ܒܝܽܘܡ 15 ܕܟܳܢܽܘܢ ܐ̱ܚܪܳܝ

ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܡܫܰܠܶܡ ܢܽܘܗܪܶܗ ܕܺܐܝܡܳܡܳܐ
(ܣܳܠܶܩ: ܐܶܢܳܐ ܐ̱ܢܳܐ ܢܘܗܪܳܐ ܫܰܪܝܪܳܐ)

ܒܬܽܘܠܬܳܐ ܝܳܠܕܰܬ ܐܰܠܳܗܳܐ: ܒܥܳܝ ܘܶܐܬܟܰܫܰܦܝ̱ ܠܺܝܚܺܝܕܶܟܝ̱: ܕܢܶܫܪܶܐ ܫܰܝܢܶܗ ܘܰܫܠܳܡܶܗ ܒܰܐܪ̈ܒܰܥܦܶܢܝܳܢ ܕܰܒܪܺܝܬܳܐ: ܘܟܶܢܫܳܐ ܕܙܰܝܰܚ ܕܽܘܟܪܳܢܶܟܝ̱: ܥܰܡܶܟܝ̱ ܢܶܥܽܘܠ ܠܰܓܢܽܘܢ ܚܰܕ̈ܘܳܬܳܐ܀

ܫܽܘܒܚܳܐ

ܥܰܡ ܥܶܛܪܳܐ ܕܒܶܣ̈ܡܶܐ ܛܳܒ̈ܶܐ: ܢܗܶܐ ܕܽܘܟܪܳܢܳܗܿ ܕܰܒܬܽܘܠܬܳܐ: ܘܰܐܝܠܶܝܢ ܕܝܰܩܰܪܘ̱ ܕܽܘܟܪܳܢܳܗܿ: ܢܶܬܥܰܕܪܽܘܢ ܒܰܨ̈ܠܰܘܳܬܳܗܿ: ܘܰܐܫܪܳܐ ܫܰܝܢܳܟ ܘܰܫܠܳܡܳܟ: ܡܰܠܟܳܐ ܡܫܺܝܚܳܐ ܒܰܐܪܒܰܥ ܦܶܢ̈ܝܳܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܓܰܘ ܡܰܫܟܰܢܙܰܒܢܳܐ
ܕܟܺܝܪܳܐ ܗ̱ܝ ܡܒܰܪܰܟܬܳܐ܆ ܘܰܕܟܺܝܪܳܐ ܗܳܝ ܬܶܫܡܶܫܬܳܐ (ܣܳܠܶܩ: ܒܗܰܒܠܳܗ̇ ܠܥܺܕܬܳܟ)

ܡܰܢܽܘ ܚܙܳܐ ܢܶܩܝܳܐ܆ ܕܰܛܥܺܝܢܳܐ ܓܽܘܪܝܳܐ ܕܰܐܪܝܳܐ ܘܰܡܢܰܨܪܳܐ ܠܶܗ ܘܠܳܐ ܕܳܚܠܳܐ܆ ܢܶܩܝܳܐ ܗܺܝ ܡܰܪܝܰܡ܆ ܕܰܛܥܺܝܢܳܐ ܓܰܢ̱ܒܳܪ ܥܳܠ̈ܡܶܐ ܘܰܒܓܰܘ ܥܽܘܒܳܗ̇ ܐܰܓܶܢ ܫܪܳܐ܆ ܗ̄ ܘܠܳܐ ܙܳܥܰܬ ܡܶܢ ܪܰܒܽܘܬܶܗ܆ ܫܽܘܒܚܳܐ ܠܗܰܘ ܚܰܝܠܳܐ ܕܣܰܡܟܳܗ̇܀

ܫܽܘܒܚܳܐ

ܛܽܘܪܳܐ ܗܰܘ ܕܣܺܝܢܰܝ܆ ܠܳܐ ܣܦܰܩ ܗ̱ܘܳܐ ܠܚܰܝܠܶܗ ܪܰܒܳܐ܆ ܕܰܐܠܳܗܳܐ ܕܰܥܠܰܘܗ̱ܝ ܢܚܶܬ ܫܪܳܐ܆ ܒܟܰܪܣܳܗ̇ ܕܒܰܪ̱ܬ ܕܰܘܺܝܕ ܢܚܶܬ ܘܰܫܪܳܐ ܝܰܪ̈ܚܶܐ ܬܶܫܥܳܐ܆ ܫܽܘܒܚܳܐ ܠܪ̈ܰܚܡܰܘܗ̱ܝ ܟܡܳܐ ܐܶܬܪܟܶܢ܆ ܗ̄ ܒܪܺܝܟ ܕܰܐܘܪܶܒ ܕܽܘܟܪܳܢ ܐܶܡܶܗ܆ ܘܢܰܨܰܚ ܒܥܺܕ̱ܬܳܐ ܥܰܕܥܺܐܕܳܗ̇܀

ܡܰܕܪܳܫܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܒܪܺܝܟ ܕܰܕܢܰܚ ܠܰܢ܆ ܡܶܢܶܟܝ ܡܰܪܝܰܡ܆ ܘܝܰܩܰܪ ܘܰܐܘܪܶܒ ܝܽܘܡ ܕܽܘܟܪܳܢܶܟܝ.

