ܒܝܽܘܡ 15 ܕܟܳܢܽܘܢ ܐ̱ܚܪܳܝ

ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܥܰܡ ܗܳܢܽܘܢ ܕܰܠܥܶܠ

ܚܰܬܢܳܐ ܫܡܰܝܳܢܳܐ܆ ܐܰܘܪܶܒ ܕܽܘܟܪܳܢ ܝܳܠܶܕܬܶܗ ܒܰܐܪܒܰܥ ܦܶܢ̈ܝܳܢ܆ ܒܰܨ̈ܠܰܘܳܬܳܗ̇ ܢܰܛܰܪ ܡܰܪܥܺܝܬܳܟ܆ ܠܳܟ ܬܶܫܒܽܘܚܬܳܐ ܒܳܪܽܘܝܳܐ ܕܟܽܠܗܶܝܢ ܒܶܪ̈ܝܳܬܳܐ܀

ܥܰܡ ܗܳܢܽܘܢ ܕܰܠܥܶܠ܆ ܗܳܐ ܚܳܕܝܳܐ ܥܺܕܬܳܐ ܘܝܰܠ̈ܕܶܝܗ̇ ܘܫܽܘܒܚܳܐ ܙܳܡܪܺܝܢ܆ ܠܰܐܒܳܐ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ. ܠܶܗ ܬܶܫܒܽܘܚܬܳܐ܀

ܫܽܘܒܚܳܐ

ܢܶܗܘܶܐ ܕܽܘܟܪܳܢܳܗ̇܆ ܕܒܰܪ̱ܬ ܕܰܘܺܝܕ ܒܬܽܘܠܬܳܐ ܡܰܪܝܰܡ ܒܰܐܪܒܰܥ ܦܶܢ̈ܝܳܢ܆ ܒܰܨ̈ܠܰܘܳܬܳܗ̇ ܫܰܟܶܢ ܠܰܢ ܒܪ̈ܰܚܡܰܝܟ: ܐܳܘ ܚܰܢܳܢܳܐ ܕܰܐܘܪܶܒ ܝܽܘܡ ܕܽܘܟܪܳܢܳܗ̇܀

ܐ̱ܚܪܺܢܳܐ

ܩܳܠܳܐ ܒܩ̄: ܝܳܐܶܐ ܘܙܳܕܶܩ

ܒܓܰܘ ܟܰܪܣܳܐ ܢܽܘܪܳܐ ܫܰܪܝܳܐ: ܘܥܰܠ ܚܰܕܝܳܐ ܬܶܗܪܳܐ ܪܰܒܳܐ: ܒܨܶܒ̈ܥܳܬܳܗܿ ܢܽܘܪܳܐ ܠܶܒܟܰܬ: ܘܰܒܟܶܢܦܶܝ̈ܗܿ ܫܶܡܫܳܐ ܛܶܥܢܰܬ: ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܫܽܘܒܚܳܐ

ܐܰܝܟ ܠܶܓ̈ܝܽܘܢܶܐ ܕܢܽܘܪ̈ܳܢܶܐ: ܙܗܶܝܢ ܗ̱ܘܰܘ ܘܰܕܟܶܝܢ ܚܽܘܫܳܒܶܝ̈ܗܿ: ܕܬܶܓܠܶܐ ܐ̱ܪܳܙܳܐ ܕܳܚܠܳܐ ܗ̱ܘܳܬ: ܘܰܕܬܶܫܠܶܐ ܠܳܐ ܡܰܨܝܳܐ ܗ̱ܘܳܬ: ܫܽܘܒܚܳܐ ܠܳܟ: ܫܽܘܒܚܳܐ ܠܳܟ ܐܰܠܳܗܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܗ̱ܝ
ܡܶܢ ܐܰܒܳܐ ܡܳܪܳܐ ܕܢܰܚ ܠܰܢ

