ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܐܰܘܕܳܝ ܠܶܗ ܥܺܕܬܳܐ

ܣܰܒܪܳܐ ܘܚܰܕܽܘܬܳܐ: ܘܰܫܠܳܡܳܐ ܒܥܽܘܡܩܳܐ: ܝܰܘܡܳܢ ܐܶܬܥܡܶܕ: ܡܳܪܰܢ ܒܓܰܘ ܝܽܘܪܕܢܳܢ: ܡܶܢ ܐܺܝ̈ܕܰܝ ܥܰܒܕܶܗ܀

ܝܰܘܡܳܢܳܐ ܢܶܚܕܶܐ: ܐܳܕܳܡ ܪܺܝܫ ܛܽܘ̈ܗܡܶܐ: ܕܰܢܚܶܬ ܡܳܪܶܐ ܟܽܠ: ܘܰܥܡܰܕ ܒܓܰܘ ܝܽܘܪܕܢܳܢ: ܘܰܠܚܰܘܒܬܶܗ ܦܰܪܥܳܗ̇܀

ܝܰܘܡܳܢ ܟܽܠ ܫܰܪ̈ܒܳܢ: ܬܶܫܒܽܘܚܬܳܐ ܢܰܣ̈ܩܳܢ: ܠܰܐܠܳܗܳܐ ܕܶܐܬܪܟܶܢ: ܘܰܥܡܰܕ ܡܶܢ ܐܺܝ̈ܕܰܝ: ܥܰܒܕܶܗ ܝܽܘܚܰܢܳܢ܀

ܝܰܥܩܽܘܒ ܒܚܶܠܡܶܗ ܚܙܳܐ: ܣܶܒܠܬܳܐ ܕܩܳܝܡܳܐ: ܘܰܠܓܶܢܣܰܢ ܡܰܣܩܳܐ: ܠܪܰܘܡܳܐ ܕܰܫܡܰܝܳܐ: ܕܬܶܦܪܩܰܢ ܡܶܢ ܛܽܘܥܝܰܝ܀

ܫܽܘܒܚܳܐ

ܬܰܘܕܺܝܬܳܐ ܠܳܟ ܡܳܪܝ: ܦܳܪܽܘܩܳܐ ܕܥܳܠ̈ܡܶܐ: ܕܰܐܦܨܰܚܬ ܠܰܢ ܒܪ̈ܰܚܡܰܝܟ: ܡܳܪܳܐ ܕܟܽܠ ܒܶܪ̈ܝܳܢ: ܠܳܟ ܡܳܪܝ ܬܶܫܒܽܘܚܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܟܰܕ ܡܶܢ ܫܶܢܬܳܐ ܡܶܬܛܰܝܰܒ ܐ̱ܢܳܐ

ܗܰܘ ܕܰܡܩܰܕܫܺܝܢ ܣܪ̈ܳܦܶܐ ܕܢܽܘܪܳܐ܆ ܠܥܰܙܺܝܙܽܘܬܶܗ ܒܪܰܘܡܳܐ ܕܰܠܥܶܠ܆ ܥܡܰܕ ܗ̱ܘܳܐ ܒܝܽܘܪܕܢܳܢ ܐܰܝܟ ܒܰܪܢܳܫܳܐ܆ ܘܩܰܕܶܫ ܠܡܰܝ̈ܳܐ ܐܰܠܳܗܳܐܺܝܬ܀

ܥܡܰܕ ܗ̱ܘܳܐ ܘܰܣܠܶܩ ܡܶܢ ܓܰܘ ܝܽܘܪܕܢܳܢ܆ ܝܺܚܺܝܕܳܝܳܐ ܡܶܠܬܶܗ ܕܰܐܒܳܐ܆ ܪܶܗܛܰܬ ܥܺܕܬܳܐ ܘܩܰܒܶܠܬܶܗ ܗ̱ܘܳܬ܆ ܠܚܰܬܢܳܐ ܡܟܺܝܪܳܗ̇ ܘܣܶܓܕܰܬ ܩܽܘܕܡܰܘܗ̱ܝ܀

ܫܽܘܒܚܳܐ

ܗܰܘ ܕܰܥܡܰܕ ܒܝܽܘܪܕܢܳܢ ܢܰܗܪܳܐ܆ ܨܶܡܚܰܐ ܗ̱ܘ ܕܰܐܒܳܐ ܘܒܰܪ ܐܺܝܬܽܘܬܶܗ܆ ܢܶܗܘܶܐ ܡܰܚܪܰܡ ܐܰܝܢܳܐ ܕܳܐܡܰܪ ܕܠܰܘ ܐܰܠܳܗܰܐ ܗ̱ܘ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܗܘܺܝ ܠܳܗ̇ ܠܢܰܦܫܝ
ܛܳܣ ܓܰܒܪܺܐܶܝܠ: ܒܶܐܒܪ̈ܶܐ ܕܪܽܘܚܳܐ (ܣܳܠܶܩ: ܒܣܳܗ̈ܕܰܘܗ̱ܝ ܐܰܢ̱ܬܽܘܢ)

ܟܡܳܐ ܟܰܝ ܢܰܘܕܶܐ܆ ܓܶܢܣܳܐ ܕܺܝܠܰܢ ܡܚܺܝܠܳܐ ܘܬܰܚܽܘܒܳܐ܆ ܕܡܶܛܽܠܳܬܰܢ ܗܰܘ ܥܰܙܺܝܙܳܐ ܐܶܬܳܐ ܠܰܥܡܳܕܳܐ܆ ܘܚܰܣܺܝ ܘܡܰܪܩܰܢ ܒܰܥܡܳܕܶܗ܆ ܘܝܰܗ̱ܒ ܠܰܢ ܪܽܘܚܳܐ ܩܰܕܺܝܫܳܐ܆ ܢܶܒܪܽܘܟ ܘܢܶܣܓܽܘܕ ܠܶܗ܀

ܫܽܘܒܚܳܐ

ܟܝܳܢܳܐ ܟܽܠܶܗ ܕܡܰܝ̈ܳܐ ܐܰܪܓܶܫ ܒܰܥܡܳܕܳܟ ܡܳܪܰܢ܆ ܘܳܐܦ ܡܰܒܽܘ̈ܥܶܐ ܘܢܰܗܪ̈ܰܘܳܬܳܐ ܣܘܰܚ ܠܳܟ ܕܢܶܬܒܰܪܟܽܘܢ܆ ܘܢܰܗܺܝܪ̈ܶܐ ܬܽܘܒ ܕܰܫܡܰܝܳܐ܆ ܚܕܺܝܘ ܗ̱ܘܰܘ ܘܰܪܘܰܙܘ ܟܰܕ ܚܙܰܐܽܘܟ ܕܰܥܡܰܕܬ ܒܓܰܘ ܒܝܽܘܪܕܢܳܢ܀

ܡܰܕܪܳܫܳܐ

ܩܳܠܳܐ ܒܩ̄: ܩܽܘܡ ܦܰܘܠܳܘܣ
ܠܳܐ ܪܓܺܝܫܺܝܢ ܟܪ̈ܽܘܒܶܐ ܠܡܽܘܢ ܕܳܡܶܐ

ܥܽܘܢܺܝܬܳܐ: ܒܪܺܝܟ ܕܰܥܡܰܕ ܒܡܰܝ̈ܳܐ ܘܩܰܕܶܫ ܠܰܢ܆ ܒܪܺܝܟ ܕܰܥܡܰܕ ܘܕܰܟܝܰܢ ܡܶܢ ܥܰܘܠܰܢ .

ܒܰܪ̱ܬ ܢܽܘܗܪܳܐ ܚܙܳܬܶܗ ܠܢܰܗܺܝܪܳܐ܆ ܘܰܠܒܰܟܬܶܗ ܕܚܰܬܢܳܐ ܢܚܰܘܶܐ ܠܳܗ̇܆ ܗܳܐ ܫܒܰܝܬܳܢܝ ܒܚܽܘܒܶܗ ܕܺܐܝܩܳܪܳܟ܆ ܐܶܢ ܐܰܢ̱ܬܽ ܗ̱ܘ ܚܰܬܢܳܐ ܐܶܡܰܪ ܠܺܝ܆ ܙܳܥ ܘܰܕܚܶܠ ܓܰܒܝܳܐ܆ ܘܰܐܘܕܺܝ ܕܠܰܘ ܚܰܬܢܰܐ ܗ̱ܘ܆ ܘܶܐܡܰܪ ܕܠܰܡܣܳܐܢܰܘ̈ܗ̱ܝ܆ ܕܶܐܫܪܶܐ ܠܳܐ ܡܨܶܐ ܐ̱ܢܳܐ܆ ܘܚܰܘܺܝ ܠܳܗ̇ ܕܶܐܢܳܐ ܥܰܒܕܶܗ ܐ̱ܢܳܐ܆ ܘܰܡܟܺܝܪܶܟܝ ܐܺܝܬܰܘܗ̱ܝ ܐܰܠܳܗܳܐ܀

