ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܥܰܡ ܗܳܢܽܘܢ ܕܰܠܥܶܠ

ܒܰܥܡܳܕܶܗ ܕܰܒܪܳܐ܆ ܗܳܐ ܚܳܕܶܝܢ ܫܡܰܝܳܐ ܘܰܐܪܥܳܐ܆ ܘܙܳܡܪܺܝܢ ܫܽܘܒܚܳܐ܆ ܠܰܐܒܳܐ ܕܫܰܕܰܪ ܠܰܒܪܶܗ ܠܦܽܘܪܩܳܢܰܢ܆ ܠܶܗ ܬܶܫܒܽܘܚܬܳܐ܀

ܐ̱ܪܳܙܳܐ ܕܰܟܣܶܐ ܗ̱ܘܳܐ܆ ܡܶܢ ܕܳܪ̈ܶܐ ܘܡܶܢ ܫܰܪ̈ܒܳܬܳܐ ܐܰܠܳܗܳܐܺܝܬ܆ ܒܗܳܢܳܐ ܝܰܘܡܳܐ ܐܶܬܓܠܺܝ ܥܰܠ ܝܽܘܪܕܢܳܢ܆ ܠܶܗ ܬܶܫܒܽܘܚܬܳܐ܀

ܒܰܥܡܳܕܶܗ ܕܰܒܪܳܐ܆ ܐܶܬܩܰܕܫܰܬ ܡܰܥܡܽܘܕܺܝܬܳܐ ܠܝܰܠ̈ܕܰܘܗ̱ܝ ܕܳܐܕܳܡ܆ ܕܒܳܗ̇ ܢܶܬܝܰܠܕܽܘܢ ܘܢܶܗܘܽܘܢ ܪ̈ܽܘܚܳܢܶܐ܆ ܠܶܗ ܬܶܫܒܽܘܚܬܳܐ܀

ܒܓܰܘ ܝܽܘܪܕܢܳܢ ܢܰܗܪܳܐ܆ ܐܶܬܥܡܶܕ ܒܰܪ ܐܰܠܳܗܳܐ ܡܶܢ ܝܽܘܚܰܢܳܢ܆ ܘܰܐܒܳܐ ܕܩܳܥܶܐ ܕܗܳܢܰܘ ܒܶܪܝ ܚܰܒܺܝܒܝ܆ ܠܶܗ ܬܶܫܒܽܘܚܬܳܐ܀

ܫܽܘܒܚܳܐ

ܢܫܰܒܰܚ ܒܰܪܘܳܙܳܐ܆ ܠܡܳܪܳܐ ܕܡܰܠܰܐܟ̈ܶܐ ܕܰܚܠܳܦܰܝܢ ܐܶܬܪܟܶܢ܆ ܘܒܰܕܡܽܘܬ ܣܢܺܝܩܳܐ ܥܡܰܕ ܗ̱ܘܳܐ ܒܓܰܘ ܝܽܘܪܕܢܳܢ܆ ܠܶܗ ܬܶܫܒܽܘܚܬܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܐܰܒܳܐ ܟܬܰܒ ܗܘܳܐ

ܐܰܒܳܐ ܟܬܰܒ ܗ̱ܘܳܐ ܐܶܓܰܪܬܳܐ. ܒܝܰܕ ܥܺܝܪܳܐ ܘܫܰܕܪܳܗ̇ ܠܢܳܨܪܰܬ. ܠܘܳܬ ܒܬܽܘܠܬܳܐ ܡܰܪܝܰܡ. ܕܰܓܒܳܐ ܘܰܨܒܳܐ ܒܳܗ̇. ܕܬܶܗܘܶܐ ܐܶܡܳܐ ܠܺܝܚܺܝܕܶܗ. ܟܰܕ ܢܳܚܶܬ ܕܢܶܦܪܽܘܩ ܠܥܳܠܡܳܐ܀

