ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܒܚܰܕ ܒܫܰܒܳܐ ܚܙܳܬܳܟ ܥܺܕܬܳܐ
(ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ)

ܒܰܥܡܳܕܳܟ ܡܳܪܝ ܐܶܬܩܰܕܫܰܬ܆ ܡܰܥܡܽܘܕܺܝܬܳܐ ܠܚܽܘܣܳܝܳܐ܆ ܘܥܳܡܕܺܝܢ ܒܓܰܘܳܗ̇ ܚܰܛܳܝ̈ܶܐ܆ ܘܣܳܠܩܺܝܢ ܗܳܘܶܝܢ ܙܰܟܳܝ̈ܶܐ܆ ܒܪܺܝܟ ܕܶܢܚܳܟ ܕܒܶܗ ܗ̱ܘ ܦܪܰܩܬܳܢ܆ ܡܶܢ ܫܽܘܥܒܳܕܳܐ ܕܰܚܛܺܝܬܳܐ܀

ܫܽܘܒܚܳܐ

ܐܶܡܪ̈ܶܐ ܚܰܕ̱̈ܬܶܐ ܘܪ̈ܽܘܚܳܢܶܐ܆ ܩܰܒܠܰܬ ܥܺܕܬܳܐ ܡܶܢ ܡܰܝ̈ܳܐ܆ ܘܒܰܛܝܳܪܳܐ ܕܚܰܝ̈ܶܐ ܐܶܬܡܢܺܝܘ܆ ܒܰܓܙܳܪܳܐ ܕܪܳܥܝܰܢ ܛܳܒܳܐ܆ ܕܶܐܫܟܰܚ ܥܶܪ̈ܒܶܐ ܐܰܒܺܝ̈ܕܶܐ܆ ܘܰܐܦܢܺܝ ܐܶܢܽܘܢ ܠܰܛܝܳܪܶܗ܀

ܡܰܕܪܳܫܳܐ

ܩܳܠܳܐ ܒܩ̄: ܐܰܒܳܐ ܟܬܰܒ ܗ̱ܘܳܐ
ܢܶܩܥܽܘܢ ܓܰܪ̈ܡܰܝ ܡܶܢ ܩܰܒܪܳܐ ܕܰܐܠܳܗܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ ܕܶܐܬܬܰܚܬܺܝ܆ ܘܡܶܢ ܐܺܝ̈ܕܰܝ ܥܰܒܕܶܗ ܥܡܰܕ ܗ̱ܘܳܐ .

ܐܶܡܪܶܗ ܚܰܝܳܐ ܕܰܐܠܳܗܳܐ܆ ܢܚܶܬ ܘܰܗܘܳܐ ܐ̱ܢܳܫܳܐ ܡܶܢ ܓܶܢܣܰܢ܆ ܘܰܚܠܰܛ ܪܰܒܽܘܬܶܗ܆ ܒܛܽܘܗܡܳܐ ܕܥܰܦܪ̈ܳܢܶܐ܆ ܕܢܰܣܶܩ ܐܶܢܽܘܢ ܠܰܫܡܰܝܳܐ܆ ܘܳܐܦ ܢܶܬܚܙܽܘܢ ܩܕܳܡ ܐܰܒܳܐ ܡܫܰܒܚܳܐ܀

ܐܰܪܺܝܡ ܩܳܠܶܗ ܒܶܝܬ ܟܶܢ̈ܫܶܐ܆ ܟܰܕ ܩܳܥܶܐ ܘܗܳܟܰܢ ܐܳܡܰܪ܆ ܕܗܳܢܰܘ ܠܰܡ ܐܶܡܪܶܗ܆ ܚܰܝܳܐ ܕܰܐܠܳܗܳܐ܆ ܗܳܢܳܐ ܫܳܩܶܠ ܒܰܩܢܽܘܡܶܗ܆ ܠܰܚܛܺܝܬܶܗ ܕܥܳܠܡܳܐ ܘܦܳܪܶܩ ܠܶܗ܀