ܠܡܰܪܝܰܡ ܟܽܠܗܶܝܢ ܫܰܪ̈ܒܳܬܳܐ. ܢܶܬܠܽܘܢ ܛܽܘܒܳܐ ܐܰܝܟ ܕܰܟܬܺܝܒ܆ ܕܗܰܘ ܕܰܫܡܰܝܳܐ ܡܠܶܝܢ ܡܶܢܶܗ ܢܚܶܬ ܘܰܫܪܳܐ ܒܥܽܘܒܳܗ̇. ܢܦܰܩ ܡܶܢܳܗ̇ ܘܠܳܐ ܫܪܳܐ ܒܬܽܘ̈ܠܶܝܗ̇܆ ܘܰܬܗܰܪܘ ܒܳܗ̇ ܟܽܠ ܚܰܙܳܝ̈ܶܐ. ܘܰܙܡܰܪܘ ܫܽܘܒܚܳܐ ܘܬܰܘܕܺܝܬܳܐ. ܠܗܰܘ ܕܰܕܢܰܚ ܡܶܢܳܗ̇܀

ܫܽܘܒܚܳܐ

ܠܝܽܘܡ ܥܺܐܕܳܗ̇ ܐܶܬܛܰܝܰܒܢܰܢ. ܕܰܒܬܽܘܠܬܳܐ ܕܟܺܝܬܳܐ ܡܰܪܝܰܡ܆ ܬܰܘ ܢܰܪܡܶܐ ܠܳܗ̇ ܪܽܘܡܝܳܢܳܐ ܨܠܽܘܬܳܐ ܘܒܳܥܽܘܬܳܐ. ܕܗܺܝ ܩܳܝܡܳܐ ܠܰܢ ܒܒܶܝܬ ܕܺܝܢܳܐ܆ ܘܰܡܦܺܝܣܳܐ ܡܶܛܽܠܳܬܰܢ. ܠܰܐܠܳܗܳܐ ܕܢܶܥܒܶܕ ܪ̈ܰܚܡܶܐ. ܥܰܠ ܥܳܠܡܳܐ ܟܽܠܶܗ܀

ܡܰܕܪܳܫܳܐ

ܩܳܠܳܐ ܒܩ̄: ܦܰܪܕܰܝܣܳܐ
ܡܰܢܽܘ ܚܙܳܐ ܢܶܩܝܳܐ ܟܰܕ ܡܰܝܢܩܳܐ ܠܰܐܪܝܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܥܰܒܕܶܟܝ ܠܶܗ ܐܶܡܳܐ ܒܛܰܝܒܽܘܬܶܗ܆ ܒܬܽܘܠܬܳܐ ܩܰܕܺܝܫܬܳܐ ܡܰܠܝܰܬ ܟܽܠ ܫܽܘܦܪ̈ܺܝܢ.

ܐ̱ܪ̈ܳܙܰܝܟܝ̱ ܒܰܪ̱ܬ ܕܰܘܺܝܕ: ܣܺܝܡܺܝܢ ܒܳܐܪܽܘܢܳܐ: ܕܨܳܪܰܬ ܢܒܺܝܽܘܬܳܐ ܨܰܠܡܶܟܝ̱ ܫܰܦܺܝܪܳܐ: ܘܣܳܡܰܬ݀ ܒܓܰܘ ܣܶܦܪܳܐ: ܠܰܐܝܢܳܐ ܕܡܶܣܬܰܟܰܠ ܒܗܳܝ ܩܽܘܩܬܳܐ ܚܕܰܬܳܐ ܡܰܬܠܶܟ݉ܝ̱: ܕܰܒܪܶܟܝ̱ ܗ̱ܘܳܐ ܡܶܠܚܳܐ: ܘܡܰܕܰܟ ܠܦܰܟܺܝ̈ܗܶܐ: ܘܒܶܗ ܗܽܘ ܚܝܳܐ ܥܳܠܡܳܐ: ܟܽܠܶܗ ܕܰܐܒܺܝܕ ܗ̱ܘܳܐ܀

ܨܳܪܽܘܟܝ ܒܗܰܘ ܫܰܒܛܳܐ ܕܶܐܬܬܣܺܝܡ ܒܳܐܪܽܘܢܳܐ܆ ܕܟܰܕ ܠܳܐ ܢܨܺܝܒ ܐܰܦܪܰܥ ܕܫܰܪܒܶܟܝ ܡܙܰܝܰܚ ܗ̱ܘܳܐ܆ ܫܰܒܛܳܐ ܕܠܳܐ ܫܶܩܝܳܐ ܒܛܰܪ̈ܦܶܐ ܡܟܰܠܰܠ ܗ̱ܘܳܐ܆ ܕܠܰܒܬܽܘܠܬܳܐ ܢܶܗܘܶܐ ܐ̱ܪܳܙܳ݉ܐ܆ ܕܦܺܐܪܳܐ ܕܬܶܕܡܽܘܪܬܳܐ ܐܰܦܪܝܰܬ ܘܠܰܢ ܝܶܗܒܰܬ܆ ܛܽܘܦܣܳܐ ܪܫܺܝܡ ܘܺܝܕܺܝܥ ܒܫܰܒܛܶܗ ܕܠܶܘܳܝܳܐ܀