ܩܳܠܳܐ ܒܩ̄: ܠܡܰܠܟܽܘܬ ܪܰܘܡܳܐ
ܛܽܘܪܳܐ ܕܣܺܝܢܰܝ܆ ܙܳܥ ܗ̱ܘܳܐ ܡܶܢ ܩܽܘܕܡܰܝܟ

ܪܰܒܽ ܗ̱ܘ ܘܰܫܒܺܝܚ ܕܶܢܚܶܗ ܕܦܳܪܽܘܩܰܢ܆ ܒܰܐܪܒܰܥ ܦܶܢ̈ܝܳܬܳܐ܆ ܕܒܶܗ ܐܶܬܚܰܘܺܝ ܠܰܒܪܺܝܬܳܐ܆ ܐ̱ܪܳܙܳܐ ܕܰܬܠܺܝܬܳܝܽܘܬܳܐ܆ ܘܗܳܐ ܙܳܡܪܳܐ ܠܶܗ ܬܶܫܒܽܘܚܬܳܐ܆ ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܗܺܝ ܘܝܰܠ̈ܕܶܝܗ̇܆ ܕܦܰܪܩܳܗ̇ ܡܶܢ ܛܽܘܥܝܰܝ܀

ܫܽܘܒܚܳܐ

ܒܕܶܢܚܳܟ ܡܳܪܰܢ ܐܶܬܩܰܕܰܫܘ ܡܰܝ̈ܳܐ܆ ܘܡܰܒܽܘ̈ܥܶܐ ܟܽܠܗܽܘܢ܆ ܒܕܶܢܚܳܟ ܘܰܥܡܳܕܳܟ ܡܳܪܰܢ܆ ܚܰܛܳܝ̈ܶܐ ܗܘܰܘ ܬܰܝ̈ܳܒܶܐ܆ ܘܥܺܕ̱ܬܳܐ ܒܕܶܢܚܳܟ ܗܳܐ ܚܳܕܝܳܐ܆ ܘܒܰܥܡܳܕܳܟ ܐܶܬܩܰܕܫܰܬ ܠܳܗ̇܆ ܘܶܐܬܚܰܘܪܰܬ܆ ܐܰܝܟ ܬܰܠܓܳܐ ܕܰܟܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܬܰܪܥܳܟ ܡܳܪܰܢ
ܐܺܝܢ ܛܰܠܝܳܐ ܪܓܺܝܓܳܐ ܫܠܶܝܡܽܘܢ (ܣܳܠܶܩ: ܒܠܡܰܪܝܰܡ ܝܳܠܕܰܬ ܐܰܠܳܗܳܐ)

ܒܰܝܢܳܬ ܟܶܢ̈ܫܶܐ ܩܳܐܶܡ ܗ̱ܘܳܐ ܒܪܶܗ ܕܰܙܟܰܪܝܳܐ: ܥܰܠ ܝܽܘܪܕܢܳܢ ܢܰܗܪܳܐ: ܘܰܚܙܳܝܗ̱ܝ ܗ̱ܘܳܐ ܠܒܰܪ ܐܰܠܳܗܳܐ ܕܶܐܬܳܐ ܠܘܳܬܶܗ: ܘܶܐܡܰܪ ܠܳܗ̇ ܠܥܺܕܰܬ ܩܽܘܕܫܳܐ ܕܗܳܢܰܘ ܚܰܬܢܳܐ ܕܰܥܠܰܘܗ̱ܝ ܡܰܟܪܶܙ ܗ̱ܘܺܝܬ܀

ܚܙܳܬܶܗ ܥܺܕܬܳܐ ܠܰܡܫܺܝܚܳܐ ܠܥܶܠ ܡܶܢ ܢܰܗܪܳܐ: ܘܒܶܪܟܰܬ ܣܶܓܕܰܬ ܠܶܗ: ܘܶܐܡܪܰܬ ܠܶܗ ܒܪܺܝܟ ܫܳܠܽܘܚܳܟ ܚܰܬܢܳܐ ܕܪܰܘܡܳܐ: ܕܰܐܠܒܶܫܬܳܢ ܡܶܢ ܓܰܘ ܡܰܝ̈ܳܐ ܐܶܣܛܰܠ ܫܽܘܒܚܳܐ ܕܙܶܩܪܰܬ ܪܽܘܚ ܩܽܘܕܫܳܐ܀

ܡܰܕܪܳܫܳܐ

ܩܳܠܳܐ ܒܩ̄: ܗܳܢܰܘ ܝܰܪܚܳܐ
ܗܳܢܰܘ ܝܰܪܚܳܐ ܕܰܛܥܺܝܢ ܟܽܠܶܗ

ܥܽܘܢܺܝܬܳܐ: ܠܳܟ ܬܶܫܒܽܘܚܬܳܐ. ܒܪܳܐ ܕܒܰܥܡܳܕܶܗ ܚܰܣܺܝ ܚܛܳܗܰܝ̈ܢ.

