ܒܝܽܘܡ ܫܰܒܬܳܐ ܕܫܳܒܽܘܥܳܐ ܩܰܕܡܳܝܳܐ ܕܨܰܘܡܳܐ ܪܰܒܳܐ

ܩܝܢܬܐ ܚ

ܦܬܓܡܐ:

ܦܽܘܡܝ̱ ܢܣܰܒܰܪ ܙܰܕܺܝܩܽܘܬܳܟ. ܘܟܽܠܶܗ ܝܰܘܡܳܐ ܪܰܒܽܘܬܳܟ ܗ̄܀

ܬܒܪܬ‌ܐ:

ܨܠܽܘܬܳܟ ܥܰܡܰܢ ܡܰܠܦܳܢ ܩܽܘܫܬܳܐ ܨܠܽܘܬܳܟ ܥܰܡܰܢ: ܠܰܨܠܰܘ̈ܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܒܰܨܠܰܘ̈ܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܳܐ ܕܪܽܘܓܙܳܐ: ܡܶܢܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀

ܒܬܪ ܐܘܢܓܠܝܘܢ ܒܩ̄: ܒܟܽܠܡܶܕܶܡ ܐܶܬܒܰܩܺܝܬ - H

ܐܶܢܳܐ ܐܰܦܪܶܝܡ ܡܳܐܶܬ ܐ̱ܢܳܐ܇ ܘܕܺܝܰܬܺܝܩܺܝ ܟܳܬ̣ܶܒ ܐ̱ܢܳܐ ܕܬܶܗܘܶܐ ܣܳܗܕܽܘܬ̣ܳܐ܇ ܠܬܰܠܡܺܝ̈ܕܶܐ ܕܒܳܬ̣ܰܪܝ̱. ܗܘܰܘ ܐܰܡܺܝܢܺܝܢ ܒܰܨܠܽܘܬ̣ܳܐ܇ ܐܺܝܡܳܡܳܐ ܘܠܺܠܝܳܐ. ܕܰܐܟܳܪܳܐ ܕܟܳܪܶܒ ܘܬܳܢܶܐ܇ ܫܳܦܪ̈ܳܢ ܥܰܠܳܠ̈ـܬܶܗ. ܠܳܐ ܬܶܗܘܽܘܢ ܐܰܝܟ ܡܰܐܺܝ̈ܢܶܐ܇ ܕܡܰܘ̈ܥܝܳܢ ܟܽܘ̈ܒܶܐ ܚܰܩ̈ܠܳܬ̣ܗܽܘܢ. ܗܘܰܘ ܐܰܡܺܝܢܺܝܢ ܒܰܨܠܽܘܬ̣ܳܐ. ܕܰܐܝܢܳܐ ܕܡܰܚܶܒ ܠܳܗ̇ ܣܰܓܺܝ. ܡܶܢܳܗ̇ ܡܶܬ̣ܥܰܕܰܪ܇ ܒܰܬܪ̈ܰܝܗܽܘܢ ܥܳܠ̈ܡܶܐ܀