ܝܰܠܕܳܐ ܕܢܰܚ ܘܰܢܦܰܩ ܒܽܐܘܪܚܳܐ ܕܺܝܠܺܝ̈ܕܶܐ܆ ܘܶܐܡܶܗ ܒܬܽܘܠܬܳܐ ܗ̱ܘܳܬ ܘܬܶܗܪܳܐ ܠܒܺܝܫܳܐ ܗ̱ܘܳܬ܆ ܕܦܺܐܪܳܐ ܛܥܺܝܢܳܐ ܗ̱ܘܳܬ ܘܟܰܪܣܳܗ̇ ܚܬܺܝܡܳܐ ܗ̱ܘܳܬ܆ ܘܽܐܘܪܚܳܐ ܚܕܰܬܳܐ ܗ̱ܘܳܬ ܒܥܳܠܡܳــ݉ܐ܆ ܘܝܶܗܒܰܬ ܒܬܶܕܡܽܘܪܬܳܐ ܠܰܒܬܽܘܠܬܳܐ ܝܰܠܕܳܐ܆ ܡܶܕܶܡ ܕܠܳܐ ܝܳܗܶܒ ܟܝܳܢܳܐ ܠܢܶܩ̈ܒܳܬܳܐ܀

ܛܽܘܪ̈ܶܐ ܚܰܠܝܽܘܬܳܐ ܢܰܪܕܽܘܢ ܩܥܳܐ ܢܒܺܝܳܐ܆ ܛܰܒܝܳܐ ܘܥܽܘܙܰܝܠܳܐ ܘܰܐܝܠܳܐ ܩܥܳܐ ܫܠܶܝܡܳܘܢ܆ ܛܽܘܪ̈ܶܐ ܬܕܶܝ̈ܗ̇ ܕܡܰܪܝܰܡ ܕܰܡܢܰܛܦܺܝܢ ܚܰܠܒܳܐ܆ ܛܰܒܝܳܐ ܘܥܽܘܙܰܝܠܳܐ ܡܪܰܝܡܳܐ܆ ܕܰܢܚܶܬ ܫܪܳܐ ܒܥܽܘܒܳܗ̇ ܕܰܒܬܽܘܠܬܳܐ ܡܰܪܝܰܡ܆ ܐܰܝܟ ܐܰܝܠܳܐ ܡܫܺܝܚܳܐ ܥܰܠ ܬܕܶܝ̈ܗ̇ ܡܕܰܝܶܨ ܗ̱ܘܳܐ܀

ܫܡܰܝܳܐ ܡܪܰܡܪܰܡܬܳܐ ܡܰܪܝܰܡ ܗ̱ܘܳܬ ܠܳܟ ܡܳܪܝ܆ ܘܰܐܝܟ ܟܽܘܪܣܝܳܐ ܒܟܰܪܣܳܗ̇ ܛܥܶܢܬܳܟ ܘܙܰܝܰܚܬܳܟ܆ ܒܽܘܪ̈ܟܶܝܗ̇ ܗܘܰܝ̈ ܓܺܝ̈ܓܠܶܐ ܘܪ̈ܶܓܫܶܝܗ̇ ܕܡܽܘܬ ܥܺܝܪ̈ܶܐ܆ ܘܛܶܥܢܰܬ ܙܰܝܰܚܬܳܟ ܥܰܠ ܒܽܘ݉ܪ̈ܟܶܝܗ̇܆ ܒܛܺܝܢܳܐ ܘܺܝܠܺܝܕܳܐ ܥܡܺܝܕܳܐ ܡܚܰܣܝܳܢܳܐ܆ ܩܒܺܝܪܳܐ ܡܢܰܚܡܳܢܳܐ ܘܒܰܪ ܡܰܘܬܒܳܐ ܕܰܐܒܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ
ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ ܒܝܰܕ

ܥܽܘܢܺܝܬܳܐ: ܒܪܺܝܟܳܐ ܗ̱ܝ ܡܰܪܝܰܡ ܕܺܝܠܶܕܬܶܗ܆ ܠܰܡܫܺܝܚܳܐ ܦܳܪܽܘܩܶܗ ܕܥܳܠܡܳܐ.