ܒܰܝܢܳܬ ܟܶܢ̈ܫܶܐ ܩܳܐܶܡ ܗ̱ܘܳܐ܆ ܡܳܪܶܐ ܟܽܠ ܥܰܠ ܝܽܘܪܕܢܳܢ ܢܰܗܪܳܐ܆ ܘܰܚܠܺܝܛ ܗ̱ܘܳܐ ܥܰܡܗܽܘܢ܆ ܟܰܕ ܗܽܘ ܥܰܡ ܐܰܒܽܘܗ̱ܝ܆ ܘܳܐܦ ܠܰܥܡܳܕܳܐ ܐܶܬܪܟܶܢ܆ ܟܰܕ ܝܳܗܶܒ ܩܽܘܕܫܳܐ ܠܩܰܕܺܝ̈ܫܶܐ܀

ܐܰܪܟܶܢ ܪܺܝܫܶܗ ܩܕܳܡ ܥܰܒܕܶܗ܆ ܗܰܘ ܪܺܝܫܳܐ ܘܡܳܪܳܐ ܕܒܶܪ̈ܝܳܬܳܐ܆ ܟܰܕ ܫܳܐܶܠ ܡܶܢܶܗ܆ ܥܡܳܕܳܐ ܐܰܝܟ ܟܽܠܢܳܫ܆ ܘܰܩܦܰܣ ܐܺܝܕܶܗ ܟܳܪܽܘܙܳܐ܆ ܟܰܕ ܚܙܳܝܗ̱ܝ ܗ̱ܘܳܐ ܠܡܳܪܶܗ ܕܶܐܬܪܟܶܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܣܠܶܩ ܠܰܨܠܺܝܒܳܐ

ܥܽܘܢܺܝܬܳܐ: ܠܳܟ ܬܶܫܒܽܘܚܬܳܐ ܐܰܠܳܗܳܐ ܕܶܐܬܪܟܶܢܬ܆ ܥܕܰܡܳܐ ܕܬܶܥܡܰܕ ܡܶܢ ܐܺܝ̈ܕܰܝ ܟܳܪܽܘܙܳܟ.

ܐܰܝܟܰܢ ܐܰܡܪܰܚ܆ ܘܶܐܬܩܰܪܰܒ ܨܶܝܕ ܘܰܥܕܳܟ܆ ܕܙܳܝܥܺܝܢ ܡܶܢܳܟ ܐܳܦ ܬܶܓ̈ܡܶܐ ܕܓܰܘܙܰܠܬܳܐ܆ ܛܽܘܪ ܣܺܝܢܰܝ ܢܣܰܝܒܪܳܟ ܠܳܐ ܐܶܫܟܰܚ܆ ܘܡܶܢ ܢܽܘܪܳܟ ܝܺܩܶܕ ܘܶܐܬܬܰܢܰܢ܆ ܘܶܐܢܳܐ ܡܳܪܝ ܐܰܡܪܰܚ܆ ܕܰܠܪܺܝܫܳܟ ܐܶܬܩܰܪܰܒ܀

ܠܳܐ ܬܶܬܩܰܢܰܛ܆ ܟܳܪܽܘܙܳܐ ܘܠܳܐ ܬܶܕܚܰܠ܆ ܫܰܡܠܳܐ ܨܶܒܝܳܢܝ ܘܠܳܐ ܬܶܬܚܪܶܐ ܒܰܪ ܥܰܩܪ̈ܶܐ܆ ܕܰܐܝܟ ܕܰܨܒܺܝܬ ܘܰܫܪܺܝܬ ܒܓܰܘ ܟܰܪܣܳܐ܆ ܘܰܬܕܰܝ̈ܳܐ ܐܳܦ ܒܽܘܪ̈ܟܶܐ ܪܰܒܝܽܘܢܝ܆ ܨܒܺܝܬ ܘܶܐܬܺܝܬ ܠܰܥܡܳܕܳܐ܆ ܘܶܐܚܰܬܶܡ ܟܽܠ ܕܰܟܬܺܝܒ܀

