ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܛܺܝܡܳܬܶܐܳܘܣ ܐ
ܒ: ܐ ـ ܝܗ 1Timothy 2:1-15

ܒܳܥܶܐ ܐ̱ܢܳܐ ܗܳܟܺܝܠ ܡܶܢܳܟ܆ ܕܡܶܢ ܩܕܳܡ ܟܽ‍ܠܡܶܕܶܡ ܒܳܥܽܘܬܐ ܬܶܗܘܶܐ ܡܩܰܪܶܒ ܠܐܠܗܐ ܘܰܨܠܘܬܐ ܘܬܰܚܢܰܢܬܐ ܘܬܰܘܕܺܝܬܐ܇ ܚܠܳܦ ܟܽ‍ܠܗܘܢ ܒܢܰܝܢ̈ܫܳܐ ܚܠܳܦ ܡܰـ̈ܠܟܶܐ ܘܪ̈ܰܘܪܒܳܢܶܐ܇ ܕܥܽܘܡܪܳܐ ܫܰܠܝܳܐ ܘܢܺܝܚܳܐ. ܢܶܥܡܰܪ ܒܟܽ‍ܠܳܗ̇ ܕܶܚܠܰܬ ܐܠܳܗܳܐ ܘܕܰܟܝܽܘܬܐ. ܗܳܕܶܐ ܓܶܝܪ ܫܰܦܺܝܪܳܐ ܘܰܡܩܰܒܠܳܐ ܩܕܳܡ ܐܠܳܗܳܐ ܡܰܚܝܳܢܰܢ܇ ܗܰܘ ܕܨܳܒܶܐ ܕܟܽ‍ܠܗܽܘܢ ܒܢܰܝ̈ܢܳܫܳܐ ܢܺܚܽܘܢ܇ ܘܢܶܬܦܢܽܘܢ ܠܺܝܕܰܥܬܐ ܕܰܫܪܳܪܐ. ܚܰܕ ܗܽܘ ܓܶܝܪ ܠܠܗܳܐ. ܘܚܰܕ ܗ̱ܽܘ ܡܶܨܥܳܝܳܐ ܕܰܐܠܳܗܳܐ ܘܕܰܒܢܰܝ̈ܢܳܫܳܐ ܒܰܪܢܳܫܳܐ ܝܶܫܘܥ ܡܫܝܚܐ܇ ܗܰܘ ܕܝܰܗ̱ܒ ܢܰܦܫܶܗ ܦܽܘܪܩܳܢܳܐ ܚܠܳܦ ܟܽ‍ܠ ܐ̱ܢܳܫ܆ ܣܳܗܕܽܘܬܐ ܕܶܐܬܳܬ ܒܙܰܒܢܳܗ̇. ܗܳܝ ܕܶܐܢܳܐ ܐܶܬܣܺܝܡܶܬ ܟܪܽܘܙܳܗ̇ ܘܰܫܠܺܝܚܳܗ̇. ܩܽܘܫܬܐ ܐܳܡܰܪ ܐ̱ܢܳܐ ܘܠܳܐ ܡܕܰܓܶ‍ܠ ܐ̱ܢܳܐ܆ ܕܰܗܘܺܝܬ ܡܰܠܦܳܢܳܐ ܕܥܰܡ̱̈ܡܶܐ ܒܗܰܝܡܳܢܽܘܬܐ ܕܰܫܪܳܪܳܐ. ܨܳܒܶܐ ܐ̱ܢܳܐ ܗܳܟܺܝܠ܆ ܕܰܗܘܰܘ ܡܨܰܠܶܝܢ ܓܰܒܪ̈ܶܐ ܒܟܽ‍ܠ ܕܽܘܟܳܐ܇ ܟܰܕ ܡܪܺܝܡܺܝܢ ܐܻܝ̈ܕܰܝܗܽܘܢ ܕܰܟܝܳܐܝܺܬ ܕܠܳܐ ܪܽܘܓܙܳܐ ܘܰܕܠܳܐ ܡܰܚ̈ܫܒܳܬܐ. ܗܳܟܰܢܳܐ ܐܳܦ ܢܶܫ̈ܶܐ ܒܶܐܣܟܺܡܳܐ ܢܰܟܦܳܐ ܕܰܠܒܽܘܫܳܐ. ܒܬܰܚܡܶܨܬܐ ܘܰܒܢܰܟܦܽܘܬܐ ܢܶܗܘܶܐ ܬܰܨܒܺܝܬܗܶܝܢ܆ ܠܐ ܒܰܓܕܽܘ̈ܠܶܐ ܘܰܒܕܰܗܒܳܐ. ܐܰܘ ܒܡܰܪ̈ܓܳܢܝܳܬܐ. ܐܰܘ ܒܢܰܚ̈ܬܶܐ ܫܰܦܺܝܪ̈ܶܐ܇ ܐܶܠܐ ܒܰܥ̈ܒܳܕܶܐ ܛܳـ̈ܒܶܐ܇ ܐܰܝܟܰܢܳܐ ܕܝܳܐܷܐ ܠܢܶܫ̈ܶܐ ܕܡܶܫܬܰܘ̈ܕܝܳܢ ܕܶܚܠܰܬ ܐܠܗܳܐ. ܐܰܢ̱ܬܬܳܐ ܒܫܶܠܝܳܐ ܗܘܳܬ ܝܳܠܦܳܐ ܒܟܽ‍ܠ ܫܽܘܥܒܳܕ. ܠܰܐܢ̱ܬܬܳܐ ܓܶܝܪ ܠܡܰܠܳܦܽܘ ܠܐ ܡܰܦܶܣ ܐ̱ܢܳܐ܆ ܘܠܳܐ ܠܡܰܡܪܳܚܽܘ ܥܰܠ ܓܰܒܪܳܐ܇ ܐܶܠܐ ܬܶܗܘܶܐ ܒܫܶܠܝܳܐ. ܐܳܕܳܡ ܓܶܝܪ ܐܶܬܓܒܶܠ ܠܽܘܩܕܰܡ ܘܗܳܝܕܶܝܢ ܚܰܘܳܐ. ܘܳܐܕܳܡ ܠܐ ܛܥܳܐ܆ ܐܰܢ̱ܬܬܳܐ ܕܶܝܢ ܛܥܳܬ ܘܥܶܒܪܰܬ ܥܰܠ ܦܽܘܩܕܳܢܳܐ. ܚܳܝܳܐ ܕܶܝܢ ܒܝܰܕ ܝܰܠܕܶܝ̈ܗ̇܆ ܐܶܢ ܢܩܰܘܽܘܢ ܒܗܰܝܡܳܢܽܘܬܐ ܘܰܒܚܽܘܒܳܐ ܘܰܒܩܰܕܺܝܫܽܘܬܐ ܘܰܒܢܰܟܦܽܘܬܐ܀