ܩܝܢܬܐ ܘ

ܦܬܓܡܐ:

ܡܶܟܺܝܠ ܐܶܩܽܘܡ ܐܳܡܰܪ ܡܳܪܝܳܐ: ܘܶܥܒܶܕ ܦܽܘܪܩܳܢܳܐ ܓܰܠܝܳܐܺܝܬ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ - H

ܗܰܘ ܢܽܘܗܪܳܐ ܫܰܦܝܳܐ ܘܫܰܪܺܝܪܳܐ: ܕܡܶܢ ܐܰܒܳܐ ܕܢܽܘܗܪ̈ܶܐ ܕܢܰܚ ܠܰܢ. ܘܰܩܦܰܠ ܠܚܶܫܟܳܐ ܡܶܢ ܐܰܪܥܳܐ: ܘܰܐܨܡܰܚ ܒܳܗ̇ ܚܰܝ̈ܶܐ ܘܢܽܘܗܪܳܐ. ܐܰܕܢܰܚ ܢܽܘܗܪܳܐ ܕܦܽܘܩܕܳܢܰܝ̈ܟ: ܒܠܶܒܰܘ̈ܳܬܳܐ ܕܣܳܓܽܘ̈ܕܰܝܟ: ܘܗܰܒ ܠܰܢ ܕܢܶܫܦܰܪ ܠܺܐܝܩܳܪܳܟ. ܘܢܶܗܘܶܐ ܐܰܚ̈ܶܐ ܠܪܰܒܽܘܬܳܟ: ܘܝܳܪ̈ܽܘܬܶܐ ܕܡܰܠܟܽܘܬ ܪܰܘܡܳܐ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ - H

ܢܶܚܕܽܘܢ ܝܰܘܡܳܢ: ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ. ܘܢܶܒܗܰܬ ܥܰܡܳܐ ܟܳܦܽܘܪܳܐ: ܕܰܒܩܰܝܣܳܐ ܬܠܳܐ ܠܰܐܠܳܗܳܐ. ܘܰܒܬܶܫܒܽܘܚܬܳܐ ܐܶܬܢܰܚܰܡ: ܘܶܐܬܥܰܠܺܝ ܡܶܢ ܓܰܘ ܩܰܒܪܳܐ. ܘܰܚܪܰܪ ܠܳܐܕܳܡ ܘܰܠܝܰܠ̈ܕܰܘܗܝ ܡܶܢ ܐܺܝ̈ܕܰܝ ܡܰܘܬܳܐ ܝܰܥܢܳܐ. ܘܰܐܦܨܰܚ ܐܶܢܽܘܢ ܠܰܫܠܺܝ̈ܚܰܘܗܝ: ܕܰܐܒܺܝܠܺܝܢ ܗܘܰܘ ܥܰܠ ܡܰܘܬܶܗ܀

ܠܘܛܢܝܐ ܒܩ̄: ܚ : ܗ ܠܢܣܒܚ ܘܢܡܓܕ - H

ܢܫܰܒܰܚ ܘܢܰܘܕܶܐ ܠܰܡ ܘܰܢܗܰܕܰܪ: ܠܝܶܫܽܘܥ ܦܳܪܽܘܩܰܢ. ܘܰܢܪܰܡܪܶܡ ܘܢܶܣܓܽܘܕ ܘܰܢܫܰܕܰܪ: ܬܶܫܒ̈ܚܳܢ ܠܶܗ ܠܒܳܪܝܰܢ܀

ܗܳܐ ܡܶܛܽܠ ܒܰܪܢܳܫܳܐ ܣܺܝܡ ܗܽܘ: ܥܠܰܘܗܝ ܥܰܠ ܡܰܕܒܚܳܐ. ܘܰܐܝܢܳܐ ܕܡܶܬܩܰܪܰܒ ܠܶܗ ܢܳܣܶܒ: ܛܰܝܒܽܘ ܕܫܽܘܒܩܳܢܳܐ܀

ܬܰܘܽܘܢ ܟܽܠܟܽܘܢ ܐܰܚܰܝ̈ ܦܽܘܠܚܽܘܗܝ: ܒܪܽܘܚܳܐ ܘܰܒܠܶܒܳܐ. ܣܰܒܽܘܢܳܝܗܝ ܕܶܝܢ ܘܰܛܥܰܡܽܘܢܳܝܗܝ: ܟܡܳܐ ܚܠܶܐ ܠܚܰܒܺܝܒܳܐ܀

ܚܘܬܡܐ ܒܩ̄: ܗܰܒܠܰܢ ܡܳܪܰܢ ܕܰܒܢܽܘܚܳܡܳܐ - H

ܗܰܒܠܰܢ ܡܳܪܰܢ ܒܝܽܘܡ ܢܽܘܚܳܡܳܟ: ܫܰܝܢܳܐ ܠܥܺܕ̈ܳܬܰܢ ܘܰܠܕܰܝܪ̈ܳܬܰܢ. ܘܢܶܣܓܶܐ ܚܢܳܢܳܐ ܕܒܰܣܺܝܡܽܘܬܳܟ: ܨܶܝܕ ܥܰܒܕܰܝ̈ܟ ܡܚܺܝ̈ܠܶܐ ܦܪ̈ܺܝܩܰܝ ܒܰܕܡܳܟ܀