ܕܝܳܠܕܰܬ ܐܰܠܳܗܳܐ:

ܡܰܢܽܘ ܣܳܦܶܩ ܕܰܢܩܰܠܶܣ. ܠܥܰܕܥܺܐܕܰܝ̈ܟܝ̱ ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ. ܘܡܰܢܽܘ ܡܶܫܟܰܚ ܕܰܢܡܰܠܶܠ ܥܰܠ ܒܰܛܢܶܟܝ̱. ܥܰܠ ܝܰܠܕܶܟܝ̱ ܕܰܗܘܳܐ ܕܽܘܡܳܪܳܐ. ܒܬܽܘܠܬܳܐ ܕܟܺܝܬܳܐ ܘܩܰܕܺܝܫܬܳܐ. ܕܰܫܪܳܬ ܒܳܗ̇ ܢܽܘܪܳܐ ܚܰܝܬܳܐ ܒܟܰܪܣܳܐ ܕܒܶܣܪܳܐ ܘܡܶܢܳܗ̇ ܠܳܐ ܝܺܩܶܕܬܝ̱. ܐܰܦܺܝܣܝ̱ ܚܠܳܦ ܟܽܠܰܢ ܕܒܰܨ̈ܠܰܘܳܬܶܟܝ̱ ܘܰܒܒܳܥ̈ܘܳܬܶܟܝ̱ ܢܶܬܦܰܪ̈ܩܳܢ ܡܶܢ ܪܽܘܓܙܳܐ ܢܰܦ̈ܫܳܬܳܐ ܕܟܽܠܰܢ܀

ܕܩܰܕܺܝ̈ܫܶܐ ܒܗ:

ܠܰܚܠܽܘܠܳܐ ܕܢܶܨܚܳܢܰܝ̈ܟܽܘܢ ܐܶܬܘܰܥܰܕܢܰܢ ܘܶܐܬܰܝܢܰܢ. ܕܰܢܩܰܒܶܠ ܡܶܢ ܓܰܪ̈ܡܰܝܟܽܘܢ ܥܽܘܕܪܳܢܳܐ ܘܟܽܠ ܐܳܣ̈ܘܳܬܳܐ. ܫܠܳܡ ܠܟܽܘܢ ܢܒܺܝ̈ܶܐ ܘܰܫܠܺܝ̈ܚܶܐ ܐܰܪ̈ܕܺܝܟܠܶܐ ܕܗܰܝܡܳܢܽܘܬܳܐ. ܫܠܳܡ ܠܟܽܘܢ. ܚܶܣ̈ܢܶܐ ܚܰܣܺܝ̈ܢܶܐ ܕܢܰܦ̈ܫܳܬܰܢ ܒܟܽܘܢ ܐܶܬܚܣܶܢ̈ܝ̱. ܫܠܳܡ ܠܟܽܘܢ ܥܰܡܽܘ̈ܕܶܐ ܗܕܺܝܪ̈ܶܐ ܕܣܰܡܟܽܘܗ̇ ܠܰܐܪܥܳܐ ܕܠܳܐ ܬܶܦܶܠܝ̱ ܡܶܛܽܠ ܥܰܘܠܳܐ ܕܥܳܡܽܘܪ̈ܶܝܗ̇. ܘܗܳܐ ܥܺܕܰܬ ܩܽܘܕܫܳܐ ܘܝܰܠܕܶܝ̈ܗ̇. ܡܙܰܝܚܳܐ ܠܝܰܘܡܳܐ ܕܥܺܐܕܰܝ̈ܟܽܘܢ ܕܒܰܨ̈ܠܰܘܳܬܟܽܘܢ ܢܶܬܦܰܪ̈ܩܳܢ ܡܶܢ ܪܽܘܓܙܳܐ ܢܰܦ̈ܫܳܬܳܐ ܕܟܽܠܰܢ܀

ܕܰܬܝܳܒܽܘܬܳܐ:

ܫܰܓܫܽܘܢܝ̱ ܘܕܰܠܚܽܘܢܝ̱ ܚܽܘ̈ܫܳܒܰܝ ܘܦܶܣܩܶܬ ܣܰܒܪܳܐ ܥܰܠ ܚܰܝܰܝ̈. ܕܰܣܓܺܝܘ ܚܰܘ̈ܒܰܝ ܐܰܝܟ ܝܰܡܳܐ. ܘܛܳܒ ܡܶܢ ܓܰܠܠܰܘ̈ܗܝ ܒܽܘܨܳܪ̈ܰܝ. ܘܒܰܕܓܽܘܢ ܫܶܡܥܶܬ ܠܛܰܝܒܽܘܬܳܟ ܕܩܳܪܝܳܐ ܘܳܐܡܪܳܐ ܠܚܰܛܳܝ̈ܶܐ. ܕܰܩܪܰܘ ܘܶܐܢܳܐ ܥܳܢܶܐ ܐ̱ܢܳܐ ܘܩܽܘܫܽܘܢ ܘܶܐܢܳܐ ܦܳܬܰܚ ܐ̱ܢܳܐ. ܐܰܝܟ ܚܰܛܳܝܬܳܐ ܓܳܥܶܐ ܐ̱ܢܳܐ ܘܰܐܝܟ ܡܳܟܣܳܐ ܡܶܬܟܰܫܰܦ ܐ̱ܢܳܐ. ܘܰܐܝܟ ܗܰܘ ܒܪܳܐ ܕܦܰܪܰܚ ܢܶܟܣܰܘ̈ܗܝ. ܚܛܺܝܬ ܒܰܫܡܰܝܳܐ ܘܰܩܕܳܡܰܝܟ. ܠܰܝܬ ܡܳܪܝ ܥܰܒܕܳܐ ܕܠܳܐ ܚܳܛܶܐ. ܐܳܦܠܳܐ ܡܳܪܳܐ ܛܳܒܳܐ ܕܠܳܐ ܫܳܒܶܩ. ܘܶܐܢܳܐ ܕܰܚܛܺܝܬ ܘܰܐܪܓܶܙܬܳܟ. ܚܽܘܣ ܥܠܰܝ ܦܳܪܽܘܩܝ̱ ܒܪ̈ܰܚܡܰܝܟ ܘܶܐܬܪܰܚܰܡܥܠܰܝ܀

ܕܥܰܢܺܝ̈ܕܶܐ:

ܛܰܥܡܶܗ ܕܗܳܒܶܝܠ. ܛܳܒ ܡܶܢ ܕܶܒܫܳܐ ܒܣܶܡ ܠܺܝ. ܘܛܰܥܡܶܗ ܕܝܶܫܽܘܥ ܣܰܓܺܝ ܡܰܪܺܝܪ. ܕܳܐܦ ܟܰܕ ܚܰܝ ܗܘܳܐ. ܡܺܝ̈ܬܶܐ ܬܠܳܬܳܐ ܚܛܰܦ ܡܶܢܝ. ܘܗܳܫܳܐ ܕܡܺܝܬ ܠܶܗ ܠܟܶܢ̈ܫܶܐ ܐܰܩܺܝܡ. ܡܰܢ ܡܶܢ ܡܺܝ̈ܬܶܐ ܐܰܙܺܝܥ ܠܰܫܝܽܘܠ. ܒܟܽܠܗܽܘܢ ܕܳܪ̈ܶܐ. ܕܗܳܐ ܚܳܙܶܐ ܐ̱ܢܳܐ. ܘܡܺܝ̈ܬܶܐ ܕܢܳܦܩܺܝܢ ܠܽܐܘܪܥܶܗ ܘܫܽܘ̈ܥܶܐ ܕܡܶܨܛܰܪܺܝܢ . ܘܩܰܒܪ̈ܶܐ ܕܡܶܬܦܰܬܚܺܝܢ. ܘܡܺܝ̈ܬܶܐ ܕܩܳܝܡܺܝܢ. ܘܳܝ ܠܳܟ ܕܳܘܝܳܐ ܕܠܳܐ ܝܳܕܰܥ ܐܰܢ̱ܬ ܕܳܐܦ ܠܳܟ ܫܳܪܶܐ. ܡܶܢ ܗܰܘ ܕܰܪܓܳܐ ܕܒܶܗ ܩܳܐܶܡ ܐܰܢ̱ܬ܀