ܐܰܝܟܰܢ ܐܶܩܪܶܝܗ̇ ܠܰܒܬܽܘܠܬܳܐ. ܕܰܒܪ̈ܶܒܽܘ ܫܡܳܗܺܝ̈ܢ ܡܟܰܠܠܳܐ. ܝܳܠܕܰܬ ܐܰܠܳܗܳܐ܆ ܘܡܰܠܝܰܬ ܛܰܝܒܽܘܬܳܐ. ܫܡܰܝܳܐ ܕܒܶܣܪܳܐ ܕܰܛܥܶܢܬܶܗ܆ ܠܗܰܘ ܕܰܛܥܺܝܢ ܪܶܡܙܶܗ ܠܥܳܠܡܳܐ܀

ܢܶܚܕܶܐ ܐܳܕܳܡ ܥܰܬܺܝܩܳܐ. ܕܰܐܘܒܶܕ ܗ̱ܘܳܐ ܐܶܣܛܠܶܗ ܒܓܰܢܬܳܐ. ܕܒܶܟܝ ܐܶܬܦܰܢܺܝ ܠܶܗ܆ ܫܽܘܒܚܳܐ ܕܰܫܠܰܚ ܗ̱ܘܳܐ. ܐܰܢ̱ܬܺܝ ܗ̱ܝ ܦܬܰܚܬܝ ܠܶܗ ܦܰܪܕܰܝܣܳܐ܆ ܘܒܶܟܝ ܥܰܠ ܠܶܗ ܝܳܪܬܳܐ ܠܓܰܢܬܳܐ܀

ܗܰܘ ܨܰܝܳܪܳܐ ܕܟܽܠ ܥܽܘ̈ܠܺܝܢ. ܨܳܪ ܨܰܠܡܳܐ ܠܝܳܬܶܗ ܒܟܰܪܣܳܐ. ܘܰܕܡܽܘܬܳܐ ܕܥܰܒܕܳܐ܆ ܫܩܰܠ ܠܶܗ ܡܶܢ ܡܰܪܒܥܳܐ܆ ܘܰܢܦܰܩ ܣܰܥܪܳܗ̇ ܠܰܒܪܺܝܬܳܐ܆ ܘܶܐܬܡܰܟܰܟ ܘܰܦܪܰܩ ܠܥܳܠܡܳܐ܀

ܩܳܠ ܢܽܘܨܪ̈ܳܬܳܐ ܡܶܢ ܦܽܘܡܳܗ̇. ܘܥܰܠ ܒܽܘܪ̈ܟܶܝܗ̇ ܝܰܠܽܘܕܳܐ ܣܺܝܡ ܗ̱ܘܳܐ. ܚܰܠܒܳܐ ܪܳܬܰܚ ܗ̱ܘܳܐ܆ ܘܰܒܬܽܘ̈ܠܶܝܗ̇ ܢܛܺܝܪܺܝܢ. ܟܽܠܶܗ ܬܶܗܪܳܐ ܡܰܠܝܳܐ ܗ̱ܘܳܬ܆ ܘܶܐܢ ܒܳܨܶܐ ܚܳܐܶܒ ܠܶܗ ܣܳܦܪܳܐ܀

ܚܶܘܝܳܐ ܐܰܪܡܺܝ ܡܰܨܽܘܬܳܐ. ܒܶܝܬ ܐܳܕܳܡ ܠܰܐܠܳܗܳܐ ܒܓܰܢܬܳܐ. ܘܶܐܫܬܰܦܰܠ ܥܰܒܕܳܐ܆ ܘܰܫܪܶܟ ܠܰܚܒܳܠܳܐ. ܘܰܨܒܳܐ ܐܰܒܳܐ ܡܪܰܚܡܳܢܳܐ܆ ܕܰܢܪܰܥܶܝܘܗ̱ܝ ܠܰܪܓܺܝܙܳܐ ܘܢܰܦܢܶܝܘܗ̱ܝ܀