ܗܳܐ ܥܰܡ̱̈ܡܶܐ ܛܝܳܪܳܐ ܘܰܡܨܺܝܕܬܳܐ: ܠܰܡܥܺܝܢܳܐ ܢܳܚܬܺܝܢ ܕܚܽܘܣܳܝܳܐ: ܒܓܰܘ ܡܰܝ̈ܳܐ ܫܳܠܚܺܝܢ ܢܰܚܬܰܝ̈ܗܽܘܢ: ܘܡܶܢ ܡܰܝ̈ܳܐ ܠܳܒܫܺܝܢ ܬܶܫܒܽܘܚܬܳܐ: ܢܽܘܗܪܳܐ ܠܒܽܘܫܰܝ̈ܗܽܘܢ: ܙܺܝܘܳܐ ܥܶܛܦܰܝ̈ܗܽܘܢ: ܬܰܟܣܺܝܬܗܽܘܢ ܗܶܕܪܳܐ: ܘܰܩܢܽܘܡܗܽܘܢ ܫܽܘܒܚܳܐ: ܓܰܘܢܰܝ̈ܗܽܘܢ ܢܽܘܗܪܳܐ ܥܰܙܺܝܙܳܐ: ܘܡܰܦܪܓܺܝܢ ܒܰܟܠܺܝ̈ܠܶܐ ܡܫܰܒ̈ܚܶܐ܀

ܩܥܳܐ ܩܳܠܳܐ ܪܳܡܳܐ ܘܶܐܬܟܰܢܰܫܘ܆ ܘܰܡܙܰܓ ܠܗܽܘܢ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܘܓܳܙܪ̈ܳܬܳܐ ܐܶܬܰܝ̈ ܘܦܶܢ̈ܝܳܬܳܐ܆ ܘܰܠܘܰܥܕܶܗ ܕܦܰܓܪܳܐ ܟܢܰܫܘ ܢܶܫܪ̈ܶܐ܆ ܘܰܐܚܶܬ ܡܪܰܩ ܐܶܢܽܘܢ܆ ܒܡܰܝ̈ܳܐ ܠܚܶܫܽܘ̈ܟܶܐ܆ ܠܒܽܘ̈ܫܰܝܗܽܘܢ ܚܰܘܰܪܘ܆ ܘܰܣܠܶܩ ܒܬܶܫܒܽܘܚܬܳܐ܆ ܘܰܒܚܽܘܒܶܗ ܗܘܳܐ ܠܗܽܘܢ ܕܶܝܢ ܐܽܘܟܠܳܐ܆ ܣܒܰܥܘ ܡܶܢܶܗ ܕܟܰܦ̈ܢܶܐ ܥܒܺܝܕܺܝܢ ܗ̱ܘܰܘ܀

ܗܳܐ ܪܳܥܶܡ ܬܪܰܥ ܡܰܥܡܽܘܕܺܝܬܳܐ܆ ܒܟܽܠ ܟܶܢܫܺܝ̈ܢ ܕܢܺܐܬܽܘܢ ܠܳܗ̇ ܘܚܳܒܨܺܝܢ܆ ܪܳܡ ܘܰܦܬܺܝܚ ܘܚܳܕܶܐ ܒܥܳܠܽܘ̈ܠܶܐ܆ ܘܰܡܩܰܒܶܠ ܒܚܰܘ̈ܒܶܐ ܠܣܰܓܺܝ̈ܶܐܐ܆ ܘܚܳܛܶܦ ܒܢܰܝ̈ܢܳܫܳܐ܆ ܡܶܢ ܬܰܪ̈ܥܰܝ ܡܰܘܬܳܐ܆ ܘܡܰܥܶܠ ܠܰܓܢܽܘܢܳܐ܆ ܕܢܺܐܬܽܘܢ ܠܘܳܬ ܚܰܝ̈ܶܐ܆ ܘܒܰܥܡܳܕܳܐ ܕܰܟܝܳܐ ܢܶܬܦܰܨܽܘܢ܆ ܡܶܢ ܢܽܘܪܳܐ ܕܰܛܢܳܢܶܗ ܕܡܳܪܝܳܐ܀

