ܕܰܬܠܳܬܳܐ ܒܫܰܒܳܐ

ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܗܰܘ ܕܰܠܡܰܠܟܳܐ ܕܢܺܝܢܘܶܐ܆ ܕܰܠܒܶܫ ܣܰܩܳܐ ܥܰܡ ܦܳܠ̈ܚܰܘܗ̱ܝ܆ ܫܰܘܙܶܒ ܘܰܦܪܰܩ܆ ܡܶܢ ܪܽܘܓܙܳܐ ܘܡܶܢ ܐܰܒܕܳܢܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܰܒܣܽܘܓܳܐܐ ܕܪ̈ܰܚܡܰܘܗ̱ܝ܆ ܐܶܬܪܰܥܺܝ ܗ̱ܘܳܐ ܠܢܺܝܢ̈ܘܳܝܶܐ܆ ܐܶܬܪܰܥܳܐ ܠܰܢ܆ ܕܰܐܪܓܶܙܢܳܟ ܡܳܪܝ ܒܰܥ̈ܒܳܕܰܝܢ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܰܢ̱ܬ ܕܰܠܥܰܡܳܐ ܕܢܺܝܢܘܶܐ܆ ܕܰܒܚܰܫܳܐ ܐܶܬܩܰܪܰܒܘ ܠܳܟ܆ ܘܰܒܝܰܕ ܨܰܘܡܳܐ܆ ܘܰܨܠܽܘܬܳܐ ܩܰܒܶܠܬ ܐܶܢܽܘܢ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܳܘ ܡܪܰܚܡܳܢܳܐ ܕܩܰܒܶܠ܆ ܕܶܡ̈ܥܶܐ ܕܚܰܫܳܐ ܡܶܢ ܢܺܝܢܘܶܐ܆ ܩܰܒܶܠ ܒܪ̈ܰܚܡܰܝܟ܆ ܕܶܡ̈ܥܶܐ ܕܥܰܒ̈ܕܰܝܟ ܘܕܰܐܡ̈ܗܳܬܳܟ܆ ܐܰܠܳܗܳܐ ܐܶܬܪܰܚܰܡܥܠܰܝܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܨܠܺܝ ܡܳܪܝܳܐ ܒܪ̈ܰܚܡܶܐ

ܢܺܝܢܘܶܐ ܡܕܺܝܢ̱ܬܳܐ ܐܶܫܬܰܓܫܰܬ. ܒܝܰܘܢܳܢ ܕܰܢܦܰܩ ܡܶܢ ܝܰܡܳܐ܆ ܦܬܰܚ ܝܰܘܢܳܢ ܦܽܘܡܶܗ ܟܺܐܢܳܐ܆ ܘܢܺܝܢܘܶܐ ܫܶܡܥܰܬ ܘܶܐܬܟܰܡܪܰܬ܀

ܚܰܕ ܟܳܪܽܘܙܳܐ ܥܶܒܪܳܝܳܐ܆ ܕܰܠܚܶܗ ܠܟܰܪܟܳܐ ܡܶܢ ܣܳܟܶܗ܆ ܡܠܶܐ ܦܽܘܡܶܗ ܘܝܰܗ̱ܒܠܶܗ ܘܳܝܳܐ܆ ܘܦܰܠܶܓ ܡܰܘܬܳܐ ܠܫܳܡܽܘ̈ܥܰܘܗ̱ܝ܀

ܝܰܡܳܐ ܕܪ̈ܰܚܡܶܐ ܘܕܰܚܢܳܢܳܐ܆ ܕܰܐܓܺܝܚ ܫܶܦ̈ܥܰܘܗ̱ܝ ܥܰܠ ܓܶܢܣܰܢ܆ ܚܰܣܳܐ ܚܰܘ̈ܒܶܐ ܕܡܰܪܥܺܝܬܳܟ܆ ܒܰܕܡܳܐ ܕܰܪܕܳܐ ܡܶܢ ܕܰܦܢܳܟ܀

ܢܶܫܠܰܚ ܐܰܚܰܝ̈ ܣܰܢ̈ܝܳܬܳܐ܆ ܐܰܝܟ ܢܺܝܢ̈ܘܳܝܶܐ ܒܦܽܘܪܫܳܢܳܐ܆ ܘܢܶܠܒܰܫ ܙܰܝܢܳܐ ܕܛܳܒ̈ܳܬܳܐ܆ ܕܰܢܪܰܥܶܝܘܗ̱ܝ ܠܰܡܠܶܟ ܡܰܠ̈ܟܶܐ܀

