ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܒܰܨܠܽܘܬܳܗ̇ ܕܝܳܠܶܕܬܳܟ

ܒܰܥܡܳܕܳܟ ܦܳܪܽܘܩܰܢ: ܒܡܰܚܰܬܬܳܟ ܕܰܠܓܰܘ ܢܰܗܪܳܐ: ܚܰܣܳܐ ܠܺܝ ܚܰܘ̈ܒܰܝ: ܘܪܰܚܶܡܥܠܰܝ ܐܰܠܳܗܳܐ܀

ܚܙܳܝܗ̱ܝ ܝܽܘܚܰܢܳܢ ܠܰܒܪܳܐ: ܟܰܕ ܐܶܬܳܐ ܠܡܰܥܡܽܘܕܺܝܬܳܐ: ܘܰܩܥܳܐ ܟܰܕ ܐܳܡܰܪ: ܕܗܳܢܰܘ ܚܰܬܢܳܐ ܫܡܰܝܳܢܳܐ܀

ܒܰܥܡܳܕܳܟ ܦܳܪܽܘܩܰܢ: ܐܶܬܩܰܕܫܰܬ ܡܰܥܡܽܘܕܺܝܬܳܐ ܠܚܽܘܣܳܝ ܚܰܘ̈ܒܳܬܰܢ ܪܰܚܶܡܥܠܰܝܢ ܐܰܠܳܗܳܐ܀

ܐܰܒܳܐ ܩܥܳܐ ܡܶܢ ܪܰܘܡܳܐ: ܕܰܐܢ̱ܬ ܐܺܝܬܰܝܟ ܒܶܪܝ ܚܰܒܺܝܒܳܐ: ܘܪܽܘܚܳܐ ܐܰܝܟ ܝܰܘܢܳܐ: ܢܶܚܬܰܬ ܫܶܟܢܰܬ ܥܰܠ ܪܺܝܫܶܗ ܕܰܒܪܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܳܪܝܳܐ ܩܪܺܝܬܳܟ ܐܰܢ̱ܬ

ܩܪܺܝܬܳܟ ܡܳܪܝܳܐ ܐܰܢ̱ܬ ܥܢܺܝܢܝ܆ ܨܽܘܬ ܡܶܠܰܝ̈ ܘܩܰܒܶܠ ܨܠܽܘܬܝ܀

ܥܡܰܕܬ ܒܝܽܘܪܕܢܳܢ ܡܶܢ ܝܽܘܚܰܢܳܢ܆ ܡܫܺܝܚܳܐ ܐܰܠܳܗܳܐ ܕܺܝܠܰܢ܀

ܐܰܪܥܳܐ ܚܳܕܝܳܐ ܘܰܦܨܺܝܚܳܐ܆ ܒܰܥܡܳܕܳܟ ܡܰܠܟܳܐ ܡܫܺܝܚܳܐ܀

ܬܗܰܪܘ ܗ̱ܘܰܘ ܥܺܝܪ̈ܶܐ ܒܒܳܪܽܘܝܗܽܘܢ܆ ܕܡܶܢ ܥܰܒܕܶܗ ܥܡܳܕܳܐ ܩܰܒܶܠ܀

ܐܰܙܥܶܩ ܐܰܒܳܐ ܡܶܢ ܪܰܘܡܳܐ܆ ܕܗܳܢܰܘ ܒܪܳܐ ܕܺܝܠܝ ܚܰܒܺܝܒܳܐ܀

ܬܠܺܝܬܳܝܽܘܬܳܐ ܐܶܬܓܰܠܝܰܬ܆ ܒܰܥܡܳܕܶܗ ܕܒܰܪ ܐܰܠܳܗܳܐ܀

ܫܽܘܒܚܳܐ

ܢܰܣܶܩ ܫܽܘܒܚܳܐ ܘܬܰܘܕܺܝܬܳܐ܆ ܠܰܒܪܳܐ ܕܒܰܥܡܳܕܶܗ ܦܰܪܩܰܢ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܒܡ̈ܰܬܠܶܐ ܡܰܠܶܠ ܦܳܪܽܘܩܰܢ

