ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܢ̱ܬܽܘܢ ܐܶܢܽܘܢ ܓܰܢ̱ܒܳܪ̈ܶܐ. ܕܰܠܡܰܠ̈ܟܶܐ ܕܰܐܪܥܳܐ ܙܟܰܝܬܽܘܢ. ܠܳܐ ܒܓܶܐܪ̈ܶܐ ܫܢܺܝ̈ܢܶܐ: ܘܠܳܐ ܒܤܰܝ̈ܦܶܐ ܠܛܺܝ̈ܫܶܐ. ܐܶܠܳܐ ܒܚܰܝܠܶܗ ܕܰܨܠܺܝܒܳܐ. ܠܛܳܥܝܽܘܬܳܐ ܕܫܺܐܕ̈ܶܐ ܤܚܰܦܬܽܘܢ܀

ܩܳܠܳܐ ܒܩ̄: ܒܰܥܪܽܘܒܬܳܐ ܒܪܺܝܫܺܝܬ
ܠܺܝ ܢܶܬܠܳــ̈ܢ ܛܽܘܒܳܐ܆ ܟܽܠܗܶܝܢ ܫܰܪ̈ܒܳܬܳܐ (ܣܳܠܶܩ: ܕܰܚܛܳܐ ܠܳܐ ܢܶܚܛܶܐ)

ܡܶܢ ܪܰܘܡܳܐ ܠܥܽܘܡܩܳܐ: ܩܳܠܳܐ ܐܶܫܬܡܰܥ ܗ̱ܘܳܐ ܒܰܥܡܳܕܶܗ ܕܰܒܪܳܐ: ܕܗܳܢܰܘ ܒܶܪܝ ܚܰܒܺܝܒܝ: ܕܠܶܗ ܣܰܟܺܝܘ ܥܰܡ̱̈ܡܶܐ ܘܰܒܚܰܪܬܳܐ ܐܶܬܓܠܺܝ: ܗ̄ܘܗ̄ ܠܦܽܘܪܩܳܢ ܒܶܪ̈ܝܳܬܳܐ܀

ܫܽܘܒܚܳܐ

ܡܰܢܽܘ ܕܠܳܐ ܢܶܬܗܰܪ: ܒܓܰܒܝܳܐ ܝܽܘܚܰܢܳܢ ܕܩܳܐܶܡ ܥܰܠ ܢܰܗܪܳܐ: ܘܰܒܪܳܐ ܕܰܐܠܳܗܳܐ ܟܰܕ ܐܶܬܳܐ ܠܘܳܬܶܗ ܕܡܶܢܶܗ ܢܶܥܡܰܕ ܗ̱ܘܳܐ: ܗ̄ܘܗ̄ ܘܰܢܚܰܣܶܐ ܠܥܳܠܡܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ
ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ ܡܳܪܝܳܐ (ܣܳܠܶܩ܆ ܒܡܰܪܝܰܡ ܝܳܠܕܰܬ ܐܰܠܳܗܳܐ)

ܒܰܥܡܳܕܶܗ ܕܒܰܪ ܐܰܠܳܗܳܐ ܐܶܬܩܰܕܫܰܬ܆ ܡܰܥܡܽܘܕܺܝܬܳܐ ܠܚܽܘܣܳܝܳܐ ܕܝܰܠ̈ܕܰܘܗ̱ܝ ܕܳܐܕܳܡ܆ ܘܗܳܐ ܥܳܡܕܺܝܢ ܒܳܗ̇ ܚܰܛܳܝ̈ܶܐ ܘܙܰܕܺܝ̈ܩܶܐ܆ ܕܡܶܢ ܓܰܘ ܡܰܝ̈ܳܐ ܢܶܬܝܰܠܕܽܘܢ ܪܽܘܚܳܢܳܐܺܝܬ܀

ܫܽܘܒܚܳܐ

ܟܰܕ ܚܙܳܝܗ̱ܝ ܝܽܘܚܰܢܳܢ ܠܰܡܫܺܝܚܳܐ ܕܶܐܬܳܐ܆ ܠܰܥܡܳܕܳܐ ܐܰܟܪܶܙ ܘܶܐܡܰܪ ܩܽܘܕܡܰܬ ܟܶܢ̈ܫܶܐ܆ ܕܗܳܐ ܐܶܡܪܶܗ ܕܰܐܠܳܗܳܐ ܕܶܐܬܳܐ ܕܢܶܫܩܽܘܠ܆ ܠܰܚܛܺܝܬܶܗ ܕܥܳܠܡܳܐ ܗܳܢܳܐ ܘܗܽܘ ܦܳܪܶܩ ܠܶܗ܀

