ ܐܶܢܽܘܢ ܒܽܘܣܳܡܳܐ ܚܠܳܦ ܛܽܘܪ̈ܳܦܶܐ܆ ܕܣܰܝܒܰܪܘ ܦܰܓܪ̈ܰܝܗܽܘܢ. ܕܶܐܬܓܰܙܺܝܘ ܡܶܢ ܐܰܚܰܝ̈ܗܽܘܢ܆ ܘܡܶܢ ܚܙܳܬܳܐ ܕܚܰܒܺܝ̈ܒܰܝܗܽܘܢ܆ ܥܰܡ ܓܽܘ̈ܕܶܐ ܕܥܺܝܪ̈ܶܐ܆ ܘܒܰܝܢܳܬ܆ ܟܶܢ̈ܫܶܐ ܕܩܰܕܺܝ̈ܫܶܐ܆ ܢܶܩܥܽܘܢ ܠܳܟ ܫܽܘܒܚܳܐ ܦܰܐܝܳܐ܆ ܠܳܟ ܚܰܢܳܢܳܐ ܡܢܰܚܡܳܢܳܐ܆ ܕܝܰܠ̈ܕܰܘܗ̱ܝ ܕܳܐܕܳܡ܀

ܡܶܢ ܥܳܠܰܡ

ܐܶܢ ܢܽܘܚܳܡܳܐ ܠܳܐ ܗܳܘܶܐ܆ ܡܽܘܢ ܝܺܬܰܪܘ ܣܳܗ̈ܕܶܐ ܒܩܶܛܠܳܐ. ܘܶܐܢ ܥܳܠܡܳܐ ܐ̱ܚܪܺܢܳܐ ܠܳܐ ܐܺܝܬ܆ ܙܰܕܺܝ̈ܩܶܐ ܠܡܽܘܢ ܐܶܬܟܰܫܰܪܘ. ܘܶܐܢ ܩܝܳܡܬܳܐ ܠܳܐ ܫܰܪܺܝܪܳܐ ܐܳܦܠܳܐ ܡܫܺܝܚܳܐ. ܩܳܡ ܡܶܢ ܒܶܝܬ ܡܺܝ̈ܬܶܐ. ܥܰܢܺܝ̈ܕܶܐ ܣܰܟܰܘ ܠܰܒܪܳܐ. ܕܫܰܪܺܝܪ ܣܰܒܪܳܐ ܕܫܽܘܘܕܳܝܶܗ. ܕܶܐܡܰܪ ܒܰܣܒܰܪܬܶܗ. ܕܰܒܫܳܥܬܳܐ ܕܫܳܡܥܺܝܢ ܡܺܝ̈ܬܶܐ܆ ܩܳܠܶܗ ܚܰܝܳܐ ܕܰܐ‌ܠܳܗܳܐ. ܨܳܪܶܝܢ ܩܰܒܪ̈ܶܐ ܘܢܳܦܩܺܝܢ: ܠܽܐܘܪܥܶܗ ܡܳܐ ܕܳܐܬܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܠܳܐ ܬܶܫܬܰܥܠܶܐ ܐܳܘ ܡܰܘܬܳܐ

ܠܳܐ ܬܶܟܪܶܐ ܠܟܽܘܢ ܐܰܝܠܶܝܢ ܕܰܥܢܰܕܘ ܒܰܐܟܣܶܢܝܳܐ܆ ܕܡܶܢ ܥܶܢܝܳܢܳܐ ܕܰܐܚܰܝ̈ܟܽܘܢ ܘܨܰܘܬܳܐ ܪܚܺܝܡܳܐ ܕܐ̱ܢܳܫܽܘܬܟܽܘܢ܆ ܒܫܶܢܰܬ ܙܰܒܢܳܐ ܐܶܬܓܠܶܙܬܽܘܢ܆ ܘܡܶܢ ܓܶܢܣܳܐ ܐܶܫܬܰܘܚܰܕܬܽܘܢ܆ ܡܫܺܝܚܳܐ ܣܰܒܪܳܐ ܘܣܽܘܟܳܝܳܐ܆ ܕܰܐܝܠܶܝܢ ܕܰܫܟܶܒܘ ܥܰܠ ܣܰܒܪܶܗ܆ ܒܶܝܬ ܡܰܠܟܽܘܬܳܐ ܢܒܰܣܶܡܟܽܘܢ܆ ܥܰܡ ܟܺܐܢ̈ܶܐ ܕܰܫܦܰܪܘ ܩܽܘܕܡܰܘܗ̱ܝ܀

ܫܽܘܒܚܳܐ

ܫܡܰܥܘ ܘܶܐܬܠܰܒܰܒܘ܆ ܐܰܝܠܶܝܢ ܕܰܥܢܰܕܘ ܒܰܡܫܺܝܚܳܐ܆ ܘܒܰܐܬܪܳܐ ܕܪܰܚܺܝܩ ܡܶܢ ܓܶܢܣܳܐ܆ ܘܡܶܢ ܐܰܚ̈ܶܐ ܘܡܶܢ ܐܰܒ̈ܳܗܶܐ܆ ܡܫܺܝܚܳܐ ܠܰܘܺܝ ܘܥܰܦܺܝܟܽܘܢ܆ ܘܡܰܠܺܝ ܠܟܽܘܢ ܕܽܘܟܰܬ ܛܽܘܗܡܳܐ܆ ܘܰܚܠܳܦ ܐܰܚ̈ܶܐ ܘܰܐܒܳܗ̈ܶܐ܆ ܘܒܰܝ̈ܬܳܝܶܐ ܥܰܡ ܩܰܪ̈ܺܝܒܶܐ܆ ܡܰܫܪܺܝܬܳܐ ܕܥܺܝܪ̈ܰܝ ܪܰܘܡܳܐ܆ ܟܰܣܝܳܐܺܝܬ ܠܟܽܘܢܽ ܗ̱ܘ ܠܰܘܝܰܬ܀