ܛܽܘܒܰܝܟܝ ܡܰܪܝܰܡ. ܒܰܪ̱ܬ ܡܶܣ̈ܟܺܢܶܐ. ܕܰܗܘܰܝܬܝ ܐܶܡܳܐ ܠܡܳܪܶܐ ܡܰܠ̈ܟܶܐ܆ ܘܰܫܪܳܐ ܒܥܽܘܒܶܟܝ܆ ܩܰܕܺܝܫܳܐܺܝܬ܆ ܗܰܘ ܕܰܫܡܰܝܳܐ ܡܠܶܝܢ ܡܶܢ ܫܽܘܒܚܶܗ܆ ܛܽܘܒ ܠܰܬܕܰܝ̈ܟܝ ܕܰܪܬܰܚܘ ܠܶܗ ܘܰܐܝܢܩܽܘܗ̱ܝ. ܘܰܠܦܽܘܡܶܟܝ ܕܰܣܘܰܚ ܠܶܗ ܘܢܰܨܪܶܗ. ܕܪ̈ܳܥܰܝܟܝ ܙܰܝܚܳܝ̈ܗ̱ܝ܆ ܘܰܗܘܰܝܬܝ ܡܰܪܟܰܒܬܳܐ. ܘܰܛܥܶܢܬܝ ܠܢܽܘܪܳܢܳܐ܀

ܛܽܘܒܰܝܟܝ ܡܰܪܝܰܡ. ܒܬܽܘܠܬܳܐ ܕܟܺܝܬܳܐ. ܡܰܪܓܳܢܺܝܬܳܐ ܕܢܳܨܰܚ ܫܰܪܒܶܟܝ܆ ܒܰܒܬܽܘ̈ܠܳܬܳܐ܆ ܥܰܠ ܕܰܛܥܶܢܬܺܝܘܗ̱ܝ܆ ܠܦܺܐܪܳܐ ܚܰܠܝܳܐ ܘܝܳܗܶܒ ܚܰܝ̈ܶܐ܆ ܬܶܗܪܳܐ ܐܰܢ̱ܬܝ ܕܰܐܬܗܰܪܬܝ ܠܥܳܠܡܳܐ. ܕܕܽܘܡܳܪܳܐ ܕܢܰܚ ܡܶܢܶܟܝ ܟܢܺܝܟܬܳܐ. ܠܶܟܝ ܛܽܘܒܰܝܟܝ ܢܰܟܦܬܳܐ܆ ܕܒܶܟܝ ܢܶܦܩܰܬ ܒܽܘܪܟܬܳܐ. ܠܰܐܪܥܳܐ ܕܠܺܝܛܳܐ ܗ̱ܘܳܬ܀

ܬܳܐ ܐܶܫܰܥܝܳܐ. ܚܙܺܝ ܠܒܬܽܘܠܬܳܐ. ܕܰܓܡܺܝܪܺܝܢ ܒܳܗ̇ ܐ̱ܪ̈ܳܙܶܐ ܕܰܪܫܰܡܬ܆ ܗܳܐ ܫܪܶܐ ܒܥܽܘܒܳܗ̇܆ ܥܰܡܰܢܽܘܐܶܝܠ܆ ܘܝܳܢܶܩ ܚܰܠܒܳܐ ܒܰܕܡܽܘܬ ܫܰܒܪܳܐ܆ ܬܳܐ ܚܽܘܪ ܒܶܗ ܘܫܰܒܰܚ ܘܰܐܘܕܳܐ. ܘܰܩܪܺܝ ܠܰܢ̈ܒܺܝܶܐ ܕܥܰܡܳܟ ܢܶܚܕܽܘܢ. ܕܗܳܐ ܐܶܬܳܐ ܠܶܗ܆ ܘܰܓܡܰܪ ܦ̈ܶܠܳܐܬܳܐ. ܕܠܶܗ ܗܽܘ ܨܳܝܪ̈ܳܢ ܗ̱ܘܰܝ̈܀

ܛܽܘܒܰܝܟܝ ܡܰܪܝܰܡ. ܕܰܗܘܳܐ ܥܽܘܒܶܟܝ. ܒܺܝܪܰܬ ܡܰܠܟܳܐ ܘܥܰܠ ܘܰܫܪܳܐ ܒܶܟܝ܆ ܩܳܛܰܪ ܬܳܓ̈ܶܐ܆ ܠܟܽܠܗܽܘܢ ܡܰܠ̈ܟܶܐ܆ ܘܝܳܗܶܒ ܕܰܪ̈ܓܶܐ ܠܡܳܪ̈ܰܘܳܬܳܐ܆ ܡܶܢ ܫܰܒܛܳܐ ܕܺܝܗܽܘܕܳܐ ܡܰܫܩܠܶܟܝ. ܘܡܶܢ ܐܰܪܥܳܐ ܕܒܶܝܬ ܕܰܘܺܝܕ ܫܰܪܒܬܶܟܝ. ܓܶܢܣܶܟܝ ܓܶܝܪ ܡܫܰܒܚܳܐ܆ ܘܰܗܘܰܝܬܝ ܠܶܗ ܐܶܡܳܐ. ܠܰܒܪܳܐ ܒܬܶܕܡܽܘܪܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܢܰܘ ܢܺܝܣܳܢ

