ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܩܕܡܝܐ H

ܡܰܠܰܐܟܳܐ ܫܰܪܺܝܪܳܐ܆ ܫܰܕܰܪ ܡܳܪܝܳܐ ܫܰܪܺܝܪܳܐ. ܠܘܳܬ ܒܪܺܝܟܰܬ ܒܢܶܫ̈ܶܐ ܡܰܪܝܰܡ܆ ܘܰܫܠܳܡܳܐ ܫܰܪܺܝܪܳܐ. ܙܪܰܥ ܒܶܐܕܢܳܗ̇ ܫܰܪܺܝܪܳܐܺܝܬ. ܘܶܐܡܰܪ ܠܳܗ̇ ܕܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ܀

ܬܪܝܢܐ H

ܟܺܐܦܳܐ ܕܰܒܕܰܒܪܳܐ. ܗܘܳܬ ܒܺܐܪܳܐ ܟܰܕ ܠܳܐ ܢܩܺܝܪܳܐ. ܘܰܪܕܰܘ ܡܶܢܳܗ̇ ܡܰܒܽܘ̈ܥܶܐ. ܐܰܝܟ ܡܰܪܝܰܡ ܕܰܒܓܰܘ ܫܰܝܢܳܐ. ܝܶܠܕܰܬ ܠܰܡܫܺܝܚܳܐ: ܡܰܒܽܘܥܳܐ ܕܟܽܠ ܛܽܘ̈ܒܺܝܢ. ܘܶܐܫܬܺܝܘ ܡܶܢܳܗ̇ ܕܰܐܠܺܝܨܺܝܢ܀

ܬܠܝܬܝܐ H

ܣܳܗ̈ܕܶܐ ܕܣܰܝܒܰܪܬܽܘܢ. ܐܽܘܠ̈ܨܳܢܶܐ ܘܢܶܓ̈ܕܶܐ ܩܫܰܝ̈ܳܐ. ܡܶܢ ܕܰܝ̈ܳܢܶܐ ܥܰܘ̈ܳܠܶܐ. ܘܶܐܡܰܪܬܽܘܢ ܕܠܳܐ ܕܳܚܠܺܝܢܰܢ. ܡܶܢ ܢܶܓ̈ܕܶܐ. ܕܺܐܝܬܽ ܗ̱ܘ ܡܰܢ ܕܰܡܥܰܕܰܪ ܠܰܢ. ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܀

ܪܒܝܥܝܐ H

ܡܚܰܝܠܳܢܳܐ ܕܰܐܬܠܺܝ̈ܛܰܘܗ̱ܝ. ܝܶܫܽܘܥ ܦܳܪܽܘܩܳܐ ܕܟܽܠܰܢ. ܐܶܬܪܰܚܰܡ ܥܰܠ ܡܰܪܥܺܝܬܳܟ. ܘܰܛܪܽܘܕ ܡܶܢܳܗ̇ ܟܽܠ ܡܰܚ̈ܘܳܢ. ܘܣܶܕ̈ܩܶܐ ܘܚܶܪ̈ܝܳܢܶܐ ܕܥܰܘܠܳܐ. ܒܝܰܕ ܨܠܽܘܬܳܐ ܕܣܳܗ̈ܕܶܐ ܕܪܰܚܡܽܘܟ܀

ܚܡܝܫܝܐ H

ܠܰܫܡܰܝܳܐ ܐܶܢ ܐܶܣܰܩ ܠܝܰܡܳܐ ܘܝܰܒܫܳܐ ܐܶܢ ܐܶܚܽܘܬ. ܬܰܡܳܢ ܐܺܝܬܰܘܗ̱ܝ ܐܰ‌ܠܳܗܳܐ. ܣܳܗܶܕ ܝܰܘܢܳܢ ܒܰܪ ܡܰܬܰܝ. ܕܰܒܝܰܡܳܐ ܚܰܒܫܶܗ. ܘܰܒܢܽܘܢܳܐ ܨܳܕܶܗ. ܘܟܰܕ ܨܰܠܺܝ ܥܢܳܝܗ̱ܝ ܐܰ‌ܠܳܗܳܐ܀

ܫܬܝܬܝܐ H

ܚܰܘ̈ܒܰܝ ܘܰܚ̈ܛܳܗܰܝ. ܘܒܺܝ̈ܫܳܬܳܐ ܕܰܣܥܺܝܪ̈ܳܢ ܠܺܝ. ܐܶܬܕܰܟܪܶܬ ܘܰܐܚܕܰܢܝ̱ ܓܽܘܢܚܳܐ. ܐܰܢ̱ܬ ܡܳܪܝܳܐ ܕܛܳܒܺܝܢ ܪ̈ܰܚܡܰܝܟ. ܥܛܺܝ ܐܶܢܽܘܢ ܡܶܢ ܥܽܘܗܕܳܢܳܟ ܩܰܕܺܝܫܳܐ. ܘܚܰܣܳܐ ܐܶܢܽܘܢ ܒܛܰܝܒܽܘܬܳܟ܀

ܫܒܝܥܝܐ H

ܠܒܰܪ ܡܶܢ ܬܰܪܥܶܗ ܕܦܰܪܕܰܝܣܳܐ. ܢܦܰܩ ܐܳܕܳܡ ܘܝܺܬܶܒ ܒܳܟܶܐ. ܟܰܕ ܐܳܠܶܐ ܗ̱ܘܳܐ ܠܰܩܢܽܘܡܶܗ. ܘܳܝܠܺܝ ܕܰܗܘܺܝܬ ܢܽܘܟܪܳܝܳܐ. ܠܰܐܬܪܳܐ ܕܥܺܝܪ̈ܶܐ ܘܡܰܠܰܐܟ̈ܶܐ: ܡܕܰܝܪܺܝܢ ܒܶܗ. ܘܝܶܪܬܶܬ ܐܰܪܥܳܐ ܕܠܰܘ̈ܛܳܬܳܐ܀

ܬܡܝܢܝܐ H

ܒܰܣܒܰܪܬܳܟ ܦܳܪܽܘܩܰܢ. ܐܶܫܬܘܕܺܝܬ ܘܗܳܟܰܢ ܐܶܡܰܪܬ. ܕܶܐܢܳܐ ܐܺܝܬܰܝ ܢܽܘܚܳܡܳܐ. ܘܟܽܠ ܐܰܝܢܳܐ ܕܰܡܗܰܝܡܶܢ ܒܺܝ. ܠܥܳܠܰܡ ܥܳܠܡܺܝܢ ܠܳܐ ܢܶܕܚܰܠ ܡܶܢ ܡܰܘܬܳܐ. ܕܶܐܢܳܐ ܒܫܽܘܒܚܳܐ ܡܩܺܝܡ ܐ̱ܢܳܐ ܠܶܗ܀