ܪܰܒ ܝܽܘܡ ܕܶܢܚܳܟ ܦܳܪܽܘܩܰܢ܆ ܕܚܰܕܺܝ ܠܰܐܪܥܳܐ ܘܠܰܫܡܰܝܳܐ܆ ܙܺܝܘܳܟ ܪܰܕܦܶܗ ܠܚܶܫܽܘܟܳܐ܆ ܕܰܦܪܺܝܣ ܗ̱ܘܳܐ ܥܰܠ ܦܶܢ̈ܝܳܬܳܐ܆ ܘܰܚܙܰܘ ܢܽܘܗܪܳܟ ܐܰܝܟ ܕܰܟܬܺܝܒ ܥܰܡܳܐ ܕܝܳܬܶܒ܆ ܒܛܶܠܳܠܰܝ̈ ܡܰܘܬܳܐ܆ ܘܰܗܘܳܐ ܠܗܽܘܢ ܥܰܪܡܳܐ ܠܫܰܦܝܳܐ܆ ܘܰܐܬܪܳܐ ܥܰܣܩܳܐ ܠܰܦܩܰܥܬܳܐ܆ ܘܰܚ݉ܙܰܐܽܘܟ ܟܽܠ ܒܣܰܪ܆ ܕܰܐܢ̱ܬܽ ܗ̱ܘ ܡܚܰܕܶܬ ܟܽܠ ܒܶܪ̈ܝܳܢ܆ ܘܰܒܝܽܘܡ ܕܶܢܚܳܟ ܐܶܫܬܰܝܰܢܘ܆ ܐܰܝܟ ܕܰܐܡܺܝܪܳܐ ܪܰܘܡܳܐ܆ ܘܥܽܘܡܩܳܐ ܘܟܽܠ ܕܰܒܗܽܘܢ܀

ܫܽܘܒܚܳܐ

ܗܳܐ ܚܳܕܶܝܢ ܥܰܡ̱̈ܡܶܐ ܒܕܶܢܚܳܟ܆ ܘܒܰܥܡܳܕܳܟ ܒܰܪ ܐܰܠܳܗܳܐ܆ ܕܒܶܗܽ ܗ̱ܘ ܩܢܰܘ ܝܰܠ̈ܕܰܘܗ̱ܝ ܕܳܐܕܳܡ܆ ܚܰܝ̈ܶܐ ܚܰܕ̱̈ܬܶܐ ܘܪ̈ܽܘܚܳܢܶܐ܆ ܘܒܶܗ ܐܶܫܬܰܝܰܢܘ ܥܶܠܳܝ̈ܶܐ ܥܰܡ ܬܰܚ̈ܬܳܝܶܐ܆ ܘܰܙܡܰܪܘ ܬܶܫܒܽܘܚܬܳܐ܆ ܘܕܳܫ̈ܢܶܐ ܕܫܽܘܒܚܳܐ ܩܰܪܶܒܘ ܠܶܗ܆ ܡܰܒܽܘ̈ܥܶܐ ܘܢܰܗܪ̈ܰܘܳܬܳܐ܆ ܕܒܶــ݉ܗܽ ܗ̱ܘ ܐܶܬܒܰܪܰܟܘ܆ ܕܢܰܦܪܽܘܢ ܝܰܠ̈ܕܶܐ ܪ̈ܽܘܚܳܢܶܐ܆ ܘܚܰܕܽܘܬܳܐ ܐܶܬܥܰܛܰܦ ܗ̱ܘܳܐ ܥܳܠܡܳܐ ܟܽܠܶܗ܆ ܡܶܢ ܣܰܘ̈ܦܶܐ ܠܣܰܘ̈ܦܶܝܗ̇ ܕܰܐܪܥܳܐ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܩܳܝܳܐ
ܐܰܒܽܘܢ ܕܒܰܫܡܰܝܳܐ ܥܢܺܝ ܠܰܢ

ܬܶܗܪܳܐ ܪܰܒܳܐ ܡܳܐ ܕܦܳܫܶܛ ܝܰܡܺܝܢܶܗ ܟܳܗܢܳܐ܆ ܘܦܳܬܰܚ ܠܳܗ̇ ܠܡܰܥܡܽܘܕܺܝܬܳܐ ܘܥܺܝܪ̈ܶܐ ܠܥܶܠ ܪܳܥܠܺܝܢ܆ ܩܳܐܶܡ ܥܰܦܪܳܐ܆ ܠܥܶܠ ܡܶܢ ܓܰܘܙܰܠܬܳܐ܆ ܘܩܳܪܶܐ ܠܪܽܘܚܳܐ܆ ܘܢܳܚܬܳܐ ܡܶܢ ܪܰܘܡܳܐ܆ ܥܳܢܝܳܐ ܠܶܗ ܩܰܠܺܝܠܳܐܺܝܬ ܘܨܶܒܝܳܢܶܗ ܥܳܒܕܳܐ܆ ܘܰܡܩܰܕܫܳܐ ܡܰܥܡܽܘܕܺܝܬܳܐ ܚܽܘܣܳܝܳܐ ܠܥܳܠܡܳܐ܆ ܗ̄ ܠܰܐܝܢܳܐ ܕܥܳܡܶܕ ܒܳܗ̇܀