ܥܽܘܢܺܝܬܳܐ: ܒܪܺܝܟ ܕܰܐܘܪܶܒ ܘܝܰܩܰܪ܆ ܕܽܘܟܪܳܢܳܗ̇ ܕܡܰܪܝܰܡ ܒܬܽܘܠܬܳܐ ܩܰܕܺܝܫܬܳܐ.

ܐܶܫܰܥܝܳܐ ܡܫܰܒܚܳܐ ܟܶܢܳܪܳܐ ܕܪܽܘܚܳܐ܆ ܫܶܡܥܶܬ ܟܰܕ ܐܳܡܰܪ܆ ܕܗܳܐ ܒܬܽܘܠܬܳܐ ܒܳܛܢܳܐ܆ ܘܝܳܠܕܳܐ ܕܽܘܡܳܪܳܐ ܓܰܢ̱ܒܳܪܳܐ ܕܥܳܠ̈ܡܶܐ܆ ܕܰܘܺܝܕ ܩܪܳܝܗ̱ܝ ܗ̱ܘܳܐ ܡܶܠܬܳܐ ܘܰܒܪܳܐ܆ ܠܗܰܘ ܝܰܠܕܳܐ ܓܢܺܝܙܳܐ ܕܰܕܢܰܚ ܡܶܢ ܡܰܪܝܰܡ܆ ܘܟܽܠܗܽܘܢ ܡ̈ܶܠܶܐ ܘܐ̱ܪ̈ܳܙܶܐ ܕܰܢܒܺܝ̈ܶܐ ܩܰܕ̈ܡܶܐ܆ ܒܶܟܝ ܐܶܣܬܰܝܰܟܘ ܗ̱ܘܰܘ܆ ܐܳܘ ܫܒܺܝܚܰܬ ܡܶܢ ܟܽܠ܆ ܐܶܡܶܗ ܕܰܐܠܳܗܳܐ܀

ܫܰܪܒܶܟܝ ܒܰܪ̱ܬ ܕܰܘܺܝܕ܆ ܐܰܬܗܰܪ ܠܚܰܙܳܝ̈ܶܐ ܘܟܽܠܗܽܘܢ ܡܰܠܳــ̈ـܠܶܐ܆ ܒܪܽܘܚܳܐ ܡܰܠܶܠܘ ܗ̱ܘܰܘ܆ ܘܟܽܠܗܶܝܢ ܡܶܠܰܝ̈ܗܽܘܢ ܐܶܬܰܝ̈ ܠܰܥܒܳܕܳܐ܆ ܛܽܘܒܰܝܟܝ ܒܰܫܪܳܪܳܐ܆ ܕܺܝܠܶܕܬܝ ܠܡܰܘܠܶܕ ܟܽܠ܆ ܘܙܰܝܰܚܬܝ ܘܰܛܥܶܢܬܝ ܠܗܰܘ ܢܽܘܗܪܳܐ ܘܪܰܒܳܐ ܘܫܰܪܺܝܪܳܐ܆ ܣܪ̈ܳܦܶܐ ܒܓܶܦܰܝ̈ܗܽܘܢ ܐܰܦܰܝ̈ܗܽܘܢ ܡܚܰܦܶܝܢ܆ ܕܠܳܐ ܢܚܽܘܪܽܘܢ ܒܶܗ܆ ܘܥܰܠ ܚܰܕܝܳܐ ܕܦܰܓܪܶܟܝ ܐܶܙܕܰܝܰܚ ܒܬܶܗܪܳܐ܀

