ܕܚܬܢ̈ܐ ܘܟܠ̈ܠܬܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܐܶܦܶܣܳܝ̈ܶܐ
ܗ: ܟܒ ـ ܠܓ Ephesians 5:22-33

ܢܶܫ̈ܶܐ ܗܘܰܝܬܶܝ̈ܢ ܡܶܫܬܰܥܒ̈ܕܳܢ ܠܒܰܥܠܰܝ̈ܟܶܝܢ ܐܰܝܟ ܕܰܠܡܳܪܰܢ. ܡܶܛܽܠ ܕܓܰܒܪܳܐ ܪܺܝܫܳܗ̇ ܗ̱ܘ ܕܰܐܢ̱ܬܬ݂ܳܐ܆ ܐܰܝܟܰܢܳܐ ܕܳܐܦ ܡܫܺܝܚܳܐ ܪܺܝܫܰܐ ܗ̱ܘ ܕܥܺܕܬܳܐ܆ ܘܗܽܘܝܽܘ ܡܰܚܝܳܢܳܐ ܕܦܰܓ݂ܪܳܐ. ܐܶܠܳܐ ܐܰܝܟܰܢܳܐ ܕܥܺܕܬܳܐ ܡܶܫܬܰܥܒܕܳܐ ܠܰܡܫܺܝܚܳܐ܆ ܗܳܟܰܢܳܐ ܐܳܦ ܢܶܫ̈ܶܐ ܠܒܰܥܠܰܝ̈ܗܶܝܢ ܒܟܽܠ ܡܶܕܶܡ. ܓܰܒܪ̈ܶܐ ܐܰܚܶܒܘ ܢܶܫܰܝ̈ܟܽܘܢ܆ ܐܰܝܟ ܕܳܐܦ ܡܫܺܝܚܳܐ ܐܰܚܶܒ ܠܥܺܕܬܶܗ ܘܢܰܦܫܶܗ ܐܰܫܠܶܡ ܥܰܠ ܐܰܦܶܝ̈ܗ̇܆ ܕܰܢܩܰܕܫܺܝܗ̇ ܘܰܢܕܰܟܶܝܗ̇ ܒܰܣܚܳܝܳܐ ܕܡܰܝ̈ܳܐ ܘܰܒܡܶܠܬ݂ܳܐ. ܘܰܢܩܺܝܡܺܝܗ̇ ܥܺܕܬܳܐ ܠܢܰܦܫܶܗ ܟܰܕ ܡܫܰܒܚܳܐ܆ ܘܠܰܝܬ ܒܳܗ̇ ܛܽܘܠܫܳܐ ܘܠܳܐ ܩܶܢܛܳܐ ܘܠܳܐ ܡܶܕܶܡ ܕܰܠܗܳܠܶܝܢ ܕܳܡܶܐ܆ ܐܶܠܳܐ ܬܶܗܘܶܐ ܩܰܕܺܝܫܳܐ ܕܠܳܐ ܡܽܘܡ. ܗܳܟܰܢܳܐ ܘܳܠܶܐ ܠܓܰܒܪ̈ܶܐ ܕܢܰܚܒܽܘܢ ܢܶܫܰܝ̈ܗܽܘܢ ܐܰܝܟ ܕܰܠܦܰܓ݂ܪ̈ܰܝܗܽܘܢ. ܘܡܰܢ ܕܠܰܐܢ̱ܬܬ݂ܶܗ ܓܶܝܪ ܡܰܚܶܒ܆ ܢܰܦܫܶܗ ܗ̱ܘ ܡܰܚܶܒ. ܠܳܐ ܓܶܝܪ ܐ̱ܢܳܫ ܡܶܡܬܽܘܡ ܣܳܢܶܐ ܦܰܓܪܶܗ܆ ܐܶܠܳܐ ܡܬܰܪܣܶܐ ܠܶܗ ܘܝܳܨܶܦ ܕܺܝܠܶܗ܆ ܐܰܝܟܰܢܳܐ ܕܳܐܦ ܡܫܺܝܚܳܐ ܕܥܺܕܬܶܗ. ܡܶܛܽܠ ܕܗܰܕ̈ܳܡܶܐ ܚܢܰܢ ܕܦܰܓ݂ܪܶܗ ܘܡܶܢ ܒܶܣܪܶܗ ܚܢܰܢ ܘܡܶܢ ܓܰܪ̈ܡܰܘܗ̱ܝ̱. ܡܶܛܽܠ ܗܳܢܳܐ ܢܶܫܒܽܘܩ ܓܰܒܪܳܐ ܠܰܐܒܽܘܗ̱ܝ ܘܠܶܐܡܶܗ ܘܢܶܩܰܦ ܠܰܐܢ̱ܬܬ݂ܶܗ܆ ܘܢܶܗܘܽܘܢ ܬܪ̈ܰܝܗܽܘܢ ܚܰܕ ܒܣܰܪ. ܗܳܢܳܐ ܐ̱ܪܳܙܳܐ ܪܰܒ ܗ̱ܘ. ܐܶܢܳܐ ܕܶܝܢ ܐܳܡܰܪ ܐ̱ܢܳܐ ܥܰܠ ܡܫܺܝܚܳܐ ܘܥܰܠ ܥܺܕܬܶܗ. ܒܪܰܡ ܐܳܦ ܐܰܢ̱ܬܽܘܢ ܟܽܠܚܰܕ ܚܰܕ ܡܶܢܟܽܘܢ ܗܳܟܰܢܳܐ ܢܶܪܚܰܡ ܐܰܢ̱ܬܬ݂ܶܗ ܐܰܝܟ ܕܰܠܢܰܦܫܶܗ. ܐܰܢ̱ܬܬ݂ܳܐ ܕܶܝܢ ܬܶܗܘܶܐ ܕܳܚܠܳܐ ܡܶܢ ܒܰܥܠܳܗ̇܀

ܕܰܐܪ̈ܡܠܶܐ ܘܕܰܐܪ̈ܡܠܳܬ݂ܳܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܙ: ܐ ـ ܝܐ 1Corinthians 7:1-11

ܥܰܠ ‎ܐܰܝܠܶܝܢ ܕܰܟܬ݂ܰܒܬܽܘܢ ܠܺܝ ܕܶܝܢ܆ ܫܰܦܺܝܪ ܗ̱ܘ ܠܓܰܒܪܳܐ ܕܠܰܐܢ̱ܬܬ݂ܳܐ ܠܳܐ ܢܶܬ݂ܩܰܪܰܒ܆ ܐܶܠܐ ܡܶܛܽܠ ܙܳܢܝܽܘܬ݂ܳܐ ܐ̱ܢܳܫ ܐܰܢ̱ܬܬ݂ܶܗ ܢܶܐܚܽܘܕ. ܘܰܐܢ̱ܬܬ݂ܳܐ ܠܒܰܥܠܳܗ̇ ܬܶܐܚܽܘܕ. ܓܰܒܪܳܐ ܠܰܐܢ̱ܬܬ݂ܶܗ ܚܽܘܒܳܐ ܕܡܶܬܬܚܺܝܒ ܢܶܦܪܽܘܥ. ܗܳܟܰܢܳܐ ܐܳܦ ܗܺܝ ܐܰܢ̱ܬܬ݂ܳܐ ܠܒܰܥܠܳܗ̇. ܐܰܢ̱ܬܬ݂ܳܐ ܠܳܐ ܫܰܠܺܝܛܳܐ ܥܰܠ ܦܰܓ݂ܪܳܗ̇܆ ܐܶܠܳܐ ܒܰܥܠܳܗ̇. ܗܳܟܰܢܳܐ ܐܳܦ ܓܰܒܪܳܐ ܠܳܐ ܫܰܠܺܝܛ ܥܰܠ ܦܰܓܪܶܗ ܐܶܠܳܐ ܐܰܢ̱ܬܬ݂ܶܗ. ܠܳܐ ܗܳܟ݂ܺܝܠ ܬܶܓ݂ܠܙܽܘܢ ܚܰܕ ܠܚܰܕ܆ ܐܶܠܳܐ ܐܶܡܰܬ݂ܝ ܕܰܬܪ̈ܰܝܟܽܘܢ ܬܶܫܬܘܽܘܢ ܒܰܙܒܰܢ ܕܬܶܬ݂ܥܢܽܘܢ ܠܨܰܘܡܳܐ ܘܠܰܨܠܽܘܬ݂ܳܐ. ܘܬܽܘܒ ܠܳܗ̇ ܠܰܨܒܽܘܬ݂ܳܐ ܬܶܬܦܢܽܘܢ܆ ܕܠܳܐ ܢܢܰܣܶܝܟ݂ܽܘܢ ܤܳܛܳܢܳܐ ܡܶܛܽܠ ܪܶܓܬܳܐ ܕܦܰܓ݂ܪܟܽܘܢ. ܗܳܕܶܐ ܕܶܝܢ ܐܳܡܰܪ ܐ̱ܢܳܐ ܐܰܝܟ ܕܠܰܡܚܺܝ̈ܠܶܐ ܠܰܘ ܡܶܢ ܦܽܘܩܕܳܢܳܐ. ܐܶܢܳܐ ܓܶܝܪ ܨܳܒܶܐ ܐ̱ܢܳܐ ܕܟܽܠܗܽܘܢ ܒܢܰܝ̈ܢܳܫܳܐ ܐܰܟܘܳܬ݂ܝ ܢܶܗܘܽܘܢ ܒܕܰܟ݂ܝܽܘܬ݂ܳܐ. ܐܶܠܳܐ ܟܽܠܢܳܫ ܡܰܘܗܰܒܬ݂ܳܐ ܝܗܺܝܒܳܐ ܠܶܗ ܡܶܢ ܐܰܠܳܗܳܐ. ܐܺܝܬ ܕܗܳܟ݂ܰܢܳܐ ܘܺܐܝܬ ܕܗܳܟ݂ܰܢܳܐ. ܐܳܡܰܪ ܐ̱ܢܳܐ ܕܶܝܢ ܠܰܐܝܠܶܝܢ ܕܠܰܝܬ ܠܗܽܘܢ ܢܶܫ̈ܶܐ ܘܠܰܐܪ̈ܡܠܳܬ݂ܳܐ܆ ܕܦܰܩܳܚ ܠܗܽܘܢ ܐܶܢ ܢܩܰܘܽܘܢ ܐܰܟ݂ܘܳܬ݂ܝ. ܐܶܢ ܠܳܐ ܕܶܝܢ ܡܣܰܝܒܪܺܝܢ ܢܶܙܕܰܘܓ݂ܽܘܢ. ܦܰܩܳܚ ܓܶܝܪ ܠܡܶܣܰܒ ܐܰܢ̱ܬܬ݂ܳܐ ܛܳܒ ܡܶܢ ܕܰܠܡܺܐܩܰܕ ܒܪܶܓܬ݂ܳܐ. ܠܰܐܝܠܶܝܢ ܕܶܝܢ ܕܺܐܝܬ ܠܗܽܘܢ ܢܶܫ̈ܶܐ ܡܦܰܩܶܕ ܐ̱ܢܳܐ ܠܳܐ ܐܶܢܳܐ ܐܶܠܳܐ ܡܳܪܝ. ܕܰܐܢ̱ܬܬ݂ܳܐ ܡܶܢ ܒܰܥܠܳܗ̇ ܠܳܐ ܬܶܦܪܽܘܫ. ܘܶܐܢ ܬܶܦܪܽܘܫ ܬܩܰܘܶܐ ܕܠܳܐ ܓܰܒܪܳܐ ܐܰܘ ܠܒܰܥܠܳܗ̇ ܬܪܰܥܶܐ. ܘܓܰܒܪܳܐ ܠܰܐܢ̱ܬܬ݂ܶܗ ܠܳܐ ܢܶܫܒܽܘܩ܀