ܛܶܥܢܰܬ ܢܽܘܪܳܐ ܒܰܕܪ̈ܳܥܶܝܗ̇. ܘܥܰܠ ܐܺܝ̈ܕܶܝܗ̇ ܠܰܓܡܽܘܪܬܳܐ ܙܰܝܚܰܬ. ܐܳܦ ܫܰܠܗܶܒܺܝܬܳܐ܆ ܠܶܒܟܰܬ ܗ̱ܘܳܬ ܕܬܰܝܢܶܩ. ܘܝܶܗܒܰܬ ܚܰܠܒܳܐ ܠܗܳܝ ܢܽܘܪܳܐ܆ ܘܡܰܢ ܣܳܦܶܩ ܕܢܺܐܡܰܪ ܫܰܪܒܳܗ̇܀

ܐ̱ܚܪܺܢܳܐ

ܩܳܠܳܐ ܒܩ̄: ܠܟܶܢܫܳܐ ܥܶܠܳܝܳܐ

ܥܽܘܢܺܝܬܳܐ: ܐܰܫܘܳܢ ܐܳܦ ܠܺܝ ܡܳܪܝ܆ ܕܶܐܙܡܰܪ ܠܳܟ ܫܽܘܒܚܳܐ܆ ܒܕܽܘܟܪܳܢ ܝܳܠܶܕܬܳܟ ܒܬܽܘܠܬܳܐ ܩܰܕܺܝܫܬܳܐ.

ܐܶܫܰܥܝܳܐ ܢܒܺܝܳܐ. ܢܶܪܘܰܙ ܒܓܶܠܝܳܢܰܘ̈ܗ̱ܝ܆ ܕܰܒܬܽܘܠܬܳܐ ܝܶܠܕܰܬ ܐܰܟܡܳܐ ܕܶܐܬܢܰܒܺܝ. ܓܰܢ̱ܒܳܪܳܐ ܕܥܳܠ̈ܡܶܐ܆ ܘܫܰܠܺܝܛܳܐ ܕܰܫܠܳܡܳܐ܆ ܕܪܰܥܝܰܢ ܥܰܡ ܐܰܒܽܘܗ̱ܝ. ܒܰܕܡܳܐ ܕܰܩܢܽܘܡܶܗ܆ ܘܰܫܠܳܡܳܐ ܘܫܰܝܢܳܐ ܗܽܘ ܙܪܰܥ܆ ܘܰܣܝܳܓܳܐ ܕܪܽܘܓܙܳܐ ܗܽܘ ܬܪܰܥ܆ ܘܡܰܠܰܐܟ̈ܶܐ ܘܐ̱ܢܳܫ̈ܳܐ ܗܽܘ ܚܠܰܛ܀

ܒܝܰܘܡܳܐ ܕܗܳܘܶܐ ܒܶܗ. ܕܽܘܟܪܳܢ ܝܳܠܶܕܬܳܟ܆ ܕܳܡܶܐ ܠܗܰܒܳܒܳܐ ܕܗܰܒܶܒ ܝܽܘܡ ܢܺܝܣܳܢ܆ ܕܡܶܢ ܫܰܢ̱ܬܳܐ ܠܫܰܢ̱ܬܳܐ. ܡܶܬܟܪܶܟ ܘܡܶܙܕܰܝܰܚ܆ ܝܰܪܚܰܐ ܗ̱ܘ ܕܠܳܐ ܡܰܘܦܶܝܢ܆ ܛܽܘ̈ܒܰܘܗ̱ܝ ܘܒܽܘܣܳܡܰܘ̈ܗ̱ܝ܆ ܚܰܓܰܐ ܗ̱ܘ ܕܠܳܐ ܦܳܛܪ̈ܳܢ ܚܰܕ̈ܘܳܬܶܗ܆ ܘܰܐܝܢܳܐ ܕܡܶܫܬܰܘܬܰܦ ܒܕܽܘܟܪܳܢܳܗ̇܆ ܐܰܫܘܳܝܗ̱ܝ ܡܳܪܝ ܠܰܓܢܽܘܢܳܟ ܕܠܳܐ ܥܳܒܰܪ܀