ܒܬܪ ܐܘܢܓܠܝܘܢ ܐܚܪܢܐ ܒܩ̄: ܡܫܺܝܚܳܐ ܢܰܛܰܪܝܗ̇ - H

ܟܶܢܳܪܳܐ ܐܰܠܳܗܳܝܳܐ: ܕܡܶܢܰܘ̈ܗܝ ܚܺܝ̈ܨܳܢ ܠܰܡܫܺܝܚܳܐ. ܡܠܰܚܶܡ ܪ̈ܶܟܢܶܐ ܕܰܫܪܳܪܳܐ: ܢܩܺܝ̈ܫܰܝ ܨܶܒ̈ܥܳܬ ܪܽܘܚܩܽܘܕܫܳܐ. ܕܰܐܟܪܶܙ ܚܰܕ ܗܽܘ ܐܰܠܳܗܳܐ. ܘܙܰܝܶܦ ܠܒܶܕ̈ܝܶܐ ܫܟܺܝܪ̈ܶܐ ܕܛܳܥܰܝ̈ܳܐ: ܘܡܶܢ ܢܶܒܥܳܐ ܒܪܺܝܟܳܐ ܕܚܰܝ̈ܶܐ: ܐܰܪܘܺܝ ܠܥܳܢ̈ܶܗ ܕܰܡܫܺܝܚܳܐ: ܘܢܰܓܕܳܗ̇ ܡܶܢ ܬܰܘܫܳܐ ܠܥܽܘܒܳܐ ܕܰܬܪܝܺܨܰܬ ܫܽܘܒܚܳܐ. ܘܗܳܐ ܡܫܰܒܚܳܐ ܒܦܽܘܡܳܐ ܕܝܰܠ̈ܕܶܝܗ̇. ܠܝܶܫܽܘܥ ܪܰܒܶܗ. ܕܚܰܘܺܝ ܒܶܗ ܚܰܝܠܶܗ ܬܡܺܝܗܳܐ܀

ܠܘܛܢܝܐ: - H

ܟܶܦܢܶܬ ܟܡܳܐ ܙܰܒܢܺܝ̈ܢ: ܕܰܟܝܳܢܝ̱ ܬܳܒܰܥ ܗܘܳܐ. ܘܶܐܬܟܠܺܝܬ ܘܠܳܐ ܐܶܟܠܶܬ: ܕܶܐܫܬܘܶܐ ܠܗܰܘ ܛܽܘܒܳܐ. ܕܰܢܛܺܝ̣ܪ ܠܨܰܝ̈ܳܡܶܐ܀

ܡܰܝ̈ܳܐ ܠܫܳܩܽܘܬܳܐ: ܬܰܒܥܰܢܝ̱ ܟܝܳܢܝ̱ ܛܺܝܢܳܐ. ܘܰܐܪܦܺܝܬܶܗ ܕܢܺܐܒܰܫ: ܕܢܺܐܙܰܠ ܢܶܬܦܰܪܦܰܥ. ܒܛܰܠܶܗ ܕܦܰܪܕܰܝܣܳܐ܀

ܡܰܕܒܚܳܐ ܗܘܳܐ ܪܶܥܝܳܢܝ̱: ܘܟܳܗܢܳܐ ܗܘܳܐ ܨܶܒܝܳܢܝ̱. ܘܰܐܝܟ ܐܶܡܰܪ ܕܰܟܝܳܐ. ܕܶܒܚܶܬ ܐܶܢܳܐ ܠܰܩܢܽܘܡܝ̱. ܘܩܰܪܒܶܬ ܩܽܘܪܒܳܢܳܐ܀

ܢܽܘܪܳܐ ܕܫܰܪܝܳܐ ܗܘܳܬ: ܐܰܚܰܝ̣ ܒܗܰܕܳܡܰܝ̈. ܒܰܕܡܶܗ ܕܰܐܠܳܗܳܐ: ܕܰܥܟܶܬ ܓܰܘܙܰܠܬܳܗ̇. ܕܠܳܐ ܬܰܘܩܶܕ ܠܰܩܢܽܘܡܝ̱܀

ܡܶܢ ܛܰܠܝܽܘܬܝ̱ ܠܣܰܝܒܽܘܬܝ̱. ܢܺܝܪܳܟ ܫܶܩܠܶܬ ܡܳܪܝ. ܘܦܶܠܚܶܬ ܕܠܳܐ ܩܽܘܛܳܥ. ܟܽܠ ܝܽܘܡ ܚܳܕܝܳܐܺܝܬ. ܥܕܰܡܳܐ ܠܫܽܘܠܳܡܳܐ܀