ܐ̱ܪܳܙܳܐ ܕܗܰܘ ܐܺܝܣܚܳܩ ܨܳܪܶܟܝ܆ ܒܰܪ̱ܬ ܕܰܘܺܝܕ ܒܶܐܡܪܳܐ ܘܺܐܝܠܳܢܳܐ܆ ܕܦܰܪܩܶܗ ܡܶܢ ܩܶܛܠܳܐ܆ ܘܠܰܘ ܡܶܢ ܢܶܩܝܳܐ ܗ̱ܘܳܐ ܐܶܡܪܳܐ ܕܰܒܣܰܘܟܬܳܐ܆ ܘܠܰܘ ܡܶܢ ܙܽܘܘܳܓܳܐ܆ ܝܺܠܶܕܬܝ ܠܰܡܫܺܝܚܳܐ܆ ܫܰܒܛܶܗ ܕܰܐܗܪܽܘܢ ܕܰܐܦܪܰܥ܆ ܠܶܟܝ ܗ̱ܘ ܨܳܐܰܪ ܗ̱ܘܳܐ܆ ܩܶܣܛܳܐ ܘܩܺܐܒܽܘܬܳܐ ܘܓܶܙܬܳܐ܆ ܘܛܰܠܳܐ ܕܒܶܝܬ ܓܶܕܥܽܘܢ܆ ܘܟܽܠܗܽܘܢ ܚܰܙܳܝ̈ܶܐ ܛܽܘܦܣܰܝ̈ܟܝ ܪܳܫܡܺܝܢ ܗ̱ܘܰܘ܆ ܕܺܝܠܶܕܬܝ ܕܠܳܐ ܙܰܪܥܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܝܰܘܢܳܐ ܛܠܺܝܬܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܝܰܠܕܳܐ ܡܬܽܘܡܳܝܳܐ܆ ܕܪܰܡܪܶܡ ܥܺܐܕܳܐ ܕܝܳܠܶܕܬܶܗ.

ܐܺܝܬܽܘܬܳܟ ܟܰܣܝܳܐ ܒܰܐܒܽܘܟ. ܘܥܰܡ ܪܽܘܚܳܟ ܡܬܽܘܡܳܝܽܘܬܳܟ܆ ܒܰܐܒܳܐ ܘܪܽܘܚܳܐ ܓܢܺܝܙܽܘܬܳܟ. ܡܬܽܘܡܳܝ ܘܰܓܢܺܝܙ ܒܺܐܝܬܽܘܬܳܐ܆ ܥܳܒܽܘܕܳܐ ܕܙܰܒ̈ܢܶܐ. ܕܰܗܘܳܐ ܬܚܶܝܬ ܙܰܒ̈ܢܶܐ܆ ܘܰܒܬܽܘܠܬܳܐ ܡܰܪܝܰܡ܆ ܥܠܰܝܡܬܳܐ ܝܺܠܶܕܬܶܗ. ܚܰܒܒܰܬ ܘܢܰܨܰܪܬܶܗ܆ ܘܰܠܩܳܠ ܢܽܘܨܪ̈ܳܬܳܗ̇܆ ܐܶܬܬܙܺܝܥܘ ܢܽܘܪ̈ܳܢܶܐ. ܕܥܰܡܳܗ̇ ܢܶܩܥܽܘܢ ܠܳܟ܆ ܒܪܺܝܟ ܐܰܢ̱ܬ ܡܶܢ ܐܰܬܪܳܟ܀

ܝܰܘܢܳܐ ܫܦܺܝܬܳܐ ܘܬܰܡܺܝܡܬܳܐ. ܣܢܽܘܢܺܝܬܳܐ ܚܰܠܝܰܬ ܩܳܠܳܐ܆ ܠܦܰܪܽܘܓܳܗ̇ ܢܶܫܪܳܐ ܣܳܒܳܐ. ܒܠܶܥ̈ܙܳܐ ܦܰܐܝ̈ܳܐ ܡܢܰܨܪܳܐ ܗ̱ܘܳܬ܆ ܡܳܪܳܗ̇ ܕܡܰܪܟܰܒܬܳܐ. ܕܓܺܝ̈ܓܠܶܐ ܕܚܺܝ̈ܠܳܬܳܐ܆ ܕܢܽܘܪܳܐ ܟܕܺܝ̈ܢܳܢ ܒܳܗ̇܆ ܡܰܢ ܐܰܚܬܳܟ ܨܶܐܕܰܝ. ܕܬܶܫܪܶܐ ܥܰܠ ܒܽܘܪ̈ܟܰܝ܆ ܘܬܶܬܢܺܝܚ ܥܰܠ ܕܪ̈ܳܥܰܝ܆ ܛܽܘܒܰܝ ܕܺܝܠܶܕܬܳܟ. ܛܽܘܒܰܝ ܕܢܰܨܰܪܬܳܟ܆ ܒܪܺܝܟ ܐܰܢ̱ܬ ܡܶܢ ܐܰܬܪܳܟ܀

ܬܳܐ ܨܶܐܕܰܝ ܐܳܘ ܒܰܪ ܐܰܡܽܘܨ. ܟܶܢܳܪܳܐ ܫܰܦܝܳܐ ܕܪܽܘܚܳܐ܆ ܚܰܙܳܝܳܐ ܕܰܩܕܽܘܫ ܩܽܘ̈ܕܫܺܝܢ܆ ܕܺܝܠܶܦ ܐ̱ܪ̈ܳܙܶܐ ܕܢܽܘܪ̈ܳܢܶܐ܆ ܐܰܨܶܕ ܒܰܕܪ̈ܳܥܰܝ. ܘܰܚܙܺܝ ܠܥܶܠ ܡܶܢܗܶܝܢ܆ ܠܡܰܢܽܘ ܛܥܺܝܢܳܐ ܐ̱ܢܳܐ܆ ܠܰܐܕܽܘܢܰܝ ܪܰܒܳܐ. ܘܶܐܢ ܡܳܪܝܳܐ ܨܒܰܐܘܽܬ. ܐܺܝܬܰܘܗ̱ܝ ܗܰܘ ܕܰܚܙܰܝܬ܆ ܒܫܶܩܠܳܐ ܕܓܰܐܝܽܘܬܶܗ. ܘܰܫܡܰܝܳܐ ܘܰܐܪܥܳܐ܆ ܡܠܶܝܢ ܡܶܢ ܬܶܫܒܽܘܚܬܶܗ܀