ܡܶܫܬܰܒܗܰܪ ܗ̱ܘܳܐ. ܐܳܟܶܠܩܰܪܨܳܐ ܕܚܰܒܫܶܗ ܠܳܐܕܳܡ܆ ܒܗܰܘܬܳܐ ܟܡܺܝܪܬܳܐ ܥܰܠ ܣܰܟܠܽܘܬܶܗ܆ ܘܰܒܝܰܕ ܥܡܳܕܶܗ ܒܰܪ ܐܰܠܳܗܳܐ܆ ܫܪܳܝܗ̱ܝ ܗ̱ܘܳܐ ܠܳܐܕܳܡ܆ ܘܚܰܒܫܶܗ ܠܫܺܐܕܳܐ ܒܶܐܫܬܗܽܘܢ ܕܝܰܡ̱̈ܡܶܐ܀

ܟܰܕ ܚܙܳܝܗ̱ܝ ܝܽܘܪܕܢܳܢ. ܠܒܰܪ ܐܰܠܳܗܳܐ ܕܶܐܬܳܐ ܕܢܶܥܡܰܕ܆ ܙܩܰܦ ܗ̱ܘܳܐ ܓܰܠ̱̈ܠܰܘܗ̱ܝ ܘܡܰܪܕܺܝܬܶܗ ܟܠܳܐ܆ ܘܰܒܥܳܐ ܕܢܶܥܪܽܘܩ ܡܶܢ ܕܶܚܠܬܶܗ܆ ܘܰܐܫܦܥܶܗ ܪܶܡܙܶܗ܆ ܢܚܶܬ ܘܰܥܡܰܕ ܒܶܗ ܐܰܝܟ ܕܰܫܦܰܪ ܠܶܗ܀

ܐܶܠܽܘܠܳܐ ܥܡܰܕ. ܒܰܪ ܐܰܠܳܗܳܐ ܘܰܫܩܰܠ ܚܛܺܝܬܰܢ܆ ܘܛܰܒܥܳܗ̇ ܒܝܰܡܳܐ ܘܰܐܫܺܝܓ ܥܰܘܠܰܢ܆ ܩܰܝܳܡܳܐ ܗ̱ܘܳܬ ܥܕܰܟܺܝܠ ܚܛܺܝܬܰܢ܆ ܘܰܡܛܰܒܥܺܝܢ ܗ̱ܘܰܝܢ ܒܚܶܙܶܝ̈ܗ̇ ܕܰܫܝܽܘܠ܆ ܥܕܰܡܳܐ ܠܥܳܠܰܡ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܐܳܦܪܰܬ

ܥܽܘܢܺܝܬܳܐ: ܒܪܺܝܟܽ ܗ̱ܘ ܡܫܺܝܚܳܐ. ܕܶܐܬܳܐ ܘܰܥܡܰܕ܆ ܡܶܢ ܝܽܘܚܰܢܳܢ ܒܝܽܘܪܕܢܳܢ ܢܰܗܪܳܐ.

ܛܽܘܒܰܝܟ ܝܽܘܪܕܢܳܢ. ܢܰܗܪܳܐ ܙܥܽܘܪܳܐ܆ ܕܝܰܡܳܐ ܪܰܒܳܐ ܢܚܶܬ ܘܰܥܡܰܕ ܒܳܟ܆ ܠܗܰܘܦܳܐ ܕܢܽܘܛܦܬܶܗ܆ ܠܳܐ ܣܳܦܶܩ ܗ̱ܘܰܝܬ܆ ܕܢܶܒܥܳܐ ܕܚܰܝ̈ܶܐ ܘܫܳܒܶܩ ܚܰܘ̈ܒܶܐ܆ ܛܽܘܒ ܠܫܶܦܥܰܝ̈ܟ ܕܶܐܬܡܪܶܩܘ ܒܡܰܚܬܶܗ܆ ܕܩܰܕܺܝܫܳܐ ܕܶܐܬܪܟܶܢ ܘܒܳܟ ܣܚܳܐ܆ ܡܰܥܡܽܘܕܺܝܬܳܐ܆ ܒܰܥܡܳܕܶܗ ܢܚܶܬ ܦܬܰܚ܆ ܠܚܽܘܣܳܝ ܢܰܦ̈ܫܳܬܰܢ܀