ܗܳܐ ܥܳܡܶܕ ܐ̱ܢܳܐ܆ ܟܰܕ ܟܶܢ̈ܫܶܐ ܚܳܝܪܺܝܢ ܒܺܝ܆ ܘܰܐܒܳܐ ܕܫܰܠܚܰܢܝ ܗܽܘ ܡܰܘܕܰܥ ܥܰܠ ܪܰܒܽܘܬܝ܆ ܐܰܢ̱ܬ ܐܺܝܕܳܟ ܒܰܠܚܽܘܕ ܣܺܝܡ ܥܰܠ ܪܺܝܫܝ܆ ܘܡܶܢ ܪܰܘܡܳܐ ܗܽܘ ܐܰܒܳܐ ܡܰܙܥܶܩ܆ ܕܗܳܢܰܘ ܒܶܪܝ ܚܰܒܺܝܒܳܐ܆ ܕܶܐܨܛܒܺܝܬ ܒܶܗ ܕܢܶܦܪܽܘܩ ܟܽܠ܀

ܥܰܠ ܕܶܐܬܡܰܟܰܟ. ܝܽܘܚܰܢܳܢ ܘܶܐܬܢܰܚܰܬ܆ ܕܰܐܝܟ ܕܠܰܡ̈ܣܳܐܢܶܐ ܠܳܐ ܫܳܘܶܐ ܗ̱ܘܳܐ ܕܢܶܛܥܰܢ܆ ܐܶܬܥܰܠܺܝ ܠܪܰܘܡܳܐ ܥܶܠܳܝܳܐ܆ ܘܣܳܡ ܐܺܝܕܶܗ ܥܰܠ ܪܺܝܫ ܒܳܪܽܘܝܶܗ܆ ܘܠܳܐ ܐܺܝܬ ܪܰܘܡܳܐ ܐ̱ܚܪܺܢܳܐ܆ ܠܥܶܠ ܡܶܢ ܪܺܝܫ ܒܳܪܽܘܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܘܳܐ ܢܽܘܗܪܳܐ ܐܰܝܟ

ܥܽܘܢܺܝܬܳܐ: ܒܪܺܝܟ ܕܰܢܚܶܬ ܠܰܒܫܶܗ ܠܳܐܕܳܡ܆ ܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ.

ܒܡܰܥܡܽܘܕܺܝܬܳܐ ܐܶܫܟܰܚ ܐܳܕܳܡ܆ ܗܳܝ ܬܶܫܒܽܘܚܬܳܐ ܕܒܶܝܬ ܐܺܝ̈ܠܳܢܶܐ܆ ܢܚܶܬ ܗ̱ܘܳܐ ܘܠܰܒܫܳܗ̇ ܡܶܢ ܓܰܘ ܡܰܝ̈ܳܐ܆ ܘܠܰܒܫܳܗ̇ ܘܰܣܠܶܩ ܘܶܐܬܝܰܩܰܪ ܒܳܗ̇܆ ܒܪܺܝܟ ܚܳܐܶܢ ܟܽܠ܀

ܫܪܰܥ ܓܰܢ̱ܒܳܪܳܐ ܒܓܰܘ ܦܰܪܕܰܝܣܳܐ܆ ܒܡܰܥܡܽܘܕܺܝܬܳܐ ܣܰܡܟܶܗ ܚܢܳܢܳܐ܆ ܐܰܘܒܶܕ ܫܽܘܦܪ̈ܰܘܗ̱ܝ ܡܶܢ ܝܰܕ ܚܣܳܡܳܐ܆ ܐܶܫܟܰܚ ܐܶܢܽܘܢ ܡܶܢ ܛܰܝܒܽܘܬܳܐ܆ ܒܪܺܝܟ ܚܳܐܶܢ ܟܽܠ܀

ܚܰܬܢ̈ܶܐ ܒܰܥܕܶܢ ܐܶܨܛܰܒܰܬܘ ܗ̱ܘܰܘ܆ ܘܰܓܢܰܒ ܚܶܘܝܳܐ ܠܰܟܠܺܝ̈ܠܰܝܗܽܘܢ܆ ܪܳܨܽܘܗ̱ܝ ܪ̈ܰܚܡܶܐ ܠܗܰܘ ܚܰܪܡܳܢܳܐ܆ ܘܰܐܦܪܶܓܘ ܚܰܬܢ̈ܶܐ ܒܰܠܒܽܘ̈ܫܰܝܗܽܘܢ܆ ܒܪܺܝܟ ܚܳܐܶܢ ܟܽܠ܀

