ܩܝܢܬܐ ܓ

ܦܬܓܡܐ:

ܗܳܢܰܘ ܝܰܘܡܳܐ ܕܰܥܒܰܕ ܡܳܪܝܳܐ. ܬܰܘ ܢܕܽܘܨ ܘܢܶܚܕܶܐ ܒܶܗ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠܕܶܝ̈ܗ̇ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠܕܶܝ̈ܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܡܫܺܝܚܳܐ ܢܰܛܰܪܝܗ̇

ܥܰܠ ܛܽܘܪ̈ܶܐ ܪ̈ܳܡܶܐ ܣܰܩܝ̱ ܠܶܟܝ̱: ܥܺܕܬܳܐ ܘܰܙܡܰܪܝ ܬܶܫܒܽܘܚܬܳܐ: ܠܰܐܠܳܗܳܐ ܕܩܳܡ ܡܶܢ ܩܰܒܪܳܐ: ܘܚܰܕܺܝ ܠܰܐܪܥܳܐ ܘܠܰܫܡܰܝܳܐ. ܣܳܗܶܕ ܕܰܘܺܝܕ ܒܰܪ ܐܺܝ̣ܫܰܝ. ܕܒܰܙܡܺܝܪ̈ܳܬܶܗ ܣܰܒܪܶܟܝ̱ ܟܰܕ ܐܳܡܰܪ: ܕܶܐܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ: ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ. ܫܽܘܒܚܳܐ ܠܡܽܘܟܳܟܶܗ. ܕܰܛܥܶܡ ܡܰܘܬܳܐ ܒܨܶܒܝܳܢܶܗ. ܘܰܐܟܪܶܙ ܚܰܝ̈ܶܐ ܠܡܳܝܽܘ̈ܬܶܐ. ܘܩܳܡ ܒܬܶܫܒܽܘܚܬܳܐ ܘܰܐܩܺܝܡ ܠܰܢ ܡܶܢ ܡܰܦܽܘܠܬܳܐ܀

ܠܘܛܢܝܐ ܒܩ̄:

ܗܳܐ ܢܺܝ̈ܫܶܐ ܕܰܩܝܳܡܬܳܐ ܬܠܶܝܢ: ܘܰܐܪܥܳܐ ܢܰܗܺܝܪܳܐ. ܘܟܽܠ ܣܰܘܦܺܝ̈ܢ ܣܰܒܪ̈ܳܬܳܐ ܡܠܶܝܢ: ܕܩܳܡ ܚܰܝܳܐ ܩܒܺܝܪܳܐ. ܐܶܬܬܥܺܝܪ ܐܰܝܟ ܓܰܒܪܳܐ ܕܢܰܦܨܶܗ ܚܰܡܪܶܗ. ܘܰܥܛܺܝܦ ܬܳܓܳܐ ܕܢܶܨܚܳܢܳܐ܀

ܠܒܶܝܬ ܡܺܝ̈ܬܶܐ ܢܚܶܬ ܒܰܪ ܚܰܝܳܐ: ܘܢܳܕܘ ܫܽܘܪ̈ܶܐ ܕܗܰܘܬܳܐ. ܘܰܐܥܕܺܝ ܠܟܶܢ̈ܫܶܐ ܕܰܫܒܰܝ̈ܳܐ: ܡܶܢ ܐܺܝ̣̈ܕܰܝ ܡܰܘܬܳܐ. ܘܩܳܡ ܘܰܐܩܺܝܡ ܥܰܡܶܗ ܠܓܶܢܣܶܗ ܕܳܐܕܳܡ: ܡܶܢ ܚܽܘܒܳܠܳܐ ܕܰܐܒܕܳܢܳܐ܀

ܐ̱ܚܪܺܢܳܐ ܠܘܛܢܝܐ ܙ : ܙ ܒܩ̄: ܢܶܩܝܳܐ ܗܘܺܝܬ

ܒܚܰܕ ܒܫܰܒܳܐ ܐܶܬܬܥܺܝܪ ܡܳܪܝܳܐ: ܐܰܝܟ ܕܰܡܟܳܐ ܡܶܢ ܓܰܘ ܩܰܒܪܳܐ. ܘܚܰܕܺܝ ܠܰܐܪܥܳܐ ܘܠܰܫܡܰܝܳܐ: ܒܝܰܘܡܳܐ ܪܰܒܳܐ ܕܢܽܘܚܳܡܶܗ܀

ܕܽܘܨܝ ܘܰܚܕܳܝ ܥܺܕܰܬ ܩܽܘܕܫܳܐ: ܒܰܩܝܳܡܬܶܗ ܕܺܝܚܺܝܕܳܝܳܐ. ܕܰܢܚܶܬ ܘܰܦܪܰܩ ܒܶܪ̈ܝܳܬܳܐ: ܘܶܐܬ̣ܥܰܠܺܝ ܠܳܘܬ ܫܳܠܽܘܚܶܗ܀

ܝܰܘܡܳܢ ܚܳܕ̈ܝܳܢ ܒܶܪ̈ܝܳܬܳܐ: ܘܪ̈ܳܘܙܳܢ ܘܕܳܝ̈ܨܳܢ ܘܰܦܨܺܝ̈ܚܳܢ. ܕܶܐܬ̣ܢܰܚܰܡ ܘܩܳܡ ܡܶܢ ܩܰܒܪܳܐ: ܒܰܪ ܐܰܠܳܗܳܐ ܒܬܶܫܒܽܘܚܬܳܐ܀

ܫܽܘܒܚܳܐ ܠܰܐܒܳܐ ܩܰܕܺܝܫܳܐ: ܕܫܰܕܰܪ ܠܰܒܪܶܗ ܩܰܕܺܝܫܳܐ. ܘܰܛܥܶܡ ܡܰܘܬܳܐ ܒܨܶܒܝܳܢܶܗ: ܘܰܐܩܺܝܡ ܠܰܢ ܡܶܢ ܡܰܦܽܘܠܬܰܢ܀

ܚܘܬܡܐ ܒܩ̄: ܗܰܒܠܰܢ ܡܳܪܰܢ

ܣܒܰܪܬ̣ܳܐ ܥܠܰܝܟܽܘܢ ܫܟ̣ܺܝ̈ܒܰܝ ܗܳܡܳܢ: ܕܗܳܐ ܓܰܢ̱ܒܳܪ ܥܳܠܡ̈ܶܐ ܢܚܶܬ̣ ܨܶܐܕܰܝܟܽܘܢ. ܡܢܰܦܶܨ ܚܶܠܳܐ ܡܶܢ ܐܰܦܰܝ̈ܟܽܘܢ: ܘܰܡܩܺܝܡ ܠܟ̣ܽܘܢ ܥܰܡܶܗ ܒܫܽܘܒܚܳܐ ܪܰܒܳܐ܀