ܡܰܕܪܳܫܳܐ

ܩܳܠܳܐ ܒܩ̄: ܕܽܘܨ ܟܶܢܫܳܐ ܕܰܥܠܰܝ̈ܡܳܬܳܐ

ܥܽܘܢܺܝܬܳܐ: ܒܪܺܝܟܽ ܗ̱ܘ ܕܚܰܣܺܝ ܚܰܘ̈ܒܰܝܟܽܘܢ܆ ܕܬܶܣܒܽܘܢ ܦܰܓܪܶܗ ܙܰܗܝܳܐܺܝܬ.

ܥܒܰܕ ܝܰܥܩܽܘܒ ܦܽܘܪܣܳܐ ܕܢܶܚܛܽܘܦ܆ ܥܳܢ̈ܶܗ̇ ܕܠܳܒܳܢ ܥܰܠ ܕܢܰܟܠܶܗ܆ ܘܰܩܠܰܦ ܩܰܝܣܳܐ ܛܡܰܪ ܒܪ̈ܳܗܛܶܐ܆ ܕܥܳܢ̈ܳܐ ܡܶܢܗܽܘܢ ܫܳܬܝܳܐ ܗ̱ܘܳܬ܆ ܕܬܶܗܘܶܐ ܩܪ̈ܳܚܶܐ ܘܦܰܝܣ̈ܟܳܝܶܐ܆ ܘܢܶܗܘܽܘܢ ܕܺܝܠܶܗ ܒܰܫܪܳܪܳܐ܀

ܩܰܝܣܳܐ ܐ̱ܪܳܙܶܗ ܕܰܨܠܺܝܒܳܐ܆ ܨܳܐܰܪ ܗ̱ܘܳܐ ܫܰܪܺܝܪܳܐܺܝܬ܆ ܕܒܰܨܠܺܝܒܳܐ ܡܶܬܩܰܕܫܳܐ ܠܳܗ̇܆ ܡܰܥܡܽܘܕܺܝܬܳܐ ܠܚܽܘܣܳܝܰܢ܆ ܘܰܨܠܺܝܒܳܐ ܗܽܘ ܦܳܪܶܫ ܠܰܢ܆ ܡܶܢ ܢܽܘܟܪ̈ܳܝܶܐ ܕܣܳܢܶܝܢ ܠܰܢ܀

ܒܢܰܗܪܳܐ ܛܡܰܪ ܗ̱ܘܳܐ ܐܶܪܰܡܝܳܐ܆ ܠܣܽܘܕܳܪܳܐ ܗܰܘ ܕܶܐܬܚܰܒܰܠ܆ ܛܽܘܦܣܳܐ ܚܰܘܺܝ ܠܗܰܘ ܥܰܡܳܐ܆ ܕܰܥܬܶܩ ܘܰܒܠܺܝ ܘܶܐܬܚܰܒܰܠ܆ ܐܳܦ ܥܰܡ̱̈ܡܶܐ ܕܒܳܩܘ ܘܶܐܬܚܰܒܰܠܘ܆ ܡܶܢ ܡܰܝ̈ܳܐ ܠܒܶܫܘ ܚܽܘܕܳܬܳܐ܀

ܒܫܺܝܠܽܘܚܳܐ ܡܰܝ̈ܳܐ ܒܪ̈ܺܝܟܶܐ܆ ܟܳܗ̈ܢܶܐ ܡܰܫܚܽܘܗ̱ܝ ܠܰܫܠܶܝܡܽܘܢ܆ ܝܰܩܺܝܪܳܐ ܗ̱ܘܳܬ ܛܰܠܝܽܘܬܶܗ܆ ܘܙܰܠܺܝܠܳܐ ܗ̱ܘܳܬ ܣܰܝܒܽܘܬܶܗ܆ ܒܝܰܕ ܡܰܝ̈ܳܐ ܢܰܟ̈ܦܶܐ ܠܒܶܫܬܽܘܢ܆ ܢܰܟܦܽܘܬܳܐ ܫܡܰܝܳܢܺܝܬܳܐ܀