ܝܽܘܚܰܢܳܢ ܥܰܠ ܝܽܘܪܕܢܳܢ ܢܰܗܪܳܐ܆ ܗܘܳܐ ܩܳܠܳܐ ܕܩܳܪܶܐ ܒܓܰܘ ܚܽܘܪܒܳܐ܆ ܘܰܡܫܰܦܶܐ ܐܽܘܪܚܳܐ ܩܕܳܡ ܚܰܬܢܳܐ܆ ܕܶܐܬܳܐ ܢܩܰܕܶܫ ܡܰܥܡܽܘܕܺܝܬܳܐ܆ ܘܰܢܣܺܝܡ ܒܓܰܘ ܡܰܝ̈ܳܐ܆ ܓܰܙ̈ܶܐ ܕܡܰܠܟܽܘܬܳܐ܆ ܕܢܰܥܬܰܪ ܒܡܰܘܗܰܒܬܶܗ܆ ܠܗܳܝ ܦܺܐܝܬܳܐ ܕܰܡܟܰܪ܆ ܕܡܶܢ ܫܶܦܠܳܐ ܕܩܺܝܩܰܠܬܳܐ ܢܩܺܝܡܺܝܗ̇܆ ܠܒܰܪ̱ܬ ܥܰܡ̱̈ܡܶܐ ܕܡܳܛܰܬ ܘܶܐܬܗܰܓܡܰܬ܀

ܟܣܶܐ ܚܰܬܢܳܐ ܒܟܶܢ̈ܫܶܐ ܘܠܳܐ ܝܺܕܺܝܥ܆ ܘܰܚܠܽܘܠܳܐ ܪܳܥܶܡ ܒܬܶܫܒܽܘܚܬܳܐ܆ ܝܽܘܚܰܢܳܢ ܡܰܟܪܶܙ ܘܠܳܐ ܫܳܠܶܐ܆ ܘܡܰܦܨܰܚ ܠܳܗ̇ ܠܟܰܠܬܳܐ ܒܰܣܒܰܪܬܳܐ܆ ܒܫܽܘܦܪ̈ܰܘܗ̱ܝ ܕܥܰܙܺܝܙܺܝܢ܆ ܒܥܽܘܬܪ̈ܰܘܗ̱ܝ ܕܣܰܓܺܝܐܺܝܢ܆ ܒܓܶܢܣܶܗ ܕܒܰܪ ܡܰܢܽܘ܆ ܒܰܐܬܪܶܗ ܥܶܠܳܝܰܐ ܗ̱ܘ܆ ܫܡܰܝܳܢܰܐ ܗ̱ܘ ܚܰܬܢܳܐ ܕܰܡܟܰܪ ܠܶܟܝ܆ ܐܶܬܛܰܝܰܒܝ ܘܬܳܝ ܠܶܟܝ ܠܰܚܠܽܘܠܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܳܐ ܩܛܺܝܠ ܗ̱ܽܘ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܰܐܘܠܶܕ ܠܰܢ܆ ܪܽܘܚܳܢܳܐܺܝܬ܆ ܡܶܢ ܥܽܘܒܳܐ ܕܰܟܝܳܐ ܕܡܰܥܡܽܘܕܺܝܬܳܐ.

ܒܟܶܢܳܪܳܐ ܪܰܒܳܐ܆ ܕܗܰܝܡܳܢܽܘܬܳܐ܆ ܬܶܙܡܰܪ ܒܰܪ̱ܬ ܡܰܠܟܳܐ ܠܺܝܚܺܝܕܳܝܳܐ܆ ܕܰܒܢܽܘܪܳܐ ܘܪܽܘܚܳܐ܆ ܚܰܠܶܠ ܡܰܪܩܳܗ̇܆ ܡܶܢ ܕܶܒ̈ܚܶܐ ܛܰܡ̈ܐܶܐ ܕܰܥܠܰܘ̈ܳܬܳܐ܀