ܩܳܠܳܐ ܓܶܝܪ ܫܶܡܥܶܬ. ܕܙܳܡܰܪ ܒܚܰܠܝܽܘܬܳܐ܆ ܩܳܠܳܗ̇ ܕܗܳܝ ܝܰܘܢܳܐ ܪܚܺܝܡܬܳܐ ܒܰܪ̱ܬ ܕܰܘܺܝܕ. ܕܰܠܢܶܫܪܳܐ ܡܰܠܟܳܐ܆ ܡܢܰܨܪܳܐ ܒܚܰܕܽܘܬܳܐ܆ ܬܗܰܪܘ ܒܳܗ̇ ܥܶܠܳܝ̈ܶܐ. ܘܰܬܡܰܗܘ ܣܶܕܪ̈ܰܝܗܽܘܢ܆ ܫܡܰܝܳܐ ܒܳܗ̇ ܚܶܣܡܰܬ ܕܰܠܡܳܪܳܗ̇ ܛܶܥܢܰܬ܆ ܘܠܺܝ ܛܽܘܒܳܐ ܐܶܡܪܰܬ ܕܰܠܡܰܢܽܘ ܝܶܠܕܶܬ܆ ܡܶܢ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ܀

ܫܰܦܺܝܪܽ ܗ̱ܘ ܝܰܘܢܳܐ. ܘܰܪܓܺܝܓ ܫܽܘܦܢܺܝܢܳܐ܆ ܘܠܳܥܙܳܐ ܣܢܽܘܢܺܝܬܳܐ ܘܚܰܠ̈ܝܳܢ ܢܽܘܨܪ̈ܳܬܳܗ̇. ܗܳܐ ܥܺܕ̱ܬܳܐ ܝܰܘܢܳܐ܆ ܘܫܽܘܦܪܳܗ̇ ܫܰܦܺܝܪܽ ܗ̱ܘ܆ ܘܝܽܘܚܰܢܳܢ ܓܰܒܝܳܐ ܫܽܘܦܢܺܝܢܳܐ ܐܶܬܟܰܢܺܝ܆ ܣܢܽܘܢܺܝܬܳܐ ܐܺܝܬܶܝܗ̇ ܒܬܽܘܠܬܳܐ ܡܰܪܝܰܡ܆ ܕܰܡܢܰܨܪܳܐ ܒܢܽܘܨܪ̈ܳܬܳܗ̇ ܘܳܐܡܪܳܐ܆ ܕܠܺܝ ܢܶܬܠܳـ̈ـܢ ܛܽܘܒܳܐ ܫܰܪ̈ܒܳܬܳܐ ܟܽܠܗܶܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܣܠܶܩ ܠܰܨܠܺܝܒܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܪܰܡܪܶܡ܆ ܘܰܐܘܪܶܒ ܝܽܘܡ ܕܽܘܟܪܳܢܳܗ̇܆ ܕܶܐܡܶܗ ܒܬܽܘܠܬܳܐ ܩܰܕܺܝܫܬܳܐ ܒܰܪ̱ܬ ܕܰܘܺܝܕ.

ܬܶܗܪܶܬ ܠܺܝ ܒܶܟܝ. ܡܰܪܟܰܒܬܳܐ ܡܓܰܫܰܡܬܳܐ܆ ܕܰܥܪܰܝܬܝ ܒܥܽܘܒܶܟܝ ܠܗܰܘ ܕܰܥܠܶܝܗ̇ ܡܶܙܕܰܝܰܚ܆ ܗܰܘ ܕܰܒܪܳܐ ܥܳܠ̈ܡܶܐ ܥܰܡ ܐܰܒܽܘܗ̱ܝ. ܬܽܘܒ ܐܰܩܺܝܡ ܬܶܓ̈ܡܶܐ ܕܓܰܘܙܰܠܬܳܐ܆ ܒܓܰܘ ܥܽܘܒܶܟܝ ܥܰܠ ܘܰܫܪܳܐ. ܘܡܶܢ ܢܽܘܪܶܗ ܠܳܐ ܝܺܩܶܕܬܝ܀

