ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܒܚܰܕ ܒܫܰܒܳܐ ܒܨܰܦܪܳܐ ܒܓܰܢܬܳܐ

ܒܰܥܡܳܕܶܗ ܕܒܰܪ ܐܰܠܳܗܳܐ܆ ܚܳܕܶܝܢ ܥܺܝܪ̈ܶܐ ܘܡܰܠܰܐܟ̈ܶܐ܆ ܘܪܳܘܙܳܐ ܥܺܕܬܳܐ ܘܝܰܠ̈ܕܶܝܗ̇ ܘܙܳܡܪܺܝܢ ܬܶܫܒܽܘܚܬܳܐ܀

ܒܪܺܝܟܽ ܗ̱ܘ ܓܰܙܳܐ ܕܥܽܘܕܪ̈ܳܢܶܐ܆ ܕܰܐܥܬܰܪ ܐܶܢܽܘܢ ܠܰܣܢܺܝ̈ܩܶܐ܆ ܒܪܺܝܟ ܫܶܡܫܳܐ ܕܙܰܕܺܝܩܽܘܬܳܐ ܕܰܐܢܗܰܪ ܠܰܢ܀

ܒܪܺܝܟܽ ܗ̱ܘ ܡܫܺܝܚܳܐ ܕܰܕܢܰܚ ܠܰܢ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܘܰܥܡܰܕ ܒܝܽܘܪܕܢܳܢ ܕܰܢܚܰܕܶܬ ܠܰܢ ܒܰܥܡܳܕܶܗ܀

ܒܗܳܢܳܐ ܝܰܘܡܳܐ ܩܥܳܐ ܐܰܒܳܐ܆ ܕܗܳܢܰܘ ܒܪܳܐ ܕܺܝܠܝ ܚܰܒܺܝܒܳܐ܆ ܘܪܽܘܚܳܐ ܕܩܽܘܕܫܳܐ ܐܰܝܟ ܕܰܒܨܶܒܥܳܐ ܚܰܘܝܶܗ ܗ̱ܘܳܐ܀

ܚܙܰܐܽܘܟ ܡܰܝ̈ܳܐ ܐܰܠܳܗܳܐ܆ ܐܰܟܪܶܙ ܕܰܘܺܝܕ ܒܰܪ ܐܺܝܫܰܝ܆ ܘܙܳܥ ܢܰܗܪܳܐ ܕܰܚܙܳܟ ܕܶܐܬܰܝܬ ܠܰܥܡܳܕܳܐ܀

ܒܪܺܝܟܽ ܗ̱ܘ ܕܒܰܥܡܳܕܶܗ ܩܰܕܫܰܢ܆ ܘܰܥܒܰܕ ܠܰܢ ܒܢܰܝ̈ܳܐ ܠܰܐܒܽܘܗ̱ܝ܆ ܘܰܟܬܰܒ ܠܰܢ ܐܰܚ̈ܶܐ ܘܝܳܪ̈ܬܶܐ ܕܡܰܠܟܽܘܬܳܐ ܫܡܰܝܳܢܺܝܬܳܐ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܩܳܡ ܡܶܢ ܒܶܝܬ ܡܺܝ̈ܬܶܐ

ܐܶܬܳܐ ܡܳܪܰܢ ܕܢܶܥܡܰܕ܆ ܘܚܰܘܺܝ ܢܰܦܫܶܗ ܨܶܝܕ ܝܽܘܪܕܢܳܢ܆ ܚܙܳܝܗ̱ܝ ܝܽܘܚܰܢܳܢ ܘܰܩܦܰܣ ܐܺܝܕܶܗ܆ ܘܩܳܡ ܟܰܕ ܡܰܙܥܶܩ܆ ܐܰܟܚܕܳܐ ܫܰܒܚܽܘܗ̱ܝ ܠܥܳܠܰܡ ܥܳܠܡܺܝܢ܀

ܐܶܡܰܪ ܗ̱ܘܳܐ ܟܰܕ ܪܳܥܶܠ܆ ܕܰܐܝܟܰܢܳܐ ܡܳܪܝ ܡܶܢܝ ܬܶܥܡܰܕ܆ ܕܰܐܢ̱ܬܽ ܗ̱ܘ ܡܚܰܣܝܳܢܳܐ ܕܟܽܠܗܽܘܢ܆ ܐܰܝܠܶܝܢ ܕܳܐܬܶܝܢ ܠܰܥܡܳܕܳܐ܆ ܐܰܟܚܕܳܐ ܫܰܒܚܽܘܗ̱ܝ ܠܥܳܠܰܡ ܥܳܠܡܺܝܢ܀