ܕܳܠ ܝܺܚܺܝܕܳܝܳܐ܆ ܡܶܢ ܒܶܝܬ ܐܰܒܽܘܗ̱ܝ܆ ܘܰܢܚܶܬ ܘܰܡܙܰܓ ܠܳܗ̇ ܡܰܥܡܽܘܕܺܝܬܳܐ܆ ܘܣܳܡ ܢܰܚ̈ܬܶܐ ܕܫܽܘܒܚܳܐ܆ ܒܓܰܘ ܪ̈ܳܕܰܝܳܐ܆ ܕܟܰܕ ܣܳܚܝܳܐ ܬܶܠܒܰܫ ܪܽܘܚܳܢܳܐܺܝܬ܀

ܘܰܥܕܳܐ ܠܒܶܝܬ ܐܰܒܳܐ܆ ܝܰܗ̱ܒܠܳܗ̇ ܚܰܬܢܳܐ܆ ܕܬܰܡܳܢ ܬܶܬܒܰܣܰܡ ܥܰܡ ܩܰܕܺܝܫܰܘ̈ܗ̱ܝ܆ ܕܡܳܐ ܕܰܣܚܳܬ ܣܶܠܩܰܬ܆ ܬܶܥܽܘܠ ܬܺܐܪܰܬ܆ ܓܰܙ̈ܶܐ ܘܣܺܝ̈ܡܳܬܳܐ ܕܠܳܐ ܡܶܬܕܰܪܟܺܝܢ܀

ܚܰܬܢܳܐ ܝܰܗ̱ܒ ܢܰܦܫܶܗ܆ ܠܡܶܬܢܰܩܳܦܽܘ܆ ܠܓܶܢܣܳܐ ܚܰܣܺܝܪܳܐ ܕܒܶܝܬ ܡܶܣ̈ܟܺܢܶܐ܆ ܘܠܰܒܫܳܗ̇ ܡܶܢ ܟܰܪܣܳܐ܆ ܐܳܦ ܗܺܝ ܠܒܶܫܬܶܗ܆ ܡܶܢ ܥܽܘܒܳܐ ܕܰܟܝܳܐ ܕܡܰܥܡܽܘܕܺܝܬܳܐ܀

ܝܰܗ̱ܒ ܠܰܢ ܡܶܢ ܡܰܝ̈ܳܐ܆ ܣܺܝܡܰܬ ܓܰܙ̈ܶܐ܆ ܘܟܰܬܒܰܢ ܒܰܢ̈ܒܺܝܶܐ ܕܢܶܩܪܶܝܘܗ̱ܝ ܐܰܒܽܘܢ܆ ܠܰܐܒܳܐ ܕܫܰܕܰܪ ܠܰܢ܆ ܠܺܝܚܺܝܕܳܝܶܗ܆ ܐܳܦ ܥܰܒܕܰܢ ܐܰܚ̈ܶܐ ܒܡܰܥܡܽܘܕܺܝܬܳܐ܀

ܠܒܽܘ̈ܫܰܝ ܬܶܫܒܽܘܚܬܳܐ. ܝܰܗ̱ܒ ܠܰܢ ܚܰܬܢܳܐ܆ ܕܰܒ̈ܡܰܝܳܐ ܙܩܺܝܪܺܝܢ ܐܰܠܳܗܳܐܺܝܬ܆ ܡܶܢ ܢܽܘܪܳܐ ܘܪܽܘܚܳܐ. ܕܠܳܐ ܡܶܬܓܰܫܫܳܐ܆ ܨܶܒܬܳܐ ܕܠܳܐ ܒܳܠܶܐ ܠܟܰܠܰܬ ܡܰܠܟܳܐ܀

ܢܶܚܬܰܬ ܠܰܥܡܳܕܳܐ. ܘܡܶܢ ܓܰܘ ܡܰܝ̈ܳܐ܆ ܠܒܶܫܬܶܗ ܠܰܡܟܺܝܪܶܗ ܩܰܕܺܝܫܳܐܺܝܬ܆ ܘܰܗܘܳܬ ܥܰܡܶܗ ܚܰܕ܆ ܒܰܚܕܳܐ ܪܽܘܚܳܐ܆ ܟܰܠܬܳܐ ܡܫܰܒܰܚܬܳܐ ܕܚܰܬܢܳܐ ܪܰܒܳܐ܀