ܫܽܘܒܚܳܐ ܡܶܢ ܟܽܠ ܠܰܬܠܳܬܳܐ. ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܆ ܬܠܺܝܬܳܝܳܐ ܚܰܣܳܐ ܚܰܘ̈ܒܰܝ. ܚܠܳܦ ܫܽܘܒܚܳܟ ܕܰܢܦܰܩ ܡܶܢ ܦܽܘܡܝ܆ ܫܰܒܛܶܗ ܡܳܪܝ ܕܰܐܗܪܽܘܢ. ܕܰܐܦܪܰܥ ܗ̱ܘܳܐ ܘܰܐܦܶܩ. ܢܽܘܪ̈ܒܶܐ ܡܶܢ ܓܰܘܶܗ܆ ܘܦܰܓܪܳܐ ܡܳܪܝ ܕܰܟܣܶܐ. ܒܓܰܘܶܗ ܟܽܘܐܳܪܶܗ. ܠܳܐ ܢܶܬܓܠܽܘܢ ܡܽܘ̈ܡܰܘܗ̱ܝ܆ ܒܟܶܢ̈ܦܶܐ ܕܛܰܝܒܽܘܬܳܟ. ܣܰܬܰܪ ܚܰܠܳܫܽܘܬܝ܆ ܕܶܐܙܡܰܪ ܠܳܟ ܫܽܘܒܚܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܬܬܥܺܝܪܘ ܫܳܗܪ̈ܶܐ

ܥܽܘܢܺܝܬܳܐ: ܟܶܢܫܳܐ ܗܳܐ ܙܰܡܶܢܬ: ܒܬܽܘܠܬܳܐ ܩܰܕܺܝܫܬܳܐ: ܕܰܩܕܳܡܰܝܗܽܘܢ ܬܪܺܝܡܝ̱ ܩܳܠܳܗ ܟܰܕ ܐܳܡܪܳܐ.

ܐܶܠܽܘ ܐܶܙܕܰܘܓܶܬ: ܒܰܪܢܳܫܳܐ ܝܶܠܕܶܬ: ܘܰܕܠܳܐ ܚܙܺܝܬ ܓܰܒܪܳܐ: ܒܶܪܝ̱ ܡܳܪܰܐ ܗ̱ܘ ܕܥܳܠ̈ܡܶܐ܀

ܐܶܠܽܘ ܐܶܫܬܰܘܬܦܶܬ: ܦܫܺܝܩ ܗ̱ܘܳܐ ܕܰܬܡܰܠܠܽܘܢ: ܘܕܰܚܬܺܝܡܳܐ ܐ̱ܢܳܐ ܠܡܽܘܢ ܬܪܺܝܥ ܦܽܘܡܳܐ ܕܣܳܦܪ̈ܶܐ܀

ܘܳܐܦܠܳܐ ܐܶܢܳܐ ܒܨܺܝܬ: ܕܰܐܝܟܰܢ ܐܶܡܳܐ ܗܘܺܝܬ: ܕܟܰܕ ܐܺܝܬܰܝ ܐܶܡܳܐ: ܒܬܽܘ̈ܠܰܝ ܠܳܐ ܐܶܫܬܪܺܝܘ܀

ܗܳܐ ܚܰܠܒܳܐ ܒܰܬܕ̈ܰܝ: ܘܰܒܬܽܘ̈ܠܶܐ ܒܰܩܢܽܘܡܝ̱: ܘܰܐܝܟܰܢ ܡܶܬܦܰܫ̈ܩܳܢ: ܐܰܟܚܕܳܐ ܬܰܪ̈ܬܰܝܗܶܝܢ܀

ܠܳܐ ܬܶܒܨܽܘܢ ܣܳܦܪ̈ܶܐ: ܠܰܒܪܳܐ ܦܳܪܽܘܩܟܽܘܢ: ܕܰܐܠܳܗܳܐ ܥܰܡܟܽܘܢ: ܘܒܰܪܢܳܫܰܐܗ̱ܘ ܥܰܡܟܽܘܢ܀

ܣܽܘܓܺܝܬܳܐ

ܩܳܠܳܐ ܒܩ̄: ܥܰܡܳܐ ܘܥܰܡ̱̈ܡܶܐ

ܥܽܘܢܺܝܬܳܐ: ܫܽܘܒܚܳܐ ܠܳܟ ܡܶܢ ܟܽܠ ܦܽܘ̈ܡܺܝܢ܆ ܒܥܰܕܥܺܐܕܳܗ̇ ܕܰܡܒܰܪܰܟܬܳܐ.