ܠܳܐ ܡܳܪܰܢ ܠܳܐ ܐܶܬܥܨܶܐ܆ ܕܶܐܢܳܐ ܣܢܺܝܩ ܐ̱ܢܳܐ ܕܡܶܢܳܟ ܐܶܥܡܰܕ܆ ܐܰܢ̱ܬܽ ܗ̱ܘ ܒܙܽܘܦܳܟ ܡܚܰܘܰܪ ܟܽܠ܆ ܐܰܟܚܕܳܐ ܫܰܒܚܽܘܗ̱ܝ ܠܥܳܠܰܡ ܥܳܠܡܺܝܢ܀

ܓܶܠܳܐ ܠܢܽܘܪܳܐ ܠܳܐ ܡܨܶܐ܆ ܕܢܶܠܒܽܘܟ ܒܺܐܝ̈ܕܰܘܗ̱ܝ ܟܰܕ ܚܰܒܬܰܐ ܗ̱ܘ܆ ܢܽܘܪܳܐ ܐܰܢ̱ܬ ܡܳܪܝ ܪܰܚܶܡ ܥܠܰܝ܆ ܘܠܳܐ ܐܶܩܪܽܘܒ ܠܳܟ ܕܠܳܐ ܐܶܬܢܰܟܶܐ܆ ܐܰܟܚܕܳܐ ܫܰܒܚܽܘܗ̱ܝ ܠܥܳܠܰܡ ܥܳܠܡܺܝܢ܀

ܐܶܡܰܪ ܠܶܗ ܦܳܪܽܘܩܰܢ܆ ܓܠܺܝܬ ܠܳܟ ܨܶܒܝܳܢܝ ܡܽܘܢ ܕܳܪܫܰܬ܆ ܩܪܽܘܒ ܐܰܥܡܶܕܰܝܢܝ ܒܓܰܘ ܡܰܝ̈ܳܐ܆ ܕܶܐܚܫܽܘܠ ܙܰܝܢܳܐ ܠܰܕܒܶܝܬ ܐܳܕܳܡ܆ ܐܰܟܚܕܳܐ ܫܰܒܚܽܘܗ̱ܝ ܠܥܳܠܰܡ ܥܳܠܡܺܝܢ܀

ܗܰܘ ܕܰܒܦܽܘܩܕܳܢܶܗ ܓܳܚܘ ܗ̱ܘܰܘ܆ ܡܳܡܽܘ̈ܠܶܐ ܕܝܰܡܳܐ ܪܰܒܳܐ܆ ܒܓܰܘ ܡܰܝ̈ܳܐ ܙܥܽܘܪ̈ܶܐ ܕܝܽܘܪܕܢܳܢ܆ ܢܚܶܬ ܘܰܥܡܰܕ ܡܶܛܽܠ ܪ̈ܰܚܡܰܘܗ̱ܝ܆ ܐܰܟܚܕܳܐ ܫܰܒܚܽܘܗ̱ܝ ܠܥܳܠܰܡ ܥܳܠܡܺܝܢ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ

ܬܶܗܪܳܐ ܪܰܒܳܐ ܘܕܽܘܡܳܪܳܐ܆ ܚܙܳܐ ܝܽܘܚܰܢܳܢ ܓܰܒܝܳܐ ܥܰܠ ܢܰܗܪܳܐ ܝܽܘܪܕܢܳܢ܆ ܠܰܒܪܳܐ ܡܫܺܝܚܳܐ ܟܰܕ ܥܳܡܶܕ܆ ܘܪܽܘܚܳܐ ܕܩܽܘܕܫܳܐ ܕܰܡܪܰܚܶܦ܆ ܘܰܐܒܳܐ ܕܩܳܥܶܐ ܘܳܐܡܰܪ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܀

ܬܶܗܪܳܐ ܪܰܒܳܐ ܘܕܽܘܡܳܪܳܐ܆ ܐܶܚܰܕ ܗ̱ܘܳܐ ܠܥܺܝܪ̈ܶܐ ܘܬܶܓ̈ܡܶܐ ܕܡܰܠܰܐܟ̈ܶܐ܆ ܕܰܚܙܰܐܽܘܗ̱ܝ ܠܰܒܪܳܐ ܕܥܳܡܶܕ܆ ܡܶܢ ܝܽܘܚܰܢܳܢ ܟܳܪܽܘܙܶܗ܆ ܘܟܶܢ̈ܫܶܐ ܕܩܳܥܶܝܢ ܘܳܐܡܪܺܝܢ܆ ܫܰܒܚܽܘܗ̱ܝ ܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܦܰܐܝܽܘܬ ܙܳܕܩܳܐܺܝܬ ܐܰܚܰܝ̈܆ ܢܶܬܩܰܪܰܒ ܟܽܠܰܢ ܠܘܳܬ ܡܥܺܝܢܳܐ ܕܡܰܝ̈ܳܐ܆ ܕܡܰܪܕܶܝܢ ܫܶܦ̈ܥܶܐ ܪ̈ܽܘܚܳܢܶܐ܆ ܕܗܳܐ ܡܶܠܬܳܐ ܐܶܬܳܐ ܠܘܳܬܰܢ܆ ܘܰܐܝܬܺܝ ܫܶܦ̈ܥܶܐ ܛܳܒ̈ܶܐ܆ ܘܰܫܒܺܝ̈ܚܶܐ ܠܨܰܗ̈ܝܰܝ ܠܰܐܠܳܗܳܐ܀