ܩܪܶܒ ܝܽܘܚܰܢܳܢ. ܘܰܩܪܳܐ ܠܟܰܠܬܳܐ܆ ܕܰܢܚܰܘܶܐ ܠܳܗ̇ ܚܰܬܢܳܐ ܡܳܪܳܗ̇܆ ܒܰܫܡܳܐ ܗܳܢܳܐ܆ ܡܰܘܪܶܒ ܗ̱ܘܺܝܬ ܠܶܟܝ܆ ܕܠܶܗ ܡܣܰܟܝܳܐ ܗ̱ܘܰܝܬܝ ܗܳܐ ܡܶܢ ܢܽܘܓܪܳܐ܆ ܗܳܐ ܐܶܬܳܐ ܠܶܗ ܕܢܶܚܽܘܬ ܢܶܥܡܰܕ܆ ܘܶܐܣܛܰܠ ܫܽܘܒܚܳܐ ܡܶܢ ܡܰܝ̈ܳܐ ܢܰܠܒܫܶܟܝ܆ ܘܥܺܕ̱ܬܳܐ ܪܶܗܛܰܬ܆ ܣܶܓܕܰܬ ܠܰܡܟܺܝܪܳܗ̇܆ ܥܰܠ ܝܽܘܪܕܢܳܢ ܢܰܗܪܳܐ܀

ܢܚܶܬ ܠܰܥܡܳܕܳܐ. ܡܶܠܬܶܗ ܕܰܐܒܳܐ܆ ܘܰܫܪܳܐ ܥܽܘܙܶܗ ܒܢܰܗܪܳܐ ܙܥܽܘܪܳܐ܆ ܣܶܘܚܰܬ ܗ̱ܘܳܬ ܠܶܗ. ܡܰܥܡܽܘܕܺܝܬܳܐ܆ ܘܚܰܡܘ ܘܶܐܫܬܰܠܗܰܒܘ ܡܰܝ̈ܳܐ ܒܢܽܘܪܳܐ܆ ܘܰܐܒܳܐ ܐܰܙܥܶܩ ܗ̱ܘܳܐ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܚܰܒܺܝܒܳܐ ܕܒܶܗ ܐܶܨܛܒܺܝܬ܆ ܘܪܽܘܚܳܐ ܢܶܚܬܰܬ܆ ܒܰܕܡܽܘܬܳܐ ܕܝܰܘܢܳܐ܆ ܘܫܶܟܢܰܬ ܥܰܠ ܪܺܝܫܶܗ܀

ܡܰܘܕܶܝܢ ܠܳܟ ܡܳܪܝ. ܝܰܠ̈ܕܰܘܗ̱ܝ ܕܳܐܕܳܡ܆ ܕܰܥܒܰܕܬ ܐܶܢܽܘܢ ܐܰܚ̈ܶܐ ܠܚܽܘܒܳܟ܆ ܘܰܒܢܰܝ̈ܳܐ ܬܽܘܒ܆ ܠܰܐܒܳܐ ܓܢܺܝܙܳܐ܆ ܐܳܦ ܫܰܘ̈ܬܳܦܶܐ ܠܪܽܘܚܳܐ ܕܩܽܘܕܫܳܐ܆ ܘܗܳܐ ܚܳܕܶܝܢ ܘܕܳܝܨܺܝܢ ܘܰܦܨܺܝܚܺܝܢ܆ ܘܰܒܥܺܐܕܳܟ ܡܫܰܒܚܺܝܢ ܠܰܐܒܳܐ ܕܫܰܠܚܳܟ܆ ܘܳܐܡܪܺܝܢ ܒܪܺܝܟ ܕܶܐܬܳܐ܆ ܘܦܰܪܩܰܢ ܡܶܢ ܛܽܘܥܝܰܝ܆ ܬܶܫܒ̈ܚܳܢ ܠܫܳܠܽܘܚܶܗ܀