ܐܳܘ ܓܰܢ̱ܒܳܪܳܐ ܕܰܠܟܽܠ ܛܥܺܝܢ܆ ܘܕܰܨܒܳܐ ܛܥܶܢܬܶܗ ܠܳܟ ܬܶܫܒ̈ܚܳܢ܆ ܐܳܘ ܥܰܬܺܝܪܳܐ ܕܰܗܘܳܐ ܒܪܳܐ܆ ܠܒܰܪ̱ܬ ܡܶܣ̈ܟܺܢܶܐ ܠܳܟ ܬܰܘ̈ܕܝܳܢ܀

ܒܡܰܪܝܰܡ ܬܶܗܪܶܬ ܟܰܕ ܡܰܝܢܩܳܐ܆ ܠܙܳܐܶܢ ܥܳܠ̈ܡܶܐ ܕܥܽܘܠܳܐ ܗܘܳܐ܆ ܫܪܳܐ ܗ̱ܘܳܐ ܒܟܶܢܦܳܗ̇ ܕܰܥܠܰܝܡܬܳܐ܆ ܘܰܡܠܶܝܢ ܡܶܢܶܗ ܟܽܠ ܣܰܘ̈ܦܺܝܢ܀

ܒܰܪ̱ܬ ܡܶܣ̈ܟܺܢܶܐ ܐܶܡܳܐ ܗܘܳܬ܆ ܠܒܰܪ ܥܰܬܺܝܪܳܐ ܕܚܽܘܒܶܗ ܥܨܳܝܗ̱ܝ܆ ܢܽܘܪܳܐ ܒܥܽܘܒܳܗ̇ ܕܰܒܬܽܘܠܬܳܐ܆ ܘܡܶܢ ܓܰܘܙܰܠܬܳܗ̇ ܠܳܐ ܝܳܩܕܳܐ܀

ܫܶܡܫܳܐ ܪܰܒܳܐ ܩܦܰܣ ܘܶܐܬܚܡܶܠ܆ ܒܰܚܕܳܐ ܥܢܳܢܳܐ ܢܰܗܺܝܪܬܳܐ܆ ܗܘܳܬ ܠܶܗ ܛܠܺܝܬܳܐ ܐܶܡܳܐ ܠܗܰܘ܆ ܕܰܐܘܠܶܕ ܠܳܐܕܳܡ ܘܰܠܥܳܠܡܳܐ܀

ܛܶܥܢܰܬ ܥܰܦܩܰܬ ܐܳܦ ܢܰܨܪܰܬ܆ ܒܩ̈ܳܠܶܐ ܪ̈ܚܺܝܡܶܐ ܟܰܕ ܡܰܘܕܝܳܐ܆ ܠܥܽܘܠܳܗ̇ ܣܶܓܕܰܬ ܟܰܕ ܐܳܡܪܳܐ܆ ܦܩܽܘܕ ܪܰܒܽܘܠܺܝ ܐܶܢܰܨܪܳܟ܀

ܦܗܳܐ ܠܶܗ ܪܶܥܝܳܢܝ ܡܶܢ ܕܶܚܠܬܳܟ܆ ܟܢܽܘܫ ܚܽܘ̈ܫܳܒܰܝ ܐܶܫܰܒܚܳܟ܆ ܬܶܗܪܶܬ ܠܺܝ ܒܳܟ ܕܰܟܡܳܐ ܫܠܶܝܬ܆ ܘܪܰܥܡܳܐ ܕܩ̈ܳܠܶܐ ܗܳܐ ܒܳܟ ܟܣܶܐ܀

ܒܺܝ ܘܒܰܫܡܰܝܳܐ ܐܺܝܬ ܡܰܫܪܝܳܟ܆ ܐܰܟܘܳܬܳܗ̇ ܡܳܪܝ ܐܶܫܰܒܚܳܟ܆ ܥܳܡܪ̈ܰܝ ܪܰܘܡܳܐ ܒܺܝ ܢܶܬܗܪܽܘܢ܆ ܘܟܽܠܗܽܘܢ ܛܽܘܒܳܐ ܠܺܝ ܢܶܬܠܽܘܢ܀

ܫܡܰܝܳܐ ܬܶܚܙܶܐ ܘܰܬܚܰܒܒܰܢܝ܆ ܕܰܗܘܺܝܬ ܟܽܘܪܣܝܳܐ ܠܪܰܒܽܘܬܳܟ܆ ܟܡܳܐ ܝܰܩܺܝܪܳܐ ܘܰܡܥܰܠܝܳܐ܆ ܐܶܡܶܗ ܕܡܰܠܟܳܐ ܡܶܢ ܟܽܘܪܣܝܳܐ܀