ܓܶܙܬܳܐ ܕܝܶܒܫܰܬ ܡܶܢ ܛܰܠܳܐ܆ ܐܽܘܪܫܠܶܡ ܨܺܝܪܳܐ ܗ̱ܘܳܬ ܒܳܗ̇܆ ܠܰܩܢܳܐ ܕܰܡܠܳܬ ܡܶܢ ܛܰܠܳܐ܆ ܡܰܥܡܽܘܕܺܝܬܳܐ ܨܳܝܪܳܐ ܗ̱ܘܳܬ܆ ܝܶܒܫܰܬ ܗܺܝ ܐܰܝܟ ܒܰܪ̱ܬ ܛܽܘܦܣܳܗ̇܆ ܡܠܳܬ ܡܰܝ̈ܳܐ ܐܰܝܟ ܒܰܪ̱ܬ ܐ̱ܪܳܙܶܗ܀

ܦܰܓܪܳܐ ܠܰܐܝܳܐ ܒܓܰܘ ܡܰܝ̈ܳܐ܆ ܣܳܚܶܐ ܘܢܳܐܰܚ ܡܶܢ ܥܰܡܠܶܗ܆ ܗܳܐ ܡܰܣܚܽܘܬܳܐ ܕܰܟܣܶܝܢ ܒܳܗ̇܆ ܢܝܳܚ̈ܶܐ ܘܚܰܝ̈ܶܐ ܫܰܪܺܝܪ̈ܶܐ܆ ܒܗܽܘܢ ܗܘܳܐ ܢܺܝܚ ܐܳܕܳܡ ܠܰܐܝܳܐ܆ ܕܰܐܥܶܠ ܡܰܘܬܳܐ ܠܰܒܪܺܝܬܳܐ܀

ܫܳܡܪܳܝܬܳܐ ܠܡܳܪܰܢ ܐܶܡܪܰܬ܆ ܕܗܳܐ ܠܰܡ ܒܺܐܪܳܐ ܥܰܡܺܝܩܳܐ܆ ܡܰܥܡܽܘܕܺܝܬܳܐ ܡܪܰܝܰܡܬܳܐ܆ ܒܰܚܢܳܢܶܗ ܪܶܒܝܰܬ ܨܶܐܕܰܝܢ܆ ܚܽܘܣܳܝܰܐ ܗ̱ܘ ܓܶܝܪ ܥܶܠܳܝܳܐ܆ ܐܶܬܬܰܚܬܺܝ ܠܘܳܬ ܚܰܛܳܝ̈ܶܐ܀

ܒܡܰܥܡܽܘܕܺܝܬܳܐ ܕܫܺܝܠܽܘܚܳܐ܆ ܐܰܫܺܝܓ ܣܰܡܝܳܐ ܘܶܐܬܦܰܬܰܚ܆ ܢܗܰܪ̈ܝ ܒܳܒ̈ܳܬܶܗ ܡܶܢ ܡܰܝ̈ܳܐ܆ ܫܠܰܚ ܚܶܫܽܘܟܳܐ ܕܰܥܠܰܝܗܶܝܢ܆ ܚܶܫܽܘܟܳܐ ܟܰܣܝܳܐ ܫܠܰܚܬܽܘܢ܆ ܘܡܶܢ ܡܰܝ̈ܳܐ ܢܽܘܗܪܳܐ ܠܒܶܫܬܽܘܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܦܰܪܕܰܝܣܳܐ
ܡܰܢܽܘ ܚܙܳܐ ܢܶܩܝܳܐ ܟܰܕ ܡܰܝܢܩܳܐ

ܥܽܘܢܺܝܬܳܐ: ܫܽܘܒܚܳܐ ܠܰܥܡܳܕܳܟ ܕܰܥܛܳܐ ܚܰܘ̈ܒܳܬܰܢ܆ ܫܽܘܒܚܳܐ ܠܡܽܘܟܳܟܳܟ ܕܰܗܘܳܐ ܠܪܽܘܡܪܳܡܰܢ.

