ܕܚܕ ܫܒܪܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܪ̈ܽܗܘܡܳܝܶܐ
ܘ: ܐ ـ ܚ Romans 6:1-8

ܐܰܚ̈ܰܝ: ܡܳܢܳܐ ܗܳܟܺܝܠ ܢܺܐܡܰܪ. ܢܩܰܘܶܐ ܒܳܗ̇ ܒܰܚܛܺܝܬܳܐ܆ ܕܛܰܝܒܽܘܬܳܐ ܬܶܬܝܰܬܰܪܝ. ܚܳܣ. ܐܰܝܠܶܝܢ ܓܶܝܪ ܕܡܺܝܬܢ ܠܰܚܛܺܝܬܳܐ܆ ܐܰܝܟܰܢܳܐ ܢܺܚܶܐ ܒܳܗ̇ ܬܽܘܒ. ܐܰܘ ܠܳܐ ܝܳܕܥܺܝܢ ܐܰܢ̱ܬܽܘܢ ܕܰܐܝܠܶܝܢ ܕܰܥܡܰܕܢ ܒܝܶܫܽܘܥ ܡܫܺܝܚܳܐ܆ ܒܡܰܘܬܶܗܽ ܗ̱ܘ ܥܡܰܕܢ. ܐܶܬܩܒܰܪܢ ܓܶܝܪ ܥܰܡܶܗ ܒܡܰܥܡܽܘܕܺܝܬܳܐ ܠܡܰܘܬܳܐ܆ ܕܰܐܝܟܰܢܳܐ ܕܩܳܡ ܝܶܫܽܘܥ ܡܫܺܝܚܳܐ ܡܶܢ ܒܶܝܬ ܡܺܝ̈ܬܶܐ ܒܬܶܫܒܽܘܚܬܳܐ ܕܰܐܒܽܘܗ̱ܝ܆ ܗܳܟܰܢܳܐ ܐܳܦ ܚܢܰܢ ܒܚܰܝ̈ܶܐ ܚܰܕ̱̈ܬܶܐ ܢܗܰܠܶܟ. ܐܶܢ ܓܶܝܪ ܐܰܟܚܰܕ ܐܶܬܢܨܶܒܢ ܥܰܡܶܗ ܒܰܕܡܽܘܬܳܐ ܕܡܰܘܬܶܗ܆ ܗܳܟܰܢܳܐ ܐܳܦ ܒܰܩܝܳܡܬܶܗ ܢܶܗܘܶܐ. ܝܳܕܥܺܝܢܰܢ ܓܶܝܪ ܕܒܰܪܢܳܫܰܢ ܥܰܬܺܝܩܳܐ ܐܶܙܕܩܶܦ ܥܰܡܶܗ ܕܢܶܬܒܰܛܰܠ ܦܰܓܪܳܐ ܕܰܚܛܺܝܬܳܐ܆ ܕܬܽܘܒ ܠܳܐ ܢܫܰܡܶܫ ܠܰܚܛܺܝܬܳܐ. ܐܰܝܢܳܐ ܕܡܺܝܬ ܓܶܝܪ܆ ܐܶܬܚܰܪܰܪ ܠܶܗ ܡܶܢ ܚܛܺܝܬܳܐ. ܐܶܢ ܗܳܟܺܝܠ ܡܺܝܬܢ ܥܰܡ ܝܶܫܽܘܥ ܡܫܺܝܚܳܐ܆ ܢܗܰܝܡܶܢ ܕܥܰܡܶܗ ܥܰܡ ܡܫܺܝܚܳܐ ܢܺܚܶܐ܀

ܕܚܕܐ ܫܒܪܬܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܓܰ‍ܠܰܛܳܝ̈ܶܐ
ܓ: ܟܓ ـ ܟܛ Galatians 3:23-29

ܐܰܚ̈ܰܝ: ܥܰܕܠܳܐ ܕܶܝܢ ܬܺܐܬܶܐ ܗܰܝܡܳܢܽܘܬܐ܆ ܢܳܡܽܘܣܳܐ ܢܳܛܰܪ ܗ̱ܘܳܐ ܠܰܢ܆ ܟܰܕ ܚܒܺܝܫܺܝܢܰܢ ܠܗܰܝܡܳܢܽܘܬܳܐ ܕܰܥܬܺܝܕܳܐ ܗ̱ܘܳܬ ܠܡܶܬܓܠܳـܝܽܘ. ܢܳܡܽܘܣܳܐ ܗܳܟܺܝܠ ܬܳܪܐܳܐ ܗܘܳܐ ܠܰܢ ܠܘܳܬ ܡܫܺܝܚܳܐ܆ ܕܡܶܢ ܗܰܝܡܳܢܽܘܬܳܐ ܢܶܙܕܰܕܰܩ. ܟܰܕ ܐܶܬܳܬ ܕܝܶܢ ܗܰܝܡܳܢܽܘܬܳܐ܆ ܠܳܐ ܗܘܰܝܢ ܬܚܶܝܬ ܬܳܪ̈ܐܶܐ. ܟܽܠܟܽܘܢ ܓܶܝܪ ܒܢܰܝ̈ܳܐ ܐܰܢ̱ܬܽܘܢ ܕܰܐܠܳܗܳܐ ܒܗܰܝܡܳܢܽܘܬܳܐ ܕܝܶܫܽܘܥ ܡܫܺܝܚܳܐ. ܐܰܝܠܶܝܢ ܓܶܝܪ ܕܒܰܡܫܺܝܚܳܐ ܥܡܰܕܬܽܘܢ܆ ܠܰܡܫܺܝܚܳܐ ܠܒܶܫܬܽܘܢ. ܠܰܝܬ ܓܶܝܪ ܝܺܗܽܘܕܳܝܳܐ ܘܠܳܐ ܐܰܪܡܳܝܳܐ. ܠܰܝܬ ܥܰܒܕܳܐ ܘܠܳܐ ܒܰܪ ܚܺܐܪ̈ܶܐ. ܠܰܝܬ ܕܶܟܪܳܐ ܘܠܳܐ ܢܶܩܒܬܳܐ. ܟܽܠܟܽܘܢ ܓܶܝܪ ܚܰܕ ܐܰܢܬܽܘܢ ܒܝܶܫܽܘܥ ܡܫܺܝܚܳܐ. ܘܶܐܢ ܕܰܡܫܺܝܚܳܐ ܐܰܢܬܽܘܢ܆ ܡܶܟܺܝܠ ܙܰܪܥܶܗ ܐܰܢܬܽܘܢ ܕܰܐܒܪܳܗܳܡ. ܘܝܳܪ̈ܬܶܐ ܒܡܽܘܠܟܳܢܳܐ܀