ܥܶܡܕܰܬ ܘܶܐܫܟܰܚܬܶܗ. ܒܡܰܝ̈ܳܐ ܚܰܝ̈ܶܐ܆ ܕܰܡܚܰܕܶܬ ܐ̱ܢܳܫ̈ܳܐ ܒܝܰܠܕܳܐ ܕܰܬܪܶܝܢ܆ ܘܟܰܕ ܥܳܒܶܕ ܚܰܕ̱̈ܬܶܐ܆ ܡܶܢ ܥܰܬܺܝ̈ܩܶܐ܆ ܘܡܶܢ ܡܺܝ̈ܬܶܐ ܚܰܝ̈ܶܐ ܒܡܰܥܡܽܘܕܺܝܬܳܐ܀

ܨܳܡܰܬ ܥܰܡ ܚܰܬܢܳܐ. ܟܰܕ ܡܶܬܟܰܬܰܫ܆ ܘܰܒܕܰܪܳܐ ܩܳܡܰܬ ܥܰܠ ܙܳܟܽܘܬܳܐ܆ ܥܶܡܕܰܬ ܘܰܠܒܶܫܬܶܗ܆ ܕܳܐܦ ܗܺܝ ܬܶܙܟܶܐ܆ ܠܕܰܐܚܺܝܕ ܫܽܘܠܛܳܢܳܐ ܕܡܰܩܪܶܒ ܥܰܡܳܗ̇܀

ܪܰܗܒܽܘܢܳܐ ܕܡܰܘܬܶܗ. ܥܰܡ ܢܽܘܚܳܡܶܗ܆ ܝܳܗܶܒ ܠܰܥܡܺܝ̈ܕܶܐ ܒܰܪ ܐܰܠܳܗܳܐ܆ ܕܡܶܬܩܰܪܒܺܝܢ ܥܰܡܶܗ. ܒܡܰܥܡܽܘܕܺܝܬܳܐ܆ ܕܢܶܡܛܽܘܢ ܠܰܩܝܳܡܬܶܗ ܘܰܠܢܽܘܚܳܡܶܗ܀

ܬܶܫܒܽܘܚܬܳܐ ܚܕܰܬܳܐ. ܡܶܢ ܓܰܘ ܡܰܝ̈ܳܐ܆ ܬܶܙܡܰܪ ܒܰܪ̱ܬ ܥܰܡ̱̈ܡܶܐ ܒܩܳܠܳܐ ܪܳܡܳܐ܆ ܠܒܰܪ ܡܰܠܟܳܐ ܕܝܰܗ̱ܒ ܠܰܢ܆ ܡܰܥܡܽܘܕܺܝܬܳܐ܆ ܒܪܺܝܟܽ ܗ̱ܘ ܕܰܐܘܠܶܕ ܠܰܢ ܪܽܘܚܳܢܳܐܺܝܬ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܰܘ̈ܕܝܳܢܶܐ
ܕܽܘܨ ܟܶܢܫܳܐ ܕܰܥܠܰܝ̈ܡܳܬܳܐ

ܥܽܘܢܺܝܬܳܐ: ܫܽܘܒܚܳܐ ܠܳܟ ܥܰܠ ܡܰܘܗܰܒܬܳܟ ܡܫܺܝܚܳܐ ܕܒܰܥܡܳܕܶܗ ܐܰܣܝܰܢ.

ܡܶܢ ܟܰܪܣܳܐ ܕܡܰܥܡܽܘܕܺܝܬܳܐ. ܒܢܰܝ̈ܳܐ ܗܘܰܝܬܽܘܢ ܠܰܐܠܳܗܳܐ܆ ܦܳܬܽܘܪ ܛܽܘ̈ܒܶܐ ܗܳܐ ܡܰܬܩܰܢ. ܘܚܰܝ̈ܶܐ ܝܳܗܶܒ ܠܳܐܟܽܘܠܰܘ̈ܗ̱ܝ܆ ܝܳܪ̈ܬܶܐ ܩܪܽܘܒܘ ܐܰܟܽܘܠܘ ܘܰܣܒܰܥܘ܀

ܟܡܶܢ ܕܺܐܒܳܐ ܒܶܝܬ ܐܺܝ̈ܠܳܢܶܐ. ܘܠܶܐܡܪ̈ܶܐ ܫܰܦܺܝܪ̈ܶܐ ܒܰܣܒܶܣ܆ ܘܰܒܡܰܝ̈ܳܐ ܚܰܝ̈ܶܐ ܥܰܨܒܶܗ܆ ܪܳܥܝܳܐ ܡܶܫܟܰܚ ܠܰܐܒܺܝ̈ܕܶܐ܆ ܒܪܺܝܟ ܕܰܥܨܰܒ ܫܽܘܚܢܰܘ̈ܗ̱ܝ ܕܳܐܕܳܡ܀