ܬܶܗܪܳܐ ܪܰܒܳܐ ܘܕܽܘܡܳܪܳܐ܆ ܟܰܕ ܩܳܐܶܡ ܗ̱ܘܳܐ ܒܶܝܬ ܟܶܢ̈ܫܶܐ ܒܳܪܽܘܝܳܐ ܕܥܳܠ̈ܡܶܐ܆ ܘܫܳܐܶܠ ܕܢܶܥܡܰܕ ܡܶܢ ܥܰܒܕܶܗ܆ ܕܠܰܢ ܢܚܰܪܰܪ ܡܶܢ ܥܰܒܕܽܘܬܳܐ܆ ܬܰܘ ܟܽܠܰܢ ܢܰܘܕܶܐ ܠܶܗ ܘܰܢܫܰܒܚܺܝܘܗ̱ܝ ܠܥܳܠܰܡ ܥܳܠܡܺܝܢ܀

ܢܫܰܒܰܚ ܟܽܠܰܢ ܒܰܪܘܳܙܳܐ܆ ܠܡܳܪܳܐ ܕܡܰܠܰܐܟ̈ܶܐ ܕܰܚܠܳܦܰܝܢ ܐܶܬܪܟܶܢ܆ ܘܰܐܝܟ ܣܢܺܝܩܳܐ ܥܡܰܕ ܗ̱ܘܳܐ ܒܡܰܝ̈ܳܐ܆ ܕܢܰܥܡܶܕ ܠܰܢ ܒܪܽܘܚܳܐ ܕܩܽܘܕܫܳܐ܆ ܘܢܶܥܒܕܰܢ ܒܢܰܝ̈ܳܐ ܠܰܐܒܽܘܗ̱ܝ܆ ܘܰܢܫܰܒܰܚ ܠܥܳܠܰܡ ܥܳܠܡܺܝܢ܀

ܬܶܗܪܳܐ ܪܰܒܳܐ ܘܕܽܘܡܳܪܳܐ܆ ܚܙܳܐ ܗ̱ܘܳܐ ܡܽܘܫܶܐ ܓܰܒܝܳܐ ܥܰܠ ܝܰܕ ܝܰܡܳܐ ܕܣܽܘܦ܆ ܝܰܡܳܐ ܕܰܦܠܺܝܓ ܗ̱ܘܳܐ ܠܰܬܪܶܝܢ܆ ܘܡܰܫܪܺܝܬܳܐ ܕܥܳܒܪܳܐ ܒܓܰܘܶܗ܆ ܘܥܰܡܳܐ ܕܩܳܥܶܐ ܘܳܐܡܰܪ܆ ܫܰܒܚܽܘܗ̱ܝ ܠܥܳܠܰܡ ܥܳܠܡܺܝܢ܀

ܝܽܘܚܰܢܳܢ ܩܪܶܒ ܟܰܕ ܕܳܚܶܠ܆ ܕܰܐܝܟ ܥܰܒܕܳܐ ܠܦܽܘܩܕܳܢܳܐ ܕܡܳܪܶܐ ܟܽܠ ܢܶܫܬܡܰܥ܆ ܘܣܳܡ ܝܰܡܺܝܢܶܗ ܥܰܠ ܪܺܝܫܶܗ܆ ܘܰܐܙܥܶܩ ܐܰܒܳܐ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܆ ܢܰܘܕܶܐ ܠܶܗ ܟܽܠܰܢ ܘܰܢܫܰܒܚܺܝܘܗ̱ܝ ܠܥܳܠܰܡ ܥܳܠܡܺܝܢ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܐܰܢ̱ܬ ܕܰܒܪܺܝܫܺܝܬ

ܒܰܛܶܠܬ ܘܰܫܪܰܝܬ ܠܰܚܛܺܝܬܳܐ ܕܓܶܢܣܳܐ ܕܺܝܠܰܢ܆ ܒܝܰܕ ܡܰܘܠܳܕܳܐ ܕܝܰܗ̱ܒܬ ܠܰܢ ܡܶܢܕܪܺܝܫ ܒܰܣܚܳܬܳܟ܆ ܡܒܰܪܟܳܐ ܓܶܝܪ ܐܺܝܬܰܝܟ܆ ܡܳܪܝܳܐ ܐܰܠܳܗܳܐ ܡܩܺܝܡܳܢܳܐ ܕܡܰܦܽܘܠܬܰܢ܀