ܟܡܳܐ ܐܰܪܟܢܽܘܟ ܪ̈ܰܚܡܰܝܟ ܡܶܛܽܠ ܒܢܰܝ̈ܢܳܫܳܐ܆ ܟܡܳܐ ܐܰܚܬܳܟ ܚܽܘܒܳܟ ܨܶܝܕܶܝܗ̇ ܕܐ̱ܢܳܫܽܘܬܰܢ܆ ܐܰܪܟܶܢܬ ܪܰܒܽܘܬܳܟ ܛܳܒܳܐ ܘܒܰܣܺܝܡܳܐ܆ ܕܡܶܢ ܐܰܪܥܳܐ ܬܰܣܩܰܢ ܠܘܳܬܶܗ ܕܫܳܠܽܘܚܳܟ܆ ܘܥܰܡ ܥܰܦܪ̈ܳܢܶܐ ܨܒܰܝܬ ܕܬܶܚ݉ܠܽܘܛ܆ ܕܰܐܚ̈ܶܐ ܢܶܗܘܽܘܢ ܠܳܟ ܡܶܢ ܡܰܥܡܽܘܕܺܝܬܳܐ܆ ܒܢܰܝ̈ܳܐ ܠܝܳܠܽܘܕܳܟ ܠܪܽܘܚܳܐ ܫܰܘ̈ܬܳܦܶܐ܀

ܚܽܘܒܳܟ ܢܓܰܕ ܐܰܚܬܳܟ ܠܘܳܬܰܢ ܚܰܠܳܫ̈ܶܐ܆ ܕܰܒܝܰܕ ܡܽܘܟܳܟܳܟ ܬܪܰܡܪܶܡ ܡܚܺܝܠܽܘܬܰܢ܆ ܐ̱ܢܳܫܳܐ ܗܘܰܝܬ ܒܪ̈ܰܚܡܰܝܟ ܡܶܢ ܗܳܝ ܒܰܪ̱ܬ ܕܰܘܺܝܕ܆ ܘܚܰܠܶܛܬ ܐ̱ܢܳܫܽܘܬܳܟ ܥܰܡܰـܢ݉܆ ܫܽܘܒܚܳܐ ܠܛܰܝܒܽܘܬܳܟ ܕܰܟܡܳܐ ܐܶܬܪܰܟܢܰܬ܆ ܘܥܰܠܺܝܬ ܪܰܡܪܶܡܬܳܝܗ̱ܝ ܠܰܟܝܳܢܰܢ ܪܰܦܝܳܐ܀

ܥܰܠ ܝܽܘܪܕܢܳܢ ܢܰܗܪܳܐ ܩܕܳܡ ܟܶܢ̈ܫܶܐ ܐܰܙܥܶܩ܆ ܝܽܘܚܰܢܳܢ ܒܨܶܒܥܳܐ ܘܚܰܘܝܶܗ ܕܡܰܢ ܐܺܝܬܰܘܗ̱ܝ܆ ܐܶܡܪܳܐ ܫܰܡܗܶܗ ܗ̱ܘܳܐ ܘܰܠܟܶܢ̈ܫܶܐ ܚܰܘܝܶܗ܆ ܘܰܐ̱ܚܪܺܢܳܐ ܕܶܢܚܳܐ ܘܫܰܠܺܝـ݉ܛܳܐ܆ ܕܗܳܢܳܐ ܠܰܡ ܫܳܩܶܠ ܠܰܚܛܺܝܬܶܗ ܕܥܳܠܡܳܐ܆ ܒܰܪ ܥܰܩܪ̈ܶܐ ܐܶܡܰܪ ܠܟܶܢ̈ܫܶܐ ܥܰܠ ܝܽܘܪܕܢܳܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܳܘ ܢܰܦܫܳܐ ܨܽܘܪܬܳܐ

ܥܽܘܢܺܝܬܳܐ: ܥܶܠܳܝ̈ܶܐ ܚܳܕܶܝܢ ܒܟܶܢ̈ܫܰܝܗܽܘܢ ܕܶܐܬܩܰܕܰܫܘ ܐ̱ܢܳܫ̈ܳܐ ܥܰܦܪ̈ܳܢܶܐ.

ܛܰܡܳܐܐ ܗ̱ܘܳܬ ܒܕܶܒ̈ܚܶܐ ܕܰܥܠܰܘ̈ܳܬܳܐ܆ ܢܕܺܝܕܳܐ ܗ̱ܘܳܬ ܒܰܕܡܳܐ ܕܰܦܬܰܟܪܽܘܬܳܐ܆ ܘܰܒܡܰܝ̈ܳܐ ܚܰܠܠܳܗ̇ ܡܚܰܘܰܪ ܟܽܠ܀