ܗܳܐ ܡܰܪܟܰܒܬܳܐ ܒܪܰܘܡܳܐ ܠܥܶܠ܆ ܘܰܛܥܺܝܢܳܐ ܠܳܟ ܟܰܕ ܒܺܝ ܫܪܶܝܬ܆ ܒܶܝܬ ܥܶܠܳܝ̈ܶܐ ܒܢܽܘܗܪܳܐ ܫܪܶܝܬ܆ ܐܳܦ ܠܬܰܚ̈ܬܳܝܶܐ ܠܳܐ ܡܰܘܩܕܰܬ܀

ܩܰܫܺܝܫ ܡܶܢ ܟܽܠ ܠܰܐܪܥܳܐ ܢܚܶܬ܆ ܗܘܳܐ ܥܽܘܠܳܐ ܠܘܳܬܝ ܠܳܟ ܡܰܘܕܝܳܢ܆ ܫܪܶܝܬ ܥܰܠ ܒܽܘܪ̈ܟܰܝ ܘܰܬܠܶܝܢ ܒܳܟ܆ ܪܰܘܡܳܐ ܘܥܽܘܡܩܳܐ ܘܟܽܠ ܕܰܒܗܽܘܢ܀

ܣܪ̈ܳܦܶܐ ܩܽܘܕ̈ܫܶܐ ܠܳܟ ܡܩܰܪܒܺܝܢ܆ ܘܰܐܝܟܰܢܳܐ ܡܳܪܝ ܐܶܢܰܨܪܳܟ܆ ܟܪ̈ܽܘܒܶܐ ܒܕܶܚܠܳܐ ܠܳܟ ܡܒܰܪܟܺܝܢ܆ ܘܰܒܩܳܠܰܝ̈ ܕܺܝܠܝ ܡܶܬܝܰܩܪܰܬ܀

ܬܶܫܡܰܥ ܗܳܫܳܐ ܘܬܺܐܬܶܐ ܠܟܳܐ܆ ܚܰܘܳܐ ܐܶܡܰܢ ܩܰܕܡܳܝܬܳܐ܆ ܘܢܶܬܬܪܺܝܡ ܪܺܝܫܳܗ̇ ܗܰܘ ܕܶܐܬܪܟܶܢ܆ ܒܗܰܘ ܦܽܘܪܣܳܝܳܐ ܕܰܒܓܰܢܬܳܐ܀

ܥܰܒ̈ܕܶܐ ܛܪ̈ܺܝܕܶܐ ܒܳܟ ܢܶܬܦܢܽܘܢ܆ ܠܗܰܘ ܝܽܘܬܪܳܢܳܐ ܕܡܶܢܶܗ ܢܦܰܩܘ܆ ܠܒܽܘܫܳܐ ܕܫܽܘܒܚܳܐ ܬܶܗܘܶܐ ܠܗܽܘܢ܆ ܕܰܢܟܰܣܽܘܢ ܒܶܗ ܦܽܘܪܣܳܝܗܽܘܢ܀

ܐ̱ܣܺܝܪ̈ܶܝܗ̇ ܕܰܫܝܽܘܠ ܒܳܟ ܢܶܫܬܪܽܘܢ܆ ܘܡܺܝ̈ܬܶܐ ܒܩܳܠܳܟ ܢܶܬܢܰܚܡܽܘܢ܆ ܘܰܫܡܰܝ̈ܳܐ ܒܳܟ ܢܶܪܥܡܽܘܢ܆ ܒܪܺܝܟ ܫܳܠܽܘܚܳܟ ܠܳܟ ܢܶܩܥܽܘܢ܀

ܟܽܠܗܽܘܢ ܟܰܦ̈ܢܶܐ ܒܳܟ ܢܶܣܒܥܽܘܢ܆ ܐܳܦ ܡܶܣ̈ܟܺܢܶܐ ܒܳܟ ܢܶܥܬܪܽܘܢ܆ ܘܚܰܣܺܝܪ̈ܶܐ ܒܳܟ ܢܶܫܬܰܪܬܚܽܘܢ܆ ܘܢܰܣܩܽܘܢ ܫܽܘܒܚܳܐ ܠܡܽܘܟܳܟܳܟ܀

ܚܰܘܳܐ ܘܳܐܕܳܡ ܒܺܝ ܢܶܛܦܣܽܘܢ܆ ܕܦܺܐܪܳܐ ܕܚܰܝ̈ܶܐ ܡܶܢܝ ܢܶܩܛܦܽܘܢ܆ ܒܺܝ ܢܶܬܚܰܠ̈ܝܳܢ ܚܶܟܰܝ̈ܗܽܘܢ܆ ܚܠܳܦ ܗܰܘ ܦܺܐܪܳܐ ܕܶܐܡܰܪ ܠܗܽܘܢ܀