ܛܽܘܒܰܝܟܝ ܥܺܕܬܳܐ ܕܰܐܫܩܝܶܟܝ ܡܰܝ̈ܳܐ: ܚܰܝ̈ܶܐ ܘܠܳܐ ܬܽܘܒ ܠܥܳܠܰܡ ܨܳܗܝܰܬܝ܆ ܠܩܽܘܫܬܳܐ ܓܶܝܪ ܩܪܳܐ. ܡܰܝ̈ܳܐ ܚܰܝ̈ܶܐ܆ ܕܠܳܐ ܬܽܘܒ ܨܳܗܶܝܢ ܟܽܠ ܫܳܡܽܘ̈ܥܰܘܗ̱ܝ܆ ܠܶܟܝ ܛܽܘܒܰܝܟܝ ܕܺܝܠܶܦܬܝ ܫܪܳܪܳܐ ܘܠܳܐ ܨܗܰܝܬܝ܆ ܚܰܕܽ ܗ̱ܘ ܓܶܝܪ ܡܫܺܝܚܳܐ ܘܠܰܝܬ ܬܽܘܒ ܐ̱ܚܪܺܢܳܐ܆ ܓܰܒܪ̈ܰܝܟܝ ܗܳܐ ܣܓܺܝܘ܆ ܘܰܡܫܺܝܚܰܝ̈ܟܝ ܠܳܐ ܣܓܺܝܘ܆ ܕܚܰܕܽ ܗ̱ܘ ܝܺܚܺܝܕܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܳܕܳܡ ܚܛܳܐ ܘܰܩܢܳܐ

ܥܽܘܢܺܝܬܳܐ: ܒܪܺܝܟ ܡܳܪܝܳܐ ܕܰܥܡܰܕ ܒܓܰܘ ܝܽܘܪܕܢܳܢ܆ ܒܪܺܝܟ ܕܰܕܢܰܚ ܘܡܰܪܩܰܢ ܒܰܥܡܳܕܶܗ.

ܒܰܛܢܶܗܽ ܗ̱ܘ ܣܺܝܡܰܬ ܒܽܘܪ̈ܟܳܬܰܢ܆ ܝܰܠܕܶܗܽ ܗ̱ܘ ܓܰܙܳܐ ܕܚܰܕ̈ܘܳܬܰܢ܆ ܥܡܳܕܶܗܽ ܗ̱ܘ ܥܶܠܰܬ ܚܽܘܣܳܝܰܢ܆ ܡܰܘܬܶܗܽ ܗ̱ܘ ܥܶܠܰܬ ܢܽܘܚܳܡܰܢ܆ ܠܡܰܘܬܳܐ ܐܰܥܺܝܩ ܒܰܠܚܽܘܕ ܢܽܘܚܳܡܶܗ܀

ܒܝܰܠܕܶܗ ܨܡܰܚ ܒܳܐܐܰܪ ܟܰܘܟܰܒ ܢܽܘܗܪܳܐ܆ ܥܡܰܕ ܐܰܒܪܶܩ ܢܽܘܗܪܳܐ ܒܓܰܘ ܡܰܝ̈ܳܐ܆ ܒܡܰܘܬܶܗ ܚܫܶܟ ܫܶܡܫܳܐ ܒܰܪܩܺܝܥܳܐ܆ ܒܚܰܫܶܗ ܥܡܰܕܘ ܥܰܡܶܗ ܢܰܗܺܝܪ̈ܶܐ܆ ܒܕܶܢܚܶܗ ܕܢܰܚܘ ܥܰܡܶܗ ܢܰܗܺܝܪ̈ܶܐ܀

ܓܠܳܐ ܫܽܘܒܚܶܗ ܡܶܛܽܠ ܪܰܒܽܘܬܶܗ܆ ܓܠܳܐ ܚܽܘܒܶܗ ܡܶܛܽܠ ܛܰܝܒܽܘܬܶܗ܆ ܓܠܳܐ ܚܰܫܶܗ ܡܶܛܽܠ ܐ̱ܢܳܫܽܘܬܶܗ܆ ܓܠܳܐ ܕܶܢܚܶܗ ܡܶܛܽܠ ܟܺܐܢܽܘܬܶܗ܆ ܐܰܣܪܰܚ ܛܥܳܡ̈ܳܬܶܗ ܠܩܰܢܳܝܰܘ̈ܗ̱ܝ܀