ܚܘܬܡܐ ܒܩ̄: ܐܶܬܩܰܛܰܠܘ ܗܘܘ ܝܰܠܽܘ̈ܕܶܐ - H

ܟܰܕ ܐܺܝܬܰܝ ܗܘܺܝܬ ܝܰܠܽܘܕܳܐ. ܘܡܶܬܕܰܒܰܪ ܗܘܺܝܬ ܐܰܝܟ ܫܰܒܪܳܐ. ܐܰܝܟ ܕܰܒܚܶܠܡܳܐ ܚܳܙܶܐ ܗܘܺܝܬ. ܓܦܶܬܳܐ ܕܺܝܥܳܬ ܠܺܝ ܒܠܶܫܳܢܝ̱. ܕܺܐܝ̣ܬ ܗܘܳܐ ܒܳܗ̇ ܪ̈ܶܒܽܘ ܣܓܽܘܠܺܝ̈ܢ. ܘܪ̈ܶܒܽܘ ܪ̈ܶܒܘܳܢ ܛܽܘܛܝ̈ܳܬܳܐ. ܣܓܽܘ̈ܠܶܐ ܐܺܝܬܰܝܗܽܘܢ ܡܺܐܡܪ̈ܶܐ. ܘܪ̈ܶܒܽܘ ܛܽܘ̈ܛܝܺܢ ܡܰܕܪ̈ܳܫܶܐ. ܒܪܺܝܟ ܢܳܨܽܘܒܳܗ̇ ܕܰܓܦܶܬܳܐ. ܕܰܐܣܓܺܝ̣ ܣܓܽܘܠܶܝ̈ܗ̇ ܘܛܽܘܛܝ̈ܳܬܳܗ̇܀

ܚܘܬܡܐ ܐܚܪܢܐ ܒܩ̄: ܝܰܘܢܳܐ ܛܠܺܝܬܳܐ - H

ܐܰܒܽܘܒܳܐ ܕܡܶܠܰܬ ܚܰܝ̈ܶܐ. ܘܰܣܢܺܐܓܪܳܐ ܕܗܰܝܡܳܢܽܘܬܳܐ. ܡܙܰܝܶܦ ܪ̈ܽܘܫܥܶܐ ܕܛܳܥܝܽܘܬܳܐ. ܣܳܚܶܦ ܓܰܒܳܐ ܕܒܰܪܕܰܝܨܳܢ. ܫܺܝܦܽܘܪ ܐܰܪܡܽܘܢܝܰܐ: ܡܗܰܕܶܐ ܥܠܰܝܡܽܘܬܳܐ: ܠܰܬܪܺܝܨܽܘܬ ܫܽܘܒܚܳܐ: ܡܢܰܨܚܳܢ ܒܰܪܬ ܥܰܡ̱̈ܡܶܐ. ܒܺܝܕܰܥܬܳܐ ܕܩܽܘܫܬܳܐ ܢܦܺܝܚܰܬ ܪܽܘܚܩܽܘܕܫܳܐ. ܗܳܐ ܒܰܪܬ ܐܰܪ̈ܡܳܝܶܐ ܒܺܐܝܩܳܪܳܐ ܡܙܰܝܚܳܐ: ܝܰܘܡܳܐ ܕܕܽܘܟܪܳܢܳܟ܀

ܚܘܬܡܐ ܐܚܪܢܐ ܒܩ̄: ܗܰܒܠܰܢ ܡܳܪܰܢ - H

ܝܽܘܡ ܕܽܘܟܪܳܢܳܟ ܗܳܐ ܡܶܬܢܰܨܰܚ܇ ܡܳܪܝ ܬܶܐܘܳܕܳܪܳܘܣ ܪܳܚܡܶܗ ܕܝܶܫܽܘܥ: ܚܠܳܦ ܕܰܫܦܰܪܬ ܠܶܗ ܒܥܰܡܠܰܝ̈ܟ ܛܳܒ̈ܶܐ܇ ܗܳܐ ܢܛܺܝܪ ܦܽܘܪܥܳܢܳܟ ܒܰܐܘܳܢ ܚܰܝ̈ܶܐ܀