ܐܰܢ̱ܬ ܕܡܶܢ ܠܩܽܘܕܡܺܝܢ ܒܨܰܠܡܳܟ ܥܒܰܕܬܳܝܗ̱ܝ ܠܪܺܝܫ ܓܶܢܣܰܢ܆ ܘܒܰܥܡܳܕܳܟ ܬܽܘܒ ܡܶܢ ܕܪܺܝܫ ܚܰܕܶܬܬܳܝܗ̱ܝ ܒܪ̈ܰܚܡܰܝܟ܆ ܡܒܰܪܟܳܐ ܓܶܝܪ ܐܺܝܬܰܝܟ܆ ܡܳܪܝܳܐ ܐܰܠܳܗܳܐ ܡܩܺܝܡܳܢܳܐ ܕܡܰܦܽܘܠܬܰܢ܀

ܐܰܢ̱ܬ ܕܰܐܝܟ ܣܢܺܝܩܳܐ ܥܡܰܕܬ ܒܝܽܘܪܕܢܳܢ ܡܶܢ ܝܽܘܚܰܢܳܢ܆ ܘܰܐܝܟ ܐܰܠܳܗܳܐ ܫܰܟܶܢܬ ܠܰܢ ܫܽܘܒܩܳܢ ܚܰܘ̈ܒܶܐ܆ ܡܒܰܪܟܳܐ ܓܶܝܪ ܐܺܝܬܰܝܟ܆ ܡܳܪܝܳܐ ܐܰܠܳܗܳܐ ܡܩܺܝܡܳܢܳܐ ܕܡܰܦܽܘܠܬܰܢ܀

ܐܰܢ̱ܬ ܕܒܰܥܡܳܕܳܟ܆ ܩܰܕܶܫܬ ܠܰܢ ܡܰܥܡܽܘܕܺܝܬܳܐ܆ ܘܰܐܒܳܐ ܕܣܳܗܶܕ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܆ ܡܒܰܪܟܳܐ ܓܶܝܪ ܐܺܝܬܰܝܟ܆ ܡܳܪܝܳܐ ܐܰܠܳܗܳܐ ܡܩܺܝܡܳܢܳܐ ܕܡܰܦܽܘܠܬܰܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܰܝܬ ܕܩܰܕܺܝܫ ܐܰܟܘܳܬܳܟ

ܢܽܘܪܳܐ ܗܳܝ ܐܰܠܳܗܳܝܬܳܐ: ܕܒܰܥܡܺܝ̈ܕܶܐ ܕܒܶܣܪܳܐ ܐܰܓܢܰܬ: ܐܶܬܚܰܝܕܰܬ ܒܰܚܕܳܐ ܐܰܘܝܽܘܬܳܐ: ܒܨܶܡܚܳܐ ܫܒܺܝܚܳܐ ܘܠܳܐ ܒܠܺܝܠܳܐ: ܕܠܶܗ ܡܫܰܒ̈ܚܳܢ ܟܽܠ ܒܶܪ̈ܝܳܬܳܐ: ܕܠܰܝܬ ܕܩܰܕܺܝܫ ܐܰܟܘܳܬܳܟ ܡܳܪܝܳܐ܀

ܐܰܒܳܐ ܐܰܣܗܶܕ ܒܝܰܕ ܩܳܠܳܐ: ܠܫܰܘܝܽܘܬ ܡܰܢ ܐܰܠܳܗܽܘܬܳܐ: ܕܺܝܚܺܝܕܳܝܳܐ ܣܓܺܝܕ ܡܶܢ ܟܽܠ: ܘܪܽܘܚܳܐ ܕܩܽܘܕܫܳܐ ܒܡܰܚܰܬܬܶܗ: ܠܰܟܝܳܢܳܐ ܗܰܘ ܠܳܐ ܣܕܺܝܩܳܐ: ܕܰܐܠܳܗܽܘܬܳܐ ܓܠܳܐ ܘܚܰܘܺܝ: ܒܰܬܠܺܝܬܳܝܽܘܬ ܩܢܽܘ̈ܡܶܐ ܡܫܰܒ̈ܚܶܐ܀