ܡܶܢ ܥܳܠܰܡ

ܠܳܐ ܬܶܫܬܰܥܠܶܐ: ܐܳܘ ܡܰܘܬܳܐ ܥܰܠ ܥܰܢܺܝ̈ܕܶܐ. ܕܠܳܐ ܗ̱ܘܳܐ ܡܢܳܬܳܟ ܐܺܝܬܰܝܗܽܘܢ. ܐܳܦܠܳܐ ܒܫܽܘܠܛܳܢ ܕܳܘܝܽܘܬܳܟ. ܒܳܪܽܘܝܗܽܘܢ ܓܶܝܪ ܬܰܩܺܝܦ ܗܽܘ̱: ܘܗܽܘ ܕܳܐܶܢ ܕܺܝܢܳܐ ܕܺܝܠܗܽܘܢ. ܕܕܺܝܠܶܗ ܐܺܝܬܰܝܗܽܘܢ ܥܰܒ̈ܕܶܐ: ܝܳܪ̈ܬܶܐ ܛܳܒ̈ܶܐ ܘܰܒ̈ܢܰܝܳܐ. ܘܗܽܘ ܡܦܰܨܶܐ ܠܗܽܘܢ ܡܶܢ ܐܺܝܕܰܝ̈ܟ. ܘܡܰܘܪܶܬ ܠܗܽܘܢ ܡܰܠܟܽܘܬ ܪܰܘܡܳܐ܀

ܦܶܬܓܳܡܳܐ: ܗܳܐ ܠܡܺܝ̈ܬܶܐ ܥܳܒܶܕ ܐܰܢ̱ܬ ܬܶܕܡܪ̈ܳܬܳܐ܆ ܘܓܰܢ̱ܒܳܪ̈ܶܐ ܢܩܽܘܡܽܘܢ ܘܢܰܘܕܽܘܢ ܠܳܟ܆ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܠܥܰܒܕܰܝ̈ܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ܆

ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝܫܰܝ̈ܟ܀

ܒܩܳܠܳܟ ܚܰܝܳܐ ܒܝܰܘܡܳܐ ܐ̱ܚܪܳܝܳܐ ܡܳܐ ܕܕܳܢܰܚ ܐܰܢ̱ܬ܆ ܩܪܺܝ ܠܥܰܢܺܝ̈ܕܶܐ ܕܶܐܟܰܠܘ ܦܰܓܪܳܟ ܘܶܐܫܬܺܝܘ ܠܰܕܡܳܟ܆ ܕܰܥܡܰܕܘ ܒܰܫܡܳܟ ܘܡܺܝܬܘ ܥܰܠ ܣܰܒܪܳܟ ܒܶܝܬ ܐܰܟܣܶܢܝܳܐ܆ ܒܶܝܬ ܡܰܠܟܽܘܬܳܐ ܥܰܡ ܩܰܕܺܝܫܰܝ̈ܟ ܢܶܗܘܽܘܢ ܝܳܪ̈ܬܶܐ܀

ܫܽܘܒܚܳܐ ܠܰܐܒܳܐ ܕܡܶܛܽܠ ܚܽܘܒܶܗ ܫܒܰܩܬܽܘܢ ܓܶܢܣܳܐ܆ ܘܣܶܓܕܬܳܐ ܠܰܒܪܳܐ ܕܡܶܛܽܠܳܬܶܗ ܟܦܰܪܬܽܘܢ ܒܰܐܬܪܳܐ܆ ܬܰܘܕܺܝ ܠܪܽܘܚܳܐ ܕܒܶܗ ܣܰܝܒܰܪܬܽܘܢ ܟܽܠ ܛܽܘܪ̈ܳܦܺܝܢ܆ ܒܪܺܝܟ ܕܰܒܩܳܠܶܗ ܡܩܺܝܡ ܦܰܓܪ̈ܰܝܟܽܘܢ ܠܶܗ ܬܶܫܒܽܘܚܬܳܐ܀

ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ ܡܶܢ ܩܰܒܪ̈ܰܝܗܽܘܢ܆

ܘܡܰܠܒܶܫ ܠܗܽܘܢ ܐܶܣܛܰܠ ܫܽܘܒܚܳܐ ܒܝܽܘܡ ܢܽܘܚܳܡܳܐ܀

ܐ̱ܚܪܺܢܳܐ

ܠܳܐ ܡܳܪܝ ܢܶܫܡܰܥ ܠܗܳܝ ܒܰܪ̱ܬ ܩܳܠܳܐ ܕܰܦܣܳܩ ܣܰܒܪܳܐ܆

ܕܰܐܘܕܺܝܢܰܢ ܒܳܟ ܡܳܪܝ ܐܰܘܕܳܐ ܒܰܢ ܘܪܰܚܶܡ ܥܠܰܝܢ܀