ܩܝܢܬܐ ܚ

ܦܬܓܡܐ:

ܡܶܛܽܠ ܕܠܳܐ ܫܒܰܩܬ ܠܢܰܦܫܝ ܒܰܫܝܽܘܠ: ܘܠܳܐ ܝܰܗܒܬ ܠܚܰܣܝܳܟ ܕܢܶܚܙܶܐ ܚܒܳܠܳܐ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ - H

ܛܽܘܒܰܝܟܝ ܥܺܕ̱ܬܳܐ: ܕܩܳܠܶܗ ܕܰܒܪܳܐ ܪܳܥܶܡ ܒܶܟ̣ܝ̱: ܘܠܳܐ ܡܶܬܬܙܺܝ̈ܥܳܢ ܫܶܬܶܐܣܰܝ̈ܟܝ̱: ܕܡܳܪܝܳܐ ܥܒܺܝܕ ܠܶܟܝ̱ ܢܳܛܽܘܪܳܐ: ܕܟܺܐܦܳܐ ܕܰܐܣܠܺܝܘ ܒܰܢܳܝ̈ܶܐ: ܗܺܝ ܗܘܳܬ̣݀ ܠܪܺܝܫܶܗ ܕܒܶܢܝܳܢܳܐ: ܒܪܺܝܟ̣ ܕܰܕܒܰܚ ܢܰܦܫܶܗ ܚܠܳܦܰܝܟܝ̱: ܘܦܰܓ̣ܪܶܗ ܝܰܗ̱ܒ ܠܶܟ̣ܝ̱ ܡܶܐܟ̣ܽܘܠܬܳܐ: ܘܰܕܡܶܗ ܟܳܣܳܐ ܕܦܽܘܪܩܳܢܳܐ: ܚܽܘܣܳܝܳܐ ܠܶܟ̣ܝ̱ ܘܰܠܝܰܠܕܰܝ̈ܟܝ̱܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ - H

ܒܚܰܕ ܒܫܰܒܳܐ ܐܰܙܠܶܓ ܢܽܘܗܪܳܐ ܥܰܠ ܥܰܢܺܝ̈ܕܶܐ: ܕܰܩܪܳܐ ܚܰܝܳܐ ܒܶܝܬ ܡܺܝܬܶܐ ܚܺܐܪܽܘܬܳܐ ܠܟܽܠܗܽܘܢ. ܣܰܥܪܶܗ ܠܳܐܕܳܡ ܘܕܰܒܪܶܗ ܘܰܐܩܺܝܡܶܗ: ܘܝܰܗܒ ܪܰܗܒܽܘܢܳܐ ܠܟܽܠܗܽܘܢ ܡܳܝܽܘ̈ܬܶܐ. ܕܰܥܬܺܝܕ ܕܢܺܐܬܶܐ ܒܬܶܫܒܽܘܚܬܳܐ: ܒܝܰܘܡܳܐ ܕܰܩܝܳܡܬܳܐ. ܘܰܕܠܳܐ ܚܒܳܠܳܐ ܢܶܬܢܰܚܡܽܘܢ ܘܢܶܦܩܽܘܢ ܡܶܢ ܩܰܒܪܳܐ ܗ̄ܘܗ̄܀

ܠܘܛܢܝܐ ܒܩ̄: ܝܒ:ܝܒ ܐܳܘ ܚܰܟܺܝܡܳܐ - H

ܡܰܢ ܒܳܨܶܐ ܠܳܟ ܡܺܝܬ̣ܳܐ ܕܢܳܒܥܝܺܢ ܚܰܝ̈ܶܐ ܡܶܢܶܗ: ܡܰܢ ܕܳܪܶܫ ܠܳܟ ܚܰܝܳܐ ܕܰܙܩܺܝܦ ܥܰܪܛܶܠܳܐܺܝܬ̣܀

ܬܠܶܝܬ ܥܰܠ ܩܰܝܣܳܐ ܘܙܳܝܥܳܐ ܘܪܳܥܠܳܐ ܒܪܺܝܬ̣ܳܐ ܡܶܢܳܟ: ܡܺܝܬ̣ܬ ܡܶܢ ܟܰܕܽܘ ܘܰܐܥܺܝܪ ܩܳܠܳܟ ܡܺܝ̈ܬ̣ܶܐ ܕܰܫܝܽܘܠ܀

ܒܰܕܡܳܐ ܘܡܰܝ̈ܳܐ ܕܰܪܕܰܘ ܡܶܢܳܟ ܥܰܠ ܓܳܓ̣ܽܘܠܬܳܐ: ܝܶܠܦܰܬ̣݀ ܐܰܪܥܳܐ ܕܳܐܦ ܚܰܝܳܐ ܐܰܢ̱ܬ ܐܳܦ ܡܺܝܬ̣ܳܐ ܐܰܢ̱ܬ܀

ܕܰܗܘܰܝܬ ܡܺܝܬ̣ܳܐ ܣܳܗܕܺܝܢ ܡܰܝ̈ܳܐ ܕܰܢܦܰܩܘ̱ ܡܶܢܳܟ: ܘܰܕܚܰܝܳܐ ܐܰܢ̱ܬ ܕܡܳܟ ܗܳܐ ܒܰܐܪܥܳܐ ܟܽܠܳܗ̇ ܐܺܝܬ̣ܰܘܗ̱ܝ܀

ܐܶܩܪܶܝܟ ܡܺܝܬ̣ܳܐ ܚܰܝ ܐܰܢ̱ܬܽ ܗ̱ܘ ܡܳܪܝ ܥܰܠ ܝܳܠܽܘܕܳܟ: ܚܰܝܳܐ ܐܺܡܪܳܟ ܗܳܐ ܙܩܺܝܦ ܐܰܢ̱ܬܽ ܗ̱ܘ ܥܰܠ ܓܳܓ̣ܽܘܠܬܳܐ܀

ܫܰܪܺܝܪ ܡܰܘܬܳܟ ܘܰܕܚܰܝܳܐ ܐܰܢ̱ܬ ܟܽܠ ܣܳܗܶܕ ܠܳܟ̣: ܘܒܳܬ̣ܰܪ ܗܳܠܶܝܢ ܐܰܝܢܳܐ ܕܒܳܨܶܐ ܬܒܳܪܳܐ ܡܶܫܟܰܚ܀

ܚܘܬܡܐ ܒܩ̄: ܐܳܕܳܡ ܚܛܳܐ ܘܰܩܢܳܐ - H

ܒܪܺܝܟ ܚܰܝܳܐ ܕܰܐܚܺܝ ܡܺܝܬ̣ܽܘܬ̣ܰܢ: ܒܪܺܝܟ ܥܺܝܪܳܐ ܕܰܐܥܺܝܪ ܕܰܡܟ̣ܽܘܬ̣ܰܢ: ܒܪܺܝܟ ܗ̱ܘ ܒܰܪ ܛܳܒܳܐ ܕܰܦܪܰܩ ܠܰܢ: ܡܶܢ ܐܺܝܕܰܝ̈ ܡܰܘܬܳܐ ܘܣܳܛܳܢܳܐ: ܘܰܐܩܺܝܡ ܠܰܢ ܥܰܡܶܗ ܒܰܩܝܳܡܬܶܗ܀