ܠܒܽܘ̈ܫܶܐ ܕܰܦܐܶܝܢ ܕܢܽܘܪܳܐ ܘܪܽܘܚܳܐ܆ ܝܳܗܒܳܐ ܠܰܒ̈ܢܶܝܗ̇ ܡܰܥܡܽܘܕܺܝܬܳܐ܆ ܕܪܽܘܚܳܐ ܕܩܽܘܕܫܳܐ ܗܰܘ ܓܳܡܰܪ ܟܽܠ܆ ܒܡܰܝ̈ܳܐ ܐܰܥܬܰܪ ܠܰܒ̈ܢܰܝ ܐ̱ܪܳܙܶܗ܆ ܒܪܺܝܟ ܚܳܐܶܢ ܟܽܠ܀

ܐܰܪܕܳܐ ܡܳܪܰܢ ܒܥܰܝ̈ܢܰܝܢ ܕܶܡ̈ܥܶܐ܆ ܕܣܳܦ̈ܩܳܢ ܢܫܺܝ̈ܓܳܢ ܨܳܐܬܳܐ ܕܚܰܘ̈ܒܰܝܢ܆ ܗܰܒ ܠܰܢ ܡܳܪܰܢ ܡܰܝ̈ܳܐ ܠܪ̈ܺܝܫܰܝܢ܆ ܕܡܶܫ̈ܟܚܳܢ ܡܳܪ̈ܩܳܢ ܟܽܠ ܟܽܘ̈ܬܡܳܬܰܢ܆ ܒܪܺܝܟ ܚܳܐܶܢ ܟܽܠ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܟܺܐܦܳܐ ܕܰܚܙܳܐ ܕܳܢܺܝܐܶܝܠ ܕܶܐܬܓܰܙܪܰܬ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܡܫܺܝܚܳܐ ܐܶܬܳܐ ܠܰܥܡܳܕܳܐ܆ ܘܩܰܕܶܫ ܠܰܢ ܡܰܥܡܽܘܕܺܝܬܳܐ܆ ܠܰܘ ܕܰܣܢܺܝܩ ܗ̱ܘܳܐ ܠܕܽܘܟܳܝܳܐ܆ ܐܶܠܳܐ ܕܰܚܢܰܢ ܢܶܬܕܰܟܶܐ܆ ܥܡܰܕ ܗ̱ܘܳܐ ܘܰܣܠܶܩ ܡܶܢ ܡܰܝ̈ܳܐ܆ ܘܚܰܣܺܝ ܠܥܳܠܡܳܐ ܚܰܘ̈ܒܳܬܶܗ܆ ܘܚܰܘܺܝ ܠܰܢ ܕܰܒܝܰܕ ܡܰܝ̈ܳܐ܆ ܕܰܥܡܳܕܳܐ ܡܶܬܚܰܣܶܝܢܰܢ܀

ܫܡܰܥ ܝܽܘܚܰܢܳܢ ܠܦܳܪܽܘܩܰܢ܆ ܕܳܐܡܰܪ ܠܶܗ ܩܪܽܘܒ ܐܰܥܡܶܕܰܝܢܝ܆ ܘܰܒܕܶܚܠܳܐ ܘܣܽܘܪܳܕܳܐ ܗ̱ܘܳܐ܆ ܘܙܰܘܥܳܐ ܪܰܒܳܐ ܘܰܪܬܺܝܬܳܐ܆ ܘܶܐܡܰܪ ܠܶܗ ܕܶܐܢܳܐ ܣܢܺܝܩ ܐ̱ܢܳܐ܆ ܕܡܶܢܳܟ ܐܶܥܡܰܕ ܡܩܰܕܶܫ ܟܽܠ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