ܠܩܰܕܺܝܫܳܐ ܠܶܒܫܰܬ ܡܶܢ ܡܰܝ̈ܳܐ܆ ܕܗܽܘ ܠܰܒܫܳܗ̇ ܐܳܦ ܗܽܘ ܡܶܢ ܟܰܪܣܳܐ܆ ܫܩܰܠ ܦܰܓܪܳܐ ܘܪܽܘܚܳܐ ܫܒܰܩ ܘܰܣܠܶܩ܀

ܐܶܬܚܰܝܰܕ ܥܰܡܳܗ̇ ܕܐ̱ܢܳܫܽܘܬܳܐ܆ ܒܡܰܘܠܳܕܶܗ ܐܰܘܠܕܳܗ̇ ܠܫܰܒܪܽܘܬܳܐ܆ ܕܰܒܝܰܠܕܳܐ ܬܶܩܢܶܐ ܓܡܺܝܪܽܘܬܳܐ܀

ܒܰܪܢܳܫܳܐ ܗܘܳܐ ܡܶܢ ܓܰܘ ܟܰܪܣܳܐ܆ ܘܰܐܠܳܗ̈ܶܐ ܥܰܒܕܰܢ ܡܶܢ ܡܰܝ̈ܳܐ܆ ܗܘܳܐ ܡܶܢܰܢ ܕܰܚܢܰܢ ܢܗܶܐ ܕܺܝܠܶܗ܀

ܠܳܐ ܕܳܡܶܐ ܥܡܳܕܶܗ ܠܫܺܝܠܽܘܚܳܐ܆ ܕܚܰܕ ܟܺܐܒܳܐ ܒܰܠܚܽܘܕ ܡܰܐܣܶܐ ܗ̱ܘܳܐ܆ ܘܣܰܓܺܝ̈ܶܐܐ ܦܳܝܫܺܝܢ ܕܠܳܐ ܥܽܘܕܪܳܢ܀

ܡܰܠܰܐܟܳܐ ܡܙܺܝܥ ܗ̱ܘܳܐ ܠܫܺܝܠܽܘܚܳܐ܆ ܕܩܰܕܡܳܝܳܐ ܟܪܺܝܗܳܐ ܕܢܳܚܶܬ ܗ̱ܘܳܐ܆ ܚܽܘܠܡܳܢܳܐ ܩܳܢܶܐ ܘܣܳܠܶܩ ܗ̱ܘܳܐ܀

ܗܳܐ ܝܰܘܡܳܢ ܡܳܪܳܐ ܕܡܰܠܰܐܟ̈ܶܐ܆ ܒܪܽܘܚ ܩܽܘܕܫܳܐ ܡܙܺܝܥ ܡܰܥܡܽܘܕܺܝܬܳܐ܆ ܕܪ̈ܶܒܘܳܬܳܐ ܘܟܶܢ̈ܫܶܐ ܢܶܬܰܐܣܽܘܢ܀

ܩܰܕ̈ܡܳܝܶܐ ܐ̱ܚܪ̈ܳܝܶܐ ܘܡܶܨ̈ܥܳܝܶܐ܆ ܒܽܘܟܪ̈ܶܐ ܐܶܢܽܘܢ ܕܡܶܬܝܰܠܕܺܝܢ ܡܶܢ ܥܽܘܒܳܗ̇܆ ܘܡܶܬܩܰܕܫܺܝܢ ܒܪܽܘܚܳܐ ܩܰܕܺܝܫܳܐ܀

ܒܢܰܝ̈ ܐܰܪܥܳܐ ܕܰܣܠܶܩܘ ܘܡܶܢ ܫܶܠܝ ܗܘܰܘ܆ ܫܡܰܝܳܢ̈ܶܐ ܒܚܽܘܒܶܗ ܕܰܐܠܳܗܰܢ܆ ܫܽܘܒܚܳܐ ܠܶܗ ܕܰܐܘܪܶܒ ܙܥܽܘܪܽܘܬܰܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܟܶܢܫܳܐ ܥܶܠܳܝܳܐ

ܥܽܘܢܺܝܬܳܐ: ܐܰܫܘܳܢܝ ܐܳܦ ܠܺܝ ܡܳܪܝ܆ ܕܶܐܙܡܰܪ ܠܳܟ ܫܽܘܒܚܳܐ܆ ܒܟܶܢܳܪܳܐ ܕܪܽܘܚܳܐ ܒܝܰܘܡܳܐ ܕܰܥܡܳܕܳܟ.