ܬܶܗܪܳܐ ܪܰܒܳܐ ܘܕܽܘܡܳܪܳܐ: ܐܶܚܰܕ ܗ̱ܘܳܐ ܠܥܺܝܪ̈ܰܝ ܪܰܘܡܳܐ: ܕܰܚܙܰܐܘܽܗ̱ܝ ܠܺܝܚܺܝܕܳܝܳܐ: ܕܰܥܡܰܕ ܡܶܢ ܐܺܝ̈ܕܰܝ ܥܰܒܕܶܗ: ܗܰܘ ܕܺܐܝܬܰܘܗ̱ܝ ܡܳܪܳܐ ܕܥܺܝܪ̈ܶܐ: ܕܰܨܒܳܐ ܘܰܥܡܰܕ ܡܶܢ ܝܽܘܚܰܢܳܢ: ܫܽܘܒܚܳܐ ܠܶܗ ܘܰܠܫܳܠܽܘܚܶܗ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܥܶܕܳܢ ܨܰܦܪܳܐ

ܒܝܽܘܪܕܢܳܢ ܢܰܗܪܳܐ. ܝܽܘܚܰܢܳܢ ܚܙܳܐ ܗ̱ܘܳܐ ܬܶܕܡܽܘܪܬܳܐ܆ ܡܰܠܰܐܟ̈ܶܐ ܕܰܡܝܰܒܒܺܝܢ ܠܰܒܪܳܐ ܟܰܕ ܐܳܡܪܺܝܢ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܝܽܘܪܕܢܳܢ ܢܰܗܪܳܐ. ܐܶܬܥܡܶܕ ܒܪܳܐ ܕܰܐܠܳܗܳܐ܆ ܘܰܚܙܰܐܽܘܗ̱ܝ ܟܶܢ̈ܫܶܐ ܕܰܐܪ̈ܥܳܢܶܐ ܘܰܡܫܰܒܚܺܝܢ܆ ܫܽܘܒܚܳܐ ܠܳܟ ܐܰܠܳܗܳܐ܀

ܙܳܥܰܬ ܐܰܪܥܳܐ܆ ܕܰܚܙܳܬܶܗ ܠܓܰܒܝܳܐ ܕܰܐܠܳܗܳܐ܆ ܟܰܕ ܣܳܐܶܡ ܐܺܝܕܶܗ ܥܰܠ ܡܳܪܶܗ ܘܰܡܫܰܒܰܚ܆ ܫܽܘܒܚܳܐ ܠܳܟ ܐܰܠܳܗܳܐ܀

ܬܗܰܪܘ ܡܰܠܰܐܟ̈ܶܐ܆ ܘܟܶܢ̈ܫܶܐ ܟܽܠܗܽܘܢ ܕܰܫܡܰܝܳܐ܆ ܒܡܳܪܳܐ ܕܰܥܡܰܕ ܡܶܢ ܥܰܒܕܶܗ ܘܰܡܫܰܒܚܺܝܢ܆ ܫܽܘܒܚܳܐ ܠܳܟ ܐܰܠܳܗܳܐ܀

ܗܰܘ ܕܺܐܝܬܰܘܗ̱ܝ ܗ̱ܘܳܐ܆ ܡܳܪܳܐ ܕܥܺܝܪ̈ܶܐ ܘܰܕܐ̱ܢܳܫ̈ܳܐ܆ ܒܓܰܘ ܝܽܘܪܕܢܳܢ ܥܡܰܕ ܡܶܢ ܝܽܘܚܰܢܳܢ ܡܶܛܽܠܳܬܰܢ܆ ܫܽܘܒܚܳܐ ܠܳܟ ܐܰܠܳܗܳܐ܀

ܛܳܣܰܬ ܪܽܘܚܳܐ܆ ܡܶܢ ܪܰܘܡܳܐ ܒܰܕܡܽܘܬܳܐ ܕܝܰܘܢܳܐ܆ ܘܥܰܠ ܪܺܝܫܶܗ ܕܰܒܪܳܐ ܫܶܟܢܰܬ ܗ̱ܘܳܬ ܘܰܡܫܰܒܚܺܝܢ܆ ܫܽܘܒܚܳܐ ܠܳܟ ܐܰܠܳܗܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܚܰܬܢܳܐ ܡܰܛܺܝ

ܝܽܘܚܰܢܳܢ ܐܰܟܪܶܙ ܘܶܐܡܰܪ: ܒܰܝܢܳܬ ܟܶܢ̈ܫܶܐ: ܕܰܡܫܺܝܚܳܐ ܒܳܬܪܰܝ ܐܳܬܶܐ: ܘܩܰܕܡܳܝܽ ܗ̱ܘ ܡܶܢܝ܀