ܬܰܪܥܳܐ ܕܰܚܙܳܐ. ܚܰܙܩܺܝܐܶܝܠ ܒܰܪ ܒܽܘܙܺܝ܆ ܕܰܐܚܺܝܕ ܘܰܛܒܺܝܥ ܗܺܝ ܒܬܽܘܠܬܳܐ ܒܰܪ̱ܬ ܕܰܘܺܝܕ܆ ܒܗܰܘ ܬܰܪܥܳܐ ܥܰܠ ܡܳܪܝܳܐ ܠܥܳܠܡܳܐ. ܟܰܕ ܐܰܚܺܝܕ ܢܦܰܩ ܡܶܢܶܗ ܘܠܳܐ ܦܬܰܚ܆ ܠܛܰܒ̈ܥܶܐ ܕܗܳܝ ܕܺܝܠܶܕܬܶܗ. ܐܰܝܟ ܗܰܘ ܬܰܪܥܳܐ ܐܰܚܺܝܕܳܐ܀

ܩܽܘܩܬܳܐ ܚܕܰܬܳܐ. ܕܒܳܗ̇ ܡܰܝ̈ܳܐ ܐܶܬܚܰܠܺܝܘ܆ ܠܶܟܝ ܕܶܝܢ ܡܰܪܝܰܡ ܐܶܠܺܝܫܳܥ ܩܰܕܶܡ ܨܳܪ܆ ܕܒܶܟܝ ܡܰܝ̈ܳܐ ܚܰܝ̈ܶܐ ܪܕܰܘ ܘܰܢܦܰܩܘ. ܐܳܦ ܐܰܫܩܺܝܘ ܠܐܢܳܫ̈ܳܐ ܡܰܪܺܝܪ̈ܶܐ܆ ܗܘܰܘ ܚܠܰܝ̈ܳܐ ܘܒܰܣܺܝ̈ܡܶܐ. ܐܰܝܟ ܡܶܠܬܶܗ ܕܶܐܠܺܝܫܳܥ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܨܠܽܘܬܶܟܝ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ ܥܰܡܰܢ܆

ܠܰܨ̈ܠܰܘܳܬܶܟܝ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܛܽܘܒܰܝܟܝ ܕܡܶܢܶܟܝ ܕܢܰܚ ܦܳܪܽܘܩܳܐ ܥܰܠ ܓܳܠܽܘܬܳܐ܆ ܘܰܠܫܰܒܳܝܳܐ ܦܟܰܪ ܒܰܛܢܳܢܶܗ ܘܫܰܝܶܢ ܐܰܪܥܳܐ܆ ܛܽܘܒܰܝܟܝ ܕܶܐܬܬܣܺܝܡ ܦܽܘܡܶܟܝ ܕܰܟܝܳܐ ܥܰܠ ܣܶܦ̈ܘܳܬܶܗ܆ ܕܗܰܘ ܕܰܣܪ̈ܳܦܶܐ ܡܚܰܦܶܝܢ ܡܶܢܶܗ ܦܰܪ̈ܨܽܘܦܰܝܗܽܘܢ܀

ܫܽܘܒܚܳܐ ܠܪܳܡܳܐ ܕܰܫܒܰܩ ܪܳܡܳܐ ܘܟܽܠ ܓܰܐܝ̈ܳܬܳܐ: ܘܰܒܡܽܘܟܳܟܶܗ ܫܪܳܐ ܒܡܶܣܟܺܢ̱ܬܳܐ ܒܰܪ̱ܬ ܚܳܕܽܘܪ̈ܶܐ: ܛܳܒܳܐ ܕܰܐܘܪܶܒ ܕܽܘܟܪܳܢ ܐܶܡܶܗ ܚܰܣܳܐ ܒܪ̈ܰܚܡܰܝܟ: ܠܚܰܝ̈ܶܐ ܘܡܺܝ̈ܬܶܐ ܕܝܰܩܰܪܘ̱ ܥܺܐܕܳܗܿ ܘܠܳܟ ܬܶܫܒܽܘܚܬܳܐ܀

ܒܰܨ̈ܠܰܘܳܬܶܟܝ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܶܟܝ ܒܗܰܝܡܳܢܽܘܬܳܐ܀

ܐ̱ܚܪܺܢܳܐ

ܡܰܠܝܰܬ ܪ̈ܰܚܡܶܐ ܐܰܦܺܝܣܝ ܘܰܒܥܳܝ ܠܰܡܠܶܐ ܪ̈ܰܚܡܶܐ܆

ܕܢܶܥܒܶܕ ܪ̈ܰܚܡܶܐ ܥܰܠ ܢܰܦ̈ܫܳܬܳܐ ܕܫܳܐܠܳــ̈ܢ ܪ̈ܰܚܡܶܐ܀