ܡܰܢ ܕܰܚܙܳܐ ܚܰܫܶܗ ܘܰܟܦܰܪ ܒܶܗ܆ ܢܺܐܬܶܐ ܢܶܚܙܶܐ ܫܽܘܒܚܶܗ ܘܢܶܣܓܽܘܕ ܠܶܗ܆ ܡܰܢ ܕܒܳܣܶܐ ܘܛܳܥܶܐ ܛܰܝܒܽܘܬܶܗ܆ ܢܶܕܚܰܠ ܕܰܐܪܓܶܫ ܒܳܗ̇ ܒܟܺܐܢܽܘܬܶܗ܆ ܐܰܣܪܰܚ ܠܣܳܓܽܘܕܰܘ̈ܗ̱ܝ ܡܰܘܗܰܒܬܶܗ܀

ܗܳܐ ܡܰܕܢܚܳܐ ܒܨܰܦܪܳܐ ܐܰܢܗܪܰܬ ܗ̱ܘܳܬ܆ ܐܳܦ ܬܰܝܡܢܳܐ ܒܛܰܗܪܳܐ ܚܶܫܟܰܬ ܗ̱ܘܳܬ܆ ܦܢܳܬ ܡܰܥܪܒܳܐ ܒܪܰܡܫܳܐ ܬܽܘܒ ܢܶܗܪܰܬ܆ ܨܳܪ̈ܳܝܗ̱ܝ ܬܠܳܬ ܦܶܢ̈ܝܳܢ ܠܚܰܕ ܝܰܠܕܳܐ܆ ܡܰܘܬܶܗ ܐܳܦ ܚܰܝܰܘ̈ܗ̱ܝ ܐܰܟܪ̈ܶܙܝ ܗ̱ܘܰܝ̈܀

ܘܰܐܝܟܰܢ ܕܠܳܐ ܬܰܪܥܳܐ ܕܡܰܘܠܳܕܳܐ܆ ܠܳܐ ܐ̱ܢܳܫ ܡܨܶܐ ܥܳܐܶܠ ܠܰܒܪܺܝܬܳܐ܆ ܗܳܟܰܢ ܕܠܳܐ ܓܺܝܫܪܳܐ ܕܢܽܘܚܳܡܳܐ܆ ܠܳܐ ܐ̱ܢܳܫ ܡܨܶܐ ܥܳܐܶܠ ܠܡܰܠܟܽܘܬܳܐ܆ ܡܶܢ ܕܰܦܣܺܝܩ ܓܺܝܫܪܶܗ ܒܛܶܠ ܣܰܒܪܶܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢܬܳܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܩܪܶܒ ܝܽܘܚܰܢܳܢ ܘܰܐܪܟܶܢ ܐܺܝܕܶܗ ܥܰܠ ܓܰܘܙܰܠܬܳܐ܆ ܘܣܶܕܪ̈ܰܝ ܢܽܘܪܳܐ ܛܦܰܣܘ ܒܰܚ̈ܕܳܕܶܐ ܡܶܢ ܣܽܘܪܳܕܳܐ܆ ܐܶܬܕܰܡܰܪܘ ܗ̱ܘܰܘ ܚܰܝ̈ܠܰܘܳܬܳܐ ܓܢܺܝ̈ܙܶܐ ܕܰܠܥܶܠ܆ ܟܰܕ ܚܰܒܽܘܒܳܐ ܥܪܶܐ ܠܓܰܘܙܰܠܬܳܐ ܘܠܳܐ ܡܶܬܚܰܪܰܟ܀

ܛܳܣܰܬ ܪܽܘܚܳܐ ܡܶܢ ܒܶܝܬ ܐܰܒܳܐ ܩܰܠܺܝܠܳܐܺܝܬ܆ ܘܦܶܪܚܰܬ ܢܶܚܬܰܬ ܫܶܟܢܰܬ ܩܰܘܝܰܬ ܥܰܠ ܚܰܒܺܝܒܶܗ܆ ܐܶܬܳܬ ܒܰܕܡܽܘܬ ܓܽܘܫܡܳܐ ܕܝܰܘܢܳܐ ܬܰܡܺܝܡܳܐܺܝܬ܆ ܕܬܶܓܕܽܘܠ ܘܰܬܣܺܝܡ ܩܶܢܳܗ̇ ܬܰܡܳܢ ܒܡܰܥܡܽܘܕܺܝܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