ܚܕܳܐ ܥܓܶܠܬܳܐ ܥܛܺܝܦܰܬ ܓܰܘܢܳܐ. ܕܰܙܩܺܝܦܽܘܬܳܐ ܕܳܒܰܚ ܗ̱ܘܳܐ܆ ܘܡܰܘܩܶܕ ܠܳܗ̇ ܘܪܳܡܶܐ ܩܶܛܡܳܗ̇܆ ܒܡܰܝ̈ܳܐ ܕܢܶܗܘܽܘܢ ܠܰܪܣܳܣܳܐ܆ ܘܰܪܫܰܡ ܒܳܗ̇ ܡܰܥܡܽܘܕܺܝܬܳܐ܀

ܡܶܢ ܡܰܝ̈ܳܐ ܓܰܒܠܶܗ ܠܳܐܕܳܡ. ܘܰܒܗܽܘܢ ܫܽܘܚܬܶܗ ܐܶܬܡܰܪܩܰܬ܆ ܒܗܽܘܢ ܚܰܕܶܬ ܠܶܗ ܡܰܘܠܳܕܳܐ܆ ܘܶܐܫܬܰܡܠܺܝ ܗ̱ܘܳܐ ܪܽܘܚܳܢܳܐ܆ ܡܶܢ ܟܰܪܣܳܐ ܕܶܐܡܳܐ ܕܚܰܝ̈ܶܐ܀

ܡܰܥܡܽܘܕܺܝܬܳܐ ܐܰܝܟ ܣܰܪܳܐ. ܝܳܠܕܳܐ ܝܳܪ̈ܬܶܐ ܕܡܽܘܠܟܳܢܳܐ܆ ܘܡܶܢ ܡܰܘܠܳܕܳܗ̇ ܡܛܳܐ ܐ̱ܢܳܫܳܐ܆ ܕܠܰܐܠܳܗܳܐ ܢܶܩܪܶܐ ܐܰܒܽܘܢ܆ ܒܪܺܝܟܽ ܗ̱ܘ ܕܟܰܬܒܰܢ ܒܰܢ̈ܒܺܝܶܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܩܽܘܕܫܳܐ ܫܦܰܥ ܗ̱ܘܳܐ ܥܰܠ ܛܽܘܪ ܣܺܝܢܰܝ ܡܶܢ ܥܶܠܳܝܳܐ܆ ܘܥܰܠ ܝܽܘܚܰܢܳܢ ܡܶܢ ܦܳܪܽܘܩܰܢ ܐܶܫܬܰܦܰܥ ܗ̱ܘܳܐ܆ ܗܳܝ ܟܽܘܡܪܽܘܬܳܐ ܐܶܬܝܰܒܠܰܬ ܗ̱ܘܳܬ ܡܶܢ ܒܶܝܬ ܐܰܗܪܽܘܢ܆ ܘܗܺܝ ܒܰܫܠܺܝ̈ܚܶܐ ܠܥܳܠܡܳܐ ܢܶܦܩܰܬ ܡܶܢ ܦܳܪܽܘܩܰܢ܀

ܠܳܟ ܬܶܫܒܽܘܚܬܳܐ ܡܰܠܟܳܐ ܕܡܰܠ̈ܟܶܐ ܘܰܡܩܺܝܡ ܡܰܠ̈ܟܶܐ܆ ܘܠܳܟ ܬܰܘܕܺܝܬܳܐ ܪܺܝܫܳܐ ܘܪܰܒܳܐ ܕܡܳܪ̈ܰܘܳܬܳܐ܆ ܣܓܺܝܕ ܐܰܢ̱ܬ ܒܰܐܒܽܘܟ ܥܰܡ ܪܽܘܚ ܩܽܘܕܫܳܐ ܟܝܳܢܳܐ ܡܓܰܫܡܳܐ܆ ܕܰܢܚܶܬܬ ܘܰܥܡܰܕܬ ܘܰܗܘܰܝܬ ܪܺܝܫܳܐ ܠܳܟ ܬܶܫܒܽܘܚܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