ܩܪܶܒ ܡܳܪܰܢ ܨܶܝܕ ܝܽܘܚܰܢܳܢ ܕܢܶܥܡܰܕ ܡܶܢܶܗ: ܘܩܳܡܘ ܒܰܪܬܺܝܬܳܐ ܬܶܓܡܰܝ̈ܗܽܘܢ ܕܰܫܡܰܝ̈ܳܢܶܐ܀

ܒܪܺܝܟ ܚܰܝܳܐ ܕܰܢܚܶܬ ܘܰܥܡܰܕ ܡܶܢ ܝܽܘܚܰܢܳܢ: ܘܩܰܕܶܫ ܠܰܢ ܡܰܥܡܽܘܕܺܝܬܳܐ ܠܚܽܘܣܳܝ ܚܰܘ̈ܒܶܐ܀

ܨܪܳܐ ܐܰܒܳܐ ܫܡܰܝܳܐ ܘܰܐܙܥܶܩ ܥܰܠ ܚܰܒܺܝܒܶܗ: ܕܗܳܢܰܘ ܒܶܪܝ ܠܳܐ ܬܶܬܦܰܠܓܽܘܢ ܥܰܠ ܡܶܐܬܺܝܬܶܗ܀

ܛܳܣܰܬ ܪܽܘܚܳܐ ܡܶܢ ܪܰܘܡܳܐ ܒܬܶܗܪܳܐ ܪܰܒܳܐ: ܘܢܶܚܬܰܬ ܫܶܟܢܰܬ ܥܰܠ ܪܺܝܫܶܗ ܕܺܝܚܺܝܕܳܝܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܡܳܐ ܦܰܐܝܳܐ ܗ̱ܘܳܬ ܫܳܥܬܳܐ܆ ܕܰܢܚܶܬ ܡܳܪܰܢ ܠܝܽܘܪܕܢܳܢ ܢܰܗܪܳܐ܆ ܟܰܕ ܐܳܡܰܪ ܠܶܗ ܠܝܽܘܚܰܢܳܢ ܩܪܽܘܒ ܐܰܥܡܶܕܰܝܢܝ܆ ܘܰܥܢܳܐ ܘܶܐܡܰܪ. ܡܳܪܝ ܘܰܐܠܳܗܝ ܪܰܚܶܡ ܥܠܰܝ܀

ܡܳܐ ܫܰܦܺܝܪ ܗ̱ܘܳܐ ܩܳܠܶܗ܆ ܕܰܒܪܳܐ ܡܫܺܝܚܳܐ ܟܰܕ ܐܳܡܰܪ ܠܶܗ܆ ܠܒܰܪ ܥܰܩܪ̈ܶܐ ܩܪܽܘܒ ܣܺܝܡ ܐܺܝܕܳܟ ܥܰܠ ܪܺܝܫܝ ܘܶܐܥܡܰܕ܆ ܘܰܐܒܳܐ ܕܡܰܙܥܶܩ܆ ܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܀

ܫܽܘܒܚܳܐ

ܡܳܐ ܫܰܦܺܝܪ ܗ̱ܘܳܐ ܩܳܠܶܗ܆ ܕܰܐܒܳܐ ܕܩܳܥܶܐ ܒܪܰܘܡܳܐ ܕܰܠܥܶܠ܆ ܟܰܕ ܥܳܡܶܕ ܗ̱ܘܳܐ ܦܳܪܽܘܩܰܢ ܡܶܢ ܝܽܘܚܰܢܳܢ܆ ܕܗܳܢܳܐ ܐܺܝܬܰܘܗ̱ܝ܆ ܒܶܪܝ ܚܰܒܺܝܒܳܐ ܘܫܰܪܺܝܪܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܳܐ ܕܰܒܚܽܘܒܶܗ

ܐܰܒܳܐ ܒܚܽܘܒܶܗ: ܫܰܕܰܪ ܠܰܒܪܶܗ ܚܰܒܺܝܒܳܐ: ܘܰܢܚܶܬ ܘܰܥܡܰܕ ܒܓܰܘ ܝܽܘܪܕܢܳܢ ܡܶܢ ܝܽܘܚܰܢܳܢ: ܘܫܰܡܠܺܝ ܐ̱ܪ̈ܳܙܶܐ ܕܰܢܒܺܝ̈ܶܐ: ܕܶܐܬܢܰܒܺܝܘ ܡܶܛܽܠܳܬܶܗ: ܐܶܬܕܰܟܪܰܝܢ ܡܳܪܝܳܐ܀

