ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܕ: ܝܙ ـ ܟܐ܇ ܗ: ܐ ـ ܗ 1Corinthians 4:17-21, 5:1-5

ܡܶܛܽܠ ܗܳܢܳܐ ܫܰܕܪܶܬ ܠܘܳܬܟܽܘܢ ܠܛܺܝܡܳܬܘܣ܆ ܕܺܐܝܬܘܗܝ ܒܶܪܝ ܚܰܒܺܝܒܳܐ ܘܰܡܗܰܝܡܢܳܐ ܒܡܳܪܝܳܐ܆ ܕܗܽܘ ܢܰܥ̱ܗܶܕܟܽܘܢ ܐܽܘܪ̈ܚܳܬܝ ܕܒܰܡܫܺܝܚܳܐ. ܐܰܝܟ ܡܶܕܶܡ ܕܡܰܠܶܦ ܐ̱ܢܳܐ ܒܟܽ‍ܠܗܶܝܢ ܥܺـ̈ܕܳܬܐ. ܐܰܝܟ ܗܰܘ ܕܶܝܢ ܕܠܳܐ ܐܳܬܶܐ ܐ̱ܢܳܐ ܠܘܳܬܟܽܘܢ܆ ܐܶܬܚܬܰܪܘ ܐ̱ܢܳܫܳܐ ܡܶܢܟܽܘܢ. ܐܶܠܐ ܐܶܢ ܡܳܪܝܳܐ ܨܳܒܶܐ܆ ܒܰܥܓܰ‍ܠ ܐܳܬܶܐ ܐ̱ܢܳܐ ܠܘܳܬܟܽܘܢ. ܘܶܐܕܰܥ ܠܳܐ ܡܶܠܰܬܗܽܘܢ ܕܗܳܠܶܝܢ ܕܰܡܪܺܝܡܺܝܢ ܢܰܦܫܗܽܘܢ ܐܶܠܐ ܚܰܝܠܗܽܘܢ. ܡܰܠܟܽܘܬܗ ܓܶܝܪ ܕܰܐܠܳܗܳܐ ܠܐ ܗܘܳܬ ܒܡܶܠܬܐ ܐܶܠܐ ܒܚܰܝܠܳܐ. ܐܰܝܟܰܢܳܐ ܨܳܒܶܝܢ ܐܢ̱ܬܽܘܢ܆ ܒܚܽܘܛܪܳܐ ܐܻܬܶܐ ܠܘܳܬܟܽܘܢ܇ ܐܰܘ ܒܚܽܘܒܳܐ ܘܰܒܪܽܘܚܳܐ ܡܰܟܺܝܟ‍ܬܐ܆ ܣܳܟܳܐ ܡܶܫܬܡܥܳܐ ܒܰܝܢܳܬܟܽܘܢ ܙܳܢܝܽܘܬܐ. ܘܕܰܐܝܟ ܗܳܕܶܐ ܙܳܢܝܽܘܬܐ ܐܰܝܕܳܐ ܕܳܐܦܠܳܐ ܒܶܝܬ ܚܰܢ̈ܦܶܐ ܡܶܫܬܰܡܗܳܐ. ܥܕܰܡܳܐ ܕܢܶܣܰܒ ܒܪܳܐ ܐܰܢ̱ܬܰܬ ܐܰܒܽܘܗܝ. ܘܰܐܢ̱ܬܘܢ ܚܬܺܝܪܺܝܢ ܐܢ̱ܬܘܢ܆ ܘܠܐ ܕܶܝܢ ܝܰܬܝܪܳܐܝܺܬ ܝܺܬܶܒܬܽܘܢ ܒܶܐܒܠܳܐ܆ ܕܢܶܫܬܩܶܠ ܡܶܢ ܒܰܝܢܳܬܟܽܘܢ ܗܰܘ ܡܰܢ ܕܗܳܢܳܐ ܣܽܘܥܪܳܢܳܐ ܣܥܰܪ. ܐܶܢܳܐ ܓܶܝܪ ܟܰܕ ܪܰܚܺܝܩ ܐ̱ܢܳܐ ܡܶܢܟܽܘܢ ܒܰܦܓܰܪ ܘܩܰܪܺܝܒ ܐ̱ܢܳܐ ܠܟܽܘܢ ܒܪܽܘܚ܆ ܡܶܢ ܟܰܕܽܘ ܕܳܢܶܬ ܐܰܝܟ ܩܰܪܺܝܒܳܐ ܠܗܰܘ ܡܰܢ ܕܗܳܕܶܐ ܣܳܥܰܪ܆ ܕܒܰܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ ܬܶܬܟܰܢܫܽܘܢ ܟܽ‍ܠܟܽܘܢ܇ ܘܶܐܢܳܐ ܥܰܡܟܽܘܢ ܒܪܽܘܚ܇ ܥܰܡ ܚܰܝܠܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܇ ܘܬܰܫܠܡܽܘܢܶܗ ܠܗܳܢܳܐ ܠܣܳܛܳܢܳܐ ܠܰܐܒܕܳܢܳܐ ܕܦܰܓܪܶܗ܆ ܕܰܒܪܽܘܚ ܢܺܚܶܐ ܒܝܰܘܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ܀