ܫܽܘܒܚܳܐ

ܣܚܳܐ ܘܰܣܠܶܩ ܡܶܢ ܓܰܘ ܡܰܝ̈ܳܐ ܒܪܳܐ ܕܰܐܠܳܗܳܐ܆ ܘܰܫ̈ܡܰܝܳܐ ܘܰܫ̈ܡܰܝ ܫܡܰܝ̈ܳܐ ܠܺܐܝܩܳܪܶܗ ܐܶܬܦܬܰܚܘ܆ ܐܰܙܥܶܩ ܐܰܒܳܐ܆ ܕܗܳܢܰܘ ܒܶܪܝ ܚܰܒܺܝܒܝ܆ ܘܢܶܚܬܰܬ ܪܽܘܚܳܐ܆ ܘܩܰܘܝܰܬ ܥܰܠ ܪܺܝܫܶܗ܆ ܘܕܳܠܘ ܡܰܠܰܐܟ̈ܶܐ ܩܰܕܺܝ̈ܫܶܐ ܥܛܺܝ̈ܦܰܝ ܢܽܘܗܪܳܐ܆ ܟܰܕ ܩܳܥܶܝܢ ܩܰܕܺܝܫ ܩܰܕܺܝܫ ܩܰܕܺܝܫܰܬ ܡܳܪܝܳܐ܆ ܗ̄ ܕܶܐܬܰܝܬ ܠܰܥܡܳܕܳܐ܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕ̈ܰܝܟ܀

ܦܶܬܓܳܡܳܐ: ܝܰܡܳܐ ܚܙܳܝܗ̱ܝ ܘܰܥܪܰܩ܆ ܘܝܽܘܪܕܢܳܢ ܗܦܰܟ ܠܒܶܣܬܪܶܗ܆ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܢܦܰܩܘ ܡܶܢ ܝܺܗܽܘܕ ܒܢܰܝ̈ ܝܺܣܪܳܐܶܝܠ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܢܦܰܩ ܝܽܘܚܰܢܳܢ ܘܰܛܥܺܝܢ ܥܽܘܬܪܳܐ ܕܓܰܙܳܐ ܪܰܒܳܐ܆ ܕܰܢܨܰܒܶܬ ܗ̱ܘܳܐ ܠܒܰܪ̱ܬ ܡܶܣ̈ܟܺܢܶܐ ܐܰܝܟ ܕܶܐܬܦܰܩܰܕ܆ ܫܩܰܠ ܗ̱ܘܳܐ ܦܰܬܚܳܗ̇ ܠܥܽܘܒܳܐ ܕܪܽܘܚܳܐ ܠܥܶܠ ܡܶܢ ܡܰܝ̈ܳܐ܆ ܘܰܐܦܶܩ ܢܰܚ̈ܬܶܐ ܕܩܰܕܺܝܫܽܘܬܳܐ ܕܬܶܠܒܰܫ ܥܺܕܬܳܐ܀

ܠܳܟ ܬܶܫܒܽܘܚܬܳܐ ܐܳܘ ܡܕܰܟܝܳܢܳܐ ܕܟܽܠܗܽܘܢ ܛܰܡ̈ܶܐܐ܆ ܘܫܳܒܶܩ ܚܰܘ̈ܒܶܐ ܕܶܐܬܰܝܬ ܕܬܶܥܡܰܕ ܐܰܝܟ ܚܰܝܳܒܳܐ܆ ܟܽܠ ܕܶܐܬܚܰܪܰܪܘ ܡܳܪܝ ܒܰܣܚܳܬܳܟ ܡܶܢ ܛܰܡܐܽܘܬܳܐ܆ ܢܰܣܩܽܘܢ ܫܽܘܒܚܳܐ ܠܳܟ ܡܳܪܝ ܘܠܰܐܒܽܘܟ ܘܰܠܪܽܘܚ ܩܽܘܕܫܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