ܫܽܘܒܚܳܐ

ܬܰܘܕܺܝ ܠܳܟ ܡܶܢ ܟܽܠ ܦܽܘ̈ܡܺܝܢ܆ ܠܳܟ ܬܶܫܒ̈ܚܳܢ ܒܟܽܠ ܠܶܫܳܢܺܝ̈ܢ܆ ܛܳܒܳܐ ܕܰܨܒܳܐ ܒܦܽܘܪܩܳܢܰܢ܆ ܠܳܟ ܫܽܘܒܚܳܐ ܘܰܥܠܰܝܢ ܪ̈ܰܚܡܶܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܣܳܗ̈ܕܰܘܗ̱ܝ ܐܰܢ̱ܬܽܘܢ
ܝܳܕܥܺܝܢܰܢ ܡܳܪܝ ܕܰܚܛܰܝܢܰܢ ܠܳܟ

ܛܠܳܝ̈ܶܐ ܪ̈ܚܺܝܡܶܐ ܒܢܰܝ̈ ܥܶܒܪ̈ܳܝܶܐ܆ ܒܨܰܘܡܳܐ ܕܰܥܶܟܘ ܠܢܽܘܪܶܗ ܕܰܐܬܽܘܢܳܐ܆ ܐܳܦ ܢܺܝܢ̈ܘܳܝܶܐ܆ ܒܣܰܩ̈ܶܐ ܘܕܶܡ̈ܥܶܐ ܒܰܛܶܠܘ ܪܽܘܓܙܳܐ ܕܰܠܚܺܝܡ ܗ̱ܘܳܐ ܥܠܰܝܗܽܘܢ܆ ܘܳܐܦ ܚܢܰܢ ܡܳܪܰܢ܆ ܕܦܰܓܪܳܟ ܘܰܕܡܳܟ ܐܰܘܟܶܠܬܳܢ܆ ܫܰܟܶܢ ܠܰܢ ܒܶܗ ܚܽܘܣܳܝܳܐ܀

ܫܽܘܒܚܳܐ

ܒܶܫܬܳܐ ܝܰܘ̈ܡܺܝܢ ܒܪܳܐ ܐܰܠܳܗܳܐ܆ ܫܡܰܝ̈ܳܐ ܘܰܐܪܥܳܐ ܘܟܽܠܡܳܐ ܕܺܐܝܬ ܒܗܽܘܢ܆ ܘܰܠܚܰܕ ܟܰܪܟܳܐ ܕܰܒܥܳܐ ܕܢܶܥܩܽܘܪ܆ ܐܰܪܒܥܺܝܢ ܝܰܘ̈ܡܺܝܢ ܐܰܓܰܪ ܠܶܗ ܪܽܘܚܳܐ܆ ܠܶܗ ܬܶܫܒܽܘܚܬܳܐ܆ ܕܡܳܐ ܕܒܳܢܶܐ ܩܰܠܺܝܠ ܘܰܪܗܺܝܒ܆ ܘܡܳܐ ܕܪܳܓܶܙ ܡܰܓܰܪ ܪܽܘܚܶܗ܀

ܡܶܢ ܥܳܠܰܡ

ܝܳܕܥܺܝܢܰܢ: ܡܳܪܝ ܕܰܚܛܰܝܢܰܢ ܠܳܟ ܘܰܒܣܽܘܪ̈ܚܳܢܝܢ: ܣܰܓܺܝ ܐܰܪܓܶܙܢܳܟ. ܘܶܐܢ ܟܺܐܢܽܘܬܳܐ ܫܶܡܛܰܬ ܣܰܝܦܳܐ. ܚܢܳܢܳܟ ܡܳܪܰܢ܆ ܗܽܘ ܢܶܩܽܘܡ ܒܰܐܦܰܝ̈ܢ܆ ܘܶܐܢܗܽܘ ܡܳܪܰܢ. ܕܫܽܘܠܳܡܶܗ ܕܙܰܒܢܳܐ ܡܰܛܺܝ: ܒܪ̈ܰܚܡܰܝܟ ܢܶܗܘܶܐ ܫܽܘܠܳܡܰܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܒܥܺܝ ܚܰܛܳܝܳܐ ܫܽܘܒܩܳܢܳܐ ܡܶܢ ܐܰܠܳܗܳܐ