ܐܳܘ ܠܡܰܣܚܽܘܬܳܐ: ܩܰܕܺܝܫܬܳܐ ܘܰܐܠܳܗܳܝܬܳܐ: ܕܫܰܟܢܰܬ ܠܰܢ ܚܰܝ̈ܶܐ ܚܰܕ̈ܬܶܐ ܘܠܳܐ ܡܳܝܽܘ̈ܬܶܐ: ܕܰܢܚܶܬ ܥܶܠܳܝܳܐ ܠܡܰܝ̈ܳܐ: ܕܢܰܣܶܩ ܬܰܚ̈ܬܳܝܶܐ ܠܪܰܘܡܳܐ: ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܡܦܺܝܣܺܝܢܰܢ ܠܳܟ: ܒܗܳܢܳܐ ܝܰܘܡܳܐ ܕܰܥܡܳܕܳܟ: ܕܰܬܚܰܕܶܬ ܥܰܬܺܝܩܽܘܬܰܢ ܒܪܽܘܚܳܐ ܕܩܽܘܕܫܳܐ: ܘܰܒܥܰܕܥܺܐܕܳܟ ܕܠܳܐ ܥܳܒܰܪ ܢܫܰܒܚܳܟ ܥܰܡ ܩܰܕܺܝ̈ܫܰܝܟ: ܐܶܬܕܰܟܪܰܝܢ ܡܳܪܝܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ
ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ ܠܰܐܠܳܗܳܐ

ܡܰܠܰܐܟ̈ܶܐ ܘܰܒܢܰܝ̈ܢܳܫܳܐ܆ ܚܠܺܝܛܺܝܢ ܝܰܘܡܳܢ ܒܰܚ̈ܕܳܕܶܐ܆ ܘܰܦܨܺܝܚܽܘܬܳܐ ܘܚܰܕܽܘܬܳܐ ܣܶܠܩܰܬ ܠܰܡܪ̈ܰܘܡܶܐ܆ ܒܰܝܢܳܬ ܗܳܠܶܝܢ ܓܰܠ̈ܝܳܬܳܐ܆ ܚܠܺܝ̈ܛܳܢ ܗܳܠܶܝܢ ܟܰܣ̈ܝܳܬܳܐ܆ ܘܚܳܕܶܝܢ ܒܳܗ̇ ܒܡܰܥܡܽܘܕܺܝܬܳܐ. ܡܰܠܰܐܟ̈ܶܐ ܘܐ̱ܢܳܫ̈ܳܐ܀

ܫܽܘܒܚܳܐ

ܗܘܳܐ ܠܰܢ ܡܳܪܰܢ ܡܶܨܥܳܝܳܐ܆ ܒܶܝܬ ܠܰܢ ܘܠܰܐܒܳܐ ܝܳܠܽܘܕܶܗ܆ ܘܰܐܝܟ ܪܺܝܫܳܐ ܘܪܰܒܳܐ ܕܟܽܘܡܪ̈ܶܐ܆ ܩܳܐܶܡ ܥܰܠ ܡܰܝ̈ܳܐ܆ ܡܰܣܚܶܐ ܘܡܰܥܡܶܕ ܘܰܡܩܰܕܶܫ܆ ܒܩܽܘ̈ܕܫܶܐ ܬܠܺܝ̈ܬܳܝܰܝ ܛܽܘ̈ܒܶܐ܆ ܠܰܐܝܠܶܝܢ ܕܳܐܬܶܝܢ ܘܡܶܬܥܰܡܕܺܝܢ܆ ܒܡܰܝ̈ܳܐ ܕܚܽܘܣܳܝܳܐ܀

ܡܶܢ ܥܳܠܰܡ

ܢܶܬܕܟܰܪ ܐܶܢܽܘܢ ܠܰܐܒܳܗܰܝ̈ܢ܆ ܕܡܰܠܦܺܝܢ ܗ̱ܘܰܘ ܠܰܢ ܟܰܕ ܚܰܝ̣ܺܝ̣ܢ܆ ܕܢܶܗܘܶܐ ܒܢ̈ܰܝܳܐ ܠܰܐܠܳܗܳܐ: ܒܗܳܢ ܥܳܠܡܳܐ ܕܥܳܒܰܪ. ܒܪܳܐ ܕܰܐ‌ܠܳܗܳܐ ܢܢܺܝܚ ܐܶܢܽܘܢ: ܒܗܳܝ ܡܰܠܟܽܘܬܳܐ ܕܰܫܡܰܝܳܐ. ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ: ܒܥܳܠܡܳܐ ܕܠܳܐ ܥܳܒܰܪ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ
ܣܠܶܩ ܥܶܛܪܳܐ ܡܶܢ ܓܰܪ̈ܡܰܝܗܽܘܢ

ܙܡܺܝ̈ܢܶܐ ܘܰܚܕܽܘ̈ܓܶܐ ܕܚܰܬܢܳܐ ܥܽܘܠܘ ܘܶܐܬܒܰܣܰܡܘ܆ ܒܡܶܫܬܽܘܬܳܐ ܕܛܰܝܶܒ ܐܰܒܳܐ ܠܺܝܚܺܝܕܳܝܶܗ܆ ܘܡܶܢ ܡܰܝ̈ܳܐ ܡܟܰܪ ܠܶܗ ܥܺܕܬܳܐ ܟܰܠܰܬ ܢܽܘܗܪܳܐ܆ ܘܗܳܐ ܚܠܺܝܛܳܐ ܥܰܡܶܗ ܒܫܽܘܒܚܳܐ ܩܰܕܺܝܫܳܐܺܝܬ܀