ܐܰܒܳܐ ܥܰܡ ܪܽܘܚܳܐ܆ ܠܰܒܪܳܐ ܚܰܒܶܒܘ ܗ̱ܘܰܘ܆ ܕܰܢܚܶܬ ܘܶܐܬܓܰܫܰܡ ܘܰܠܒܶܫ ܡܽܘܟܳܟܳܐ܆ ܝܰܠܕܶܗ ܘܰܥܡܳܕܶܗ܆ ܐܰܟܪܙܽܘܗ̱ܝ ܟܡܳܐ ܡܰܟܺܝܟ܆ ܒܝܰܠܕܶܗ ܓܶܝܪ ܩܰܕܫܰܢ ܘܒܰܥܡܳܕܶܗ ܕܰܟܝܰܢ܆ ܘܟܰܕ ܐܰܥܡܕܰܢ ܦܰܪܥܳܗ̇ ܠܚܰܘܒܬܰܢ܆ ܘܚܰܕܬܶܗ ܗ̱ܘܳܐ ܠܓܶܢܣܰܢ ܕܰܒܠܺܝ܆ ܒܪܺܝܟ ܕܰܥܡܰܕ ܘܚܰܣܺܝ ܠܥܳܠܡܳܐ܀

ܝܽܘܚܰܢܳܢ ܐܰܥܡܶܕ܆ ܒܡܰܝ̈ܳܐ ܠܚܰܛܳܝ̈ܶܐ܆ ܘܰܐܟܪܶܙ ܕܰܢܬܽܘܒܽܘܢ ܘܢܶܬܦܢܽܘܢ ܠܡܰܠܟܽܘܬܳܐ܆ ܐܰܢ̱ܬ ܡܳܪܰܢ ܒܙܽܘܦܳܟ܆ ܠܟܽܠܢܳܫ ܡܚܰܘܰܪ ܐܰܢ̱ܬ܆ ܠܡܽܘܢ ܥܰܡ ܚܰܛܳܝ̈ܶܐ ܐܶܬܰܝܬ ܠܰܥܡܳܕܳܐ܆ ܘܟܰܕ ܩܽܘܕܫܳܐ ܠܟܽܘܡܪ̈ܶܐ ܝܳܗܶܒ ܐܰܢ̱ܬ܆ ܘܚܽܘܣܳܝܳܐ ܠܛܰܡ̈ܶܐܐ ܡܫܰܟܶܢ ܐܰܢ̱ܬ܆ ܕܬܶܥܡܰܕ ܒܓܰܘ ܡܰܝ̈ܳܐ ܠܳܐ ܣܢܺܝܩ ܐܰܢ̱ܬ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܒܟܽܠ ܫܶܡ ܡܰܪܝܰܡ ܐܶܬܩܰܠܣܰܬ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܒܰܥܡܳܕܳܟ ܡܳܪܝ ܐܶܬܚܰܠܠܰܬ܆ ܥܺܕܬܳܐ ܡܟܺܝܪܬܳܟ ܡܟܰܬܰܡܬܳܐ܆ ܥܩܰܪܬܳܐ ܗ̱ܘܳܬ ܘܰܡܓܰܙܰܝܬܳܐ ܕܰܣܓܺܝܘ ܝܰܠ̈ܕܶܝܗ̇ ܡܶܢ ܡܰܝ̈ܳܐ܆ ܘܗܳܐ ܒܛܶܠܳܠܶܗ ܕܺܐܝܠܳܢܳܐ܆ ܕܰܢܨܺܝܒ ܥܰܠ ܡܝ̈ܳܐ ܝܳܬܒܺܝܢ܀

ܫܽܘܒܚܳܐ ܠܰܐܒܳܐ ܡܬܽܘܡܳܝܳܐ܆ ܕܫܰܕܰܪ ܠܰܒܪܶܗ ܐܺܝܬܝܳܝܳܐ܆ ܕܢܰܦܢܶܐ ܠܰܒܪܺܝܬܳܐ ܕܺܝܠܶܗ܆ ܡܶܢ ܫܰܒܳܝܳܐ ܕܰܫܒܳܗ̇ ܗ̱ܘܳܐ܆ ܫܽܘܒܚܳܐ ܠܶܗ ܘܠܰܐܒܳܐ ܕܫܰܠܚܶܗ܆ ܘܰܠܪܽܘܚܩܽܘܕܫܳܐ ܒܟܽܠܥܶܕܳܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