ܫܰܦܺܝܪܳܐ ܗ̱ܘܳܬ܆ ܒܳܥܽܘܬܳܐ ܕܥܶܒܕܰܬ ܢܺܝܢܘܶܐ܆ ܕܡܳܪܝܳܐ ܒܪܰܘܡܳܐ ܐܶܬܬܢܺܝܚ ܒܳܗ̇܆ ܘܡܰܠܰܐܟ̈ܶܐ ܘܥܺܝܪ̈ܶܐ ܬܗܰܪܘ ܒܳܗ̇܆ ܘܢܶܨܚܳܢܳܐ ܕܰܬܝܳܒܽܘܬܳܐ܆ ܐܶܬܡܰܠܰܠ ܒܰܐܪܒܰܥ ܦܶܢ̈ܝܳܢ܆ ܕܰܒܢܰܝ̈ܢܳܫܳܐ ܘܰܒܥܺܝܪܳܐ܆ ܒܨܰܘܡܳܐ ܪܰܥܺܝܘ ܠܰܐܠܳܗܳܐ܆ ܘܰܒܕܶܡ̈ܥܶܐ ܘܰܒܚܶܢ̈ܓܳܬܳܐ܆ ܐܶܫܬܰܘܙܰܒܘ ܡܶܢ ܐܰܒܕܳܢܳܐ܀

ܫܽܘܒܚܳܐ

ܠܳܐ ܐܶܫܬܰܡܥܰܬ܆ ܒܰܒܪܺܝܬܳܐ ܡܶܢ ܫܽܘܪܳܝܳܐ܆ ܐܰܝܟ ܒܳܥܽܘܬܳܐ ܕܩܰܪܒܰܬ ܗ̱ܘܳܬ܆ ܢܺܝܢܘܶܐ ܡܕܺܝܢܰܬ ܓܰܢ̱ܒܳܪ̈ܶܐ܆ ܕܨܳܡܘ ܒܳܗ̇ ܐ̱ܢܳܫ̈ܳܐ ܘܰܒܥܺܝܪܳܐ܆ ܘܚܰܝ̈ܘܳܬܳܐ ܕܠܳܐ ܒܰܥܝܳܕܳܐ܆ ܘܡܳܪܝܳܐ ܕܰܚܙܳܐ ܚܽܘܡܣܳܢܳܗ̇܆ ܘܗܰܝܡܳܢܽܘܬܳܗ̇ ܫܰܪܺܝܪܬܳܐ܆ ܐܰܥܒܰܪ ܡܶܢܳܗ̇ ܡܰܪܕܽܘܬܳܐ܆ ܘܝܰܗ̱ܒܠܳܗ̇ ܪ̈ܰܚܡܶܐ ܘܰܚܢܳܢܳܐ܀

ܦܶܬܓܳܡܳܐ: ܡܳܪܝܳܐ ܠܳܐ ܒܪܽܘܓܙܳܟ ܬܰܟܣܰܢܝ܆ ܐܳܦܠܳܐ ܒܚܶܡܬܳܟ ܬܶܪܕܶܝܢܝ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܺܝܢܬܳܐ ܕܺܝܠܳܢܳܝܬܳܐ ܕܨܰܘܡܳܐ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܪܓܺܝܓ ܗ̱ܘܳܐ ܟܢܽܘܫܝܳܐ ܕܥܶܒܕܰܬ ܢܺܝܢܘܶܐ ܠܰܬܝܳܒܽܘܬܳܐ܆ ܕܡܶܢ ܟܽܠ ܦܽܘ̈ܡܺܝܢ ܩܳܠܰܝ̈ ܚܰܫܳܐ ܡܶܫܬܰܡܥܺܝܢ ܗ̱ܘܰܘ܆ ܪܚܺܝܡ ܗ̱ܘܳܐ ܚܰܓܳܐ ܕܰܗܘܳܐ ܬܰܡܳܢ ܒܶܝܬ ܫܽܘ̈ܩܰܝܗܽܘܢ܆ ܕܝܳܗܒܺܝܢ ܕܶܡ̈ܥܶܐ ܘܫܳܩܠܺܝܢ ܪ̈ܰܚܡܶܐ ܡܶܢ ܚܰܢܳܢܳܐ܀

ܕܺܐܝܬ ܠܶܗ ܕܶܡ̈ܥܶܐ ܢܰܝܬܶܐ ܕܶܡ̈ܥܶܐ ܘܡܶܬܩܰܒܰܠܽ ܗ̱ܘ܆ ܘܕܺܐܝܬ ܠܶܗ ܚܰܫܳܐ ܒܚܰܫܳܐ ܢܶܦܪܽܘܥ ܡܳܐ ܕܡܳܛܶܐ ܠܶܗ܆ ܗܳܐ ܒܢܰܝ̈ܢܳܫܳܐ ܥܰܡ ܚܰܝ̈ܘܳܬܳܐ ܒܚܰܫܳܐ ܟܦܺܝܦܺܝܢ܆ ܘܫܳܐܠܺܝܢ ܡܶܢܳܟ ܕܬܰܥܒܰܪ ܪܽܘܓܙܳܐ ܕܰܠܚܺܝܡ ܠܗܽܘܢ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