ܫܽܘܒܚܳܐ

ܠܒܽܘ̈ܫܰܝ ܫܽܘܒܚܳܐ ܝܰܗ̱ܒ ܗ̱ܘܳܐ ܠܳܗ̇ ܡܫܺܝܚܳܐ ܠܥܺܕܬܶܗ܆ ܕܰܒܡܰܝ̈ܳܐ ܙܩܺܝܪܺܝܢ ܟܽܠܗܽܘܢ ܐܰܠܳܗܳܐܺܝܬ܆ ܘܡܶܢ ܡܰܝ̈ܳܐ ܘܪܽܘܚܳܐ ܕܩܽܘܕܫܳܐ ܦܰܪܰܩܠܺܝܛܳܐ܆ ܨܶܒ̈ܬܶܐ ܪ̈ܓܺܝܓܶܐ ܐܶܬܥܰܛܦܰܬ ܒܰܪ̱ܬ ܢܰܗܺܝܪ̈ܶܐ܀

ܡܶܢ ܥܳܠܰܡ

ܫܽܘܒܚܳܐ ܠܳܟ ܕܰܒܦܽܘܩܕܳܢܳܟ. ܐܰܡܠܶܟ ܡܰܘܬܳܐ. ܘܰܒܢܽܘܚܳܡܳܟ ܐܶܬܒܰܛܰܠ ‌ܐܳܦ ܚܰܪܡܳܢܳܐ. ܬܶܣܰܩܝ ܠܳܟ ܡܳܪܝ ܬܶܫܒܽܘܚܬܳܐ ܡ̣ܶܢ ܟܽܠ ܦܽܘܡܺܝ̈ܢ: ܘܡ̣ܶܢ ܟܽܠ ܕܽܘܟܳܐ ܡܟܰܢܶܫ ܐܰܢ̱ܬ: ܠܥܰܦܪܶܗ ܕܳܐܕܳܡ܀

ܦܶܬܓܳܡܳܐ: ܐܰܢ̱ܬ ܒܥܽܘܫܢܳܟ ܦܪܰܫܬ ܝܰܡܳܐ: ܘܪܰܨܶܨܬ ܪ̈ܺܝܫܰܝܗܽܘܢ ܕܬܰܢܺܝ̈ܢܶܐ ܒܡܰܝ̈ܳܐ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܐܳܙܺܠ̱ܝܢ ܕܳܪ̈ܶܐ ܘܳܐܬܶܝܢ ܕܳܪ̈ܶܐ ܘܣܳܒܳܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܚܙܳܗ̇ ܠܰܪܕܺܝܦܬܳܐ ܕܰܡܚܺܝܠܳܐ ܗ̱ܘܳܬ ܘܰܫܚܺܝܩܳܐ ܗ̱ܘܳܬ܆ ܘܰܡܙܰܓ ܡܰܝ̈ܳܐ ܘܫܰܕܪܳܗ̇ ܕܬܶܣܚܶܐ ܘܟܶܢ ܡܶܬܡܰܟܪܳܐ܆ ܚܳܪ ܒܰܩܢܽܘܡܳܗ̇ ܕܶܐܫܬܰܢܺܝ ܠܶܗ ܒܥܶܛܪ̈ܶܐ ܕܨܰܠ̈ܡܶܐ܆ ܘܰܙܠܰܚ ܫܶܦ̈ܥܶܐ ܕܢܰܗܪܳܐ ܒܰܐܦܶܝ̈ܗ̇ ܕܢܶܫܦܰܪ ܓܰܘܢܳܗ̇܀

ܫܽܘܒܚܳܐ ܠܰܐܒܳܐ ܕܰܡܟܰܪ ܥܺܕܬܳܐ ܠܺܝܚܺܝܕܳܝܶܗ܆ ܘܣܶܓܕܬܳܐ ܠܰܒܪܳܐ ܕܥܰܒܕܳܗ̇ ܟܰܠܬܳܐ ܘܚܰܬܡܳܗ̇ ܒܰܫܡܶܗ܆ ܬܰܘܕܺܝ ܠܪܽܘܚܳܐ ܕܡܰܪܩܳܗ̇ ܘܩܰܕܫܳܗ̇ ܒܡܰܥܡܽܘܕܺܝܬܳܐ܆ ܚܰܕܽ ܗ̱ܘ ܟܝܳܢܳܐ ܕܰܬܠܳܬܰܝ̈ܗܽܘܢ ܠܶܗ ܬܶܫܒܽܘܚܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