ܬܶܕܢܰܚ ܒܰܫܝܽܘܠ ܥܰܠ ܫܶܦܠܗܽܘܢ܆ ܘܬܶܪܕܽܘܦ ܡܶܢܗܽܘܢ ܚܶܫܽܘܟܗܽܘܢ܆ ܘܒܳܟ ܟܽܠ ܥܰܡ̱̈ܡܺܝܢ ܢܶܬܒܰܪܟܽܘܢ܆ ܥܽܘܠܳܐ ܣܳܒܳܐ ܕܰܫܪܶܐ ܒܥܽܘܒܝ܀

ܬܰܘܕܺܝ ܠܚܰܝܠܳܐ ܕܰܛܥܺܝܢ ܟܽܠ܆ ܘܡܰܪܝܰܡ ܣܶܦܩܰܬ ܘܰܛܥܶܢܬܶܗ܆ ܘܢܰܨܰܪܬܶܗ ܐܰܝܟ ܝܰܠܽܘܕܳܐ. ܠܗܰܘ ܕܰܡܙܰܝܚܺܝܢ ܠܶܗ ܟܪ̈ܽܘܒܶܐ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܒܟܽܠ ܫܶܡ ܡܰܪܝܰܡ ܐܶܬܩܰܠܣܰܬ

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܆

ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܒܬܽܘܠܬܳܐ ܡܰܠܝܰܬ ܟܽܠ ܫܽܘܦܪ̈ܺܝܢ ܐܰܦܺܝܣ ܥܰܡܰܢ ܠܺܝܚܺܝܕܶܟܝ̱: ܕܒܰܨ̈ܠܰܘܳܬܶܟܝ̱ ܕܰܟܝ̈ܳܬܳܐ ܢܶܫܬܘܶܐ ܠܫܽܘܒܩܳܢܳܐ ܕܚܰܘ̈ܒܶܐ܀

ܗܳܕܶܐ ܕܰܗܘܳܬ ܡܰܪܟܰܒܬܳܐ ܘܙܰܝܚܰܬ ܡܳܪܳܐ ܕܰܒܪܺܝܬܳܐ: ܘܰܗ̱ܘܳܬ ܐܶܠܦܳܐ ܕܚܰܕ̈ܘܳܬܳܐ ܘܛܶܥܢܰܬ ܥܽܘܬܪܳܐ ܫܡܰܝܳܢܳܐ܀

ܢܶܚܕܶܐ ܐܳܕܳܡ ܪܺܝܫ ܛܽܘ̈ܗܡܶܐ܆ ܒܝܽܘܡ ܕܽܘܟܪܳܢܶܟܝ ܩܰܕܺܝܫܬܳܐ܆ ܕܒܰܒܪܳܐ ܕܺܝܠܶܕܬܝ ܕܠܳܐ ܙܽܘܘܳܓ܆ ܐܶܬܬܪܺܝܡ ܪܺܝܫܶܗ ܕܰܪܟܺܝܢ ܗ̱ܘܳܐ܆ ܗܘܳܐ ܠܶܗ ܣܰܒܪܳܐ ܘܠܽܘܒܳܒܳܐ܆ ܒܦܺܐܪܳܐ ܚܰܝܳܐ ܘܡܰܚܝܳܢܳܐ܀

ܐ̱ܚܪܺܢܳܐ

ܒܬܽܘܠܬܳܐ ܝܳܠܕܰܬ ܐܰܠܳܗܳܐ܆ ܒܥܳܝ ܘܶܐܬܟܰܫܰܦܝ ܠܺܝܚܺܝܕܶܟܝ܆ ܕܢܰܫܪܶܐ ܫܰܝܢܶܗ ܘܰܫܠܳܡܶܗ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܆ ܘܟܶܢܫܳܐ ܕܙܰܝܰܚ ܕܽܘܟܪܳܢܶܟܝ܆ ܢܶܬܒܰܪܰܟ ܒܰܨ̈ܠܰܘ̈ܳܬܶܟܝ܀

ܢܶܚܕܶܐ ܐܳܕܳܡ ܪܺܝܫ ܛܽܘ̈ܗܡܶܐ܆ ܒܝܽܘܡ ܕܽܘܟܪܳܢܶܟܝ ܩܰܕܺܝܫܬܳܐ܆ ܕܒܰܒܪܳܐ ܕܺܝܠܶܕܬܝ ܕܠܳܐ ܙܽܘܘܳܓ܆ ܐܶܬܬܪܺܝܡ ܪܺܝܫܶܗ ܕܰܪܟܺܝܢ ܗ̱ܘܳܐ܆ ܗܘܳܐ ܠܶܗ ܣܰܒܪܳܐ ܘܠܽܘܒܳܒܳܐ܆ ܒܦܺܐܪܳܐ ܚܰܝܳܐ ܘܡܰܚܝܳܢܳܐ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܰܨܠܽܘܬ ܡܰܪܝܰܡ ܕܺܝܠܶܕܬܳܟ܆

ܒܰܨܠܽܘܬܳܗ̇ ܘܚܺܝܠ ܒܳܥܽܘܬܳܗ̇ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